Isahluko 7
Oko UThixo Akwenzileyo Ukuze Asindise Uluntu
1, 2. (a) Umthetheli-khulu womRoma waqonda njani ukuba ungubani uNyana kaThixo? (b) Kwakutheni ukuze uYehova avumele ukuba uYesu afe?
NGENYE imva kwemini yasentwasahlobo phantse kwiminyaka engama-2 000 eyadlulayo, umthetheli-khulu womRoma wabukela amadoda amathathu esifa ngokuthe ngcembe yaye ethuthunjelwa. Loo mphumi-mkhosi waphawula ngokukodwa omnye wawo—uYesu Kristu. UYesu wayebethelelwe esibondeni. Isibhakabhaka saba mnyama emini emaqanda njengoko ilixa lokufa kwakhe lalisondela. Ukufa kwakhe, umhlaba washukuma ngendlela eyoyikekayo, yaye lo mphumi-mkhosi wathi: “Inyaniso, lo mntu ubenguNyana kaThixo.”—Marko 15:39.
2 UNyana kaThixo! Loo mphumi-mkhosi wayechanile. Wayesandul’ ukubona esona siganeko sibalulekileyo sakha senzeka emhlabeni. Ngezinye izihlandlo ngaphambilana, uThixo wayebize uYesu ngokuthi nguNyana wakhe oyintanda. (Mateyu 3:17; 17:5) Kutheni uYehova wavumela uNyana wakhe ukuba afe? Kungenxa yokuba le yayiyindlela kaThixo yokusindisa uluntu kwisono nokufa.
UKHETHELWE INJONGO EKHETHEKILEYO
3. Kutheni kwakufanelekile ukuba uNyana kaThixo okuphela kwamzeleyo anyulelwe ukuphumeza injongo ekhethekileyo ngokuphathelele uluntu?
3 Njengokuba sesifundile ngaphambilana kule ncwadi, uYesu wayephila ngaphambi kokuba abe ngumntu. Ubizwa ngokuba ‘nguNyana kaThixo okuphela kwamzeleyo’ ngenxa yokuba uYehova wamdala ngokuthe ngqo. Emva koko uThixo wasebenzisa uYesu ekwenzeni zonke ezinye izinto zibekho. (Yohane 3:18; Kolose 1:16) UYesu wayeluthanda ngokukhethekileyo uluntu. (IMizekeliso 8:30, 31) Akumangalisi ke ukuba uYehova wakhetha uNyana wakhe okuphela kwamzeleyo ukuba afeze injongo ekhethekileyo xa uluntu lwaba ngaphantsi kwesigwebo sokufa!
4, 5. Ngaphambi kokuza kukaYesu emhlabeni, iBhayibhile yayityhile ntoni ngeMbewu enguMesiya?
4 Xa wayedlulisela isigwebo kuAdam, uEva noSathana kumyezo wase-Eden, uThixo wathetha ngalowo wayeya kuba nguMhlanguli kwixesha elizayo ‘njengembewu.’ Le Mbewu, okanye inzala, yayiya kuza ngenjongo yokulungisa wonke umonakalo uSathana uMtyholi, “inyoka yakudala,” awayewenzile. Eneneni, iMbewu eThenjisiweyo yayiya kutyumza uSathana nabo bonke abo bamlandelayo.—Genesis 3:15; 1 Yohane 3:8; ISityhilelo 12:9.
5 Ebudeni beenkulungwane, ngokuthe ngcembe uThixo watyhila okungakumbi ngale Mbewu, ekwabizwa ngokuba nguMesiya. Njengoko kuphawulwe kwisicangca esikwiphepha 37, iziprofeto ezininzi zanikela iinkcukacha ngeenkalo ezininzi zobomi bakhe emhlabeni. Ngokomzekelo, wayeza kuphathwa kakubi gqitha ukuze aphumeze indima yakhe kwinjongo kaThixo.—Isaya 53:3-5.
ISIZATHU SOKUBA UMESIYA WAYEYA KUFA
6. Ngokutsho kukaDaniyeli 9:24-26, wayeya kufeza ntoni uMesiya, yaye njani?
6 Isiprofeto esibhalwe kuDaniyeli 9:24-26 saxela kwangaphambili ukuba uMesiya—Lowo uThanjisiweyo kaThixo—wayeya kuzalisekisa injongo ebalulekileyo. Wayeya kuza emhlabeni ukuze “sithintelwe isikreqo, zitywinwe izono, bucanyagushelwe ubugwenxa, kuziswe ubulungisa” ngonaphakade. UMesiya wayeya kusisusa isigwebo sokufa kuluntu oluthembekileyo. Kodwa wayeya kukwenza njani oku? Isiprofeto sibonisa ukuba wayeya “kunqunyulwa,” okanye abulawe.
7. Kwakutheni ukuze amaYuda anikele amadini ezilwanyana, ibe la ayefanekisela ntoni?
7 AmaSirayeli amandulo ayeqhelene nengcamango yokucanyagushelwa kobugwenxa. Kunqulo lwawo ngaphantsi koMthetho uThixo awayewanike wona ngoMoses, ayenikela amadini ezilwanyana rhoqo. Oku kwakukhumbuza abantu bakwaSirayeli ukuba abantu kufuneka bafumane into yokucamagushela, okanye yokugubungela, izono zabo. Umpostile uPawulos wawushwankathela ngolu hlobo lo mgaqo: “Kungaphalalanga gazi, akubikho kuxolelwa.” (Hebhere 9:22) AmaKristu akakho ngaphantsi koMthetho kaMoses nezinto ezazifuneka kuwo, ezinjengamadini. (Roma 10:4; Kolose 2:16, 17) Kwakhona ayazi ukuba amadini ezilwanyana akabangeli ukuxolelwa ngokusisigxina nangokupheleleyo kwezono. Kunoko, le mibingelelo yamadini yayifanekisela idini elixabiseke ngakumbi—elo likaMesiya, okanye uKristu. (Hebhere 10:4, 10; thelekisa amaGalati 3:24.) Kodwa, usenokubuza, ‘Ngaba kwakuyimfuneko ngokwenene ukuba uMesiya afe?’
8, 9. Ziziphi izinto ezixabisekileyo abalahlekelwa zizo uAdam noEva, ibe izenzo zabo zayichaphazela njani inzala yabo?
8 Ewe, uMesiya kwakufuneka afe ukuze uluntu lusindiswe. Ukuze uqonde isizathu, masibuyele emyezweni wase-Eden size sizame ukuqonda ubungakanani boko kwalahlwa nguAdam noEva xa bavukela uThixo. Babethenjiswe ubomi obungunaphakade! Njengabantwana bakaThixo, babekwanolwalamano oluthe ngqo naye. Kodwa xa balugatyayo ulawulo lukaYehova, balahlekelwa kuko konke oko baza bazisela uhlanga lwabantu isono nokufa.—Roma 5:12.
9 Kwakufana nokuba abazali bethu bokuqala babedyakraze ngobutyebi obuninzi, baza bazifaka zwabha ematyaleni. UAdam noEva badlulisela elo tyala kwinzala yabo. Ngenxa yokuba singazange sizalwe sifezekile yaye singenasono, ngamnye kuthi unesono yaye uyafa. Xa sigula okanye sithetha into embi esinqwenela ukuba besinga singayiginya kwakhona, siva imiphumo yetyala esalizuza njengelifa—ukungafezeki kwabantu. (Roma 7:21-25) Ekuphela kwethemba esinalo kukuzuza kwakhona oko uAdam wakulahlayo. Noko ke, asinakubuzuza ubomi obufezekileyo njengabantu. Ekubeni bonke abantu abangafezekanga besona, sonke sizuza ukufa, kungekhona ubomi.—Roma 6:23.
10. Yintoni eyayifuneka ukuze kuthengwe oko uAdam wakulahlayo?
10 Sekunjalo, ngaba ikho into eyayinokunikelwa ukuze kufunyanwe ubomi uAdam awabulahlayo? Imilinganiselo kaThixo yokusesikweni ifuna ulungelelwano, “umphefumlo ngomphefumlo.” (Eksodus 21:23) Ngoko kwakufuneka kunikelwe ngobomi ukuze kuhlawulelwe ubomi obalahlwayo. Kwakungayi kufuneka nabuphi na ubomi. INdumiso 49:7, 8 ithi ngabantu abangafezekanga: “Akukho bani unokukhulula umzalwana; akanakumnika uThixo isicamagusho [“intlawulelo,” NW] ngaye (sinqabile isikhululo somphefumlo wabo, masincanywe ngonaphakade).” Ngoko ke ngaba akukho nto inokwenziwa ngale meko? Akunjalo konke konke.
11. (a) Linayiphi intsingiselo igama elithi “intlawulelo” ngesiHebhere? (b) Ngubani kuphela owayenokuhlangula uluntu, yaye ngoba?
11 Kulwimi lwesiHebhere, igama elithi “intlawulelo” libonisa isixa semali esihlawulelwa ukukhulula ikhoboka yaye likwabonisa into elinganayo. Kuphela ngumntu onobomi obufezekileyo owayenokunikela okulingana noko uAdam wakulahlayo. Emva koAdam, okuphela komntu ofezekileyo owazalwayo emhlabeni nguYesu Kristu. Ngenxa yoko, iBhayibhile ibiza uYesu ngokuthi “owokugqibela uAdam” ize isiqinisekise ukuba uKristu ‘wazinikela ukuba abe yintlawulelo [elinganayo, NW] yokukhulula abantu bonke.’ (1 Korinte 15:45; 1 Timoti 2:5, 6) Ngoxa uAdam wadlulisela ukufa kubantwana bakhe, uYesu wadlulisela ubomi obungunaphakade. Eyoku-1 kwabaseKorinte 15:22 iyacacisa: “Njengokuba kuye uAdam bafa bonke, ngokunjalo nakuye uKristu baya kudliswa ubomi bonke.” Ngokufanelekileyo ke ngoko, uYesu ubizwa ngokuba ‘nguBawo Ongunaphakade.’—Isaya 9:6, 7, NW.
INDLELA INTLAWULELO EYAHLAWULWA NGAYO
12. UYesu waba nguMesiya nini, ibe liliphi ikhondo lobomi awalilandelayo emva koko?
12 Ekwindla ngowama-29 C.E., uYesu waya kwisalamane sakhe uYohane ukuze abhaptizwe aze ngaloo ndlela azinikele ukuze enze ukuthanda kukaThixo. Ngeso sihlandlo uYehova wathambisa uYesu ngomoya oyingcwele. Ngaloo ndlela uYesu waba nguMesiya, okanye uKristu, lowo uthanjiswe nguThixo. (Mateyu 3:16, 17) Wandula ke uYesu waqalisa ubulungiseleli bakhe beminyaka emithathu enesiqingatha. Walityhutyha lonke ilizwe lokuzalwa kwakhe, eshumayela ngoBukumkani bukaThixo yaye ehlanganisa abalandeli abathembekileyo. Noko ke, njengoko kwakuxelwe kwangaphambili, inkcaso yanda.—INdumiso 118:22; IZenzo 4:8-11.
13. Ziziphi iziganeko ezandulela ukufa kukaYesu njengomgcini wengqibelelo?
13 Ngenkalipho uYesu walubhenca uhanahaniso lweenkokeli zonqulo, zaza zafuna ukumbulala. Ekugqibeleni zaqulunqa iyelenqe elingendawo elalibandakanya ukungcatsha, ukubanjwa ngokungafanelekanga, ukuchotshelwa kwetyala ngendlela engekho mthethweni nesityholo sobuxoki sokulahlekisa. UYesu wabethwa, watshicelwa, wagculelwa waza wabethwa ngesabhokhwe esasenzelwe ukuba siyikrazule inyama yakhe. Yandula ke irhuluneli yomRoma uPontiyo Pilato yamgwebela ukubulawa ngokuxhonywa emthini wentuthumbo. Wabethelelwa esibondeni waza wajingiswa kuso ngoxa sasimiswe nkqo. Sihlandlo ngasinye ephefumla wayeqaqanjelwa ngokungathethekiyo, yaye kwadlula iiyure ngaphambi kokuba afe. Ebudeni bayo yonke loo nto, uYesu wagcina ingqibelelo ngokupheleleyo kuThixo.
14. Kwakutheni ukuze uThixo avumele uNyana wakhe abandezeleke aze afe?
14 Ngaloo ndlela, ngoNisan 14, 33 C.E., uYesu wanikela ngobomi bakhe baba “yintlawulelo yokukhulula abaninzi.” (Marko 10:45; 1 Timoti 2:5, 6) Esezulwini, uYehova wayenokumbona uNyana wakhe amthandayo engcungcutheka aze afe. Kwakutheni ukuze uThixo avumele into embi ngolo hlobo yenzeke? Wenjenjalo ngenxa yokuba wayeluthanda uluntu. UYesu wathi: “Wenjenje uThixo ukulithanda kwakhe ihlabathi, ude wancama uNyana wakhe okuphela kwamzeleyo, ukuze bonke abakholwayo kuye bangatshabalali, koko babe nobomi obungunaphakade.” (Yohane 3:16) Ukufa kukaYesu kukwasifundisa ukuba uYehova nguThixo osesikweni ngokugqibeleleyo. (Duteronomi 32:4) Bambi basenokuzibuza isizathu sokuba uThixo engazange ayibekele ecaleni imigaqo yakhe yokusesikweni eyayifuna umphefumlo ngomphefumlo aze alityeshele ixabiso elalifuneka ngenxa yekhondo lika-Adam lesono. Isizathu kukuba ngalo lonke ixesha uYehova uyabambelela kwimithetho yakhe yaye uyayiphakamisa, kwanaxa oko kusenokuthetha ukuba ulahlekelwa kakhulu.
15. Ekubeni kwakungayi kuba kokusesikweni ukuvumela ukuba ubomi bukaYesu buphele ngokusisigxina, wenza ntoni uYehova?
15 Kwakhona ngenxa yokuba sesikweni kukaYehova kwafuneka ukuba ukufa kukaYesu kube nomphumo owonwabisayo. Ngapha koko, ngaba kwakuya kuba sesikweni ukuvumela uYesu othembekileyo alale ekufeni ngonaphakade? Kakade kwakungayi kuba sesikweni! IZibhalo zesiHebhere zaziprofete ukuba onyanisekileyo kaThixo wayengayi kuhlala engcwabeni. (INdumiso 16:10; IZenzo 13:35) Walala ekufeni inxalenye yeentsuku ezintathu, waza uYehova uThixo wamvusela ebomini njengesidalwa somoya esinamandla.—1 Petros 3:18.
16. Wenza ntoni uYesu ekubuyeleni kwakhe ezulwini?
16 Ekufeni kwakhe, uYesu wanikela ngokusisigxina ngobomi bakhe njengomntu. Akuba evuselwe ebomini ezulwini, waba ngumoya odlisa ubomi. Ngaphezu koko, xa uYesu wanyukela kweyona ndawo ingcwele kwindalo iphela, wamanyana kwakhona noYise amthandayo waza wanikela Kuye ngokusemthethweni ixabiso lobomi bakhe obufezekileyo njengomntu. (Hebhere 9:23-28) Ixabiso lobo bomi buxabisekileyo lalinokwandula ke lisetyenziswe kubantu abathobelayo. Kuthetha ntoni oko kuwe?
INTLAWULELO KAKRISTU NAWE
17. Sinokukufumana njani ukuxolelwa ngokusekelwe kwidini lentlawulelo likaKristu?
17 Qwalasela iindlela ezintathu ongenelwa ngazo kwintlawulelo kaKristu kwanangoku. Okokuqala, ibangela ukuxolelwa kwezono. Ngokholo kwigazi likaYesu elaphalalayo, sifumana “inkululeko ngokuhlawulelwa,” ewe, “ukuxolelwa ke kweziphoso zethu.” (Efese 1:7) Ngoko kwanokuba senze isono esinzulu, sinokucela uThixo asixolele egameni likaYesu. Ukuba siyaguquka ngokwenene, uYehova usebenzisa kuthi ixabiso ledini lentlawulelo loNyana wakhe. UThixo uyasixolela, asisikelele ngesazela esicocekileyo, kunokuba aphumeze isigwebo sokufa esifanele sisifumane ngenxa yokona.—IZenzo 3:19; 1 Petros 3:21.
18. Idini likaYesu lisinika ithemba ngayiphi indlela?
18 Okwesibini, idini lentlawulelo likaKristu lilungiselela isiseko sethemba lethu ngekamva. Embonweni, umpostile uYohane wabona ukuba ‘isihlwele esikhulu, ekungekho namnye unako ukusibala’ sasiya kusinda kwintlekele ezayo yokuphela kwale nkqubo yezinto. Kutheni beya kusinda xa uThixo etshabalalisa abanye abaninzi kangako? Isithunywa sezulu saxelela uYohane ukuba isihlwele esikhulu ‘sasihlambe iingubo zaso ezinde, sazenza mhlophe egazini leMvana,’ uYesu Kristu. (ISityhilelo 7:9, 14) Logama nje sinokholo kwigazi elaphalalayo likaYesu Kristu yaye siphila ngokuvisisana noko kufunwa nguThixo, uThixo uya kusijonga njengabacocekileyo yaye siya kuba nethemba lobomi obungunaphakade.
19. Idini likaKristu lingqina njani ukuba yena noYise bayakuthanda?
19 Okwesithathu, idini lentlawulelo libobona bungqina bothando lukaYehova bubalaseleyo. Ukufa kukaKristu kwabonisa ezona zenzo zibalaseleyo zothando ezibini kwimbali yendalo iphela: (1) uthando lukaThixo ngokuthumela uNyana wakhe ukuba aze kusifela; (2) uthando lukaYesu lokuzinikela ngokuzithandela njengentlawulelo. (Yohane 15:13; Roma 5:8) Ukuba sinokholo ngokwenene, olu thando lusebenza kuye ngamnye wethu. Umpostile uPawulos wathi: ‘UNyana kaThixo wandithanda, wazinikela, ngenxa yam.’—Galati 2:20; Hebhere 2:9; 1 Yohane 4:9, 10.
20. Kutheni sifanele sibe nokholo kwidini likaYesu lentlawulelo?
20 Ngoko ke, masibonise umbulelo ngothando olwaboniswa nguThixo noKristu ngokuba nokholo kwidini lentlawulelo likaYesu. Ukwenjenjalo kukhokelela kubomi obungunaphakade. (Yohane 3:36) Kodwa, ukusindiswa kwethu akusiso esona sizathu sibalulekileyo sobomi nokufa kukaYesu apha emhlabeni. Eyona nto wayeyixhalabele yimbambano enkulu ngakumbi, eyendalo iphela. Njengoko siza kubona kwisahluko esilandelayo, loo mbambano isichaphazela sonke ngenxa yokuba ibonisa isizathu sokuba uThixo evumele ubungendawo nokubandezeleka kuqhubeke ixesha elide kangaka kweli hlabathi.
HLOLA ULWAZI LWAKHO
Kutheni kwafuneka ukuba uYesu afe ukuze kusindiswe uluntu?
Yahlawulwa njani intlawulelo?
Ungenelwa ngaziphi iindlela kwintlawulelo?
[Umfanekiso ozalise iphepha, kwiphepha 67]