Ngaba Uya Kungenelwa Kwiminqophiso KaThixo
“Ziya kusikelelelwa kuwe zonke iintlanga. Ngoko ke abaselukholweni bayasikelelwa ndawonye noAbraham okholwayo.”—GALATI 3:8, 9.
1. Yintoni eboniswa yimbali mayela nempumelelo yabalawuli abaninzi?
“OOZWILAKHE abangoovula-zibhuqe [okanye, abakhanyiselweyo]” leyo yindlela ababebizwa ngayo abanye abalawuli baseYurophu benkulungwane ye-18. Loo mabinzana ‘athetha ukuba babebalawula kakuhle abantu babo benobubele obunjengobukatata, kodwa izinto abazicebayo zasingisa kwicala eliphosakeleyo ibe inkqubo yabo yokuhlaziya izinto yasilela.’a (The Encyclopedia Americana) Oku kwaba ngunobangela oyintloko weemvukelo ezathi zagubungela ngokukhawuleza elaseYurophu.
2, 3. Wahluke njani uYehova kubalawuli abangabantu?
2 Hayi indlela ahluke ngayo uYehova kubalawuli abangabantu abangachazekiyo uhlobo abalulo. Sinokuyibona ngokulula indlela uluntu oluyifuna ngokusentlungwini ngayo inguqulelo eya kuthi ekugqibeleni ivelise izicombululo zokwenene kokungekho sikweni nokubandezeleka. Kodwa akuyomfuneko ukuba sizikhathaze ngelokuba amanyathelo aza kuthatyathwa nguThixo ukuze aphumeze oku axhomekeke kwiingcamango ezithile ezivele nje zathi qatha engqondweni. Kweyona ncwadi esasazwa ngokubanzi ehlabathini, uye wabhala idinga lakhe lokuzisa iintsikelelo ezihlala zihleli kuluntu olukholwayo. Oku kuya kwenzeka kungakhathaliseki uhlanga, isizwe, imfundo, okanye imekobume yasekuhlaleni abantu abebekuyo ngaphambili. (Galati 3:28) Kodwa ngaba unokuthembela koku?
3 Umpostile uPawulos wacaphula inxalenye yesiqinisekiso esanikelwa nguThixo kuAbraham: “Inene, ndiya kuthi, ndisikelela, ndikusikelele.” UPawulos wongezelela ukuba ekubeni ‘uThixo engenako ukuxoka,’ ‘sinako ukubambelela kwithemba elibekwe phambi kwethu.’ (Hebhere 6:13-18) Intembelo esinayo kwezo ntsikelelo inokomelezwa ngokubhekele phaya ngokuphawula indlela ecwangcisiweyo athe uThixo wandlala ngayo isiseko sokuphumeza oku.
4. UThixo wayisebenzisa njani iminqophiso eyahlukahlukeneyo ukuze aphumeze injongo yakhe?
4 Sele sibonile ukuba uThixo wenza umnqophiso noAbraham obandakanya imbewu eyayiza kusetyenziselwa ukusikelela “zonke iintlanga zehlabathi.” (Genesis 22:17, 18) AmaSirayeli aba yimbewu yokwenyama, kodwa ngengqiqo yokomoya ebaluleke ngakumbi, uYesu Kristu wangqineka eyinxalenye eyintloko yembewu ka-Abraham. Kwakhona uYesu wayenguNyana, okanye iMbewu, ka-Abraham Omkhulu, uYehova. AmaKristu ‘angakaKristu’ abumba inxalenye yesibini yembewu ka-Abraham. (Galati 3:16, 29) Emva kokwenza umnqophiso noAbraham, uThixo wongezelela okwexeshana umnqophiso woMthetho kuhlanga lwakwaSirayeli. Wabonisa ukuba amaSirayeli ayengaboni ababefuna umbingeleli osisigxina nedini eligqibeleleyo. Wakhusela umnombo weMbewu waza wanceda ekuyifaniseni. Kwakhona umnqophiso woMthetho wabonisa ukuba, ngandlel’ ithile, uThixo wayeza kuvelisa uhlanga lwababingeleli abangookumkani. Ngoxa loo Mthetho wawusasebenza, uThixo wenza umnqophiso noDavide wokuba nomnombo wolandelelwano lookumkani kwaSirayeli. Loo mnqophiso woBukumkani owenziwa noDavide wakwalatha kuthile olawula ngokusisigxina emhlabeni.
5. Yiyiphi imibuzo okanye iingxaki ekusafuneka ziconjululwe?
5 Kanti, kwakukho iinkalo ezithile okanye iinjongo ngale minqophiso eyayibonakala izizinqam okanye ifuna ukucaciswa. Ngokomzekelo, ukuba imbewu ezayo yayiza kuba ngukumkani kumnombo kaDavide, kwakunokwenzeka njani ukuba ibe ngumbingeleli osisigxina owayeza kwenza okungaphezu koko kwakusenziwa ngababingeleli ngaphambili? (Hebhere 5:1; 7:13, 14) Ngaba lo kumkani wayenokulawula ummandla womhlaba ongaphezu kwalowo ulinganiselweyo? Kwakuza kwenzeka njani ukuba inxalenye yesibini yembewu ifanelekele ukuba kwintsapho ka-Abraham Omkhulu? Kwanokuba yayinokufaneleka, yayiza kuba ivela phi, ekubeni uninzi lwamalungu ayo lwalungaveli kuDavide? Makhe sibone indlela uThixo awathabatha ngayo amanyathelo angokwasemthethweni esebenzisa iminqophiso engakumbi eyayiza kuba sisicombululo kule mibuzo, ehlahlel’ indlela yokuba sifumane iintsikelelo ezingunaphakade.
Umnqophiso Wombingeleli Wasezulwini
6, 7. (a) NgokweNdumiso 110:4, nguwuphi umnqophiso owongezelelekileyo owasungulwa nguThixo? (b) Kukuphi okuthile okwenzeka emva phayaa okusinceda siqonde lo mnqophiso wongezelelwayo?
6 Njengoko sibonile, ngethuba lokusebenza komnqophiso woMthetho, uThixo wenza umnqophiso noDavide ngenzala (ngembewu) eyayiza kulawula ngokusisigxina kummandla wasemhlabeni. Kodwa uYehova wakwatyhilela uDavide ukuba kwakuza kufika umbingeleli ohlala ehleli. UDavide wabhala: “Ufungile uYehova, akayi kuzohlwaya; uthe, Ungumbingeleli ngonaphakade wena ngokohlobo lukaMelkitsedeke.” (INdumiso 110:4) Yintoni eyayiqulethwe ngala mazwi esifungo sikaThixo eyalingana nomnqophiso wobuqu phakathi koYehova noMbingeleli ozayo?
7 UMelkitsedeke wayengukumkani waseSalem yamandulo, ekubonakala ukuba yayimi kwindawo apho kwathi kamva kwakhiwa khona isixeko saseYerusalem (igama elihlanganisa “iSalem”). Ingxelo yeenkqubano zika-Abraham naye zibalaselisa ukuba wayengukumkani owayenqula “uThixo Osenyangweni.” (Genesis 14:17-20) Kanti, amazwi kaThixo akwiNdumiso 110:4 abonisa ukuba uMelkitsedeke wayekwangumbingeleli, nto leyo emenza abe ngumntu okhethekileyo. Wayengukumkani kwaye engumbingeleli, ibe wakhonza apho ookumkani bomnombo kaDavide nababingeleli abangamaLevi baphumeza khona imisebenzi yabo eyayilungiselelwe nguThixo.
8. Wenziwa nabani umnqophiso wombingeleli ngokohlobo lukaMelkitsedeke, ibe oko kwaba nawuphi umphumo?
8 UPawulos usinika iinkcukacha ezingakumbi mayela nalo mnqophiso ungombingeleli onjengoMelkitsedeke. Ngokomzekelo, uthi yayinguYesu Kristu ‘owabizwa nguThixo, ukuba abe ngumbingeleli omkhulu ngokohlobo lukaMelkitsedeke.’ (Hebhere 5:4-10; 6:20; 7:17, 21, 22) Nangona ngokucacileyo uMelkitsedeke wayenabazali abangabantu, akukho ngxelo yomlibo wakhe. Ngoko kunokuba uYesu asizuz’ ilifa isikhundla sokuba ngumbingeleli ngokomlibo obhaliweyo osusela kuMelkitsedeke, wamiselwa ngokungqalileyo nguThixo. Ububingeleli bukaYesu abuyi kudluliselwa kwilandela, kuba “uhleli engumbingeleli ngokungapheliyo.” Oku kunjalo, kuba iingenelo zenkonzo yakhe yokuba ngumbingeleli ziya kuba zezikanaphakade. Ngokwenyaniso sinokuba ngabasikelelekileyo ngokuba nombingeleli ‘onako nokubasindisa kanye abo beza kuThixo ngaye’ enako nokufundisa nokukhokela abathembekileyo ngonaphakade.—Hebhere 7:1-3, 15-17, 23-25.
9, 10. Ukuba nolwazi ngalo mnqophiso wesihlanu kusenza njani sibe ngabaphangaleleyo ekuqondeni indlela eya kuzalisekiswa ngayo injongo kaThixo?
9 Esinye isibakala esibalulekileyo kukuba indima kaYesu njengoMbingeleli onguKumkani ayipheleli nje kummandla wasemhlabeni. Kwakuloo mazwi anomongo ofanayo apho akhankanya khona lo mnqophiso wombingeleli onjengoMelkitsedeke, uDavide wabhala: “Utsho uYehova eNkosini yam ukuthi, Hlala ngasekunene kwam, ndide iintshaba zakho ndizenze isitulo seenyawo zakho.” Ngaloo ndlela sinokubona ukuba uYesu—iNkosi kaDavide—wayeza kuhlala noYehova ezulwini, nto leyo eyenzeka ekunyukeleni kwakhe apho. Emazulwini apho, uYesu unokusebenzisa igunya noYise ukuze oyise iintshaba aze aphumeze imigwebo.—INdumiso 110:1, 2; IZenzo 2:33-36; Hebhere 1:3; 8:1; 12:2.
10 Ngenxa yoku, ngokuba nolwazi ngalo mnqophiso wesihlanu, sinembono ephangaleleyo ngendlela ecwangcisiweyo necacileyo aya kuthi uYehova azalisekise ngayo injongo yakhe. Oku kuqinisekisa ukuba inxalenye eyintloko yembewu iya kuba kwangumbingeleli ezulwini nokuba igunya layo njengombingeleli onguKumkani liya kuba ngokomlinganiselo wendalo iphela.—1 Petros 3:22.
Umnqophiso Omtsha Nenxalenye Yesibini Yembewu
11. Kwabakho ziphi iingxaki ngokuphathelele inxalenye yesibini yembewu?
11 Xa ngaphambilana siye saqwalasela umnqophiso owenziwa noAbraham, siphawulile ukuba uYesu waba yinxalenye eyintloko yembewu ngelungelo elingokwemvelo. Ngokungqalileyo wavela kwinzala kasolusapho uAbraham, ibe njengomntu ofezekileyo, waba nguNyana owamkelekileyo ka-Abraham Omkhulu. Noko ke, kuthekani ngabantu abanelungelo lokuba yinxalenye yesibini yembewu ka-Abraham, ‘iindlalifa ngokwedinga’? (Galati 3:29) Ekubeni bengafezekanga, beyinxalenye yentsapho yomoni uAdam, babengayi kufaneleka ukuba kwintsapho kaYehova, uAbraham Omkhulu. Sasinokoyiswa njani isiphako sokungafezeki? Oko bekungenakwenziwa ngabantu, kodwa uThixo unokukwenza.—Mateyu 19:25, 26.
12, 13. (a) UThixo wawuxela kwangaphambili njani omnye umnqophiso? (b) Yiyiphi imbalasane ekhethekileyo yalo mnqophiso ekufuneka siyinikele ingqalelo?
12 Ngoxa uMthetho wawusasebenza, esebenzisa umprofeti wakhe uThixo waxela kwangaphambili oku: “Ndiya kwenza umnqophiso omtsha nendlu kaSirayeli nendlu kaYuda; ungabi njengomnqophiso endawenza nooyise . . . umnqophiso wam abasuka bawaphula bona . . . ndiya kuwubeka umyalelo wam embilinini yabo, ndiwubhale ezintliziyweni zabo, ndibe nguThixo wabo, babe ngabantu bam; bangabi safundisa . . . besithi, Mazini uYehova; ngokuba bonke bephela baya kundazi, . . . ngokuba ndiya kubuxolela ubugwenxa babo, ndingabi sasikhumbula isono sabo.”—Yeremiya 31:31-34.
13 Phawula ukuba imbalasane yalo mnqophiso mtsha yayikukuxolelwa kwezono, ngokucacileyo oku ‘kwakungenakuba’ ngendlela yelungiselelo lamadini ezilwanyana awayesenziwa phantsi koMthetho. UYesu wakucacisa oku ngomhla awafa ngawo. Emva kokuhlanganisa abafundi bakhe elungiselela umsitho wePasika njengoko oko kwakufunwa nguMthetho, uKristu wasungula iSidlo SeNkosi Sangokuhlwa. Lo msitho waminyaka le wawuza kubandakanyaka ukwabelana ngendebe yewayini, awathi uYesu ngayo: “Le ndebe ingumnqophiso omtsha osegazini lam, eliphalalela nina.”—Luka 22:14-20.
14. Kutheni le nto ubalulekile umnqophiso omtsha ekuvelisweni kwenxalenye yesibini yembewu?
14 Ngenxa yoko, lo mnqophiso mtsha wawuya kwenziwa usebenze ngegazi likaYesu. Ngesizinzi sedini eligqibelele ngolo hlobo, uThixo ‘wayenokubuxolela ubugwenxa nesono’ ngonaphakade. Cinga ngento ekwakuza kuthetha yona oko! Ekubeni wayekwazi ukuzixolela ngokupheleleyo izono zabantu abazinikeleyo abakwintsapho ka-Adam, uThixo wayenokubajonga njengabangenasono, ebazala njengoonyana bokomoya baka-Abraham Omkhulu, aze emva koko abathambise ngomoya oyingcwele. (Roma 8:14-17) Ngaloo ndlela, umnqophiso omtsha owenziwa wasebenza ngedini likaYesu ubangela ukuba abafundi bakhe babe yinxalenye yesibini yembewu ka-Abraham. UPawulos wabhala: “Ngako ukufa [uYesu wayeya kuthi] ambhangise lowo unamandla okufa, oko kukuthi, uMtyholi lo; [wayeya kuthi] abakhulule ebukhobokeni bonke abo babethe ngalo lonke ixesha lokudla kwabo ubomi bazizisulu zokoyika ukufa. Kuba ndithi, akathabatheli kuye zithunywa; uthabathela kuye imbewu ka-Abraham.”—Hebhere 2:14-16; 9:14.
15. Ngoobani ababumba isigqeba somnqophiso omtsha?
15 Ngoxa uYesu wayeya kuba nguMlamleli nalowo wayeya kwenza lisebenze idini lomnqophiso omtsha, ayengoobani amalungu alo mnqophiso? UYeremiya waxela kwangaphambili ukuba uThixo wayeya kuwenza lo mnqophiso ‘nendlu kaSirayeli.’ Nguwuphi loo Sirayeli? Asinguye uSirayeli wokwenyama owaluswayo phantsi koMthetho, kuba umnqophiso omtsha wawutshitshisa umnqophiso wangaphambili. (Hebhere 8:7, 13; bona iphepha 31.) Ngeli thuba uThixo wayeza kuqhubana namaYuda nabeeNtlanga abathi ngokholo ‘baluswa ngokomfuziselo entliziyweni ngomoya.’ Oku kuvisisana namazwi akhe okuba ‘imithetho yakhe wayeya kuyibeka engqondweni yabo’ bakumnqophiso omtsha aze ‘ayibhale nasezintliziyweni zabo.’ (Roma 2:28, 29; Hebhere 8:10) UPawulos wawabiza loo maYuda okomoya ngokuthi ‘nguSirayeli kaThixo.’—Galati 6:16; Yakobi 1:1.
16. Umnqophiso omtsha uluncedo njani ekuphumezeni oko kwalathwa kuko kwiEksodus 19:6?
16 Ekubeni ngeli thuba uThixo wayeqhubana noSirayeli wokomoya, kwavuleka ithuba lokwenza okuthile. Xa uThixo waseka uMthetho, wathetha ngoonyana bakaSirayeli esithi babeza kuba ‘bubukumkani bababingeleli kuye, nohlanga olungcwele.’ (Eksodus 19:6) Enyanisweni, uSirayeli wokomoya wayengenakuze kwaye engazange abe luhlanga olwaluza kuthi luphela lube ngababingeleli nookumkani. Kodwa ngamaYuda nabeeNtlanga abamkelwayo njengenxalenye yesibini yembewu ka-Abraham awayenokuba ngababingeleli nookumkani.b Umpostile uPetros wakungqina oku, exelela abanjalo oku: “Nina nisisizukulwana esinyuliweyo, isibingeleli esibukumkani, uhlanga olungcwele, abantu abayinqobo, ukuze nivakalise isidima salowo wanibizayo ukuba niphume ebumnyameni.” Kwakhona wabhala esithi ‘bagcinelwe ilifa elingenakuguga emazulwini.’—1 Petros 1:4; 2:9, 10.
17. Kutheni le nto umnqophiso omtsha ‘ulungile’ kunomnqophiso woMthetho?
17 Ngenxa yoko, umnqophiso omtsha usebenzisana nalowo wawusele ukho kwangaphambili owenziwa noAbraham ukuze uvelise inxalenye yesibini yembewu. Lo mnqophiso mtsha wenziwe phakathi koYehova namaKristu azelwe ngomoya ubangela ukubunjwa kohlanga lwasezulwini olungababingeleli nookumkani kwintsapho yasebukhosini ka-Abraham Omkhulu. Ngoko, sinokusibona isizathu sokuba uPawulos athi lo “usekwe phezu kwawona madinga alungileyo.” (Hebhere 8:6) Loo madinga aquka intsikelelo yokubhalwa komthetho kaThixo ezintliziyweni zabo bazinikeleyo abazono zabo zingakhunjulwayo, ibe bonke ‘bemazi uYehova kuthabathela komncinane ukusa komkhulu.’—Hebhere 8:11.
Umnqophiso KaYesu WoBukumkani
18. Kungayiphi ingqiqo ethi iminqophiso esixubushe ngayo okwangoku ingayiphumezi ngokupheleleyo injongo kaThixo?
18 Xa sicinga ngeminqophiso emithandathu esixubushe ngayo, kusenokubonakala ukuba uYehova uye walungiselela ngokusemthethweni konke okufunekayo ukuze aphumeze injongo yakhe. Kanti, iBhayibhile ichaza omnye umnqophiso odibana nalowo sixubushe ngawo, mnqophiso lowo ogubungela iinkalo ezingakumbi zalo mbandela ubalulekileyo. AmaKristu azelwe ngomoya akulindele ngokufanelekileyo ukuba ‘iNkosi iwahlangule kuwo wonke umsebenzi ongendawo iwasindisela ebukumkanini bayo obusemazulwini.’ (2 Timoti 4:18) Aya kuba luhlanga olungababingeleli nookumkani ezulwini, kodwa aya kuba ephuma phi? Xa evuselwa ezulwini, uKristu sele elapho njengoMbingeleli Omkhulu ofezekileyo. Uya kuba sele emile esemandleni obukumkani ukuze alawule indalo iphela. (INdumiso 2:6-9; ISityhilelo 11:15) Yintoni eza kwenziwa apho ngabanye ababingeleli abangookumkani?
19. Wenziwa nini yaye njani umnqophiso wesixhenxe obalulekileyo?
19 NgoNisan 14, 33 C.E., urhatya uYesu awasungula ngalo iSidlo SeNkosi Sangokuhlwa waze wakhankanya “umnqophiso omtsha osegazini [lakhe],” wathetha ngomnye umnqophiso, ongowesixhenxe esiza kuxubusha ngawo. Waxelela abapostile bakhe abathembekileyo oku: “Nina ke ningabo basoloko behleli nam ekulingweni kwam. Nam ndinimisela ubukumkani, njengokuba uBawo endimisele mna, ukuze nidle, nisele, esithebeni sam ebukumkanini bam, nihlale ezitroneni, nigweba izizwe ezilishumi elinazibini zakwaSirayeli.” (Luka 22:20, 28-30) Njengokuba kanye uYise wenza umnqophiso noYesu wokuba uza kuba ngumbingeleli ngokohlobo lukaMelkitsedeke, ngoko uKristu wenza umnqophiso wobuqu nabalandeli bakhe abanyanisekileyo.
20. Wenziwa nabani umnqophiso woBukumkani, ibe ngoba? (Daniyeli 7:18; 2 Timoti 2:11-13)
20 Abapostile abali-11 ngokuqinisekileyo babesoloko benoYesu ekulingweni kwakhe, ibe loo mnqophiso wabonisa ukuba babeza kuhlala ezitroneni. Ngaphezu koko, ISityhilelo 3:21 sibonisa ukuba onke amaKristu azelwe ngomoya azingqina ethembekile aya kuhlala ezitroneni zasezulwini. Ngaloo ndlela, lo mnqophiso wenziwa nalo lonke i-144 000 eliye lathengwa ngegazi likaYesu ukuze lithatyathelwe ezulwini njengababingeleli ‘nookumkani phezu komhlaba.’ (ISityhilelo 1:4-6; 5:9, 10; 20:6) Umnqophiso uYesu awenza nabo uyabamanya kunye naye ukuze babe ngamadlelane elulawulweni lwakhe. Ngokusengqiqweni, kungokungathi umtshakazi ophuma kwintsapho yasebukhosini wayemanywa ngomtshato nomlawuli olawulayo. Ngaloo ndlela esiba kwisigxina sokuba lidlelane kulawulo lobukumkani bakhe.—Yohane 3:29; 2 Korinte 11:2; ISityhilelo 19:7, 8.
21, 22. Yiyiphi intsikelelo enokulindelwa ngenxa yoko kuphunyezwa yile minqophiso?
21 Oku kuya kuvulela ziphi iingenelo kuluntu oluthobelayo? UYesu ne-144 000 abayi kuba njengoozwilakhe abangoovula-zibhuqe ‘abangenako ukulungiselela izicombululo zokwenene.’ Kunoko, siqinisekiswa ukuba uYesu ungumbingeleli omkhulu “owahendwayo ngeento zonke, ngokufana nathi, engenasono.” Ngoko ke, sinokusiqonda isizathu sokuba ‘enokuvelana’ nobuthathaka boluntu nesizathu sokuba “ezinye izimvu,” njengoko kuye kwanjalo ngamaKristu athanjisiweyo, zinokuthi nazo, ngoKristu, zisondele kuyo itrone kaThixo ‘zinokungafihlisi.’ Ngaloo ndlela, nazo ‘zisekwanokufumana ubabalo lokusiza ngexesha elililo.’—Hebhere 4:14-16; Yohane 10:16.
22 Abo bakumnqophiso wokudlelana noYesu njengababingeleli abangookumkani bakwayintsikelelo eluntwini. Njengokuba ababingeleli bamandulo abangamaLevi baba yingenelo kulo lonke uhlanga lwakwaSirayeli, ngoko abo bakhonza kwiitrone zasezulwini noYesu baya kubagweba ngobulungisa bonke abo baphila emhlabeni. (Luka 22:30) Abo babingeleli bangookumkani babekhe bangabantu, ngoko baya kuba novelwano ngeemfuno zoluntu. Le nxalenye yesibini yembewu iya kusebenzisana noYesu ekuboneni ukuba ‘ziyasikelelwa zonke iintlanga’ kusini na.—Galati 3:8.
23. Bafanele benze ntoni abantu ngenjongo yokuvisisana nale minqophiso?
23 Bonke abafuna ukufumana loo ntsikelelo eya kuba phezu koluntu, ngaloo ndlela bengenelwa kwiminqophiso kaThixo, ngoku bamenyelwa ukwenjenjalo. (ISityhilelo 22:17) Elinye inyathelo elihle lokwenjenjalo kukubakho kumsitho weSidlo SeNkosi Sangokuhlwa, oya kuqhutywa emva kokutshona kwelanga ngoLwesithathu, ngoMatshi 22, 1989. Khawucebe kwangoku ukuze uye kulo msitho kwelinye lamabandla amaNgqina kaYehova. Apho uya kufunda okungakumbi ngeminqophiso kaThixo ibe uya kubona ngokubhekele phaya indlela onokungenelwa ngayo kuyo.
[Imibhalo esemazantsi]
a “Kwanezona nkqubo zokuhlaziya izinto ezazibeka ubomi emngciphekweni zashiya abalimi abahlwempuzekileyo, abantu abanamalungelo angakumbi, izityebi ezingarhafiyo, abantu abakudidi oluphakathi bexubene ngokungafanelekanga kurhulumente nakwibutho labantu . . . Kumele kutshiwo ukuba ngoxa ulawulo loozwilakhe abakhanyiselweyo lwaqalisa ukujongana nemibuzo eyayingenakuze ityeshelwe nakancinane, lwalungenakuzisa zicombululo zokwenene kwimibandela yokwenene yezobupolitika ngeyezoqoqosho lwaloo maxesha.”—Western Civilization—Its Genesis and Destiny: The Modern Heritage.
b UYesu akalolungu lesigqeba somnqophiso omtsha. UnguMlamleli kuwo ibe akanazono zifuna ukuxolelwa. Ngokubhekele phaya, akuyomfuneko ngaye ukuba abe ngumbingeleli ongukumkani ngenxa yawo, kuba ungukumkani ngokomnqophiso owenziwa noDavide ibe ukwangumbingeleli ngokohlobo lukaMelkitsedeke.
Uyakhumbula Na?
◻ Kutheni le nto kwenziwa umnqophiso okhankanywe kwiNdumiso 110:4, ibe waphumeza ntoni?
◻ Ngoobani abakumnqophiso omtsha, ibe wanceda njani ekuveliseni uhlanga lwababingeleli abangookumkani?
◻ Kutheni le nto uYesu wenza umnqophiso wobuqu nabalandeli bakhe?
◻ Yiyiphi iminqophiso esixhenxe esixubushe ngayo?
[Umzobo okwiphepha 17]
(Ukuba ufuna inkcazelo ehlahlelwe kakuhle, yiya kwimpapasho)
Umnqophiso owenziwa e-Eden Genesis 3:15
Umnqophiso owenziwa noAbraham
Umnqophiso woMthetho
Umnqophiso woBukumkani owenziwa noDavide
Umnqophiso wombingeleli ngokohlobo lukaMelkitsedeke
Imbewu eyintloko
Inxalenye yesibini yembewu
Iintsikelelo ezingunaphakade
[Umzobo okwiphepha 19]
(Ukuba ufuna inkcazelo ehlahlelwe kakuhle, yiya kwimpapasho)
Umnqophiso owenziwa e-Eden Genesis 3:15
Umnqophiso owenziwa noAbraham
Umnqophiso woMthetho
Umnqophiso omtsha
Umnqophiso woBukumkani owenziwa noDavide
Umnqophiso wombingeleli ngokohlobo lukaMelkitsedeke
Imbewu eyintloko
Umnqophiso woBukumkani basezulwini
Inxalenye yesibini yembewu
Iintsikelelo ezingunaphakade