Imibingelelo Yendumiso Ekholisa UYehova
“Niyinikele imizimba yenu ibe yimibingelelo ephilayo, engcwele, eyamkelekileyo kuThixo.”—ROMA 12:1.
1. Ithini iBhayibhile ngexabiso elilinganiselweyo lemibingelelo eyayisenziwa phantsi koMthetho kaMoses?
“EKUBENI uMthetho unesithunzi sezinto ezilungileyo eziza kuza, kodwa ungenawo owona mongo wezinto, abantu abanakuze babe nako ukubenza bagqibelele abo basondela ukuza kunikela imibingelelo efanayo ngokuqhubekayo unyaka nonyaka.” (Hebhere 10:1) Kuloo ngxelo icacileyo, umpostile uPawulos uyangqina ukuba yonke imibingelelo eyayisenziwa phantsi koMthetho kaMoses yayingenaxabiso lihlala lihleli yaye yayingenakumsindisa umntu ngokusisigxina.—Kolose 2:16, 17.
2. Kutheni kungelolize ukuzama ukuqonda inkcazelo eneenkcukacha eseBhayibhileni ngokuphathelele iminikelo nemibingelelo ekuthethwa ngayo eMthethweni?
2 Ngaba oku kuthetha ukuba inkcazelo ekwiPentatiki ngokuphathelele iminikelo nemibingelelo ayinaxabiso kumaKristu namhlanje? Enyanisweni, kwixesha elingaphezulwana nje konyaka, abo babhalise kwiSikolo Sobulungiseleli Sobuthixo kumabandla amaNgqina kaYehova ehlabathini lonke baye bafunda iincwadi ezintlanu zokuqala zeBhayibhile. Bambi baye benza imigudu yokufunda nokuqonda zonke iinkcukacha. Ngaba yonke loo migudu iye yaba lilize? Ngokuqinisekileyo akunakuba njalo, kuba “zonke izinto ezabhalwa kwixesha langaphambili zabhalelwa ukuyalela thina, ukuze ngonyamezelo lwethu nangentuthuzelo yeZibhalo sibe nethemba.” (Roma 15:4) Ngoko ke, umbuzo ngulo, Sinokufumana luphi ‘uyalelo’ ‘nentuthuzelo’ kuloo nkcazelo yoMthetho ngokuphathelele iminikelo nemibingelelo?
Ukuyalela Nokuthuthuzela Thina
3. Yiyiphi intswelo esisiseko esinayo?
3 Nangona kungeyomfuneko ukuba siyenze ngokoqobo imibingelelo ngendlela ekuchazwe ngayo eMthethweni, sisakufuna ngamandla oko imibingelelo yayiwenzela kona amaSirayeli ngomlinganiselo othile, oko kukuthi, ukuxolelwa izono zethu nokuzuza inkoliseko kaThixo. Ekubeni singasanikeli imibingelelo ngokoqobo, sinokuzifumana njani ezo ngenelo? Emva kokuchaza ukusikelwa umda kwemibingelelo yezilwanyana, uPawulos uthi: “Xa [uYesu] engena ehlabathini uthi: ‘Akufunanga mbingelelo namnikelo, kodwa undilungiselele umzimba. Akukholiswanga yiminikelo etshiswa kuphele nangumnikelo wesono.’ Ndandula ke ndathi, ‘Khangela! Ndiyeza (emqulwini wencwadi kubhaliwe ngam) ukuza kwenza intando yakho, Thixo.’”—Hebhere 10:5-7.
4. UPawulos uyisebenzisa njani INdumiso 40:6-8 kuYesu Kristu?
4 Ecaphula kwiNdumiso 40:6-8, uPawulos uthi uYesu wayengazelanga kwenza ‘imibingelelo neminikelo,’ ‘iminikelo etshiswa kuphele nomnikelo wesono,’ leyo uThixo wayengasakholiswa yiyo ngexesha lokubhala kukaPawulos la mazwi. Kunoko, uYesu weza nomzimba owawulungiselelwe nguYise wasezulwini, lowo wawufana ngazo zonke iindlela nalowo uThixo wayewulungiselele uAdam ekumdaleni kwakhe. (Genesis 2:7; Luka 1:35; 1 Korinte 15:22, 45) NjengoNyana kaThixo ofezekileyo, uYesu wayeza kuba ‘yimbewu’ yomfazi, njengoko kwakuxelwe kwangaphambili kwiGenesis 3:15. Wayeza kuthabatha amanyathelo ‘okutyumza intloko kaSathana,’ nangona uYesu naye wayeza ‘kutyunyuzwa isithende.’ Ngale ndlela, uYehova wenza ilungiselelo lokusindiswa koluntu ngoYesu, elo amadoda okholo ebekhangele kulo ukususela ngemihla ka-Abheli.
5, 6. Yiyiphi indlela ephakamileyo amaKristu anokusondela ngayo kuThixo?
5 Ethetha ngale ndima ikhethekileyo yadlalwa nguYesu, uPawulos uthi: “Lowo wayengasazi isono [uThixo] wamenza waba sisono ngenxa yethu, ukuze sibe bubulungisa bukaThixo ngaye.” (2 Korinte 5:21) Ibinzana elithi “wamenza waba sisono” lisenokuguqulelwa ngokuthi ‘wamenza waba njengomnikelo wesono.’ Umpostile uYohane uthi: “Yena ungumbingelelo wokucamagushela izono zethu, kanti kungekhona ezethu kuphela kodwa kwanezehlabathi liphela.” (1 Yohane 2:2) Ngenxa yoko, ngoxa amaSirayeli ayenendlela yokwexeshana yokusondela kuThixo ngemibingelelo yawo, amaKristu anesizinzi esiphakamileyo sokuza kuThixo—idini likaYesu Kristu. (Yohane 14:6; 1 Petros 3:18) Ukuba siqhelisela ukholo kwidini lentlawulelo elalungiselelwa nguThixo size simthobele, nathi izono zethu zinokuxolelwa size sizuze inkoliseko nentsikelelo kaThixo. (Yohane 3:17, 18) Ngaba lowo asingomthombo wentuthuzelo? Noko ke, sinokubonakalisa njani ukuba sinokholo kwidini lentlawulelo?
6 Emva kokuchaza ukuba amaKristu anesizinzi esiphakamileyo sokusondela kuThixo, umpostile uPawulos, njengoko sifunda kumaHebhere 10:22-25, uchaza iindlela ezintathu esinokubonakalisa ngazo ukholo noxabiso lwethu ngelungiselelo likaThixo lothando. Nangona isibongozo sikaPawulos sasibhekiswe ngokuyintloko kwabo banendlela ‘yokungena kwindawo engcwele’—oko kukuthi, amaKristu athanjisiweyo anobizo lwasezulwini—ngokuqinisekileyo bonke abantu bafanele banikele ingqalelo kumazwi kaPawulos aphefumlelweyo ukuba bayafuna ukungenelwa kumbingelelo kaYesu wokucamagushela.—Hebhere 10:19.
Nikela Imibingelelo Ecocekileyo Nehlambulukileyo
7. (a) AmaHebhere 10:22 akubonisa njani oko kwakusenziwa xa kunikelwa umbingelelo? (b) Yintoni ekwakufuneka yenziwe ukuqinisekisa ukuba umbingelelo wamkelekile kuThixo?
7 Okokuqala, uPawulos ubongoza amaKristu esithi: “Masisondele ngeentliziyo ezinyanisekileyo siqiniseke ngokupheleleyo ngokholo, iintliziyo zethu zifefiwe sasuswa isazela esingendawo nemizimba yethu ihlanjwe ngamanzi ahlambulukileyo.” (Hebhere 10:22) Ulwimi olusetyenziswe apha ngokucacileyo lubonisa oko kwakusenziwa xa kunikelwa umbingelelo phantsi koMthetho. Oku kufanelekile ngenxa yokuba ukuze umbingelelo wamkeleke, kwakufuneka unikelwe ngeentshukumisa ezifanelekileyo wenziwe ngento ecocekileyo nehlambulukileyo. Isilwanyana ekwakusenziwa ngaso umbingelelo sasithatyathwa emhlambini, oko kukuthi wezilwanyana ezicocekileyo, yaye ‘sasiphilile,’ singenasiphene. Ukuba umnikelo wawuthatyathwe ezintakeni, kwakufuneka umntu awuthabathe kumahobe asendle okanye kumantshontsho amavukuthu. Yaye ukuba oko kwenziwe ngaloo ndlela, ‘wawuza kwamkelwa ngenkoliseko aze acanyagushelwe.’ (Levitikus 1:2-4, 10, 14; 22:19-25) Umnikelo wokudla okuziinkozo wawungenagwele, elingumfuziselo wokonakala; yaye wawungenabo ubusi, mhlawumbi okuthetha ukuthi incindi yeziqhamo, edla ngokubilisa. Xa kunikelwa imibingelelo esibingelelweni—eyezilwanyana okanye eyokudla okuziinkozo—kwakugalelwa ityuwa, ethintela ukubola.—Levitikus 2:11-13.
8. (a) Yintoni eyayiyimfuneko kumntu owenza umnikelo? (b) Sinokuqiniseka njani ukuba unqulo lwethu lwamkelekile kuYehova?
8 Kuthekani ngomntu owenza umbingelelo? UMthetho wawusithi nabani na owayesiza phambi koYehova kwakufuneka acoceke yaye ahlambuluke. Ubani oye wadyobheka ngenxa yaso nasiphi na isizathu kwakufuneka kuqala anikele umnikelo wesono okanye wetyala ukuze abuyisele ukuma kwakhe okucocekileyo phambi koYehova ukuze umnikelo wakhe otshiswayo okanye umbingelelo wakhe wobudlelane wamkeleke Kuye. (Levitikus 5:1-6, 15, 17) Ngoko ke, ngaba siyakuqonda ukubaluleka kokulondoloza ukuma okucocekileyo phambi koYehova? Ukuba sifuna unqulo lwethu lwamkeleke kuThixo, simele sikulungise ngokukhawuleza nakuphi na ukwaphulwa kwemithetho kaThixo. Simele sikhawulezise ukuxhakamfula ilungiselelo likaThixo lokusinceda—“amadoda amakhulu ebandla” ‘nombingelelo wokucamagushela izono zethu,’ uYesu Kristu.—Yakobi 5:14; 1 Yohane 2:1, 2.
9. Yintoni owona mahluko ukhoyo phakathi kwemibingelelo eyayinikelwa kuYehova naleyo yayinikelwa koothixo bobuxoki?
9 Eneneni, ukugxininisa ekubeni ubani angadyobheki nangayiphi na indlela kwakungowona mahluko uyintloko phakathi kwemibingelelo eyayinikelwa kuYehova naleyo yayinikelwa koothixo bobuxoki ngabantu beentlanga ezazingqonge uSirayeli. Igqabaza ngale nkalo ikhethekileyo yemibingelelo yoMthetho kaMoses, enye incwadi yeembekiselo ithi: “Sisenokuphawula ukuba akukho nto yakwenza nokuvumisa; akukho mpambano yezonqulo, ukuzisusa amalungu athile omzimba, okanye ubunongogo obungcwele, ukuzifica kwizithethe zokuchuma nezobuhenyu akuvumelekanga ngokupheleleyo; akubingelelwa ngabantu; abafileyo abenzelwa mibingelelo.” Kukonke oku kungqinela esi sibakala: UYehova ungcwele, yaye akasibethi ngoyaba yaye akasamkeli isono okanye ukonakala nokuba kokwaluphi na uhlobo. (Habhakuki 1:13) Unqulo nemibingelelo enikelwa kuye imele icoceke yaye ihlambuluke—ngokwenyama, ngokokuziphatha nangokomoya.—Levitikus 19:2; 1 Petros 1:14-16.
10. Ngokuvisisana nesiluleko sikaPawulos esikwabaseRoma 12:1, 2, yiyiphi indlela esimele sizihlolisise ngayo?
10 Ngenxa yoku, simele sizihlolisise kuzo zonke iinkalo zobomi bethu ukuze siqiniseke ukuba inkonzo yethu yamkelekile kuYehova. Asifanele sicinge ukuba logama nje sisiba nesabelo kwiintlanganiso nobulungiseleli bamaKristu, akunamsebenzi oko sikwenzayo ngasese. Kanjalo asifanele sivakalelwe kukuba ukuba nenxaxheba kwimisebenzi yobuKristu ngandlel’ ithile kuyasikhulula ekuthobeleni imithetho kaThixo kwezinye iinkalo zobomi bethu. (Roma 2:21, 22) Asinakulindela ukufumana iintsikelelo nenkoliseko kaThixo ukuba sivumela nantoni na engacocekanga okanye engahlambulukanga emehlweni akhe yonakalise iingcinga nezenzo zethu. Khumbula amazwi kaPawulos athi: “Ndiyanibongoza ngeemfesane zikaThixo, bazalwana, ukuba niyinikele imizimba yenu ibe yimibingelelo ephilayo, engcwele, eyamkelekileyo kuThixo, inkonzo ke leyo engcwele ngokwamandla enu engqiqo. Yaye musani ukumilisa okwale nkqubo yezinto, kodwa guqukani ngokutshintsha ingqondo yenu, ukuze nikungqine ngokwenu ukulunga nokwamkeleka nokugqibelela kokuthanda kukaThixo.”—Roma 12:1, 2.
Nikela Imibingelelo Yendumiso Ngentliziyo Yonke
11. Yintoni equkiweyo kwibinzana elithi “uvumo lwasesidlangalaleni,” olukhankanywe kumaHebhere 10:23?
11 Xa ebhalela amaHebhere, ngokulandelayo uPawulos utsalel’ ingqalelo kwinkalo ebalulekileyo yonqulo lokwenyaniso esithi: “Masilubambe nkqi uvumo lwasesidlangalaleni lwethemba lethu ngaphandle kokuxengaxenga, kuba uthembekile lowo uthembisileyo.” (Hebhere 10:23) Ibinzana elithi “uvumo lwasesidlangalaleni” ngokoqobo lithetha “ukuvuma,” yaye uPawulos ukwathetha ‘ngombingelelo wendumiso.’ (Hebhere 13:15) Oku kusikhumbuza ngohlobo lwemibingelelo eyayinikelwa ngamadoda anjengoAbheli, uNowa noAbraham.
12, 13. Wayevuma ntoni umSirayeli xa enikela umbingelelo otshiswayo, yaye yintoni esinokuyenza ukuze sibonakalise umoya ofanayo?
12 Xa umSirayeli enikela umbingelelo otshiswayo, wayewenza “ngokuzithandela kwakhe phambi kukaYehova.” (Levitikus 1:3) Ngaloo mbingelelo, ngokuzithandela wayesenza uvumo lwasesidlangalaleni, okanye evuma ukuba uYehova uyabasikelela abantu bakhe ngokuyintabalala aze abonakalise ububele bothando kubo. Khumbula ukuba inkalo ekhethekileyo yemibingelelo etshiswayo yayikukuba wonke umnikelo wawuphelela esibingelelweni—imbonakaliso efanelekileyo yokuzinikela nokuzahlulela ngokupheleleyo. Ngokufanayo, sibonakalisa ukholo lwethu kwidini lentlawulelo nombulelo esinawo ngelo lungiselelo xa sinikela ngokuzithandela nangomphefumlo uphela “umbingelelo wendumiso, oko kukuthi, isiqhamo semilebe,” kuYehova.
13 Ngoxa amaKristu enganikeli mibingelelo yokoqobo—izilwanyana okanye izityalo—anembopheleleko yokunikela ubungqina kwiindaba ezilungileyo zoBukumkani nokwenza abafundi bakaYesu Kristu. (Mateyu 24:14; 28:19, 20) Ngaba uyawaxhakamfula amathuba okuba nesabelo ekuvakaliseni ekuhleni iindaba ezilungileyo zoBukumkani bukaThixo ukuze abantu abaninzi ngakumbi bazi izinto ezimangalisayo uThixo azigcinele uluntu oluthobelayo? Ngaba uchitha ixesha namandla akho ngokuzithandela ufundisa abantu abanomdla yaye ubanceda ukuba babe ngabafundi bakaYesu Kristu? Ukuba nenxhaxheba kwethu ngenzondelelo kubulungiseleli, njengevumba elithozamisayo lomnikelo otshiswayo, kuyamvuyisa uThixo.—1 Korinte 15:58.
Yiba Nemihlali Ekunxulumaneni NoThixo Kunye Nabantu
14. Kukuphi ukufana okukhoyo kumazwi kaPawulos akumaHebhere 10:24, 25 nokunikelwa kombingelelo wobudlelane?
14 Okokugqibela, uPawulos utsalel’ ingqalelo kulwalamano lwethu namanye amaKristu njengoko sinqula uThixo. “Masinyamekelane, sivuselelane eluthandweni nasemisebenzini emihle, singakutyesheli ukuhlanganisana kwethu ndawonye, njengoko kulisiko labathile ukwenjenjalo, kodwa masikhuthazane, ngokungakumbi njengoko nibona ukuba imini iyasondela.” (Hebhere 10:24, 25) Ibinzana elithi “sivuselelane eluthandweni nasemisebenzini emihle,” nelithi “ukuhlanganisana kwethu ndawonye,” nelithi “masikhuthazane” ewonke asikhumbuza ngoko umbingelelo wobudlelane wawukwenzela abantu bakaThixo kwaSirayeli.
15. Kukuphi ukufana okukhoyo phakathi kombingelelo wobudlelane neentlanganiso zamaKristu?
15 Ibinzana elithi “umbingelelo wobudlelane” maxa wambi liguqulelwa ngokuthi “umnikelo woxolo.” Igama lesiHebhere elithetha “uxolo” apha likwisininzi, mhlawumbi libonisa ukuba ukuba nenxaxheba kwimibingelelo enjalo kwakubangela ubani abe noxolo noThixo kunye nabanye abanquli. Ngokuphathelele umbingelelo wobudlelane, omnye umphengululi uthi: “Eneneni, eli yayilixesha lobudlelane obumnandi noThixo Womnqophiso, apho wayesihla ukuze abe Lundwendwe lukaSirayeli kwisidlo sombingelelo, kanye njengoko wayesoloko eNgumamkeli-zindwendwe kubo.” Oku kusikhumbuza ngedinga elenziwa nguYesu esithi: “Apho kukho ababini okanye abathathu abahlanganisene ndawonye egameni lam, ndilapho phakathi kwabo.” (Mateyu 18:20) Ngalo lonke ixesha sisiya kwintlanganiso yamaKristu, siyangenelwa kunxulumano olwakhayo, kuyalelo olukhuthazayo, nakwingcamango yokuba iNkosi yethu uYesu Kristu ikunye nathi. Oku kwenza intlanganiso yamaKristu ibe sisihlandlo esivuyisayo nesomeleza ukholo ngokwenene.
16. Sicinga ngombingelelo wobudlelane, yintoni eyenza kube mnandi ngokukhethekileyo kwiintlanganiso zamaKristu?
16 Kumbingelelo wobudlelane, wonke umhlehlo—ogubungele amathumbu, izintso, umhlehlo ophezu kwesibindi, noselusendweni nomsila otyebileyo wemvu—wawunikelwa kuYehova ngokutshiswa uqhunyiswe phezu kwesibingelelo. (Levitikus 3:3-16) Umhlehlo wawugqalwa njengeyona nxalenye ityebileyo nentle esilwanyaneni. Ukunikela ngawo esibingelelweni kwakufanekisela ukunikela okona kulungileyo kuYehova. Okwenza kube mnandi ngokukhethekileyo kwiintlanganiso zamaKristu kukuba asaneli nje kukufundiswa kodwa sikwanikela indumiso kuYehova. Oku sikwenza ngokuba nenxaxheba—ngemigudu yethu engephi kodwa sisenza konke okusemandleni ethu—sicula ngokusuk’ entliziyweni, siphulaphule ngenyameko yaye sigqabaze xa kuyimfuneko. Umdumisi wadanduluka esithi: “Dumisani uYa! Mvumeleni ingoma entsha uYehova, indumiso yakhe ebandleni labanyanisekileyo.”—INdumiso 149:1.
Silindelwe Yintabalala Yeentsikelelo Ezivela KuYehova
17, 18. (a) Nguwuphi umbingelelo omkhulu owenziwa nguSolomon xa kwakunikezelwa itempile eyayiseYerusalem? (b) Abantu bafumana ziphi iintsikelelo ngenxa yomsitho wokunikezelwa kwetempile?
17 Xa kwakunikezelwa itempile eyayiseYerusalem, ngenyanga yesixhenxe yonyaka we-1026 B.C.E., uKumkani uSolomon wanikela “umbingelelo omkhulu phambi koYehova,” owawuquka “umbingelelo otshiswayo nomnikelo wokudla okuziinkozo namanqatha ombingelelo wobudlelane.” Ukongezelela kwiminikelo yokudla okuziinkozo, kwanikelwa iinkomo ezingama-22 000 nezimvu ezili-120 000 ngeso sihlandlo.—1 Kumkani 8:62-65.
18 Ngaba unokuzithelekelela iindleko nomsebenzi owawubandakanyekile kuloo msitho umkhulu kangako? Ukanti, ngokucacileyo iintsikelelo ezafunyanwa nguSirayeli zazingaphezulu lee kunezo ndleko. Ekupheleni kwemibhiyozo, uSolomon “wabandulula abantu; yaye baqalisa ukumsikelela ukumkani baza baya emakhayeni abo, benemihlali yaye bechwayitile entliziyweni ngako konke ukulunga uYehova awayekwenzele uDavide umkhonzi wakhe namaSirayeli abantu bakhe.” (1 Kumkani 8:66) Enyanisweni, njengokuba uSolomon watshoyo, “intsikelelo kaYehova—yiyo etyebisayo, yaye akongezi ntlungu kuyo.”—IMizekeliso 10:22.
19. Sinokwenza ntoni ukuze sifumane iintsikelelo ezizukileyo ezivela kuYehova ngoku nangonaphakade?
19 Siphila kwixesha apho ‘isithunzi sezinto ezilungileyo eziza kuza’ siye sathatyathelw’ indawo ‘ngowona mongo wezinto.’ (Hebhere 10:1) UYesu Kristu, njengoMbingeleli Omkhulu wokomfuziselo, sele engenile ezulwini ngokwalo waza wanikela ngexabiso legazi lakhe ukuze acamagushele bonke abo baqhelisela ukholo kwidini lakhe. (Hebhere 9:10, 11, 24-26) Ngesizinzi selo dini likhulu nangokunikela kuThixo ngentliziyo yonke imibingelelo yethu yendumiso ecocekileyo nehlambulukileyo, nathi sinokuqhubeka “sinemihlali yaye sichwayite ezintliziyweni,” sikhangele phambili kwintabalala yeentsikelelo ezivela kuYehova.—Malaki 3:10.
Ungaphendula Uthini?
• Yiyiphi imfundiso nentuthuzelo esinokuyifumana kwinkcazelo eseMthethweni ngemibingelelo neminikelo?
• Yintoni efunekayo kuqala ukuze umbingelelo wamkeleke, yaye kunayiphi intsingiselo oko kuthi?
• Yintoni esinokunikela ngayo efana nomnikelo otshiswayo wokuzithandela?
• Iintlanganiso zamaKristu zinokufaniswa ngaziphi iindlela nombingelelo wobudlelane?
[Umfanekiso okwiphepha 18]
Idini lentlawulelo likaYesu lalungiselelwa nguYehova ukuze kusindiswe uluntu
[Umfanekiso okwiphepha 20]
Ukuze inkonzo yethu yamkeleke kuYehova, simele singadyobheki nangaluphi na uhlobo
[Umfanekiso okwiphepha 21]
Xa sisiba nesabelo kubulungiseleli sivuma ekuhleni ukulunga kukaYehova