Ngaba Indaleko Iyavisisana NeBhayibhile?

NGABA uThixo wadala abantu bephuma kwizilwanyana? Ngaba uThixo wenza ukuba intsholongwane ibe yintlanzi kuze kuvele izilwanyana ezirhubuluzayo nezanyisayo, ekugqibeleni inkawu yavelisa abantu? Zimbi izazinzulu neenkokeli zakwalizwi zikholelwa kwindaleko naseBhayibhileni. Zithi incwadi yeBhayibhile yeGenesis iyafuzisela. Mhlawumbi ukhe wazibuza ukuba, ‘Ngaba imfundiso yokuba abantu bavela kwizilwanyana iyavisisana neBhayibhile?’

Ukwazi imvelaphi yethu kubalulekile ukuze sizazi ukuba singobani, sisingise phi sazi nendlela esimele siphile ngayo. Xa sisazi imvelaphi yabantu sinokusazi isizathu sokuba uThixo avumele ukubandezeleka nenjongo yakhe ngekamva loluntu. Asinakukwazi ukuba nolwalamano oluhle noThixo ukuba asiqinisekanga ukuba unguMdali wethu. Makhe sihlolisise oko iBhayibhile ikutshoyo ngemvelaphi yomntu, imeko yakhe ngoku nekamva lakhe. Emva koko siyakubona enokuba indaleko iyavisisana kusini na neLizwi likaThixo.

Xa Kwakukho Umntu Omnye

Abo bakholelwa kwindaleko ngokuqhelekileyo bathi izilwanyana zijika ngokuthe ngcembe zibe ngabantu beyikhanyela into yokuba kwakukhe kwakho umntu omnye. Noko ke, iBhayibhile itheth’ eny’ into. Ingxelo yeBhayibhile ithi uAdam wayengumntu wokwenene. Isixelela igama lomfazi wakhe namagama abanye babantwana bakhe. Isichazela ngokweenkcukacha ngoko wakwenzayo, izinto azithethayo, indawo awayehlala kuyo nexesha awafa ngalo. UYesu akazange acinge ukuba lo ngxelo libali nje elenzelwe abantu abangafundanga. Xa wayethetha neenkokeli zonqulo ezazifunde zayityekeza, wathi: “Anizange nifunde na ukuba lowo wabadalayo ukususela ekuqaleni wabenza baba yindoda nebhinqa?” (Mateyu 19:3-5) UYesu wacaphula amazwi athetha ngoAdam noEva akwiGenesis 2:24.

ULuka, owayengumbhali-mbali nowayekwangumbhali weBhayibhile uthi uAdam wayengumntu wokwenene njengoYesu. ULuka wawulanda umlibo kaYesu waya kutsho kumntu wokuqala uAdam. (Luka 3:23-38) Kwakhona xa uPawulos wayethetha phambi kwesihlwele phakathi kwaso ekwakukho iintanda-bulumko ezazifunde kwizikolo ezaziwayo zamaGrike, wathi: “UThixo owenza ihlabathi nazo zonke izinto ezikulo . . . wazenza ngokuphuma kumntu omnye zonke iintlanga zabantu, ukuba zihlale phezu komhlaba uphela.” (IZenzo 17:24-26) Ngokucacileyo iBhayibhile isifundisa ukuba siphuma “kumntu omnye.” Ngaba oko kuthethwa yiBhayibhile ngemvelaphi yomntu kuyavisisana nendaleko?

Ukuphulukana Komntu Nemfezeko

IBhayibhile ithi umntu wokuqala owadalwa nguYehova wayefezekile. Akunakwenzeka uThixo enze into engafezekanga. Ingxelo yendalo ithi: “UThixo wamdala umntu ngokomfanekiso wakhe . . . Emva koko uThixo wazibona zonke izinto awayezenzile, khangela! zilunge gqitha.” (Genesis 1:27, 31) Unjani umntu ofezekileyo?

Umntu ofezekileyo unenkululeko yokuzikhethela yaye uyakwazi ukuxelisa iimpawu zikaThixo ngokupheleleyo. IBhayibhile ithi: “UThixo oyinyaniso walwenza uluntu lwathi tye, kodwa lusuke lona lwafuna amacebo amaninzi.” (INtshumayeli 7:29) UAdam wakhetha ukumvukela uThixo. Ngenxa yoko uAdam waphulukana nemfezeko kuquka nenzala yakhe. Ukuphulukana komntu nemfezeko kuyasinceda siqonde isizathu sokuba maxa wambi sisenza izinto esizisolayo ngazo, nangona sifuna ukwenza okulungileyo. Umpostile uPawulos wabhala wathi: “Kuba oko ndikunqwenelayo, andikuqheliseli; kodwa oko ndikuthiyileyo koko ndikwenzayo.”—Roma 7:15.

IBhayibhile ithi umntu ofezekileyo wayeza kuphila ngonaphakade engabikwa hlaba. Oko sikuphawula koko uThixo akuxelela uAdam esithi, ukuba umntu wokuqala wayengonanga ngewayengazange afe. (Genesis 2:16, 17; 3:22, 23) UYehova wayengenakuze athi umntu ‘ulunge gqitha’ emva kokuba emdalile ukuba umntu wayeza kugula okanye avukele. Ukuphulukana komntu nemfezeko kusibonisa isizathu sokuba umzimba womntu nakuba wenziwe ngokumangalisayo uneziphene nezifo. Ngalo ndlela indaleko ayivisisani neBhayibhile ngenxa yokuba ifundisa ukuba umntu uqala abe sisilwanyana aze ekugqibeleni abe ngumntu, ngoxa yona iBhayibhile isithi umntu uvela kumntu ofezekileyo.

Ingcamango yokuba uThixo wasebenzisa indaleko ukuze adale umntu inxamnye noko kuthethwa yiBhayibhile ngobuntu bukaThixo. Ukuba uThixo wasebenzisa indaleko ukudala abantu, oko kuthetha ukuba nguye unobangela wezifo nale meko imaxongo siphila kuyo. Noko ke, iBhayibhile ithi ngoThixo: “NguLiwa, ugqibelele umsebenzi wakhe, ngokuba zonke iindlela zakhe zisesikweni. NguThixo wentembeko, tu ubugqwetha; lilungisa yaye uthe tye yena. Bona bazonakalisile ngokwabo; abangobantwana bakhe, bazizisele isiphako ngokwabo. Basisizukulwana esigwenxa nesijijekileyo!” (Duteronomi 32:4, 5.) Noko ke, uThixo akanguye unobangela wobu bugxwayiba siphila kubo. Ngokuvukela uThixo umntu wokuqala waphulukana nemfezeko kuquka nenzala yakhe. Ekubeni sele sithethile ngoAdam, makhe siphethulele ingqalelo yethu kuYesu. Ngaba indaleko iyavisisana noko kuthethwa yiBhayibhile ngoYesu?

Ngaba Ungakholelwa Kwindaleko NakubuKristu?

“UKristu wafela izono zethu.” Kusenokwenzeka uyazi, ukuba le yenye yeemfundiso ezisisiseko zobuKristu. (1 Korinte 15:3; 1 Petros 3:18) Ukuze sibone indlela indaleko engavisisani ngayo nale mfundiso, okokuqala kufuneka sazi isizathu sokuba iBhayibhile isithi singaboni nokuba senza ntoni isono kuthi.

Sonke singaboni kuba asinakuze sikwazi ukuzixelisa ngokugqibileleyo iimpawu zikaThixo ezinjengothando nokusesikweni. Ngoko ke, ithi iBhayibhile: “Kuba bonke bonile baza basilela kuzuko lukaThixo.” (Roma 3:23) IBhayibhile ifundisa ukuba isono ngunobangela wokufa. Eyoku-1 kwabaseKorinte 15:56 ithi: “Ulwamvila oluvelisa ukufa sisono.” Isono esisizuze njengelifa sikwangunobangela wokugula. UYesu wabonisa ukuba ukugula kwethu kunxulumene nesono. Wathi, kofe umzimba “izono zakho zixolelwe” yaza yaphiliswa loo ndoda.—Mateyu 9:2-7.

Kusinceda njani ukufa kukaYesu? IBhayibhile ithelekisa uAdam noYesu Kristu ize ithi: “Kuba kanye njengoko kuAdam bonke besifa, ngokunjalo nakuKristu bonke baya kwenziwa baphile.” (1 Korinte 15:22) Xa wayenikela ngobomi bakhe, uYesu wayehlawulela isono esasizuza njengelifa kuAdam. Ngenxa yoko, bonke abo babonisa ukholo kuYesu baze bamthobele baza kufumana oko uAdam waphulukana nako—ithemba lobomi obungunaphakade.—Yohane 3:16; Roma 6:23.

Ngaba uyayibona into yokokuba indaleko ayivisisani nobuKristu? Ukuba siyayithandabuza into yokuba ‘kuAdam bonke bayafa,’ sinokuthemba njani ukuba “kuKristu bonke baya kwenziwa baphile”?

Kutheni Abantu Betsaleleka Kwindaleko

IBhayibhile ibonisa indlela ezithandwa ngayo iimfundiso ezinjengendaleko. Ithi: “Kuba kuya kubakho ixesha laxa bengayi kuyinyamezela imfundiso ephilileyo, kodwa basuke ngokweminqweno yabo baziqwebele abafundisi bokubanyumbaza iindlebe; baya kuyifulathela inyaniso, baphambukele kumabali obuxoki.” (2 Timoti 4:3, 4) Nangona xa kuthethwa ngendaleko kudla ngokusetyenziswa ulwimi lwenzululwazi, inyaniso kukuba iyimfundiso yonqulo. Ifundisa isimo sengqondo abamele babenaso abantu ngobomi nendlela abamele bamjonge ngayo uThixo. Abantu abaninzi abakholelwa kwindaleko bathi bakwakholelwa nakuThixo. Noko ke, xa becinga ngoThixo bavakalelwa kukuba akazange azidale izinto, akangeneleli kwimicimbi yabantu yaye akayi kubagweba abantu. Yimfundiso enyumbaz’ iindlebe zabantu.

Abatyali bale ngcamango abadli ngokuphenjelelwa zizibakala, kunoko baqhutywa “yiminqweno yabo”—mhlawumbi ukufuna nje ukwamkeleka kwizazinzulu ezikholelwa kwindaleko. UMichael Behe ongunjingalwazi wamachiza, ochithe inxalenye enkulu yobomi bakhe efunda ngendlela ezisebenza ngokuntsonkothe ngayo iiseli, wathi abo bafundisa ngendaleko yeeseli izinto abazifundisayo azinasihlahla. Ngaba indaleko inokwenzeka nakwiiseli? Wabhala wathi: “Indaleko yeeseli ayisekelwanga kwigunya lenzululwazi. Kwiincwadi zenzululwazi ayikho echaza indlela iseli eyabakho ngayo ngendaleko ingachazi nesiganeko okwenzeka ngayo oko okanye kwanendlela ekumele ukuba kwenzeka ngayo. . . . Imfundiso kaDarwin yendaleko yeeseli ngunozala wokuba nekratshi.

Ukuba iinkcuba-buchopho zendaleko zishumayel’ into engenasihlahla kutheni zinenzondelelo? UBehe uphendula esithi: “Uninzi lwabantu nkqu nezazinzulu ezihlonelwayo, azifuni nokuyiv’ into yokuba kukho umntu onamandla angaphezu kwawendalo.”

Imfundiso yendaleko ithandwa ngabefundisi abaninzi abafuna ukubonakala beziinkcuba buchopho. Bafana nqwa nabo athetha ngabo umpostile uPawulos kwincwadi eyayisiya kumaKristu aseRoma. UPawulos wabhala wathi: “Oko kunokwaziwa ngoThixo kuyabonakala phakathi kwabo . . . Kuba iimpawu zakhe ezingabonakaliyo zibonwa ngokucacileyo ukususela ekudalweni kwehlabathi kuse phambili, ngenxa yokuba ziqondeka ngezinto ezenziweyo, kwanamandla angunaphakade nobuThixo bakhe, khon’ ukuze bangabi nakungxengxezeleka; ngenxa yokuba, nangona babemazi uThixo, abakhange bamzukise njengoThixo bengakhange futhi bambulele, kodwa basuka baba ziziphukuphuku kwiingcinga zabo, neentliziyo zabo ezingenakuqiqa zenziwa mnyama. Nangona babemi ngelithi bazizilumko, baba zizidenge.” (Roma 1:19-22) Ungakuphepha njani ukukhohliswa ngabefundisi bobuxoki?

Ubungqina Obusekelwe Ekukholelweni KuMdali

IBhayibhile ibalaselisa ukubaluleka kobungqina xa ithetha ngokholo. Ithi: “Ukholo lululindelo oluqinisekisiweyo lwezinto ezithenjiweyo, ubungqina obucacileyo bezinto zokwenene nangona zingabonwa.” (Hebhere 11:1) Ukholo lokwenene kuThixo lufanele lusekelwe kubungqina obubonisa ukuba ukho ngokwenene uMdali. IBhayibhile iyachaza apho unokubufumana khona obo bungqina.

Umbhali weBhayibhile ophefumlelweyo uDavide wabhala wathi: “Ndiya kukubonga ngenxa yokuba ngendlela eyoyikekayo ndenziwe ngokumangalisayo.” (INdumiso 139:14) Ukuzinika ixesha lokucamngca ngendlela eyilwe ngayo imizimba yethu nezinye izinto eziphilayo kusishiya sibamb’ ongezantsi bubulumko boMenzi wethu. Amawaka eenkqubo zokusebenza komzimba ziyasebenzisana ukuze siqhubeke siphila. Kwakhona, indalo ilungelelaniswe kakuhle. UDavide wabhala: “Amazulu avakalisa uzuko lukaThixo; yaye isibhakabhaka sixela umsebenzi wezandla zakhe.”—INdumiso 19:1.

IBhayibhile inentaphane yobungqina bokuba uMdali ukho. Ukuzipha ixesha lokuhlolisisa ukuvisisana kweencwadi zayo ezingama-66, imilinganiselo yayo yokuziphatha ephakamileyo nokuzaliseka kweziprofeto zayo bubungqina bokuba umbhali wayo nguMdali. Ukuqonda iimfundiso zeBhayibhile kuya kukunceda uyithembe, njengeLizwi loMdali. Ngokomzekelo, xa uqonda iimfundiso zeBhayibhile ezinjengonobangela wokubandezeleka, uBukumkani bukaThixo, ikamva loluntu, indlela yokufumana ulonwabo lokwenene uya kuzibonela ukuba uThixo usisilumko. Mhlawumbi uya kuvakalelwa ngendlela uPawulos avakalelwa ngayo xa wabhala wathi: “Hayi ubunzulu bobutyebi nobobulumko nobolwazi lukaThixo! Hayi indlela engaphengululeki ngayo imigwebo yakhe nendlela ezingalandeki ngayo iindlela zakhe!”—Roma 11:33.

Njengoko uhlolisisa obo bungqina nokholo lwakho lukhula, uya kweyiseka ukuba xa ufunda iBhayibhile, uphulaphula uMdali ngokwakhe. Uthi: “Ndim owenza umhlaba, ndadala nomntu okuwo. Ngezandla zam ndawaneka amazulu, ndawuyalela wonke nomkhosi wawo.” (Isaya 45:12) Ngokuqinisekileyo akusayi kuze uzisole ngokuzibonela ubungqina bokuba uYehova unguMdali wezinto zonke.

[Amagama acatshulweyo akwiphepha 14]

Umpostile uPawulos waxelela izifundiswa zamaGrike oku: “UThixo . . . wazenza ngokuphuma kumntu omnye zonke iintlanga zabantu”

[Amagama acatshulweyo akwiphepha 15]

Indaleko ifundisa ukuba umntu uqala abe sisilwanyana aze ekugqibeleni abe ngumntu, ngoxa yona iBhayibhile isithi umntu uvela kumntu ofezekileyo

[Amagama acatshulweyo akwiphepha 16]

“Indaleko yeeseli ayisekelwanga kwigunya lenzululwazi”

[Amagama acatshulweyo akwiphepha 17]

Izinto ezingummangaliso eziphilayo zisenza sibuxabise ubulumko boMenzi wethu