Ukufuna Ubulungisa Kuya Kusikhusela

‘Qhubekani, ke ngoko, nifuna kuqala ubulungisa bukaThixo.’—MATEYU 6:33.

1, 2. Sisiphi isigqibo esenziwa ngomnye umKristu oselula, ibe kwakutheni ukuze enze eso sigqibo?

ELINYE ibhinqa eliselula elingumKristu eAsia lalingunobhala kwenye iofisi karhulumente. Lalikhuthele, lifika ngexesha yaye lingatshiveli kumsebenzi walo. Noko ke, ekubeni lalingekaqeshwa ngokusisigxina apho, kwafika ixesha lokuba kuhlaziywe imeko yalo. Umphathi welo sebe walixelela ukuba unokuliqesha ngokusisigxina de alinyusele, xa nje linokuncuma naye. Lakukhaba ngaw’ omane oko, nakuba kwakuthetha ukuphulukana nomsebenzi walo.

² Ngaba isenzo selo bhinqa sasintama ukungabhadli kwalo? Akunjalo, lalithobela amazwi kaYesu athi: ‘Qhubekani, ke ngoko, nifuna kuqala ubulungisa bukaThixo.’ (Mateyu 6:33) Kulo ukuthobela imigaqo yobulungisa kwakubaluleke ngaphezu kokuhanjelwa kakuhle zizinto ngenxa yokuziphatha kakubi libe neentlobano zesini.—1 Korinte 6:18.

Ukubaluleka Kobulungisa

3. Buyintoni ubulungisa?

³ “Ubulungisa” buquka ingqibelelo nokunyaniseka. EBhayibhileni, eli gama ngesiGrike nesiHebhere lidlulisela ingcamango “yokungabi namakhwiniba” okanye “ukuthi tye.” Asikokuzama nje ukuzenza ilungisa. (Luka 16:15) Bubulungisa ngokwemilinganiselo kaYehova. Bubulungisa bukaThixo.—Roma 1:17; 3:21.

4. Kutheni kubalulekile nje ukuba umKristu abe lilungisa?

⁴ Kutheni bubalulekile nje ubulungisa? Kungenxa yokuba uYehova, ‘uThixo olilungisa,’ uyabathanda abantu bakhe xa besenza ngobulungisa. (INdumiso 4:1; IMizekeliso 2:20-22; Habhakuki 1:13) Nabani na ongelolungisa ngekhe abe nolwalamano naye. (IMizekeliso 15:8) Yiloo nto umpostile uPawulos wabongoza uTimoti wathi: “Zisabe iinkanuko zobutsha, uphuthume ubulungisa,” kunye nezinye iimpawu ezibalulekileyo. (2 Timoti 2:22) Ikwaseso sizathu esenza uPawulos aquke “isigcina-sifuba sobulungisa” xa echaza iintlobo ezahlukeneyo zesikrweqe sethu sokomoya.—Efese 6:14.

5. Ingenzeka njani into yokuba izidalwa ezingafezekanga zifune ubulungisa?

⁵ Kakade ke, akakho umntu olilungisa ngokugqibeleleyo. Sonke ukungafezeki sakuzuza njengelifa kuAdam, ngoko sonke sinesono, asizalwa singamalungisa. Ukanti, uYesu wathi simele sifune ubulungisa. Singakwazi njani ukufuna ubulungisa? Oko kungenzeka kuba uYesu wanikela ngobomi bakhe obufezekileyo ngenxa yethu, ibe xa sinokholo kwidini lakhe, uYehova ukulungele ukuxolela izono zethu. (Mateyu 20:28; Yohane 3:16; Roma 5:8, 9, 12, 18) Njengokuba sifunda imilinganiselo yobulungisa kaYehova yaye sisenza konke okusemandleni ethu ukuze siyithobele—sithandazela ukuba asincede soyise ubuthathaka bethu—uYehova uyalwamkela unqulo lwethu. (INdumiso 1:6; Roma 7:19-25; ISityhilelo 7:9, 14) Kuyathuthuzela ngokwenene oko!

Ubulungisa Kwihlabathi Elingenabulungisa

6. Kwakutheni ukuze ihlabathi libe yindawo eyingozi kumaKristu enkulungwane yokuqala?

⁶ Xa abafundi bakaYesu banikwa uthumo lokuba ngamangqina akhe “kwezona nxalenye zikude zomhlaba,” baye bajamelana nobunzima. (IZenzo 1:8) Wonke ummandla ababeza kushumayela kuwo ‘wawusemandleni ongendawo,’ uSathana. (1 Yohane 5:19) Ihlabathi lalizaliswe ngumoya ongendawo ophenjelelwa nguSathana, ibe amaKristu ayeza kuchanabeka kwimpembelelo yawo eyonakalisayo. (Efese 2:2) Kuwo, ihlabathi laliyindawo eyingozi. Kukufuna ubulungisa bukaThixo kuphela into eyayiya kuwanceda akwazi ukunyamezela aze agcine ingqibelelo yawo. Inkoliso yawo yanyamezela, nakuba kukho athile aye aphambuka ‘kumendo wobulungisa.’—IMizekeliso 12:28; 2 Timoti 4:10.

7. Ziziphi iimbopheleleko anazo amaKristu, nezifuna ukuba axhathise iimpembelelo ezonakalisayo?

⁷ Ngaba ihlabathi yindawo ekhuselekileyo kumaKristu namhlanje? Unotshe! Lonakele ngakumbi kunakwinkulungwane yokuqala. Ukongezelela koko, uSathana uye waphoswa phantsi emhlabeni ibe ulwa imfazwe enzima namaKristu athanjisiweyo, “abo baseleyo bembewu [yomfazi], abagcina imiyalelo kaThixo nabanomsebenzi wokungqinela uYesu.” (ISityhilelo 12:12, 17) Uhlasela nabani na oxhasa loo “mbewu.” Sekunjalo, amaKristu akanakukwazi ukusaba kweli hlabathi. Ngoxa engeyonxalenye yalo, amele aphile kulo. (Yohane 17:15, 16) Amele ashumayele kulo afunisise abo bafanelekayo ukuze abafundise babe ngabafundi bakaKristu. (Mateyu 24:14; 28:19, 20) Ngoko ke, ekubeni amaKristu engenakuziphepha ngokupheleleyo ezi mpembelelo zonakalisayo zeli hlabathi, amele axhathise alwe nazo. Makhe sixubushe ngezine kwezo mpembelelo.

Umgibe Wokuziphatha Okubi

8. Kwakutheni ukuze amaSirayeli atyeke anqule oothixo bamaMowabhi?

⁸ Ngasekupheleni kohambo lwawo lweminyaka engama-40 entlango, inkitha yamaSirayeli yawushiya umendo wobulungisa. Yazibonela ngokwayo izenzo zokuhlangula zikaYehova, ibe kwakumbovu ukuba ingene kwiLizwe Lesithembiso. Ukanti, kwelo xesha libaluleke kangako, yatyeka yakhonza oothixo bamaMowabhi. Kwakutheni? Yanikezela ‘kwinkanuko yenyama.’ (1 Yohane 2:16) Ingxelo ithi: “Baqala abantu baba neentlobano zokuziphatha okubi neentombi zakwaMowabhi.”—Numeri 25:1.

9, 10. Yiyiphi imeko ekhoyo namhlanje ekwenza kubaluleke lonk’ ixesha ukulumkela impembelelo eyonakalisayo yeminqweno yenyama ephosakeleyo?

⁹ Eso siganeko sibonisa indlela iminqweno yenyama ephosakeleyo enokubonakalisa ngayo abo bangalumkanga. Kuya kuba bubulumko ukufunda koko, ngakumbi ekubeni ukuziphatha okubi sele kujongwa njengento eyamkelekileyo kulo lonk’ elimiweyo. (1 Korinte 10:6, 8) Enye ingxelo yaseUnited States ithi: “Ngaphambi kowe-1970, kulo lonke elaseMerika, kwakungekho semthethweni ukuhlalisana kwabantu abangatshatanga. Ngoku oku sele kuyindlela ekuphilwa ngayo. Ngaphezu kwesiqingatha sayo yonke imitshato yabo baqalayo ukutshata, ezo zibini ziye zaqala ngokuhlalisana.” Ezo ndlela zokuziphatha zigqugqise lonk’ ihlabathi. Okubuhlungu kukuba kukho amaKristu aye alandela elo khondo—de amanye aphulukane nokuma kwawo kwibandla lamaKristu.—1 Korinte 5:11.

¹⁰ Ukongezelela, kubonakala ngathi kulo lonke elimiweyo amajelo osasazo ayakukhuthaza oko. Iimovie nomabonwakude zikhuthaza ukuba kwamkelekile ukuba neentlobano zesini kwabaselula ngaphambi komtshato. Ubufanasini buvezwa njengento eyamkelekileyo. Ziya zisanda iinkqubo ezibonisa abantu ababelana ngesondo. Nemifanekiso yabo bantu ifumaneka nje lula kwi-Internet. Ngokomzekelo, omnye umbhali wemihlathi kumaphephandaba wachaza ukuba unyana wakhe oneminyaka esixhenxe ubudala wayebuya esikolweni waza ngodlamko waxelela uyise ukuba omnye umhlobo wakhe esikolweni uye wafumana ijelo leInternet elibonisa abafazi ababini ababenxibe eyesele besabelana ngesondo. Uyise kwamothusa gqitha oko, kodwa bangaphi abantwana ababona loo majelo kodwa bengabaxeleli abazali babo? Bebangaphi bona abazali abayaziyo imidlalo yevidiyo edlalwa ngabantwana babo? Imidlalo emininzi ethandwayo ibonisa indlela zokuziphatha okubi ezenyanyekayo kuquka ubudemoni nogonyamelo.

11. Intsapho inokukhuselwa njani ekuziphatheni okubi kwehlabathi?

¹¹ Intsapho inokuyiphepha njani loo ndlela ilihlazo “yokuzonwabisa”? Ngokufuna kuqala ubulungisa bukaThixo, ize iphephe nakuphi na ukuziphatha okubi. (2 Korinte 6:14; Efese 5:3) Abazali abaneliso elibukhali kwizinto ezenziwa ngabantwana babo baze babethelele kubantwana babo ukuthanda uYehova nemithetho yakhe yobulungisa babangela ukuba beme beqinile nxamnye nemifanekiso yamanyala ekumaphephancwadi, kwimidlalo yevidiyo, iimovie ezingcolileyo nezinye izinto ezingendawo.—Duteronomi 6:4-9.a

Ingcinezelo Yabantu Basekuhlaleni

12. Yiyiphi ingxaki eyavela kwinkulungwane yokuqala?

¹² Xa uPawulos wayeseListra eAsia Minor, waphilisa indoda ngendlela engummangaliso. Le ngxelo ithi: “Zaza izihlwele, zibona oko uPawulos wayekwenzile, zaphakamisa amazwi azo, zisithi ngolwimi lwaseLikawoniya: ‘Oothixo baye baba njengabantu yaye bahlile beza kuthi!’ Yaye zabiza uBharnabhas ngokuba nguZeyus, kodwa uPawulos zisithi nguHermes, ekubeni wayengulowo ukhokelayo ekuthetheni.” (IZenzo 14:11, 12) Kwaezo zihlwele kamva zafuna ukubabulala uPawulos noBharnabhas. (IZenzo 14:19) Kucacile ukuba abo bantu babelawulwa gqitha yingcinezelo yasekuhlaleni. Kuyabonakala ukuba abanye abaye bangamaKristu kubantu balapho, abazange bahlukane neenkolelo zalapho. Kwincwadi yakhe eyayisiya kumaKristu aseKolose, uPawulos wawalumkisa nxamnye ‘nokunqula iingelosi.’—Kolose 2:18.

13. Ngawaphi amanye amasiko umKristu amele awaphephe, ibe unokuwafumana phi amandla okwenjenjalo?

¹³ Nanamhlanje, amaKristu okwenyaniso amele aphephe amasiko athile athandwayo asekelwe kunqulo lobuxoki abe engqubana nemigaqo yobuKristu. Ngokomzekelo, kwamanye amazwe imibhiyozo emininzi yokuzalwa nokufa isekelwe kubuxoki bokuba abantu banomoya ongafiyo. (INtshumayeli 9:5, 10) Kukho amazwe anesiko lokolusa amantombazana. Eli siko yinkohlakalo, alifuneki kwaphela yaye liyaphikisana nothando olumele luboniswe ngabazali abangamaKristu kubantwana babo. (Duteronomi 6:6, 7; Efese 6:4) UmKristu unokuyixhathisa njani ingcinezelo yabahlali aze ahlukane nezenzo ezinjalo? Unokwenjenjalo xa ekholose ngokupheleleyo ngoYehova. (INdumiso 31:6) UThixo olilungisa uya kubomeleza aze abanyamekele abo bathi kuye ezintliziyweni zabo: “Uyindawo yam yokusabela negwiba lam, Thixo wam, endiza kukholosa ngaye.”—INdumiso 91:2; IMizekeliso 29:25.

Uze Ungamlibali UYehova

14. Sisiphi isilumkiso uYehova awasinika amaSirayeli ngaphambi nje kokuba angene kwiLizwe Lesithembiso?

¹⁴ Ngaphambi nje kokuba amaSirayeli angene kwiLizwe Lesithembiso, uYehova wawalumkisa esithi aze angamlibali. Wathi: “Uze ulumke ungamlibali uYehova uThixo wakho ngokuthi ungayigcini imiyalelo yakhe nezigwebo zakhe nemimiselo yakhe endikuyalela yona namhlanje; kuba hleze uthi wakuba udlile wanela, wakhe izindlu ezintle, uhlale kuzo, wande umhlambi wakho weenkomo nomhlambi wakho weegusha, yande kuwe isilivere negolide, yande yonke into onayo; isuke iphakame intliziyo yakho uze umlibale uYehova uThixo wakho.”—Duteronomi 8:11-14.

15. Singenza njani ukuze siqinisekise ukuba asimlibali uYehova?

¹⁵ Ngaba inokwenzeka into enjalo namhlanje? Inokwenzeka ukuba sinosukelo lwezinto ezingafanelekanga. Kodwa, ukuba sifuna kuqala ubulungisa bukaThixo, unqulo olunyulu luya kuba yeyona nto ibalulekileyo kubomi bethu. Njengokuba uPawulos esikhuthaza, siya ‘kuzongela ixesha’ size sishumayele sinesimo sengqondo sokungxamiseka. (Kolose 4:5; 2 Timoti 4:2) Noko ke, ukuba ukuya kwiintlanganiso nasentsimini akubalulekanga kangako kuthi kodwa sithanda ukubethwa ngumoya okanye ukuzonwabisa, siya kumlibala uYehova aze ke angabaluleki kuthi. UPawulos wathi ngemihla yokugqibela, abantu babeya kuba ‘ngabathandi beziyolo kunokuba bathande uThixo.’ (2 Timoti 3:4) AmaKristu okwenyaniso asoloko ezihlolisisa ukuze aqinisekise ukuba akaphenjelelwa lolo hlobo lokucinga.—2 Korinte 13:5.

Wulumkele Umoya Wokuzilawula

16. Nguwuphi umoya ongafanelekanga awayenawo uEva nabathile ngomhla kaPawulos?

¹⁶ E-Eden, uSathana waphumelela ukusebenzisa kakubi umnqweno wokuzingca kaEva wokufuna ukuzilawula. UEva wayefuna ukuzenzela izigqibo ngokulungileyo nokubi. (Genesis 3:1-6) Ngenkulungwane yokuqala, abanye kwibandla laseKorinte babenaloo moya wokufuna ukuzilawula. Babecinga ukuba bazi ngakumbi kunoPawulos, ibe xa wayephoxisa ngabo wathi bangabapostile abaziincamisa.—2 Korinte 11:3-5; 1 Timoti 6:3-5.

17. Singakuphepha njani ukuba nomoya wokuzilawula?

¹⁷ Ihlabathi namhlanje, lizaliswe ngabantu ‘abaneentloko ezilukhuni, abakhukhumele likratshi,’ ibe amanye amaKristu aye aphenjelelwa yiloo ndlela yokucinga. Abanye bade baba ngabachasi benyaniso. (2 Timoti 3:4; Filipi 3:18) Kwimiba ephathelele unqulo lwenyaniso, kubalulekile ukufuna ulwalathiso lukaYehova size sisebenzisane ‘nekhoboka elithembekileyo neliyingqondi’ kunye nabadala bebandla. Yileyo indlela yokufuna ubulungisa, ibe iyasikhusela singabi nomoya wokuzilawula. (Mateyu 24:45-47; INdumiso 25:9, 10; Isaya 30:21) Ibandla labathanjiswa ‘yintsika nesixhaso senyaniso.’ UYehova uye walimisela ukuze lisikhusele. (1 Timoti 3:15) Ukuyiqonda kakuhle indima yalo ebalulekileyo kuya kusinceda ‘singenzi nanye into ngokuzigwagwisa’ njengoko sizithoba kwintando kaYehova yobulungisa.—Filipi 2:2-4; IMizekeliso 3:4-6.

Yibani Ngabaxelisa UYesu

18. Ziziphi iindlela esikhuthazwa ukuba simxelise ngazo uYesu?

¹⁸ Isiprofeto seBhayibhile sithi ngoYesu: “Ubuthandile ubulungisa waza wabuthiya ubungendawo.” (INdumiso 45:7; Hebhere 1:9) Eso sisimo sengqondo esimele sisixelise! (1 Korinte 11:1) UYesu akazange anele nje kukuyazi imilinganiselo yobulungisa kaYehova; wayithanda. Ngoko ke, xa uSathana wamlingayo entlango, akazange aphozise maseko waqina waza wakuphepha ‘ukuphambuka kumendo wobulungisa.’—IMizekeliso 8:20; Mateyu 4:3-11.

19, 20. Yiyiphi imiphumo emihle yokufuna ubulungisa?

¹⁹ Yinyaniso ukuba, iminqweno engafanelekanga yenyama inokuba namandla. (Roma 7:19, 20) Kodwa ukuba siyabuxabisa ubulungisa, buya kusomeleza sixhathise ubungendawo. (INdumiso 119:165) Ukubuthanda ngokunzulu ubulungisa kuya kusikhusela xa sijamelene nobubi. (IMizekeliso 4:4-6) Khumbula ukuba, nanini na sinikezela kwisilingo, uSathana uyoyisa. Bekuya kuba kuhle gqitha ukumxhathisa ize ibe nguYehova owoyisayo!—IMizekeliso 27:11; Yakobi 4:7, 8.

²⁰ Ekubeni efuna ubulungisa, amaKristu okwenyaniso, ‘azaliswe sisiqhamo sobulungisa, esingoYesu Kristu, kuse kuzuko nendumiso kuye uThixo.’ (Filipi 1:10, 11) Ambatha “ubuntu obutsha obadalwa ngokokuthanda kukaThixo ngobulungisa bokwenyaniso nokunyaniseka.” (Efese 4:24) NgakaYehova ibe aphilela ukumkhonza, kungekhona ukukholisa iziqu zawo. (Roma 14:8; 1 Petros 4:2) Yilo nto ke elawula iingcinga nezenzo zawo. Oko kumvuyisa gqitha uBawo wethu wasezulwini!—IMizekeliso 23:24.

[Umbhalo osemazantsi]

Ungachaza Na?

• Kutheni kubalulekile nje ukufuna ubulungisa?

• UmKristu ongafezekanga angabufuna njani ubulungisa?

• Ziziphi ezinye zezinto umKristu amele aziphephe ehlabathini?

• Ukufuna ubulungisa kusikhusela njani?

[Umfanekiso okwiphepha 26]

Kubalandeli bakaYesu ihlabathi laliyindawo eyingozi

[Umfanekiso okwiphepha 27]

Abantwana abaye bafundiswa ukuthanda uYehova baya kukwazi ukuxhathisa ukuziphatha okubi

[Umfanekiso okwiphepha 28]

Amanye amaSirayeli amlibala uYehova emva kokuba eye ema kakuhle kwiLizwe Lesithembiso

[Umfanekiso okwiphepha 29]

NjengoYesu, amaKristu akuthiyile okubi