UkuFa

Ingcaciso: Kukuyeka kwayo yonke imisebenzi yobomi. Emva kokuyeka ukuphefumla, ukubetha kwentliziyo nokusebenza kobuchopho, amandla obomi ngokuthe ngcembe ayayeka ukusebenza kwiiseli zomzimba. Ukufa kusisichasi sobomi.

Ngaba uThixo wamdala umntu ukuba afe?

Ngokwahlukileyo koko, uYehova wamlumkisa uAdam nxamnye nokungathobeli, okwakuya kukhokelela ekufeni. (Gen. 2:17) Kamva, uThixo walumkisa uSirayeli nxamnye nehambo eyayiya kukhokelela kwanasekufeni phambi kwexesha. (Hez. 18:31) Ekuhambeni kwexesha wathumela uNyana wakhe afele uluntu ukuze abo babeya kukholwa kweli lungiselelo babe banganandipha ubomi obungunaphakade.—Yoh. 3:16, 36.

INdumiso 90:10 ithi ubude obuqhelekileyo bobomi bomntu bungama-70 okanye ama-80 eminyaka. Oko kwakunjalo xa uMoses wakubhalayo, kodwa imeko yayingenjalo ekuqalekeni. (Thelekisa iGenesis 5:3-32.) AmaHebhere 9:27 athi, “Abantu bemiselwe ukuba bafe kube kanye.” Kwanoku, kwakunjalo xa kwakubhalwa. Kodwa kwakungenjalo ngaphambi kokuba uThixo agwebe uAdam onesono.

Kutheni sisaluphala size sife?

UYehova wasidala isibini sokuqala esingabantu safezeka, sinethemba lokuphila ngonaphakade. Wasinika ilungelo lokuzikhethela. Ngaba sasiya kumthobela uMdali waso ngenxa yokumthanda nokuxabisa konke awayesenzele kona? Sasinamandla apheleleyo okwenjenjalo. UThixo wayemxelele uAdam wathi: “Ke wona umthi wokwazi okulungileyo nokubi uze ungawudli; kuba mhlana uthe wawudla, uya kufa.” Esebenzisa inyoka njengesithethi, uSathana walukuhlela uEva ekwaphuleni umyalelo kaYehova. UAdam akazange amkhalimele umkakhe kodwa wamthelela ekutyeni kweso siqhamo salelweyo. Enyanisile, uYehova wamgwebela ukufa uAdam, kodwa ngaphambi kokusibulala esi sibini sinesono, uYehova ngenceba wasivumela sizale abantwana.—Gen. 2:17; 3:1-19; 5:3-5; thelekisa iDuteronomi 32:4 neSityhilelo 12:9.

Roma 5:12, 17, 19: “Isono sangena ngamntu mnye [uAdam] ehlabathini, kwangena ke ukufa ngaso isono; kwaza ngokunjalo ukufa kwabatyhutyha abantu bonke, ekubeni bonke bonayo. . . . Ngesiphoso salowo mnye ukufa kwalawula ngalowo mnye . . . Ngokungeva komntu omnye lowo, abaninzi benziwa aboni.”

1 Kor. 15:22: “Kuye uAdam bafa bonke.”

Bona kwanomxholo omkhulu othi “IliShwa.”

Kutheni iintsana zisifa?

INdu. 51:5: “Uyabona, ndizalelwe ebugwenxeni, ndakhawulwa nguma esonweni.” (Bona kwanoYobhi 14:4; iGenesis 8:21.)

Roma 3:23; 6:23: “Kuba bonile bonke, basilela eluzukweni lukaThixo. . . . Umvuzo wesono kukufa.”

UThixo “akabathabathi” abantwana kubazali babo, njengoko bambi beye baxelelwa njalo. Nangona umhlaba uvelisa ukutya okwaneleyo, abantu abazingcayo bezobupolitika norhwebo badla ngokuthintela ukusasazwa kwako kwabo bakuswele ngamandla, nto leyo ephumela ekufeni ngenxa yokungondleki. Bambi abantwana bafa ezingozini, njengokuba kunjalo nakubantu abakhulu. Kodwa sisonke sisizuze ilifa isono; sonke asifezekanga. Sizalelwe kwinkqubo apho wonke ubani—olungileyo kwanokhohlakeleyo, agqibela ngokufa. (INtshu. 9:5) Kodwa uYehova ‘ulangazelela’ ukubuye amanyanise abantwana nabazali babo ngovuko, yaye ilungiselelo lokwenjenjalo sele elenze ngothando.—Yoh. 5:28, 29; Yobhi 14:14, 15; thelekisa uYeremiya 31:15, 16; Marko 5:40-42.

Baphi abafi?

Gen. 3:19: “Uya kudla ukudla kokubila kobuso bakho, ude ubuyele emhlabeni, kuba uthatyathwe kuwo; ngokuba uluthuli, uya kubuyela kwaseluthulini.”

INtshu. 9:10: “Yonke into esiyifumanayo isandla sakho ukuba siyenze, yenze ngamandla akho; ngokuba akukho kwenza, nakucinga, nakwazi, nakulumka kwelabafileyo [kwaneTEV; “engcwabeni,” KJ, Kx; “eSheol,” NW], apho uya khona wena.”

Injani imeko yabafi?

INtshu. 9:5: “Abadla ubomi bayazi ukuba baya kufa; ke bona abafileyo abazi lutho.”

INdu. 146:4: “Uyaphuma umoya wakhe, abuyele yena emhlabeni wakhe; ngaloo mini ayatshitsha amabhongo [“iingcamango,” KJ, “zonke iingcinga zakhe,” NE; “amacebo,” RS, NAB] akhe.”

Yoh. 11:11-14: “ULazaro, umhlobo wethu, ulele; ndiyaya ukuba ndimvuse. . . . Wandula ngoko uYesu wathi kubo ngokungafihlisiyo, ULazaro ufile.” (KwaneNdumiso 13:3)

Ngaba kukho nxalenye ithile yomntu ephilayo xa umzimba usifa?

Hez. 18:4: “Umphefumlo [“umphefumlo,” RS, NE, KJ, Dy, Kx; “umntu,” JB] owonayo, kuya kufa wona.”

Isa. 53:12: “Ewuminyele ekufeni umphefumlo [“umphefumlo,” RS, KJ, Dy; “ubomi,” TEV; “yena buqu,” JB, Kx, NAB] wakhe.” (Thelekisa uMateyu 26:38.)

Bona kwanomxholo omkhulu othi “UmPhefumlo” nothi “UMoya.”

Ngaba abafileyo bayakwazi ukubanceda okanye ukubenzakalisa abaphilayo nangayiphi na indlela?

INtshu. 9:6: “Seluphelile kade uthando lwabo, nentiyo yabo, nekhwele labo; abasenasabelo naphakade ezintweni zonke ezenzekayo phantsi kwelanga.”

Isa. 26:14: “Abafileyo abo abasayi kuba saphila; abangasekhoyo abo abasayi kuba savuka.”

Kuthekani ngeengxelo zokuba kobunye ubomi eziye zenziwa ngabantu abathe bavuseleleka ngemva kokuthiwa babefile?

Ngokuqhelekileyo, akuba umntu eyekile ukuphefumla nentliziyo iyekile ukubetha, kuthabatha imizuzu eliqela ngaphambi kokuqalisa kokuyeka ngokuthe ngcembe kwamandla obomi kwiiseli zomzimba. Ukuba umzimba ufunyenwe yingqele egqithiseleyo, loo nkqubo inokubanjezelwa iiyure eziliqela. Ngesi sizathu, kudla ngokwenzeka ukuvuselela abantu ngokuhlaziya ukubetha kwentliziyo nokuhamba komoya kwimiphunga. Bona bebekwimeko ebizwa ngokuba “kukufa isiqaqa,” kodwa iiseli zabo zomzimba bezisaphila.

Abantu abaninzi abavuselelweyo “ekufeni isiqaqa” abakhumbuli nto. Abanye kuthiwa baba namava okuduka kwengqondo. Bambi bathi babone izinto ezintle; abanye babekhwankqisiwe ngamava abo.

Ngaba ikho ingcaciso engokwezamayeza enokunikelwa ngawo nawaphi na ala mava?

Umhleli wecandelo lezamayeza kwiThe Arizona Republic wabhala oku: “Xa amandla omzimba ehle gqitha, njengaxa udonywe ingqondo, okanye ngenxa yesifo okanye ingozi, ngenxa yoko ukuzilawula komzimba okuzisebenzelayo kuyayekelela. Ngaloo ndlela, iincindi zamadlala zemithambo-luvo ziyaphuma zize ziphalale ngomlinganiselo ongalawulekiyo. Phakathi kwezinye iimbonakaliso, kubakho umphumo oba kukubona izinto ezingekhoyo, ezithi zichazwe emva kokubuyela ezingqondweni, emva kokuba ubani ebefile waza wabuyela ebomini.”—Meyi 28, 1977, iphe. C-1; kwanonondaba wezamayeza ongumJamani weFortschritte der Medizin, No. 41, 1979; Psychology Today, kaJanuwari 1981.

Kodwa ngaba ubungqina babo bathe bavuselelwa abuqinisekiswanga ngabantu ekuye kwavela kubo izihlobo zabo ezifileyo zaza zathetha nabo?

Khawuphinde ufunde izibhalo ezicatshulwe ngaphambilana ezingemeko yabafi. Lisixelela ntoni iLizwi likaThixo eliyinyaniso ngemeko yabafi?

Ngubani ofuna abantu bakholelwe kwenye into? Ngemva kokulumkisa kukaYehova abazali bethu bokuqala ngelithi ukungathobeli kwakuya kuzisa ukufa, ngubani owayiphikisayo loo nto? “Yathi inyoka [eyayisetyenziswa nguSathana; bona ISityhilelo 12:9] kumfazi, Anisayi kufa.” (Gen. 3:4) Kamva, uAdam noEva bathi bafa. Ngoko, ngokusengqiqweni, ngubani owavelisa ingcamango yokuba inxalenye engumoya yomntu ayifi xa kusifa umzimba? Njengoko sesibonile kakade, alithethi ngaloo nto iLizwi likaThixo. Umthetho kaThixo kuSirayeli wakudala wabagweba ‘njengabaziinqambi’ ‘nabangamasikizi’ ababeqhelisela ukuquqela kwabafileyo. (Lev. 19:31; Dut. 18:10-12; Isa. 8:19) Ngaba uThixo oluthando ebeya kulugweba olu qheliselo ukuba abaphilayo bebenxibelelana nje nabathandekayo babo abangasekhoyo? Kwelinye icala, ukuba imimoya eziidemon ibizenza abantu abafayo yaye ilahlekisa uluntu ngokufaka ezingqondweni zabo iingcamango ebeziya kuhambisela phambili ubuxoki, bekungayi kuba luthando na ngoThixo ukukhusela abakhonzi bakhe kwinkohliso enjalo?—Efe. 6:11, 12.

Kutheni amaNgqina kaYehova engenanxaxheba kumasiko esithethe okuzilela abafileyo?

Intlungu ebangelwa kukufa kothandekayo iqhelekile yaye isenokubonakaliswa ngokufanelekileyo

Ngemva kokufa komhlobo wakhe osenyongweni uLazaro, “uYesu walila.” (Yoh. 11:35) Maxa wambi intlungu eviwa ngabakhonzi bakaThixo ngokunxibelelene nofileyo iye yaba yeqatha.—2 Sam. 1:11, 12.

Kodwa ngenxa yethemba lovuko, amaKristu axelelwa oku: “Ke kaloku andithandi ukuba ningazi, bazalwana, mayela nabalele ukufa, ukuze ningabi buhlungu njengabanye abangenathemba bona.”—1 Tes. 4:13.

Abakhonzi bakaYehova abawagatyi onke amasiko anxulumene nabafi

Gen. 50:2, 3: “UYosefu wabawisela umthetho abakhonzi bakhe, amagqirha, ukuba amqhole uyise; . . . Bamzalisela imihla emashumi mane, kuba bebesenjenjalo ukuyizalisa imihla yabaqholiweyo.”

Yoh. 19:40: “Bawuthabatha ke umzimba kaYesu, bawubopha ngezisongelo zelinen, ndawonye nobulawu, njengoko kulisiko lokungcwaba kumaYuda.”

Amasiko angqubanayo neLizwi likaThixo ayaphetshwa ngabo bafuna ukumkholisa

Wambi amasiko ayibhengeza ekuhleni intlungu kabani. Kodwa uYesu wathi: “Xa sukuba ke nizila ukudla [ngenxa yentlungu], maningabi njengabahanahanisi, bona bamatshekileyo; kuba babenza bubi ubuso babo, ukuze babonakale ebantwini ukuba bazilile. Inene ndithi kuni, Bawufincile umvuzo wabo. Ke wena, wakuzila, yithambise intloko yakho, ubuhlambe ubuso bakho, ukuze ungabonakali ebantwini ukuba uzilile, ubonakale kuYihlo osemfihlekweni; aze uYihlo obona emfihlekweni akubuyisele ekuhleni.”—Mat. 6:16-18.

Amasiko athile abonisa inkolelo yokuba umntu unomphefumlo ongafiyo osindayo ekufeni komzimba yaye ke ekuqonda okwenziwa ngabasaphilayo. Kodwa iBhayibhile ithi: “Ke bona abafileyo abazi lutho.” (INtshu. 9:5) Kwakhona, “Umphefumlo owonayo, kuya kufa wona.”—Hez. 18:4.

Amasiko amaninzi azalwa yinkolelo yokuba abafi bafuna uncedo lwabaphilayo okanye luloyiko lokuba basenokwenzakalisa abaphilayo ukuba abaxoliswa. Kodwa iLizwi likaThixo libonisa ukuba abafi abeva ntlungu nalonwabo. “Uyaphuma umoya wakhe, abuyele yena emhlabeni wakhe; ngaloo mini ayatshitsha amabhongo akhe.” (INdu. 146:4; bona kwaneyesi-2 kaSamuweli 12:22, 23.) “Seluphelile kade uthando lwabo, nentiyo yabo, nekhwele labo; abasenasabelo naphakade ezintweni zonke ezenzekayo phantsi kwelanga.”—INtshu. 9:6.

Ukuba Ubani Uthi—

‘Kukuthanda kukaThixo’

Usenokuphendula uthi: ‘Loo nkolelo iqheleke gqitha. Kodwa ndikufumanise kuluncedo ukuphengulula okuthethwa nguThixo ngokwakhe ngalo mcimbi.’ Mhlawumbi usenokongeza uthi: (1) ‘(Funda iGenesis 2:17.) Ukuba uyise ulumkisa unyana wakhe ngelithi ukwenza into ethile kuya kumbangela afe, ngaba ubuya kuthi loo bawo ufuna unyana wakhe ayenze loo nto?’ (2) ‘Ngoko kuyintoni ngokwenene ukuthanda kukaThixo ngoluntu? UYesu wathi: “Kuko ke oku ukuthanda kowandithumayo, ukuthi babe nobomi obungunaphakade bonke abambonayo uNyana [oko kukuthi, abaqiqayo baze bavume ukuba uYesu okunene unguNyana kaThixo], bakholwe kuye; ndandiya kubavusa mna ngomhla wokugqibela.” (Yoh. 6:40)’

‘Abantu baza kusoloko besifa’

Usenokuphendula uthi: ‘Ngokuqinisekileyo yiloo nto ethe yenzeka ebantwini kude kube ngumhla wethu, andibi kunjalo?’ Mhlawumbi usenokongeza uthi: ‘Kodwa phawula eli dinga limangalisayo lenziwa nguThixo kwiSityhilelo 21:3, 4 (okanye uIsaya 25:8).’

‘Kufika lakuphela ixesha lakho’

Usenokuphendula uthi: ‘Abantu abaninzi bavakalelwa ngaloo ndlela nabo. Ubusazi na ukuba uninzi lwamaGrike akudala lwalukwanaloo mbono? Lwalukholelwa ukuba kwakukho oothixokazi abathathu ababemisela ubude bobomi obuya kuba bobomntu ngamnye. Kodwa iBhayibhile inikela imbono eyahluke kwaphela ngobomi.’ Mhlawumbi usenokongeza uthi: (1) ‘(Funda INtshumayeli 9:11.) Umzekelo: Iqhekeza lekhonkile lisenokwaphuka esakhiweni lize liwe phezu kohamba ngendlela. Ngaba nguThixo okubangeleyo oko? Ukuba kunjalo, ngaba kusesikweni ukubek’ ityala umnini wesakhiwo ngokungakhathali? . . . Njengoko iBhayibhile isitsho, ohamba ngendlela wehlelwa nje sisihlo esingacetywanga nesingabonwanga kusengaphambili ukuba abe ebelapho ngexesha lokuwa kwekhonkile.’ (2) ‘IBhayibhile isixelela ukuba ukuba siyayiphepha ihambo embi silondoloza ubomi bethu. (IMize. 16:17) Ukuba ungumzali, ndiqinisekile ukuba uyawusebenzisa loo mgaqo ebantwaneni bakho. Uyabalumkisa ngezinto ebezingaphumela ekuphulukaneni nobomi. UYehova wenza kwaloo nto kulo lonke uluntu namhlanje.’ (3) ‘UYehova uyakwazi okufunjethwe likamva. NgeBhayibhile usixelela indlela esinokubunandipha ngayo ubomi obude ngakumbi kunobabantu abagatya akuthethayo. (Yoh. 17:3; IMize. 12:28)’ (Bona kwanomxholo omkhulu othi “IliShwa.”)