IINCWADI, iimuvi nemidlalo yevidiyo, zonke zigcwele abantu abanamandla angaqhelekanga, amagqwirha angabantwana namadala kunye navuselela iinkanuko zokuziphatha ngokwesondo neevampire ezintle. Kutheni zithandwa kangaka ezi zinto?a

Uprofesa kwimicimbi yezentlalo uClaude Fischer uthi: “Kumashumi eminyaka edlulileyo, baye babaninzi kakhulu abantu abakholelwa kwizithunzela eMerika. Xa kuthelekiswa nabantu abadala baseMerika, liye laphindeka kabini inani labantu bakhona abasebatsha abathi bakhe baya kumaxhwele, bayakholelwa kwizithunzela nakwizindlu zeziporho.”

Amabali abantu abanemimoya engcolileyo aphinde axhaphaka ngendlela eyoyikisayo. Umbhali weThe Wall Street Journal, uMichael Calia uthi: “Into ebangela ukuba kuxhaphake abantu abaneedemon kukuba kule minyaka ilishumi idlulileyo kuye kwanda izithunzela, abantu abazenza iingcuka kunye neevampire.”

Enye ingxelo ithi “ehlabathini lonke liye landa kakhulu inani labantu abakholelwa kwiziporho, kwaye kuthethwa kakhulu ngazo kwiincwadi ezininzi ezithandwayo.” Uhlolisiso olwenziwe ngooprofesa kwimicimbi yezentlalo, uChristopher Bader kunye noCarson Mencken baseMerika, “lubonisa ukuba liyothusa inani labantu baseMerika abakholelwa kuhlobo oluthile lwezinto ezenziwa ngamandla angaqhelekanga.”

Ngaba ukuba nento yokwenza nale mimoya ingcolileyo namandla angaqhelekanga kukuzonwabisa nje okungeyongozi?

ABANTU abaninzi abaqinisekanga ngezinto ezinento yokwenza namandla angaqhelekanga kunye nemimoya engcolileyo. Bathi kuqhathwa nje abantu okanye zizinto nje ezikwiimuvi. Kodwa yona iBhayibhile ithetha enye into. Ilumkisa ngokucacileyo ngemimoya engcolileyo. Ngokomzekelo, kwiDuteronomi 18:10-13 ithi: ‘Maze kungafunyanwa namnye kuwe ovumisayo, noqhelisela umlingo, nohlaba izihlabo nokhafulayo, nobopha ngoomabophe, nobuza koneshologu, noyinkunkqele ekuxeleni iziganeko kwangaphambili, nobuzisa kwabafileyo.’ Ngoba? Esi sibhalo siqhubeka sithi: “UYehova uyamcekisa wonke ubani ozenzayo ezi zinto . . . Uze ungqineke ungenasiphoso kuYehova uThixo wakho.”

Kutheni iBhayibhile ingayifuni nje le mimoya ingcolileyo?

IMVELAPHI YAYO

IBhayibhile ithi ngaphambi kokuba kubekho umhlaba, uThixo wadala izidalwa zomoya ezininzi okanye iingelosi. (Yobhi 38:4, 7; ISityhilelo 5:11) Nganye kwezi ngelosi yayinelungelo lokuzikhethela okulungileyo nokubi. Ezinye zazo zakhetha ukungamthobeli uThixo, zagxothwa ezulwini, zaza kubangela iingxaki emhlabeni. Ngenxa yaloo nto, umhlaba ‘wazaliswa lugonyamelo.’​—Genesis 6:2-5, 11; Yude 6.

IBhayibhile ithi ezi ngelosi zingalunganga zilahlekisa izigidi zabantu. (ISityhilelo 12:9) Zide zibangele bafune ukwazi izinto eziza kwenzeka kwixesha elizayo.​—1 Samuweli 28:5, 7; 1 Timoti 4:1.

Ewe kona, amandla angaqhelekanga abonakala ekwazi ukunceda abantu. (2 Korinte 11:14) Kodwa ke eyona nyani yile, iingelosi ezingalunganga zizama ukuphazamisa iingqondo zabantu ukuze bangayazi inyaniso ngoThixo.​—2 Korinte 4:4.

IBhayibhile ibonisa ukuba ukuzidibanisa nemimoya engcolileyo akungomdlalo nje. Yiloo nto abantu ababefuna ukuba ngabafundi bakaYesu bathi bakuva inyaniso ngezi zinto, ‘abo babeqhelisela ubugcisa bomlingo bazizisa ndawonye iincwadi zabo baza bazitshisa,’ nangona zazibiza imali eninzi.​—IZenzo 19:19.

Namhlanje, abantu abaninzi baye bazimisela ukungazidibanisi nakancinci nezinto ezinento yokwenza nemimoya engcolileyo. Ngokomzekelo, xa uMariaa wayeneminyaka eyi-12, wayekwazi ukuchaza ezinye izinto eziza kwenzeka okanye iingozi ezizayo. Wayefundela abantwana afunda nabo amakhadi emilingo ibe ngenxa yokuba izinto awayezichaza zazisenzeka, wayithanda kakhulu imilingo.

UMaria wayecinga ukuba nguThixo omenza akwazi ukunceda abantu. Uthi: “Kodwa ikho into eyayindihlupha. Xa ndifunda amakhadi emilingo, ndandiwafundela abanye. Nangona ndandifuna ukwazi ngam, ndandingakwazi ukuchaza into eza kwenzeka kum.”

Ezibuza imibuzo emininzi engaphendulekiyo, uMaria wathandaza kuThixo. Emva koko wadibana namaNgqina kaYehova, amfundela iBhayibhile. Wafunda eBhayibhileni ukuba ayingoThixo omenza akwazi ukuchaza izinto zexesha elizayo. Waphinda wafunda ukuba ukuze abe ngumhlobo kaThixo ufanele azilahle izinto zemimoya engcolileyo. (1 Korinte 10:21) Wenza ntoni emva koko? Wazilahla zonke iincwadi nezinto zemilingo. Ngoku uchazela abanye ngenyaniso ayifunde eBhayibhileni.

Ekukhuleni kwakhe, uMichael wayekuthanda ukufunda iincwadi zamabali athetha ngabantu abanamandla angaqhelekanga. Uthi: “Ndandikuthanda ukufunda ngeentanga zam ezingamaqhawe athanda ukuya kwiindawo ezingaqhelekanga.” Waya ekuqhela ukufunda iincwadi zemilingo nezinto zobusathana. Uthi: “Umdla endandinawo kwezi zinto wandenza andafunda iincwadi zodwa kodwa ndabukela neemuvi zazo.”

Ukufunda kukaMichael iBhayibhile kwamenza wafuna ukuzihlolisisa izinto azifundayo. Uthi: “Ndaqokelela zonke izinto ezinento yokwenza nemimoya engcolileyo ndaza ndazilahla. Ndafunda into ebalulekileyo. Kweyoku-1 kwabaseKorinte 10:31, iBhayibhile ithi: ‘Zonke izinto zenzeleni uzuko lukaThixo.’ Ngoku ndiyazibuza ukuba, ‘Ngaba le nto ndiyifundayo iyamzukisa uThixo?’ Ukuba ayimzukisi, ndiyayiyeka.”

IBhayibhile ichazwa kakuhle xa kusithiwa sisibane. Yiyo kuphela esikhanyisela ngeyona nto iyiyo imimoya engcolileyo. (INdumiso 119:105) Kodwa ayipheleli nje ekusikhanyiseleni. Isichazela ngethemba elivuyisayo lomhlaba ongenayo imimoya engcolileyo. Le nto iza kubanceda kakhulu abantu. Ngokomzekelo, iNdumiso 37:10, 11 ithi: “Kusele ithutyana, angabikho ongendawo; uya kuyikhangela indawo yakhe, abe engekho. Kodwa abalulamileyo baya kuwudla ilifa umhlaba, baziyolise ngokugqibeleleyo ngobuninzi boxolo.”