IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • Ithemba—Ngaba Ngokwenene Lenza Umahluko?
    Vukani!—2004 | Meyi 8
    • Ithemba—Ngaba Ngokwenene Lenza Umahluko?

      UDANIEL wayeneminyaka elishumi kuphela ubudala, kodwa wayesele enethuba elingangonyaka elwisana nesifo somhlaza. Oogqirha nabahlobo bakhe babesele bephelelwe lithemba. Kodwa uDaniel wayengavumi ukunikezela. Wayekholelwa ukuba uza kukhula abe yingcali yophando aze ngeny’ imini ancedise ekufumaneni iyeza lomhlaza. Eyona nto yayimenza abe nethemba yayikukuza kogqirha owayenyanga uhlobo lomhlaza awayenalo. Noko ke, lwafika olo suku kodwa ngenxa yemozulu embi kwanyanzeleka ukuba ugqirha aluhlehlise uhambo lwakhe. UDaniel waphelelwa lithemba. Okwesihlandlo sokuqala, waphelelwa ngumdla kwinto yonke. Kwadlula iintsuku nje ezimbalwa wafa.

      Ibali likaDaniel labaliswa ngumsebenzi wezonyango owayesenza uphando ngendlela impilo yomntu echaphazeleka ngayo kukuba nethemba nokungabi nalo. Kusenokwenzeka ukuba wakha waweva amabali afana neli. Ngokomzekelo, masithi umntu osele ekhulile ugulel’ ufa kodwa kukho isiganeko esithile esibalulekileyo ebomini bakhe asilindeleyo—mhlawumbi utyelelo lomntu amthandayo okanye isikhumbuzo esithile. Kamsinya nje emva kokuba sidlulile eso siganeko, usutywa kukufa. Ibangelwa yintoni loo nto? Ngaba ngokwenene ithemba linendima eliyidlalayo njengoko abaninzi becinga njalo?

      Abaphandi abaninzi bakholelwa ukuba ithemba nesimo sengqondo esifanelekileyo linempembelelo enkulu ebomini nakwimpilo yomntu. Kodwa asingabo bonke abaphandi abanaloo mbono. Bambi bathi obo bubuvuvu nje babantu obungasekelwanga kwinzululwazi. Bakholelwa ukuba ukugula akunanto yakwenza nendlela esivakalelwa ngayo.

      Kakade ke, amathandabuzo ngokuphathelele ukubaluleka kwethemba akaqali ngoku. Kumawaka eminyaka eyadlulayo, xa kwathiwa isithandi sobulumko esingumGrike uAristotle masichaze intsingiselo yegama elithi ithemba, saphendula sathi: “Kukuphupha emini.” Yaye kutshanje, isithethi sikarhulumente waseMerika uBenjamin Franklin sathi: “Umntu oxhomekeke kwithemba uya kufa esong’ izandla.”

      Ngoko yiyiphi inyaniso ngethemba? Ngaba ukuba nethemba kusoloko ikukuzikhohlisa, indlela nje abantu abazithuthuzela ngayo? Okanye ngaba sikho isizathu esibambekayo sokukholelwa kumandla ethemba—njengento ebalulekileyo kuthi sonke ukuze sihlale sisempilweni yaye sonwabile, into enesiseko neengenelo zokwenene?

  • Kutheni Sifanele Sibe Nethemba?
    Vukani!—2004 | Meyi 8
    • Kutheni Sifanele Sibe Nethemba?

      UKUBA uDaniel, ixhoba lomhlaza elikhankanywe kwinqaku lokuqala wayengazange aphelelwe lithemba, kwakuza kwenzeka ntoni kuye? Ngaba wayeza kuphumelela ekulweni nomhlaza? Ngaba ubeya kube esaphila namhlanje? Nabona bantu bayimeleyo ingcamango yokuba ithemba linamandla bebengayi kukwazi ukuyiphendula le mibuzo. Nantso ke eyona ngongoma ibalulekileyo ngalo mbandela. Akafanelanga abaxwe amandla ethemba. Alingozifo-zonke.

      Kudliwano-ndlebe neCBS News, uGqr. Nathan Cherney walumkisa ngengozi yokubaxa amandla ethemba kubantu abagulel’ ukufa, wathi: “Kuye kwakho iimeko apho abayeni baye bagxeka kabukhali abafazi babo besithi abanathemba ngokwaneleyo yaye abanasimo sengqondo sifanelekileyo.” UGqr. Cherney wongeza ngelithi: “Oku kuye kwabangela abantu banengcamango ephosakeleyo yokuba xa umntu enesimo sengqondo esifanelekileyo unako ukulwa nomhlaza, yaye xa esoyisakala, abantu bacinga ukuba akakhange azame ngokwaneleyo, kodwa le ngcamango ayikho ngqiqweni.”

      Enyanisweni, abantu abanezifo ezinganyangekiyo bakumlo onzima. Ngokuqinisekileyo, abantu ababathandayo abafuni kongeza umthwalo wabo ngokubenza bazive benetyala. Ngoko, ngaba sifanele sigqibe kwelokuba alibalulekanga ithemba?

      Akunjalo. Ngokomzekelo, lo gqirha unceda abantu abagulayo bakwazi ukujamelana nentlungu abakuyo—oko kukuthi akanyangi izifo abanazo okanye azame ukusindisa ubomi babo, kodwa uzama ukuba bonwabe ngoxa besaphila. Oogqirha abanjengaye bakholelwa ukuba kungakhathaliseki enoba umntu ugulel’ ukufa, ufanele onwabe. Kukho ubungqina obuninzi bokuba ithemba linokumenza onwabe umntu—kanti linokwenza nokungakumbi kunoko.

      Ukubaluleka Kwethemba

      “Ithemba lunyango olunamandla,” utsho njalo umcholacholi weendaba zonyango uGqr. W. Gifford-Jones. Wahlolisisa iingxelo ezininzi zophando ngokubaluleka kwenkxaso kubantu abanezifo ezinganyangekiyo. Kuqikelelwa ukuba inkxaso inceda abantu bahlale benethemba nesimo sengqondo esifanelekileyo. Olunye uhlolisiso olwenziwa ngowe-1989 lwadiza ukuba abantu abagulayo abafumana inkxaso baphila ubomi obude, ukanti uhlolisiso olwenziwe kutshanje alukhange lube nabungqina bungako buxhasa eli bango. Noko ke, uphando luye lwabonisa ukuba abantu abagulayo abafumana inkxaso abaxinezelekanga kangako yaye bayakwazi ukumelana neentlungu kunabantu abangafumani nkxaso.

      Khawucingisise ngolunye uhlolisiso oluye lwenziwa ngenjongo yokubona indlela ithemba nokuphelelwa lithemba okubachaphazela ngayo abantu abanesifo sentliziyo. Kwenziwa uhlolisiso kumadoda angaphezu kwe-1 300 ukuze kubonwe enoba anethemba okanye akanalo kusini na. Uhlolisiso olwenziwa kwiminyaka elishumi kamva, lwadiza ukuba kuloo madoda, angaphezu kwe-12 ekhulwini anesifo sentliziyo. Kwelo nani, indoda e-1 kwama-2 yayinethemba. ULaura Kubzansky, usekela-njingalwazi wezempilo nezentlalo kwiHarvard School of Public Health uthi: “Ubungqina obuninzi bokuba ‘isimo sengqondo esifanelekileyo’ siluncedo kwimpilo kabani bebusoloko busekelwe kuphando olungenakuthanani nenzululwazi—kodwa olu hlolisiso luze nobungqina obunokuthenjwa kwezempilo bokuba ithemba liyabanceda abantu abanesifo sentliziyo.”

      Kolunye uhlolisiso kwafunyaniswa ukuba abantu abazibona benempilo enkenenkene bathabath’ ixesha ukuchacha emva kotyando kunabantu abazigqala besempilweni. Kukwathiwa ukuphila ubomi ubude kunento yokwenza nethemba. Kolunye uhlolisiso kwenziwa uphando ngendlela ukuba nesimo sengqondo esihle okanye esibi ngokwaluphala ekubachaphazela ngayo abantu abakhulileyo. Kwafunyaniswa ukuba emva kokudlala imidlalo ebonisa ukuba ukukhula kwenza ubani abe nobulumko namava, baba nodlamko. Enyanisweni, babedlamke okomntu obelolonga umzimba kangangeeveki ezili-12!

      Yintoni ebangela ukuba ithemba nesimo sengqondo esifanelekileyo zibe luncedo empilweni? Mhlawumbi izazinzulu noogqirha azikabi nalwazi lwaneleyo ngendlela ingqondo nomzimba womntu osebenza ngayo yaye azinako ukuwuphendula ngokuchanileyo lo mbuzo. Sekunjalo, iingcali ezenza uphando ngalo mbandela zinokuyithelekelela bhetele impendulo. Ngokomzekelo, enye ingcali ngokusebenza kwemithambo-luvo yathi: “Yintw’ entle ukuvuya nokuba nethemba. Ezi zinto zehlisa uxinezeleko yaye zenza umzimba ukhululeke. Zezinye zezinto abantu abanokuzihlakulela ukuze bahlale besempilweni.”

      Le ngcamango isenokubonakala intsha kwabanye oogqirha, iingcali ngokusebenza kwengqondo nezazinzulu, kodwa iqhelekile kubafundi beBhayibhile. Malunga neminyaka engama-3 000 eyadlulayo, uKumkani uSolomon owayesisilumko waphefumlelwa ukuba abhale le ngcamango: “Intliziyo evuyayo iyaphilisa, kodwa umoya oxhwalekileyo womisa amathambo.” (IMizekeliso 17:22) Phawula ulungelelwano olu kule ndinyana. Ayithi intliziyo evuyayo iphilisa zonke izifo, kodwa ithi “iyaphilisa.”

      Eneneni, bekuya kuba kuhle ukubuza, Ukuba ithemba ibiliyeza, nguwuphi ugqirha obengayi kulincomela? Ngapha koko, ithemba liyanceda nakwezinye izinto ngaphandle kwempilo.

      Indlela Ithemba Nokuphelelwa Lithemba Ekubuchaphazela Ngayo Ubomi Bakho

      Abaphandi bafumanise ukuba abantu abanesimo sengqondo esihle bayangenelwa ngeendlela ezininzi. Badla ngokuqhuba kakuhle esikolweni, emsebenzini nakwezemidlalo. Ngokomzekelo, kwenziwa uphando kwiqela lamabhinqa abandakanyeke kwezemidlalo. Abaqeqeshi bachaza ubuchule bokudlala bala mabhinqa. Kwangaxeshanye, la mabhinqa ahlolwa, kukhangelwa ukuba anaso kusini na isimo sengqondo esihle. Iziphumo zabonisa ukuba eyona nto igqiba ngendlela abaza kudlala ngayo aba badlali, lithemba abanalo kungekhona ingxelo yabaqeqeshi. Yintoni ebangela ithemba libe nempembelelo enamandla ngolu hlobo?

      Kuye kwafundwa okuninzi ngokuphelelwa lithemba. Kwiminyaka yee-1960, kwenziwa uhlolisiso kwizilwanyana yaye abaphandi bamangaliswa kukufumanisa ukuba “ukuphelelwa lithemba” kubangelwa ziimeko. Bafumanisa ukuba oku kuyenzeka nasebantwini. Ngokomzekelo, abantu ekwakusenziwa kubo uhlolisiso bafakwa kwindawo enengxolo enganyamezelekiyo baza baxelelwa ukuba banokuyiphelisa loo ngxolo ngokucofa amaqhosha athile ngokulandelelana kwawo. Bakwazi ukuyiphelisa loo ngxolo.

      Iqela lesibini laxelelwa into efanayo—kodwa ukucofa amaqhosha akuzange kuncede nganto. Kanye njengokuba unokuthelekelela, abanye kwelo qela baphelelwa lithemba. Kuhlolisiso olwenziwa kamva, babengafuni kwaukuzama. Babeqinisekile ukuba imizamo yabo ayinakwenza mahluko. Kodwa nakwelo qela lesibini, babekho ababengafuni kunikezela.

      UGqr. Martin Seligman, owaba ngomnye wabantu bokuqala ukuvelisa ezi ndlela zophando, wakwenza umsebenzi wakhe ukuphanda ngamandla ethemba nokungabi nathemba. Wagxininisa kwindlela abacinga ngayo abantu abangenathemba. Wagqiba ngelithi, ukungabi nathemba kubangela ukuba abantu baphelelwe ngamandla okwenza izinto okanye bangafuni kwaukuzama. Ethetha ngokungabi nathemba nendlela oku okumchaphazela ngayo umntu, lo kaSeligman uthi: “Uhlolisiso endiye ndalwenza kangangeminyaka engama-25 lundenze ndaqonda ukuba ukusoloko sikholelwa ukuba sambethwe ngamashwa kuyenza ibetheleleke ezingqondweni zethu loo nto kuze kusenze singabi namandla okwenza nantoni na yaye kubangela ukuba sihlelwe zizinto ezibuhlungu kunabantu abanethemba ebomini.”

      Kwakhona, loo ngcamango inokuvakala intsha kwabanye abantu namhlanje kodwa iqhelekile kubafundi beBhayibhile. Yiva lo mzekeliso: “Ngaba uzibonakalise udimazekile ngomhla wokubandezeleka? Uya kuphelelwa ngamandla.” (IMizekeliso 24:10) Ewe, iBhayibhile itsho ngokucacileyo ukuba ukuphoxeka nokuba nesimo sengqondo esitenxileyo, kumenza aphelelwe ngamandla umntu. Yintoni ke onokuyenza ukuze ulwe nokuphelelwa lithemba uze ube nesimo sengqondo esihle?

      [Umfanekiso okwiphepha 12, 13]

      Ithemba linokuba luncedo kakhulu

  • Unokulwa Nokuphelelwa Lithemba
    Vukani!—2004 | Meyi 8
    • Unokulwa Nokuphelelwa Lithemba

      UBUJONGA njani ubunzima ojamelana nabo? Ngoku, iingcali ezininzi zikholelwa ukuba impendulo yalo mbuzo ibonisa ukuba ungumntu onesimo sengqondo esifanelekileyo okanye ophelelwe lithemba kusini na. Sonke sijamelana nobunzima obahlukahlukeneyo ebomini, abanye batsala nzima ngakumbi kunabanye. Noko ke, yintoni eyenza ukuba abanye abantu banganikezeli, basoloko bekulungele ukuxoza mphini wumbi ngoxa abanye benikezela nokuba baye bajamelana nobunzima obungephi?

      Ngokomzekelo, yiba nomfanekiso ngqondweni wakho ufuna umsebenzi. Uya kudliwano-ndlebe uze uxelelwe ukuba akuwufumananga umsebenzi. Uziva njani emva koko? Usenokuziva ukhathazekile ucinge ukuba kukho ingxaki ngawe de uthi ‘Akukho mntu oya kuze aqeshe umntu ofana nam. Andinakuze ndiwufumane umsebenzi.’ Okanye ukungawufumani umsebenzi kunokubangela ukuba ube nembono egqwethekileyo ngazo zonke izinto ebomini bakho, uthi, ‘Akukho nto ndikhe ndiyenze iphumelele. Andiloncedo mntwini.’ Kwimeko nganye, ukucinga ngolo hlobo kubonisa ukuba uphelelwe lithemba.

      Ukulwa Nokuphelelwa Lithemba

      Unokulwa njani nokuphelelwa lithemba? Inyathelo lokuqala elibalulekileyo kukuba wazi xa uphelelwa lithemba. Inyathelo lesibini kukulwa naloo meko. Khangela izizathu ezinokubangela ube kwimeko okuyo. Ngokomzekelo, ngaba yinyaniso ukuba akukhange uqeshwe kuba kungekho mntu ufuna ukukuqesha? Okanye ngaba kunokwenzeka ukuba umqeshi ebefuna umntu onobuchule obuthile?

      Xa sele uzivelele zonke iinkalo, uya kubona ukuba ukulahl’ ithemba kukuzibaxa izinto. Ngaba ukungawufumani umsebenzi isihlandlo sokuqala kuthetha ukuba akunto yanto, okanye ngaba ungacinga ngezinye iinkalo zobomi bakho owenza kakuhle kuzo—njengosukelo lwakho lokomoya, ulwalamano lwakho nentsapho okanye nabahlobo bakho? Yahlukana nokujonga yonk’ into ebomini bakho njengophawu lokuba “wambethwe ngamashwa.” Enyanisweni, ngaba ngokwenene unokuqiniseka ukuba akunakuze uwufumane umsebenzi? Zininzi izinto onokuzenza ukuze uhlakulele isimo sengqondo esifanelekileyo.

      Isimo Sengqondo Esifanelekileyo

      Kwiminyaka yakutshanje, abaphengululi baye bachaza ithemba ngendlela emfutshane ebangel’ umdla. Bathi ithemba libandakanya inkolelo yokuba unako ukulufikelela usukelo ozibekele lona. Njengoko inqaku elilandelayo liza kubonisa, ithemba libandakanya okungakumbi kunoko, kodwa le nkcazelo iluncedo ngeendlela ezininzi. Ukunikel’ ingqalelo kolu hlobo lwethemba kunokusinceda sihlakulele isimo sengqondo esifanelekileyo.

      Ukuze sikwazi ukuphumeza izinto esizicebileyo, sifanele sibe nobuchule bokuzibekela usukelo size sizame ukulufikelela. Ukuba akungomntu odla ngokuzibekela usukelo, kufuneka ucinge nzulu ngezinto ofuna ukuziphumeza ebomini. Okokuqala, ngaba zikho izinto ofuna ukuziphumeza? Kulula ukuba singacingi nokucinga ngezona zinto sizifunayo ebomini, izinto ezibalulekileyo kuthi. Ngokuphathelele lo mgaqo ubalulekileyo wokuzibekela usukelo, sifumanisa ukuba kwakudala iBhayibhile yathi: “Niqiniseke ngezinto ezibaluleke ngakumbi.”—Filipi 1:10.

      Xa sele sizibekele usukelo, kulula ukucinga ngezinto ezibalulekileyo kwiinkalo ezahlukahlukeneyo ebomini bethu, njengemeko yethu yokomoya, ubomi bentsapho nomsebenzi. Noko ke, kubalulekile ukuba singazibekeli usukelo lokwenza izinto ezininzi zisuka nje, sizibekele usukelo esinako ukulufikelela. Xa kunzima ukufikelela usukelo oluthile sinokuziva sidimazekile de sinikezele. Ngoko kudla ngokunceda ukuzama ukufikelela usukelo ngalunye ngokwamanqanaba.

      “Apho kukho umnqweno, kukho indlela.” Litsho njalo iqhalo lakudala yaye kukhangeleka ngathi linabo ubunyani. Xa sele sizibekele usukelo, kufuneka sibe nomnqweno size sizimisele ukuluphumeza. Oku sinokukwenza ngokucinga ngemiphumo neengenelo zoko siceba ukukwenza. Kakade ke, iza kubakho imiqobo kodwa sifanele siyijonge njengocelomngeni kunokuba siyijonge njengemiqobo engenakoyiswa.

      Noko ke, kufuneka sicinge ngeendlela esinokuluphumeza ngazo usukelo lwethu. Umbhali uC. R. Snyder, owenza uphando olubhekele phaya ngokubaluleka kwethemba ucebisa ukuba sicinge ngeendlela ezininzi esinokuluphumeza ngazo naluphi na usukelo. Ngoko, xa enye indlela ingaphumeleli sinokubhenela kwenye.

      Lo kaSnyder ukwacebisa ukuba sifunde ukulutshintsha usukelo lwethu. Xa singasakwazi ukuluphumeza usukelo oluthile, ukusoloko sicinga ngalo kunokusidimaza. Kwelinye icala, ukwenza enye into esikwaziyo ukuyifikelela kuya kusenza singalahl’ ithemba.

      IBhayibhile inomzekelo omhle kule nkalo. UKumkani uDavide wayezimisele ukwakhela uThixo wakhe uYehova itempile. Kodwa uThixo wathi kuDavide elo lungelo laliza kufunyanwa ngunyana wakhe uSolomon. Kunokuba aqumbe okanye atyhale ngesifuba, uDavide wazibekela olunye usukelo. Wazibhokoxa ekuqokeleleni iminikelo nezixhobo zokwakha loo tempile yayiza kwakhiwa ngunyana wakhe.—1 Kumkani 8:17-19; 1 Kronike 29:3-7.

      Nangona kusenokwenzeka ukuba siye sazama ukuhlakulela ithemba ukusa kumlinganiselo othile ngokuphepha isimo sengqondo esingafanelekanga, kusenokwenzeka ukuba kusafuneka siphucule kule nkalo. Ngoba? Ngenxa yokuba izinto ezininzi ezenza silahl’ ithemba zibangelwa zizinto ezingaphaya kwamandla ethu. Xa sicinga ngeengxaki ezinkulu ezithwaxa uluntu—ubuhlwempu, iimfazwe, ukungabikho kobulungisa nexhala lokugula nokufa—yintoni enokusinceda sihlale sinethemba?

      [Umfanekiso okwiphepha 15]

      Xa ungakhange uwufumane umsebenzi, ngaba uye ucinge ukuba akunakuze uwufumane?

      [Umfanekiso okwiphepha 16]

      UKumkani uDavide wayebhetyebhetye ngokuphathelele usukelo

  • Unokulifumana Phi Ithemba Lokwenene?
    Vukani!—2004 | Meyi 8
    • Unokulifumana Phi Ithemba Lokwenene?

      IWOTSHI yakho imile yaye ikhangeleka ngathi yonakele. Ingqondo yakho iyabethabethana xa kufuneka uyilungise. Zininzi izibhengezo zeendawo ezilungisa iiwotshi, yaye zonke zikwenza ube nethemba, kodwa ezinye zazo ziyaphikisana. Kodwa ubuya kwenza ntoni xa ufumanisa ukuba loo wotshi yenziwa ngomnye wabamelwane bakho okrelekrele kwiminyaka eliqela eyadlulayo? Ngapha koko, ufumanisa ukuba ukulungele ukukunceda ngaphandle kwentlawulo. Izicacele into obuya kuyenza, akunjalo?

      Ngoku thelekisa le wotshi nokuba nethemba. Ukuba ufumanisa ukuba uphelelwa lithemba—njengabantu abaninzi abaphelelwe lithemba kweli xesha lizaliswe ziinkathazo—ubuya kubhenela kubani xa ufuna uncedo? Baninzi abantu abathembisa ukukunceda, kodwa amacebiso abo anokwenza ingqondo yakho ibethabethane yaye asenokuba ayaphikisana. Ngoko kutheni ungabheneli kuLowo wenza abantu banethemba? IBhayibhile ithi ‘akakude kuye ngamnye wethu’ yaye uzimisele ukusinceda.—IZenzo 17:27; 1 Petros 5:7.

      Ingcaciso Enzulu Yethemba

      Ingcaciso yethemba ekuthethwa ngalo eBhayibhileni iphangalele ngakumbi kunaleyo ixhaphakileyo phakathi koogqirha, izazinzulu noogqirha bengqondo banamhlanje. Amabinzana antlandlolo asetyenziswe eBhayibhileni aguqulelwe ngokuthi “ithemba” athetha ukulindela into entle ngolangazelelo olukhulu. Ngokusisiseko, ithemba libandakanya izinto ezimbini. Libandakanya umnqweno wento entle nesizathu sokukholelwa ukuba loo nto iza kwenzeka. Ithemba ekuthethwa ngalo eBhayibhileni asilophupha. Lisekelwe kwizibakala nobungqina obunokuthenjwa.

      Ngokuphathelele le nkalo, ithemba liyafana nokholo, olumele lusekelwe kubungqina—kungekhona ukukholelwa kuyo yonk’ into. (Hebhere 11:1) Sekunjalo, iBhayibhile ibonisa ukuba kukho umahluko phakathi kokholo nethemba.—1 Korinte 13:13.

      Ngokomzekelo: Xa ucela uncedo kumhlobo osenyongweni uba nethemba lokuba uya kukunceda. Uyamthemba umhlobo wakho kuba umazi kakuhle yaye ukhe wambona esenza ububele ngokupha abanye izinto. Ukholo nethemba ziyahambisana kodwa zahlukile. Unokulihlakulela njani ithemba elinjalo ngoThixo?

      Isiseko Sethemba

      UThixo ngumthombo wethemba lokwenene. Kumaxesha okubhalwa kweBhayibhile uYehova wayebizwa ngokuba ‘lithemba likaSirayeli.’ (Yeremiya 14:8) Naliphi ithemba lokwenene ababenalo abakhonzi bakhe lalivela kuye; ngenxa yoko wayelithemba labo. Elo themba yayingekokuzithembisa nje ngento engenakwenzeka. UThixo wayebanike isizathu esivakalayo sokuba nelo themba. Kwiinkulungwane ezidluleyo wazenzela igama elihle ngokuzizalisekisa zonke izithembiso zakhe. UYoshuwa owayekhokela amaSirayeli wathi kuwo: “Niyazi kakuhle . . . ukuba akusilelanga nalinye ilizwi kuwo onke amazwi alungileyo uYehova uThixo wenu awathethileyo kuni.”—Yoshuwa 23:14.

      Nangona kudlule amawaka eminyaka, usaqhubeka ezizalisekisa izithembiso zakhe. IBhayibhile iqulethe izithembiso zikaThixo ezimangalisayo nengxelo echanileyo ephathelele ukuzaliseka kwazo. Iziprofeto eziphathelele izithembiso zakhe zinokuthenjwa kangangokuba zide zibhalwe ngokungathi sele zizalisekile.

      Kungenxa yeso sizathu le nto sinokuthi iBhayibhile yincwadi yethemba. Njengoko ufunda ngendlela uThixo awayeqhubana ngayo nabantu, uza kufumana izizathu ezingakumbi zokumthemba. Umpostile uPawulos wabhala: “Zonke izinto ezabhalwa kwixesha langaphambili zabhalelwa ukuyalela thina, ukuze ngonyamezelo lwethu nangentuthuzelo yeZibhalo sibe nethemba.”—Roma 15:4.

      Yintoni Asithembisa Yona UThixo?

      Liliphi ixesha esilifuna ngamandla ngalo ithemba? Ngaba akuxa sijamelene nokufa? Noko ke, kubantu abaninzi leli xesha kanye—xa befelwe ngumntu abamthandayo—abaphelelwa lithemba ngalo. Kakade ke, yintoni enokwenza umntu aphelelwe lithemba ngaphezu kokufelwa? Ukufa kuchaphazela wonke umntu. Sinokukuphepha kangangethuba elifutshane, kodwa xa sele kufikile, akukho nto sinokuyenza. Ngokufanelekileyo ke ngoko, iBhayibhile ithi ukufa ‘lutshaba lokugqibela.’—1 Korinte 15:26.

      Ngoko, sinokuhlala njani sinethemba xa sifelwe? Kwale ndinyana yeBhayibhile ethi ukufa lutshaba lokugqibela iphinda ithi olu tshaba luya “kutshitshiswa.” UYehova uThixo unamandla ngaphezu kokufa. Uye wakungqina oku izihlandlo eziliqela. Njani? Ngokuvusa abantu abafileyo. IBhayibhile ichaza izihlandlo ezisithoba ezahlukahlukeneyo uThixo awasebenzisa ngazo amandla akhe waza wavusa abantu abafileyo.

      Ngesihlandlo esikhethekileyo, uYehova wanika uNyana wakhe uYesu amandla okuvusa umhlobo wakhe uLazaro, owayesele eneentsuku ezine efile. UYesu akazange akwenze ekhusini oku, kodwa wakwenza phambi kwesihlwele esasibukele.—Yohane 11:38-48, 53; 12:9, 10.

      Usenokuzibuza, ‘Kwakutheni ze kuvuswe abantu? Ngaba abazange baluphale baphinde bafe?’ Ewe baluphala baza bafa. Sekunjalo, ngenxa yeengxelo zovuko ezinokuthenjwa ezifana nale, asinamnqweno nje wokuba abantu abafileyo esibathandayo baphinde baphile; kodwa sinesizathu sokukholelwa ukuba baza kuphila. Ngamany’ amazwi, sinethemba lokwenene.

      UYesu wathi: “Ndim uvuko nobomi.” (Yohane 11:25) UYehova uza kumnika amandla okuvusa abantu emhlabeni wonke. UYesu wathi: “Liyeza ilixa ekuya kuthi ngalo bonke abo bakumangcwaba enkumbulo balive ilizwi lakhe [uKristu] baze baphume.” (Yohane 5:28, 29) Ewe, bonke abo balele emangcwabeni banethemba lokuvuselwa ebomini kumhlaba oyiparadesi.

      Umprofeti uIsaya waluchaza ngale ndlela ichukumisayo uvuko: “Abafileyo bakho baya kuphila, izidumbu zabo ziya kuvuka. Abo balele eluthulini baya kuvuka baze bamemelele ngovuyo; kuba umbethe wabo unjengombethe wemifuno, nomhlaba uya kubangela bazalwe kwanabo balele ekufeni.”—Isaya 26:19, The New English Bible.

      Ngaba esi sithembiso asithuthuzeli? Abantu abafileyo bakweyona ndawo ikhuselekileyo sinokucinga ngayo, njengemveku ekhuselekileyo esibelekweni sikanina. Eneneni, uThixo onguSomandla ongenakuze alibale uyabakhumbula bonke abo baphumle emangcwabeni. (Luka 20:37, 38) Yaye kungekudala, baza kuvuswa baphile kwihlabathi elinabantu abonwabileyo ababalindele ngolangazelelo olukhulu kanye njengokuba imveku isamkelwa ngothando yintsapho! Ngoko sinokuba nethemba naxa sifelwe.

      Indlela Elinokukunceda Ngayo Ithemba

      UPawulos usifundisa izinto ezininzi ngokubaluleka kwethemba. Wathi ithemba liyinxalenye ebalulekileyo yesikrweqe sokomoya—isigcina-ntloko. (1 Tesalonika 5:8) Wayethetha ukuthini? Kaloku, ngamaxesha okubhalwa kweBhayibhile, ijoni lalinxiba isigcina-ntloko emfazweni, ngokuqhelekileyo phezu komnqwazi owenziwe ngewulu okanye ufele. Ngenxa yesi sigcina-ntloko, izinto zazibetheka nje entlokweni yalo zidlule, zingalibulali. Ngaba uPawulos wayezama ukuveza le ngongoma? Njengoko isigcina-ntloko sikhusela intloko, ithemba likhusela ingqondo, apho ziphuma khona zonke iingcinga. Ukuba unethemba lokwenene ngezinto ezivumelana nenjongo kaThixo, akufanelanga ube nexhala okanye udimazeke xa ujamelene neengxaki. Ngubani ongasifuniyo isigcina-ntloko esinjalo?

      UPawulos waphinda wasebenzisa omnye umzekeliso ocacileyo xa wayebonisa ukuhlobana kwethemba nokuthanda kukaThixo. Wabhala: “Eli themba sinalo elifana neankile yomphefumlo, liqinisekile yaye liqinile.” (Hebhere 6:19) Ekubeni wayekhe waphukelwa yinqanawa izihlandlo eziliqela, uPawulos wayekwazi ukubaluleka kweankile. Xa kuvela isaqhwithi, oomatiloshe babedla ngokuphosa iankile yenqanawa elwandle. Ukuba ifike yabambelela enzulwini yolwandle, inqanawa yayinokusinda ingatyhalelwa elunxwemeni ize intlitheke ematyeni.

      Ngokufanayo, ukuba izithembiso zikaThixo zisenza sibe nethemba ‘eliqinisekileyo neliqinileyo,’ elo themba linokusinceda sikwazi ukumelana neenkqwithela zala maxesha. UYehova uthembisa ukuba kungekudala ziza kuphela iimfazwe, ulwaphulo-mthetho, usizi kunye nokufa okuthwaxa abantu namhlanje. (Bona ibhokisi ekwiphepha 18.) Ukubambelela kwelo themba kuya kusinceda siphephe iingxaki, kusishukumisele ukuba siphile ngemilinganiselo kaThixo kunokuba sinikezele kweli hlabathi likavula-zibhuqe lizaliswe kukuziphatha okubi.

      UYehova ufuna nawe ube nelo themba. Ufuna unandiphe ubomi kanye ngale ndlela wayefuna abantu baphile ngayo. Umnqweno wakhe kukuba “zonke iintlobo zabantu zisindiswe.” Njani? Okokuqala, mntu ngamnye umele ‘afikelele elwazini oluchanileyo lwenyaniso.’ (1 Timoti 2:4) Abapapashi balo lindixesha bakukhuthaza ukuba ungenise ulwazi olukhokelela ebomini oluphathelele inyaniso yeLizwi likaThixo. Ithemba oya kulifumana kuThixo libhetele kunalo naliphi na ithemba onokulifumana kweli hlabathi.

      Xa unelo themba, akukho mfuneko yokuba uzive ungenamandla, kuba uThixo uya kukunika amandla okwenza nantoni na ofuna ukuyenza evumelana nokuthanda kwakhe. (2 Korinte 4:7; Filipi 4:13) Ngaba eli asilothemba olifunayo? Ngoko, ukuba ufuna ukuba nelo themba yaye kudala ulifuna, ungapheli mandla. Elo themba liyafumaneka. Kwaye nawe unokuba nalo!

      [Ibhokisi/Umfanekiso okwiphepha 18]

      Izizathu Zokuba Nethemba

      Ezi ngcamango zisekelwe eZibhalweni zinokukunceda uhlakulele ithemba:

      ◼ UThixo uthembisa ulonwabo kwikamva.

      ILizwi lakhe lithi umhlaba uya kuba yiparadesi ehlala abantu abonwabileyo nabamanyeneyo.—INdumiso 37:11, 29; Isaya 25:8; ISityhilelo 21:3, 4.

      ◼ UThixo akanakuxoka.

      Uluthiyile naluphi na uhlobo lokuxoka. UYehova ungcwele okanye akanakwenza mpazamo, ngoko akanako ukuxoka.—IMizekeliso 6:16-19; Isaya 6:2, 3; Tito 1:2; Hebhere 6:18.

      ◼ UThixo unamandla angenakuphela.

      UYehova unguSomandla. Akukho nto inokwenza angazizalisekisi izithembiso zakhe.—Eksodus 15:11; Isaya 40:25, 26.

      ◼ UThixo ufuna uphile ngonaphakade.

      —Yohane 3:16; 1 Timoti 2:3, 4.

      ◼ UThixo unethemba ngathi.

      Ujonga iimpawu ezintle nemigudu yethu kungekhona iimpazamo esizenzayo. (INdumiso 103:12-14; 130:3; Hebhere 6:10) Unethemba lokuba siya kwenza okulungileyo yaye uyavuya xa sikwenza.—IMizekeliso 27:11.

      ◼ UThixo uthembisa ukukunceda uphile ngokuvisisana nemilinganiselo yobuthixo.

      Abakhonzi bakhe abafanele nangaliphi na ixesha baphelelwe lithemba. UThixo uyabanceda esebenzisa umoya wakhe oyingcwele onamandla ukodlula nantoni na.—Filipi 4:13.

      ◼ Umntu othembele kuThixo akanakuze aphoxeke.

      Unokumthemba ngokupheleleyo akanakuze akuphoxe.—INdumiso 25:3.

      [Umfanekiso okwiphepha 20]

      Njengoko isigcina-ntloko sikhusela intloko, ithemba likhusela ingqondo

      [Umfanekiso okwiphepha 20]

      Njengeankile, ithemba elisekelwe kwizinto ezinokuthenjwa linokusenza siqine

      [Inkcazelo]

      Courtesy René Seindal/Su concessione del Museo Archeologico Regionale A. Salinas di Palermo

Iimpapasho ZesiXhosa (1986-2025)
Log Out
Log In
  • IsiXhosa
  • Share
  • Zikhethele
  • Copyright © 2025 Watch Tower Bible and Tract Society of Pennsylvania
  • Imiqathango
  • Umthetho Wezinto Eziyimfihlo
  • Privacy Settings
  • JW.ORG
  • Log In
Share