Indima KaMariya Kwinjongo KaThixo

NGEXESHA lobulungiseleli bukaYesu, elinye ibhinqa ladanduluka phakathi kwesihlwele sabantu lathi: “Sinoyolo isibeleko esakuthwalayo namabele owawanyayo!” Ukuba uYesu wayefuna ukuba unina ahlonelwe, eli yayilithuba lokuba akukhuthaze oko. Kunoko waphendula wathi: “Hayi, kunoko, Banoyolo abo balivayo ilizwi likaThixo baze baligcine!”—Luka 11:27, 28.

UYesu akazange akhuthaze ukuba unina ahlonelwe ngokukhethekileyo; okanye axelele abalandeli bakhe ukuba benjenjalo. Oku kuvisisana njani nendlela amakholwa amaninzi anyanisekileyo amhlonela ngayo uMariya? Makhe sihlolisise oko kuthethwa yiBhayibhile ngezinye zeemfundiso ezithandwayo ngonina kaYesu.

“Wena Ubabaliweyo,” “Usikelelwe . . . Phakathi Kwabafazi”

Ingelosi uGabriyeli yaxelela uMariya ngendima yakhe kwinjongo kaThixo. Ngeso sihlandlo, yambulisa isithi: “Bhota, wena ubabalwe kakhulu, uYehova unawe.” (Luka 1:28) Enye inguqulelo ithi xa iguqulela lo mbuliso: “Bhota, wena ubabaliweyo, iNkosi inawe.” Ngokukhawuleza emva koko, uElizabhete wabulisa uMariya ngala mazwi: “Usikelelwe wena phakathi kwabafazi, sisikelelwe nesiqhamo sesibeleko sakho!” (Luka 1:42) Ngaba la mabinzana awabonisi ukuba uMariya ufanele aphathwe ngokukhethekileyo?

Akunjalo. Nangona amaKatolika ewathetha la mazwi xa ethandaza kuMariya, iBhayibhile ayitsho ukuba makuthandazwe kuye. UGabriyeli noElizabhete babeliqonda ilungelo elikhethekileyo likaMariya, njengalowo wayeza kuzala uMesiya, kodwa ayikho indawo ethi makuthandazwe kuye eZibhalweni. Ngokwahlukileyo koko, xa abafundi bakaYesu bamcela ukuba abafundise ukuthandaza, wathi bamele bathandaze kuYise. Phofu ke, umthandazo odumileyo kaYesu uqala ngala mazwi: “Bawo wethu osemazulwini.”—Mateyu 6:9.

Omnye Wabalawuli

Enye yezinto ezifundiswa ngoMariya kukuba ngoku “nguKumkanikazi wezulu.” IBhayibhile ayizange imnike elo wonga. Noko ke, ibonisa ukuba unendima ekhethekileyo kwilungiselelo likaThixo lasezulwini. Yiyiphi loo ndima?

UYesu wathi abanye babafundi bakhe abathembekileyo babeza kulawula naye eBukumkanini. (Luka 22:28-30) UYesu uya kunika abo bakhethiweyo igunya lokuba babe “ngababingeleli kuThixo wethu, yaye baza kulawula njengookumkani phezu komhlaba.” (ISityhilelo 5:10) Ngelicacileyo iBhayibhile isenza sigqibe kwelokuba uMariya ngomnye wabo banikwe eli lungelo lizukileyo. Siyazi njani loo nto?

Umele ukuba uyakhumbula ukuba emva kokufa kukaYesu, uMariya ‘wayezingisa emthandazweni’ kunye nabafundi bakaYesu nabantakwabo. Kulo mthandazo kwakuhlanganisene abafundi abali-120 bekunye “nabafazi abathile.” (IZenzo 1:12-15) IBhayibhile ithi: “Ngoxa umthendeleko wePentekoste wawuqhubeka babekunye bonke kwindawo enye,” yaye bathululelwa umoya oyingcwele kaThixo, owabenza bakwazi ukuthetha iilwimi zasemzini.—IZenzo 2:1-4.

Isibakala sokuba uMariya wayengomnye wabo basikelelwa ngale ndlela sibonisa ukuba yena namanye amabhinqa awafumana isipho somoya oyingcwele bakhethelwa ukuba babe yinxalenye yoBukumkani bukaYesu basezulwini. Ngoko sinesizathu sokukholelwa ukuba ngoku uMariya ukunye noYesu kuzuko lwasezulwini. (Roma 8:14-17) Khawucinge ngamanye amalungelo yena nabanye abaza kulawula noYesu abaza kuwaxhamla ekuphumezeni injongo kaThixo.

Ukusasaza Iintsikelelo Ezimangalisayo

Incwadi yeBhayibhile yeSityhilelo ithi abali-144 000 baza kuvuselwa kuzuko lwasezulwini ukuze bakhonze noYesu njengababingeleli, abagwebi nookumkani. (ISityhilelo 14:1, 4; 20:4, 6) Njengababingeleli, baza kuba nenxaxheba ekusebenziseni idini likaYesu kubo bonke abantu abathobekileyo, babancede bafezeke ngokomoya nasemzimbeni, baze babe nemilinganiselo efaneleke ngokupheleleyo. (ISityhilelo 21:1-4) Kuya kuba lilungelo lokwenene kubo bonke abanquli bakaYehova ukuphila ngelo xesha.a

UMariya waba nendima enkulu ekufezeni injongo kaYehova, ibe usenayo nangoku. Ngenxa yokuthobeka, ukholo, ukuthobela, nokuzinikela kwakhe njengomama, singasathethi ke ngokunyamezela kwakhe izilingo, ufanele axeliswe. Ngenxa yendima awaba nayo ekuzalweni kukaMesiya nokusikelelwa koluntu, umele anikwe imbeko emfaneleyo.

Noko ke, esona sifundo sibalulekileyo esisifunda kuMariya sesokuba, njengabo bonke abakhonzi bakaThixo abathembekileyo, unqula uYehova kuphela. Ekunye nabanye abaza kulawula noKristu, bathi: “KuLowo uhleli etroneni [uYehova uThixo] nakuyo iMvana [uYesu Kristu] makubekho intsikelelo nembeko nozuko namandla ngonaphakade kanaphakade.”—ISityhilelo 5:13; 19:10.

[Umbhalo osemazantsi]

[Amagama acatshulweyo akwiphepha 10]

UMariya ufanele axeliswe ngenxa yokuthobeka, ukholo nokuthobela kwakhe