IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • ijwyp inqa. 87
  • Ndingenza Ntoni Ukuze Ndilale Ngokwaneleyo?

No video available for this selection.

Sorry, there was an error loading the video.

  • Ndingenza Ntoni Ukuze Ndilale Ngokwaneleyo?
  • Ulutsha Luyabuza
  • Imixholwana
  • Amanqaku Afanayo
  • Kutheni kufuneka ulale?
  • Yintoni ekwenza ungalali?
  • Ungenza ntoni ukuze ulale ngokwaneleyo?
  • Ukulala—Ngaba Kuyimfuneko Okanye Yinkcitha-xesha?
    Vukani!—2003
  • Kubaluleke Kangakanani—Ukulala?
    Vukani!—2011
  • Ukulala Ngokwaneleyo
    Vukani!—2004
  • Ukuphucula Indlela Olala Ngayo
    Vukani!—2003
Khangela Okunye
Ulutsha Luyabuza
ijwyp inqa. 87
Umfana osemtsha ulele eklasini

ULUTSHA LUYABUZA

Ndingenza Ntoni Ukuze Ndilale Ngokwaneleyo?

Xa usohlulwa yimaths esikolweni, usenokucinga ukuba udinga ukuyifunda ngaphezu kokuba ubusenza. Naxa ungenzi kakuhle kwezemidlalo, usenokucinga ukuba udinga ukujima ixesha elide. Kodwa kungenzeka ukuba kuzo zombini ezi meko udinga nje ukulala ngokwaneleyo. Khawufunde oku kulandelayo:

  • Kutheni kufuneka ulale?

  • Yintoni ekwenza ungalali?

  • Ungenza ntoni ukuze ulale ngokwaneleyo?

  • Bathini abantu olingana nabo?

Kutheni kufuneka ulale?

Iingcali zithi abantu abaninzi abasebatsha kufuneka ebusuku balale iiyure eziyi-8 ukuya kweziyi-10. Kutheni kubalulekile ukuba ulale ngokwaneleyo?

  • Ukulala kunceda ingqondo yakho isebenze kakuhle. Ukulala kude kubizwe ngokuba “kukutya kwengqondo.” Kungakunceda wenze kakuhle esikolweni, kwezemidlalo, uze ukwazi ukulungisa iingxaki.

  • Ukulala kuphucula indlela ocinga nozijonga ngayo izinto uze ungabi nochuku. Abantu abangalali ngokwaneleyo bazigqibela bonwabile, bavele bazibone sele bekhathazekile, ibe banengxaki yokungavani nabanye abantu.

  • Ukulala ngokwaneleyo kukunceda uphephe iingozi xa uqhuba. Olunye uphando lubonisa ukuba iingozi ezenzeka xa kuqhuba abantu abaneminyaka eyi-18 ukuya kweyi-24 “kusenokwenza ukuba zibangelwa kukozela,” xa zithelekiswa nabaqhubi abaneminyaka eyi-40 ukuya kweyi-59.

  • Ukulala kukunceda ungaguli kakhulu. Kwenza umzimba ulungise iiseli zawo, inyama yawo, nemithambo yegazi isebenze kakuhle. Kunokukunceda ungabi mkhulu kakhulu, kunciphise namathuba okuba ube neswekile, nestroke.

Umfana osemtsha uvuka edlamkile emva kokuba elele ngokwaneleyo; ifowuni  yakhe iyatshaja ngakwibhedi yakhe

Kanye njengokuba ifowuni kufuneka uyitshaje ukuze isebenze kakuhle, nawe kufuneka ulale ngokwaneleyo ukuze usebenze kakuhle.

Yintoni ekwenza ungalali?

Nangona sesibonile ukuba ukulala ngokwaneleyo kubalulekile, abantu abasebatsha abaninzi abalali ngokwaneleyo. Ngokomzekelo, enye intombi egama linguElaine eneminyaka eyi-16 ithi:

“Xa utitshala wam wasibuza ukuba silala ngabani ixesha, abaninzi eklasini bathi balala pha ngoo-2:00 ekuseni, abaye bathi balala ngoo-5 ekuseni. Mnye qha owathi ulala ngo-9:30 ebusuku.”

Yintoni enokwenza ungalali kakuhle?

Ukuzonwabisa nabahlobo. “Kulula ukungalali xa ndihleli nabahlobo.”​—UPamela.

Izinto ekufuneka uzenze. “Ndiyakuthanda kona ukulala, kodwa andilifumani ixesha ngenxa yokuba zininzi izinto ekufuneka ndizenze.”​—UAna.

Iteknoloji. “Ifowuni yam indenza ndingafuni ukulala. Kuvele kubenzima ukuyiyeka.”​—UAnisa.

Ungenza ntoni ukuze ulale ngokwaneleyo?

  • Khawuzibuze ukuba kubaluleke kangakanani ukulala kuwe. IBhayibhile ithi: “Kubhetele ukuphumla kancinci kunokuziqoba ngomsebenzi onzima nokuleqana nomoya.” (INtshumayeli 4:6) Kunyanzelekile ukuba ulale ngokwaneleyo. Xa ungayenzi loo nto, umsebenzi wakho awuzukuwenza kakuhle, naxa uhleli nabahlobo bakho awuzukonwaba kuba uza kube udiniwe.

  • Yazi eyona nto yenza kube nzima ukuba ulale. Ngaba uhlala nabahlobo bakho kude kube sebusuku? Ngaba unemisebenzi emininzi? Ngaba ifowuni yakho ikwenza ulale kade, okanye iya kuvusa xa ulele?

Cinga ngale nto: Ukuyeka into eyenza kube nzima ukulala kuza kuthatha ixesha, kodwa ungancami. IMizekeliso 21:5 ithi: “Amacebo omntu okhutheleyo aza kumenza aphumelele ngokuqinisekileyo.”

Kakade ke, izinto ezinceda abanye abantu balale ngokwaneleyo zisenokungakuncedi wena. Ngokomzekelo, abanye bathi xa bekhe balala emini balala kamnandi ebusuku. Kodwa abanye xa benze loo nto, baye baphelelwe bubuthongo ebusuku. Yeyiphi indlela ekusebenzelayo wena? Mhlawumbi ezi zinto zingakunceda:

  • Phumla. Ukuba uyaphumla ngaphambi kokuba uyokulala, uza kukhawuleza wozele.

    “Khawuleza ugqibe yonke imisebenzi yasekhaya ukuze ungabi nexhala layo xa ufuna ukulala.”​—UMaria.

  • Lilawule ixesha lakho. Sukuvumela izinto ozenzayo zikwenze ulale ebusuku kodwa zilungiselele ukuze ulale kwangethuba.

    “Ukuze ndibe ndileli ngokwaneleyo, kufuneka ndilale iiyure ezisibhozo. Ngoko ukuba kukho into efuna ndivuke ngaphambi kwexesha endiliqhelileyo, ndiye ndilale ngaphambi kwexesha endiqhele ukulala ngalo.”​—UVincent

  • Lala ngexesha elifanayo yonke imihla. Ukuba umzimba wakho uyawuqeqesha uza kuliqhela ixesha olala novuka ngalo. Noogqirha bacebisa ukuba umntu alale aze avuke ngexesha elifanayo yonke imihla. Khawulizame eli cebiso inyanga nje ibenye uze ubone ukuba alizokukunceda na.

    “Ukuba ulala ngexesha elifanayo yonke imihla, ingqondo yakho iza kusebenza kakuhle kusuku olulandelayo. Le nto iza kukunceda uzenze kakuhle izinto”​—UJared

  • Sukubaxa xa uzonwabisa. IBhayibhile ithi: ‘ungabaxi xa usenza izinto,’ le nto kufuneka siyenze naxa siziphumlele.​—1 Timoti 3:2, 11.

    “Kwafuneka ndiziqhelise ukuziyeka ezinye izinto endandizonwabisa ngazo ebusuku. Xa ndingalibekanga ixesha lokuyeka ukuzonwabisa ndiye ndilale ebusuku kakhulu.”​—URebecca.

  • Yiyeke ilale nefowuni yakho! Zama ngandlela zonke ukuba kwiyure engaphambi kokuba ulale ungayiphathi ifowuni, nokuba urhalela kangakanani ukungena kwi-intanethi okanye ukuthumelela abahlobo bakho imiyalezo. Oogqirha bathi ukucofa ifowuni okanye ukubukela iTV ngaphambi kokuba ulale kunokwenza kube nzima ukulala.

    “Abantu balindele ukuba usoloko ufumaneka. Kodwa ukuze uphumle kakuhle kufuneka uyibeke ifowuni.”​—UJulissa.

Bathini abantu olingana nabo?

UBailey

“Ceba zonke izinto oza kusenza ngosuku uze uzenze ngendlela ozibhale ngayo. Ukuba unexesha oqhele ukulala ngalo, umzimba wakho uza kude uliqhele elo xesha.”​—UBailey.

UKatie

“Ziqhelise ukungena ezingubeni ngexesha elifanayo yonke imihla. Ukulala kuyawuphilisa umzimba ibe kunceda nawe uvuke usemandleni.”​—UKatie.

ULorenzo

“Xa umenywe endaweni, akululanga ukugoduka msinyane kuba usazi ukuba uyavuka kusasa. Kodwa xa uthozamile uyakhula nasenqondweni.”​—ULorenzo.

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share