Yintoni Eza Kufezwa Kukubuya KukaKristu
“UNXUNGUPHALO ESÃO PAULO.” Leyo yindlela iphephancwadi iVeja olwazichaza ngayo iintsuku ezine ngoMeyi 2006 xa ulwaphulo-mthetho olulungelelanisiweyo “lwasingqula phantsi” esona sixeko sikhulu nesona sifumileyo eBrazil. Koloo “nxunguphalo olwathabatha iiyure ezingaphezu kwe-100” kwabulawa abantu abamalunga ne-150 bequka amagosa omthetho, izigelekeqe nabantu nje abaqhelekileyo.
Ugonyamelo lusoloko lungundaba mlonyeni kumaphephandaba mbombo zonke zomhlaba. Kubonakala ngathi iinkokeli azikwazi kulunqanda. Ihlabathi liya lisiba yindawo eyingozi. Mhlawumbi uziva udimazekile kuba usoloko usiva izinto ezibuhlungu. Noko ke, iinguqu zisemnyango.
UYesu wafundisa abalandeli bakhe ukuba bathandazele ukuba bufike uBukumkani bukaThixo nokuba ukuthanda kwakhe kwenzeke, “nasemhlabeni, njengasezulwini.” (Mateyu 6:9, 10) Obu Bukumkani ngurhulumente oza kuba noKumkani omiselwe nguThixo, uYesu Kristu. Buya kucombulula zonke iingxaki zoluntu. Noko ke, ukuze uBukumkani bukaThixo buzise utshintsho emhlabeni, kumele kupheliswe ulawulo lwabantu ukuze kulawule uKristu. Yiloo nto kanye aza kuyenza uKristu ukubuya kwakhe.
Ngaba Esi Sihlandlo Seenguqu Iya Kuba Sesoxolo?
Ngaba iintlanga ziya kuzithoba ngokuzithandela kulawulo lukaKristu? Umpostile uYohane wanikwa umbono osithela thsuphe ngempendulo yalo mbuzo. UYohane ubalisa athi: “Ndabona irhamncwa [inkqubo yehlabathi yezopolitiko] nookumkani bomhlaba nemikhosi yabo behlanganisene ndawonye ukuba benze imfazwe nalowo [uYesu] uhleli ehasheni kunye nomkhosi wakhe.” (ISityhilelo 19:19) Kuya kwenzeka ntoni kookumkani bomhlaba kule mfazwe? IBhayibhile ithi, lo Kumkani umiselwe nguYehova “uya kuziqhekeza ngentonga yobukhosi yentsimbi, ngokungathi sisitya sombumbi uya kuziqhekeza zibe ziingceba.” (INdumiso 2:9) Inkqubo yezopolitiko iya kutshayalaliswa nya. UBukumkani bukaThixo “buya kuzityumza buziphelise zonke ezi zikumkani, buze bona bume ukusa kwixesha elingenammiselo.”—Daniyeli 2:44.
Kuthekani ngabantu ababuchasayo uBukumkani bukaThixo? “Ekutyhilekeni kweNkosi uYesu ivela ezulwini kunye neengelosi zayo ezinamandla isemlilweni odangazelayo,” uYesu uchazwa ‘njengophindezela abo bangamaziyo uThixo nabo bangazithobeliyo iindaba ezilungileyo.’ (2 Tesalonika 1:7, 8) IMizekeliso 2:22 ithi: “Bona ke abangendawo, baya kunqunyulwa emhlabeni; ke wona amaqhophololo, aya kuncothulwa kuwo.”
Mayela nokuza kukaKristu, iBhayibhile ithi: “Khangela! Uza ngamafu, yaye onke amehlo aya kumbona.” (ISityhilelo 1:7) Oku akuthethi kuthi abantu baya kumbona ngamehlo enyama. Ukususela oko wenyukela ezulwini, uYesu uye waba ngumntu wokomoya “ohlala ekukhanyeni okungenakufikeleleka, ekungekho namnye umntu ombonileyo okanye onako ukumbona.”—1 Timoti 6:16.
Akuyomfuneko ukuba uYesu abe nomzimba ofana nowomntu ukuze “abonwe” ngabantu kanye njengokuba kwakungeyomfuneko ukuba uYehova abonakale xa wayebetha amaYiputa ngeZibetho Ezilishumi ngemihla kaMoses. Abantu belo xesha babengathandabuzi ukuba nguYehova owayebangela ezo zibetho, kwaye banyanzeleka ukuba bawavume amandla akhe. (Eksodus 12:31) Ngendlela efanayo, xa uKristu ephumeza umgwebo kaThixo, kuya kunyanzeleka ukuba abangendawo ‘bambone,’ okanye baqonde ukuba uYesu usetyenziswa nguThixo ukuba abagwebe. Baya kukwazi oku kuba uluntu kudala lulunyukiswa ngesi siganeko. Ewe, ‘onke amehlo aya kumbona, zize zonke izizwe zomhlaba zizimbambazele zisentlungwini ngenxa yakhe.’—ISityhilelo 1:7.
Kufanelekile ukutshatyalaliswa kwabangendawo nokupheliswa kolawulo olungendawo ngaphambi kokuba kubuyiselwe uxolo lokwenene nozinzo emhlabeni. UKristu uya kukufeza oko. Uya kulawula zonke izinto zasemhlabeni, kuze kulandele iinguqu emva koko.
Ukubuyiselwa Kwezinto Okuya Kuzisa Iingenelo
Umpostile uPetros wathetha ‘ngokubuyiselwa kwezinto zonke awathetha ngazo uThixo ngomlomo wabaprofeti bakhe abangcwele bexesha lakudala.’ (IZenzo 3:21) Oku kubuyiselwa kwezinto kuquka ukuguqulwa komhlaba okuya kwenziwa xa uKristu elawula. Phakathi kwabaprofeti abaphefumlelwa nguThixo ukuba bathethe ‘ngokubuyiselwa kwezinto zonke’ emhlabeni ngumprofeti uIsaya, owayephila ngenkulungwane yesibhozo ngaphambi kweXesha Eliqhelekileyo. Waxela kwangaphambili ukuba uYesu Kristu, “iNkosana yoXolo,” uya kubuyisela uxolo emhlabeni. Mayela nolawulo lukaKristu, isiprofeto sikaIsaya sithi: “Akayi kuyeka ukuphatha njengenkosana, noxolo aluyi kuphela.” (Isaya 9:6, 7) UYesu uya kubafundisa ukuphila ngoxolo abantu. Abemi bomhlaba baya ‘kuziyolisa ngokugqibeleleyo ngobuninzi boxolo.’—INdumiso 37:11.
Kuthekani ngobuhlwempu nendlala xa kulawula uKristu? UIsaya wathi: “Ngokuqinisekileyo uYehova wemikhosi uya kwenzela zonke izizwana, kule ntaba, isidlo sokutya okuneoli eninzi, isidlo sewayini egcinwe ngeentsipho, sokutya okuneoli eninzi okuzaliswe ngumongo, sewayini egcinwe ngeentsipho, yahluzwa.” (Isaya 25:6) Umdumisi wathi: “Kuya kubakho ukudla okuziinkozo okuninzi emhlabeni; encotsheni yeentaba kuya kubakho ukuphuphuma.” (INdumiso 72:16) Mayela nabemi bomhlaba, sifunda oku: “Ngokuqinisekileyo baya kwakha izindlu baze bahlale; batyale izidiliya baze badle isiqhamo sazo. Abayi kwakha kuhlale abanye; abayi kutyala kudle abanye. Kuba njengemihla yomthi iya kuba njalo imihla yabantu bam; nomsebenzi wezandla zabanyuliweyo bam baya kuwusebenzisa ngokupheleleyo.”—Isaya 65:21, 22.
UIsaya waphinda wachaza nangokuphela kokugula nokufa. UThixo wathetha ngoIsaya wathi: “Ngelo xesha aya kuvulwa amehlo eemfama, zivulwe neendlebe zezithulu. Isiqhwala siya kutsiba njengexhama, nolwimi lwesimumu luya kumemelela ngochulumanco.” (Isaya 35:5, 6) “Akakho ummi wakhona oya kuthi: ‘Ndiyagula.’” (Isaya 33:24) UThixo “okunene uya kuginya ukufa ngonaphakade, yaye iNkosi enguMongami uYehova ngokuqinisekileyo iya kosula iinyembezi ebusweni bonke.”—Isaya 25:8.
Kuthekani ngabafileyo “abakumangcwaba enkumbulo”? (Yohane 5:28, 29) UIsaya waprofeta wathi: ‘Abafileyo bakho baya kuphila baya kuvuka.’ (Isaya 26:19) Ewe, abo balele ekufeni baya kubuyiselwa ebomini kwakhona!
“UThixo Uyitrone Yakho Ngonaphakade”
Ukubuya kukaKristu kuya kuwuguqula umhlaba ube yiparadesi entle, kwaye abantu baya kumanyana ekunquleni uThixo oyinyaniso. Ngaba sinokuqiniseka ukuba uYesu Kristu uya kuphumelela ekususeni ubungendawo emhlabeni nasekuziseni ubulungisa?
Khawucinge ngamandla negunya anikwe lona uYesu. Ngokubhekisele kuNyana, iBhayibhile ithi: “UThixo uyitrone yakho ngonaphakade kanaphakade, nentonga yobukhosi yobukumkani bakho yintonga yobukhosi yokuthe tye. Wabuthanda ubulungisa, waza wakuthiya ukuchas’ umthetho.” (Hebhere 1:8, 9) Itrone kaYesu, oko kukuthi, isikhundla okanye igunya lakhe, livela kuYehova. Itrone yakhe ivela kuThixo. Azikho iingxaki eziya kuba ngaphaya kwamandla kaYesu.
Emva kokuvuswa kwakhe, uYesu waxelela abafundi bakhe oku: “Linikwe mna lonke igunya ezulwini nasemhlabeni.” (Mateyu 28:18) Eyoku-1 kaPetros 3:22, ithi: “Iingelosi namagunya namandla zathotyelwa phantsi kwakhe.” Alikho igunya eliya kumelana noYesu. Ayikho into enokumthintela ekuncedeni abantu.
Indlela Ekubachaphazela Ngayo Abantu Ukubuya KukaKristu
Kwileta awayibhalela abaTesalonika, umpostile uPawulos wathi: “Asiwulibali umsebenzi wenu wokuthembeka, nokubulaleka kwenu niqhutywa luthando, nokunyamezela kwenu ngenxa yethemba eninalo eNkosini yethu uYesu Kristu phambi koThixo uBawo wethu.” (1 Tesalonika 1:3) UPawulos wakunxulumanisa nokuba nethemba kuYesu Kristu ukusebenza nzima nokunyamezela. Elo themba liquka ukuba nokholo ekubuyeni kukaKristu okutyeneneza indlela yokubuyiselwa kwezinto. Ithemba elinjalo linokuwakhuthaza amaKristu okwenyaniso, okanye liwomeleze nakwezona meko zinzima.
Ngokomzekelo, cinga ngoCarlos, ohlala kwisixeko saseSão Paulo, eBrazil. NgoAgasti 2003, wafumanisa ukuba unesifo somhlaza. Ukususela ngoko, kuye kwafuneka atyandwe izihlandlo ezisibhozo utyando olukhatshwa ziintlungu nezinye iingxaki zalo. Nangona kunjalo, ebeqhubeka ebakhuthaza abanye. Ngokomzekelo, ngoxa wayeshumayela esitratweni ngaphambi kwesibhedlele esikhulu, wadibana nelinye iNgqina likaYehova, umyeni walo wayefumana unyango lomhlaza. Ekubeni wayeyazi indlela esibuhlungu ngayo isifo somhlaza, uCarlos wakwazi ukukhuthaza nokuthuthuzela loo myeni nenkosikazi yakhe. Emva koko bathi loo ncoko yabakhuthaza gqitha. UCarlos wabuqonda ubunyaniso bamazwi kaPawulos athi: ‘UThixo osithuthuzelayo kuyo yonke imbandezelo yethu, ukuze sikwazi ukuthuthuzela abo bakulo naluphi na uhlobo lwembandezelo ngayo intuthuzelo nathi ngokwethu esithuthuzelwa ngayo nguThixo.’—2 Korinte 1:4.
Yintoni enceda uCarlos akwazi ukuqhubeka ekhuthaza abanye nangona egula? Ithemba lokubuya kukaKristu nazo zonke izinto aza kuzenza kumkhuthaza ukuba aqhubeke ‘esenza okuhle.’—Galati 6:9.
Cinga nangoSamuel, umntakwabo owagetyengwa malunga neemitha ezingama-50 ukusuka kowabo. Wadutyulwa ngeembumbulu ezilishumi. Isidumbu sakhe saqungquluza ecaleni kwendlela iiyure ezisibhozo ngoxa babesaphanda abakwantsasana. USamuel akakwazi kusilibala eso siganeko. Noko ke, womelezwa lithemba lokuba uKristu uza kuba susa abangendawo nokuba ulawulo lobulungisa oluza kulandela luza kuzisa iintsikelelo kuluntu. USamuel udla ngokuba nomfanekiso-ngqondweni wakhe esamkela umntakwabo ovusiweyo kwiParadesi esemhlabeni.—IZenzo 24:15.
Yintoni Omele Uyenze?
Uya kuthuthuzelwa gqitha lithemba lokubuya kukaKristu noko aza kukufeza. UYesu Kristu uza kubalungisa zonke iingxaki zabantu nobungendawo obuzibangelayo.
Yintoni omele uyenze ukuze unandiphe iintsikelelo eziza kuziswa lulawulo lukaKristu? Fundisisa iLizwi likaThixo, iBhayibhile. Xa wayethandaza kuYise, uYesu wathi: “Oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso, nangalowo umthumileyo, uYesu Kristu.” (Yohane 17:3) Zibekele usukelo lokuphengulula oko kufundiswa yiBhayibhile. AmaNgqina kaYehova akwingingqi yakho aya kukuvuyela ukukunceda. Siyakumema ukuba uqhagamshelane nawo okanye ubhalele abapapashi beli phephancwadi.
[Imifanekiso ekwiphepha 7]
Inset, background only: Rhino and Lion Park, Gauteng, South Africa
[Inkcazelo]
Ukubuya kukaKristu kuya kubuyisela umhlaba kwimeko entle ngokupheleleyo