Ngaba Unayo “Ingqondo KaKristu”?
“Ngamana ke uThixo onika unyamezelo nentuthuzelo anganinika . . . nibe nesimo sengqondo esifanayo neso wayenaso uKristu Yesu.”—ROMA 15:5.
1. Imizobo emininzi yeNgqobhoko ibonisa uYesu engumntu onjani, yaye kutheni le iyindlela engafanelekanga yokuchaza uYesu?
“AKAZANGE abonwe ehleka.” Leyo yindlela achazwa ngayo uYesu kuxwebhu ekuthiwa, nangona kuxokwa, labhalwa ligosa laseRoma yamandulo. Olu xwebhu, obelusoloko lunjengokuba lunjalo ngoku ukususela ngenkulungwane ye-11, kuthiwa luye lwaphembelela abazobi abaninzi.a Kwimizobo emininzi, uYesu ubonakala engumntu olusizi nowayengafane ancume. Kodwa leyo asiyondlela ichanileyo yokuchaza uYesu, lowo iiVangeli zimchaza njengomntu owayenobubele nemfesane.
2. Sinokusihlakulela njani ‘isimo sengqondo esifana neso wayenaso uKristu Yesu,’ yaye oku kuya kusixhobisela ukuba senze ntoni?
2 Ngokucacileyo, ukuze simazi ngokwenene uYesu, simele sizalise iingqondo neentliziyo zethu ngolwazi oluchanileyo ngohlobo lomntu awayenguye ngokwenene uYesu ngoxa wayelapha emhlabeni. Ngoko masikhe sihlole ezinye iingxelo zeVangeli ezisenza siqonde “ingqondo kaKristu”—ngamany’ amazwi iimvakalelo zakhe, indlela awayezibona ngayo izinto, iingcinga zakhe nendlela awayeqiqa ngayo. (1 Korinte 2:16) Njengoko sixubusha, masicinge ngendlela esinokuhlakulela ngayo ukuba “nesimo sengqondo esifanayo neso wayenaso uKristu Yesu.” (Roma 15:5) Ngaloo ndlela, sinokukuxhobela ukulandela umzekelo awasimisela wona ebomini bethu nakwindlela esiqhubana ngayo nabanye.—Yohane 13:15.
Wayengeneka
3, 4. (a) Yayinjani imeko kwingxelo ebhalwe kuMarko 10:13-16? (b) Wasabela njani uYesu xa abafundi bakhe babezama ukubalela abantwana abaselula ukuba beze kuye?
3 Abantu babetsaleleka kuYesu. Ngezihlandlo ezahlukahlukeneyo, abantu abakubudala obahlukahlukeneyo nabaneemvelaphi ezingafaniyo babesiza ngokukhululekileyo kuye. Phawula isiganeko esibhalwe kuMarko 10:13-16. Senzeka ngasekupheleni kobulungiseleli bakhe njengoko wayesiya ngaseYerusalem okokugqibela, ukuze afe kabuhlungu.—Marko 10:32-34.
4 Khawube nalo mbono. Abantu baqalisa ukuzisa abantwana babo, kuquka iintsana, ukuze uYesu abasikelele.b Noko ke, abafundi bazama ukubanqanda abantwana ukuba bangezi kuYesu. Mhlawumbi abafundi bavakalelwa kukuba ngokuqinisekileyo uYesu akafuni ukukhathazwa ngabantwana kwezi veki zobunzima. Kodwa bayaphazama. UYesu akukuphawula oko kwenziwa ngabafundi bakhe, akumvuyisi. UYesu ubizela abantwana kuye, esithi: “Bayekeni abantwana abaselula beze kum; musani ukuzama ukubalela.” (Marko 10:14) Wandula ke enze into ebonisa ububele nothando lokwenene. Ingxelo ithi: “Wabawola aba bantwana waza waqalisa ukubasikelela.” (Marko 10:16) Kucacile ukuba abantwana babekhululekile njengoko uYesu wayebawola ngenyameko.
5. Ingxelo ekuMarko 10:13-16 isixelela ntoni ngohlobo lomntu awayenguye uYesu?
5 Loo ngxelo imfutshane isixelela okuninzi ngohlobo lomntu awayenguye uYesu. Phawula ukuba wayengeneka. Nangona wayekwisigxina esiphakamileyo emazulwini, wayengabasongeli okanye abajongele phantsi abantu abangafezekanga. (Yohane 17:5) Akunto ibalulekileyo na ukuba nabantwana baziva bekhululekile xa babekunye naye? Ngokuqinisekileyo babengenakutsaleleka kumntu ongenabubele nolusizi owayengakhe ancume okanye ahleke! Abantu abakubudala obahlukahlukeneyo babesiya kuYesu ngenxa yokuba babeqonda ukuba ungumntu onobubele nonenyameko yaye babeqinisekile ukuba wayengenakubagxotha.
6. Abadala banokuzenza njani ukuba bangeneke ngakumbi?
6 Xa sicinga ngale ngxelo, sinokuzibuza oku, ‘Ngaba ndinayo ingqondo kaKristu? Ngaba ndiyangeneka?’ Kula maxesha anzima, izimvu zikaThixo zifuna abalusi abangenekayo, amadoda ‘anjengendawo yokuzimela umoya.’ (Isaya 32:1, 2; 2 Timoti 3:1) Badala, ukuba nihlakulela umnqweno onyanisekileyo kubazalwana benu yaye nizimisele ukuzinikela ngenxa yabo, baya kuyiqonda inkxalabo yenu. Baya kuyibona apha ebusweni, bayive kwimvakalo zwi yenu, baze bayiphawule kububele benu. Obo bubele nenkxalabo enyanisekileyo bunokwenza ukuba kubekho ukuthembana kuze kube lula ngakumbi ngabanye, kuquka abantwana, ukuba beze kuni. Elinye ibhinqa elingumKristu lichaza isizathu sokuba laye lakwazi ukuthetha ngokukhululekileyo nomnye umdala, lithi: “Wathetha nam ngendlela ebonakalisa ukuba nobubele nemfesane. Ngapha koko, ngendandingazange ndithethe nelimdaka. Wandenza ndaziva ndinqabisekile.”
Ukuba Nolwazelelelo Ngabanye
7. (a) UYesu wabonisa njani ukuba wayenolwazelelelo ngabanye? (b) Sisenokuba siyintoni isizathu sokuba uYesu amenze abone ngokuthe ngcembe umntu owayeyimfama?
7 UYesu wayenolwazelelelo. Wayeziphaphele iimvakalelo zabanye. Ukubona nje abantu ababandezelekileyo kwakumchukumisa ngokunzulu kangangokuba wayebakhulula kwimbandezelo abakuyo. (Mateyu 14:14) Wayenolwazelelelo nangokusikelwa umda kwabanye nangeentswelo zabo. (Yohane 16:12) Ngesinye isihlandlo, abantu bazisa kuye imfama baza bacela uYesu ukuba ayiphilise. UYesu wayenza yaphinda yabona, kodwa esenjenjalo ngokuthe ngcembe. Ekuqaleni lo mntu wabona abantu—‘ababonakala ngathi yimithi, kodwa behambahamba.’ Wandula ke uYesu wamenza wabona ngokupheleleyo. Kwakutheni ukuze amphilise ngokuthe ngcembe? Kusenokuba oku kwakufanelekile ukuze lo wayeqhele ubumnyama aqhelane nokubona ngequbuliso ukukhanya nezinto ezazintsonkothile kuye.—Marko 8:22-26.
8, 9. (a) Yintoni eyenzekayo ngokukhawuleza emva kokuba uYesu nabafundi bakhe bengene kummandla waseDekapoli? (b) Chaza indlela uYesu awamphilisa ngayo umntu owayesisithulu.
8 Kwakhona phawula isiganeko esenzeka emva kwePasika yowama-32 C.E. UYesu nabafundi bakhe babengena kummandla waseDekapoli, ngakwimpuma yoLwandle lwaseGalili. Ngokukhawuleza, kwafika izihlwele apho zizise kuYesu abaninzi ababegula nababeneziphene, yaye wabanyanga bonke. (Mateyu 15:29, 30) Okubangel’ umdla kukuba uYesu wakhetha umntu omnye wamnika ingqalelo ekhethekileyo. Umbhali weVangeli uMarko, ekukuphela kwakhe obhala ngesi siganeko, unikela ingxelo ngoko kwenzekayo.—Marko 7:31-35.
9 Lo mntu wayesisithulu yaye engakwazi ukuthetha kakuhle. Kusenokuba uYesu waqonda ukuba lo mntu wayesoyika okanye eneentloni. Ngoko uYesu wenza into eyayingaqhelekanga noko. Wathabathela lo mntu bucala, kude nesihlwele, kwindawo engasese. Wandula ke uYesu wenza imiqondiso ukubonisa lo mntu oko wayeza kukwenza. “Wafaka iminwe yakhe ezindlebeni zalo mntu waza, emva kokutshica, wachukumisa ulwimi lwakhe.” (Marko 7:33) Emva koko, uYesu wakhangela ezulwini wangqukruleka ethandaza. Ezi zenzo zazisithi kule ndoda, ‘Oku ndiza kukwenzela kona kungenxa yamandla kaThixo.’ Ekugqibeleni, uYesu wathi: “Vuleka.” (Marko 7:34) Akutsho, lo mntu wabuya weva, yaye wakwazi ukuthetha kakuhle.
10, 11. Sinokubonakalisa njani ukuba sinolwazelelelo ngeemvakalelo zabanye ebandleni? entsatsheni?
10 Olunjani lona ulwazelelo olwaboniswa nguYesu kwabanye! Wayeziphaphele iimvakalelo zabo, yaye olu velwano lwamshukumisela ukuba enze izinto ngendlela eyayibonisa ukuzikhathalela iimvakalelo zabo. NjengamaKristu, senza kakuhle ukuhlakulela size sibonise ukuba nengqondo kaKristu kule nkalo. IBhayibhile iyasibongoza isithi: “Nonke yibani nengqondo efanayo, nibonakalisa imvakalelo yobudlelane, ninomsa wobuzalwana, imfesane yofefe, nithobekile engqondweni.” (1 Petros 3:8) Ngokuqinisekileyo oku kufuna ukuba sithethe size senze izinto ngendlela ebonisa ukuba nolwazelelelo ngeemvakalelo zabanye.
11 Ebandleni, sinokubonisa ulwazelelelo ngeemvakalelo zabanye ngokubaphatha ngesidima, sibaphatha ngendlela ebesingathanda ukuphathwa ngayo. (Mateyu 7:12) Oko bekuya kuquka ukukulumkela oko sikuthethayo nendlela esikuthetha ngayo. (Kolose 4:6) Khumbula ukuba ‘amazwi angacingisiswanga anokuhlaba njengekrele.’ (IMizekeliso 12:18, thelekisa iNW.) Kuthiwani ngentsapho? Indoda nomfazi abathandana ngokwenene baziphaphele iimvakalelo zomnye nomnye. (Efese 5:33) Bayakuphepha ukusebenzisa amazwi arhabaxa, ukunyemba okuzingisileyo, nezikweko ezihlabayo—zinto ezo ezinokwenzakalisa iimvakalelo ngendlela yokuba zinganyangeki lula. Nabantwana baneemvakalelo, yaye abazali abanothando bayaziphaphela iimvakalelo zabo. Xa kufuneka kulungiswe okuthile, abazali abanjalo balungisa umntwana wabo ngendlela ebonisa intlonelo nesidima yaye bangamenzi azive eneentloni.c (Kolose 3:21) Ngaloo ndlela xa sibonisa ulwazelelelo kwabanye, sibonisa ukuba sinengqondo kaKristu.
Ukukulungela Ukubathemba Abanye
12. UYesu wayenasiphi isimo sengqondo esilungeleleneyo nesifanelekileyo ngabafundi bakhe?
12 UYesu wayenesimo sengqondo esilungeleleneyo nesisengqiqweni ngabafundi bakhe. Wayesazi kakuhle ukuba abafezekanga. Ngapha koko, wayezazi iintliziyo zabantu. (Yohane 2:24, 25) Sekunjalo, wayengaboni nje ukungafezeki kwabo kuphela kodwa wayebona neempawu zabo ezintle. Wayebona noko ayenokukwazi ukukwenza la madoda awayetsalwe nguYehova. (Yohane 6:44) Indlela efanelekileyo awayebajonga ngayo uYesu abafundi bakhe yayibonakala nakwindlela awayeqhubana ngayo nabo nendlela awayebaphatha ngayo. Phakathi kwezinye izinto, wabonisa ukukulungela kwakhe ukubathemba.
13. UYesu wabonisa njani ukuba wayebathemba abafundi bakhe?
13 UYesu wakubonakalisa njani oko kubathemba? Ukumka kwakhe emhlabeni, waphathisa abafundi bakhe abathanjisiweyo imbopheleleko enzima. Wabaphathisa imbopheleleko yokunyamekela izilangazelelo zoBukumkani bakhe zomhlaba wonke. (Mateyu 25:14, 15; Luka 12:42-44) Ebudeni bobulungiseleli bakhe, wabonisa nangeendlela ezincinane nezingangqalanga ukuba wayebathemba. Emva kokuba andise ukutya kokondla izihlwele ngokungummangaliso, imbopheleleko yokwaba oko kutya wayiphathisa abafundi bakhe.—Mateyu 14:15-21; 15:32-37.
14. Unokuyishwankathela njani ingxelo ebhalwe kuMarko 4:35-41?
14 Kwakhona, phawula ingxelo ekuMarko 4:35-41. Ngesi sihlandlo uYesu nabafundi bakhe bakhwela isikhephe baza baya ngasempuma ngaphesheya koLwandle lwaseGalili. Ngokukhawuleza emva kokunduluka kwabo, uYesu wangqengqa ngemva esikhepheni waza walala ubuthongo. Noko ke, kungekudala, “kwaqhambuka isaqhwithi somoya omkhulu.” Izaqhwithi ezinjalo zaziqhelekile kuLwandle lwaseGalili. Ngenxa yokuba ikwindawo esezantsi (malunga neemitha ezingama-200 ukuphakama), umoya walapho ushushu kunalowo weminye imimandla ejikelezileyo, yaye loo nto ibangela ukuba kubekho ukuphazamiseka emoyeni. Ukongezelela koko, imimoya enamandla iya ngakwiNtlambo yeYordan isuka kwiNtaba yeHermon, engasentla. Kuyazola ngalo mzuzu kolandelayo kubekho isaqhwithi. Khawucinge ngoku: Ngokungathandabuzekiyo uYesu wayezazi izaqhwithi ezazidla ngokubakho apho, kuba wakhulela eGalili. Ukanti, walala ngoxolo, ethembele kubuchule babafundi bakhe, abanye babo ababengabalobi.—Mateyu 4:18, 19.
15. Sinokumxelisa njani uYesu ngokukulungela kwakhe ukubathemba abafundi bakhe?
15 Ngaba sinokumxelisa uYesu ngokukulungela kwakhe ukubathemba abafundi bakhe? Bambi bakufumanisa kunzima ukuphathisa abanye iimbopheleleko. Ngokungathi kunjalo, bamele babamb’ iintambo ngalo lonke ixesha. Basenokucinga ngolu hlobo, ‘Ukuba ndifuna into yenziwe kakuhle, ndimele ndiyenze ngokwam!’ Kodwa ukuba siza kuzenzela yonk’ into, sisengozini yokuzidinisa yaye mhlawumbi sithabathe ngokungeyomfuneko ixesha ebesimele ukuba silichitha neentsapho zethu. Ngapha koko, ukuba asibaniki abanye imisebenzi neembopheleleko ezifanelekileyo, sisenokuba sibabandeza ukufumana amava noqeqesho abalufunayo. Kusenokuba bubulumko ukufunda ukubathemba abanye sibaphathise imibandela ethile. Senza kakuhle ukuzibuza ngokunyanisekileyo, ‘Ngaba ndinayo ingqondo kaKristu kulo mbandela? Ngaba ndiyabanika abanye eminye imisebenzi, ndithemba ukuba baya kwenza konke okusemandleni abo?’
Wayekholelwa Kubafundi Bakhe
16, 17. Ngobusuku bakhe bokugqibela emhlabeni, sisiphi isiqinisekiso uYesu awasinika abapostile bakhe, nangona wayesazi ukuba babeza kumshiya?
16 UYesu wabonisa isimo sengqondo esifanelekileyo ngabafundi bakhe nangenye indlela ebalulekileyo. Wabazisa ukuba wayenentembelo kubo. Oku kwabonakala ngokucacileyo kumazwi aqinisekisayo awawathetha kubapostile bakhe ngobusuku bakhe bokugqibela emhlabeni. Phawula oko kwenzekayo.
17 UYesu wayexakekile ngaloo ngokuhlwa. Wabafundisa ngokoqobo abapostile bakhe ukuthobeka ngokubahlamba iinyawo. Emva koko, wasungula isidlo sangokuhlwa esasiya kuba sisikhumbuzo sokufa kwakhe. Emva koko, abapostile babandakanyeka kwingxoxo yokuba nguwuphi obonakala emkhulu kunabo bonke. Ngomonde, uYesu akazange abagxeke kabukhali kodwa waqiqa kunye nabo. Wabaxelela oko kuza kwenzeka esithi: “Nonke niya kukhutyekiswa ngokunxibelelene nam ngobu busuku, kuba kubhaliwe kwathiwa, ‘Ndiza kumbetha umalusi, ibe izimvu zomhlambi ziya kuchithachithwa.’” (Mateyu 26:31; Zekariya 13:7) Wayesazi ukuba abahlobo bakhe abasondeleyo babeya kumshiya ngexesha awayeza kubafuna ngalo. Sekunjalo, akazange abagxeke. Ngokwahluke ngokupheleleyo koko, wabaxelela oku: “Kodwa emva kokuba ndivusiwe, ndiza kuhamba phambi kwenu ndiye eGalili.” (Mateyu 26:32) Ewe, wabaqinisekisa ukuba nakuba babeya kumshiya, yena wayengayi kubashiya. Emva kokudlula kolo vavanyo loyikekayo, wayeza kuphinda adibane nabo.
18. UYesu wabanika luphi uthumo olunzima abafundi bakhe eGalili, yaye abapostile baluphumeza njani?
18 UYesu wasigcina isithembiso sakhe. Kamva, uYesu ovusiweyo wabonakala kubapostile bakhe abali-11 abathembekileyo eGalili, ekubonakala ukuba babehlanganisene nabanye abaninzi. (Mateyu 28:16, 17; 1 Korinte 15:6) Apho, uYesu wabanika uthumo olunzulu esithi: “Hambani ke ngoko nize nenze abafundi abantu beentlanga zonke, nibabhaptiza egameni loYise neloNyana nelomoya oyingcwele, nibafundisa ukuba bagcine zonke izinto endiye ndaniyalela zona.” (Mateyu 28:19, 20) Incwadi yeZenzo isinika ubungqina obucacileyo bokuba abapostile baluphumeza olo thumo. Bakhokela ngokuthembeka kumsebenzi wokushumayela iindaba ezilungileyo ngenkulungwane yokuqala.—IZenzo 2:41, 42; 4:33; 5:27-32.
19. Izenzo zikaYesu emva kokuvuswa kwakhe zisifundisa ntoni ngengqondo kaKristu?
19 Isifundisa ntoni le ngxelo ngengqondo kaKristu? UYesu wabona nezona ntsilelo zinzulu zabapostile bakhe, kodwa “wabathanda de kwasekupheleni.” (Yohane 13:1) Nangona babenazo iintsilelo, wabaxelela ukuba wayekholelwa kubo. Phawula ukuba uYesu wayengenantembelo engafanelekanga. Ngokungathandabuzekiyo intembelo nokholo awayenalo ngabo zabomelezela ukuba bazimisele ukuwuphumeza umsebenzi awayebayalele ukuba bawenze.
20, 21. Singabonakalisa njani ukuba sinesimo sengqondo esifanelekileyo ngabo sikholwa nabo?
20 Singabonisa njani ukuba sinengqondo kaKristu kulo mbandela? Musa ukungabathembi abo ukholwa kunye nabo. Ukuba ucinga izinto ezimbi, mhlawumbi oko kuya kuvakala kwinto oyithethayo nakwizenzo zakho. (Luka 6:45) Noko ke, iBhayibhile isixelela ukuba uthando “lukholelwa izinto zonke.” (1 Korinte 13:7) Umntu onothando unesimo sengqondo esifanelekileyo, kungekhona esingafanelekanga. Uthando luyakha endaweni yokuba luchithe. Abantu basabela ngokukhawuleza xa kubonakaliswa uthando kubo yaye bekhuthazwa kunaxa besongelwa. Sinokubakha abanye size sibakhuthaze ngokubabonisa ukuba sinentembelo kubo. (1 Tesalonika 5:11) Ukuba, njengoKristu sinesimo sengqondo esifanelekileyo ngabazalwana bethu, siya kubaphatha ngeendlela eziya kubakha size sifumane okona kulungileyo kubo.
21 Ukuhlakulela nokubonisa ingqondo kaKristu akupheleli nje ekulinganiseni ezinye zezinto ezenziwa nguYesu. Njengoko kukhankanyiwe kwinqaku elingaphambili, ukuba siza kwenza izinto njengoYesu, sifanele kuqala sifunde ukujonga izinto ngendlela awayezijonga ngayo. IiVangeli zisinceda sibone enye inkalo yobuntu bakhe, iingcamango neemvakalelo zakhe ngomsebenzi awayewabelwe, njengoko inqaku elilandelayo liza kubonisa.
[Imibhalo esemazantsi]
a Kolu xwebhu, lo mbhali wobu buxoki uchaza indlela ekuthiwa uYesu wayekhangeleka ngayo, kuquka umbala weenwele, iindevu namehlo akhe. Umguquleli weBhayibhile uEdgar J. Goodspeed uthi obu buxoki “babenzelwe ukuze busetyenziswe ekuchazeni imbonakalo kaYesu ekwiincwadi zabazobi.”
b Kuyabonakala ukuba aba bantwana babengalingani. Igama eliguqulelwe ngokuthi “abantwana abaselula” liyasetyenziswa nakwintombi kaYayiro eneminyaka eli-12. (Marko 5:39, 42; 10:13) Noko ke, kwingxelo efanayo, uLuka usebenzisa igama elisetyenziswa nakwiimveku.—Luka 1:41; 2:12; 18:15.
c Bona inqaku elithi “Ngaba Uyasihlonela Isidima Sabo?” kwinkupho yeMboniselo ka-Aprili 1, 1998.
Ungachaza Njani?
• UYesu wasabela njani xa abafundi bakhe babezama ukubathintela abantwana ukuba beze kuye?
• UYesu wabonakalisa njani ukuba wayenolwazelelelo ngabanye?
• Sinokumxelisa njani uYesu ngokukulungela kwakhe ukubathemba abafundi bakhe?
• Sinokukuxelisa njani ukuba nentembelo kukaYesu kubapostile bakhe?
[Umfanekiso okwiphepha 16]
Abantwana babekhululeka xa bekunye noYesu
[Umfanekiso okwiphepha 17]
UYesu wayebaphatha ngemfesane abanye
[Umfanekiso okwiphepha 18]
Abadala abangenekayo bayintsikelelo