Ukuncokola Nommelwane—Yintoni Umoya Oyingcwele?

AMANGQINA KAYEHOVA ayakuthanda ukuncokola nabamelwane bawo ngeBhayibhile. Ngaba ukho umbuzo weBhayibhile onawo? Ungathanda ukwazi iinkolelo zamaNgqina kaYehova? Ukuba kunjalo, ungabi mathidala ukuwabuza xa uphinda udibana nawo. Aya kuyiphendula imibuzo yakho.

AmaNgqina kaYehova adla ngokuncokola kanje nabantu. Makhe sithi iNgqina ekuthiwa nguSipho lincokola nomninimzi ekuthiwa nguZola.

Uthetha Ngantoni Xa Uthetha “Ngomoya Oyingcwele”?

Zola: Ndivile ukuba amaNgqina kaYehova awangomaKristu. Nina maNgqina anikholelwa kumoya oyingcwele.

Sipho: Okokuqala mandikuqinisekise ukuba singamaKristu. Isizathu sokuba ndize kuwe namhlanje kukuba ndikholelwa kuYesu Kristu. Ngapha koko nguye owayalela abalandeli bakhe ukuba bashumayele. Kodwa makhe ndikubuze, uthetha ngantoni xa uthetha “ngomoya oyingcwele”?

Zola: Ndithetha ngomoya oyingcwele, isiqu sikathixo sesithathu, umncedi awathi uYesu wayeza kusithumelela yena. Loo mncedi ubaluleke gqitha kum. Ndifuna ukuwuva ukuba uyasebenza kum.

Sipho: Abantu abaninzi bawuqonda ngaloo ndlela umoya oyingcwele. Ngenye imini ndakha ndafunda oko kuthethwa yiBhayibhile ngalo mba. Ukuba unemizuzu embalwa, ndingathanda ukukubonisa izinto endazifundayo.

Zola: Kulungile, singancokola.

Sipho: Igama lam ndinguSipho. Wena?

Zola: Mna ndinguZola.

Sipho: Zola andizukuchithela xesha kodwa ndiza kuthetha ngenkalo nje enye yomoya oyingcwele. Ubuthe umoya oyingcwele ngumncedisi owayethenjiswe nguYesu. Unyanisile. Kodwa ngaba ucinga ukuba umoya oyingcwele ngumntu kwaye ulingana noThixo?

Zola: Ewe, ndafundiswa loo nto.

Ngaba Umoya Oyingcwele Ngumntu?

Sipho: Makhe sihlole iivesi zeBhayibhile ezisinceda sibone enokuba umoya oyingcwele ngumntu kusini na. Mhlawumbi uqhelene nazo. KwiZenzo 2:1-4, kuthiwa: “Ke kaloku ngoxa umhla womthendeleko wePentekoste wawuqhubeka babekunye bonke kwindawo enye, yaye ngequbuliso kwabakho ingxolo evela ezulwini enjengaleyo kanye yempepho ebhudla ngamandla, yaza yayizalisa indlu iphela ababehleli kuyo. Yaye kwabonakala kubo iilwimi ezingathi zezomlilo kwaye zabèka, lwaza lwaolo lwahlala kuye ngamnye wabo, baza bonke bazaliswa ngumoya oyingcwele, baqala ukuthetha ngeelwimi ezahlukileyo, kanye njengoko umoya wawubanika ukuba bathethe amazwi.”

Zola: Ndiyalazi eli bali.

Sipho: Khawutsho ke Zola, ngaba umntu angangena komnye umntu?

Zola: Ayinakwenzeka loo nto.

Sipho: Makhe siphinde sihlole ivesi ye-17 kwakwesi sahluko. Inxalenye yokuqala yayo ithi: “‘Ngemihla yokugqibela,’ utsho uThixo, ‘ndiya kuthululela inxalenye yomoya wam phezu kwalo lonke uhlobo lwenyama.’” Makhe ndikubuze Zola, ngaba uThixo unokuthulula inxalenye ethile yomnye uThixo?

Zola: Naleyo ayinakwenzeka.

Sipho: UYohane uMbhaptizi wakuchaza ngenye indlela ukuzaliswa ngumoya oyingcwele. Amazwi akhe siwafumana kuMateyu 3:11. Uyafuna ukuyiva ukuba ithini le vesi?

Zola: “Mna ndinibhaptiza ngamanzi ngenxa yenguquko yenu; kodwa lowo uzayo emva kwam womelele kunam, ombadada zakhe ndingakufanelekelanga ukuzikhulula. Yena uya kunibhaptiza ngomoya oyingcwele nangomlilo.”

Sipho: Enkosi. Ngaba uyayibona into athi yayiza kwenziwa ngomoya oyingcwele uYohane umBhaptizi?

Zola: Wathetha ngokubhaptizwa ngomoya oyingcwele.

Sipho: Unyanisile. Phawula ukuba wathetha nangokubhaptizwa ngomlilo. Izicacele into yokuba umlilo awungomntu. Ngaba ucinga ukuba le vesi ithi umoya oyingcwele ngumntu?

Zola: Akunjalo.

Sipho: IZibhalo esizifundileyo zibonisa ukuba umoya oyingcwele asingomntu.

Zola: Nam ndiyabona ukuba kunjalo.

‘Ungumncedi’ Njani?

Sipho: Ngaphambili ubukhe wathetha ngebinzana elithi “umncedi.” KuYohane 14:26 uYesu Kristu wathi umoya oyingcwele ‘ngumncedi.’ Makhe siyifunde le vesi: “Umncedi, umoya oyingcwele, lowo uBawo aya kumthumela egameni lam, yena uya kunifundisa zonke izinto aze anikhumbuze zonke izinto endinixelele zona.” Abanye bacinga ukuba le vesi ixhasa uluvo lokuba umoya oyingcwele ngumntu, oza kusinceda aze afundise.

Zola: Nam bendisoloko ndicinga njalo.

Sipho: Kodwa ke akungebi uYesu wayesebenzisa isafobe esithile? Khawuve oko kwathethwa nguYesu ngobulumko, kuLuka 7:35 “Noko kunjalo, ubulumko bungqineka bububulungisa ngabantwana babo bonke.” Ngaba ubunokuthi ubulumko ngumntu onabantwana?

Zola: Akunjalo. Ngokuqinisekileyo eso sisafobe.

Sipho: Ndiyavumelana nawe. Apha uYesu wayesithi ubulumko bubonakala ngemisebenzi. IBhayibhile idla ngokusebenzisa isafobe esibizwa ngokuba sisimntwiso—esikukuthetha ngento engaphiliyo ngokungathi iyaphila. Nathi siyazisebenzisa izafobe xa sincokola. Ngokomzekelo, ekuseni sidla ngokuthi, “Vula iifestile ukuze kungene ilanga.”

Zola: Nam ndidla ngokutsho.

Sipho: Ngaba loo nto ithetha ukuba uthi ilanga lokoqobo lifanele lingene ekhayeni lakho?

Zola: Ngokuqinisekileyo akunjalo. Sisafobe nje.

Sipho: Akungebi ke noYesu wayesebenzisa isafobe xa wayesithi umoya oyingcwele ngumncedi okanye umfundisi?

Zola: Kumele ukuba kunjalo. Loo nto ibiya kuvisisana nezinye izibhalo oye wazifunda ezithi kwathululwa umoya oyingcwele nezithi abantu babhaptizwa ngawo. Kodwa ukuba umoya oyingcwele asingomntu, uyintoni ke ngoko?

Yintoni Umoya Oyingcwele?

Sipho: KwiZenzo 1:8 uYesu uyasichazela ukuba yintoni umoya oyingcwele. Ndicela uyifunde le vesi.

Zola: “Niya kwamkela amandla xa umoya oyingcwele ufika kuni, yaye niya kuba ngamangqina am eYerusalem nakulo lonke elakwaYuda naseSamariya kude kuse nakwezona nxalenye zikude zomhlaba.”

Sipho: Phawula ukuba kule vesi uYesu unxulumanisa umoya oyingcwele namandla. Ngokutsho kweevesi esiye sazifunda ngaphambili, ucinga ukuba ayevela phi loo mandla?

Zola: Ayevela kuThixo, uYise.

Sipho: Kulungile. Umoya oyingcwele ukwangala mandla asetyenziswa nguThixo xa wayedala. Ivesi yesibini eBhayibhileni ibhekisela kuwo. IGenesis 1:2 ithi: “Amandla kaThixo asebenzayo ayezula-zula phezu kwamanzi lawo.” Igama lesiHebhere eliguqulelwe ngokuthi “amandla asebenzayo” likwaguqulelwa nangokuthi “umoya.” UThixo uphumeza ukuthanda kwakhe nenjongo yakhe esebenzisa la mandla angabonakaliyo. Ndicela ufunde le vesi kaLuka 11:13.

Zola: “Ukuba ke ngoko nina, ningendawo nje, niyakwazi ukunika abantwana benu izipho ezilungileyo, wobeka phi na ke yena uYihlo osezulwini ukubanika umoya oyingcwele abo bamcelayo!”

Sipho: Singatsho njani ukuba umoya oyingcwele ulingana noBawo osezulwini ukuba lo Bawo uyawulawula aze awunike abo bawucelayo?

Zola: Akunjalo. Ndiyakuva ke ngoku.

Sipho: Andifuni kukulibazisa Zola. Ubuthe unemizuzu embalwa. Kodwa mandikubuze umbuzo omnye nje kuphela. Ngokutsho kwezi vesi sizifundileyo ungathi uyintoni umoya oyingcwele?

Zola: Ungamandla kaThixo asebenzayo.

Sipho: Uchan’ ucwethe. Xa uYesu wathi umoya oyingcwele ngumncedi okanye umfundisi kuYohane 14:26, wayesebenzisa isimntwiso.

Zola: Bendingayazi loo nto.

Sipho: Kukho into ebalulekileyo esinokuyifunda kumazwi kaYesu.

Zola: Yintoni leyo?

Sipho: Sinokucela uThixo asiphe umoya wakhe oyingcwele xa sisengxakini. Kwakhona sinokuwucela ukuze usincede sifunde inyaniso ngaye.

Zola: Ibangela umdla loo nto. Kuza kufuneka khe ndicinge ngayo.

Sipho: Ngaphambi kokuba ndihambe kukho into endifuna ushiyeke ucinga ngayo. Ekubeni umoya oyingcwele ungamandla kaThixo asebenzayo ngoko siyavumelana ukuba uThixo unokuwusebenzisa ukuze enze nantoni na afuna ukuyenza.

Zola: Ngokuqinisekileyo kunjalo.

Sipho: Kutheni ke ngoko engekawusebenzisi ukuze aphelise usizi nobungendawo obusasazeke umhlaba wonke. Ngaba wakha wazibuza lo mbuzo?a

Zola: Ndakha ndazibuza.

Sipho: Kunganjani xa ndinokubuya kwiveki ezayo ukuze ndiwuphendule?

Zola: Ungaphinda ubuye. Siya kubonana ngoko.

[Umbhalo osemazantsi]