Imbono YeBhayibhile
Ngubani UMikayeli Isiphatha-Zingelosi?
NGOKUTSHO kweBhayibhile, kukho izigidi ngezigidi zeengelosi kummandla womoya. (Daniyeli 7:9, 10; ISityhilelo 5:11) Ukususela ekuqaleni ukuya kutsho ekugqibeleni, iZibhalo zibhekisela kangangamakhulukhulu ezihlandlo kwiingelosi eziqhubeka zithembekile kuThixo. Kodwa, zimbini kuphela kwezi zidalwa zomoya ezibizwa ngamagama. Esinye yingelosi uGabriyeli, owadlulisela izigidimi ezivela kuThixo kubantu abathathu abahlukeneyo kwisithuba seminyaka engama-600. (Daniyeli 9:20-22; Luka 1:8-19, 26-28) Enye ingelosi ekhankanywe ngegama eBhayibhileni nguMikayeli.
UMikayeli yingelosi ebalaseleyo. Ngokomzekelo, kwincwadi kaDaniyeli, uMikayeli uchazwa njengolwa needemon ezingendawo esilwela abantu bakaYehova. (Daniyeli 10:13; 12:1) Kwincwadi ephefumlelweyo kaYude, uMikayeli umelana noSathana bephikisana ngomzimba kaMoses. (Yude 9) Incwadi yeSityhilelo ibonisa ukuba uMikayeli ulwa noSathana needemon zakhe aze abakhuphele ngaphandle ezulwini. (ISityhilelo 12:7-9) Ayikho enye ingelosi echazwa njengenamandla amakhulu negunya elingako kwiintshaba zikaThixo. Ngoko akumangalisi ukuba, iBhayibhile ifanele ibhekisele kuMikayeli ‘njengesiphatha-zingelosi,’ igama elithi “umphathi” libhekisela “kwintloko” okanye “ophambili.”
Impikiswano Ngoko Akuko UMikayeli
Iinkonzo zeNgqobhoko kwakunye nobuYuda nobuSilamsi, zineembono eziphikisanayo ngokuphathelele umbandela weengelosi. Ezinye iingcamango azicacanga. Ngokomzekelo iThe Anchor Bible Dictionary ithi: “Kusenokuba kukho ingelosi enye enkulu kunezinye okanye ibathwana leziphatha-zingelosi (ngokuqhelekileyo ziba ne okanye zibe sixhenxe).” Ngokutsho kweThe Imperial Bible-Dictionary, uMikayeli “sisidalwa esingaphezu kwabantu, ngokuqhelekileyo abantu bebembono-mbini ngaso, besithi siyiNkosi uYesu Kristu, okanye bathi sesinye seziphatha-zingelosi ekuthiwa zisixhenxe.”
AmaYuda athi ezi ziphatha-zingelosi zisixhenxe nguGabriyeli, uYeremiyeli, uMikayeli, uRaguweli, uRafayeli, uSariyeli noUriyeli. Kwelinye icala, amaSilamsi akholelwa kwiziphatha-zingelosi ezine, uJibril, uMikal, uIzrail, noIsrafil. Kwakhona amaKatolika akholelwa kwiziphatha-zingelosi ezine: uMikayeli, uGabriyeli, uRafayeli noUriyeli. Ithini yona iBhayibhile? Ngaba kukho nezinye iziphatha-zingelosi eziliqela?
Impendulo YeBhayibhile
Ngaphandle koMikayeli, asikho esinye isiphatha-zingelosi esikhankanywe eBhayibhileni, kanti naseZibhalweni ibinzana elithi “isiphatha-zingelosi” likwisinye. IBhayibhile ichaza uMikayeli njengesiphatha-zingelosi, ibonisa ukuba nguye yedwa oneso sibizo. Yiyo loo nto kusengqiqweni ukugqiba ngelithi uYehova uThixo unike sasinye, sasinye kuphela kwizidalwa zakhe zasezulwini, igunya elipheleleyo phezu kwazo zonke ezinye iingelosi.
Ngaphandle koMdali ngokwakhe, mnye kuphela umntu othembekileyo ezingaphantsi kwakhe zonke ezinye iingelosi—loo mntu nguYesu Kristu. (Mateyu 13:41; 16:27; 24:31) Umpostile uPawulos wakhankanya ngokukhethekileyo ‘iNkosi uYesu’ “neengelosi zayo ezinamandla.” (2 Tesalonika 1:7) Yaye uPetros wathetha ngoYesu ovusiweyo ngokuthi: “Ungasekunene kukaThixo, kuba wemka waya ezulwini; zaza iingelosi namagunya namandla zathotyelwa phantsi kwakhe.”—1 Petros 3:22.
Nangona kungekho nkcazelo eBhayibhileni ngokupheleleyo echaza uMikayeli isiphatha-zingelosi njengoYesu, sikho esinye isibhalo esinxulumanisa uYesu nesikhundla sokuba sisiphatha-zingelosi. Kwincwadi yakhe eya kwabaseTesalonika, umpostile uPawulos waprofeta wathi: “INkosi ngokwayo iya kuhla ivela ezulwini, idanduluke ngezwi lesiphatha-zingelosi nangexilongo likaThixo, yaye abo bafe bemanyene noKristu baya kuvuka kuqala.” (1 Tesalonika 4:16) Kwesi sibhalo uYesu uchazwa njengofumene igunya njengoKumkani kaThixo onguMesiya. Kodwa, uthetha “ngezwi lesiphatha-zingelosi.” Kwakhona phawula ukuba unamandla okuvusa abafileyo.
Ngoxa wayengumntu emhlabeni, uYesu wavusa abantu abahlukahlukeneyo. Ngaloo ndlela wayedanduluka ngelizwi lakhe. Ngokomzekelo, xa wayevusa unyana ofileyo womhlolokazi wesixeko saseNayin, wathi: “Mfana, ndithi kuwe, Vuka!” (Luka 7:14, 15) Kamva, ngaphambi nje kokuvusa umhlobo wakhe uLazaro, uYesu “wadanduluka ngelizwi elikhulu esithi: ‘Lazaro, phuma!’” (Yohane 11:43) Kodwa ngezi zihlandlo, uYesu wayethetha ngelizwi lomntu ofezekileyo.
Emva kokuvuswa kwakhe, uYesu waphakanyiselwa “kwisigxina esongamileyo” ezulwini njengesidalwa somoya. (Filipi 2:9) Njengoko engasengomntu, unelizwi lesiphatha-zingelosi. Ngoko xa kwakhala ixilongo likaThixo “kwabo bafe bemanyene noKristu” ukuba banyukele ezulwini, uYesu ‘wadanduluka,’ ngesi sihlandlo edanduluka “ngezwi lesiphatha-zingelosi.” Kusengqiqweni ukugqiba kwelokuba sisiphatha-zingelosi kuphela ebesiya kukhupha ubizo “ngezwi lesiphatha-zingelosi.”
Ewe, kukho ezinye iingelosi ezikwizikhundla eziphakamileyo, njengeeserafi neekerubhi. (Genesis 3:24; Isaya 6:2) Kodwa iZibhalo zibhekisela kuYesu Kristu ovusiweyo njengomphathi wazo zonke iingelosi—uMikayeli isiphatha-zingelosi.