Ekugqibeleni—okusesikweni Kubo Bonke

“Siya kuzama ukuphulaphula ngeendlela ezintsha . . . kwabo bonzakeleyo, kwabo baxhalabileyo, amazwi ebelangazelela ukuphulaphulwa. . . . Okuseleyo kukwenza oko kubhalwe emthethweni: ukuqiniseka ukuba ekugqibeleni njengokuba bonke bezalwa belingana phambi koThixo, bonke bazalwa belingana phambi komntu.”—Umongameli waseUnited States uRichard Milhous Nixon, wakuvakalisa oko kwintetho yokumiselwa kwakhe ngoJanuwari 20, 1969.

XA OOKUMKANI, abongameli neenkulumbuso beqalisa ukulawula, bathanda ukuthetha ngokusesikweni. URichard Nixon, owayesakuba ngumongameli waseUnited States, wayengahlukanga. Kodwa amazwi akhe obuciko aphelelwa sisidima xa ethelekiswa noko kubi kwenzekileyo embalini. Nangona wenza isibhambathiso ‘sokuphila ngomthetho,’ kamva uNixon wafunyanwa enetyala lokwaphula umthetho yaye kwanyanzeleka ukuba ashenxe esikhundleni sakhe. Kumashumi amathathu eminyaka kamva, ‘amazwi abo bonzakeleyo, baxhalabileyo nabangenathemba’ aqhubeka efuna ukuphulaphulwa.

Ukuphulaphula amazwi abanjalo nokusingatha izikhalazo zabo asingomsebenzi ulula, njengokuba iinkokeli ezinomnqweno omhle ziye zaphawula. ‘Okusesikweni kubo bonke’ kuye kwangqineka kulusukelo olungafikelelekiyo. Sekunjalo, kwiinkulungwane ezininzi ezadlulayo, kwenziwa isithembiso esifanele sinikele ingqalelo kuso—ithemba elimangalisayo ngokuphathelele okusesikweni.

Esebenzisa umprofeti uIsaya, uThixo uqinisekisa abantu Bakhe ukuba uya kuthumela “umkhonzi” aya kumnyula ngokwakhe. UYehova wabaxelela oku: “Ndibeke uMoya wam phezu kwakhe; uya kukuphumelelisa okusesikweni ezintlangeni.” (Isaya 42:1-3) Akakho umlawuli ongumntu obenokukwazi ukubhengeza amazwi anjalo ukuba namandla, lawo aya kuthetha okusesikweni okungayi kuphela kuzo zonke iintlanga. Ngaba eli dinga linokuthenjwa? Ngaba kunokuze kuphunyezwe into ebalasele ngolo hlobo?

Idinga Esinokulithemba

Ukuthenjwa kwesithembiso kuxhomekeke kulowo usenzayo. Kule meko, akakho omnye ngaphandle koThixo uSomandla ovakalisa ukuba “umkhonzi” wakhe uya kumisela okusesikweni ehlabathini lonke. Ngokungafaniyo nabezobupolitika, uYehova akazenzi zibe lula izithembiso zakhe. ‘Akunakwenzeka ukuba uThixo axoke,’ iBhayibhile iyasiqinisekisa. (Hebhere 6:18) “Njengoko ndicebe ngako,koma ngolo hlobo,” uThixo utsho eqinisekile.—Isaya 14:24.

Kwakhona ukuba nentembelo kwethu kweso sithembiso kuqiniswa yingxelo ‘yomkhonzi’ kaThixo okhethiweyo, uYesu Kristu. Lowo umisela okusesikweni umele athande okusesikweni aze aphile ngokuvisisana nako. UYesu washiya ingxelo engenabala njengendoda ‘eyathanda ubulungisa yaza yathiya ukuchas’ umthetho.’ (Hebhere 1:9) Awakuthethayo, indlela awayephila ngayo, kwanendlela awafa ngayo, zonke ezo zinto zangqina ukuba ngokwenene wayengumntu osesikweni. Ekufeni kukaYesu, igosa lomkhosi lamaRoma, ekubonakala ukuba lalinobungqina bokulingwa nokutshutshiswa kukaYesu lashukunyiselwa ukuba lithi: “Ngokwenene lo mntu ubelilungisa.”—Luka 23:47.

Ngaphandle kokuba lilungisa kwakhe, uYesu wakuxhathisa ukungabikho kokusesikweni okwakuxhaphakile ngemihla yakhe. Wakwenza oku, engakwenzi ngenxa yokuba efuna ukubhukuqa umbuso okanye efuna ukuvukela kodwa wakwenza oko ngokufundisa okusesikweni kubo bonke abo babephulaphula. INtshumayelo yakhe yaseNtabeni yeyona ngcaciso icacileyo yendlela okusesikweni nobulungisa ekumelwe kuqheliselwe ngayo.—Mateyu, isahluko 5-7.

UYesu wakuqhelisela oko wayekushumayela. Akazange abathiye abo ngelishwa babeneqhenqa, abo “babezinqambi” kwibutho lamaYuda. Kunoko, wathetha nabo, wabachukumisa, waza wabaphilisa. (Marko 1:40-42) Bonke abantu awadibana nabo, kuquka abangamahlwempu nabo bacinezelweyo, babebalulekile kuye. (Mateyu 9:36) Wathi kubo: “Yizani kum, nonke nina nixhamlekayo nenisindwa ngumthwalo, yaye ndiza kunihlaziya.”—Mateyu 11:28.

Ngaphezu kwako konke, uYesu wala ukuvumela ukungabikho kokusesikweni kumonakalise okanye kumqumbise. Akazange abuyise ububi ngobubi. (1 Petros 2:22, 23) Kwanaxa wayekwintlungu engcungcuthekisayo, wathandaza kuBawo wakhe osezulwini ethandazela amajoni awayembethelele. Wabongoza wathi: “Bawo, baxolele, kuba abakwazi oko bakwenzayo.” (Luka 23:34) Ngokuqinisekileyo, uYesu ‘wakwenza kwacaca okusesikweni ezintlangeni.’ (Mateyu 12:18) Bubuphi obunye ubungqina esinabo bomnqweno kaThixo wokumisela ihlabathi eligqibeleleyo ngaphezu komzekelo ophilayo woNyana wakhe?

Ukungabikho Kokusesikweni Kunokoyiswa

Bukho ubungqina bokuba ukungabikho kokusesikweni kunokoyiswa kwihlabathi lanamhlanje. Ngqina likaYehova ngalinye, nanjengentlangano lizabalazela ukulwa nekhethe, ukukheth’ ubuso, ubuhlanga nokuba nogonyamelo. Khawucinge ngalo mzekelo ulandelayo.

UPedroa wayekholelwa ukuba ukubhukuqa umbuso yayikuphela kwendlela yokuzisa okusesikweni kwiLizwana laseBasque, elikummandla waseSpeyin awayehlala kulo. Ukuze aphumeze oku waba lilungu leqela labagrogrisi elamqeqeshela umkhosi eFransi. Wathi akulugqiba olo qeqesho lwakhe, wayalelwa ukuba aseke iqela labagrogrisi elaliza kutshabalalisa iindawo ezihlala amapolisa. Amapolisa ambamba xa iqela lakhe lalisele lilungiselela iziqhushumbisi. Wachitha iinyanga ezili-18 entolongweni, kodwa naxa wayekwezimnyama izisele waqhubeka nomzabalazo wakhe wezobupolitika, eba nesabelo ekugwayimbeleni ukutya yaye ngesinye isihlandlo wazisika izihlahla zakhe ngokoqobo.

UPedro wayecinga ukuba wayelwela ukubakho kokusesikweni. Wandula wamazi uYehova neenjongo zakhe. Ngoxa uPedro wayekwezimnyama izisele, umfazi wakhe waqalisa ukufundisisa iBhayibhile namaNgqina kaYehova, yaye xa wakhululwayo, wammema ukuba abekho kwenye yeentlanganiso zabo. Wasinandipha eso sihlandlo kangangokuba wada wacela isifundo seBhayibhile, isifundo esambangela ukuba enze iinguqulelo ezinkulu kwindlela awayekhangeleka ngayo kwanakwindlela awayephila ngayo. Ekugqibeleni, ngowe-1989, uPedro nomfazi wakhe babhaptizwa.

UPedro uthi: “Ndiyambulela uYehova ngokuba ndingazange ndide ndibulale mntu kwiminyaka yam yokuba ngumgrogrisi. Ngoku ndisebenzisa ikrele lomoya kaThixo, iBhayibhile, ukuba ndidlulisele ebantwini isigidimi soxolo lokwenyaniso nokusesikweni—iindaba ezilungileyo zoBukumkani bukaThixo.” Kutshanje uPedro ngoku okhonza njengomdala kwibandla lamaNgqina kaYehova, uye watyelela ezi ndawo zamapolisa wayefuna ukuzitshabalalisa. Ngeli xesha etyelele ngenjongo yokushumayela ngesigidimi soxolo kwiintsapho ezihlala apho.

AmaNgqina kaYehova enza ezi nguqulelo ngenxa yokuba alangazelela ihlabathi elinobulungisa. (2 Petros 3:13) Nangona enentembelo epheleleyo yokuba oko uThixo akuthembisileyo uya kukwenza, ayaqonda ukuba ikwayimbopheleleko yawo ukuphila ngokuvisisana nokusesikweni. IBhayibhile isicacisela ngokuthe ngqo ukuba uThixo ulindele ukuba senze inxalenye yethu.

Ukutyala Imbewu Yobulungisa

Liyinyaniso elokuba, xa sijamelene nokungabikho kokusesikweni, sisenokuziva sithambekele ekukhalazeni sithi: “Uphi na uThixo wokugweba [wokusesikweni, NW]?” Eso yayisisikhalo samaYuda omhla kaMalaki. (Malaki 2:17) Ngaba uThixo wacinga ukuba kwakubalulekile oko ayekukhalazela? Ngokwahlukileyo koko, samenza waziva ‘ediniwe’ ngenxa yokuba, phakathi kwezinye izinto, ayenginizela abafazi bawo ababekhulile, eqhawula imitshato nabo ngezizathu ezingavakaliyo. UYehova wavakalisa inkxalabo yakhe ‘ngabafazi bobutsha babo, ababebanginizela; nakuba babengamadlelane abo, bengabafazi beminqophiso yabo.’—Malaki 2:14.

Ngaba singakwazi ukukhalazela ukungabikho kokusesikweni ukuba nathi senza izinto ngokungekho sesikweni? Kwelinye icala, ukuba sizama ukuxelisa uYesu ngokususa ikhethe nobuhlanga ezintliziyweni zethu, ngokungabi nakhethe size sibe nothando kubo bonke nangokuba singabuyiseli ububi ngobubi, sibonisa ukuba sikuthanda ngokwenene okusesikweni.

Ukuba sifuna ukuvuna okusesikweni, iBhayibhile isibongoza ukuba ‘sihlwayele ukuze kuvele ubulungisa.’ (Hoseya 10:12) Enoba lusenokubonakala luluncinane kangakanani na, lonke uloyiso lomntu ekulweni ukungabikho kokusesikweni lubalulekile. Kunjengokuba uMartin Luther King, Omnci. wabhala kwiLetter From Birmingham Jail, esithi “ukungabikho kokusesikweni kuyakusongela okusesikweni kuyo yonke indawo.” Abo ‘bafuna ubulungisa’ ngabantu abakhethwa nguThixo ukuze bakwazi ukuzuza ilifa kwihlabathi lakhe elitsha elinobulungisa elikufuphi.—Zefaniya 2:3.

Asinako ukusekela ithemba lethu lokusesikweni kumathemba abantu axengaxengayo, sekunjalo sinokulithemba ilizwi loMdali wethu onothando. Kungenxa yeso sizathu awathi uYesu wayalela abalandeli bakhe ukuba baqhubeke bethandazela uBukumkani bukaThixo ukuba bufike. (Mateyu 6:9, 10) UYesu, onguKumkani omiselweyo wobo Bukumkani, “uya kulihlangula ihlwempu elizibikayo, nabaziintsizana abangenaluncedo; abenzele inceba abasweleyo nabangamahlwempu; asindise imiphefumlo yamahlwempu.”—INdumiso 72:12, 13.

Licacile elokuba, ukungabikho kokusesikweni akuyi kuhlala ngonaphakade. Ulawulo lukaKristu emhlabeni wonke luya koyisa ukungabikho kokusesikweni ngonaphakade, njengokuba uThixo esiqinisekisa ngomprofeti wakhe uYeremiya: “Kuza ixesha endiya kusizalisekisa isithembiso endasenzayo . . . Ngelo xesha ndiya kukhetha ikumkani enobulungisa evela kumnombo kaDavide. Loo kumkani iya kwenza okulungileyo nokusesikweni kuwo wonke umhlaba.”—Yeremiya 33:14, 15, Today’s English Version.

[Imibhalo esemazantsi]