Isigidimi Esimele Sisivakalise

“YOYIKA UTHIXO OYINYANISO UZE UGCINE IMIYALELO YAKHE”

KWAKUDALA ngaphambi kwexesha lamaKristu, uYehova waxelela uAbraham owayethembekile ngelungiselelo lokuba “zonke iintlanga zomhlaba” zisikelelwe. (Gen. 22:18) Kwakhona waphefumlela uSolomon ukuba abhale ngemfuneko esisiseko kubo bonke abantu: “Yoyika uThixo oyinyaniso uze ugcine imiyalelo yakhe. Kuba oku kuyimbopheleleko yomntu.” (INtshu. 12:13) Kodwa abantu bazo zonke iintlanga babeza kuziqonda njani ezi zinto?

Nangona bekusoloko kukho abantu abalikholelwayo ilizwi likaThixo, iBhayibhile ibonisa ukuba ubungqina obucokiswayo obunikelwa ehlabathini, nobabuya kufikelela zonke iintlanga neendaba ezilungileyo, babuya kugcinelwa “imini yeNkosi.” Le mini yaqalisa ngowe-1914. (ISityhi. 1:10) Ngokuphathelele eli xesha, ISityhilelo 14:6, 7 saxela kusengaphambili ukuba kwakuya kuvakaliswa isigidimi esibalulekileyo esiya “kuzo zonke iintlanga nezizwe neelwimi nabantu” phantsi kolwalathiso lweengelosi. Zaziya kubongozwa kusithiwa: “Moyikeni uThixo nimzukise, kuba lifikile ilixa lokugweba kwakhe, ngoko mnquleni Lowo wenza izulu nomhlaba nolwandle nemithombo yamanzi.” Kukuthanda kukaThixo ukuba esi sigidimi sidluliselwe. Linikwe thina ilungelo lokuwenza lo msebenzi.

“UThixo Oyinyaniso.” Xa uYehova wathi, “Ningamangqina am,” kwakuphikiswana ngombandela wokuba ngubani na oyena Thixo. (Isa. 43:10) Isigidimi esimele sidluliselwe asikokuxelela abantu ukuba babe necawa abayihambayo okanye bakholelwe kuthixo othile. Kunoko, kufuneka banikwe ithuba lokufunda ukuba uMdali wamazulu nomhlaba ukuphela koThixo oyinyaniso. (Isa. 45:5, 18, 21, 22; Yoh. 17:3) NguThixo oyinyaniso kuphela onokuchaza ikamva ngendlela enokuthenjwa. Sinikwe ilungelo lokuchaza ukuba ukuzaliseka kwelizwi likaYehova kwixa elidluleyo kusinika isizathu esibambekayo sokuba nentembelo yokuba yonke into ayithembisileyo iya kwenzeka.—Yosh. 23:14; Isa. 55:10, 11.

Kakade ke, abaninzi esinikela ubungqina kubo banqula abanye oothixo okanye bathi abanaye uthixo. Ukuze basiphulaphule, kusenokufuneka siqale ngento esinomdla kuyo sonke. Sinokufunda kumzekelo obhalwe kwiZenzo 17:22-31. Phawula ukuba nangona umpostile uPawulos wayethetha ngendlela echubekileyo, wayenza yacaca into yokuba bonke abantu baza kuphendula kuThixo onguMdali wamazulu nomhlaba.

Ukwazisa Igama LikaThixo. Ungaze usilele ukubiza uThixo oyinyaniso ngegama lakhe. UYehova uyalithanda igama lakhe. (Eks. 3:15; Isa. 42:8) Ufuna abantu balazi elo gama. Wabangela ukuba igama lakhe elizukileyo liqukwe izihlandlo ezingaphezu kwama-7 000 eBhayibhileni. Kuyimbopheleleko yethu ukwenza abantu baqhelane nalo.—Dut. 4:35.

Amathemba abanawo bonke abantu ngobomi bexesha elizayo axhomekeke ekwazini uYehova nasekubizeni kuye ngokholo. (Yow. 2:32; Mal. 3:16; 2 Tes. 1:8) Ukanti inkoliso yabantu ayimazi uYehova. Xa sisitsho siquka nabo bazibanga benqula uThixo weBhayibhile. Kwanokuba banayo iBhayibhile kwaye bayayifunda, basenokuqhubeka bengalazi igama likaThixo kuba lisusiwe kwiinguqulelo ezininzi zala maxesha. Ekuphela kwento abanye abantu abayaziyo ngegama elithi Yehova kukuba iinkokeli zabo zonqulo zibaxelele ukuba bangalisebenzisi.

Sinokubenza njani abantu ukuba baqhelane negama likaThixo? Ayikho into edlula ukubabonisa eli gama eBhayibhileni—kowabo umbhalo ukuba kunokwenzeka. Kwezinye iinguqulelo, eli gama livela kangangezihlandlo ezingamawaka. Kwezinye, linokuvela kwiNdumiso 83:18 okanye kwiEksodus 6:3-6 kuphela, okanye linokufunyanwa kumbhalo osemazantsi we-Eksodus 3:14, 15, okanye kwisahluko 6:3. Kwiinguqulelo eziliqela, kufakelwa amabinzana anjengelithi “Nkosi” nelithi “Thixo” xa umbhalo wolwimi lwantlandlolo usebenzisa igama likaThixo. Apho abaguquleli bale mihla baye balikhupha ngokupheleleyo igama likaThixo, kusenokufuneka usebenzise inguqulelo yeBhayibhile endadlana ukuze ubonise abantu oko kwenziweyo. Kwamanye amazwe usenokubabonisa igama likaThixo kumaculo ecawa okanye kwimibhalo ekwizakhiwo zikawonke-wonke.

Nakwabo banqula abanye oothixo, uYeremiya 10:10-13 kwiNguqulelo Yehlabathi Elitsha unokusetyenziswa ngempumelelo. Lo mbhalo awaneli kuchaza igama likaThixo kuphela kodwa ukwachaza nokuba ungubani na.

Musa ukufihla igama elithi Yehova ngamagama anjengelithi “Thixo” nelithi “Nkosi” njengoko iNgqobhoko isenza. Oku akuthethi kuthi yonke incoko imele iqalise ngeli gama. Ngenxa yekhethe, abanye baya kuyiphelisa loo ngxubusho. Kodwa emva kokubeka isiseko sencoko, musa ukuba neentloni ngokusebenzisa igama likaThixo.

Kuyabonakala ukuba iBhayibhile isebenzisa igama likaThixo kangangezihlandlo ezingakumbi kunezo isebenzisa ngazo izibizo ezinjengesithi “Nkosi” nesithi “Thixo” sele zidityanisiwe. Nangona kunjalo, ababhali beBhayibhile abazamanga kufaka igama likaThixo kwisivakalisi ngasinye. Balifaka ngendlela eqhelekileyo, ekhululekileyo nebonisa intlonelo. Lowo ngumzekelo omhle esimele siwulandele.

Lowo Ubizwa Ngelo Gama. Nangona isibakala sokuba uThixo enegama siyinyaniso ebalulekileyo, sisesisiqalo nje.

Ukuze abantu bamthande uYehova yaye babize kuye ngokholo, kufuneka bamazi ukuba unguThixo onjani. Xa uYehova wachazela uMoses igama lakhe kwiNtaba yeSinayi, akazange aphelele ekuphindeni igama elithi “Yehova.” Watsalela ingqalelo kwezinye zeempawu Zakhe ezibalaseleyo. (Eks. 34:6, 7) Nathi simele siwuxelise loo mzekelo.

Enoba unikela ubungqina kubantu abanomdla okanye unikela intetho ebandleni, xa uthetha ngeentsikelelo zoBukumkani, chaza ukuba zithetha ntoni ngoThixo owenza izithembiso ezinjalo. Xa ubhekisela kwimiyalelo yakhe, gxininisa ubulumko nothando elubonakalisayo. Yicacise into yokuba izinto ezifunwa nguThixo azisiziseli ubunzima, kunoko, zenzelwe ukuba zisincede. (Isa. 48:17, 18; Mika 6:8) Bonisa indlela imbonakaliso yamandla kaYehova nganye etyhila ngayo ubuntu bakhe, imilinganiselo yakhe nenjongo yakhe. Tsalela ingqalelo kulungelelwano olubonakala kwindlela uYehova azibonisa ngayo iimpawu zakhe. Abantu mabakuve uchaza iimvakalelo onazo ngoYehova. Ukumthanda kwakho uYehova kunokubenza bamthande nabo.

Isigidimi esingxamisekileyo kule mihla sibongoza bonke abantu ukuba boyike uThixo. Ngaloo nto siyithethayo, sifanele sizabalazele ukuvuselela olo loyiko lobuthixo. Olu luloyiko olufanelekileyo, ukoyika uYehova, ukumhlonela ngokunzulu. (INdu. 89:7) Luquka ukuqonda ukuba uYehova unguMgwebi owongamileyo nokuba ikamva lethu lixhomekeke ekumkholiseni kwethu. (Luka 12:5; Roma 14:12) Ngoko ke, olu loyiko luhamba nokumthanda ngokunzulu yaye, ekugqibeleni, luphelekwa ngumnqweno ongazenzisiyo wokumkholisa. (Dut. 10:12, 13) Uloyiko lobuthixo lukwasishukumisela ekubeni sithiye okubi, sithobele imiyalelo kaThixo, yaye simnqule ngentliziyo epheleleyo. (Dut. 5:29; 1 Kron. 28:9; IMize. 8:13) Luyasikhusela ukuba singazami ukukhonza uThixo ngoxa sithanda izinto zehlabathi.—1 Yoh. 2:15-17.

Igama LikaThixo—“Inqaba Eyomeleleyo.” Abantu abamazi ngokwenene uYehova bayakhuselwa. Oku akubangelwa kukuba besebenzisa igama lakhe okanye besazi iimpawu zakhe kuphela. Kubangelwa kukuba bekholose ngoYehova ngokwakhe. Ithetha ngabo, iMizekeliso 18:10 ithi: “Yinqaba eyomeleleyo igama likaYehova. Ilungisa libalekela kulo lize likhuseleke.”

Wasebenzise kakuhle amathuba okubongoza abanye ukuba bakholose ngoYehova. (INdu. 37:3; IMize. 3:5, 6) Ukukholosa ngaye kubonisa ukuba ubani unokholo kuYehova nakwizithembiso zakhe. (Heb. 11:6) Xa abantu ‘bebiza egameni likaYehova’ ngenxa yokuba besazi ukuba unguMongami Wendalo Iphela, bethanda iindlela zakhe, yaye bekholelwa ngokwenene ukuba usindiso luza kuvela kuye kuphela—iLizwi likaThixo lisiqinisekisa ukuba—baya kusindiswa. (Roma 10:13, 14) Njengoko ufundisa abanye, bancede bahlakulele ukholo olunjalo ngokuphathelele zonke iinkalo zobomi.

Abantu abaninzi bajamelene neengxaki ezibongamelayo. Basenokungayiboni indlela yokuphuma kuzo. Babongoze bafunde iindlela zikaYehova, bakholose ngaye, yaye basebenzise oko bakufundayo. (INdu. 25:5) Bakhuthaze ukuba bathandaze ngokunyaniseka becela uncedo lukaThixo yaye bambulele ngeentsikelelo zakhe. (Fil. 4:6, 7) Xa bemazi uYehova, kungekuphela ngokufunda amazwi athile aseBhayibhileni, kodwa nangokubona inzaliseko yezithembiso zakhe kubomi babo, baya kuqalisa ukufumana unqabiseko olubangelwa kukuqonda oko kumelwa ligama elithi Yehova.—INdu. 34:8; Yer. 17:7, 8.

Wasebenzise kakuhle onke amathuba okunceda abantu ukuba baqonde ubulumko bokoyika uThixo oyinyaniso, uYehova, nokugcina imiyalelo yakhe.

‘UKUNGQINELA UYESU’

EMVA kokuvuswa kwakhe yaye ngaphambi kokuba abuyele ezulwini, uYesu Kristu wadlulisela imiyalelo kubafundi bakhe esithi: “Niya kuba ngamangqina am . . . kude kuse nakwezona nxalenye zikude zomhlaba.” (IZe. 1:8) Abakhonzi bakaThixo abanyanisekileyo bale mihla bachazwa ‘njengabanomsebenzi wokungqinela uYesu.’ (ISityhi. 12:17) Ukukhuthalele kangakanani ukunikela obo bungqina?

Abantu abaninzi abatsho benyanisekile ukuba bayakholelwa kuYesu abazi nowathwethwa ngobomi bakhe bangaphambi kokuba aphile njengomntu. Abaqondi ukuba wayengumntu wokwenene xa wayesemhlabeni. Abayiqondi kakuhle intsingiselo yokuba nguNyana kaThixo kwakhe. Abanalwazi kangako ngendima anayo ekuphunyezweni kwenjongo kaThixo. Abayazi into ayenzayo sithethanje, yaye abayiboni indlela ubomi babo obuya kuchaphazeleka ngayo koko aza kukwenza kwixesha elizayo. Ngenxa yokungazi basenokude bacinge ukuba amaNgqina kaYehova akakholelwa kuYesu. Sijizekwe ngelungelo lokuzama ukwazisa inyaniso ngezi zinto.

Kukho nabantu abangakholelwayo ukuba ngokwenene umntu onjengoYesu ochazwe eBhayibhileni wakha waphila. Bambi bajonga uYesu njengendoda nje eyayibalasele. Abaninzi abafuni nokuyiva ingcamango yokuba unguNyana kaThixo. ‘Ukungqinela uYesu’ kubantu abanjalo kufuna umgudu, umonde nobuchule obungakumbi.

Kungakhathaliseki ukuba banayiphi imbono abaphulaphuli bakho, kufuneka bangenise ulwazi ngoYesu Kristu ukuba bafuna ukungenelwa kwilungiselelo likaThixo lobomi obungunaphakade. (Yoh. 17:3) Ukuthanda kukaThixo okuchazwe ngendlela ecacileyo kukuba bonke abaphilayo bamele ‘bavume ekuhleni ukuba uYesu Kristu uyiNkosi’ kwaye bamele bazithobe kwigunya lakhe. (Fil. 2:9-11) Ngaloo ndlela, asinakusuka siyiphephe nje loo nto xa sidibana nabantu abaneenkani kodwa beneembono eziphosakeleyo okanye abanekhethe. Ngoxa kwezinye iimeko sinokuthetha ngokukhululeka ngoYesu Kristu—kwanakutyelelo lwethu lokuqala—kwezinye, kusenokufuneka siwakhethe ngobulumko amagqabaza esiwenzayo ukuze sincede abaphulaphuli bethu baqalise ukucinga ngendlela echanileyo ngaye. Kusenokufuneka sicinge nangeendlela zokufakelela iinkalo ezongezelelekileyo zaloo mbandela kutyelelo lwexesha elizayo. Noko ke, sisenokungakwazi ukuxubusha yonke into ebandakanyekileyo de simqhubele isifundo seBhayibhile sekhaya loo mntu.—1 Tim. 2:3-7.

Indima Ebalulekileyo Ephunyezwa NguYesu Kwinjongo KaThixo. Kufuneka sincede abantu baqonde ukuba ekubeni uYesu ‘eyindlela’ yaye ‘kungekho bani uya kuYise ngaphandle kokuya ngaye,’ akunakwenzeka ukuba babe nolwalamano olumkholisayo uThixo bengabanga nokholo kuYesu Kristu. (Yoh. 14:6) Ngaphandle kokuba umntu uyayiqonda indima uYehova ayabele uNyana wakhe olizibulo, akanakuyiqonda iBhayibhile. Ngoba? Ngenxa yokuba uYehova wenza uNyana wakhe wangoyena mntu uphambili ekuphunyezweni kwazo zonke iinjongo Zakhe. (Kol. 1:17-20) Isiprofeto seBhayibhile sisekelwe kule nkalo. (ISityhi. 19:10) Isicombululo sazo zonke iingxaki ezibangelwe nguSathana nasisono sika-Adam size ngoYesu Kristu.—Heb. 2:5-9, 14, 15.

Ukuze aqonde indima kaKristu, umntu umele aqonde ukuba abantu bakwimo elusizi abangenakuzikhulula kuyo. Sonke sizalelwe esonweni. Loo nto inokusichaphazela ngeendlela ezahlukahlukeneyo ebomini bethu. Noko ke, ethubeni umphumo uba kukufa. (Roma 3:23; 5:12) Qiqa ngeso sibakala nabantu onikela ubungqina kubo. Emva koko chaza ukuba ngedini lentlawulelo likaYesu Kristu, uYehova ulungiselele ukuba abo banokholo kwelo lungiselelo bahlangulwe esonweni nasekufeni. (Marko 10:45; Heb. 2:9) Oku kubanika ithuba lokuphila ubomi obungunaphakade befezekile. (Yoh. 3:16, 36) Ayikho enye indlela abanokubufumana ngayo. (IZe. 4:12) Njengomfundisi, enoba kungasese okanye kusebandleni, musa ukuphelela ekuchazeni nje izibakala. Ngobubele nangomonde yakha kubaphulaphuli bakho imvakalelo yokuba nombulelo ngendima ephunyezwa nguKristu njengoMhlawuleli wethu. Ukuba noxabiso ngeli lungiselelo kunokusichaphazela kakhulu isimo sengqondo, ihambo kunye nosukelo lomntu ebomini.—2 Kor. 5:14, 15.

Kakade ke, uYesu wabunikela kwakanye kuphela ubomi bakhe njengedini. (Heb. 9:28) Noko ke, ngoku uxakeke kukukhonza njengoMbingeleli Omkhulu. Nceda abanye baqonde ukuba ithetha ntoni loo nto. Ngaba baxinezelekile, baphoxekile, bayabandezeleka, okanye baneengxaki ezibangelwa lulunya lwabantu ababangqongileyo? Xa uYesu wayengumntu, wahlangabezana nazo zonke ezi zinto. Uyayazi indlela esivakalelwa ngayo. Ngaba siziva sifuna inceba kaThixo ngenxa yokungafezeki? Ukuba sithandaza kuThixo size sicele ukuxolelwa ngedini likaYesu, uYesu uba ‘ngumncedi kuBawo.’ Ngemfesane, ‘uyasibongozela.’ (1 Yoh. 2:1, 2; Roma 8:34) Ngenxa yedini lentlawulelo likaYesu nangenxa yenkonzo yakhe njengoMbingeleli Omkhulu, siyakwazi ukusondela “kwitrone yobubele obungasifanelanga” kaYehova ukuze sifumane uncedo ngexesha elifanelekileyo. (Heb. 4:15, 16) Nangona singafezekanga, uncedo olunikelwa nguYesu njengoMbingeleli Omkhulu lusenza sikwazi ukukhonza uThixo ngesazela esicocekileyo.—Heb. 9:13, 14.

Ukongezelela koko, uYesu usebenzisa igunya elikhulu njengalowo umiselwe nguThixo ukuba abe yiNtloko yebandla lamaKristu. (Mat. 28:18; Efe. 1:22, 23) Ngoko, unikela ulwalathiso olufunekayo ngokuvisisana nokuthanda kukaThixo. Xa ufundisa abanye, bancede baqonde ukuba nguYesu Kristu, kungekhona umntu, oyiNtloko yebandla. (Mat. 23:10) Kwakutyelelo lwakho lokuqala olwenza kubantu abanomdla, bameme beze kwiintlanganiso zebandla lasekuhlaleni, apho sifundisisa iBhayibhile sincedwa ngumbandela olungiselelwe “likhoboka elithembekileyo neliyingqondi.” Unganeli kubacacisela ukuba ngubani “ikhoboka” kodwa bachazele nokuba ngubani iNkosi ukuze baqonde ubuntloko bukaYesu. (Mat. 24:45-47) Bazise kubadala, ucacise iimfaneleko zeZibhalo abamele bahlangabezane nazo abadala. (1 Tim. 3:1-7; Tito 1:5-9) Chaza ukuba ibandla alilolabadala kodwa bayasinceda ukuba sihambe emanyathelweni kaYesu Kristu. (IZe. 20:28; Efe. 4:16; 1 Pet. 5:2, 3) Nceda abantu abanomdla babone ukuba kukho ibutho labantu elisehlabathini lonke nelilungelelanisiweyo elisebenza phantsi kobuntloko bukaKristu.

Kwiincwadi zeVangeli, sifunda ukuba xa uYesu wangena eYerusalem ngaphambi nje kokuba afe, abafundi bakhe bamkhahlela ‘njengaLowo uza njengoKumkani egameni likaYehova!’ (Luka 19:38) Njengoko abantu bengena nzulu ekufundisiseni iBhayibhile, baya kufunda ukuba ngoku uYehova ujizeke uYesu ngegunya lokulawula elichaphazela abantu bazo zonke iintlanga. (Dan. 7:13, 14) Xa unikela iintetho ebandleni okanye uqhuba izifundo, yakha uxabiso ngoko ulawulo lukaYesu lukuthethayo kuthi sonke.

Yibethelele into yokuba indlela esiphila ngayo iyachaza enoba sikholelwa ngokwenene na ukuba uYesu Kristu nguKumkani nokuba sizithoba ngokuvumayo kulawulo lwakhe kusini na. Balaselisa umsebenzi awathi uYesu, emva kokuthanjiswa njengoKumkani, wabela abalandeli bakhe ukuba bawenze. (Mat. 24:14; 28:18-20) Xubusha oko uYesu, uMcebisi Omangalisayo, wakuthethayo ngezinto ezimele zize kuqala ebomini. (Isa. 9:6, 7; Mat. 6:19-34) Yalathisa ingqalelo kumoya eyathi iNkosana yoXolo uza kubonakaliswa ngabalandeli bayo. (Mat. 20:25-27; Yoh. 13:35) Ulumke ungayithabatheli kuwe imbopheleleko yokugweba enoba abanye benza ngomlinganiselo abafanele benze ngawo, kodwa bakhuthaze ukuba bacinge ngoko izenzo zabo zikubonisayo ngokuzithoba kwabo kuKristu njengokumkani. Xa usenjenjalo, yiqonde nawe into yokuba ufanele wenze okufanayo.

Ukubeka UKristu Njengesiseko. IBhayibhile ifanisa umsebenzi wokwenza umfundi ongumKristu nokwakhela phezu kwesiseko esinguKristu. (1 Kor. 3:10-15) Ukuze uphumeze oko, nceda abantu bazi uYesu ngendlela achazwe ngayo eBhayibhileni. Ulumke bangakugqali njengalowo bamele bamlandele. (1 Kor. 3:4-7) Yalathisela ingqalelo yabo kuYesu Kristu.

Xa isiseko sibekwe kakuhle, abafundi baya kuqonda ukuba uKristu wasishiyela umzekelo ‘ukuze silandele emanyathelweni akhe ngokusondeleyo.’ (1 Pet. 2:21) Ukuze wakhele kweso siseko, khuthaza abafundi ukuba bafunde iincwadi zeVangeli kungekhona njengembali eyenzekayo kodwa njengomzekelo omele ulandelwe. Bancede bakhumbule izimo zengqondo neempawu awayephawuleka ngazo uYesu. Bakhuthaze ukuba bajonge indlela uYesu awayevakalelwa ngayo ngoYise, indlela awayeqhubana ngayo nezihendo nezilingo, indlela awazithoba ngayo kuThixo, nendlela awabaphatha ngayo abantu ababephantsi kweemeko ezahlukeneyo. Gxininisa izinto ezazibalulekile kubomi bukaYesu. Uya kwandula ke umfundi, xa kufuneka enze izigqibo naxa ejamelene nezilingo ebomini, azibuze: ‘UYesu ebeya kwenza ntoni ukuba ebekule meko? Ngaba ikhondo endiza kulithabatha liza kubonisa uxabiso olufanelekileyo ngoko andenzele kona?’

Xa unikela intetho ebandleni, musa ukucinga ukuba ekubeni abazalwana bakho sele benalo ukholo kuYesu, akuseyomfuneko ukutsalela ingqalelo kuye. Loo nto uyithethayo iya kuba nentsingiselo engakumbi ukuba wakhela kolo kholo. Xa uthetha ngeentlanganiso, zinxibelelanise nendima kaYesu njengeNtloko yebandla. Xa uxubusha ngobulungiseleli basentsimini, tsalela ingqalelo kumoya owabonakaliswa nguYesu xa wayephumeza ubulungiseleli bakhe, yaye chaza ubulungiseleli ucinga ngoko uKristu njengoKumkani akwenzayo ukuhlanganisa abantu ukuze balondolozelwe ihlabathi elitsha.

Kuyabonakala ukuba kufuneka okungakumbi kunokufunda nje izibakala ezisisiseko ngoYesu. Ukuze abantu babe ngamaKristu okwenyaniso, bamele babe nokholo kuye yaye bamthande ngokwenene. Lolo thando oluya kubenza bamthobele ngokunyaniseka. (Yoh. 14:15, 21) Lwenza abantu beme bangagungqi elukholweni xa bejamelene nobunzima, baqhubeke behamba emanyathelweni kaKristu yonke imihla yobomi babo, bazingqine bengamaKristu aqolileyo ‘amiliselwe ngokuqinileyo aza endela kwisiseko.’ (Efe. 3:17) Ikhondo elinjalo lizisa uzuko kuYehova, uThixo noYise kaYesu Kristu.

“EZI NDABA ZILUNGILEYO ZOBUKUMKANI”

XA WAYECHAZA iinkcukacha eziphathelele umqondiso wobukho bakhe nowokuqosheliswa kwale nkqubo yezinto, uYesu waxela kwangaphambili esithi: “Ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga; kwandule ke kufike ukuphela.”—Mat. 24:14.

Siyintoni kanye kanye esi sigidimi simele sivakaliswe kangaka? Siphathelele uBukumkani uYesu awasifundisa ukuba sibuthandazele kuThixo, sithi: “Mabufike ubukumkani bakho.” (Mat. 6:10) ISityhilelo 11:15 sibuchaza ngokuthi “bubukumkani beNkosi yethu [uYehova] nobukaKristu wayo” kuba igunya lokulawula livela kuYehova kwaye linikwe uKristu njengoKumkani. Noko ke, phawula ukuba isigidimi awathi uYesu siza kuvakaliswa ngomhla wethu asipheleli koko abalandeli bakhe babekushumayela ngenkulungwane yokuqala. Babexelela abantu oku: “Ubukumkani bukaThixo busondele kuni.” (Luka 10:9) Ngelo xesha uYesu, lowo uthanjiswe njengoKumkani, wayephakathi kwabo. Kodwa kuMateyu 24:14, uYesu waxela kwangaphambili ngokuvakaliswa ehlabathini lonke kwesinye isiganeko esibalulekileyo ekuphunyezweni kwenjongo kaThixo.

Umprofeti uDaniyeli wanikwa umbono ophathelele esi siganeko. Wabona “uthile onjengonyana womntu,” uYesu Kristu, enikwa ‘nguNyangelemihla,’ uYehova uThixo, “ulawulo nesidima nobukumkani, ukuze zonke izizwana neentlanga neelwimi zimkhonze.” (Dan. 7:13, 14) Eso siganeko sibalulekileyo kwindalo iphela senzeka ezulwini ngonyaka we-1914. Emva koko, uMtyholi needemon zakhe baphoswa emhlabeni. (ISityhi. 12:7-10) Inkqubo endala yezinto yayingene kwimihla yayo yokugqibela. Kodwa ngaphambi kokuba ishenxiswe ngokupheleleyo, kukhutshwa isibhengezo ehlabathini lonke esithi ngoku uKumkani kaYehova onguMesiya uyalawula kwitrone yakhe esezulwini. Abantu abakuzo zonke iindawo bayaziswa. Intsabelo yabo ibonisa isimo sengqondo abanaso ngOyena Uphakamileyo njengoMlawuli “ebukumkanini babantu.”—Dan. 4:32.

Kuyinyaniso kona ukuba kuninzi okuseza kwenzeka—kuninzi kakhulu! Sisaqhubeka sithandaza sisithi, “Mabufike ubukumkani bakho,” kodwa asitsho ngengqiqo yokuba uBukumkani bukaThixo buza kumiselwa kwixesha elizayo. Kunoko, sitsho ngengqiqo yokuba uBukumkani basezulwini buya kuthabatha amanyathelo angqalileyo okuzalisekisa iziprofeto ezinjengeso sikuDaniyeli 2:44 nesikwiSityhilelo 21:2-4. Buya kuguqula umhlaba ube yiparadesi ezaliswe ngabantu abathanda uThixo nabathanda abanye abantu. Njengoko sishumayela “ezi ndaba zilungileyo zobukumkani,” sichaza loo mathemba exesha elizayo. Kodwa ngentembelo sikwaxelela abantu ukuba uYehova sele elidlulisele kuNyana wakhe igunya lokulawula. Ngaba uyazigxininisa ezi ndaba zilungileyo xa unikela ubungqina ngoBukumkani?

Ukucacisa UBukumkani. Sinokuluphumeza njani uthumo esilunikiweyo lokuvakalisa uBukumkani bukaThixo? Sinokuvuselela umdla ngokuqalisa incoko ngemibandela eyahlukeneyo, kodwa ifanele icace msinya into yokuba isigidimi sethu singoBukumkani bukaThixo.

Inkalo ebalulekileyo yalo msebenzi ibandakanya ukufunda okanye ukucaphula izibhalo ezibhekisela kobu Bukumkani. Xa ubhekisela kuBukumkani, qiniseka ukuba abo uthetha nabo bayayiqonda into obuyiyo. Kusenokufuneka ungapheleli nje ekuthini uBukumkani bukaThixo bungurhulumente. Abanye abantu basenokukufumanisa kunzima ukuyigqala njengorhulumente into engabonakaliyo. Usenokuqiqa nabo ngeendlela ezahlukeneyo. Ngokomzekelo, amandla omxhuzulane akabonakali, kodwa anempembelelo enamandla ebomini bethu. Asinakumbona Lowo wenze umthetho womxhuzulane, kodwa ke izicacele into yokuba unamandla amakhulu. IBhayibhile imchaza ‘njengoKumkani kanaphakade.’ (1 Tim. 1:17) Okanye unokuqiqa ngokuthi kwilizwe elikhulu, abantu abaninzi abakaze baye kwidolophu elikomkhulu okanye babone umlawuli wabo ngawabo amehlo. Beva ezindabeni ngezi zinto. Ngendlela efanayo, iBhayibhile, epapashwe ngeelwimi ezingaphezu kwama-2 200, isixelela ngoBukumkani bukaThixo; iyasichazela ukuba ngubani onikwe igunya nokuba benza ntoni obu Bukumkani. IMboniselo, epapashwa ngeelwimi ezininzi ukugqitha naliphi na iphephancwadi eliphuma ngamaxesha athile, ‘Ivakalisa UBukumkani BukaThixo,’ njengoko lisitsho iphepha layo elisekuqaleni.

Ukuze uncede abantu baqonde uBukumkani, usenokukhankanya ezinye zezinto abafuna oorhulumente babenzele zona: ukunqabiseka kwezoqoqosho, uxolo, ukungabikho kolwaphulo-mthetho, ukungacalulwa kwamaqela eentlanga, imfundo nokunyanyekelwa kwempilo. Bonisa ukuba buBukumkani bukaThixo kuphela obuya kuyanelisa ngokupheleleyo le minqweno kunye neminye iminqweno olunayo uluntu.—INdu. 145:16.

Zabalazela ukwenza abantu banqwenele ukuba ngabalawulwa boBukumkani obuya kulawulwa nguYesu Kristu njengoKumkani. Chaza imimangaliso awayenzayo ukuze abonise oko aya kukwenza xa sele enguKumkani ezulwini. Thetha ngokufuthi ngeempawu ezinomtsalane awazibonakalisayo. (Mat. 8:2, 3; 11:28-30) Chaza ukuba wanikela ubomi bakhe ngenxa yethu nokuba emva koko uThixo wamvusela kubomi bokungafi emazulwini. Kulapho ezulwini apho alawula khona njengoKumkani.—IZe. 2:29-35.

Yibethelele into yokuba ngoku uBukumkani bukaThixo bulawula busezulwini. Noko ke, yiqonde into yokuba inkoliso yabantu ayiziboni izinto ebinokulindela ukuba zenzeke xa elawula. Yivume loo nto, uze ubuze enoba bayayazi na into uYesu Kristu awathi lwaluya kubonakala ngayo ulawulo lwakhe. Khawuthi gqaba gqaba ezinye zeenxalenye zomqondiso oyintlanganisela okuMateyu isahluko 24, kuMarko isahluko 13 okanye kuLuka isahluko 21. Emva koko buza isizathu sokuba ukubekwa kukaKristu etroneni ezulwini kukhokelele kwiimeko ezinjalo ehlabathini. Yalathisa ingqalelo kwiSityhilelo 12:7-10, 12.

Ukuze ubanike ubungqina obuvakalayo boko uBukumkani bukaThixo bukwenzayo ngoku, funda uMateyu 24:14, uze uchaze ucwangciso lwemfundo yeBhayibhile oluqhutywa ehlabathini lonke sithethanje. (Isa. 54:13) Baxelele abantu ngezikolo ezahlukahlukeneyo angenelwa kuzo amaNgqina kaYehova—zonke zisekelwe eBhayibhileni, zonke azibizi nemdaka le isenti. Chaza ukuba ukongezelela kubulungiseleli bendlu ngendlu, siye siqhube izifundo zeBhayibhile zamakhaya zesisa kubantu nakwiintsapho ezifunayo ezikumazwe angaphezu kwama-230. Nguwuphi urhulumente wabantu okwaziyo ukulungiselela ucwangciso lwemfundo oluphangalele ngolo hlobo, lungapheleli kubalawulwa bakhe kodwa ludlulele nakubantu abasemhlabeni wonke? Bameme abantu ukuba beze kwiHolo yoBukumkani, beze kwiindibano ezincinane nezinkulu zamaNgqina kaYehova, baze kubona indlela le mfundo ebuchaphazela ngayo ubomi babantu.—Isa. 2:2-4; 32:1, 17; Yoh. 13:35.

Kodwa ngaba umninimzi uya kuyiqonda indlela obakhe ubomi obuchaphazeleka ngayo? Unokumchazela ngobuchule ukuba injongo yokutyelela kwakho kukuxubusha ngethuba elivulekele wonk’ ubani lokuba ngumlawulwa woBukumkani bukaThixo. Njani? Ngokufunda oko uThixo akufunayo nangokuphila ngokuvisisana nako.—Dut. 30:19, 20; ISityhi. 22:17.

Nceda Abanye Babeke UBukumkani Kwindawo Yokuqala. Kwanasemva kokuba umntu esamkele isigidimi soBukumkani, kukho izigqibo amele azenze. Ngaba buya kubaluleka kangakanani uBukumkani bukaThixo ebomini bakhe? UYesu wabongoza abafundi bakhe ukuba ‘bafune kuqala ubukumkani.’ (Mat. 6:33) Sinokuwanceda njani amanye amaKristu enze oko? Ngokumisela umzekelo thina kuqala nangokuxubusha amathuba avelayo. Maxa wambi, ngokubuza umntu ukuba ukhe wacinga na ngezinto ezithile anokuzenza nangokumbalisela amava ukuze umbonise oko abanye bakwenzayo. Ngokuxubusha iingxelo zeBhayibhile ngendlela yokuba zilwenze nzulu uthando lukabani ngoYehova. Ngokuyibethelela into yokuba uBukumkani buyinto yokwenene. Ngokugxininisa indlela obaluleke ngokwenene ngayo umsebenzi wokuvakalisa uBukumkani. Okona kulunge nangakumbi kudla ngokuphunyezwa, kungekhona ngokuxelela abantu oko kufanele kwenziwe, kodwa ngokuvuselela kubo umnqweno wokukwenza.

Ngokuqinisekileyo, isigidimi esibalulekileyo esimele sonke sisivakalise sinikela ingqalelo ekhethekileyo kuYehova uThixo, kuYesu Kristu nakuBukumkani. Iinyaniso ezibalulekileyo eziphathelele aba bantu sifanele sizigxininise xa sinikela ubungqina esidlangalaleni, kwiintlanganiso zethu zebandla nakubomi bethu. Xa sisenjenjalo, sibonisa ukuba ngokwenene siye sangenelwa kwimfundo yeSikolo Sobulungiseleli Sobuthixo.