Ukuzikhusela Ngokusemthethweni Iindaba Ezilungileyo

MINI umntu waqala ukwakha izixeko, kumhla waqhubeka esakh’ iindonga. Ingakumbi ke endulo phayaa, ezi nqaba zazenzelwe ukuzikhusela. Bengaphezu kolu thango, abalindi babedla ngokulwa kume ngabo besenzela into yokuba iintshaba zingakhe zilinge zizibethe zibe yingqushu ezo ndonga. Ezi ndonga ke zibe zingenzelwa ukukhusela abemi besixeko eso nje kuphela, kodwa bezikhusela nabo bahlala kwiidolophu eziselumelwaneni.—2 Samuweli 11:20-24; Isaya 25:12.

Kube njalo ke nangamaNgqina kaYehova, wona kuye kwafuneka akh’ udonga—udonga olungokwasemthethweni—ukuze azikhusele. Akalumisanga ke olu donga kuba efuna ukwahlula wona maNgqina kwibutho labantu ngokubanzi, kuba kaloku amaNgqina kaYehova la adume ngokuthanda abantu nokuba nobuhlobo. Kodwa, luye lwazibetha zaluqilima iziqinisekiso ezenziwe ngumthetho zokuba wonke umntu unelungelo lokufumana inkululeko. Kwangaxeshanye lukhusela ilungelo lamaNgqina elingokwasemthethweni ukuze anqule ngokukhululekileyo. (Thelekisa uMateyu 5:14-16.) Olu donga lukhusela indlela anqula ngayo nelungelo lawo lokushumayela iindaba ezilungileyo zoBukumkani bukaThixo. Luyintoni kanye olu donga ibe lwakhiwe njani?

Ukwakha Udonga Olungokwasemthethweni Ukuze Azikhusele

Nangona amaNgqina kaYehova enqula ngokukhululekileyo kumazwe amaninzi, kwamanye ke aye azizisulu zokuhlaselwa elengwa engenabhola. Bekuthi ke kusakuphazanyiswana nelungelo lawo lokunqula ngokuhlanganisana okanye ngokushumayela kwizindlu ngezindlu, agabe ukuya kuwuthi thaca umbandela lowo phambi komthetho. Kangangokuba angamawakawaka emhlabeni wonke amatyala angokwasemthethweni abandakanya amaNgqina.a Akawatolanga onke. Kodwa ke xa ebecinezelwa ngedolo ziinkundla ezingaphantsi, aye aqhubeka nokubhenela kwiinkundla eziphakamileyo. Iye yaya kuphuma phi ke yonke le nquleqhu?

Njengoko bekuqengqeleka amashumi eminyaka ale nkulungwane yama-20, uloyiso olungokwasemthethweni kumazwe amaninzi lwenze kwacaca ngamaNgqina kaYehova ukuba anako ukubhena xa ekwimeko efanayo. Kanye njengezitena okanye amatye okwakha udonga, ezi zigqibo zincumisayo zakha udonga olungokwasemthethweni lokuzikhusela. Ngaphezu kolu donga lungumzekelo, amaNgqina aye asong’ imikhono esilwela ukunqula ngokukhululekileyo.

Ngokomzekelo, khawucinge nje ngetyala ekuthiwa yiMurdock v. Commonwealth of Pennsylvania, elalichotshelwe Yeyona Nkundla Iphakamileyo yaseUnited States ngoMeyi 3, 1943. Kweli tyala imbambano yayiyile: Ngaba amaNgqina kaYehova afanele afumane iphepha-mvume lokuthengisa ukuze akwazi ukusasaza uncwadi lwawo lonqulo? AmaNgqina kaYehova alikhupha latsola elokuba akuyomfuneko ukuba wona enze loo nto. Umsebenzi wawo asinguwo—ibe ungasokuze—ube ngoworhwebo. Injongo yawo asikukungenisa imali, kodwa ashumayela iindaba ezilungileyo. (Mateyu 10:8; 2 Korinte 2:17) Kweli tyala libizwa ngokuba yiMurdock, iNkundla yema ngakumaNgqina, isithi nakuphi na ukufunwa kwerhafu yephepha-mvume njengento evula ithuba lokusasaza uncwadi lonqulo ayikho kumgaqo-siseko.b Esi sigqibo sahlahl’ indlela, ibe ukususela ngoko amaNgqina aye aphumelela ekusisebenziseni njengekhaka lawo kumatyala awahlukeneyo. Isigqibo esenziwa kweli tyala likaMurdock siye sabonakala njengesitena esomeleleyo solu donga lungokwasemthethweni lokuzikhusela.

Amatyala anjalo ke afeze lukhulu ekukhuseleni inkululeko yonqulo yabantu bonke. Kaloku iUniversity of Cincinnati Law Review yathi xa yayithetha ngegalelo amaNgqina abe nalo ekukhuseleni amalungelo abantu baseUnited States: “AmaNgqina kaYehova aye anegalelo elibonakalayo ekuphuhliseni imithetho yomgaqo-siseko, ingakumbi ekutwabululeni imida yokukhusela amalungelo okuthetha nonqulo.”

Olu Donga Lubethwa Lube Ngumankankela

Loyiso ngalunye olungokwasemthethweni, lomeleza olu donga. Khawucinge nje ngezigqibo ezimbalwa eziye kwiminyaka yee-1990 zanyenyis’ intambo kumaNgqina kaYehova, nakwabanye abathandi benkululeko gqobhogqi ehlabathini.

EGrisi. NgoMeyi 25, 1993, iNkundla Yamalungelo Abantu YaseYurophu yavumelana nelokuba ummi waseGrisi unelungelo lokufundisa abanye iinkolelo zakhe zonqulo. Kweli tyala kwakukho uMinos Kokkinakis, owayeneminyaka engama-84 ubudala ngelo xesha. Njengomnye wamaNgqina kaYehova, lo kaKokkinakis wayesele ebanjwe wagityiselwa entolongweni izihlandlo ezingaphezu kwama-60 ukususela ngowe-1938, evele izihlandlo ezili-18 phambi kweenkundla zamaGrike waza wachitha ngaphezu kweminyaka emithandathu eqamele ngenqindi. Eyona nto imandla ke eyambambisayo kukwaphula umthetho waseGrisi owawukho ngeminyaka yee-1930 owawungafuni mntu uguqula abanye—ikwangulo mthetho ke owabangela ukuba kujulwe emva kwezitshixo amaNgqina kaYehova amalunga nama-20 000 ukususela ngowe-1938 ukuza kuthi xhaxhe ngowe-1992. Le Nkundla yaseYurophu yathi urhulumente waseGrisi ulinyathele ngeenyaw’ ezinodaka ilungelo lonqulo likaKokkinakis ibe yamthi ngqi ngentlawulo exabisa ii-R42 500 ngelokusula olo daka. Yathi xa yayisenz’ isigqibo le Nkundla, eneneni amaNgqina kaYehova “alunqulo olwaziwayo.”—Bona IMboniselo kaSeptemba 1, 1993, iphepha 27-31.

EMexico. NgoJulayi 16, 1992, eMexico kwenziw’ into yabonakala kukhuselwa inkululeko yonqulo. Ngaloo mini ke kwawiswa uMthetho Ovumela Imibutho Yonqulo Nonqulo Lwasesidlangalaleni. Ngenxa yalo mthetho, naliphi na iqela lonqulo lalinokwamkeleka ngokusemthethweni kuphela ukuba liye nje latyikitya amaphepha athile asemthethweni. Phambili phayaa, amaNgqina kaYehova ayegqalwa njengasemthethweni njengezinye iinkonzo ngaphandle kwamaphepha asemthethweni. NgoAprili 13, 1993, amaNgqina acela ukubhalisa. Eyona nto imnandi ke yile yokuba, ngoMeyi 7, 1993, abhaliswa ngokusemthethweni njengeLa Torre del Vigía, A. R. neLos Testigos de Jehová en México, A. R., yomibini ke le yimibutho yonqulo.—Bona uVukani! (wesiNgesi) kaJulayi 22, 1994, iphepha 12-14.

EBrazil. NgoNovemba 1990, iNational Institute of Social Security (INSS) yaseBrazil yazisa iofisi yesebe yeWatch Tower Society ukuba abalungiseleli bokuzithandela abaseBheteli (indlela ezibizwa ngayo izakhiwo zamasebe amaNgqina kaYehova) abasayi kuphinda bajongwe njengabalungiseleli bonqulo yaye baza kuba phantsi kwemithetho yabasebenzi yaseBrazil. AmaNgqina abhena ngenxa yesi sigqibo. NgoJuni 7, 1996, iJudicial Advisory of the Office of the Attorney General yaseBrasília yakhupha isigqibo esibachaza abalungiseleli abaseBheteli njengamalungu omanyano lonqulo olusemthethweni, kungekhona abaqeshwa.

EJapan. NgoMatshi 8, 1996, Eyona Nkundla Iphakamileyo yaseJapan yawisa umthetho kumbandela wemfundo nenkululeko yonqulo—ukuze kungenelwe wonke umntu waseJapan. Le nkundla yalikhupha latsola elokuba iMunicipal Industrial Technical College yaseKobe yawunyol’ esweni umthetho ngokugxotha uKunihito Kobayashi, kuba nje esuke wala ukuba nenxaxheba ekufundeni ubuchule bokulwa. Lo ngumthetho wokuqala owakhutshwa Yeyona Nkundla Iphakamileyo nosekelwe kwinkululeko yonqulo ehambisana noMgaqo-siseko waseJapan. Lilandela isazela salo esiqeqeshwe ngeBhayibhile, eli Ngqina liselula lahla layiqonda into yokuba le ngqeqesho yayingahambisani nemigaqo yeBhayibhile efana naleyo ifumaneka kuIsaya 2:4, ethi: “Ziwakhande amakrele azo abe ngamakhuba, nezikhali zazo zibe zizitshetshe zeediliya; uhlanga lungaphakamiseli uhlanga ikrele, nezizwe zingaphindi zifunde ukulwa.” Esi sigqibo seNkundla sahlahlel’ indlela amatyala awayeza kulandela.—Bona IMboniselo, kaNovemba 1, 1996, iphepha 19-21.

NgoFebruwari 9, 1998, iNkundla Ephakamileyo yaseTokyo yakhupha esinye isigqibo esibalulekileyo isithi iNgqina elinguMisae Takeda linelungelo lomguli lokungavumi ukuthabatha unyango lwezamayeza olungavisisaniyo nomyalelo weBhayibhile ‘wokukhwebuka egazini.’ (IZenzo 15:28, 29) Eli tyala ke lisasiwe Kweyona Nkundla Iphakamileyo ibe ke kuseza kubonwa ukuba isigqibo seNkundla Iphakamileyo siya kusetyenziswa kusini na.

KwiiPhilippines. Kwisigqibo esakhutshwa ngoMatshi 1, 1993, Seyona Nkundla Iphakamileyo yakwiiPhilippines yakhupha umthetho othethelela amaNgqina kaYehova kwityala elalibandakanya ulutsha lwamaNgqina olwagxothwayo esikolweni kuba ngentlonelo lusuke alwavuma ukukhahlela indwe.

Mthetho ngamnye onyenyis’ intambo owiswa yinkundla ufana nokongezelela ilitye okanye isitena esilutsho olu donga lungokwasemthethweni lokukhusela amalungelo amaNgqina kaYehova nawabantu ngokubanzi lube ngumankankela.

Ukuhlanganisela Olu Donga

AmaNgqina kaYehova abhaliswe ngokusemthethweni kumazwe ali-153, enelungelo lokunandipha iinkululeko ezininzi, kanye njengezinye iinqulo ezaziwayo. Emva kwamashumi eminyaka etshutshiswa aza avalw’ umlomo eMpuma Yurophu nakumazwe ayesakuba yiSoviet Union, xa kungoku amaNgqina kaYehova agqalwe ngokusemthethweni kumazwe anjengaseAlbania, eBelarus, eCzech Republic, eGeorgia, eHungary, eKazakstan, eKyrgyzstan, eRomania naseSlovakia. Sekunjalo, kumazwe athile namhlanje, kuquka amanye amazwe aseNtshona Yurophu anenkqubo yomthetho ekudala ikho, amalungelo amaNgqina kaYehova asacelw’ umngeni okanye anyathelwe ngenyawo ngendlela ethande ukuqhawul’ ujingi. Abachasi bazama ngamandla ‘ukubumba ububi ngommiselo’ nxamnye namaNgqina. (INdumiso 94:20) Athini ke wona?c

AmaNgqina kaYehova afuna ukusebenzisana nabo bonke oorhulumente, kodwa ayakufuna nokuba nenkululeko esemthethweni yokunqula. Eyiseke ngokwenene kwelokuba nayiphi na imithetho okanye izigqibo zenkundla zokuwathintela ekuthobeleni imiyalelo kaThixo—kuquka umyalelo wokushumayela iindaba ezilungileyo—zifana nje nenja engenamazinyo. (Marko 13:10) Ukuba akwenzeki ukuba kufikelelwe kwizigqibo ezifanelekileyo, amaNgqina kaYehova ay’ equq’ emthethweni, abhene ngelokukhusela ngokusemthethweni ilungelo lawo alinikwe nguThixo lonqulo. AmaNgqina kaYehova anentembelo epheleleyo kweli dinga likaThixo: “Zonke izixhobo ezikhandelwa ukulwa nawe aziyi kuba nampumelelo.”—Isaya 54:17.

[Imibhalo esemazantsi]

[Ibhokisi ekwiphepha 21]

UKUTHETHELELA AMALUNGELO AMANGQINA KAYEHOVA

Ukutshutshiswa kwamaNgqina kaYehova kuye kwabangela ukuba arholelwe phambi kweejaji namagosa karhulumente emhlabeni wonke. (Luka 21:12, 13) AmaNgqina kaYehova akaziyekelanga ke ekukhuseleni ngokusemthethweni amalungelo awo. Uloyiso alufumene enkundleni kumazwe amaninzi luye lwanegalelo ekukhuseleni inkululeko esemthethweni yamaNgqina kaYehova, kwakunye namalungelo awo:

◻ okushumayela kwindlu ngendlu engaphazanyiswa yimiqathango ebekelwe oonozakuzaku bezorhwebo—Murdock v. Commonwealth of Pennsylvania, Eyona Nkundla Iphakamileyo YaseUnited States (1943); Kokkinakis v. Greece, INkundla YaseYurophu Yamalungelo Abantu (European Court of Human Rights [ECHR]) (1993).

◻ okuhlanganisana ngokukhululekileyo ukuze anqule—Manoussakis and Others v. Greece, ECHR (1996).

◻ okugqiba ngendlela anokuthi ngokuthembeka ayibonakalise ngayo imbeko kwindwe okanye umfuziselo welizwe—West Virginia State Board of Education v. Barnette, Eyona Nkundla Iphakamileyo YaseUnited States (1943); Eyona Nkundla Iphakamileyo YakwiiPhilippines (1993); Eyona Nkundla Iphakamileyo YaseIndiya (1986).

◻ okungavumi ukuya kwinkonzo yasemkhosini ephazamisana nesazela sawo sobuKristu—Georgiadis v. Greece, ECHR (1997).

◻ okukhetha unyango namayeza angaphazamisaniyo nezazela zawo—Malette v. Shulman, INkundla Yezibheno YaseOntario, eKhanada (1990); Watch Tower v. E.L.A., INkundla Ephakathi YaseSan Juan, ePuerto Rico (1995); Fosmire v. Nicoleau, INkundla Yezibheno YaseNew York, eUnited States (1990).

◻ okukhulisa abantwana bawo ngokuvisisana neenkolelo zawo ezisekelwe eBhayibhileni kwanaxa ezi nkolelo zicelw’ umngeni kumatyala abandakanya ilungelo lokugcina umntwana—St-Laurent v. Soucy, Eyona Nkundla Iphakamileyo YaseKhanada (1997); Hoffmann v. Austria, ECHR (1993).

◻ okuba nayo nokuqhuba imibutho engokwasemthethweni engabizwa rhafu kanye njengemibutho esetyenziswa zezinye iinkonzo ezaziwayo—People v. Haring, INkundla Yezibheno YaseNew York, eUnited States (1960).

◻ yokwenza abo bamiselwe kuhlobo oluthile lwenkonzo ekhethekileyo yexesha elizeleyo babonelelwe ngerhafu njengokuba kunjalo kwabezakwalizwi abasebenza ixesha elizeleyo abakwezinye iinkonzo—Brazil’s National Institute of Social Security, Brasília, (1996).

[Umfanekiso okwiphepha 20]

UMinos Kokkinakis nomfazi wakhe

[Umfanekiso okwiphepha 20]

UKunihito Kobayashi

[Inkcazelo Ngomfanekiso okwiphepha 19]

The Complete Encyclopedia of Illustration/J. G. Heck