Xa Usebenzisa Igunya, Xelisa UKristu

XA KWENZIWA ulingelo ngokuziphatha komntu kwiminyaka eyadlulayo imiphumo yolo lingelo yabashiya bebamb’ ongezantsi abantu. Abo babenenxaxheba bohlulwa bangamaqela amabini. Elinye iqela lenziwa abalindi bamabanjwa, ngoxa elinye lenziwa amabanjwa. Lwazala nkomoni olo lingelo?

“Kungedlulanga ntsuku zingaphi,” kwanikelwa ingxelo yokuba, “inkoliso [yabalindi] yayiwaxhaphaza amabanjwa ngamazwi nangezenzo, iwagagamela, iwohlwaya rhoqo, ngoxa amabanjwa ayengothobela sikutyele ngenxa yoloyiko.” Isigqibo ekwafikelelwa kuso kukuba: Phantse nabani na unokuwela kumgibe wokulisebenzisa kakubi igunya.

Ukusetyenziswa Kakuhle Kwegunya Nokusetyenziswa Kwalo Kakubi

Kakade ke, ukusetyenziswa kakuhle kwegunya, kunokuba yingenelo. Kunokubakho ulwalathiso olufanelekileyo nemiphumo emihle ngokwasenyameni, ngokweemvakalelo nangokomoya. (IMizekeliso 1:5; Isaya 48:17, 18) Njengokuba olu lingelo lungasentla luye lwabonisa, kusoloko kukho umgibe wokulisebenzisa kakubi igunya. Ilumkisa ngalo mgibe iBhayibhile ithi: “Xa kulawula ongendawo, abantu bayancwina.”—IMizekeliso 29:2; INtshumayeli 8:9.

Ukulisebenzisa kakubi igunya kuyingozi, nokuba kukho isizathu esivakalayo sokwenjenjalo. Ngokomzekelo kutshanje, umbutho wonqulo eIreland uye wacela uxolo ngendlela abaye baphathwa ngayo abanye abantwana ngootitshala ababebafundisa. Akuthandabuzeki ukuba, iinjongo zabanye kwaba titshala zazintle, kodwa ziindlela abazisebenzisayo ezaziyingozi. Elinye iphepha-ndaba lapapasha ingxelo yokuba “abantwana abaninzi boyikiswa lugonyamelo nayindlela engqwabalala ababefundisa ngayo abo titshala.” (The Irish Times) Unokulisebenzisa njani ke kakuhle igunya kwabanye kunokuba ubabhekelise kude kuwe okanye ubakhubekise ngamazwi nangezenzo?—IMizekeliso 12:18.

“Lonke Igunya” Linikwe UYesu Kristu

Khawondele lo mzekelo kaYesu Kristu. Ngaphambi nje kokuba enyukele ezulwini, wathi kubafundi bakhe: “Linikwe mna lonke igunya ezulwini nasemhlabeni.” (Mateyu 28:18) Ngaba ukuba oko kwabatsho bagubha abafundi bakhe? Ngaba bavakalelwa kukuba uYesu wayeza kubanesimo sengqondo esifana nesooKesare baseRoma, ababethanda ukuphalaza igazi xa abantu bekhalaza okanye bevukela urhulumente?

Ingxelo yeBhayibhile ibonisa ukuba zange bazive njalo! UYesu Kristu usebenzisa igunya ngendlela efanayo noYise. Nangona uYehova enguMongami Wendalo iphela, ufuna abantu bakhe bamkhonze ngokuzithandela, bengaqhutywa luloyiko okanye kuba benyanzelekile ukuba bamthobele. (Mateyu 22:37) UYehova zange khe alisebenzise kakubi igunya lakhe. Umbono owanikwa umprofeti uHezekile ukuveza kakuhle oku.

Kulo mbono, uHezekile wabona iingelosi ezine ezibalaselisa ulongamo lukaThixo. Nganye inobuso obune. UHezekile ubhala athi: “Yona imfano yobuso bazo, zone zazinobuso bomntu kunye nobuso bengonyama ngasekunene, yaye zone zazinobuso benkunzi yenkomo ngasekhohlo; kanjalo zone zazinobuso bokhozi.” (Hezekile 1:10) Obu buso bune bumela iimpawu ezine ezibalaseleyo zikaThixo. ELizwini likaThixo ezi mpawu zichazwa: njengothando, olumelwa bubuso bomntu; okusesikweni, okumelwa bubuso bengonyama; nobulumko, obumelwa bubuso bokhozi. Ezi mpawu zintathu zisebenzisana nophawu lwesine—amandla, njengokuba lumelwa bubuso benkunzi yenkomo. Kuthethani ntoni konke oku? Lo mbono ubonisa ukuba uYehova akasoze asebenzise amandla akhe negunya lakhe nxamnye nezinye iimpawu zakhe ezibalaseleyo.

Exelisa uYise, uYesu Kristu usoloko esebenzisa igunya lakhe ngokuvisisana nothando, ubulumko nokusesikweni. Abafundi bakhe babehlaziyeka kakhulu kukusebenza phantsi kwegunya lakhe. (Mateyu 11:28-30) Ukuba kukho uphawu ababalasele ngalo uYehova uThixo noYesu Kristu, olo phawu luthando, kungekhona amandla okanye igunya!—1 Korinte 13:13; 1 Yohane 4:8.

Ulisebenzisa Njani Igunya Onalo?

Uqhuba njani kule nkalo? Ngokomzekelo, entsatsheni ngaba utyhala ngesifuba kuba ufuna kwenziwe ukuthanda kwakho? Ngaba amalungu entsapho yakho axhasa izigqibo ozenzayo kuba ekoyika okanye ekuthanda? Ngaba igunya lakho yeyonanto iphambili? Le yimibuzo enokuqwalaselwa ziintloko ntsapho ukuze izinto zenziwe ngokobuthixo entsatsheni.—1 Korinte 11:3.

Kuthekani ukuba unomlinganiselo othile wegunya ebandleni? Ukuze ubone enoba ulisebenzisa kakuhle kusini na, khawuzihlole usebenzisa le migaqo ilandelayo eyaphefumlelwa nguYehova uThixo waza uYesu Kristu wenza ngokuvisisana nayo.

“Ikhoboka leNkosi . . . kufuneka lithantamise kubo bonke, . . . linyamezela ububi, libayalela ngobulali abo bangenalutyekelo luhle.”—2 Timoti 2:24, 25.

Bambi abantu kwibandla lamaKristu lenkulungwane yokuqala babenegunya elikhulu. Ngokomzekelo uTimoti, wayenokude ‘ayalele abathile abalapho ukuba bayeke ukufundisa imfundiso eyahlukileyo.’ (1 Timoti 1:3) Sinokuqiniseka ukuba, uTimoti wabonisa iimpawu zobuthixo kwindlela awayelisebenzisa ngayo igunya lakhe, kuba wayelisebenzisa ngokuvisisana nesiluleko sikaPawulos sokuba ‘nobulali’ ‘nokuthantamisa kubo bonke’ xa evelela ibandla lamaKristu. Ekubeni naye wayeselula, kwakuza kufuneka aziphathe njengonyana xa eqhubana nabantu abadala kunaye aze aziphathe njengomkhuluwa onenyameko xa eqhubana nabaselula. (1 Timoti 5:1, 2) Xa likwimeko enjalo ibandla lamaKristu liba nomoya ofudumeleyo, wentsapho ethandanayo, kungekhona umoya obandayo nokhohlakeleyo ngathi kuqhutywa ishishini.—1 Korinte 4:14; 1 Tesalonika 2:7, 8.

“Abalawuli beentlanga baba ziinkosi phezu kwazo yaye abo bazizikhulu basebenzisa igunya phezu kwazo. Makungabi njalo phakathi kwenu; kodwa nabani na ofuna ukuba mkhulu phakathi kwenu makabe ngumlungiseleli wenu.”—Mateyu 20:25, 26.

Oozwilakhe beli hlabathi ‘bazenz’ iinkosi’ phezu kwabantu ngokubanyanzela ukuba benze izinto ngendlela abafuna ngayo nethandwa ngabo, baze babagrogrise ngokubohlwaya xa bengakwenzi oko. Kodwa, yena uYesu Kristu wakhuthaza ukukhonzwa kwabanye kungekhona ukubagagamela. (Mateyu 20:27, 28) Abafundi bakhe wayesoloko ebaphatha ngothando ebathantamisa. Xa ulandela umzekelo kaYesu, kubalula kwabanye ukusebenzisana nawe. (Hebhere 13:7, 17) Kubalula ngabo ukuzijul’ ijacu xa kuyimfuneko oko bekwenza ngokuzithandela benganyanzelwa.—Mateyu 5:41.

“Waluseni umhlambi kaThixo eniwunyamekelayo, . . . ningabi ziinkosi phezu kwabo balilifa likaThixo, kodwa yibani yimizekelo emhlambini.”—1 Petros 5:2, 3.

Namhlanje abaveleli bayaqonda ukuba bamele baphendule ngobumoya babo bonke abo basebandleni. Bayithabatha nzulu le mbopheleleko. Xa benyamekela umhlambi kaThixo, bazama ukuwunyamekela ngokuzithandela, ngendlela enothando. Njengompostile uPawulos, bayazibhokoxa ekwakheni nasekomelezeni ukholo lwabo babanyamekelayo, abazami kuba ziinkosi phezu kokholo lwabo.—2 Korinte 1:24.

Xa kufuneka kunikelwe isiluleko esifanelekileyo, abadala baluleka ngomoya wobulali xa belungisa umntu owenze impazamo okanye benceda omnye umKristu ukuba enze inkqubela ngokomoya. Bakhumbula isiluleko sikampostile uPawulos esithi: “Bazalwana, ukuba umntu uqutyulwe sisiphoso, nina enineemfaneleko zokomoya zamani ukumlungisa umntu onjalo ngomoya wobulali, nizilumkela ukuba ningahendwa nani.”—Galati 6:1; Hebhere 6:1, 9-12.

“Qhubekani ninyamezelana yaye nixolelana ngesisa . . . Yambathani uthando, kuba lungumxokelelwane ogqibeleleyo womanyano.”—Kolose 3:13, 14.

Uqhubana njani nabo basilelayo ukufikelela imigaqo yobuKristu? Ngaba usoloko ukhumbula ukuba abafezekanga, njengokuba esenjenjalo uYehova noYesu Kristu? (Isaya 42:2-4) Okanye ubambelela emthethweni ngokungqongqo nokuba sele kutheni? (INdumiso 130:3) Khumbula ukuba kuhle ukuthantamisa xa kufanelekile nokungayekeleli kuphela xa kuyimfuneko. Ukusebenzisa igunya lakho ngothando kuya kukunceda ube nobuhlobo obusenyongweni nabo baphantsi kwakho.

Ukuba uphathiswe umlinganiselo othile wegunya, zama ukuxelisa uYehova uThixo noYesu Kristu xa ulisebenzisa. Khumbula indlela entle umdumisi amchaza ngayo uYehova xa esebenzisa igunya kubantu bakhe. UDavide wathi: “UYehova nguMalusi wam. Andiyi kuswela nto. Undilalisa kumadlelo anengca; undikhaphelela kwiindawo zokuphumla ezinamanzi amaninzi. Uyawuhlaziya umphefumlo wam. Undikhokelela kumkhondo wobulungisa ngenxa yegama lakhe.” Ngendlela efanayo sifunda oku ngoYesu: “Ndingumalusi omhle, kwaye ndiyazazi izimvu zam nezimvu zam ziyandazi, kanye njengoko uBawo endazi mna nam ndimazi uBawo; yaye ndinikezela umphefumlo wam ngenxa yezimvu.” UYehova uThixo noYesu Kristu bayeyona mizekelo ibalaseleyo yokusebenzisa kakuhle igunya esinokuyixelisa.—INdumiso 23:1-3; Yohane 10:14, 15.

[Amagama acatshulweyo akwiphepha 18]

Xa uYehova esebenzisa igunya usoloko elivisisanisa nokusesikweni, ubulumko nothando

[Umfanekiso okwiphepha 18]

Maxa wambi, abadala kuye kufuneke ukuba baluleke abo benza iimpazamo

[Umfanekiso okwiphepha 19]

UPawulos waluleka uTimoti ukuba aziphathe njengonyana onentlonelo nomkhuluwa onenyameko

[Umfanekiso okwiphepha 20]

UYesu Kristu wasebenzisa igunya lakhe ngobulumko, ngokusesikweni nangothando