Imibuzo Yabafundi
Ngaba AmaNgqina KaYehova Ayayamkela ITestamente Endala?
AmaNgqina kaYehova ajonga iBhayibhile njengeLizwi likaThixo yaye iTestamente Endala neNtsha azijonga njengezibalulekileyo. Sekunjalo, akhetha ukusebenzisa awona magama afanelekileyo athi iZibhalo ZesiHebhere neZibhalo ZamaKristu ZesiGrike, ekubeni ezi iziilwimi eyabhalwa ngazo iTestamente eNdala kunye neNtsha.
Kwelinye icala, abantu abathi bangamaKristu abayithandi ncam iTestamente eNdala. Bathi ithetha ngoThixo onomsindo okhuthaza iimfazwe, ukubulala, nezinto ezingafaniyo kwaphela noThixo onothando nonemilinganiselo efanelekileyo yokuziphatha ekuthethwa ngaye kwiTestamente eNtsha. Okanye baqiqa ngelithi ekubeni iTestamente eNdala ithetha ngonqulo lwamaYuda, ayifaneleki kumaKristu. Noko ke, ngokuvisisana nomyalelo kaThixo okwiDuteronomi 12:32 wokuba kungongezwa okanye kungancitshiswa nto kula mazwi, ngaba ezi zizizathu ezivakalayo zokugatya eyona nxalenye inkulu yeBhayibhile?
Ngaxa lithile ngowama-50 C.E. xa umpostile uPawulos ongumKristu watyelela abantu ababehlala eTesalonika, eGrisi, ‘waqiqa nabo ngeZibhalo, ecacisa yaye engqina ngeembekiselo ukuba kwakuyimfuneko ngoKristu ukubandezeleka nokuvuka kwabafileyo.’ (IZenzo 17:1-3) Abanye kwabo bantu babemphulaphule baba ngamaKristu, yaye kamva uPawulos wabancoma esithi: “Xa nalamkelayo ilizwi likaThixo, enaliva kuthi, nalamkela, kungekhona njengelizwi labantu, kodwa, kanye njengokuba kunjalo enyanisweni, njengelizwi likaThixo.” (1 Tesalonika 2:13) Ngelo xesha, kwiincwadi ezingama-27 zeZibhalo ZamaKristu ZesiGrike, kusenokwenzeka ukuba yayiyincwadi yeVangeli kaMateyu kuphela eyayisele ibhaliwe. Ngoko licacile elokuba iimbekiselo ‘zeZibhalo’ awayezisebenzisa wayezicaphula kwiZibhalo zesiHebhere.
Phofu ke, ababhali beZibhalo ZamaKristu ZesiGrike babhekisela ngokungqalileyo kwiindinyana zeZibhalo zesiHebhere izihlandlo ezingama-320 baza kwezinye izihlandlo ezininzi babhekisela kuzo ngokungangqalanga. Kutheni? “Kuba zonke izinto ezabhalwa kwixesha langaphambili zabhalelwa ukuyalela thina, ukuze ngonyamezelo lwethu nangentuthuzelo yeZibhalo sibe nethemba.” (Roma 15:4) Oku kubonisa ngokucacileyo ukuba abo bayamkela yonke iBhayibhile namhlanje bayangenelwa.
IZibhalo ZamaKristu ZesiGrike, ezisekelwe kwiZibhalo ZesiHebhere, ziliLizwi likaThixo elityhila injongo yakhe ngokuqhubekayo. Azizisingeli phantsi iZibhalo zesiHebhere. UHerbert H. Farmer, ongunjingalwazi wezakwalizwi kwiYunivesithi yaseCambridge uthi iincwadi zeVangeli “azinakuqondwa ngaphandle kwembali yabantu bomnqophiso omdala ekwiTestamente eNdala.”
ILizwi likaThixo alifanele litshintshwe. Sekunjalo, “umendo wamalungisa unjengokukhanya okuqaqambileyo okuya kukhanya ngokukhanya de kube semini emaqanda.” (IMizekeliso 4:18) Xa wayesongeza iZibhalo ZamaKristu ZesiGrike kwimibhalo engcwele yeBhayibhile, uThixo wayeyikhanyisa ngakumbi indlela eziya kuzaliseka ngayo iinjongo zakhe, engazisingeli phantsi iZibhalo ZesiHebhere. Zonke ziyinxalenye ‘yelizwi likaYehova elihlala likho ngonaphakade.’—1 Petros 1:24, 25.