Imbono YeBhayibhile

Ngaba Amabhinqa Afanele Abufihle Ubuhle Bawo?

UGEORGE SIMONTON onamava ekuthungeni impahla nokwangunjingalwazi eNew York’s Fashion Institute of Technology wathi: “Amabhinqa ayayithanda impahla esefashonini.” Utyatyadula esithi: “Amabhinqa ayakuthanda ukuziva engoothile, ukukhangeleka emahle, nokuzilungisa . . . Ndicinga ukwenjenjalo kubonisa ukuba uyazihlonela yaye uhlonela nabantu okunye nabo.” Ewe, ukuzilungisa bekukade kusaziwa njengendlela amabhinqa abonisa ngayo ukuba ahlukile kumadoda, mahle, yaye ukusa kumlinganiselo othile azithembile.

Noko ke, bambi bakujonga njengento embi ukuzilungisa kwamabhinqa kuba besithi akuhambisani nonqulo. Ngenkulungwane yesithathu yeXesha Eliqhelekileyo uTertullian wabhala: “Amabhinqa angcwele . . . ukuba . . . mahl’ indalo, . . . akamele azilungise, kodwa amele azame ukubufihla ubuhle bawo.” Wathi ngezinto zokuthambisa: “Amabhinqa athambisa iicream ebusweni bawo, azitsho zibe bomvu izidlele zawo, okanye andise amashiya awo, ayona kuThixo.” Yaye wathi igolide nesilivere “azihombisa ngayo zizinto nje zokutsala abantu.”

Nanamhlanje abantu abaninzi basakujonga njengento embi ukuzilungisa kwamabhinqa. Ezinye iicawa aziwavumeli amarhamente ukuba anxibe izacholo, asebenzise izithambiso okanye anxibe iimpahla ezimbejembeje. Ngaba ibhinqa elingumKristu lifanele libufihle ubuhle balo, okanye lifanele lizilungise?

Imbono KaThixo

IBhayibhile ayikuchazi ngokweenkcukacha ukunxitywa kwezacholo nokusetyenziswa kwezinto zokuthambisa ubuso. Sekunjalo, kukho ubungqina obaneleyo obubonisa ukuba uThixo akazigatyi ezi zinto okanye ezinye iindlela zokuzilungisa.

Ngokomzekelo, xa echaza indlela awayisikelela ngayo iYerusalem, uThixo wathetha ngokungathi esi sixeko silibhinqa, esithi: ‘Ndahlabela mgama ndakuvathisa ngezihombo yaye wakhula waba mhle kakhulu kunene.’ (Hezekile 16:11-13) Ezi zihombo, nangona zifuzisela, ziquka izacholo, intsimbi yomqala namacici. Kwakhona iZibhalo zifanisa ezi zihombo zegolide ‘nomohlwayi’, onamazwi amkelekayo kumntu okulungeleyo ukuphulaphula. (IMizekeliso 25:1, 12) Kusengqiqweni ukugqiba kwelokuba ukuba iZibhalo zithetha kakuhle ngezi zinto, uThixo akanakuba uyakugatya ukusebenzisa kwamabhinqa izinto ezintle ukuze azilungise.

Amabhinqa AngamaKristu Ayazilungisa

Ezinye iZibhalo zithetha ngokucacileyo ngendlela amabhinqa amele azilungise ngayo. Umpostile uPawulos wabhala: “Ndinqwenela ukuba abafazi bazihombise ngesinxibo esilungiswe kakuhle.” Xa abafazi bezihombise ‘ngokuthozamileyo nangengqondo ephilileyo’ oko kuya kubonisa ukuba bahlonela uThixo. (1 Timoti 2:9, 10) Kwakhona xa amabhinqa angamaKristu ebonisa ukuthozama kwindlela azilungisa ngayo azimela kakuhle iimfundiso zikaThixo nebandla.

Abanye abantu bebambelela koko kuthethwa yile ndinyana besithi amabhinqa akafanele azilungise ‘ngezimbo zokulukwa kweenwele nokunxitywa kwegolide neeperile nezambatho zeendleko ezinkulu, kodwa makazilungise ngendlela efanele abafazi abazibanga behlonela uThixo, oko kukuthi, ngemisebenzi elungileyo.’ Ngaba oku kuthetha ukuba amabhinqa akhonza uThixo akafanele azilungise iinwele zawo okanye anxibe izacholo?

Akunjalo; iBhayibhile iyakuncoma ukuzilungisa. Ngoko ke, kunokuba athi ukuzilungisa ngendlela ethile akulunganga, uPawulos wayekhuthaza amabhinqa ukuba anikel’ ingqalelo kakhulu ekuphuculeni iimpawu zawo zobuKristu nemisebenzi elungileyo.

Indlela Ozilungisa Ngayo Iyathetha

Umpostile uPawulos wabhala: “Masingabi sagwebana, kodwa kunoko zenzeleni esi sigqibo, sokuba ningamkhubekisi umzalwana okanye nimwise.” (Roma 14:13) Oku sinokukusebenzisa njani xa sikhetha indlela yokuzilungisa?

Okokuqala, uPawulos usixelela ukuba ‘singagwebani.’ Sifanele singabi ‘sosikhubekiso kumzalwana.’ Indlela yokunxiba eyamkelekileyo inokwahluka ngokwamazwe ngamazwe nangokohlanga. Okwamkelekileyo ngelinye ixesha kwenye indawo kusenokungamkeleki kwenye. Asifanele sikhubekise abanye ngokuzilungisa ngendlela uhlanga lwethu olusenokuyijonga njengengathandekiyo. Amabhinqa ahlonel’ uThixo afanele azibuze: ‘Abantu basekuhlaleni bayijonga njani indlela endinxiba ngayo? Ngaba amalungu ebandla aziva eneentloni, edidekile, okanye edanile ngenxa yendlela endinxibe ngayo?’ Enoba ibhinqa elingumKristu linelungelo lokunxiba okanye lokuzilungisa ngendlela ethile, liya kujonga ngaphaya kwalo ukuba indlela elizilungisa ngayo iyakhubekisa.—1 Korinte 10:23, 24.

Kwakhona, ukunikel’ ingqalelo kakhulu ekuzilungiseni kusenokukhokelela kwisimo sengqondo esingafanelekanga. Namhlanje kumazwe amaninzi amanye amabhinqa ayazilungisa kuba efuna ukutsalela ingqalelo yabanye kuwo. Noko ke, amabhinqa angamaKristu ayakuphepha ukuzilungisa enezo njongo, azabalazela ukuba ngaphilileyo engqondweni aze abe nyulu kwindlela azenza ngayo izinto, “ukuze ilizwi likaThixo lingatshabhiswa.”—Tito 2:4, 5.

Amabhinqa ahlonel’ uThixo ayazi ukuba nakubeni esenokuzilungisa ngaphandle, obona buhle amele anikel’ ingqalelo kubo ‘bobomntu ofihlakeleyo wentliziyo’ kwaye bubonakala kwisimo sengqondo somntu nendlela athetha ngayo. (1 Petros 3:3, 4) Amabhinqa ayikhetha kakuhle indlela anxiba ngayo, izinto azithambisayo, nezacholo azinxibayo ayahlonelwa ngabanye yaye azukisa uMdali wawo.