Ukushumayela Nokufundisa Ehlabathini Lonke

INOBA amazwi kaYesu abadida abafundi bakhe benkulungwane yokuqala. Wathi baya kuthiywa ziintlanga zonke—babeya kubulawa baze banikelwe ekubandezelweni. Kwakhona abaninzi babeya kukhutyekiswa baze bangcatshwe. Kodwa uYesu wathi iindaba ezilungileyo zaziya kushunyayelwa ehlabathini lonke. (Mat. 24:9-14) Ngaba umsebenzi wokushumayela uza kuphumelela phezu kwayo nje inkcaso esehlabathini lonke? Kula maphepha alandelayo uza kufumana impendulo yalo mbuzo.

Isimbuku Sowama-2010

Amasebe amaNgqina kaYehova: 116

Inani Lamazwe Anikela Ingxelo: 236

Isimbuku Samabandla: 107 210

Incopho Yabavakalisi Bobukumkani: 7 508 050

Umlinganiselo Wabavakalisi Kunowama-2009: 2.5

Isimbuku Sababhaptiziweyo: 294 368

Umlinganiselo Woovulindlela Nyanga Nganye: 844 901

Isimbuku Seeyure Ezichithwe Entsimini: 1 604 764 248

Ebudeni bonyaka wenkonzo wowama-2010, amaNgqina kaYehova aye achitha imali engaphezu kwe-R1 bhiliyoni ekunyamekeleni oovulindlela abakhethekileyo, abavangeli basemazweni nabaveleli abahambahambayo kwizabelo zabo.

◼ Ehlabathini lonke, bangama-20 062 abasebenza kwiiofisi zamasebe. Bonke bangamalungu Elungiselelo Lehlabathi Lonke Labakhonzi Abakwinkonzo Ekhethekileyo Yexesha Elizeleyo YamaNgqina KaYehova.

EAFRIKA

AMAZWE 57

ABEMI 888 219 101

ABAVAKALISI 1 222 352

IZIFUNDO ZEBHAYIBHILE 2 596 614

IQELA LABANTU LIKHANGELA INYANISO. Kwilali encinane yaseMadagascar, abantu abangama-80 bagqiba kwelokuba bayishiye Icawa Yelizwe YamaProtestanti. Bazakhela eyabo icawa baza baqalisa ukukhangela unqulo lokwenyaniso ngokuhlola icawa nganye kwezasekuhlaleni. Bafumanisa ukuba amaKatolika akayifundi iBhayibhile nokuba kwiCawa yamaLuthere kwakukho ukungavisisani. Eli qela lalivakalelwa kukuba amaPentekoste ayengafundisi inyaniso yaye iCawa yamaSabatha inezinto ezininzi engazenziyo. Emva koko baya komnye wabazalwana bethu baza bamcela ukuba abafundise iBhayibhile. Lo mzalwana wavuma.

Kwenziwa ilungiselelo lokuba abavakalisi abambalwa batyelele aba bantu banomdla. Abazalwana batyelela abantu abangama-26 kwicawa yabo ababeyakhile yaye babekulungele ukuphulaphula inkcazelo esekelwe eBhayibhileni. Besebenzisa isahluko 15 sencwadi ethi Okufundiswa YiBhayibhile, abazalwana bachaza indlela onokulufumana ngayo unqulo uThixo akholiswayo lulo. Aba bantu babanelisekile yile nkcazelo. Xa abazalwana babuyelayo badibana nabantu abangama-73. Xa babuya okwesithathu bafika kukho abantu abali-142!

UMYALEZO OWATHUNYELWA KUMNTU EBEKUNGAFANELE UYE KUYE. Ukuze likhuthaze isifundo salo seBhayibhile, elinye iNgqina elinguMenen elihlala e-Ethiopia, lathumela umyalezo onomxholo wonyaka wowama-2009 ngeselfowuni. Noko ke, wabhala inombolo engeyiyo yaye umyalezo waya komnye umntu. Ibhinqa elafumana lo myalezo, lawufunda ngokuphindaphindiweyo: “‘Nikela ubungqina obucokisekileyo kwiindaba ezilungileyo’—IZe. 20:24, NW.” Ekubeni eli bhinqa lalisoyika uThixo, lavumelana nalo myalezo kodwa lalingazi ukuba lalinokukwenza njani oku. Lalixakwe nangu-“NW” [New World Translation] owayesekugqibeleni. Kwaqengqeleka iiveki licinga ngoko kwakuthethwa ngulo mbhalo. Ekugqibeleni, lafowunela lo mntu wayelithumelele lo myalezo. Lo dade yamothusa into eyayenzeke kulo myalezo kodwa wasebenzisa elo thuba ukuba aphendule imibuzo yeli bhinqa. Oko kwakhokelela kwisifundo seBhayibhile esiqhutywa kabini ngeveki.

OOVULINDLELA ABASEBATSHA ABASEBENZA KUNYE. UPersis, ohlala eCameroon, waba ngumvakalisi ongabhaptizwanga xa wayeneminyaka emithandathu ubudala. Kwingxelo yakhe yokuqala yasentsimini wabhala izifundo zeBhayibhile ezilishumi. Unobhala webandla wacinga ukuba uphazamile. Xa wambuzayo ngoku, uPersis wamchazela ukuba unezifundo ezilishumi. Kwakhona wambuza: “Ekubeni ungenayo iwotshi wazi njani ukuba lingakanani ixesha olichithe ushumayela?” Wathi, wayesazi ukuba ikhefu lasesikolweni lithatha iyure. Wayeqalisa ukushumayela ekuqaleni kwalo aze ayeke kwakukhala intsimbi. Ukushumayela kwakhe ngenkalipho kwachukumisa umama wakhe nomzala wakhe ababa ngabavakalisi abangabhaptizwanga. Ngoku uPersis uneminyaka elishumi ubudala, unguvulindlela ongumncedani ngoxa esesesikolweni. Umhlobo wakhe oneminyaka esibhozo ubudala uAasy sele engumvakalisi ongabhaptizwanga. Omnye umntu ofundelwayo wathi ngabo: “Kwandivuyisa ukubona abantwana ezintlanganisweni bebulisa bonke abantu, ngokukodwa abantu abalupheleyo, ngaphambi kokuba baye kuhlala nabazali babo. Andizange ndikubone oku ecaweni yam. Ndiyazi ukuba abantwana abakhuliswe ngolu hlobo baba ngabantu ababhetele kwibutho labantu xa bebadala.”

EMERIKA

AMAZWE 55

ABEMI 918 834 998

ABAVAKALISI 3 673 750

IZIFUNDO ZEBHAYIBHILE 3 967 184

AKAZANGE ANKQONKQOZE. UMiriam, ohlala eBolivia, wathandaza kuThixo kangangeveki. Umthandazo wakhe wawusithi: “Ndicela undincede ndikwazi kodwa andifuni kuncedwa ngamaNgqina kaYehova. Andifuni ankqonkqoze emnyangweni wam.”

Ngasekupheleni kwaloo veki kwakhala ifowuni. YayinguCandy, uvulindlela okhethekileyo owathi uza kuphathela uMiriam amaphephancwadi ethu ingaphelanga iyure. UMiriam wavuma. Ingekapheli iyure uCandy wayesemnyango. UMiriam wavula umnyango ngokukhawuleza waza wathi kuCandy makangene ahlale phantsi. UMiriam wehl’ esenyuka aph’ endlwini, enikin’ intloko kubonakala ukuba kukho into emkhathazayo. UCandy wambuza ukuba yayiyintoni ingxaki. UMiriam wathi: “Ndothukile! Kangangeveki bendithandaza kuThixo ndicela ulwalathiso kodwa ndiye ndamchazela ngokucacileyo ukuba andifuni kunkqonkqoze maNgqina kaYehova apha kwam. Yaye wena undifowunele kunokuba unkqonkqoze emnyango. Emva kokuba undifowunele kwiyure edluleyo, bendithandaza kuThixo ndimcela ukuba ungezi. Yaye uzile! Andiyikholelwa le nto! Kucacile ukuba uYehova ufuna ndincedwe ngamaNgqina kaYehova.” Kwaqaliswa isifundo ngokukhawuleza.

BAMSHIYA BECINGA UKUBA UFILE. UPasensi wayekade esisibonda esaziwayo eSuriname nomhlobo omkhulu wenkosi eyayiphethe wonke ummandla walapho ukuya kutsho ngasemlanjeni. UPasensi wayewathanda kakhulu amasiko. Wayengafuni nokuwabona amaNgqina kaYehova kuba wayesithi akawafuni amasiko.

Ekuhambeni kwexesha elinye ityendyana laxelela abahlali ukuba lona linesiphiwo sokubona amagqwirha. Igquba elingabalandeli beli tyendyana lahamba ngomlambo ngezikhitshane libetha abo babetyholwa ngobugqwirha lize lohluthe nezinto zabo. Abantu ababetyholwa ngobugqwirha kwakufuneka bahlawule intywenka yemali ukuze kugxothwe imimoya emdaka. NoPasensi wayengomnye wabantu abamsulwa ababetyholwa ngokuthakatha yaye wabethwa waza washiywa kucingwa ukuba ufile. Nomhlobo wakhe omkhulu, inkosi ayizange imncede kuba nayo yayisoyika ukuba ukunceda umntu otyholwa ngobugqwirha kwakuza kuyenza inuk’ umzondo ebantwini. Abahlobo nezalamane babengavunyelwa ukuba bamncede. Noko ke, umkhwenyana kaPasensi waqweb’ isibindi waza wamsa kwilali enamaNgqina kaYehova amaninzi. Abazalwana bathetha ngalo mbandela baza bagqiba kwelokuba bancede nangona babeyiqonda ingozi ababezifaka kuyo. Benza amalungiselelo okusa uPasensi ngesikhephe kwilali ekwakukho kuyo umzalwana owayesebenza kwisikhululo seenqwelo-moya. Ukusuka apho, uPasensi owayekade ewachasa amaNgqina wasiwa ngenqwelo-moya kwisibhedlele esikwesinye isixeko.

UPasensi owachachayo kamva, lwamhlab’ umxhelo uthando olwaboniswa ngabantu awayekade engabafuni. Waqalisa ukufunda iBhayibhile waza wabhaptizwa ngoDisemba 2009. Sithethanje uPasensi ushumayela iindaba ezilungileyo ngenzondelelo yaye nangona eneminyaka engama-80 ubudala, uye wanguvulindlela ongumncedani ngoAprili 2010.

WAYECINGA UKUBA UYAYAZI IBHAYIBHILE. UEric, owayesisixhaphothi yintshebe wafika kwiintlanganiso zamaNgqina kaYehova eUnited States ephethe iBhayibhile ngesandla. Emva kokuba omnye umzalwana embulisile, uEric wambuza ngeenkolelo zethu. Wala ukuthatha incwadi ethi Okufundiswa YiBhayibhile esithi yena ukholwa yiBhayibhile uqobo. Wayefunda amaphepha angama-20 ngosuku yaye wayengasakhumbuli nokukhumbula ukuba wayeyifunde wayigqiba kangangezihlandlo ezingaphi. Emva kweentlanganiso wancokola nalaa mzalwana ixesha elingaphezu kweeyure ezintathu. Emva koko uEric wathi: “Ingathi ungavuleka umhlaba ndingene.” Lo mzalwana wabuza ukuba kutheni. UEric wathi: “Bendicinga ukuba ndizazi kakuhle iZibhalo. Noko ke, ukuza kwam apha kundenze ndaqonda ukuba akukho kwanto endiyaziyo.” Emva koko wayithatha incwadi ethi Okufundiswa YiBhayibhile.

Ngemini elandelayo uEric nalo mzalwana baqalisa ukufunda iBhayibhile kunye. Ngobusuku obungaphambili, uEric akazange alale efunda izahluko zokuqala ezilishumi zencwadi ethi Okufundiswa YiBhayibhile. Waba yintoni umphumo? Wathi: “Ekugqibeleni ndide ndayifumana inyaniso!” Babefunda iiyure ezintathu ukuya kwezine ngosuku, iintsuku ezintlanu ngeveki. UEric waqalisa ukuzilungiselela nokuya kuzo zonke iintlanganiso nentsapho yakhe. Kwathi kungekapheli neveki wabe sele ebhalele iicawa ezintathu ezixelela ukuba uzishiya ngokusemthethweni, watsheva waza wayeka ukubhiyozela iiholide. Kwathi kuphela iiveki ezimbini wabe sele ebhalisile kwiSikolo Sobulungiseleli Sobuthixo yaye kwezine wayesele engumvakalisi ongabhaptizwanga. Wabhaptizwa ngoAprili 2010, kwiinyanga nje ezintandathu edibene namaNgqina kaYehova!

WABHAPTIZWA ENEMINYAKA ESIXHENXE. UPaola, ohlala kwintshona yeMexico ukhuliswa ngutatomkhulu nomakhulu wakhe. Xa uPaola wayeneminyaka emihlanu ubudala, umakhulu wakhe waqalisa ukufunda iBhayibhile namaNgqina kaYehova. UPaola wayedla ngokuphulaphula yaye inyaniso yangena entliziyweni yale ntwazana. Nangona umakhulu wakhe engazange enze nkqubela, uPaola waqalisa ukuya kwiintlanganiso. Wayedla ngokucela utatomkhulu nomakhulu wakhe ukuba bamncede alungiselele ukuya ezintlanganisweni baze bamwelise isitrato ukuze aye kufika kwiHolo yoBukumkani.

Wathi nje esa kukwazi ukufunda nokubhala, uPaola wabhalisa kwiSikolo Sobulungiseleli Sobuthixo waza waba ngumvakalisi. Ngenxa yokumthanda kwakhe uYehova wabhaptizwa eneminyaka esixhenxe ubudala. Xa ebuzwa isizathu sokuba esiya kwiintlanganiso yaye eshumayela ngenzondelelo nangona engaxhaswa yintsapho yakhe, uPaola ngoku oneminyaka elishumi ubudala uthi: “Ndiyazithanda iintetho ngoba zindikhuthaza ukuba ndifunde iBhayibhile nokuze ndingangeni ezingxakini. Ndiyashumayela ngenxa yokuba ndifuna ukufundisa abantu ngoko uYehova aza kubenzela kona kwikamva nangenxa yokuba iBhayibhile inokubenza bonwabe kwanangoku.”

UKUSHUMAYELA KUBANTU ABAFOWUNE NGEMPAZAMO. KwiDominican Republic, omnye udade wayefonelwa ngabantu abaninzi ngempazamo, nto leyo eyayimphazamisa emsebenzini. Emva kweentsuku ezimbalwa wathi, ‘Ndifanele ndishumayele kwaba bantu bandiphazamisayo. Wayenza njani loo nto? Xa ephendula ifowuni aze afumanise ukuba loo mntu umfowunele ngempazamo wayemchazela ngentlonelo aze athi, “Kodwa ke makhe ndikubuze, Ukhe wayifunda iBhayibhile namhlanje?” Nangona abanye babevele babek’ ifowuni phantsi, abanye babemphendula bathi khange bayifunde. Emva koko wayedla ngokuthi, “Ngaba uyazi ukuba kutheni kubalulekile ukufunda iBhayibhile?” Ukuze abaphendule ngeZibhalo, wayefunda iNdumiso 1:1-3. Enye indoda esebenzela urhulumente yancokola nalo dade yaye yamxelela ukuba ayinayo iBhayibhile. Lo dade wenza amalungiselelo okuyithumelela iBhayibhile neencwadi zeBhayibhile. Emva kweeveki ezimbini le ndoda yafowuna ibulela lo dade ngoncedo lwakhe nangeencwadi awayeyithumelele zona.

Enye intombazana eyayifowunile yabuza lo dade isithi, “Ngaba uliNgqina likaYehova?” Xa lo dade wathi ulilo, le ntombazana yalila yaza yamxelela ukuba ingumvakalisi opholileyo. Lo dade wayikhuthaza yaye kwenziwa amalungiselelo okuba kubekho umntu oyincedayo ngokomoya. Namhlanje le ntombazana ingumvakalisi okhutheleyo.

EASIYA NAKUMBINDI MPUMA

AMAZWE 47

ABEMI 4 587 021 833

ABAVAKALISI 652 251

IZIFUNDO ZEBHAYIBHILE 601 306

“UMFAZI ONGUMSAMARIYA.” Laligqats’ ubhobhoyi ilanga ngaloo mini eKazakhstan. Oovulindlela ababini babesentsimini xa babona inkosikazi ethile isikha amanzi equleni. Umzalwana wacela ukuba imphe amanzi yaye ngoxa wayesasela udade owayehamba naye washumayela kuyo. Eli bhinqa laba nomdla laza lacela aba vulindlela ukuba baye ekhayeni lalo ukuze balifundise okungakumbi. Aba vulindlela bancokola nalo baza balishiyela iincwadi ezisekelwe eBhayibhileni. Udade walithembisa ukuba wayeza kubuya emva kweentsuku ezimbini.

Njengokuba wayethembisile, lo dade wabuya ehamba nomama wakhe naye oliNgqina. Bafika le nkosikazi ibalinde ngaphandle kwendlu yayo, iphethe iincwadi ababeyishiyele zona. Yanika udade ezo ncwadi yaza yathi: “Ezi ziincwadi zamaNgqina kaYehova yaye le cawa yenu yeyaseRashiya!”

Umama walo dade wacela ukufundela le nkosikazi iSibhalo esinye ngaphambi kokuba bahambe. Ekubeni wayefuna ukuyibonisa igama likaThixo eBhayibhileni, wafunda iEksodus 3:15 ethi: “UYehova uThixo wookhokho benu, uThixo ka-Abraham, uThixo kaIsake noThixo kaYakobi, undithumile kuni.” Aba dade bamangaliswa xa le nkosikazi yabangenisa endlwini yayo. Yintoni eyasenza satshintsha ngokukhawuleza isimo sayo sengqondo? Ookhokho bayo yayinguAbraham, uIsake noYakobi. Yayisithi ukuba uYehova nguThixo wookhokho bayo ayinakukwazi ukugxotha amaNgqina akhe. Kutyelelo olwalandelayo kwaqaliswa isifundo seBhayibhile. Yayinomdla kakhulu wokufunda inyaniso kangangokuba isifundo sasiqhutywa kabini ngeveki. Nakuba yayichaswa ngoonyana bayo yenza inkqubela ngokomoya kangangokuba ngoku ingumvakalisi ongabhaptizwanga. Kanti ke umolokazana wayo kunye nomama wakhe nabo bafunda iBhayibhile yaye baya rhoqo kwiintlanganiso. Ekubeni indlela ekwadityanwa ngayo nayo ifana nebali elikuYohane 4:3-15, le nkosikazi ibizwa ngokuba ‘ngumfazi ongumSamariya.’

“NDINEMIBUZO.” Udade waseCyprus onguvulindlela nosele ekhulile ubalisa athi: “Ngenye iintsasa yangoLwesithathu ndandigula kodwa ndandifuna ukuya kushumayela esitratweni kunokuba ndihlale ekhaya. Ngoko ndathandaza kuYehova ndimcela ukuba andithumelele umntu owayeza kukwazi ukufumana ixesha lokuhlala phantsi kunye nam ukuze ndiqalise isifundo seBhayibhile. Kungekudala kwathi gqi elinye ityendyana laseNepal. Ekubeni ndandiwabambe ngesandla amaphephancwadi, ndathi ndingekathethi eli tyendyana landibuza ukuba athetha ngantoni. Xa ndalixelela ukuba athetha ngeBhayibhile lathi kum: ‘Makhulu, akukho apho ndingxamele khona ngoko ndicela ukuhlala apha ecaleni kwakho. Kukho imibuzo ephathelele iBhayibhile endifuna ukukubuza yona.’

“Ndavuma kuba yiloo nto kanye endandisandul’ ukuyicela kuYehova. Eli tyendyana lathi: ‘Umbuzo wokuqala uthi, Yintoni ngokwenene efundiswa yiBhayibhile?’ Ndothuka ndabamb’ ongezantsi. Ndathi rhuthu incwadi ethi Yintoni Ngokwenene Efundiswa YiBhayibhile? ndaza ndalibonisa yona. Lajonga le ncwadi, lajonga mna laza lathi, ‘Ingathi umxholo wale ncwadi ngulo mbuzo ndigqiba kukubuza wona nje?’ Ngoko, ndaqalisa isifundo seBhayibhile kweso situlo sasepakini sasihleli kuso. Ngoku ndifunda nalo iBhayibhile rhoqo, liyaya nakwiintlanganiso yaye lifuna ukubhalisa kwiSikolo Sobulungiseleli Sobuthixo. Ndiyakuqonda ukubaluleka kokuthembela kumandla nolwalathiso lukaYehova ekuphumezeni ubulungiseleli bobuKristu, nangona ndikhe ndizive ndidiniwe ngamanye amaxesha.”

UTATOMKHULU UFUNDISA UMBULALI WOMZUKULWANA WAKHE. Umzukulwana kaMiguel wabulawa kwiminyaka embalwa eyadlulayo. Umbulali, uEsmeraldo wabanjwa kodwa akazange alivume ityala enkundleni. Sekunjalo, wavalelwa entolongweni ngenxa yobungqina obafunyanwayo.

Kamva, omnye umdala wacela uMiguel ukuba ahambe naye ukuze baye kushumayela kwintolongo yakwiiPhilippines awayevalelwe kuyo uEsmeraldo. UMiguel wayesonqena ukuya kuba wayesazi ukuba umntu owabulala umzukulwana wakhe wayelapho. Noko ke, waya ibe wancedisa xa kwakufundiswa amanye amabanjwa iBhayibhile. Njengokuba kwakuqhutywa isifundo, wabona uEsmeraldo esiza ngakuye. Ukuze aphephe ingxwabangxwaba, wathetha naye ezolile esithi: “Esmer andizanga kudala uqhushululu apha kodwa ndize kubonakalisa uthando kubantu abafana nawe. Sifunda iBhayibhile nale ndoda. Le nto yenzeka kuwe ngeyayingenzekanga ukuba wawulazi iLizwi likaThixo. Ndicela nawe ufunde iBhayibhile nathi.” UMiguel wamangaliswa xa uEsmeraldo waphulaphula de saphela isifundo. Echukunyiswe koko wakuvayo, uEsmeraldo wachazela uMiguel ukuba wambulala umzukulwana wakhe. Emva koko wacela uxolo.

Lo mdala ungazange ayive incoko yabo, wabona ukuba babencokola kamnandi yaye wacela uMiguel ukuba afunde noEsmeraldo. Ekuqaleni uMiguel wayesoyika kuba wayesazi ukuba yayingengomzukulwana wakhe nje kuphela owayebulewe yile ndoda, kodwa ke wavuma. Kwakunzima kuEsmeraldo ukuphila ngemigaqo kaThixo kodwa imigudu yakhe yavuzwa yaye ngoFebruwari 1, 2010 wabhaptizwa efuzisela uzahlulelo lwakhe kuYehova. UMiguel ubonisa indlela amxolele ngayo uEsmeraldo ngokuzama ukunceda ukuba kuncitshiswe isigwebo sakhe ukuze akwazi ukufundisa abanye inyaniso yeBhayibhile.

IYUROPHU

AMAZWE 47

ABEMI 739 193 855

ABAVAKALISI 1 575 094

IZIFUNDO ZEBHAYIBHILE 830 888

IMINQWENO YAKHE EMIBINI YAZALISEKA. UNelena waseBulgaria oneminyaka eli-19 ubudala wayeneminqweno emibini, wayefuna ukubhaptizwa nokuba nguvulindlela ongumncedani. Noko ke, unesifo sofuzo esenza ukuba imithambo-luvo yakhe ingasebenzi kakuhle nesinganyangekiyo okwangoku. Uphefumla ngomatshini yaye loo nto imenza angakwazi ukuhamba. Ukufezekiswa komnqweno wakhe wokuqala okukubhaptizwa kwabangela ingxaki kuba imeko yakhe yayingamvumeli ukuba aphume phandle ukuze aye endibanweni. Xa wayeneminyaka eli-18 ubudala intetho esekelwe eBhayibhileni yanikelwa ekhayeni lakhe waza emva koko wabhaptizelwa ebhafini.

Kuthekani ngomnqweno wakhe wokuba nguvulindlela ongumncedani? Ngexesha lonyaka elinemozulu entle, uyakwazi ukuphefumla ngaphandle komatshini kangangeyure. Ngaloo maxesha uba nguvulindlela ongumncedani yaye umvakalisi ahamba naye uyamtyhala ngesitulo sakhe esinamavili xa besiya kwindlu ngendlu. Kwakhona uNelena uqhuba isifundo seBhayibhile ngefowuni. Ngamanye amaxesha oodade bebandla lakhe baqhubela izifundo zabo zeBhayibhile ekhayeni likaNelena ukuze naye abe nenxaxheba. Ngenxa yoko, uNelena uye wakwazi ukuba nguvulindlela ongumncedani kathathu kulo nyaka uphelileyo. Uthi: “Ndiyavuya kuba ndiye ndayifezekisa iminqweno yam emibini. Loo nto iye yandisondeza kuMdali wam onothando, uYehova.”

NGOKU UNXIBA IQHINA. Udade waseArmenia wayegculelwa emsebenzini ngenxa yokuba eliNgqina likaYehova. Enye indoda awayesebenza nayo yayihlekisa ngaye isithi, “abantu abanxib’ amaqhina” babekhohlise lo dade ukuba amkele unqulo lwabo. Emva kokuzama ukuqiqa nayo izihlandlo ezininzi kodwa ingaphulaphuli, wagqiba kwelokuba angayihoyi yaye njengoYesu Kristu ‘akazange ayiphendule.’ (Mat. 27:12) Ekugqibeleni le ndoda yagxothwa emsebenzini ngenxa yemikhwa yayo emibi nangenxa yokugculela kwayo lo dade. Kwiinyanga kamva, kwafika ndoda ithile emsebenzini walo dade ize kumfuna. Yayiyilaa ndoda yayikade igculela lo dade emsebenzini. Wothuka xa wabona indlela eyayinxibe ngayo. Nangona yayikade igculela amaNgqina ngokunxiba amaqhina, nayo yayinxibe elayo, iphethe nebhegi eneencwadi. Yathi kulo dade: “Ndicela uxolo ngezinto ezimbi endazithetha kuwe. Ngoku ndiyazi ukuba ndiyifumene inyaniso.” Le ndoda yayifunde iBhayibhile namaNgqina kaYehova yaza yabhaptizwa nangona yayichaswa yintsapho yayo yaye ngoku yayinguvulindlela othe ngxi.

“NGABA UYAMAZI UNKOSKZ. NADIA?” UNadia nguvulindlela kwibandla elikumntla weItali. NgoSeptemba 2009 wathetha kwi-intercom nenye indoda eyamxelela ukuba isandul’ ukuswelekelwa yinkosikazi yayo yaye ayifuni kuthetha naye. NgeCawa elandelayo, uNadia wabuyela kuyo efuna ukuyithuthuzela aze ayifundise nangethemba lovuko eliseBhayibhileni, kodwa nangoko le ndoda ayizange ifune ukuphulaphula. ISifundo seMboniselo sangaloo mvakwemini sasinamava odade owabhalela ileta umntu owayeswelekelwe sisalamane. Oko kwenza uNadia wacinga ngendoda awayethethe nayo kwi-intercom, ibe wagqiba kwelokuba ayibhalele ileta eyithuthuzelayo waza kuquka kuyo iinkcukacha ezingethemba lovuko. Emva kweentsuku ezimbini, wafaka le leta eposini yale ndoda.

Emva kweentsuku ezimbalwa, xa uNadia wayeshumayela esitratweni, wamisa indoda ekwiminyaka yayo yama-70 ukuze ayifundele indinyana yeBhayibhile. Le ndoda yabuza ukuba uliNgqina likaYehova na, waza uNadia wathi ulilo. Le ndoda yamchazela ukuba yayityelelwe liNgqina likaYehova elayishiyela ileta eyayichukumisa kakhulu intliziyo yayo. Emva koko yathi, “Ngaba uyamazi uNkoskz. Nadia?” Bobabini bamangaliswa xa uNadia wazazisa kuyo, ibe wenza amalungiselelo okuyityelela kunye nomyeni wakhe. Le ndoda ayizange nje iqalise ukufunda iBhayibhile kodwa ibakho rhoqo kwiintlanganiso.

ABAKWAZI UKUBAFUNDISA BONKE. AmaNgqina amane abhaptiziweyo ahlala kwidolophu yaseBujanovac ekumazantsi eSerbia. Aba bavakalisi boBukumkani bavuya xa kwabakho abantu abangama-460 kwiSikhumbuzo sowama-2010! Abadala bebandla elikufutshane baqasha indawo ukuze kuqhutywe iintlanganiso rhoqo eBujanovac. Kuza abantu abangaphezu kwama-50 yaye uninzi lwabo bayinzalelwane yaseRoma. Ngenxa yendlela abantu abasithanda ngayo isigidimi soBukumkani, oovulindlela abakhethekileyo ababelwe kuloo ntsimi abakwazi ukubaqhubela isifundo seBhayibhile bonke abantu abanomdla. Ngenxa yoko, bafundela kuphela abo beza kwiintlanganiso bezilungiselele zonke.

UNEMINYAKA ENGAPHEZU KWEKHULU UBUDALA! UElin oyena mvakalisi mdala waseSweden, uneminyaka eli-110 ubudala, minyaka leyo awayifikelelayo noYoshuwa. (Yosh. 24:29) Uhlala kwikhaya labantu abalupheleyo yaye usebenzisa naliphi na ithuba elivelayo ukuze athethe nabantu abatyelele apho. Uhambisa iincwadi ezininzi. Xa omnye umdala owayehamba nentombi yakhe babeshumayela kwindlu ngendlu badibana nentombazana eyathi iye yashunyayezwa nguElin waza wayishiyela nencwadi. Ngenxa yoko bancokola kamnandi.a

WAZIFUMANA ECAWENI IINCWADI. UTatyana ohlala eBelarus, wothuka akufowunelwa yintombazana angayaziyo. Le ntombazana yayifuna iimpendulo zeBhayibhile kwimibuzo eyayinayo. Emva koko bancokola kamnandi. Yayifumana njani inombolo yefowuni kaTatyana. Ngoxa isecaweni yafumana incwadi ethi Yintoni Ngokwenene Efundiswa YiBhayibhile neNguqulelo Yehlabathi Elitsha ngaphantsi kwesitulo yaye inombolo yefowuni kaTatyana yayibhalwe kwezi ncwadi. Kwenzeka njani ukuba ezi ncwadi zibe secaweni? Zaziye nomama wenye intombazana afunda nayo iBhayibhile uTatyana. Lo mama wayefuna ukubuza umfundisi enoba kufanelekile na ngentombi yakhe ukuba ifunde ezi ncwadi. Ngenxa yezizathu ezingaziwayo ezi ncwadi zazishiywe ngaphantsi kwesitulo. Le ntombazana yazibona yaza yazithatha. Ukufowunelwa kukaTatyana kwakhokelela kwiincoko ezingakumbi zeBhayibhile.

IDYASI ELAHLEKILEYO IVULA ITHUBA. UElena, udade onguvulindlela okhethekileyo wabona idyasi entle, ishiywe kwisitrato saseMinsk, eBelarus. Le dyasi yayicocekile yaye yayingabonakali ngathi ilahliwe. Akuyiphakamisa wafumana iR8 800 kwipokotho yayo. Wakhawuleza wamfumana umntu owayelahlekelwe yile dyasi. Wayekhangela kuyo yonke indawo kubonakala ukuba kukho into emlahlekeleyo. UElena kwafuneka amleqe ukuze amfumane. Le ndoda yayingusomashishini waseBangladesh, ohlala eMoscow. Yavuya yakufumana idyasi nemali yayo. Kwakhona yafun’ ukwazi isizathu sokuba lo dade abuyise idyasi nokuba ade ayileqe. Wayichazela ukuba uliNgqina likaYehova. Yathi kwiintsuku ezimbalwa ngaphambili yayincokole namaNgqina kaYehova amabini. Yayiphikisene nawo kangangemizuzu engama-30, ithethelela icawa yayo. Le ndoda yabuza uElena ukuba yayinokumbulela ngantoni ngokuyibuyisela idyasi yayo. Wayixelela ukuba wayengafuni kuvuzwa ngokubuyisa idyasi kodwa ke wathi uxabiso lwayo yayinokulubonakalisa ngokuvuma ukufunda iBhayibhile namaNgqina kaYehova xa ibuyela eMoscow. Le ndoda yavuma.

EOCEANIA

AMAZWE 30

ABEMI 39 384 408

ABAVAKALISI 101 483

IZIFUNDO ZEBHAYIBHILE 62 367

UYASHUMAYELA NANGONA ENGAKWAZI UKUTHETHA KAKUHLE. UHamish, umzalwana oneminyaka engama-23 ubudala ohlala eOstreliya akakwazi kuthetha kakuhle yaye xa ethetha uyashwantshwatha. Noko ke, imeko yakhe ayiyithothisanga inzondelelo yakhe xa enikela intetho okanye xa eshumayela. Ngokomzekelo, ukuze anikele intetho kwiHolo yoBukumkani uHamish uchwetheza phantsi yonke into aza kuyithetha aze ayifake kwisixhobo esikwaziyo ukuguqula into ebhaliweyo ibe lilizwi. Xa enikela intetho yakhe ubeka esi sixhobo eqongeni aze asidlale yaye uneqhosha alicofayo xa efuna ukuphinda iingongoma ezithile. Ilizwi eliphuma kwesi sixhobo lingena kwisandisi-lizwi. Xa intetho yakhe iquka abaphulaphuli, ucwetheza amagqabaza okubabulela kwesi sixhobo asisebenzisayo. Nasentsimini uthetha nabantu ngendlela efanayo, esebenzisa izivakalisi azibhale kwangaphambili, izicatshulwa zezibhalo aze achwetheze xa kuyimfuneko. Ngenxa yoko, unamabuyelo amaninzi anomdla. Ukususela ekumiselweni kwakhe njengesicaka solungiselelo ngowama-2007, uHamish ebesiba nguvulindlela ongumncedani izihlandlo eziliqela nyaka ngamnye.

IPRINTA YAKHE YAYINENGXAKI. ENew Caledonia, uDavid olungisa iikhompyutha wafowunelwa lelinye ibhinqa elalonakalelwe yiprinta—eyayingakwazi ukuprinta iphepha elithile. UDavid wakhawuleza wayilungisa loo ngxaki kodwa wothuka xa wabona eli phepha lalikule printa elalibhalwe kwathiwa: “UNGANGENI. SinoYesu nathi aph’ ekhaya. Asiyifuni enye icawa.”

UDavid wathi kweli bhinqa: “Njengokuba bendilungisa iprinta yakho, ndiye ndalifunda ela phepha. Ndicel’ ukubuza ukuba lelantoni?”

Eli bhinqa laphendula lathi: “Kaloku amaNgqina kaYehova eza apha qho ngeempelaveki. Sikruqukile kukusoloko siwabon’ apha. Akukho nelinye eliya kuze lingene apha kwam.”

UDavid wathi: “Uyazi na ukuba likhona osele ulivumele ukuba lingene?”

Eli bhinqa lathi: “Unotshe. Soze ndiyenze loo nto!”

UDavid wathi: “NdiliNgqina likaYehova yaye undivumele ukuba ndingene!” Eli bhinqa lamangaliswa laza laba neentloni. UDavid walichazela isizathu sokuba amaNgqina kaYehova esiya emakhayeni abantu. Bancokola iiyure ezimbini zonke. Kwiintsuku ezimbalwa kamva, uDavid watyelela eli bhinqa nomyeni walo. Bamchazela ukuba emva kokucingisisa ngoko kwakwenzekile babeqinisekile ukuba nguThixo othumele uDavid. Ngenxa yoko, babengenakwala ukuba abatyelele. Ngoku bayawamkela amaphephancwadi ethu.

UXHOBE NGAMAPHECANA. UNathan oneminyaka eli-12 ubudala uhlala eOstreliya. Uphatha amaphecana asekelwe eBhayibhileni xa esiya esikolweni ukuze ashumayele kubahlobo bakhe. Ngoxa wayebuya esikolweni ngenye imini, wabona elinye ibhinqa elisele likhulile limi phambi komzi walo. Eli bhinqa lamncumela naye uNathan wancuma waza walinika elinye lamaphecana. Eli bhinqa lamchazela ukuba sele iyiminyaka emithathu laswelekelwa ngumyeni walo. Ngenxa yoko uNathan wakhupha iphecana elithi Liyintoni Ithemba Ngabafileyo Obathandayo? Zathi gwantyi iinyembezi emehlweni eli bhinqa njengoko uNathan wayelichazela ngovuko oluzayo apho lisenokuphinda limbone khona umyeni walo eParadesi. Eli bhinqa labuza: “Kodwa kuza kuphela nini konke ukubandezeleka?” UNathan wathi rhuthu elinye iphecana elithi Konke Ukubandezeleka Sele Kuza Kuphela! Emva koko eli bhinqa labuza uNathan enye into ayikholelwayo. Nalapho wathi rhuthu elinye iphecana elithi Yintoni Ayikholelwayo AmaNgqina KaYehova? Emva koko, uNathan wemka. Kwiiveki kamva wabona eli bhinqa limi phambi kweyadi yalo. Lambiza laza lamanga. Lathi: “Uyazi ukuba kwenzeke ntoni Nathan? Emva kokuba undinike la maphecana kuye kwafika amaNgqina amabini yaye ngoku ndifunda iBhayibhile kunye nawo!”

BABENESIMEMO SESIKHUMBUZO ESINYE. UMichael wayencedisile xa kwakusakhiwa iofisi yesebe yakwiiSolomon Islands. Emva koko wagqiba ekubeni aye kushumayela eMbanika, isiqithi awayekhulele kuso nalapho babehlala khona abakhuluwa bakhe. Ayengekho amaNgqina kweso siqithi. Kwakhona akukho nqanawa iya apho, akukho posi yaye kukho ifowuni enye kuphela.

Wahamba noHansly omnye uvulindlela oselula. Ukufika kwabo, ngoko nangoko baqalisa ukwakha iHolo yoBukumkani encinane ngemithi baza bamemela abantu kwiSikhumbuzo sokufa kukaYesu. Ekubeni babenesimemo esinye, aba bazalwana babesibonisa abantu baze babachazele ngokubaluleka kweSikhumbuzo.

Kusuku olungaphambi kweSikhumbuzo abazalwana bahamba ngesikhephe kangangeeyure ezimbini besiya kwelinye icala lesiqithi ukuze bameme intsapho ehlala apho. Noko ke, bafika kwelo khaya kukho abantwana kuphela. UMichael wagqiba kwelokuba abashiyele ekuphela kwesimemo awayenaso. Wasinika intombazana endala waza wayicela ukuba isinike uyise.

Ngemva kwemini elandelayo njengoko uMichael noHansly babelungiselela iSikhumbuzo, babona le ntsapho isiza ngesikhephe. Utata wayesifundile esi simemo waza wagqiba kwelokuba iSikhumbuzo sisiganeko esibalulekileyo, ngenxa yoko weza nayo yonke intsapho yakhe. Ngaloo ngokuhlwa, eSikhumbuzweni kweza abantu abangama-52. UMichael noHansly basaqhubeka beshumayela yaye befunda iBhayibhile nabo babeze eSikhumbuzweni.

[Umbhalo osemazantsi]

[Isicangca esikwiphepha 40-47]

INGXELO YONYAKA WENKONZO WAMA-2010 YAMANGQINA KAYEHOVA EHLABATHINI LONKE

(Yiya kwimpapasho)

[Iimaphu ezikwiphepha 48-50]

(Yiya kwimpapasho)