Ngaba Ubusazi?

Ngaba inentsingiselo into yokuba umpostile uPetros kuthiwa wayehleli nomsuki ngaphambi kokuba athunywe kuKorneli?

▪ Ingxelo ekwiZenzo ithi uPetros wahlala “Kangangemihla eliqela . . . eYopa kunye noSimon othile, umsuki,” ‘owayenendlu ngaselwandle.’ (IZenzo 9:43; 10:6) Umsebenzi wokusuka wawujongwa njengongahlambulukanga nophantsi kumaYuda. ITalmud ibeka abasuki kumgangatho ongaphantsi kwababuthi bobulongwe. Umsebenzi kaSimon wawumenza asoloko esebenza ngezidumbu zezilwanyana, nto leyo eyayithetha ukuba wayesoloko engahlambulukanga. (Levitikus 5:2; 11:39) Ngokutsho kwemithombo eyahlukeneyo ethetha ngalo mbandela, uSimon kusenokwenzeka ukuba wayesebenzisa amanzi olwandle mhlawumbi neshishini lakhe lalisecaleni edolophini kuba ‘iimfele zazinuka.’

Nakuba kunjalo, kubonakala ukuba uPetros wayengenangxaki nokuhlala noSimon. Mhlawumbi ukuhlala kwakhe naye kubonisa ukuba njengoYesu, uPetros wayeloyisile ikhethe awayenalo amaYuda kubantu abajongwa njengabangahlambulukanga.—Mateyu 9:11; Luka 7:36-50.

Athetha ukuthini amazwi kaYesu athi “nawe utsho”?

▪ Xa wayebuzwa nguKayafa, umbingeleli omkhulu wamaYuda, ukuba achaze esidlangalaleni enoba unguKristu uNyana kaThixo kusini na, uYesu waphendula wathi: “Nawe utsho.” (Mateyu 26:63, 64) Wayethetha ukuthini?

UYesu wayengazami ukuphepha umbuzo kaKayafa. Ibinzana elithi “nawe utsho” kubonakala ukuba ayeqhele ukulisebenzisa amaYuda xa eqinisekisa ubunyani baloo nto ithethwayo. Ngokomzekelo, iYerusalem Talmud, uthotho lwemithetho lwamaYuda eyaqulunqwa ngenkulungwane yesine yeXesha Eliqhelekileyo, ithetha ngendoda yomYuda eyathi xa ibuzwa ukuba urabhi ubhubhile kusini na yathi: “Utsho nawe.” Impendulo yayo yathatyathwa njengeqinisekisa ukuba nyhani urabhi ubhubhile.

UYesu wayeqonda ukuba umbingeleli omkhulu unegunya lokumtshutshisa. Noko ke, ukuba wayethule wayeza kubonakala ngathi wayekhanyela ukuba unguKristu. Ngaloo ndlela impendulo kaYesu ethi “nawe utsho” yamshiya engenamathandabuzo umbingeleli omkhulu. Kwincwadi kaMarko, xa wayebuzwa nguKayafa ukuba unguMesiya, uYesu waphendula ngenkalipho wathi: “Ndinguye.”—Marko 14:62; funda uMateyu 26:25 noMarko 15:2.

[Umfanekiso okwiphepha 18]

Indawo yokusuka eFez, eMorocco