‘Phaphani’
‘Isiphelo sezinto zonke sisondele. Kuphapheleni ukuthandaza.’—1 PET. 4:7.
1. Wawusithini umxholo weemfundiso zikaYesu?
XA UYESU KRISTU wayesemhlabeni, umxholo weemfundiso zakhe wawubuBukumkani bukaThixo. UYehova uya kusebenzisa obo Bukumkani ukuze athethelele ulongamo lwakhe lwendalo iphela aze angcwalise igama lakhe. Kungenxa yoko uYesu wafundisa abafundi bakhe ukuba bathandaze bathi kuThixo: “Mabufike ubukumkani bakho. Makwenzeke ukuthanda kwakho nasemhlabeni, njengasezulwini.” (Mat. 4:17; 6:9, 10) Kungekudala uBukumkani buya kuphelisa ihlabathi likaSathana buze buqinisekise ukuba ukuthanda kukaThixo kuyenziwa emhlabeni wonke. Ngokwesiprofeto sikaDaniyeli, uBukumkani bukaThixo “buya kuzityumza buziphelise zonke ezi zikumkani [zilawula namhlanje], buze bona bume ukusa kwixesha elingenammiselo.”—Dan. 2:44.
2. (a) Abalandeli bakaYesu babeza kwazi njani ukuba sele ekumandla oBukumkani? (b) Yintoni enye eyayiza kuboniswa ngulo mqondiso?
2 Kangangendlela ukufika koBukumkani bukaThixo okwakubaluleke ngayo kubalandeli bakaYesu, bambuza oku: “Uya kuba yintoni na umqondiso wobukho bakho nowokupheliswa kwenkqubo yezinto?” (Mat. 24:3) Kwakuza kubakho umqondiso ocacileyo ngenxa yokuba ubukho bukaKristu kumandla oBukumkani babungayi kubonwa ngabo basemhlabeni. Loo mqondiso wawuya kubunjwa ziinkalo ezahlukahlukeneyo ezichazwe kusengaphambili eZibhalweni. Ngenxa yoko, abalandeli bakaYesu abaya kuba besaphila ngelo xesha babeza kuqonda ukuba sele eqalisile ukulawula ezulwini. Kanti lo mqondiso wawuya kuphawula ukuqalisa kwexesha eBhayibhileni elibizwa ngokuba ‘yimihla yokugqibela’ yenkqubo engendawo yezinto esele yesamele emhlabeni xa kungoku.—2 Tim. 3:1-5, 13; Mat. 24:7-14.
Phaphani Kule Mihla Yokugqibela
3. Kutheni amaKristu efanele aphaphe?
3 Umpostile uPetros wabhala wathi: “Isiphelo sezinto zonke sisondele. Ngoko ke, yibani ngabaphilileyo engqondweni, nikuphaphele ukuthandaza.” (1 Pet. 4:7) Kwakuza kufuneka abalandeli bakaYesu baphaphe, bajonge iziganeko zehlabathi ezibonisa ukuba sele elawula njengoKumkani. Ukuqhubeka kwabo bephaphile kwakuya kungxamiseka ngakumbi njengoko isiphelo sale nkqubo yezinto ingendawo sisondela. UYesu wathi kubafundi bakhe: “Hlalani nilindile, kuba anazi ukuba inkosi yendlu iza kufika nini [ukuza kugweba ihlabathi likaSathana].”—Marko 13:35, 36.
4. Thelekisa isimo sengqondo sabantu abayinxalenye yehlabathi likaSathana kunye nesabakhonzi bakaYehova. (Quka ibhokisi.)
4 Abantu abaninzi balawulwa nguSathana, yaye abakuphaphelanga oko kuthethwa ziziganeko zehlabathi. Ababuqondi ubukho bukaKristu ekumandla oBukumkani. Kodwa abalandeli bakaKristu bokwenyaniso bebephaphile yaye baye bayiqonda eyona ntsingiselo yoko kwenzeka kwinkulungwane edluleyo. Ukususela ngowe-1925, amaNgqina kaYehova aye aqonda ukuba iMfazwe Yehlabathi I neziganeko eziye zalandela zinikela ubungqina obuqinisekileyo bokuba ubukho bukaKristu ekumandla oBukumkani ezulwini baqalisa ngowe-1914. Ngenxa yoko, imihla yokugqibela yale nkqubo ingendawo yezinto phantsi kukaSathana iqalile. Nangona bengazi ngentsingiselo yoku, abantu abaninzi abanikela ingqalelo kwiziganeko zehlabathi bayawubona umahluko omkhulu phakathi kwexesha elingaphambi kweMfazwe Yehlabathi I nasemva kwayo.—Bona ibhokisi enomxholo othi “Ukuqalisa Kwexesha Lobunzima.”
5. Kutheni kubalulekile ukuba sihlale siphaphile?
5 Sele kumalunga nenkulungwane ngoku, iziganeko ezimasikizi zisenzeka emhlabeni, nto leyo engqinayo ukuba siphila kwimihla yokugqibela. Lincinane kakhulu ixesha ngaphambi kokuba uYehova ayalele uKristu ukuba akhokele imikhosi yeengelosi enamandla ukuba itshabalalise ihlabathi likaSathana. (ISityhi. 19:11-21) AmaKristu okwenyaniso ayalelwa ukuba ahlale elindile. Kungenxa yoko le nto kungxamisekile ukwenjenjalo njengoko silindele ukuphela kwale nkqubo yezinto. (Mat. 24:42) Simele sihlale silindile yaye ngaphantsi kolwalathiso lukaKristu, sinomsebenzi esimele siwenze emhlabeni wonke.
Umsebenzi Owenziwa Emhlabeni Wonke
6, 7. Uye wanda kangakanani umsebenzi wokushumayela ngoBukumkani kule mihla yokugqibela?
6 Umsebenzi omele wenziwe ngabakhonzi bakaYehova wachazwa kwangaphambili njengomnye wemiqondiso eyayiya kuphawula ukuba sikwimihla yokugqibela yale nkqubo ingendawo yezinto. UYesu wawuchaza lo msebenzi womhlaba wonke xa wayebala izinto ezahlukahlukeneyo ezaziza kwenzeka ngexesha lesiphelo. Phakathi kwesi siprofeto kwakukho le nkcazelo ibalulekileyo: “Ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga; kwandule ke kufike ukuphela.”—Mat. 24:14.
7 Cinga nje ngezinye izibakala ezinxulumene nale nkalo yesiprofeto sikaYesu. Babembalwa kakhulu abantu abashumayela iindaba ezilungileyo xa kwaqalisa imihla yokugqibela ngowe-1914. Kodwa ngoku sele bebaninzi gqitha. Kukho amaNgqina kaYehova angaphezu kwezi-7 000 000 ashumayela ehlabathini lonke, akumabandla angaphezu kwe-100 000. Abanye abantu abazizi-10 000 000 baye bahlanganisana namaNgqina kaYehova ngowama-2008 kwiSikhumbuzo sokufa kukaKristu. Aba bantu babebaninzi gqitha kunabo babeze ngonyaka ongaphambi kwalowo.
8. Kutheni inkcaso ingakwazanga ukuthintela ukuphumelela komsebenzi wethu wokushumayela?
8 Kuye kwanikelwa ubungqina obungathethekiyo ngoBukumkani bukaThixo kuzo zonke iintlanga ngaphambi kokuphela kwale nkqubo yezinto! Oko kwenziwe nakuba uSathana ‘enguthixo wale nkqubo yezinto.’ (2 Kor. 4:4) Onke amaziko ezopolitiko, unqulo, norhwebo lweli hlabathi kwakunye namaziko osasazo aphenjelelwa nguye. Yintoni ke, ebangela ukuba umsebenzi wokushumayela uphumelele kangaka? Kaloku uxhaswa nguYehova. Ngenxa yoko, umsebenzi wokushumayela ngoBukumkani uqhuba kakuhle ngendlela emangalisayo nakuba uSathana esenza unako nako wokuwuthintela.
9. Kutheni kunokuthiwa ukwanda kwethu ngokomoya kungummangaliso?
9 Ukuphumelela komsebenzi wokushumayela ngoBukumkani nokwanda nokukhula ngokomoya kwabantu bakaYehova kungummangaliso. Ukuba ubungaxhaswa nguThixo, oko kukuthi ukuba ebengabakhokeli aze abakhusele abantu bakhe, ngowungaqhubeki umsebenzi wokushumayela. (Funda uMateyu 19:26.) Sinokuqiniseka ukuba njengokuba umoya oyingcwele kaThixo usebenza kwiintliziyo zabantu abaphaphileyo nabakulungeleyo ukumkhonza, umsebenzi wokushumayela uya kwenziwa de ugqitywe “kwandule ke kufike ukuphela.” Alifikanga ligalelekile elo xesha.
‘Imbandezelo Enkulu’
10. Wayichaza njani uYesu imbandezelo enkulu ezayo?
10 Isiphelo sale nkqubo ingendawo yezinto siya kufika ngexesha elibizwa ngokuba ‘yimbandezelo enkulu.’ (ISityhi. 7:14) Kodwa iBhayibhile ayisixeleli ukuba iya kuthabatha ixesha elingakanani, kodwa uYesu wathi: “Kuya kubakho imbandezelo enkulu ekungazange kubekho injengayo ukususela ekuqaleni kwehlabathi de kube ngoku, nekungasayi kubakho injengayo kwakhona.” (Mat. 24:21) Xa sicinga ukuba eli hlabathi selikhe labandezeleka njengakwiMfazwe Yehlabathi II ekwafa kuyo abantu abaqikelelwa kwizigidi ezingama-50 ukuya kutsho kwezingama-60, ngokuqinisekileyo imbandezelo enkulu ezayo iya kuba mbi ngakumbi. Iya kuphelela kwidabi leArmagedon. Ngelo xesha uYehova uya kuthuma imikhosi yakhe etshabalalisayo ukuba itshayele ngokupheleleyo yonke inkqubo kaSathana yasemhlabeni.—ISityhi. 16:14, 16.
11, 12. Sisiphi isiganeko esibonisa ukuqalisa kwembandezelo enkulu?
11 Isiprofeto seBhayibhile asisiniki umhla wokuqalisa kwembandezelo enkulu, kodwa sisixelela ngesiganeko esikhethekileyo esiya kubonisa ukuqalisa kwayo. Eso siganeko sikukutshatyalaliswa konqulo lobuxoki ngamagunya obupolitika. Kwiziprofeto zeBhayibhile ezikwiSityhilelo isahluko 17 nese-18, unqulo lobuxoki lufaniswa nehenyukazi eliye lahenyuza neenkqubo zobupolitika zomhlaba. ISityhilelo 17:16 sithetha ngexesha elingekude laxa la magunya opolitiko ‘eya kulithiya ihenyukazi, aliphanzise, alihlube libe ze, azidle iinxalenye zenyama yalo aze alitshise ngokupheleleyo ngomlilo.”
12 Xa lifika ixesha lokwenjenjalo, uThixo uya ‘kubeka ezintliziyweni zabo [abalawuli bobupolitika] ukuba baphumeze ingcamango yakhe’ yokutshabalalisa lonke unqulo lobuxoki. (ISityhi. 17:17) Ngoko sinokutsho ukuba nguThixo oza kulutshabalalisa. Nguye oza kugweba unqulo oluhanahanisayo noluthe kangangexesha elide lwafundisa iimfundiso ezichasene nokuthanda kukaThixo lwaza lwatshutshisa abakhonzi bakhe. Ihlabathi ngokubanzi aliyilindelanga intshabalalo ezayo yonqulo lobuxoki. Kodwa bayilindele bona abakhonzi bakaYehova abathembekileyo. Ebudeni bale mihla yokugqibela bebesoloko bexelela abantu ngayo.
13. Yintoni ebonisa ukuba isiphelo sonqulo lobuxoki siya kwenzeka ngokukhawuleza?
13 Kuya kubothusa gqitha abantu ukubona unqulo lobuxoki lutshatyalalisiwa. Isiprofeto seBhayibhile sibonisa ukuba nabanye “ookumkani bomhlaba” baza kuthi ngokuphathelele loo ntshabalalo: “Yeha, yeha, . . . ngenxa yokuba ufike ngelixa elinye umgwebo wakho!” (ISityhi. 18:9, 10, 16, 19) Ukusebenzisa kweBhayibhile ibinzana elithi “ngelixa elinye” kubonisa ukuba esi siganeko siya kwenzeka ngokukhawuleza.
14. Xa ekugqibeleni iintshaba zikaYehova zihlasela abakhonzi bakhe, uya kwenza ntoni?
14 Siyaqonda ukuba emva kokuba unqulo lobuxoki lutshatyalalisiwe, kuya kuhlaselwa abakhonzi bakaYehova abaye bavakalisa izigidimi zomgwebo. (Hez. 38:14-16) Ngolo hlaselo, abahlaseli baya kuba beqala uYehova, othembisa ngokubakhusela abantu bakhe abathembekileyo. UYehova uthi: “Ndiya kuthetha ndinobukhwele, ngomlilo wokuvutha komsindo wam. . . . Ndizazise phambi kwamehlo eentlanga ezininzi; zazi ukuba ndinguYehova.” (Funda uHezekile 38:18-23.) ELizwini lakhe uThixo uthi: “Ochukumisa nina [abakhonzi bakhe abathembekileyo] uchukumisa ukhozo lweliso lam.” (Zek. 2:8) Ngoko xa iintshaba zakhe zihlasela abakhonzi bakhe emhlabeni wonke, uYehova uya kubalwela. Oko aya kukwenza kuya kukhokelela kwinqanaba lokugqibela lembandezelo enkulu—iArmagedon. Iyalelwa nguKristu, imikhosi yeengelosi enamandla iya kuphumeza imigwebo kaYehova nxamnye nehlabathi likaSathana.
Indlela Okumele Kusichaphazele Ngayo Oku
15. Kufanele kusichaphazele njani ukwazi ukuba isiphelo sale nkqubo sisondele?
15 Ukwazi ukuba isiphelo sale nkqubo ingendawo yezinto siyasondela kufanele kusichaphazele njani? Umpostile uPetros wathi: “Ekubeni ke zonke ezi zinto ziza kuchithakala, luhlobo luni lwabantu enifanele nibe lulo ngokuphathelele ihambo engcwele nezenzo zozinikelo lobuthixo.” (2 Pet. 3:11) Loo mazwi abethelela imfuneko yokuhlala siphaphe ngakumbi ukuze siqiniseke ukuba ihambo yethu ivisisana nemilinganiselo kaThixo yaye ubomi bethu buquka imisebenzi yozinikelo lobuthixo, ibonisa nokuthanda kwethu uYehova. Ezo zenzo ziquka ukwenza unako nako wokushumayela iindaba ezilungileyo zoBukumkani ngaphambi kokuba isiphelo sifike. UPetros waphinda wathi: ‘Isiphelo sezinto zonke sisondele. Kuphapheleni ukuthandaza.’ (1 Pet. 4:7) Sisondela kuYehova size sibonise ukuba siyamthanda ngokuthandaza kuye rhoqo, sicela ukuba asikhokele ngomoya wakhe oyingcwele nebandla lakhe elisehlabathini lonke.
16. Kutheni kufuneka sibambelele ngokuqinileyo kwisiluleko sikaThixo?
16 Kula maxesha ayingozi kufuneka sibambelele ngokuqinileyo kwesi siluleko seLizwi likaThixo: “Hlalani nikuphaphele ngokungqongqo ukuba indlela enihamba ngayo ingabi njengeyabantu abangezozilumko kodwa ibe njengeyezilumko, nizongele ixesha, ngenxa yokuba imihla ingendawo.” (Efe. 5:15, 16) Ubungendawo bugabadele ngoku ngaphezu kwalo naliphi na ixesha embalini. USathana wenze izinto ezininzi zokuthintela abantu ekwenzeni ukuthanda kukaYehova nokubaphazamisa. Njengabakhonzi bakaThixo, siyakwazi oku yaye asifuni ukuvumela nantoni na ukuba isenze singathembeki kuThixo. Siyakwazi oko kuza kwenzeka kungekudala yaye sithembela kuYehova nakwiinjongo zakhe.—Funda eyoku-1 kaYohane 2:15-17.
17. Chaza indlela abaya kuvakalelwa ngayo abo basinde kwiArmagedon xa kusibakho uvuko.
17 Kuya kuzalisekiswa nesithembiso esimangalisayo sikaThixo sokuvusa abafileyo, kuba “kuza kubakho uvuko lwamalungisa nabangengomalungisa.” (IZe. 24:15) Phawula indlela esigxininiswa ngayo esi sithembiso: “Kuza kubakho uvuko”! Asinakukuthandabuza oko kuba kuthethwa nguYehova! UIsaya 26:19 uthembisa ngelithi: “Abafileyo bakho baya kuphila. . . . Vukani nize nimemelele ngovuyo, nina bahlala eluthulini! . . . Nomhlaba uya kubangela bazalwe kwanabo bangenamandla ekufeni.” Loo mazwi aqala azaliseka xa kwabuyiselwa abantu bakaThixo bamandulo kwilizwe labo lokuzalwa, nto leyo esinika ithemba lokuba aya kuzaliseka ngokoqobo kwihlabathi elitsha. Kuya kubakho uvuyo olungathethekiyo njengoko abo bavusiweyo bebonana nabo babathandayo! Ngokwenene sele liza kuphela ihlabathi likaSathana, yaye sisemgubasini wehlabathi elitsha likaThixo. Kubaluleke ngokwenene ukuba sihlale siphaphile!
Ngaba Uyakhumbula?
• Wawusithini umxholo weemfundiso zikaYesu?
• Sele wande kangakanani umsebenzi wokushumayela ngoBukumkani?
• Kutheni kubalulekile nje ukuba siphaphe?
• Yintoni ekukhuthazayo ngesithembiso esikwiZenzo 24:15?
[Ibhokisi/Umfanekiso okwiphepha 16, 17]
UKUQALISA KWEXESHA LOBUNZIMA
IThe Age of Turbulence: Adventures in a New World ngumxholo wencwadi yowama-2007 ebhalwe nguAlan Greenspan. Malunga neminyaka engama-20, wayengusihlalo weUnited States Federal Reserve Board eliliso kuyo yonke iinkqubo yeebhanki yelo lizwe. Lo kaGreenspan uthi xa ephuhlisa umahluko phakathi kwemeko yehlabathi ngaphambi kowe-1914 nasemva koko:
“Xa ujonga nje yonke indlela yokwenziwa kwezinto ngelo xesha, ngaphambi kowe-1914 ihlabathi lalibonakala lisenza inkqubela entle gqitha kwezenkcubeko nakwimpucuko, yaye ngendlela abantu ababephethene kakuhle ngayo, wawunokutsho ukuba sele beza kufezeka. Ngenkulungwane yeshumi elinesithoba yayisele itshayelwe inkqubo eyenyanyekayo yokuthengiswa kwamakhoboka. Ukuphathwa kwabantu ngendlela ebakhupha isidima kwehla kakhulu. . . . Ngenxa yeemveliso zobugcisa zenkulungwane yeshumi elinesithoba, sakwazi ukuba neziporo zikaloliwe, iimfonomfono, izibane zelektriki, iindawo zemiboniso bhanya-bhanya, iimoto nezinye izixhobo zekhaya ekungasa gede sizibala. Inzululwazi yezempilo, ukuveliswa kokutya okunezondlo, nokwenziwa kwamanzi afumaneke lula kwabangela ukuba abantu baphile ixesha elide noko . . . Ehlabathini lonke kwakubonakala ngathi izinto azinakuze zibuyele umva ngeny’ imini.”
Kodwa . . . “IMfazwe Yehlabathi I yeyona yayitshabalalisayo loo nkcubeko nobugcisa kuneMfazwe Yehlabathi II eyabulala abantu abaninzi, ngamany’ amazwi eyokuqala imfazwe yatshabalalisa imilinganiselo yokuphila. Andikwazi kuyilibala iminyaka yangaphambi kweMfazwe Yehlabathi I, kuba ngelo xesha abantu babebonakala beza kunqandwa ziinkwenkwezi. Kodwa namhlanje sele kudlule inkulungwane, izinto zahluke okwempuma kwintshona yaye ngoku sijongene nobona bunyaniso bezinto. Ngaba ubugrogrisi, ukufudumala kakhulu komhlaba, okanye ukulwelwa kwamalungelo abantu okuxhaphakileyo kuya kuchana ukudibaniselana kwamazwe ehlabathi ngendlela iMfazwe Yehlabathi I eyenza ngayo kwinkulungwane engaphambili? Akukho mntu waziyo.”
OkaGreenspan ukhumbula esafunda eyunivesithi, amazwi awathethwa nguNjingalwazi Wezoqoqosho uBenjamin M. Anderson (1886-1949) athi: “Abo babesele bekhule ngokwaneleyo ngelo xesha nabasakhumbulayo ukuba ihlabathi lalinjani ngaphambi kweMfazwe Yehlabathi I bathi xa bekhangela emva, babawele ukuba ixesha libuyiselwe umva. Abantu babeziva bekhuseleke ngendlela abangazange baphinde bazive ngayo.”—Economics and the Public Welfare.
IA World Undone, ebhalwe nguG. J. Meyer, yaza yapapashwa ngowama-2006 ithetha into efanayo. Ithi: “Kusoloko kusithiwa iziganeko zembali ‘zitshintshe yonke into.’ IMfazwe Enkulu [yowe-1914-1918] iyenzile loo nto. Ngokwenene le mfazwe itshintshe yonke into: kungekhona nje imida, oorhulumente namazwe, kodwa itshintshe nendlela abantu abalijonga ngayo ihlabathi neziqu zabo ukususela ngelo xesha. Yonakalise yonke into, yaza yashiya ihlabathi lasemva kwemfazwe lingenayo nenye kwizinto elalinazo ngaphambili.”
[Umfanekiso okwiphepha 18]
EArmagedon, uYehova uya kuthumela imikhosi enamandla yeengelosi