Inyaniso NgeArmagedon
“Bangoomoya beedemon . . . abaphuma baye kubo ookumkani bomhlaba . . . , babahlanganisela endaweni ekuthiwa ngesiHebhere yiArmagedon.” (akekeliswe sithi.)—ISITYHILELO 16:14, 16, IBhayibhile YesiXhosa.
IARMAGEDON, ekukhe kuthiwe “yiHar–Magedon,” ligama lendawo. Noko ke, kubonakala ukuba ayizange ibekho indawo enjalo apha emhlabeni.
Lithetha ukuthini ke, igama elithi “Armagedon”? Kutheni lisoloko linxulunyaniswa nesiganeko esinjengemfazwe?
Bahlanganiselwe endaweni ekuthiwa yiArmagedon
Igama lantlandlolo lesiHebhere uHar–Magedon lithetha “iNtaba yaseMegido.” Nangona ingazange ibekho loo ntaba, kodwa ikho indawo ekuthiwa yiMegido. Ikwindawo ekudibana kuyo iindlela ezimbini ekumntla-ntshona wommandla welizwe lakwaSirayeli lamandulo. Ayesilwela kufutshane naloo ndawo amadabi amaninzi. Ngenxa yoko, igama elithi Megido lanxulunyaniswa nemfazwe.a
Noko ke, eyona nto ibalulekileyo ngeMegido, asikokuliwa kweemfazwe apho kodwa sisizathu sokuba zilwelwe apho. IMegido yayiyinxalenye yeLizwe Lesithembiso uYehova uThixo awalinika amaSirayeli. (Eksodus 33:1; Yoshuwa 12:7, 21) Wafunga ukuba wayeza kuwakhusela xa ehlaselwa, yaye wenjenjalo. (Duteronomi 6:18, 19) Ngokomzekelo, kwakuseMegido apho uYehova wathi ngokungummangaliso wakhusela amaSirayeli kwimikhosi kaKumkani uYabhin wamaKanan kunye nentloko yomkhosi wakhe uSisera.—ABagwebi 4:14-16.
Ngaloo ndlela igama elithi “Harmagedon,” okanye “Armagedon,” linentsingiselo yokomfuziselo. Linxulunyaniswa nongquzulwano lwemikhosi emibini enamandla.
Isiprofeto esikwiSityhilelo sithetha ngexesha elingekude apho uSathana needemon zakhe beya kuphembelela oorhulumente babantu ukuba bahlanganise imikhosi yabo, ngaloo ndlela becela uThixo umngeni. UThixo uya kubulala izigidi zabantu kolo hlaselo.—ISityhilelo 19:11-18.
Ekubeni, iBhayibhile imchaza uThixo ‘njengonenceba, ozeka kade umsindo nonobubele bothando obuninzi,’ kutheni eza kubulala abantu abaninzi kangaka? (Nehemiya 9:17) Ukuze siqonde indlela uThixo enza ngayo izinto, kufuneka siphendule imibuzo emithathu: (1) Ngubani oqala le mfazwe? (2) Kutheni uThixo engenelela? (3) Luza kuba nayiphi imiphumo emhlabeni nakubantu bawo olu ngquzulwano?
1. NGUBANI OQALA LE MFAZWE?
Imfazwe yeArmagedon ayibangelwa nguThixo. Kunoko, uThixo uza khusela abantu abalungileyo kwabo bafuna ukubabulala. Kolu ngquzulwano abahlaseli ‘ngookumkani bomhlaba omiweyo uphela,’ iinkokeli zehlabathi. Kutheni behlasela? Kanye njengonodoli, oorhulumente nemikhosi baza kuntlokothiswa nguSathana ukuze bahlasele abanquli bakaYehova uThixo.—ISityhilelo 16:13, 14; 19:17, 18.
Ekubeni ithandwa gqitha inkululeko yokuthetha neyonqulo kwamanye amazwe namhlanje, ingcamango yokuba oorhulumente baza kutshayela unqulo inokuvakala ingamampunge. Noko ke, iintlaselo ezinjalo ziye zakho ngenkulungwane yama-20 yaye nangoku zisaqhubeka.b Nakuba kunjalo, kukho izinto ezimbini ezingundoqo ezenza kubekho umahluko phakathi kweentlaselo ezidlulileyo naleyo inxulunyaniswa neArmagedon. Okokuqala, olo hlaselo luza kwenzeka emhlabeni wonke. Okwesibini, indlela uYehova uThixo aza kusabela ngayo iza kuyodlula lee nayiphina indlela awakhe wasabela ngayo ngaphambili. (Yeremiya 25:32, 33) Olu ngquzulwano iBhayibhile iluchaza ngokuba ‘yimfazwe yemini enkulu kaThixo uSomandla.’
2. KUTHENI UTHIXO ENGENELELA?
UYehova uyalela abo bamnqulayo ukuba babe noxolo yaye bazithande iintshaba zabo. (Mika 4:1-3; Mateyu 5:43, 44; 26:52) Ngoko abasayi kuthabatha izikrweqe ukuze bazikhusele xa behlaselwa ngoburhalarhume. Ukuba uThixo akanakungenelela ukuze ahlangule abantu bakhe, bebeya kutshayelwa bathi nya. Ngenxa yoko, igama likaYehova uThixo, liyachaphazeleka. Ukuba abahlaseli bebenokukwazi ukubulala abantu Bakhe, loo nto ibiya kumenza abonakale engenalo uthando, okusesikweni okanye engeloncedo. Ayinakwenzeka loo nto!—INdumiso 37:28, 29.
UThixo akafuni kutshabalalisa naye nabani na, ngoko ubalumkisa ngokwaneleyo abantu ngoko aza kukwenza. (2 Petros 3:9) Esebenzisa iingxelo eziseBhayibhileni, ukhumbuza bonke abantu ukuba kwixesha elidluleyo wayebalwela abantu bakhe xa behlaselwa. (2 Kumkani 19:35) Kwakhona iBhayibhile ilumkisa ngelokuba kwixa elizayo xa uSathana nabantu bakhe behlasela abantu bakaThixo, uYehova uya kuqubisana nabo. Eneneni, kwakude kudala iLizwi likaThixo laxela ukuba uYehova uya kubatshabalalisa abangendawo. (IMizekeliso 2:21, 22; 2 Tesalonika 1:6-9) Ngelo xesha, baza kube bengathandabuzi abahlaseli ukuba baye bazithezela olunenkume ngokuqala uSomandla ngokwakhe.—Hezekile 38:21-23.
3. LUZA KUBA NAYIPHI IMIPHUMO EMHLABENI NAKUBANTU BAWO OLU NGQUZULWANO?
Imfazwe yaseArmagedon iza kubangela ukuba kusindiswe ubomi bezigidi zabantu. Enyanisweni, iza kutshayelela ixesha loxolo emhlabeni.—ISityhilelo 21:3, 4.
Incwadi yeSityhilelo ithetha “ngesihlwele esikhulu” esingenakubalwa esiza kusinda kolu ngquzulwano. (ISityhilelo 7:9, 14) Ngaphantsi kolwalathiso lukaThixo, aba baya kwenza umhlaba ube yiParadesi nto leyo eyinjongo kaYehova yantlandlolo.
Ngaba siyazi ukuba baza kuhlaselwa nini abantu bakaThixo?
[Imibhalo esemazantsi]
a Akuyonto ingaqhelekanga ukunxulumanisa indawo nemfazwe. Ngokomzekelo, iHiroshima isixeko saseJapan esadlakazwa ngebhombu yenyukliya, ngoku ingumfuziselo wesisongelo semfazwe yenyukliya.
b Ukubulawa kwamaYuda ngumzekelo welinge likarhulumente lokutshayela unqulo nohlanga oluthile. Ngexesha lamaKomanisi, iinkonzo ezahlukeneyo ezazikummandla weU.S.S.R. zacinezelwa kanobom nazo. Funda inqaku elithi “Abantu Abathanda Uxolo Bayazithethelela,” kwiMboniselo kaMeyi 1, 2011, epapashwe ngamaNgqina kaYehova.
[Umfanekiso okwiphepha 6]
UYehova uThixo wabakhusela abantu bakhe mandulo
[Umfanekiso okwiphepha 7]
UYehova uza kuphinda abakhusele abantu bakhe, kwimfazwe yeArmagedon