Ubomi Obunenjongo—Ngoku Nangonaphakade
UNOKUYIFUMANA injongo ebomini kwanangoku. Njani? Ngokulandela imigaqo yobulumko eseLizwini likaThixo, iBhayibhile. Makhe sihlole imigaqo embalwa.
UMGAQO WEBHAYIBHILE: UKumkani uSolomon wabhala wathi “Akukho nto elunge ngakumbi emntwini kunokuba adle, asele aze enze umphefumlo wakhe ubone okulungileyo ngenxa yokusebenza kwakhe nzima.”—INTSHUMAYELI 2:24.
Sidalelwe ukufumana ulwaneliseko ngokusebenza. Nakwezona meko zinzima, ungafumana ulwaneliseko ngokusebenza ngokuzimisela nangokunyaniseka.
UMGAQO WEBHAYIBHILE: “Kunoyolo ngakumbi ukupha kunokwamkela.”—IZENZO 20:35.
Ngokomzekelo, abanye baye bafumanisa ukuba ukwenzela abanye abantu izinto—ukusebenzisa ixesha namandla abo benceda abanye ngamaxesha obunzima—kuye kwabonwabisa kakhulu kwaza kwenza ubomi babo baba nentsingiselo. USolomon wabhala wathi: “Musa ukwala nokulungileyo kwabo kuselungelweni labo ukukufumana.”—IMizekeliso 3:27.
Khawucinge ngomzekelo kaRalph. Emva kokufumana umhlala phantsi, wathelela umfazi wakhe kumsebenzi wamaKristu wokushumayela. Ngamnye wabo uchitha iiyure ezithile nyanga nganye eshumayela ukuze afundise abanye iBhayibhile. URalph uthi: “Xa sibuyela ekhaya, asidinwanga nje kuba sibadala, kodwa sidinwe kuba siye sasebenzisa amandla ethu onke ukuze sikhonze uBawo wethu osezulwini. Kukudinwa okufanelekileyo!” Yena nomfazi wakhe bonwabile, kuba bayapha.
UMGAQO WEBHAYIBHILE: “Iqabane lokwenyaniso lithanda ngamaxesha onke, yaye lingumzalwana ozalelwe ixesha lokubandezeleka.”—IMIZEKELISO 17:17.
Kunokuba lula ukujamelana neengxaki xa ungekho wedwa. Isithandi sobulumko esiliNgesi uFrancis Bacon uthi kubantu abangenabahlobo, “ihlabathi lifana nentlango.” Ukuba nabahlobo—nokuba ngumhlobo olungileyo—kunokwenza ubomi bunyamezeleke; bube mnandi buze banelise.
UMGAQO WEBHAYIBHILE: “Banoyolo abo bayiphapheleyo intswelo yabo yokomoya.”—MATEYU 5:3.
UYesu wachaza eyona nto ibalulekileyo ukuba ufuna ukunandipha izithembiso zikaThixo—yazi ‘intswelo yakho yokomoya’ uze uyanelise. Ngokungafaniyo nezilwanyana, ngokwemvelo sifuna ukuqonda intsingiselo nenjongo yobomi. NguYehova uThixo kuphela onokuyanelisa le ntswelo yaye uyanelisa ngeLizwi lakhe, iBhayibhile. Njengokuba siye sabona kwinqaku elandulela eli, iBhayibhile iyayichaza injongo kaThixo ngomhlaba. Isixelela isizathu sokuba silapha, nesizathu sokubakho kokubandezeleka, noko uThixo akulindeleyo kuthi. Ukuqonda ezo nyaniso zeBhayibhile kubalulekile ukuze siphile ubomi obunentsingiselo nobanelisayo. Abo bazipha ixesha lokufunda iBhayibhile baze basebenzise izinto abazifundayo bonwabile. Kutheni? Kungenxa yokuba bakha ulwalamano noMdali wethu, ‘uThixo onoyolo,’ uYehova.—1 Timoti 1:11.
UMGAQO WEBHAYIBHILE: “Khumbula uMdali wakho . . . ngaphambi kokuba ifike imihla yentlekele, okanye ifike iminyaka oya kuthi ngayo: ‘Ayindiyolisi.’”—INTSHUMAYELI 12:1.
Icebiso likaKumkani uSolomon kubantu abaselula, ekusenokwenzeka ukuba abaziqondi iingxaki zobomi linokusinceda sonke. UMdali wakho makabe ngoyena mntu ubalulekileyo ebomini bakho. Yiloo nto eya kubenza bube nenjongo ubomi bakho. Sigatye isimo sengqondo sokuba: “Masidle size sisele, kuba ngomso siza kufa.” (1 Korinte 15:32) Ukuba ubeka uThixo kuqala, “kuya kulunga” kuwe, ngokutsho kweNtshumayeli 8:12.
Intombazana egama linguWendi wabubona ubunyaniso baloo mazwi. Xa wayeselula, yena nodadewabo bafunda iSpanish ukuze bafudukele eDominican Republic, apho kufuneka abashumayeli beendaba ezilungileyo zeBhayibhile abangakumbi. “Kwafuneka sincame izinto ezininzi ukuze sikhonze apho kukho imfuneko khona, kodwa saba nexesha elimnandi. Ayikho enye into ebendinokufuna ukuyenza ngezo nyanga zintandathu! Iintsikelelo esazifumanayo zininzi ngakumbi kunezinto esazincamayo.”
Ukunyaniseka KuThixo Kwenza Ubomi Bube Nenjongo
Ukuba nolwalamano noYehova kunokwenza ubomi bakho bube nenjongo ngendlela ekhethekileyo. Njani? USathana akazange aphelele ekwenzeni uAdam noEva bavukele ulawulo lukaThixo, kodwa watyhola abantu esithi akukho mntu unokunyaniseka kuThixo xa evavanywa. (Yobhi 1:9-11; 2:4) Ungafak’ isandla ekungqineni uSathana elixoki! Njani? Ngokuhlala unyanisekile kuThixo, ngokuthobela imigaqo yakhe nangokubonisa ukuba uyalamkela ilungelo likaYehova lokusenzela isigqibo sokulungileyo nokubi.—ISityhilelo 4:11.
Kusenokufuneka sinyamezele ukuba sifuna ukwenza okulungileyo. Ngaba ezo zinto ziya kusenza singonwabi? Masithi utshaba olukhohlakeleyo luhleba umhlobo okanye ilungu lentsapho esilithandayo. Ukuba ukuthethelela loo mntu kusenza siphathwe kakubi lutshaba lwethu, ngaba loo nto ibiya kusenza singonwabi? Akunjalo! Besiya kukuvuyela ukunyamezela ngenxa yomhlobo wethu. Kukwanjalo nangokunyaniseka kuThixo. Ukunyaniseka kwethu kwezi meko zimbi kumenza avuye uThixo.—IMizekeliso 27:11.
Ubomi Obunenjongo Ngonaphakade
Zibekele usukelo lokufunda yonke into ngoThixo nangenjongo yakhe. UYesu Kristu wathi: “Oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso, nangalowo umthumileyo, uYesu Kristu.” (Yohane 17:3) Xa uThixo efeza injongo yakhe yantlandlolo, abantu abathembekileyo baza kunandipha “ubomi obungunaphakade” kumhlaba oyiparadesi awayebalungiselele yona kwasekuqaleni uYehova. Buya kwandula ke ubomi bube nentsingiselo buze banelise.—INdumiso 145:16.
Unokulufumana phi ulwazi awathetha ngalo uYesu? KwiLizwi likaThixo eliphefumlelweyo, iBhayibhile. Ukuba ufuna ukuncedwa, zive ukhululekile ukubhalela abapapashi beli phephancwadi. Baya kukuvuyela ukukuthumelela umntu oza kukunceda wazi oko kufundiswa yiBhayibhile.