Abaveleli Nezicaka Zolungiselelo Bamiselwa Ngokobuthixo
“Zilumkeleni nina nawo wonke umhlambi, ekuthe phakathi kwawo umoya oyingcwele wanimisela nangabaveleli.”—IZENZO 20:28.
1, 2. Uzaliseka njani uIsaya 60:22?
UYEHOVA waxela kwakude kudala ukuba kwakuya kwenzeka into ephawulekayo kwixesha lokuphela. Ngomprofeti uIsaya, kwathiwa: “Omncinane uya kuba liwaka, nophantsi abe luhlanga olunamandla. Mna, Yehova, ndiya kukukhawulezisa oko ngexesha lako.”—Isaya 60:22.
2 Ngaba bukho ubungqina bokuba esi siprofeto siyazaliseka namhlanje? Eneneni, kunjalo! Ebudeni beminyaka yee-1870, kwasekwa ibandla elinye labantu bakaYehova eAllegheny, ePennsylvania, eMerika. Ukususela kweso siqalo sincinane, kuye kwavela amashumi amawaka amabandla yaye ayanda ehlabathini lonke. Izigidi zabavakalisi boBukumkani—uhlanga olunamandla—ngoku zinxulumana namabandla angaphezu kwama-91 000 kumazwe angaphezu kwama-235 emhlabeni wonke. Ngokungathandabuzekiyo, obu bubungqina bokuba uYehova uyakukhawulezisa ukuhlanganiswa kwabanquli bokwenyaniso ngaphambi kokuba kuqhambuke “imbandezelo enkulu,” ekufuphi ngeyona ndlela ngoku.—Mateyu 24:21; ISityhilelo 7:9-14.
3. Kuthetha ntoni ukubhaptizwa ‘egameni loYise, loNyana nelomoya oyingcwele’?
3 Emva kokuzahlulela kuYehova, nangokuvisisana nemiyalelo kaYesu, ezi zigidi ziye zabhaptizwa “egameni loYise neloNyana nelomoya oyingcwele.” (Mateyu 28:19) Ukubhaptizwa “egameni loYise” kuthetha ukuba aba bantu bazahluleleyo bayamamkela uYehova njengoYise wasezulwini noMniki-bomi yaye bayazithoba kulongamo lwakhe. Ukubhaptizwa ‘egameni loNyana’ kubonisa ukuba bayavuma ukuba uYesu Kristu nguMhlawuleli, yiNkokeli noKumkani wabo. Bayayiqonda nendima yomoya oyingcwele kaThixo, okanye amandla asebenzayo, ekwalathiseleni ubomi babo. Oku kubonisa ukuba baye babhaptizwa ‘egameni lomoya oyingcwele.’
4. Bamiselwa njani abalungiseleli abangamaKristu?
4 Ekubhaptizweni kwabo, abafundi abatsha bamiselwa njengabalungiseleli bakaYehova uThixo. Ngubani obamiselayo? Ngokusisiseko, amazwi akweyesi-2 kwabaseKorinte 3:5 abhekisela kubo xa esithi: “Ukufaneleka ngokwaneleyo kwethu [njengabalungiseleli] kuphuma kuThixo.” Ayikho imbeko engakumbi ebebenokunqwenela ukuyifumana ngaphezu kwaleyo yokumiselwa nguYehova uThixo ngokwakhe! Emva kokubhaptizwa kwabo, baya kuqhubeka bekhula ngokomoya njengabalungiseleli ‘beendaba ezilungileyo’ lo gama nje bekwamkela ukwalathiswa ngumoya kaThixo yaye beqhubeka belisebenzisa iLizwi lakhe.—Mateyu 24:14; IZenzo 9:31.
Ukumiselwa—Ngokobuthixo—Kungekhona Ngedemokhrasi
5. Ngaba abaveleli abangamaKristu nezicaka zolungiselelo bamiselwa ngenkqubo yedemokhrasi? Cacisa.
5 Ukuze kunyanyekelwe iimfuno zokomoya zabalungiseleli abakhutheleyo abandayo kufuneka abaveleli abafanelekayo bencediswa zizicaka zolungiselelo ezifanelekayo. (Filipi 1:1) Amiselwa njani loo madoda okomoya? Akusetyenziswa iindlela ezifana nezo zisetyenziswa yiNgqobhoko. Ngokomzekelo, abaveleli abangamaKristu abanyulwa ngokusebenzisa inkqubo yedemokhrasi, oko kukuthi, ngokuvotelwa luninzi lwabantu abanxulumana nelo bandla. Kunoko, bamiselwa ngenkqubo yobuthixo. Kuthetha ukuthini oko?
6. (a) Luyintoni ulawulo lobuthixo lokwenene? (b) Kutheni abaveleli nezicaka zolungiselelo bemiselwa ngokobuthixo?
6 Ngamafutshane, ulawulo lobuthixo lokwenene kukulawulwa nguThixo. AmaNgqina kaYehova ngokuzithandela ayazithoba kulawulo lwakhe yaye ayasebenzisana ukuze enze ukuthanda kukaThixo. (INdumiso 143:10; Mateyu 6:9, 10) Abaveleli abangamaKristu, okanye abadala nezicaka zolungiselelo bamiselwa ngokobuthixo ngenxa yokuba inkqubo yokuncomela nokumisela loo madoda anokuthenjwa yenziwa ngokuvisisana nelungiselelo likaThixo njengoko landlalwe kwiZibhalo Ezingcwele. Yaye “njengentloko yezinto zonke,” uYehova eneneni unelungelo lokugqiba ngendlela eya kusebenza ngayo intlangano yakhe ebonakalayo.—1 Kronike 29:11; INdumiso 97:9.
7. Alawulwa njani amaNgqina kaYehova?
7 Ngokwahlukileyo kumaqela amaninzi onqulo eNgqobhoko, amaNgqina kaYehova akazigqibeli ngokwawo uhlobo lwenkqubo yonqulo asebenza phantsi kwalo. La maKristu anyanisekileyo azabalazela ukunamathela kwimilinganiselo kaYehova. Abaveleli abaphakathi kwawo ababekwa ngokwenkqubo ethile yabalawuli bebandla lasekuhlaleni, ziinkokeli ezingabefundisi, okanye inkqubo yolawulo yecawa. Ukuba imibutho yehlabathi ifuna ukufak’ impumlo ekumiselweni kwabathile, abantu bakaYehova abavumi ukulalanisa. Ngokunyanisekileyo, baxelisa oko kwenziwa ngabapostile ngenkulungwane yokuqala xa bathi: “Simele sithobele uThixo njengomlawuli kunabantu.” (IZenzo 5:29) Ngaloo ndlela, amaNgqina azithoba kuThixo ezintweni zonke. (Hebhere 12:9; Yakobi 4:7) Ukulandela inkqubo yobuthixo kuzisa inkoliseko kaThixo.
8. Inkqubo yedemokhrasi yahluka njani kweyobuthixo?
8 Njengabakhonzi boMlawuli Wobuthixo Omkhulu, uYehova, senza kakuhle ukukhumbula umahluko phakathi kweenkqubo zedemokhrasi nezobuthixo. Iinkqubo zedemokhrasi zifuna ukuba abantu babe nabameli ngokulinganayo yaye ngokufuthi kufuneka ubani enze iphulo lokuvotelwa ngaphambi konyulo aze anyulwe kuba evotelwe luninzi. Azikho ezo nkqubo xa kumiselwa ubani ngokobuthixo. Loo mntu akamiselwa ngabantu; engamiselwa nanguthunywashe othile wasemthethweni. Kuyabonakala ukuba wayebhekisela ekumiselweni kwakhe nguYesu noYehova ‘njengompostile weentlanga,’ xa uPawulos waxelela abaseGalati ukuba akamiselwanga ‘ngokuvela ebantwini kanjalo kungengamntu, kodwa kungaye uYesu Kristu noThixo uYise, owamvusayo kwabafileyo.’—Roma 11:13; Galati 1:1.
Ukumiselwa Ngomoya Oyingcwele
9. Zithini IZenzo 20:28 ngokumiselwa kwabaveleli abangamaKristu?
9 UPawulos wakhumbuza abaveleli ababehlala e-Efese ukuba babemiselwe nguThixo ngomoya oyingcwele. Wathi: “Zilumkeleni nina nawo wonke umhlambi, ekuthe phakathi kwawo umoya oyingcwele wanimisela nangabaveleli, ukuba nilaluse ibandla likaThixo, elo walithenga ngegazi lowakhe uNyana.” (IZenzo 20:28) Abo baveleli bangamaKristu kwakufuneka baqhubeke bekhokelwa ngumoya oyingcwele njengoko babephumeza imisebenzi yabo njengabalusi bomhlambi kaThixo. Ukuba loo ndoda imiselweyo ayisayifikeleli imilinganiselo yobuthixo, ekuhambeni kwexesha umoya oyingcwele wawusebenza ukuze umshenxise kweso sigxina akuso.
10. Kutshiwo njani ukuba umoya oyingcwele unendima ebalulekileyo kwabo bamiselwa ngokobuthixo?
10 Kutheni umoya oyingcwele unendima ebaluleke ngolo hlobo? Okokuqala, ingxelo echaza izinto ezifunekayo kumntu oza kuvelela ngokomoya yaphefumlelwa ngomoya oyingcwele. Kwiileta awayezibhalela uTimoti noTito, uPawulos wachaza imilinganiselo emele ifikelelwe ngabaveleli nezicaka zolungiselelo. Wachaza imilinganiselo eyahlukahlukeneyo emalunga ne-16 xa iyonke. Ngokomzekelo, abaveleli babefanele babe ngabangenakukhalazeleka, babe ngcathu ngemikhwa, baphile engqondweni, balungelelane, babuk’ iindwendwe, bafanelekele ukufundisa, babe yimizekelo njengeentloko-ntsapho. Babefanele babe ngabalungeleleneyo ekusebenziseni iziselo ezinxilisayo, bangabi ngabathandi bemali, bazeyise. Loo milinganiselo iphakamileyo yayibekelwa namadoda azabalazela ukumiselwa njengezicaka zolungiselelo.—1 Timoti 3:1-10, 12, 13; Tito 1:5-9.
11. Ziziphi ezinye zeemfaneleko ezifanele zifikelelwe ngamadoda azabalazela ukunyamekela iimbopheleleko zebandla?
11 Xa siqwalasela ezi mfaneleko kuyabonakala ukuba abo bakhokelayo kunqulo lukaYehova bamele babe ngumzekelo kwihambo yobuKristu. Amadoda azabalazela ukunyamekela iimbopheleleko zebandla amele angqine ukuba umoya oyingcwele uyasebenza kuwo. (2 Timoti 1:14) Kumele kubonakale kula madoda ukuba umoya kaThixo uvelisa isiqhamo ‘esiluthando, uvuyo, uxolo, ukuzeka kade umsindo, ububele, ukulunga, ukholo, ubulali, ukuzeyisa.’ (Galati 5:22, 23) Eso siqhamo siya kubonakala kwindlela awaphatha ngayo amanye amakholwa nabanye. Kakade ke, bambi banokubalasela ekubonakaliseni iziqhamo ezithile zomoya, ngoxa abanye benokufikelela ezinye iimfaneleko zobuveleli ngomkhamo obalaseleyo. Noko ke, kuyo yonke indlela yabo yokuphila, bonke abo banethemba lokumiselwa njengabaveleli okanye izicaka zolungiselelo bafanele babonise ukuba bangabantu bokomoya, bafikelele imilinganiselo eseLizwini likaThixo.
12. Ngoobani ekunokuthiwa bamiselwe ngomoya oyingcwele?
12 Xa uPawulos wabongoza abanye ukuba babe ngabaxelisa yena, wayekwenza oko enenkululeko yokuthetha ngenxa yokuba yena ngokwakhe wayexelisa uYesu Kristu, ‘owasishiya nomzekelo, ukuze silandele emanyathelweni akhe ngokusondeleyo.’ (1 Petros 2:21; 1 Korinte 11:1) Ngaloo ndlela, abo bayifikelelayo imilinganiselo yeZibhalo ngexesha lokumiselwa kwabo njengabaveleli okanye izicaka zolungiselelo kunokuthiwa bamiselwe ngomoya oyingcwele.
13. Umoya oyingcwele ubanceda njani abo bancomela amadoda aza kukhonza ibandla?
13 Kukho omnye uthunywashe obonisa indlela osebenza ngayo umoya oyingcwele xa kunconyelwa naxa kumiselwa abaveleli. UYesu wathi ‘uBawo osezulwini uyabanika umoya oyingcwele abo bamcelayo.’ (Luka 11:13) Ngoko xa abadala bebandla lasekuhlaleni behlanganisana ukuze bancomele amadoda okunyamekela iimbopheleleko zebandla, bathandazela umoya kaThixo ukuba ubakhokele. Uncomelo lwabo balwenza ngokusekelwe koko kuchazwe liLizwi likaThixo eliphefumlelweyo, yaye umoya oyingcwele uyabanceda baqonde enoba loo mntu bacinga ngokuba amiselwe uyayifikelela kusini na imilinganiselo yeZibhalo. Abo bancomelayo abamele baphenjelelwe ngokungafanelekanga yimbonakalo yangaphandle, yimfundo okanye ubuchule bemvelo. Eyona nto bamele bayiqwalasele ngokuyintloko kukuba lo mntu ungumntu wokomoya kusina na, lowo amalungu ebandla angenakuba mathidala ukuya kufuna isiluleko sokomoya kuye.
14. Yintoni esiyifundayo kwiZenzo 6:1-3?
14 Ngoxa amaqumrhu abadala encedisana nabaveleli abahambahambayo ukuncomela abazalwana abaza kukhonza njengabadala nezicaka zolungiselelo, ukumiselwa kwenziwa ngokuvisisana nendlela eyamiselwa kwinkulungwane yokuqala. Ngesinye isihlandlo, kwafuneka amadoda afanelekayo ngokomoya ukuba anyamekele isabelo esibalulekileyo. Iqumrhu elilawulayo lanikela olu lwalathiso lulandelayo: “Zifuneleni amadoda avunyiweyo asixhenxe phakathi kwenu, azele ngumoya nobulumko, ukuze siwamisele phezu kwalo mcimbi uyimfuneko.” (IZenzo 6:1-3) Xa amadoda awayesingethe lo mbandela ancomelayo, amadoda aseYerusalem awayephathiswe le mbopheleleko awamisela loo madoda. Nanamhlanje kusetyenziswa indlela efanayo.
15. IQumrhu Elilawulayo libandakanyeke njani kumbandela wokumiselwa kwabantu?
15 IQumrhu Elilawulayo lamaNgqina kaYehova ngokungqalileyo limisela onke amalungu eeKomiti zamaSebe. Xa lisenza isigqibo ngalowo unokunyamekela loo mbopheleleko inzima, iQumrhu Elilawulayo licinga ngoko kwathethwa nguYesu xa wayesithi: “Wonk’ ubani onikwe okuninzi, kuya kufunwa okuninzi kuye; nalowo abantu bambeke ukuba aphathe okuninzi, baya kufuna okungakumbi kunokuqhelekileyo kuye.” (Luka 12:48) Ukongezelela ekumiseleni amalungu eKomiti yeSebe, iQumrhu Elilawulayo limisela abadala baseBheteli nabaveleli abahambahambayo. Noko ke, liyalela abazalwana abanokuthenjwa ukuba bamisele abanye abathile egameni labo. Nakule nkalo kulandelwa imilinganiselo yeZibhalo.
‘Misela, Njengoko Ndakuyalelayo’
16. Kwakutheni ukuze uPawulos ashiye uTito eKrete, yaye oku kubonisa ntoni ngokuphathelele ukumiselwa ngokobuthixo okwenziwa namhlanje?
16 UPawulos waxelela uTito awayesebenza kunye naye esithi: “Ndakushiya eKrete ngenjongo yokuba umise izinto ngendlela efanelekileyo, umisele namadoda amakhulu kwizixeko ngezixeko, njengoko ndakuyalelayo.” (Tito 1:5) Wandula ke uPawulos wachaza iimfaneleko ezaziza kukhangelwa nguTito kumadoda afanelekela ukumiselwa. Ngoko ke, namhlanje iQumrhu Elilawulayo limisela abazalwana abafanelekayo kumasebe ukuba babe ngabameli balo ekumiseleni abadala nezicaka zolungiselelo. Kuyaqinisekiswa ukuba abo bangabameli beQumrhu Elilawulayo baluqonda ngokucacileyo yaye bayalulandela ulwalathiso lweZibhalo lokumisela. Ngenxa yoko, amadoda afanelekayo amiselwa ukukhonza emabandleni amaNgqina kaYehova emhlabeni wonke amiselwa phantsi kolwalathiso lweQumrhu Elilawulayo.
17. Iofisi yesebe ikusingatha njani ukunconyelwa kwabo baza kumiselwa njengabaveleli nezicaka zolungiselelo?
17 Xa amagama abo banconyelwayo ukuze bamiselwe njengabaveleli nezicaka zolungiselelo ethunyelwa kwiofisi yesebe leWatch Tower Society, amadoda anamava axhomekeka kulwalathiso lomoya kaThixo xa ebamisela. La madoda avakalelwa kukuba anembopheleleko ngokuphathelele oku, ayaqonda ukuba akamele abeke nawuphi na umntu izandla ngokungxama, kungenjalo aya kuba nesabelo kwizono zakhe.—1 Timoti 5:22.
18, 19. (a) Yiyiphi enye indlela ekumiselwa ngayo? (b) Inkqubo yokuncomela nokumisela yenziwa njani?
18 Abanye basenokumiselwa ngokuba kuthunyelwe ileta enesitampu esigunyazisayo evela kuthunywashe osemthethweni. Loo leta inokusetyenziswa ukumisela abazalwana abaninzi ebandleni.
19 Ukumiselwa ngokobuthixo kuvela kuYehova esebenzisa uNyana wakhe nejelo likaThixo lasemhlabeni elibonakalayo, ‘ikhoboka elithembekileyo neliyingqondi’ kunye neQumrhu Elilawulayo lalo. (Mateyu 24:45-47) Yonke loo nkqubo yokuncomela nokumisela yalathiswa okanye ikhokelwa ngumoya oyingcwele. Oku kunjalo ngenxa yokuba ezi mfaneleko ziseLizwini likaThixo, eliphefumlelwe ngumoya oyingcwele, yaye lowo umiselwayo unikela ubungqina ngokuvelisa isiqhamo saloo moya. Ngoko ke, ukumiselwa kumele kugqalwe njengokwenziwa ngomoya oyingcwele. Kanye njengoko abaveleli nezicaka zolungiselelo babemiselwa ngokobuthixo kwinkulungwane yokuqala, kuyafana nanamhlanje.
Ukuba Nombulelo Ngokhokelo LukaYehova
20. Kutheni sivakalelwa ngendlela awayevakalelwa ngayo uDavide echazwe kwiNdumiso 133:1?
20 Kweli xesha lenkqubela yokomoya nolwando lobuthixo kumsebenzi wokushumayela ngoBukumkani, sinombulelo kuba inguYehova ngokuyintloko omisela abaveleli nezicaka zolungiselelo. Eli lungiselelo leZibhalo liyanceda ekulondolozeni imilinganiselo kaThixo yobulungisa nephakamileyo phakathi kwethu njengamaNgqina kaYehova. Ngapha koko, umoya wobuKristu nemigudu enyanisekileyo yala madoda ifak’ isandla kakhulu kuxolo olungummangaliso nomanyano olukhoyo phakathi kwethu njengabakhonzi bakaYehova. Ngoko ke, njengomdumisi uDavide, sishukunyiselwa ukuba sidanduluke sithi: “Khangela! Hayi indlela ekulunge nekuthandeka ngayo ukuba abazalwana bahlale ndawonye ngomanyano!”—INdumiso 133:1.
21. Uzaliseka njani uIsaya 60:17 namhlanje?
21 Hayi indlela esinombulelo ngayo ngolwalathiso esilunikwa nguYehova ngeLizwi lakhe nangomoya oyingcwele! Anentsingiselo ngokwenene amazwi abhalwe kuIsaya 60:17 athi: “Esikhundleni sobhedu ndiya kuzisa igolide, esikhundleni sentsimbi ndizise isilivere, esikhundleni somthi ubhedu, esikhundleni samatye intsimbi; yaye ndiya kumisela uxolo lube ngabaveleli bakho nobulungisa bube ngabaphathi bakho.” Njengoko iinkqubo zobuthixo ziye zasetyenziswa ngokuzele ngakumbi phakathi kwamaNgqina kaYehova, siye sayibona le ntsikelelo kuyo yonke intlangano kaThixo yasemhlabeni.
22. Yintoni ekufanelekileyo ukuba sibe nombulelo ngayo, yaye yintoni esifanele sizimisele ukuyenza?
22 Sinombulelo ngokunzulu ngamalungiselelo obuthixo enziwayo phakathi kwethu. Yaye siwuxabisa kakhulu umsebenzi onzima kodwa owanelisayo owenziwa ngabaveleli nezicaka zolungiselelo ezimiselwe ngokobuthixo. Siyamdumisa ngokusuk’ entliziyweni uBawo wethu wasezulwini onothando, lowo usinike impumelelo yokomoya waza wasisikelela ngokutyebe kangaka. (IMizekeliso 10:22) Ngoko ke, masizimisele ukuhambisana nentlangano kaYehova. Ngaphezu koko, masiqhubeke sikhonza kunye ngokumanyeneyo sibeke, sidumise size sizukise igama elikhulu nelingcwele likaYehova.
Ubuya Kuphendula Uthini?
• Kutheni sinokuthi abaveleli nezicaka zolungiselelo bamiselwa ngokobuthixo, kungekhona ngenkqubo yedemokhrasi?
• Amadoda angamaKristu aphathiswe imbopheleleko amiselwa njani ngomoya oyingcwele?
• Libandakanyeke njani iQumrhu Elilawulayo ekumiseleni abaveleli nezicaka zolungiselelo?
• Ngokuphathelele ukumiselwa kobuthixo, kutheni sifanele sibe nombulelo kuYehova?
[Imifanekiso ekwiphepha 15]
Abadala nezicaka zolungiselelo banelungelo lokukhonza ngokumiselwa ngokobuthixo