Abanye abantu bakufumanisa kunzima ukuthanda uThixo. Kubo uThixo akaqondakali, ukude ebantwini yaye ukhohlakele. Yiva nje ukuba abanye bathini:

• “Nangona ndandithandaza kuThixo ndicela uncedo, wayengathi ukude kum. Ndandicinga ukuba akanazimvakalelo.”—UMarco waseItali.

• “Nangona ndandifuna ngokunyanisekileyo ukukhonza uThixo, wayengathi akafikeleleki. Ndandicinga ukuba unguThixo ongqwabalala nothanda nje ukohlwaya abantu. Ndandingayikholelwa into yokuba unobubele.”—URosa waseGuatemala.

• “Ndisengumntwana, ndandikholelwa ukuba uThixo usoloko ekhangela iimpazamo zethu kuba nje efuna ukusohlwaya. Ekuhambeni kwexesha, ndambona njengomntu ongenakufikeleleka. UThixo wayefana nomongameli ongenamdla kubantu abalawulayo.”—URaymonde waseKhanada.

Ucinga ntoni wena? Ngaba sinokukwazi ukumthanda uThixo? Kangangexesha elide amaKristu ebesoloko enalo mbuzo. Enyanisweni, kunyaka ka-500 ukusa malunga noka-1500, abantu abaninzi ababezibiza ngokuba ngamaKristu babengathandazi kwaukuthandaza kuThixo uSomandla. Ngoba? Babengcangcazela luloyiko xa becinga ngaye. Umbhali-mbali uWill Durant uthi: “Ebenokuthini umoni ukuthandaza kuThixo owoyikeka nokude kangaka ebantwini?”

Kwenzeke njani ukuba uThixo abonakale ‘njengowoyikekayo nokude ebantwini’? Ifundisa ntoni iBhayibhile ngoThixo? Ngaba ukufunda inyaniso ngoThixo kungakunceda umthande?

OKO KUKHOLELWA NGABANTU ABANINZI

“Asikavumelani enoba uThixo unalo igama, yaye ukuba unalo, lithini.”—UNjingalwazi, uDavid Cunningham, Theological Studies.

INYANISO ESEBHAYIBHILENI

UThixo wathi: “NdinguYehova. Lilo elo igama lam.” (Isaya 42:8) Igama elithi Yehova ligama lesiHebhere elithetha ukuthi “Ubangela Kubekho.”—Funda INguqulelo Yehlabathi Elitsha, i-Appendix 1, isiqendu 1.

UYehova ufuna silisebenzise igama lakhe. IBhayibhile ithi: “Bizani egameni lakhe. Zaziseni phakathi kwezizwana izenzo zakhe. Likhankanyeni igama lakhe ukuba libekwe phezulu.”—Isaya 12:4.

UYesu walisebenzisa igama likaThixo. Xa wayethandaza uYesu wathi: “Ndilazisile igama lakho kubo [kubafundi bakaYesu] yaye ndiza kulazisa.” Kwakutheni ukuze uYesu alazise igama likaThixo kubafundi bakhe? Uthi: “Ukuze uthando owandithanda ngalo [Thixo] lube kubo ndize nam ndimanyane nabo.”—Yohane 17:26.

KUTHENI UMELE UBE NOMDLA?

Umfundisi uWalter Lowrie wathi: “Umntu ongalaziyo igama likaThixo akamazi ibe akanakumthanda xa ecinga ukuba ungamandla nje.”

Indoda egama linguVictor yayisiya rhoqo ecaweni, kodwa yayingamazi uThixo. Ithi: “Ndafunda ukuba igama likaThixo nguYehova, yaba ngathi ndiyaqala ukwaziswa kuye. Ndandivakalelwa kukuba ndide ndamazi Lo mntu bendisoloko ndisiva ngaye. Waba nguMntu wokwenene kum ndaza ndafuna ukuba ngumhlobo wakhe.”

UYehova uyasondela ebantwini abasebenzisa igama lakhe. UThixo uthembisa abo “bacinga ngegama lakhe” esithi: “Ndiza kubabonisa imfesane, kanye njengomntu obonisa imfesane kunyana wakhe omkhonzayo.” (Malaki 3:16, 17) UThixo uyabavuza abo balisebenzisayo igama lakhe. IBhayibhile ithi: “Wonk’ ubani obiza egameni likaYehova uya kusindiswa.”—Roma 10:13.

OKO KUKHOLELWA NGABANTU ABANINZI

Iicawa ezintathu zobuKristu ezaziwa kakhulu, “amaRoma Katolika, amaOthodoki aseMpuma kunye namaProtestanti zithi kukho uThixo oneziqu ezithathu: uThixo uYise, uThixo uNyana noThixo Umoya Oyingcwele. Ngokutsho kwemfundiso yobuKristu, apha akuthethwa ngoothixo abathathu, kodwa ngothixo omnye oneziqu ezithathu.”—IThe New Encyclopædia Britannica.

INYANISO ESEBHAYIBHILENI

UYesu, uNyana kaThixo, akazange athi uyalingana okanye ukwimo enye noYise. Kunoko wathi: ‘Ndiyemka ndiya kuBawo, kuba uBawo mkhulu kunam.’ (Yohane 14:28) Wathi komnye wabafundi bakhe: “Ndinyukela kuBawo noYihlo nakuThixo wam noThixo wenu.”—Yohane 20:17.

Umoya oyingcwele asingomntu. AmaKristu okuqala ‘azaliswa ngumoya oyingcwele,’ noYehova wathi: “Ndiya kuthululela inxalenye yomoya wam phezu kwalo lonke uhlobo lwenyama.” (IZenzo 2:1-4, 17) Umoya oyingcwele awuyonxalenye yoThixo Oneziqu Ezithathu kodwa ungamandla kaThixo asebenzayo.

KUTHENI UMELE UBE NOMDLA?

Abaphandi abangamaKatolika, uKarl Rahner noHerbert Vorgrimler bathi xa becacisa uThixo Oneziqu Ezithathu: “Akakho umntu onokumazi uThixo engatyhilelwanga, naxa sele etyhilelwe akanakumazi ngokupheleleyo.” Ngaba unokuthanda umntu ongenakwaziwa okanye ongaqondakaliyo? Ngoko ke, imfundiso yoThixo Oneziqu Ezithathu ibangela ukuba uThixo angaziwa okanye angathandeki.

Yimfundiso kaThixo Oneziqu Ezithathu eyabangela ukuba uMarco ekuthethwe ngaye kwinqaku elingaphambili angamazi uThixo. Uthi: “Ndandicinga ukuba uThixo uyazifihla kum yaye loo nto yamenza wakude nangakumbi, akaqondakala yaye akafikeleleka.” Kodwa ke, “uThixo akangoThixo wezinto ezingaqondakaliyo.” (1 Korinte 14:33, iAmerican Standard Version) UThixo akazifihlanga kuthi, kunoko ufuna simazi. UYesu wathi: “Sinqula esikwaziyo.”—Yohane 4:22.

UMarco uthi: “Xa ndafunda ukuba uThixo akayonxalenye yoThixo Oneziqu Ezithathu, ndatsho ndakwazi ukuba ngumhlobo wakhe.” Ukuba uYehova simbona njengoMntu wokwenene kunomntu nje ongaqondakaliyo, kuya kuba lula ukumthanda. IBhayibhile ithi: “Lowo ungenaluthando akamazi uThixo, kuba uThixo uluthando.”—1 Yohane 4:8.

OKO KUKHOLELWA NGABANTU ABANINZI

“Imiphefumlo yaboni iya esihogweni bakufa, apho igwetyelwa ‘ukutsha ngonaphakade.’” (ICatechism of the Catholic Church) Ezinye iinkokeli zonqulo zithi abo basesihogweni bohlukaniswe ngokupheleleyo noThixo.

INYANISO ESEBHAYIBHILENI

“Umphefumlo owonayo—kuya kufa wona.” (Hezekile 18:4) Abafileyo “abazi nto konke konke.” (INtshumayeli 9:5) Ukuba umphefumlo uyafa yaye awazi nto konke konke, kwenzeka njani ukuba ‘utshe ngonaphakade’ okanye ube sentlungwini yokwahlukaniswa noThixo?

EBhayibhileni, amagama esiHebhere nesiGrike aguqulelwe ngokuthi “isihogo,” abhekisela kwingcwaba eliqhelekileyo. Ngokomzekelo, xa uYobhi wayegula kakhulu, wathandaza wathi: “Akwaba ubunokundifihla engcwabeni [“esihogweni,” ngokweDouay-Rheims Version].” (Yobhi 14:13, iHoly Bible—Easy-to-Read Version) UYobhi wayefuna ukuphumla, kungekhona kwindawo yokuthuthunjiswa okanye apho ahlukaniswe khona noThixo, kunoko engcwabeni.

KUTHENI UMELE UBE NOMDLA?

Ukukhohlakala akusenzi sifune ukumthanda uThixo; kunoko kuyasibhebhetha kuye. URocío ohlala eMexico uthi: “Ndafundiswa ngesihogo ndiselusana. Ndandingcangcazela luloyiko kangangokuba ndandingacingi ukuba uThixo anganeempawu ezintle. Ndandicinga ukuba unomsindo yaye akaxoleli.”

Oko kuthethwa yiBhayibhile ngemigwebo kaThixo nemeko yabafi yamenza uRocío wayitshintsha indlela amjonga ngayo uThixo. Uthi: “Ndaziva ndikhululekile—kwaba ngathi kususwe umthwalo onzima ebendinawo. Ndaqiniseka ukuba uThixo ufuna sonwabe, uyasithanda, nam ndinokumthanda. Ufana notata obabamba ngesandla abantwana bakhe nofuna bonwabe.”—Isaya 41:13.

Abantu abaninzi baye bazimisela ukukhonza kuba nje besoyika isihogo, kodwa uThixo akafuni umkhonze kuba umoyika. Kunoko, uYesu wathi: “Uze umthande uYehova uThixo wakho.” (Marko 12:29, 30) Ngaphezu koko, ukuba siyaqonda ukuba uThixo usebenzisa okusesikweni, sinokumthemba ukuba uya kugweba ngokusesikweni nakwixesha elizayo. Njengomhlobo kaYobhi uElihu, ngelunda sinokuthi: “Makube lee kuThixo oyinyaniso ukwenza ngobungendawo, nakuSomandla ukwenza ngokungekho sikweni.”—Yobhi 34:10.

Ngenye imini eYerusalem uYesu wayethetha ngoYise, uYehova, yaye ebhenca iinkokeli zonqulo lobuxoki zemihla yakhe. (Yohane 8:12-30) Oko wakuthethayo ngeso sihlandlo kusifundisa indlela yokuhlolisisa iinkolelo ezithandwayo ngoThixo kwimihla yethu. UYesu wathi: “Ukuba nithe nahlala kulo izwi lam, ngokwenene ningabafundi bam, niya kuyazi inyaniso, yaye inyaniso iya kunikhulula.”—Yohane 8:31, 32.

‘Hlala kulo izwi lam.’ Apha uYesu usibonisa indlela esinokwazi ngayo enoba iimfundiso zonqulo ‘ziyinyaniso’ na. Xa usiva kuthethwa ngoThixo, zibuze, ‘Ngaba oku kuyavisisana namazwi kaYesu kunye nazo zonke iZibhalo Ezingcwele?’ Xelisa umzekelo wabo beva umpostile uPawulos ethetha baza ‘bazincina ngenyameko iZibhalo mihla le mayela nokuba zinjalo kusini na ezo zinto [ababezifunda].’—IZenzo 17:11.

UMarco, URosa, noRaymonde, ekuthethwe ngabo kwinqaku lokuqala bahlolisisa iinkolelo zabo ngokufunda iBhayibhile namaNgqina kaYehova. Bafunda ntoni?

UMarco: “INgqina elalisifundisa iBhayibhile laphendula yonke imibuzo esasinayo nomkam ngeZibhalo. Saya simthanda ngakumbi nangakumbi uYehova, satsho sathandana nangakumbi nomkam!”

URosa: “Ekuqaleni, ndandicinga ukuba iBhayibhile yincwadi ebhalwe ngabantu esichazela ukuba inokuba unjani uThixo. Ndaya ndizifumana iimpendulo zeBhayibhile kwimibuzo endandinayo. Ngoku, uYehova ngumntu wokwenene kum. NguMntu endinokumthemba.”

URaymonde: “Ndathandaza kuThixo ndicela andincede ndimazi. Kungekudala emva koko, mna nomyeni wam saqalisa ukufunda iBhayibhile. Ekugqibeleni, safunda inyaniso ngoYehova! Asinawo amazwi okuchaza indlela esavuya ngayo sakuva uhlobo loThixo alulo.”

IBhayibhile ayibhenci nje kuphela ubuxoki ngoThixo; kodwa ikwachaza neempawu zakhe ezintle. IliLizwi lakhe eliphefumlelweyo yaye isinceda “sizazi izinto esizinikwe ngobubele nguThixo.” (1 Korinte 2:12) Kutheni ungazifundeli indlela iBhayibhile eyiphendula ngayo imibuzo eqhele ukubuzwa nebalulekileyo ngoThixo, injongo yakhe nekamva lethu? Funda iimpendulo zeminye yale mibuzo kwindawo ethi “Iimfundiso ZeBhayibhile > Imibuzo YeBhayibhile Iyaphendulwa” kwiwebhsayithi ethi www.pr2711.com/xh. Unokuzicelela nesifundo seBhayibhile kwakule Webhsayithi okanye kwiNgqina likaYehova. Siqinisekile xa usenjenjalo, uyakufumanisa kulula ukuthanda uThixo kunokuba wawucinga.