ILizwi LikaYehova Liphilile
Iimbalasane Zencwadi KaYohane
UYOHANE—‘umfundi owayethandwa nguYesu’—ngumntu wokugqibela ukubhala ingxelo ephefumlelweyo yobomi nobulungiseleli bukaKristu. (Yoh. 21:20) Ekubeni yabhalwa malunga nowama-98 C.E., iVangeli kaYohane ayithethi kangako ngezinto ezibhalwe kwezinye iincwadi zeVangeli ezintathu.
Umpostile uYohane wayibhala iVangeli yakhe enenjongo ethile ecacileyo. Ngokuphathelele izinto awazibhalayo uthi: ‘Ziye zabhalwa phantsi ukuze nikholwe ukuba uYesu unguye uKristu uNyana kaThixo, nokuze, ngenxa yokukholwa, nibe nobomi ngegama lakhe.’ (Yoh. 20:31) Isigidimi sayo siluncedo gqitha kuthi.—Heb. 4:12.
“YABONANI, IMVANA KATHIXO”
Esakubona uYesu, eqinisekile uYohane uMbhaptizi wathi: “Yabonani, iMvana kaThixo esusa isono sehlabathi!” (Yoh. 1:29) Njengoko uYesu etyhutyha elaseSamariya, eGalili, elakwaYuda, nemimandla ekwimpuma yeYordan—eshumayela, efundisa, yaye esenza imisebenzi yamandla—‘abantu abaninzi beza kuye baze bakholwe kuye.’—Yoh. 10:41, 42.
Omnye wemimangaliso ebalaseleyo ayenzayo uYesu ngulowo wokuvusa uLazaro. Abaninzi baba nokholo kuYesu xa bebona indoda ebife kangangeentsuku ezine ibuyela ebomini. Noko ke, yena umbingeleli oyintloko nabaFarisi baceba ukumbulala uYesu. Ngenxa yoko, uYesu uyemka apho aye “kwilizwe elikufuphi nentlango, kwisixeko esibizwa ngokuba yiEfrayim.”—Yoh. 11:53, 54.
Iimpendulo Kwimibuzo YeZibhalo:
1:35, 40—Ngaphandle kuka-Andreya, ngubani omnye umfundi owayemi noYohane uMbhaptizi? Umbhali usoloko ebhekisela kuYohane uMbhaptizi ngokuthi “uYohane” ibe yena akaze azibize ngegama kule ncwadi yakhe yeVangeli. Ngoko, kuyabonakala ukuba lo mfundi ungabizwa ngegama ngumbhali weVangeli uYohane ngokwakhe.
2:20—Yiyiphi le tempile “yakhiwa ngeminyaka engamashumi amane anesithandathu”? AmaYuda ayebhekisela ekwakhiweni ngokutsha kwetempile kaZerubhabheli nguKumkani uHerode wakwaYuda. Ngokutsho kombhali-mbali uJosephus, oko kwakhiwa kwaqalisa ngonyaka we-18 wolawulo lukaHerode, okanye ngowe-18/17 B.C.E. Ingcwele yaloo tempile nezinye iindawo ezibalulekileyo zakhiwa kwiminyaka esibhozo. Noko ke, ukwakhiwa kwaloo tempile kwaqhubeka de kwafika iPasika yowama-30 C.E., xa amaYuda athi yakhiwe kangangeminyaka engama-46.
5:14—Ngaba ukugula kubangelwa kukona? Akusoloko kunjalo. Indoda eyaphiliswa nguYesu yayigula kangangeminyaka engama-38 ngenxa yokungafezeki esizalwa nako. (Yoh. 5:1-9) Eyona nto yayithethwa nguYesu kukuba ekubeni ngoku le ndoda yayenzelwe inceba, yayimele ingene kwindlela yosindiso ize ingaphindi yone ngabom nto leyo embi ngakumbi kunoko kugula yayinako. Ukuba yayinokona ngabom, le ndoda yayiza kuba netyala lokwenza isono esingaxolelekiyo, esifanelwe kukufa ingavuswa.—Mat. 12:31, 32; Luka 12:10; Heb. 10:26, 27.
5:24, 25—Ngoobani abo ‘badlula ekufeni baye ebomini’? UYesu uthetha ngabo babekade befile ngokomoya kodwa abathi bakuva amazwi akhe banokholo kuye baza balishiya ikhondo labo lesono. ‘Bayadlula ekufeni baye ebomini’ kuba isigwebo sokufa siyasuswa kubo, baze banikwe ithemba lobomi obungunaphakade ngenxa yokuba nokholo kwabo kuThixo.—1 Pet. 4:3-6.
5:26; 6:53—Kuthetha ukuthini ukuba ‘nobomi’? KuYesu Kristu, oku kuthetha ukuzuza izinto ezimbini ezingqalileyo kuThixo—amandla okukwazi ukwenza abantu bakholeke kuYehova namandla okudlulisela ubomi ngokuvusa abafileyo. Kubalandeli bakaYesu, ‘ukuba nobomi kubo’ kuthetha ukuzuza ubomi obupheleleyo. AmaKristu athanjisiweyo afumana obo bomi xa evuselwa kubomi basezulwini. Abathembekileyo abanethemba lokuphila emhlabeni baya kufumana ubomi obupheleleyo emva kokuba bedlule kuvavanyo oluza kwenzeka emva nje kokuphela koLawulo LukaKristu Lweminyaka Eliwaka.—1 Kor. 15:52, 53; ISityhi. 20:5, 7-10.
6:64—Ngaba xa uYesu wayekhetha uYudas Sikariyoti wayesazi ukuba uza kumngcatsha? Kuyabonakala ukuba wayengazi. Noko ke, ngasihlandlo sithile emva konyaka wama-32 C.E., uYesu wathi kubapostile bakhe: “Omnye wenu ungumnyelisi.” Kusenokwenzeka ukuba, ngelo xesha uYesu wayesele ekubonile ‘ukuqala’ kwekhondo eliphosakeleyo likaYudas Sikariyoti.—Yoh. 6:66-71.
Oko Sikufundayo:
2:4. UYesu wayebonisa uMariya ukuba ekubeni enguNyana kaThixo othanjisiweyo wayemele ayalelwe nguYise wasezulwini. Nakuba uYesu wayesandul’ ukuqalisa ubulungiseleli bakhe, wayeliqonda kakuhle ilixa, okanye ixesha lokwenza umsebenzi wakhe awuthunyiweyo, kuquka ukufa kwakhe okulidini. Akukho namnye nkqu nesalamane sentsapho yakhe njengoMariya, owayenokuba ngumqobo ekwenzeni kwakhe ukuthanda kukaThixo. Nathi simele sizimisele ukumkhonza ngolo hlobo uThixo.
3:1-9. Umzekelo kaNikodemo, umlawuli wamaYuda usifundisa izifundo ezibini. Esokuqala sesi, uNikodemo wabonisa ukuthobeka, ingqiqo nokuphaphela intswelo yakhe yokomoya, eqonda ukuba loo nyana womchweli uphantsi wayengumfundisi othunywe nguThixo. Kufuneka ukuthobeka kumaKristu okwenyaniso namhlanje. Isifundo sesibini sesi, UNikodemo akazange abe ngumfundi ngoxa uYesu wayesesemhlabeni. Mhlawumbi ebangelwa kokoyika abantu, kukoyikela isikhundla sakhe kwiSanhedrin, okanye kukuthanda ubutyebi bakhe. Nasi isifundo esibalulekileyo esisifunda koku: Asimele sivumele utyekelo olunjalo lusithintele ‘ekuthabatheni isibonda sentuthumbo size siqhubeke silandela uYesu.’—Luka 9:23.
4:23, 24. Ukuze uThixo ayamkele indlela esimnqula ngayo, imele ivisisane nenyaniso etyhilwe eBhayibhileni ize ikhokelwe ngumoya oyingcwele.
6:27. Ukusebenzela “ukutya okuhlala kuse ebomini obungunaphakade” kukuqhubeka sisenza umgudu wokwanelisa intswelo esinayo yokomoya. Sifumana uvuyo olungathethekiyo xa sisenjenjalo.—Mat. 5:3.
6:44. UYehova usinyamekela ngokwakhe siqu. Utsalela ngamnye wethu kuNyana wakhe ngomsebenzi wokushumayela aze ngomoya wakhe oyingcwele asincede siqonde inyaniso size siyisebenzise.
11:33-36. Ukubonisa kwethu indlela esivakalelwa ngayo akuthethi kuthi sibuthathaka.
‘QHUBEKANI NIMLANDELA’
Njengoko kusondela iPasika yowama-33 C.E., uYesu ubuyela eBhethani. NgoNisan 9, ungena eYerusalem, ekhwele inkonyana le-esile. NgoNisan 10, uYesu ungena etempileni kwakhona. Kuphendulwa umthandazo wakhe wokuba igama likaYise lingcwaliswe, kuphuma ilizwi emazulwini lisithi: “Ndilizukisile yaye ndiza kulizukisa kwakhona.”—Yoh. 12:28.
Njengoko bephakathi kwisidlo sePasika, uYesu ululeka abafundi bakhe kuba sele eza kubashiya aze abathandazele. Emva kokubanjwa kwakhe, kuthethwe ityala aze axhonywe, uYesu uyavuswa.
Iimpendulo Kwimibuzo YeZibhalo:
14:2—UYesu wayeza ‘kubalungiselela’ njani abalandeli bakhe indawo emazulwini? Oku kwakuza kuquka ukwenza kukaYesu umnqophiso omtsha ngokubonakala phambi koThixo aze anikele ixabiso legazi lakhe. Oku kulungiselela kwakuza kuquka ukufumana kukaKristu ubukumkani, ekwakuya kuthi emva kwako kuqalise ukuvuselwa emazulwini kwabalandeli bakhe abathanjisiweyo.—1 Tes. 4:14-17; Heb. 9:12, 24-28; 1 Pet. 1:19; ISityhi. 11:15.
19:11—Ngaba uYesu wayebhekisela kuYudas Sikariyoti xa wayethetha noPilato ngomntu omnikele kuye? Kunokuba ibe nguYudas okanye nabani na omnye, kubonakala ngathi uYesu wayecinga ngabo bonke abo baba nenxaxheba kwisono sokumbulala. Aba babequka uYudas, “ababingeleli abaziintloko nayo yonke iSanhedrin,” nkqu ‘nezihlwele’ ezaziphembelela ukukhululelwa uBharabhas.—Mat. 26:59-65; 27:1, 2, 20-22.
20:17—Kwakutheni ukuze uYesu axelele uMariya Magadala ukuba ayeke ukunamathela kuye? Kuyabonakala ukuba uMariya wanamathela kuYesu ecinga ukuba wayesele eza kunyukela emazulwini, ngoko wayengayi kuphinda ambone. Ukuze amqinisekise ukuba wayengekemki, uYesu wamxelela ukuba ayeke ukunamathela kuye kunoko ahambe aye kuxelela abafundi bakhe ukuba uvusiwe.
Oko Sikufundayo:
12:36. Ukuze sibe “ngoonyana bokukhanya,” okanye abathwali bokukhanya, kufuneka sibe nolwazi oluchanileyo lweLizwi likaThixo, iBhayibhile. Emva koko simele silisebenzise ukutsala abanye baphume ebumnyameni beze ekukhanyeni kukaThixo.
14:6. NguYesu Kristu kuphela indlela esinokuzuza ngayo inkoliseko kaThixo. Ekuphela kwendlela esinokusondela ngayo kuYehova kukuba nokholo kuYesu size silandele umzekelo wakhe.—1 Pet. 2:21.
14:15, 21, 23, 24; 15:10. Ukuthobela ukuthanda kukaThixo kuya kusinceda sihlale eluthandweni lukaThixo naseluthandweni loNyana wakhe.—1 Yoh. 5:3.
14:26; 16:13. Umoya oyingcwele kaYehova uyasifundisa uze usikhumbuze ezo zinto besizifundile. Uphinda usincede usityhilele inyaniso. Ngenxa yoko, unokusinceda sikhule ngolwazi, ubulumko, ukuqonda, ukubona izinto nangokukwazi ukucinga. Oko kuthetha ukuba simele sizingise emthandazweni, siwucele ngokungqalileyo lo moya.—Luka 11:5-13.
21:15, 19. UYesu wabuza uPetros enoba wayemthanda ngaphezu “kwezi” kusini na, ebhekisela kwiintlanzi ezaziphambi kwakhe. Ngoko uYesu wayebethelela imfuneko yokuba uPetros alandele yena kunokusukela ishishini lokuloba. Emva kokuqwalasela iingxelo zeVangeli, ngamana singazimisela ngakumbi ukuthanda uYesu ngaphezu kwayo nantoni na enokutsala amehlo ethu. Ewe, masiqhubeke simlandela ngentliziyo epheleleyo.
[Umfanekiso okwiphepha 31]
Yintoni esinokuyifunda kumzekelo kaNikodemo?