UYehova Ufanelwe Kukudunyiswa Sithi Ngokumanyeneyo
“Dumisani uYa!”—INDU. 111:1.
1, 2. Lithetha ukuthini ibinzana elithi “Haleluya,” ibe lisetyenziswa njani kwiZibhalo ZamaKristu ZesiGrike?
“HALELUYA!” Elo libinzana elixhaphakileyo kwiicawa zeNgqobhoko. Kwabanye, eli binzana alipheli emilonyeni yabo nakwincoko yabo yemihla ngemihla. Noko ke, bambalwa abayaziyo intsingiselo yalo engcwele, yaye indlela uninzi lwabo oluphila ngayo ibonisa ukungamhloneli uThixo. (Tito 1:16) Esinye isichazi-magama seBhayibhile sithi: “Igama elithi Haleluya, lidla ngokusetyenziswa ngababhali beendumiso ezahlukahlukeneyo xa bekhuthaza abantu ukuba badumise uYehova.” Eneneni, abaphengululi beBhayibhile abaninzi bathi “uHaleluya” uthetha ukuthi “‘Dumisani uYa,’ [oko kukuthi] uYehova.”
2 Kuyaqondakala ukuba, INguqulelo Yehlabathi Elitsha iguqulele eli ibinzana kwiNdumiso 111:1 ngokuthi “Dumisani uYa!” Inguqulelo yesiGrike yeli binzana ivela izihlandlo ezine kwiSityhilelo 19:1-6 xa kuthethwa ngokubhiyozelwa kwesiphelo sonqulo lobuxoki. Xa oko kusenzeka, abanquli bokwenyaniso baya kuba nezizathu ezikhethekileyo zokusebenzisa ibinzana elithi “Haleluya” ngendlela ebonisa intlonelo.
Imisebenzi Yakhe Emikhulu
3. Yiyiphi eyona njongo yethu yokuhlanganisana rhoqo?
3 Umqambi weNdumiso 111 usinika izizathu ezininzi zokuba uYehova efanelwe kukudunyiswa sithi ngokumanyeneyo. Indinyana 1 ithi: “Ndiya kumbonga uYehova ngentliziyo yam yonke kwiqela lamakholwane abo bathe tye nakuyo indibano.” Nanamhlanje amaNgqina kaYehova avakalelwa ngaloo ndlela. Eyona njongo yethu yokuhlanganisana rhoqo emabandleni nakwiindibano ezinkulu, kukudumisa uYehova.
4. Abantu banokuyiphanda njani imisebenzi kaYehova?
4 “Imisebenzi kaYehova mikhulu, bayayiphanda bonke abo bayoliswayo yiyo.” (INdu. 111:2) Phawula ibinzana elithi “bayayiphanda.” Ngokutsho kwenye imbekiselo, le ndinyana inokubhekisela kubantu “abacamngca baze baphengulule ngokuzimisela nangenzondelelo” ngemisebenzi kaThixo. Indalo kaYehova inenjongo ekhethekileyo. Ubeke ilanga, umhlaba nenyanga ukuze zonke zisebenzisane kakuhle, loo nto yenza ukuba umhlaba ufudumale, ufumane ukukhanya, imini nobusuku, kubekho namaxesha onyaka nemisinga.
5. Ukuqonda kwabantu indalo kuye kwatyhila ntoni?
5 Izazinzulu ziye zafumana okuninzi ngendlela omi ngayo umhlaba kwakunye nendlela ojikeleza ngayo, ubukhulu bawo nobukhulu benyanga. Ukulungelelaniswa nokunxibelelana kwezi zinto zisesibhakabhakeni kubangela utshintsho oluhle nolubakho rhoqo lwamaxesha onyaka. Kanti, kuninzi okuye kwafundwa ngolungelelwano olungummangaliso lwamandla endalo. Ngenxa yoko, kwinqaku elinomxholo othi “Indalo Eyenziwe ‘Kanye Ngendlela Yayo,’” omnye unjingalwazi wezobunjineli wathi: “Kulula ukuqonda isizathu sokuba izazinzulu ezininzi zitshintshe indlela ebezicinga ngayo kwiminyaka engama-30 edluleyo, zize zivume ukuba kufuna ukholo lokwenene ukukholelwa ukuba indalo yavela ngengozi. Kuyanyanzeleka sivume ukuba ukho umdali wayo okrelekrele xa sijonga umhlaba odalwe ngobuchule.”
6. Uvakalelwa njani ngendlela uThixo amenze ngayo umntu?
6 Omnye wemimangaliso yendalo yindlela uThixo asenze ngayo. (INdu. 139:14) Xa wayedala abantu, wabanika iingqondo, imizimba enamalungu aluncedo kwakunye nobuchule namandla okusebenza. Ngokomzekelo, buyamangalisa ubuchule esibunikwe nguThixo bokuthetha nokuphulaphula kwakunye nobokubhala nokufunda. Abantu abaninzi banabo obo buchule. Umzimba wakho owakhiwe ngendlela emangalisayo uyakwazi ukuma nkqo. Kaloku, indlela umzimba wakho owenziwe nolungelelene ngayo kwakunye nendlela entsonkothileyo osebenza ngayo, ikushiya ubamb’ ongezantsi. Ngaphezu koko, ubuxhakaxhaka bemithambo-luvo obenza ingqondo nezivamvo zakho zisebenze abunakuze buthelekiswe nezinto ezenziwe zizazinzulu. Eneneni, ukuze bakwazi ukwenza izinto abazenzileyo, abantu bancedwe yingqondo nazizivamvo abazinikiweyo. Kwanoyena nonjineli ulichule nophum’ izandla akanakuze enze nantoni na entle neluncedo njengezixhobo zakho ezilishumi—iminwe noobhontsi. Khawuzibuze, ‘Ngaba amachule ngekwazile ukwenza nokwakha izinto ngaphandle kokusebenzisa iminwe ayinikwe nguThixo?’
Imisebenzi KaThixo Emikhulu Neempawu Zakhe
7. Kutheni sifanele sijonge iBhayibhile njengomnye wemisebenzi emikhulu kaThixo?
7 Imisebenzi emikhulu kaYehova iquka ezinye izinto ezimangalisayo azenzele uluntu ezichazwe eBhayibhileni. Nayo le ncwadi ingomnye wemisebenzi emikhulu kaYehova yaye iyavisisana. Ngokungafaniyo nayo nayiphi na enye incwadi, ngokwenene ‘iphefumlelwe nguThixo kwaye iyingenelo ekufundiseni.’ (2 Tim. 3:16) Ngokomzekelo, incwadi yeBhayibhile yokuqala, iGenesis, ichaza indlela uThixo awabutshayela ngayo ubungendawo emhlabeni ngemihla kaNowa. Incwadi yesibini, iEksodus, ibonisa indlela uYehova awakuthethelela ngayo ukuba nguThixo kwakhe ngokukhulula uSirayeli kubukhoboka baseYiputa. Kusenokwenzeka ukuba umdumisi wayecinga ngezo ziganeko xa wathi: “Umsebenzi [kaYehova] usisidima nobungangamsha, nobulungisa bakhe bumi ngonaphakade. Uyenzele isikhumbuzo imisebenzi yakhe emangalisayo. UYehova unobabalo nenceba.” (INdu. 111:3, 4) Ngaba akuvumi ukuba kuyo yonke imbali imisebenzi kaYehova, kuquka leyo ayenze ngexesha lokuphila kwakho, isisikhumbuzo ‘sesidima nobungangamsha’ bakhe?
8, 9. (a) Ziziphi iindlela eyahluke ngazo imisebenzi kaThixo kuleyo mininzi yenziwe ngabantu? (b) Ziziphi ezinye zeempawu zikaThixo ozixabisayo?
8 Phawula ukuba umdumisi ukwathetha ngezinye iimpawu zikaYehova ezibalaseleyo, njengobulungisa, ubabalo nenceba. Uyazi ukuba kunqabile ukuba izinto ezenziwe ngabantu abangafezekanga zisekelwe ebulungiseni. Zidla ngokwenziwa ngenxa yokubawa, umona nekratshi. Ungayibona loo nto kwizixhobo ezoyikekayo eziveliswa ngabantu ukwenzela iimfazwe nokuze benze ingeniso. Ezi mfazwe zibangela intlungu engathethekiyo kwizigidi ngezigidi zabantu abangenatyala. Ukanti izinto ezininzi ezenziwe ngabantu ziye zacinezela amahlwempu. Umzekelo oya kukhunjulwa ngabaninzi ngowokusetyenziswa kwamakhoboka xa kwakusakhiwa iipiramidi. Ezo zakhiwo zazisakhelwa nje ukungcwaba ooFaro abanekratshi. Ukongezelela, izinto ezininzi ezenziwa ngabantu namhlanje azaneli nje ukucinezela kodwa ‘zonakalisa umhlaba.’—Funda iSityhilelo 11:18.
9 Kodwa imisebenzi kaYehova yahluke kwaphela koko, kuba isoloko isekelwe kokulungileyo! Imisebenzi yakhe iquka ilungiselelo lenceba lokusindisa abantu abanesono. Xa uThixo wenza ilungiselelo lentlawulelo, ‘wayebonisa ubulungisa bakhe.’ (Roma 3:25, 26) Ngokwenene, ‘ubulungisa bakhe bumi ngonaphakade’! Ubabalo lwakhe, luye lwabonakala kwindlela uThixo anomonde ngayo xa eqhubana nabantu abanesono. Maxa wambi, wayede athi “khanincede” xa ebabongoza ukuba babuye kwiindlela zabo eziyingozi baze benze okulungileyo.—Funda uHezekile 18:25.
Uyazifeza Izithembiso Zakhe
10. UYehova wamisela wuphi umzekelo wokuthembeka ngokuphathelele umnqophiso wakhe noAbraham?
10 “Abo bamoyikayo ubanika ukutya. Uya kuwukhumbula ukusa kwixesha elingenammiselo umnqophiso wakhe.” (INdu. 111:5) Apha kubonakala ngathi umdumisi wayethetha ngomnqophiso ka-Abraham. UYehova wathembisa ngokusikelela imbewu ka-Abraham waza wathi iya kuthimba isango leentshaba zayo. (Gen. 22:17, 18; INdu. 105:8, 9) Kwinzaliseko yokuqala yezo zithembiso, imbewu ka-Abraham yaba luhlanga lukaSirayeli. Kwakukudala olo hlanga lungamakhoboka eYiputa, kodwa “wawukhumbula uThixo umnqophiso wakhe noAbraham” waza walukhulula. (Eks. 2:24) Indlela uYehova awuluphatha ngayo emva koko ibonisa ukuba nesisa kwakhe. Walulungiselela ukutya ukuze londle imizimba yalo waza walunika inkcazelo eyayiya kulunceda lulandele imilinganiselo yakhe. (Dut. 6:1-3; 8:4; Neh. 9:21) Kwiinkulungwane ezalandelayo, olu hlanga lwalumana lumshiya uThixo, nangona wayedla ngokuthumela abaprofeti ukuba balubongoze lubuyele kuye. Kwiminyaka engaphezu kwe-1 500 emva kokuba ekhulule amaSirayeli eYiputa, uThixo wathumela uNyana wakhe okuphela kwamzeleyo emhlabeni. AmaYuda amaninzi amcaphukela uYesu aza amnikela ukuba abulawe. Emva koko uYehova waseka uhlanga olutsha, olokomoya, “uSirayeli kaThixo.” Lukunye noKristu, olo hlanga lubumba imbewu yokomoya ka-Abraham, awathi uYehova waxela kwangaphambili ukuba uya kuyisebenzisa ukuze asikelele uluntu.—Gal. 3:16, 29; 6:16.
11. UYehova uqhubeka njani ‘ekhumbula umnqophiso wakhe’ noAbraham?
11 UYehova uqhubeka ‘ewukhumbula umnqophiso wakhe’ kwakunye neentsikelelo athembise ukuzizisa ngawo. Namhlanje, ulungiselela intabalala yokutya kokomoya ngeelwimi ezingaphezu kwama-400. Ukanti, uqhubeka ephendula imithandazo yethu yokucela iimfuno zokwenyama, ngokuvisisana namazwi athi: “Siphe isonka sethu sale mini ngokwemfuneko yemini le.”—Luka 11:3; INdu. 72:16, 17; Isa. 25:6-8.
Amandla KaYehova Amakhulu
12. USirayeli wamandulo walinikwa njani “ilifa leentlanga”?
12 “Ubaxelele abantu bakhe amandla emisebenzi yakhe, ngokubanika ilifa leentlanga.” (INdu. 111:6) Isiganeko esibalaseleyo esenzeka kwimbali yamaSirayeli asenokuba wayecinga ngaso umdumisi kukukhululwa kwawo ngokungummangaliso eYiputa. Xa ekugqibeleni uYehova wavumela amaSirayeli ukuba angene kwiLizwe Lesithembiso, oyisa ookumkani basempuma nasentshona yoMlambo iYordan. (Funda uNehemiya 9:22-25.) Ngokwenene, uYehova wanika uSirayeli “ilifa leentlanga.” UThixo wawabonisa ngokupheleleyo amandla akhe!
13, 14. (a) Yiyiphi indlela uThixo awabonisa ngayo amandla akhe kwiBhabhiloni ekusenokwenzeka ukuba umdumisi wayecinga ngayo? (b) Yiyiphi enye indlela ethe kratya uYehova abakhulule ngayo abantu?
13 Noko ke, sazi kakuhle ukuba, nakuba wamenzela izinto ezingako, uSirayeli akazange amhlonele uYehova engazange abahlonele nookhokho bakhe uAbraham, uIsake noYakobi. Waqhubeka evukela de uThixo wasebenzisa iBhabhiloni ukuba imthimbe. (2 Kron. 36:15-17; Neh. 9:28-30) Ukuba umqambi weNdumiso 111 waphila emva kokubuya kwamaSirayeli ekuthinjweni eBhabhiloni, njengoko abanye abaphengululi beBhayibhile besitsho, umele ukuba wayenezizathu ezininzi zokudumisa uYehova ngenxa yokunyaniseka namandla akhe. UThixo wabonisa ukunyaniseka namandla akhe ngokukhulula amaYuda eBhabhiloni—ubukhosi obabunomthetho wokungabakhululi abathinjwa.—Isa. 14:4, 17.
14 Malunga neenkulungwane ezintlanu kamva, uYehova wasebenzisa amandla akhe ngendlela ethe kratya ngokukhulula abantu abanesono kubukhoboka besono nokufa. (Roma 5:12) Phakathi kwezinye izinto, oko kwavula indlela yokuba abantu abali-144 000 babe ngabalandeli bakaKristu abathanjiswe ngomoya. Ngowe-1919, uYehova wasebenzisa amandla akhe ukukhulula intsalela encinane yaba bathanjiswa kubukhoboka bonqulo lobuxoki. Baye bancedwa ngamandla kaThixo ukuze baphumeze izinto abaye bazenza kweli xesha lesiphelo. Emva kokuzingqina bethembekile de kuse ekufeni, baya kulawula umhlaba bekunye noYesu Kristu ezulwini ukuze kungenelwe abantu abaguqukayo. (ISityhi. 2:26, 27; 5:9, 10) Baya kuwudla ilifa umhlaba ngomlinganiselo ongaphezulu lee kulowo kaSirayeli wamandulo.—Mat. 5:5.
Imigaqo Engasoze Itshintshe Nenokuthenjwa
15, 16. (a) Iquka ntoni imisebenzi yezandla zikaThixo? (b) Yiyiphi imiyalelo uThixo awayinika uSirayeli wamandulo?
15 “Imisebenzi yezandla zakhe iyinyaniso nomgwebo; ikholosekile yonke imiyalelo ayinikelayo, ixhaswa kakuhle ngonaphakade, ukusa kwixesha elingenammiselo, yenziwa ngenyaniso nangokuthe tye.” (INdu. 111:7, 8) Phakathi kwezinto ‘eziyimisebenzi yezandla [zikaYehova]’ ngamacwecwe amabini amatye awayebhalwe imithetho elishumi ebalulekileyo eyayisiya kuSirayeli. (Eks. 31:18) Le mithetho, kwakunye neminye imimiselo eyaba yinxalenye yomnqophiso woMthetho kaMoses, isekelwe kwimigaqo engasoze itshintshe nenokuthenjwa.
16 Ngokomzekelo, omnye wemiyalelo okanye imithetho eyayibhalwe kuloo macwecwe wawusithi: “Mna Yehova Thixo wakho ndinguThixo ofuna uzinikelo olupheleleyo.” Uhlabela mgama usithi uYehova ubenzela ‘ububele bothando kuse kwisizukulwana sewaka abo bamthandayo nabayigcinayo imiyalelo yakhe.’ La macwecwe amatye ayekwanemigaqo eluncedo efana nothi “beka uyihlo nonyoko” nothi “uze ungebi,” kwakunye nomthetho obonisa ingqiqo ochasene nokunqwenela izinto zabanye abantu.—Eks. 20:5, 6, 12, 15, 17.
UMkhululi Wethu Ongcwele Nowoyikekayo
17. Ziziphi izizathu amaSirayeli awayenazo zokuphatha ngobungcwele igama likaThixo?
17 “Uthumele inkululo ebantwini bakhe. Uwuyalele umnqophiso wakhe ukusa kwixesha elingenammiselo. Igama lakhe lingcwele yaye liyoyikeka.” (INdu. 111:9) Kwakhona kusenokwenzeka ukuba umdumisi wayecinga ngendlela uYehova awathembeka ngayo kumnqophiso wakhe noAbraham. Ngenxa yoko, uYehova akazange abashiye abantu bakhe xa babengamakhoboka eYiputa yamandulo naxa kamva babengabathinjwa eBhabhiloni. Kuzo zozibini ezi zihlandlo, uThixo wakhulula abantu bakhe. Ezo zihlandlo zibini zizodwa, zazimele zenze uSirayeli aliphathe ngobungcwele igama likaThixo.—Funda iEksodus 20:7; neyabaseRoma 2:23, 24.
18. Kutheni ucinga ukuba kulilungelo ukuthwala igama likaThixo?
18 Namhlanje amaKristu okwenyaniso akhululwe kwimeko enganiki themba yobukhoboka besono nokufa, afanele enze okufanayo. Sifanele senze konke okusemandleni ethu ukuphila ngokuvisisana nesicelo sokuqala esikumthandazo ongumzekelo esithi: “Malingcwaliswe igama lakho.” (Mat. 6:9) Ukucamngca ngelo gama lizukileyo kufanele kusenze simoyike uThixo. Umbhali weNdumiso 111 wayenembono echanileyo ngokoyika uThixo, kuba wathi: “Ukoyika uYehova kukuqala kobulumko. Bonke abo bayenzayo [imiyalelo yakhe] banengqiqo elungileyo.”—INdu. 111:10.
19. Yintoni esiza kuyixubusha kwinqaku elilandelayo?
19 Ukoyika uThixo ngendlela efanelekileyo kuya kusinceda sithiye okubi. Kanti kuya kusinceda sixelise iimpawu zikaThixo ezintle eziboniswe kwiNdumiso 112, esiza kuxubusha ngazo kwinqaku elilandelayo. Le ndumiso ibonisa indlela esinokukufanelekela ngayo ukuba phakathi kwezigidi ngezigidi eziya kudumisa uYehova ngonaphakade. Ufanelwe kukudunyiswa. “Indumiso yakhe imi ngonaphakade.”—INdu. 111:10.
Imibuzo Yokucamngca
• Kutheni sifanele simdumise ngokumanyeneyo uYehova?
• Ziziphi iimpawu zikaYehova ezibonakala kwizinto azenzileyo?
• Ulijonga njani ilungelo lokuthwala igama likaThixo?
[Umfanekiso okwiphepha 20]
Eyona njongo yethu yokuhlanganisana rhoqo kukudumisa uYehova
[Umfanekiso okwiphepha 23]
Yonke imithetho kaYehova isekelwe kwimigaqo engasoze itshintshe nenokuthenjwa