Ukuzithethelela—UYehova Ukugqala Njani?

INDODA yathi, “umfazi owandinikayo ukuba abe nam, nguye ondinikileyo isiqhamo somthi ndaza ndadla.” Umfazi waphendula wathi, “inyoka—indikhohlisile ndaza ndadla.” Xa abazali bethu bokuqala uAdam noEva bathetha loo mazwi kuThixo, oko kwaba sisiqalo sokuzithethelela kwabantu.—Gen. 3:12, 13.

Indlela uYehova awabagweba ngayo uAdam noEva ngenxa yokungathobeli kwabo ngabom ibonisa ngokucacileyo ukuba akazange akwamkele ukuzithethelela kwabo. (Gen. 3:16-19) Ngoko, ngaba sifanele sigqibe kwelokuba uYehova akakwamkeli konke ukuzithethelela? Okanye ngaba ngamanye amaxesha uye abone ukuba izizathu zethu ziyavakala? Ukuba kunjalo, sinokuwubona njani umahluko phakathi kwezizathu ezivakalayo nezingavakaliyo? Ukuze siphendule le mibuzo, masiqale siqonde indlela ekuchazwa ngayo ukuzithethelela.

Ukuzithethelela kukuchaza izizathu zokuba wenze okuthile okanye ungakwenzi. Usenokuchaza izizathu ezivakalayo ucele noxolo ngokunyanisekileyo ukuze wenzelwe inceba okanye uxolelwe. Kodwa, njengoko kwakunjalo ngoAdam noEva, umntu usenokuzithethelela achaze isizathu esingesiso. Kuba abantu bedla ngokuzithethelela ngale ndlela, umntu ozithethelelayo udla ngokukrokreleka.

Xa sizithethelela—ingakumbi ngokuphathelele inkonzo yethu kuThixo—sifanele siphephe ‘ukuzikhohlisa ngokuqiqa okuphosakeleyo.’ (Yak. 1:22) Ngoku makhe sihlolisise imizekelo eseBhayibhileni nemigaqo eya kusinceda ‘siqhubeke siqinisekisa ngoko kwamkelekileyo eNkosini.’—Efe. 5:10.

Oko UThixo Alindele Ukuba Sikwenze

ELizwini likaThixo kukho imiyalelo engqalileyo uYehova alindele ukuba abantu bayithobele. Ngokomzekelo, abanquli bokwenyaniso bakaKristu kulindeleke ukuba bawuthobele umyalelo kaKristu othi “hambani . . . niye kubenza abafundi abantu beentlanga zonke.” (Mat. 28:19, 20) Eneneni, kubalulekile ukuthobela lo myalelo kangangokuba umpostile uPawulos wathi: “Yeha ke mna ukuba andizivakalisanga iindaba ezilungileyo!”—1 Kor. 9:16.

Sekunjalo, abantu abathile ekusele kulithuba sifunda nabo iBhayibhile baba madolw’ anzima ukushumayela iindaba ezilungileyo zoBukumkani bukaThixo. (Mat. 24:14) Abanye ababekhe bawenza umsebenzi wokushumayela baye bayeka. Ziziphi izizathu eziye zibekwe ngabo bangawenziyo umsebenzi wokushumayela? Yintoni eyenziwa nguYehova kwabo babemathidala ukuthobela imiyalelo yakhe?

Ukuzithethelela Okungamkelekanga KuThixo

“Unzima gqitha lo msebenzi.” Abo baneentloni ngokwemvelo basenokubona umsebenzi wokushumayela njengonzima gqitha. Noko ke, cinga ngoko sinokukufunda kumzekelo kaYona. Wanikwa isabelo awasifumanisa sinzima gqitha—uYehova wamthuma ukuba aye kulumkisa abantu baseNineve ngentshabalalo awayeza kuyizisa. Siyaqondakala isizathu sokuba uYona asifumanise sinzima eso sabelo. INineve yayilikomkhulu laseAsiriya, yaye ama-Asiriya ayedume ngenkohlakalo. Kusenokwenzeka ukuba uYona wayezibuza: ‘Baza kundiphatha njani aba bantu? Baza kundenza ntoni?’ Wagqiba ekubeni abaleke. Sekunjalo, uYehova akazange akwamkele ukuzithethelela kukaYona. Kunoko, uYehova waphinda wamthumela ukuba aye kushumayela eNineve. Kwesi sihlandlo, uYona wasiphumeza ngenkalipho isabelo sakhe yaye uYehova wamsikelela.—Yona 1:1-3; 3:3, 4, 10.

Ukuba ucinga ukuba umsebenzi wokushumayela iindaba ezilungileyo unzima kakhulu, khumbula ukuba “zonke izinto zinokwenzeka kuThixo.” (Marko 10:27) Unokuqiniseka ukuba uYehova uya kukomeleza xa uqhubeka umcela yaye uya kukusikelela akwenze ube nesibindi sokushumayela.—Luka 11:9-13.

“Andinamdla wokuwenza.” Kuthekani ukuba akunamdla kubulungiseleli bamaKristu? Khumbula ukuba uYehova unokusebenza kuwe ngaphakathi aze akwenze unqwenele ukwenza lo msebenzi. UPawulos wathi: “UThixo nguye osebenzayo kuni ngaphakathi, aninike amandla okunqwenela nawokwenza, ngokokuthanda kwakhe.” (Fil. 2:13) Ngenxa yoko, unokucela uYehova akuncede wenze ukuthanda kwakhe. UKumkani uDavide wakwenza oko. Wabongoza uYehova wathi: “Ndihambise enyanisweni yakho.” (INdu. 25:4, 5) Nawe unokwenza okufanayo ngokuthandaza kuYehova ngokunyanisekileyo ukuba akuncede wenze izinto ezimkholisayo.

Kuyinyaniso ukuba, xa sidiniwe okanye sidimazekile, maxa wambi siye sizinyanzele ukuya kwiintlanganiso kwiHolo yoBukumkani okanye entsimini. Xa kunjalo, ngaba simele sivakalelwe kukuba asimthandi ngokwenene uYehova? Akunjalo. Abakhonzi bakaThixo abathembekileyo bamandulo kwafuneka bazame ngamandla ukwenza ukuthanda kukaThixo. Ngokomzekelo, uPawulos wathi kwakufuneka ‘awuqobe umzimba wakhe’ ukuze athobele imiyalelo kaThixo. (1 Kor. 9:26, 27) Ngoko kwanokuba kufuneka sizinyanzele ukuya entsimini, sinokuqiniseka ukuba uYehova uya kusisikelela. Ngoba? Kuba isizathu sokuba sizinyanzele ukwenza ukuthanda kukaThixo siyavakala—kungenxa yokuba siyamthanda uYehova. Ngokwenjenjalo, siphikisa ibango elenziwa nguSathana lokuba abakhonzi bakaThixo baya kumkhanyela xa bevavanywa.—Yobhi 2:4.

“Ndixakeke gqitha.” Ukuba akuyi kubulungiseleli kuba usithi uxakeke gqitha, kufuneka uphinde uhlolisise ukuba ziziphi ezona zinto zibalulekileyo kuwe. UYesu wathi: “Qhubekani, ke ngoko, nifuna kuqala ubukumkani.” (Mat. 6:33) Ukuze uthobele lo mgaqo, kusenokufuneka uphile ubomi obulula uze uchithe elinye lexesha lakho lokuzonwabisa kubulungiseleli. Kakade ke, kuyafuneka ukuba sizihlaziye senze nezinye izinto zobuqu, kodwa azimele zithabathe ixesha lentsimi. Umkhonzi kaThixo ubeka kuqala izilangazelelo zoBukumkani.

“Andinabuchule bokuwenza.” Usenokuvakalelwa kukuba akukufanelekeli ukuba ngumlungiseleli weendaba ezilungileyo. Abanye abakhonzi bakaYehova bamaxesha okubhalwa kweBhayibhile babevakalelwa kukuba abanakukwazi ukwenza umsebenzi uYehova awayebanike wona. Cinga nje ngoMoses. Xa wathunywa nguYehova, uMoses wathi: “Ndiyangxengxeza, Yehova, kuba umkhonzi wakho lo akazange waba liciko, ukususela ekuthetheni kwakho nam, nangezolo, nangaphambi koko, kuba ndiyacotha ngomlomo, ndikwacotha nangolwimi.” Nangona uYehova wamqinisekisayo, uMoses waphendula: “Ndiyangxengxeza, Yehova, nceda uthumele ngesandla salowo uya kumthumela.” (Eks. 4:10-13) Yintoni eyenziwa nguYehova?

UYehova akazange asihluthe eso sabelo kuMoses. Kunoko, wamisela uAron ukuba ancedise uMoses. (Eks. 4:14-17) Ngaphezulu, kwiminyaka elandelayo uYehova wamxhasa uMoses ngandlela zonke ukuze akwazi ukuphumeza izabelo awayemnike zona. Nanamhlanje, unokuqiniseka ukuba uYehova uya kusebenzisa amanye amaKristu ukuba akuncede uphumeze ubulungiseleli bakho. Ngapha koko, iLizwi likaThixo lisiqinisekisa ukuba uYehova uya kusenza sikufanelekele ukwenza umsebenzi asithume wona.—2 Kor. 3:5; funda ibhokisi ethi ‘Ndandonwabe Gqitha Ngaloo Minyaka.’

“Kukho umntu owandikhubekisayo.” Abanye bayayeka ukuya entsimini okanye kwiintlanganiso zebandla ngenxa yokukhubeka, becinga ukuba uYehova ngokuqinisekileyo uyasiqonda isizathu. Nangona sikuqonda ukuba kubuhlungu ukukhutyekiswa, kodwa ngaba eso sisizathu sokuyeka imisebenzi yobuKristu? Kusenokwenzeka ukuba uPawulos noBharnabhas babekhubekile emva kokuxambulisana okwakhokelela ekubeni ‘badubuleke kabukhali ngomsindo.’ (IZe. 15:39) Kodwa ngaba bayeka ukushumayela ngenxa yaloo nto? Akunjalo konke konke!

Ngokufanayo, xa umzalwana wakho ongumKristu ekukhubekisile, khumbula ukuba utshaba lwakho asingomzalwana wakho, kodwa nguSathana yaye ufuna ukukuqwenga. UMtyholi akayi kuphumelela ukuba ‘uma ngokunxamnye naye, uqinile elukholweni.’ (1 Pet. 5:8, 9; Gal. 5:15) Xa unokholo olunjalo, ‘akuyi kudaniswa.’—Roma 9:33.

Xa Usikelw’ Umda

Le mizekelo imbalwa yabantu abazithethelelayo esiye sayixubusha, ibonisa ukuba azikho izingxengxezo ezisekelwe eZibhalweni ezinokubangela ukuba singayithobeli imiyalelo kaYehova, equka umyalelo wokushumayela iindaba ezilungileyo. Kodwa sisenokuba nazo izizathu ezivakalayo zokungakwazi ukuphumeza kakuhle ubulungiseleli bethu. Ezinye iimbopheleleko ezingokweZibhalo zisenokusenza singakwazi ukuchitha ixesha elingakumbi kumsebenzi wokushumayela. Kwakhona, maxa wambi sisenokudinwa kakhulu okanye sigule kakhulu size singakwazi ukuphumeza inkonzo yethu kuYehova ngendlela ebesingathanda ngayo. Noko ke, iLizwi likaThixo lisiqinisekisa ukuba uYehova uyayazi iminqweno yethu yaye uyabona xa sisikelw’ umda.—INdu. 103:14; 2 Kor. 8:12.

Ngoko ke, kufuneka silumke singabi ngqongqo kuthi nakwabanye ngokuphathelele oku. Umpostile uPawulos wathi: “Ungubani na wena ukuba ugwebe isicaka sendlu somnye? Ukuma okanye ukuwa kwaso kusenkosini yaso.” (Roma 14:4) Kunokuba sizithelekise nabanye, sifanele sikhumbule ukuba “ngamnye wethu uya kuziphendulela kuThixo.” (Roma 14:12; Gal. 6:4, 5) Xa sithandaza kuYehova sizingxengxezela kuye, sifanele senjenjalo ‘ngesazela esinyanisekileyo.’—Heb. 13:18.

Isizathu Sokuba Ukukhonza UYehova Kusivuyise

Sonke sinokukhonza uYehova sinovuyo kuba imiyalelo yakhe—enoba iimeko zethu zinjani—isoloko isengqiqweni yaye ifikeleleka. Kutheni sisitsho nje?

ILizwi likaThixo lithi: “Musa ukwala nokulungileyo kwabo kuselungelweni labo ukukufumana, xa kusemandleni esandla sakho ukukwenza.” (IMize. 3:27) Yintoni oye wayiphawula kulo mzekeliso ngokuphathelele imiyalelo kaThixo? UYehova akathi zama ukulinganisa oko kusemandleni esandla somzalwana wakho kodwa uthi mkhonze ngoko “kusemandleni esandla sakho.” Sonke—enoba isandla sethu sibuthathaka okanye sinamandla kangakanani—sinokukhonza uYehova ngokunyanisekileyo.—Luka 10:27; Kol. 3:23.

[Ibhokisi/Umfanekiso okwiphepha 14]

‘Ndandonwabe Gqitha Ngaloo Minyaka’

Enoba sisikelw’ umda ngenxa yempilo, asifanele sikhawuleze sigqibe kwelokuba imeko yethu ayinakusivumela ukuba sibe nesabelo ngokuzeleyo kubulungiseleli. Ngokomzekelo, cinga ngoko kwenzeka kuErnest, umzalwana ongumKristu waseKhanada.

UErnest wayengakwazi ukuthetha kakuhle yaye wayeneentloni. Emva kokwenzakala emqolo, kwafuneka ayeke ukusebenza kwinkampani yokwakha. Nangona wayenzakele, wayekwazi ukuchitha ixesha elingakumbi kubulungiseleli. Ngenxa yokhuthazo awayelufumana kwiintlanganiso zebandla waba nomdla wokuba nguvulindlela ongumncedani. Noko ke, wayeziva engakufanelekeli ukuphumeza esi sabelo.

Ukuze aqinisekise ukuba akanakukwazi ukuba nguvulindlela ongumncedani, wafaka isicelo sokuba nguvulindlela ongumncedani inyanga enye. Nakuba wayengakulindelanga oko, wasiphumeza eso sabelo. Wathi, ‘Andinakukwazi ukuphinda ndibe nguvulindlela ongumncedani.’ Ukuze aqiniseke, kwinyanga yesibini wafaka esinye isicelo—waphinda wakwazi ukusiphumeza isabelo sakhe.

UErnest waba nguvulindlela ongumncedani isithuba esingangonyaka, kodwa wathi, “Ndiqinisekile ukuba andinakuba nguvulindlela othe ngxi.” Kwakhona ukuze aqiniseke, wafaka isicelo sokuba nguvulindlela othe ngxi. Wagqiba unyaka enguvulindlela othe ngxi ibe oko kwamvuyisa. Waqhubeka enguvulindlela othe ngxi kangangeminyaka emibini, emva koko wonganyelwa kukugula de wafa. Noko ke, ngaphambi kokufa kwakhe, ethe gwantyi iinyembezi, wayedla ngokuthi kwabo babemtyelele, “Kuloo minyaka ndayichitha ndikhonza uYehova njengovulindlela, ndandonwabe gqitha.”

[Umfanekiso okwiphepha 13]

Sinokuyoyisa yonke imiqobo enokusenza singabuphumezi ubulungiseleli bethu

[Umfanekiso okwiphepha 15]

Siyamkholisa uYehova xa simkhonza ngomphefumlo uphela ngokwenza konke okusemandleni ethu