Indoda Evunyiweyo Yintliziyo KaYehova

YINTONI ethi qatha engqondweni yakho xa kuthethwa ngoDavide eBhayibhileni? Kukoyisa kwakhe ingxilimbela yomFilisti uGoliyati? Kukusabela kwakhe entlango xa wayeleqwa nguKumkani uSawule? Isono sakhe noBhatsheba esaphumelela ekubeni abandezeleke? Okanye imibongo ephefumlelweyo kwincwadi yeeNdumiso?

UDavide waxhamla amalungelo amaninzi ebomini, uloyiso neentlekele. Kodwa, eyona nto isenza sitsaleleke kuye koko kwathethwa ngumprofeti uSamuweli ngaye—wayeya kuba “yindoda evunyiweyo yintliziyo [kaYehova].”—1 Samuweli 13:14.

Isiprofeto sikaSamuweli sazaliseka xa uDavide wayesemtsha. Ngaba ubungayi kukuthanda ukuchazwa njengendoda evunyiweyo yintliziyo kaYehova? Yintoni enokwenza ube njengoDavide, ngokukodwa xa wayesemtsha? Masibone.

Intsapho Nomsebenzi Wakhe

UYese, uyise kaDavide nomzukulwana kaRute noBhohazi, umel’ ukuba wayeyindoda ezinikeleyo. Xa uDavide, abantwana babo abasixhenxe noodadewabo ababini babeselula, uYese wabafundisa uMthetho kaMoses. Kwenye yeendumiso zakhe, uDavide wabhekisela kuye ‘njengonyana wekhobokazana’ likaYehova. (INdumiso 86:16) Le ndumiso iye yenza abanye bagqiba kwelokuba umama kaDavide, elingachazwanga igama lakhe eBhayibhile, waba negalelo kubumoya bakhe. Omnye umphengululi uthi, “Umel’ ukuba wafundiswa nguye ngendlela uThixo aqhubana ngayo nabantu bakhe” kuquka ibali likaRute noBhohazi.

Xa kuthethwa ngoDavide okokuqala, uvela eyinkwenkwe engumalusi esalusa iigusha zikayise. Umel’ ukuba wayechitha imini nobusuku ezindle eyedwa. Khawube nomfanekiso ngqondweni wale nto kuthethwa ngayo.

Intsapho yakuloDavide yayihlala eBhetelehem, idolophu encinane esendaweni ephakamileyo kwiinduli zakwaYuda ezinamathambeka. Amasimi alurhexe akufutshane neBhetelehem ayechuma. Emimangweni kwakutyalwe imithi yeziqhamo, eyomnquma kunye nezidiliya. Ngexesha likaDavide, kubonakala ukuba iindawo ezingenamasimi zazingamadlelo. Ngapha kwawo yayiyintlango yakwaYuda.

Umsebenzi kaDavide wawububek’ esichengeni ubomi bakhe maxa wambi. Kwakukwezi nduli apho waqubisana khona nengonyama nebhere ezazifuna ukuhlasela iigusha.a Eli tyendyana likhaliphileyo lawabulala la marhamncwa laza lazihlangula izimvu. (1 Samuweli 17:34-36) Mhlawumbi uDavide wabufunda ngelo xesha ubuchule bokusebenzisa isilingi. Kufutshane nale dolophu yakowabo, kwakukho umhlaba wakwaBenjamin. Abatoli beso sizwe ‘babeziinkcani ekusawuleni ngamatye, bengaphosi.’ NoDavide wayeyinkcani.—ABagwebi 20:14-16; 1 Samuweli 17:49.

Ixesha Elasetyenziswa Kakuhle

Ubukhulu becala, umsebenzi wokwalusa wawusithukuthezi. Kodwa uDavide akazange akruquke nguwo. Ngokwahlukileyo koko, loo maxesha wawasebenzisela ukucamngca. Kubonakala ngathi ezinye zezinto uDavide aziquka kwiindumiso wacamngca ngazo xa wayesemtsha. Ngaba yayileli xesha lokuba yedwa apho wayecamngca khona ngendima yoluntu kwindalo kunye nobuhle bezidalwa zasezulwini—ilanga, inyanga neenkwenkwezi, “imisebenzi yeminwe [kaYehova]”? Ngaba yayingamasimi akufutshane naseBhetelehem awayemenza acamngce ngawo, iinkomo, iintaka “kwanamarhamcwa asendle”?—INdumiso 8:3-9; 19:1-6.

Ngokungathandabuzekiyo amava kaDavide okwalusa amenza wayiqonda indlela uYehova abathanda ngayo abakhonzi bakhe abathembekileyo. Ngenxa yoko, uDavide wacula wathi: “UYehova ngumaLusi wam. Andiyi kuswela nto. Undilalisa kumadlelo anengca; undikhaphelela kwiindawo zokuphumla ezinamanzi amaninzi. Nangona ndihamba kwintlambo yethunzi elimnyama, andoyiki nto imbi, kuba unam wena; intonga yakho nomsimelelo wakho ziyandithuthuzela.”—INdumiso 23:1, 2, 4.

Mhlawumbi uyazibuza ukuba ungena phi wena kuyo yonke le nto. Impendulo kukuba esinye sezizathu esabangela ukuba uDavide abe nolwalamano olusondeleyo noYehova aze abizwe ngokuba ‘yindoda evunyiweyo yintliziyo yakhe’ yayikukuba wayecamngca ngokunzulu ngemisebenzi kaYehova nangolwalamano lwakhe noThixo. Ngaba unjalo nawe?

Ngaba wakha waziva ufuna ukudumisa nokuzukisa uMdali wakho emva kokucamngca ngenye yezinto azidalileyo? Ngaba wakha waziva umthanda uYehova emva kokubona iimpawu zakhe ezibonakala kwindlela aqhubana ngayo nabantu? Kakade ke, ukuze ukwazi ukuxabisa inkonzo kaYehova, kufuneka ucamngce uze uthandaze ngezinto eziseLizwini likaThixo nendalo yakhe. Ukucamngca ngaloo ndlela kunokukunceda umazi uYehova uze umthande. Abantwana nabantu abadala banako ukuxhamla kweli lungelo. Kubonakala ukuba uDavide wayesondele kuYehova ukususela ebuntwaneni bakhe. Sazi njani?

UDavide Uyathanjiswa

Kwathi kwakubonakala ukuba uKumkani uSawule akasakulungelanga ukukhokela abantu bakaThixo, uYehova wathi kumprofeti uSamuweli: “Kuya kude kube nini na uzilile ngenxa kaSawule, ngoxa mna, kwelinye icala, ndimgatyile ekulawuleni njengokumkani phezu koSirayeli? Zalisa uphondo lwakho ngeoli uze uhambe. Ndiya kukuthumela kuYese waseBhetelehem, ngenxa yokuba ndizilungiselele ukumkani phakathi koonyana bakhe.”—1 Samuweli 16:1.

Ukufika komprofeti kaThixo eBhetelehem, wayalela uYese ukuba abize oonyana bakhe. Nguwuphi awayeza kumthambisa uSamuweli ukuba abe ngukumkani? Wathi akubona unyana wakhe omdala uEliyabhi owayenomfaneleko, uSamuweli wathi: ‘Umel’ ukuba nguye lo.’ Kodwa uYehova wathi kuSamuweli: “Musa ukukhangela imbonakalo yakhe nokuphakama kwesithomo sakhe, kuba ndimgatyile. Kuba indlela abona ngayo umntu asiyondlela abona ngayo uThixo, ngenxa yokuba umntu nje ubona okubonakalayo emehlweni; kodwa uYehova yena, ubona oko ikuko intliziyo.” UYehova wamgatya noAbhinadabhi, uShamaha nabanye abantakwabo abane. Le ngxelo ihlabela mgama iisthi: “Ekugqibeleni wathi uSamuweli kuYese: ‘Aphelele na apha amakhwenkwe?’ Wathi ke yena: ‘Kude kube ngoku kushiyeke eyona incinane, yaye, khangela! idlisa izimvu edlelweni.’”—1 Samuweli 16:7, 11.

Kuvakala ngathi uYese wayesithi: ‘Akunakuthi kanti ufuna uDavide.’ Ekubeni wayengoyena umncinane nongabalulekanga kule ntsapho, uDavide wayesalusa. Kodwa uThixo wayekhethe yena. UYehova ubona intliziyo yaye kucacile ukuba wabona into efanelekileyo kweli tyendyana lomfana. Wathi uYese esakubiza uDavide, uYehova wathi kuSamuweli: “‘Sukuma, mthambise, kuba nguye lo!’ Ngako oko uSamuweli wathabatha uphondo lweoli waza wamthambisa phakathi kwabantakwabo. Yaye umoya kaYehova waqalisa ukusebenza kuDavide ukususela loo mini.”—1 Samuweli 16:12, 13.

Akuchazwa ukuba yayimingaphi iminyaka kaDavide xa wayethanjiswa. Noko ke, emva kwexesha elithile, abakhuluwa bakhe abathathu, uEliyabhi, uAbhinadabhi, noShamaha babekhonza emkhosini kaSawule. Mhlawumbi abanye abantakwabo abahlanu babeselula kakhulu. Kusenokwenzeka ukuba akakho kubo owayesele eneminyaka engama-20 ubudala, minyaka leyo awayedla ngokuqalisa ngayo amadoda akwaSirayeli emkhosini. (Numeri 1:3; 1 Samuweli 17:13) Enoba kuyintoni, uDavide wayeselula kakhulu xa wanyulwa nguYehova. Sekunjalo, kuyabonakala ukuba uDavide wayengumntu ozixabisayo izinto zokomoya. Kuyacaca ukuba wayesele enolwalamano olusondeleyo noYehova, olwalubangelwa kukucamngca ngezinto awayezazi ngoThixo.

Nanamhlanje abantwana bamele bakhuthazwe ukuba benze okufanayo. Bazali, ngaba niyabakhuthaza abantwana benu ukuba bacamngce ngezinto zokomoya, baxabise indalo kaThixo baze bafunde oko iBhayibhile ikuthethayo ngoMdali? (Duteronomi 6:4-9) Nina baselula, ngaba niyakwenza oku? Iimpapasho zeBhayibhile ezinjengephephancwadi iMboniselo noVukani!b zenzelwe ukukunceda.

Wayenobuchule Bokudlala Uhadi

Njengokuba iindumiso ezininzi zikaDavide zisixelela ngeemini zakhe zokuba ngumalusi, kubonakala ukuba nomculo wakhe usixelela into efanayo. Kakade ke, asiyazi indlela ezaziculwa ngayo ezi ngoma zingcwele. Kodwa ke siyazi ukuba umqambi wazo wayeyimvumi ebalaseleyo. Esinye isizathu sokuba uDavide abizwe nguKumkani uSawule ezindle kukuba wayelichule lokudlala uhadi.—1 Samuweli 16:18-23.c

Wayebufunde phi yaye nini uDavide obu buchule? Kusenokwenzeka ukuba wabufunda xa wayesalusa izimvu ezindle. Kusengqiqweni ukukholelwa ukuba, nangona wayesemncinane, uDavide wayesele ekwazi ukuculela uThixo iindumiso ezimnandi. Kaloku, uYehova wamkhetha ngenxa yokuzinikela kwakhe nokuthanda izinto zokomoya, akunjalo?

UDavide waqhubeka esiba nolwalamano oluhle noYehova nasebudaleni bakhe. Ubuntu bakhe baxonxwa ngamava awazuza xa wayeselula esalusa eBhetelehem. Yiba nomfanekiso ngqondweni kaDavide eculela uYehova esithi: “Ndikhumbule imihla yakudala; Ndicamngce ngawo wonke umsebenzi wakho; ngokuzithandela ndihleli ndizixhalabisa ngomsebenzi wezandla zakho.” (INdumiso 143:5) Le ndumiso nezinye iindumiso zikaDavide zilukhuthazo kubo bonke abo bafuna ukuba ngabavunyiweyo yintliziyo kaYehova.

[Imibhalo esemazantsi]