Indlela Amazwi KaYesu Alubangela Ngayo Uyolo
“[UYesu] wenyuka waya entabeni; yaye . . . abafundi bakhe beza kuye; waza . . . wabafundisa.”—MAT. 5:1, 2.
1, 2. (a) UYesu wayinikela kweziphi iimeko iNtshumayelo yakhe yaseNtabeni? (b) UYesu wayiqalisa njani intetho yakhe?
KUNGOWAMA-31 C.E. Kangangethutyana uYesu uyayeka ukushumayela eGalili aze aye kwiPasika eseYerusalem. (Yoh. 5:1) Xa ebuyela eGalili, uthandaza ubusuku bonke ecela ukuba uThixo amncede njengoko ekhetha abafundi abali-12. Ngosuku olulandelayo kuhlanganisana isihlwele njengoko uYesu ephilisa abagulayo. Phambi kwabafundi bakhe nabanye abantu abakhoyo, uhlala phantsi ngasentabeni aze aqalise ukubafundisa.—Mat. 4:23–5:2; Luka 6:12-19.
2 UYesu uqalisa intetho yakhe—iNtshumayelo yaseNtabeni—ngokubonisa ukuba uyolo lufumaneka ngokuba nolwalamano oluhle noThixo. (Funda uMateyu 5:1-12.) Uyolo ‘kukuba sempilweni okunokubangelwa kukwaneliseka novuyo olungathethekiyo.’ Izinto ezisithoba ezibangela uyolo awathetha ngazo uYesu zibalaselisa isizathu sokuba amaKristu onwabe, yaye la mazwi aseluncedo nanamhlanje kanye ngendlela awayeyiyo kwiminyaka emalunga nama-2 000 eyadlulayo. Ngoku makhe siwahlolisise ngokweenkcukacha.
“Abo Bayiphapheleyo Intswelo Yabo Yokomoya”
3. Kuthetha ukuthini ukuphaphela intswelo yethu yokomoya?
3 “Banoyolo abo bayiphapheleyo intswelo yabo yokomoya, kuba ubukumkani bamazulu bobabo.” (Mat. 5:3) “Abo bayiphapheleyo intswelo yabo yokomoya” bayaqonda ukuba baswele ngokomoya yaye bafuna ukwenzelwa inceba nguThixo.
4, 5. (a) Kutheni abo bayiphapheleyo intswelo yabo yokomoya benoyolo? (b) Inokwaneliswa njani intswelo yethu yokomoya?
4 Abo bayiphapheleyo intswelo yabo yokomoya banoyolo “kuba ubukumkani bamazulu bobabo.” Ukwamkela uYesu njengoMesiya kwavulela abafundi bakhe bokuqala ithuba lokulawula naye kuBukumkani bukaThixo basezulwini. (Luka 22:28-30) Enoba thina sinethemba lokuba ziindlalifa noKristu ezulwini okanye sikhangele phambili kubomi obungunaphakade kwiparadesi esemhlabeni phantsi kolawulo loBukumkani, sinokuba noyolo kuba siyiphaphele ngokwenene intswelo yethu yokomoya yaye siqonda ukuba sixhomekeke kuThixo ngokupheleleyo.
5 Asingabo bonke abantu abayiphapheleyo intswelo yabo yokomoya, kuba abaninzi abanalukholo yaye abazixabisi izinto ezingcwele. (2 Tes. 3:1, 2; Heb. 12:16) Iindlela zokwanelisa intswelo yethu yokomoya ziquka ukuyifunda ngokuzimisela iBhayibhile, ukukhuthalela ukwenza abafundi, nokubakho rhoqo kwiintlanganiso zamaKristu.—Mat. 28:19, 20; Heb. 10:23-25.
Abazili ‘Abanoyolo’
6. Ngoobani “abo bazilileyo,” yaye kutheni ‘benoyolo’?
6 “Banoyolo abo bazilileyo, kuba baya kuthuthuzelwa.” (Mat. 5:4) “Abo bazilileyo” ikwangabo “bayiphapheleyo intswelo yabo yokomoya.” Abazilanga ngengqiqo yokuhamba bekhala. Bazile kuba bebuhlungu yimeko yabo yokuba nesono neemeko ezibangelwa kukungafezeki kwabantu. Kutheni aba bazili ‘benoyolo’? Kungenxa yokuba banokholo kuThixo nakuKristu yaye bathuthuzelwa kukuba nolwalamano oluhle noYehova.—Yoh. 3:36.
7. Sifanele sivakalelwe njani lihlabathi likaSathana?
7 Ngaba ngamnye kuthi uzilile ngenxa yokungabikho kobulungisa okugqugqisileyo kwihlabathi likaSathana? Sivakalelwa njani eneneni ngoko kuthenjiswa leli hlabathi? Umpostile uYohane wathi: “Konke okusehlabathini—inkanuko yenyama nenkanuko yamehlo nokuqhayisa ngezinto zobu bomi—akuphumi kuBawo.” (1 Yoh. 2:16) Kodwa kuthekani ukuba sivakalelwa kukuba imeko yethu yokomoya iphazanyiswa ‘ngumoya wehlabathi,’ amandla alawula abantu abahlukaniswe noThixo? Xa kunjalo, simele sizingise emthandazweni, sifunde iLizwi likaThixo, size sicele uncedo kubadala. Ukuba sisondela kuYehova, siya ‘kuzifumanela intuthuzelo’ kungakhathaliseki ukuba yintoni esikhathazayo.—1 Kor. 2:12; INdu. 119:52; Yak. 5:14, 15.
Banoyolo Ngokwenene “Abo Banomoya Wobulali”!
8, 9. Kuthetha ukuthini ukuba nomoya wobulali, yaye kutheni abanomoya wobulali benoyolo?
8 “Banoyolo abo banomoya wobulali, kuba baya kuwudla ilifa umhlaba.” (Mat. 5:5) Ukuba ‘nomoya wobulali,’ akubonisi ukuba buthathaka okanye ukuzenza ngathi uzolile. (1 Tim. 6:11) Xa sinomoya wobulali siya kuwubonisa ngokwenza ukuthanda kukaYehova nokwamkela ulwalathiso lwakhe. Umoya wethu wobulali uya kubonakala kwindlela esiwaphatha ngayo amanye amaKristu kwakunye nabanye abantu. Loo moya uyavisisana nesiluleko sikampostile uPawulos.—Funda eyabaseRoma 12:17-19.
9 Kutheni abo banomoya wobulali benoyolo? Kungenxa yokuba “baya kuwudla ilifa umhlaba,” ngokutsho kukaYesu onomoya wobulali. UyiNdlalifa eyintloko yomhlaba. (INdu. 2:8; Mat. 11:29; Heb. 2:8, 9) Noko ke, “iindlalifa ezimanyene noKristu” ezinomoya wobulali zidla ilifa umhlaba kunye naye. (Roma 8:16, 17) Abanye abaninzi abanobulali abaza kuphila emhlabeni phantsi koBukumkani bukaYesu, baya kunandipha ubomi obungunaphakade.—INdu. 37:10, 11.
10. Ukungabi nawo umoya wobulali kunokuzichaphazela njani iimbopheleleko esinazo ebandleni nolwalamano esinalo nabanye?
10 Sifanele sibe nomoya wobulali kanye njengoYesu. Kodwa kuthekani ukuba sidume ngokuba ngoophuma-silwe? Ukuba ndlongondlongo ngolo hlobo kunokwenza abantu bachasele kuthi. Ukuba singabazalwana yaye sinqwenela ukuba neembopheleleko ebandleni, isimo sengqondo esinjalo sinokusenza singafaneleki. (1 Tim. 3:1, 3) UPawulos waxelela uTito ukuba aqhubeke ekhumbuza amaKristu aseKrete ukuba ‘angabi ngabathanda ukulwa, abe nganengqiqo, ebonisa ubulali kubantu bonke.’ (Tito 3:1, 2) Loo moya wobulali uyintsikelelo ngokwenene kwabanye abantu!
Balambele “Ubulungisa”
11-13. (a) Kuthetha ukuthini ukulambela nokunxanelwa ubulungisa? (b) ‘Bahluthiswa’ njani abo balambela baze banxanelwe ubulungisa?
11 “Banoyolo abo balambela baze banxanelwe ubulungisa, kuba baya kuhluthiswa.” (Mat. 5:6) “Ubulungisa” awayethetha ngabo uYesu kukwenza okulungileyo ngokuvisisana nokuthanda kukaThixo nemiyalelo yakhe. Umdumisi wathi “utyumkile ngokulangazelela” izigwebo zobulungisa zikaThixo. (INdu. 119:20) Ngaba ubulungisa sibuxabisa kangangokude sibulambele size sibunxanelwe?
12 UYesu wathi abo balambela baze banxanelwe ubulungisa baya kuba noyolo ngenxa yokuba baya “kuhluthiswa,” okanye baneliswe. Oku kwenzeka emva kwePentekoste yowama-33 C.E. xa umoya oyingcwele kaYehova waqalisa ‘ukunika ihlabathi ubungqina obeyisayo ngobulungisa.’ (Yoh. 16:8) Esebenzisa umoya oyingcwele, uThixo waphefumlela abantu ukuba babhale iZibhalo zamaKristu zesiGrike, eziyingenelo “ekuqeqesheleni ebulungiseni.” (2 Tim. 3:16) Kanti umoya kaThixo usinceda ‘sambathe ubuntu obutsha obadalwa ngokokuthanda kukaThixo ngobulungisa bokwenyaniso nokunyaniseka.’ (Efe. 4:24) Ngaba akuthuthuzeli ukwazi ukuba abo baguqukayo baze bacele ukuxolelwa izono zabo ngedini lentlawulelo likaYesu banokuba nolwalamano oluhle noThixo?—Funda eyabaseRoma 3:23, 24.
13 Ukuba sinethemba lokuphila emhlabeni, ukulambela nokunxanelwa kwethu ubulungisa kuya kwaneliswa ngokupheleleyo xa sifumana ubomi obungunaphakade phantsi kweemeko ezinobulungisa emhlabeni. De kube lelo xesha, masizimisele ukuphila ngokuvisisana nemilinganiselo kaYehova. UYesu wathi: “Qhubekani . . . nifuna kuqala ubukumkani nobulungisa [bukaThixo].” (Mat. 6:33) Ukwenjenjalo kuya kusigcina sixakeke ngumsebenzi kaThixo yaye sonwabe ngokwenene.—1 Kor. 15:58.
Isizathu Sokuba “Abanenceba” Benoyolo
14, 15. Sinokuyibonisa njani inceba, yaye kutheni benoyolo nje “abanenceba”?
14 “Banoyolo abanenceba, kuba baya kwenzelwa inceba.” (Mat. 5:7) “Abanenceba” benza izinto kuba benovelwano nosizi ngabanye. UYesu waphilisa ngokungummangaliso abaninzi abagulayo ngenxa yokuba wayebasizela. (Mat. 14:14) Inceba ibonakaliswa xa abantu bexolela abo babonileyo, kanye njengokuba uYehova ebaxolela ngenceba abo baguqukayo. (Eks. 34:6, 7; INdu. 103:10) Sinokuyibonisa ngolo hlobo inceba nangokuthetha nokubaphatha ngobubele abantu abasweleyo, nto leyo enokubanika isiqabu. Indlela ebalaseleyo yokubonisa inceba kukufundisa abanye inyaniso eseBhayibhileni. Enosizi sisihlwele, uYesu “wasifundisa izinto ezininzi.”—Marko 6:34.
15 Kungeso sizathu le nto sivumelana nala mazwi kaYesu: “Banoyolo abanenceba, kuba baya kwenzelwa inceba.” Ukuba sibonisa inceba kwabanye, nabo baya kwenjenjalo kuthi. UThixo usenokukhetha ukungasigwebi qatha ukuba siye sabonisa inceba kwabanye. (Yak. 2:13) Ngabanenceba kuphela abaya kuxolelwa izono baze bafumane ubomi obungunaphakade.—Mat. 6:15.
Isizathu Sokuba “Abasulungekileyo Entliziyweni” Benoyolo
16. Kuthetha ukuthini ‘ukusulungeka entliziyweni,’ yaye abo banolo phawu ‘bambona njani uThixo’?
16 “Banoyolo abasulungekileyo entliziyweni, kuba baya kumbona uThixo.” (Mat. 5:8) Ukuba ‘sisulungekile entliziyweni,’ oko kuya kubonakala kwizinto esizithandayo, kwizinto esizinqwenelayo nakwiinjongo zethu. Siya kuba ‘nothando oluphuma kwintliziyo ehlambulukileyo.’ (1 Tim. 1:5) Xa sineentliziyo ezicocekileyo, siya ‘kumbona uThixo.’ Oku akuthethi ukumbona ngokoqobo uYehova, kuba ‘akukho mntu unokubona uThixo aze aphile.’ (Eks. 33:20) Noko ke, ekubeni wabubonakalisa ngokugqibeleleyo ubuntu bukaThixo, uYesu wayenokuthi: “Lowo undibonileyo mna umbonile noBawo.” (Yoh. 14:7-9) Njengabanquli bakaYehova emhlabeni, ‘sinokumbona uThixo’ ngokumbukela esinceda. (Yobhi 42:5) KumaKristu athanjisiweyo ukubona uThixo kufikelela encotsheni xa evuselwa kubomi bomoya aze ambone ngokoqobo uBawo wasezulwini.—1 Yoh. 3:2.
17. Ukuba nentliziyo esulungekileyo kuya kusichaphazela njani?
17 Ngenxa yokuba icocekile ngokuziphatha nangokomoya, intliziyo esulungekileyo ayihlali icinga ngezinto ezingacocekanga ngokwembono kaYehova. (1 Kron. 28:9; Isa. 52:11) Ukuba sisulungekile entliziyweni, siya kuthetha size senze izinto ezihlambulukileyo yaye asisayi kunikela inkonzo yenkwalambisa kuYehova.
“Abanoxolo” Baba Ngoonyana BakaThixo
18, 19. “Abanoxolo” baziphatha njani?
18 “Banoyolo abanoxolo, kuba baya kubizwa ngokuba ‘ngoonyana bakaThixo.’” (Mat. 5:9) “Abanoxolo” babonakala ngezinto abazenzayo nabangenakuzenza. Ukuba siluhlobo lwabantu uYesu awayethetha ngalo, sinoxolo yaye ‘asibuyiseli ububi ngobubi nakubani na.’ Kunoko, ‘sihlala siphuthuma okulungileyo omnye komnye.’—1 Tes. 5:15.
19 Igama lesiGrike eliguqulelwe ngokuthi ‘ukuba noxolo’ kuMateyu 5:9 ngokoqobo lithetha ‘ukudala uxolo.’ Ukuze sibe phakathi kwabo banoxolo sifanele sisoloko sikhuthaza uxolo. Abantu abadala uxolo abenzi nantoni na ‘eyahlukanisa abo bazanayo.’ (IMize. 16:28) Njengabanoxolo, sithabatha amanyathelo ‘okuphuthuma uxolo nabantu bonke.’—Heb. 12:14.
20. Ngoobani ngoku ‘abangoonyana bakaThixo,’ yaye ngoobani abanye abaya kuthi ekugqibeleni babe ngabantwana bakaThixo?
20 Banoyolo abanoxolo ngenxa yokuba “baya kubizwa ngokuba ‘ngoonyana bakaThixo.’” AmaKristu athanjisiweyo athembekileyo ngakaYehova yaye ‘angoonyana bakaThixo.’ Sele enolwalamano olusondeleyo noYehova njengabantwana bakhe ngenxa yokuba enokholo kuKristu yaye emnqula ngentliziyo epheleleyo “uThixo wothando nowoxolo.” (2 Kor. 13:11; Yoh. 1:12) Kuthekani ‘ngezinye izimvu’ zikaYesu ezinoxolo? UYesu uya kuba ‘nguBawo ongunaPhakade’ kuzo ebudeni boLawulo lwakhe Lweminyaka Eliwaka, kodwa ekupheleni kwalo uya kuzithoba kuYehova zize zona zibe ngabantwana bakaThixo ngengqiqo epheleleyo.—Yoh. 10:16; Isa. 9:6; Roma 8:21; 1 Kor. 15:27, 28.
21. Siya kuzenza njani izinto xa “siphila ngomoya”?
21 Ukuba “siphila ngomoya,” ukuba noxolo kuya kuba lolunye lweempawu ezibonwayo ngabanye kuthi. Asisayi ‘kukhuphisana’ okanye ‘sicaphukisane.’ (Gal. 5:22-26; iBhayibhile yesiXhosa yowe-1996) Kunoko, siya kuzama “ukuba noxolo nabantu bonke.”—Roma 12:18.
Banoyolo Nangona Betshutshiswa!
22-24. (a) Ziziphi izizathu zokuba noyolo kwabo batshutshiswa ngenxa yobulungisa? (b) Yintoni eza kuxutyushwa kumanqaku amabini alandelayo?
22 “Banoyolo abo baye batshutshiswa ngenxa yobulungisa, kuba ubukumkani bamazulu bobabo.” (Mat. 5:10) UYesu unaba athi kule nkalo: “Ninoyolo nina xa abantu beningcikiva, benitshutshisa, bethetha ngani lonke uhlobo lwento engendawo bexoka, ngenxa yam. Yibani nemihlali nixhume ngovuyo, ngokuba umvuzo wenu mkhulu emazulwini; kuba babatshutshisa ngaloo ndlela abaprofeti ababengaphambi kwenu.”—Mat. 5:11, 12.
23 Njengabaprofeti bakaThixo bamandulo, amaKristu alindele ukugculelwa, ukutshutshiswa nokuba kuxokwe ngawo—konke oko kusenziwa “ngenxa yobulungisa.” Noko ke, xa sizinyamezela ngokuthembeka ezo mvavanyo, siya kwaneliseka ngenxa yokuba sikholisa yaye sizukisa uYehova. (1 Pet. 2:19-21) Ukubandezeleka kwethu akumele kunciphise uvuyo esinalo ekukhonzeni uYehova ngoku okanye kwixesha elizayo. Akunakulunciphisa noyolo lokulawula noKristu kuBukumkani basezulwini okanye uvuyo lokulawulwa bubo emhlabeni nokufumana ubomi obungunaphakade. Ezo ntsikelelo zibubungqina bokuba uThixo uyakholiswa sithi, unobubele yaye unesisa kuthi.
24 Ininzi into esinokuyifunda kwiNtshumayelo yaseNtabeni. Amanqaku amabini alandelayo aza kuxubusha ezinye izifundo ezahlukahlukeneyo. Makhe sibone ukuba sinokuwasebenzisa njani loo mazwi kaYesu Kristu.
Ubuya Kuphendula Uthini?
• Kutheni benoyolo “abo bayiphapheleyo intswelo yabo yokomoya”?
• Ziziphi izizathu zokuba noyolo kwabo “banomoya wobulali”?
• Kutheni amaKristu enoyolo nangona etshutshiswa?
• Yiyiphi into ebangela uyolo eyakhankanywa nguYesu oyithanda kakhulu wena?
[Umfanekiso okwiphepha 7]
Izinto ezisithoba ezibangela uyolo awazikhankanyayo uYesu ziseluncedo ngendlela ezaziyiyo ngelo xesha
[Umfanekiso okwiphepha 8]
Indlela ebalaseleyo yokubonisa inceba kukuxelela abanye ngenyaniso eseBhayibhileni