Ngaba uThixo ukubizele eluxolweni?

“Kodwa ke ukuba lowo ungelokholwa uyahlukana nalowo ukholwayo, makayekwe. Xa kunjalo indoda leyo ikholwayo nokuba ngumfazi akabotshelelwanga. Kaloku uThixo wasibizela ukuhlala ngoxolo.”—1 KORINTE 7:15, TE.

1. Umtshato ufanele ujongwe njani ngokweZibhalo?

UYEHOVA akazange abe nenjongo yokuba iqhina lo mtshato lifanele likhokelele ekwahlukaneni okanye ekuqhawuleni umtshato okubangela intliziyo ebuhlungu. Umtshato wawuza kuba lumanyano ‘lwanyama-nye,’ oluhlala luhleli nolwaluya kuphumela ekuvuyeni, ekuphumleni naseluxolweni. (Genesis 2:24; Rute 1:9) Ngokuqhelekileyo, iZibhalo ziluleka abantu abatshatileyo ukuba bahlale kunye, nokuba elinye iqabane lingumKristu elinye alikholwa. (1 Korinte 7:12-16) Ngaphezu koko, izenzo zenkohliso ezithi ziphumele ekuqhawukeni kwamaqhina omtshato zenza ubani aphendule kuThixo ngehambo yokuziphatha, ‘okuthiyileyo ukwala.’—Malaki 2:13-16.

2. AmaKristu akujonga njani ukwahlukana noqhawulo-mtshato?

² Ukungafezeki kwabantu nabanye oothunywashe baye maxa wambi bakhokelela ekwahlukaneni okanye ekuqhawuleni umtshato kwanaphakathi kwabakhonzi bakaThixo ababhaptiziweyo. Noko ke, ngenxa yendlela ephakamileyo amaKristu awujonga ngayo umtshato, ngokuqhelekileyo la manyathelo athatyathwa kuphela emva kokuzingisa ekwenzeni imigudu yokugcina umtshato ungaqhawuki. Kule nkalo, uThixo usibekela umzekelo obalaseleyo. ‘Njengendoda’ kaSirayeli wamandulo, wanyamezela iinkani, ukuvukela nokukrexeza ngokomoya kwabantu bakhe kangangeenkulungwane. (Isaya 54:1-5; Yeremiya 3:14-17; Hoseya 1:10, 11; 3:1-5) Kuphela kwaba semva kokufikelela kwinqanaba lokuba ngooncanyiwe awathi uYehova wabalahla njengohlanga.—Mateyu 23:37, 38.

3. (a) Kungokwaziphi izizathu ezivunyelwe ziZibhalo anokuthi umKristu ahlukane neqabane lomtshato? (b) Uqhawulo-mtshato oluvunyelwe ziZibhalo lunokwenzeka phantsi kwaziphi iimeko?

³ Maxa wambi, amanye amakholwa aya kubadala bebandla ukuya kufuna uncedo kwiingxaki ezinzulu zomtshato. Abadala abanalo igunya lokuxelela nabani na ukuba alishiye okanye aqhawule umtshato neqabane lomtshato, kodwa basenokubonisa oko iLizwi likaThixo likuthethayo ngale micimbi. Njengoko kubonisiwe kwinqaku elandulelayo, ukwahlukana kuvunyelwe yiBhayibhile kwimeko yokungondli okwenziwa ngabom, yokuphathwa kakubi okugqithiseleyo ngokoqobo, okanye yokuba sengozini ngokupheleleyo kobumoya. Kwakhona kuye kwaphawulwa ukuba uqhawulo-mtshato olungokweZibhalo apho kunokwenzeka ukuba ubani atshate kwakhona lunokwenziwa ukuba elinye iqabane ‘lihenyuzile,’ senzo eso sibandakanya iintlobo eziliqela zeentlobano zokuziphatha okubi ngokwesini. (Mateyu 19:9) Ngokuqhelekileyo, ukwahlukana okanye uqhawulo-mtshato alufanele lube sisigqibo ekufikelelwa kuso kwasekuqaleni, ekubeni kusenokwenzeka ukubuyisela uxolo lomtshato, ibe kwanokukrexeza okanye ezinye iindlela zokuhenyuza zinokuxolelwa liqabane lomtshato elimsulwa.—Mateyu 5:31, 32; thelekisa uHoseya 3:1-3.

4. (a) Khawushwankathele ngokufutshane oko uPawulos wakuxelela amaKristu atshatileyo kweyoku-1 yabaseKorinte 7:10-16. (b) Kunini apho kunokuthiwa: “UThixo wasibizela ukuhlala ngoxolo”?

⁴ Njengoko siye saphawula kwinqaku elingaphambilana, umpostile uPawulos wabongoza amaKristu atshatileyo ukuba angawashiyi amaqabane awo. (1 Korinte 7:10-16) Ngenxa yamazwi kaPawulos, ukuba iqabane elingakholwayo likhetha ukuhlala neqabane lalo lomtshato elingumKristu, lowo ukholwayo ufanele azame ukulinceda ngokomoya. (1 Petros 3:1-4) Ukuguquka kwalo kuya kuba negalelo elingakumbi ekwenzeni ikhaya libe yindawo yokuphumla neyoxolo. Kanti, ukuba lowo ungakholwayo uyaluchasa ukholo lweqabane lakhe elikholwayo ngokupheleleyo ngokokude akhethe ukwahlukana, unokwenza ntoni umKristu? Ukuba lowo ukholwayo uzama ukumnyanzela ukuba ahlale, lowo ungakholwayo unokuyenza imeko ibe mbi gqitha ngokokude umKristu aphulukane ngokupheleleyo noxolo. Ngoko esenzela ukufumana uxolo, lowo ukholwayo unokumyeka lowo ungakholwayo ahambe. (Mateyu 5:9) Kuphela kuxa iqabane lomtshato elingakholwayo lihamba apho kunokuthiwa: “UThixo wasibizela ukuhlala ngoxolo.” La mazwi awanakusetyenziswa ngokufanelekileyo ukuze kuthethelelwe ukwahlukana kwamaqabane amabini angamaKristu ngezizathu ezingezozaZibhalo okanye ezingenamsebenzi.

5. Yiyiphi imibuzo esifanele siyiqwalasele?

⁵ Nakuphi na ukwahlukana okanye uqhawulo-mtshato lunezizathu zako ezizodwa, ibe akukho “mgaqo” ozigubungela zonke iimeko. Kodwa ziziphi iingxaki asenokujamelana nazo umKristu owahlukene neqabane lakhe okanye oqhawule umtshato? Yintoni enokwenziwa ngazo? Yaye abanye banokuba luncedo njani?

Iimfuno Ezingokweemvakalelo Okanye Ezingokwesini

6. Ngokubhekisele kwiingxaki, kunokuthiwani ngokwahlukana okanye ngoqhawulo-mtshato?

⁶ Ukwahlukana okanye ukuqhawula umtshato okuvumelekileyo ngokweZibhalo kuya kucombulula iingxaki ezithile. Kodwa ngokusisiseko amanyathelo anjalo aphumela ekucombululeni iingxaki ezithile ngokubangela ezinye. Ngokomzekelo, omnye umKristu owayeqhawule umtshato wathi: “Ndimbulela kakhulu uYehova ngoxolo endinalo ngoku.” Kodwa wavuma oku: “Akuyonto ilula ukukhulisa abantwana ungumzali omnye. Ibe maxa wambi ubani unokuthi azive elilolo yaye edandatheke gqitha. Akuyonto ilula nangokuphathelele isini. Ubani umele aziqhelanise nobomi obahluke ngokupheleleyo.”a

7. Kutheni umKristu efanele acinge ngenyameko ngemiphumo yokwahlukana okanye yoqhawulo-mtshato?

⁷ Ngoko ke, ukuba umKristu umele enze ukhetho, ufanele acinge ngenyameko ngemiphumo esenokubakho yokwahlukana okanye yoqhawulo-mtshato. Ngokomzekelo, qwalasela iimfuno ezingokweemvakalelo, mhlawumbi umnqweno womfazi wokuba neqabane eliyindoda. (Thelekisa iGenesis 3:16.) Umfazi oqhawule umtshato usenokuba namathemba aqinisekileyo okuphinda atshate. Bambi banqwenela ukukhululeka kumtshato onezilingo, kodwa ngaba bakulungele ukwamkela isibakala sokuba kusenokwenzeka bangalifumani ithuba lokuphinda batshate?

8. (a) Ngenxa yoko kuthethwa kweyoku-1 yabaseKorinte 7:11, yintoni efanele icingisiswe ngomthandazo ngamaqabane angamaKristu awahlukene namaqabane awo omtshato? (b) Ziziphi iimfuno ezingafanele kukhiwa kancinane xa kuqwalaselwa ukwahlukana okanye uqhawulo-mtshato?

⁸ UPawulos wabhala oku: “Ukuba uthe wahlukana nayo, makahlale angatshati, okanye makaxolelaniswe nendoda yakhe.” (1 Korinte 7:11, TE) Ngokwenziwa komgudu othile, kusenokwenzeka ukuba umfazi “axolelaniswe” nendoda yakhe. Ngoko, ukuba amaqabane angamaKristu aye ahlukana, afanele akujonge ngokunzulu ukuxolelana, ekucingisisa ngomthandazo. Ngaphezu koko, akafanele asibethe ngoyaba isibakala sokuba iinkanuko zesini zisenokubangela ingozi. Kunokwenzeka ukuba uThixo abajonge njani ukuba ukusilela kwabo ukuxolelana kunokuphumela ekuweleni ekuziphatheni okubi? Amava omnye umfazi obhaptiziweyo angumzekelo wale ngozi. Emva koqhawulo-mtshato, waqalisa ukuthandana nendoda yehlabathi, ngokukhawuleza wamitha, ibe wasuswa kubudlelane. Nangona wathi kamva wabuyiselwa, amava akhe agxininisa imfuneko yokulumka nokwayama ngomthandazo ngoYehova ukuze kuphetshwe ‘ukona uThixo.’ (Genesis 39:7-12) Kwakhona kucacile ukuba iimfuno ezingokweemvakalelo nezingokwesini azifanele zikhiwe kancinane xa kuqaliswa ukucinga ngokwahlukana okanye ngoqhawulo-mtshato.

Ubulolo Bunokuncitshiswa

9. Sinokuwanceda njani amaKristu ahlukene namaqabane awo omtshato okanye aqhawule umtshato ukuba oyise ubulolo?

⁹ Ukuba ukwahlukana okanye uqhawulo-mtshato luyinto engaphephekiyo, kuya kunyanzeleka ukuba kujanyelwane neengxaki ezingumphumo woko. Ngokomzekelo, ubulolo buyingxaki enzulu yamanye amaKristu awahlukene namaqabane awo okanye aqhawule umtshato. Yintoni enokwenziwa ngabanye ngako oku? Abadala nabanye abasebandleni banokubonakalisa umdla wokomoya kubantu abanjalo, befuna ukubakhuthaza. (Thelekisa eyoku-1 yabaseTesalonika 5:14) Phakathi kwezinye izinto, sinokuthi ngezihlandlo ezithile sibamemele kumakhaya ethu aba bantu nabantwana babo ukuze babe kunye nentsapho yethu kwisidlo esilinganiselweyo nakwincoko eyakhayo. Akuyomfuneko ukulungiselela umdliva wokutya, kuba “ulungile umxhesho womfuno kunye nothando, ngaphezu kwenkomo etyetyisiweyo kunye nentiyo.” (IMizekeliso 15:17) Ngorhatya kunokuqukwa ukubaliswa kwamava aye ananditshwa kubulungiseleli okanye kulungiselelwe isifundo sencwadi ukwenzela intlanganiso yamaKristu.

10, 11. (a) Kungayiphi enye indlela anokuncedwa ngayo umKristu owahlukene neqabane lakhe okanye oqhawule umtshato? (b) Siyintoni isizathu sokulumka?

¹⁰ Ukumema umzali oqhawule umtshato okanye owahlukene neqabane kunye nabantwana bakhe ukuba bathelele intsapho yakho kubulungiseleli basentsimini kukwanokubanceda bahlangabezane nobulolo. Kakade ke, abanye abanakuthabatha indawo yomzali ongekhoyo, kodwa omnye umfazi ongumKristu oqhawule umtshato wathi: “Iinzima zokukhulisa abantwana bam ngaphandle kwendoda endlwini ziye zancitshiswa kakhulu luncedo lwabadala nezicaka ezisebandleni ezithe zazama ukubuyisa ilahleko ngeendlela eziluncedo.”

¹¹ Kanti, kukho isizathu sokulumka. Omnye udade wavuma oku: “Ekubeni unyana wam engenayise, umzalwana othile waba nomdla wobubele gqitha kuye. . . . Ndaqalisa ukubona indlela awayenobubele nawayenesisa ngayo kunyana wam, yaye iminqweno ephosakeleyo yaqalisa ukukhula ngaphakathi kum. KwakunjengakuDavide kanye xa wayeqalisa ukuba nomnqweno ophosakeleyo ngento eyayingeyoyakhe.” (2 Samuweli 11:1-4) Nangona ukuziphatha okubi ngokwesini kungazange kwenzeke, lo mfazi waziva eneentloni ngeengcinga nangezenzo zakhe zokutsala umdla, wacela uxolo kuYehova, waza waluphelisa unxulumano nalo mzalwana. Hayi indlela oku ekuyizekelisa kakuhle ngayo imfuneko yokugatya iminqweno ephosakeleyo ‘nokutyeshela nayiphi na into embi’!—1 Tesalonika 5:22, TE; Galati 5:24.

12. Umntu unokunciphisa ubulolo bakhe ngokwenza siphi isenzo esingqalileyo?

¹² Ubulolo bunokuncitshiswa ngokwenzela abanye izinto. Omnye udade awathi amaqhina omtshato wakhe aqhawuka wathi, “Ukuba uxakeke ekubeni nosukelo lokwenza okuthile nasekuncedeni abanye, alibikho ithuba lokuzisizela nelokuba lilolo.” Oko ‘kuba nosukelo lokwenza okuthile’ okwenziwa ngumntu owahlukene neqabane lakhe okanye oqhawule umtshato kunokuquka ukumemela intsapho ethile kwikhaya lakhe ukuza kuchitha urhatya ukwenzela unxulumano olwakhayo ngokomoya. Ukuba oku kunqabile ukuba kwenzeke ngenxa yemali okanye yezinye izizathu, unokutyelela uze ukhuthaze abagulayo okanye abanye. Kwakhona unokukwazi ukunceda abakhulileyo ngokuya kubathengela izinto okanye ngokubenzela imisetyenzana eyahlukahlukeneyo. Zinikele ngezo ndlela, yaye uya kube wandise ubungqina bokuba “ukupha kunoyolo ngaphezu kokuphiwa.”—IZenzo 20:35.

13. Luluphi olunye uncedo lokoyisa ubulolo?

¹³ Olunye uncedo lokoyisa ubulolo kukuthi ngalo lonke ixesha usuke kuqala ukuthelela abo ukholwa nabo kumsebenzi wokushumayela uBukumkani. Omnye udade wavuma oku, “Maxa wambi, ndithi ndizive ndililolo ngenxa yokukhumbula indoda, kodwa ngenxa yokuba nomsebenzi owandisiweyo wenkonzo yasentsimini nenkululeko endinayo ngoku yokunxulumana nabazalwana noodade, la mathuba awasoloko esibakho yaye aphela ngokukhawuleza.” Ukunikela ubungqina kwindlu ngendlu ngokuthe rhoqo kunokukhokelela ekubeni namabuyelo nasekuqhubeni izifundo zeBhayibhile zamakhaya nabantu abanomdla, abanokuthi abathile babo babe ngabakhonzi bakaYehova abazahluleleyo. Kakade ke, ukoyisa ubulolo akusosizathu esinaso sokubandakanyeka kubulungiseleli, kodwa oko kunokuba ngomnye umphumo walo msebenzi uvuyisayo nosikelelweyo.—IMizekeliso 10:22.

14. Yiyiphi imisebenzi efanele ibe nomphumo omhle kumaKristu awahlukene namaqabane awo okanye aqhawule umtshato?

¹⁴ Bonke abantu bakaYehova banokungenelwa ngokomoya ekubeni nesabelo kubulungiseleli, ekubeni nenxaxheba kwiintlanganiso zamaKristu ‘nasekufuneni tanci ubukumkani.’ (Mateyu 6:33) Ekubeni le misebenzi ihlaziyayo inomphumo omhle kubakhonzi bakaYehova xa bebonke, ukuba nosukelo lwayo kunokuwakha kwanamaKristu awahlukene namaqabane awo okanye aqhawule umtshato. Le misebenzi ayiyi kucombulula zonke iingxaki zawo, kodwa ifanele iphucule imbono yawo.

Umthandazo Unendima Ebalulekileyo

15. Umthandazo unokuba nayiphi indima kubomi babo bamele baziqhelanise nokuba ngabangatshatanga kwakhona?

¹⁵ Omnye udade ongumKristu ekwafuneka aziqhelanise nokuba ngongatshatanga kwakhona wancedwa “kukuzigcina exakekile kwinkonzo yasentsimini . . . nakukutyelela abantu abagulayo, abakhulileyo nabapholileyo.” Kodwa wongezelela oku: “Nanini na ndiziva ndililolo, ndithi ndityelele abanye ndize ndithandazele amandla, ndisazi ukuba uSathana uxakeke gqitha.” Ewe, umthandazo osuk’ entliziyweni ubalulekile ukuba kuza kugcinwa ingqibelelo kuThixo. Imithandazo yamaKristu ahlukene namaqabane awo okanye aqhawule umtshato inokuquka ukucela umoya kaYehova nesiqhamo sawo sokuzeyisa ukuze akwazi ukulawula iinkanuko zesini. (Luka 11:13; Galati 5:22, 23; Kolose 3:5, 6) Ngaphezu koko, ekubeni ukwenza izigqibo ezazikhe zenziwa yindoda kunokuzisa iingxaki kwabanye abafazi abahlukene namaqabane abo okanye abaqhawule umtshato, kwakhona kunokufuneka bathandazele uncedo lukaThixo kwimicimbi yokwenza izigqibo ngobulumko nasekuhlangabezaneni nezilingo ezahlukahlukeneyo.—Yakobi 1:2-8.

16. Ngokuphathelele ukwahlukana okanye uqhawulo-mtshato, kunokuthiwani ngeemvakalelo zokuba netyala?

¹⁶ Iimvakalelo zokuba netyala zinokubonakala zizezilingayo. Omnye umKristu wavuma oku: “Ukuziva unetyala okuthi kubekho ebudeni boqhawulo-mtshato, nokuba uliqabane elimsulwa, kunokwesamela.” Kakade ke, kufanelekile ukuba uzive unetyala ukuba ukwahlukana okanye ukuqhawula umtshato kwenzeke ngenxa yokuba uthe ngokungenakuthetheleleka wakwala ukuthwala iimbopheleleko zomtshato. (1 Korinte 7:3-5) Kodwa ukuba ukwahlukana okanye ukuqhawula umtshato kwenzeka ngezizathu ezingokweZibhalo emva kokucingisiswa ngomthandazo, kuya kuba kokufanelekileyo ukucela uncedo lukaYehova ukuze koyiswe iimvakalelo ezingathethelelekiyo zokuziva unetyala. Kunokongezelelwa ukuba abadala bebandla bafanele bakuphaphele ukunikela isiluleko esisekelwe eBhayibhileni baze bangalenzi nzima icebiso labo ngendlela yokuba umKristu enziwe azive enetyala ngokufikelela okanye ngokuvumela ukwahlukana okanye ukuqhawula umtshato okuvunyelwayo yiBhayibhile.

Ukugcinwa ‘Luxolo LukaThixo’

17. Yintoni enokunceda onke amaKristu ukuba onwabe aze axhathise kweli hlabathi lineenkathazo?

¹⁷ Ngokufuthi amaKristu awahlukene namaqabane awo okanye aqhawule umtshato aneengxaki ezikhethekileyo. Kanti, ukusa kumlinganiselo othile, “kwaezo ntlungu ziyenzeka kubo bonke abazalwana [bethu] abasehlabathini.” (1 Petros 5:6-11) Ngokomzekelo, intshutshiso ichaphazela bonke abakhonza uYehova, ibe awona maKristu maninzi ajamelene neengxaki zemali okanye ezempilo, ukatyo, izilingo njalo njalo. Ngoko ke, njengamanye amaNgqina kaYehova, umKristu owahlukene neqabane lakhe okanye oqhawule umtshato kufuneka ahlale ehlangabezana neemfuno zokomoya ngofundisiso lweBhayibhile, ngokubakho rhoqo kwiintlanganiso, ngokukhuthala kwinkonzo yasentsimini, ngokuxakeka kwezinye izinto zenkonzo engcwele nangokuthandaza rhoqo khon’ ukuze ahlale esondele kuYehova. (Mateyu 5:3) Ukusilela ukwenza oku bekuya kububeka engozini ubumoya bakhe nawuphi na umKristu, ngoxa ‘ukufuna tanci uBukumkani’ kunika ngalinye ingqina likaYehova elinyanisekileyo umlinganiselo ophawulekayo wolonwabo nowokuxhathisa kweli hlabathi lizele ziinkathazo.

18. Yiyiphi imibuzo namanyathelo afanele acingisiswe ngokunzulu ngamaqabane angamaKristu awahlukeneyo?

¹⁸ Ukuxhathisa kwethu ngokomoya kuxhomekeke kwindlela thina esilisebenzisa ngayo iLizwi likaThixo. Ngoko ke, ukuba ungumKristu owahlukene neqabane lomtshato nozahlulele kuThixo, ngaba uye wasifaka entliziyweni isiluleko sikaPawulos esikweyoku-1 yabaseKorinte 7:10-16? Uya kwenza kakuhle ukwenza ukuxolelana kube ngumbandela wokuthandazelwa ngokunyanisekileyo, ingakumbi ukuba sele nahlukene kangangexesha elithile. Kwakhona usenokuzibuza: Yintoni uYehova ayilindeleyo kum njengomntu otshatileyo? Akafanele na amaqabane angamaKristu avisisanise ubomi bawo nezinto ezifunwa nguThixo kwabo batshatileyo? Ngaba kunokwenzeka ukuba kube asiyifumani intsikelelo kaYehova ngenxa yokuba sisilele ukuhlonela izifungo zethu zomtshato? Khawucinge nje ngoko kulungileyo ebekunokuphunyezwa ukuba beninokuxubusha imicimbi ngokuthobekileyo, nithandaze ngokunyanisekileyo nize nilisebenzise ngokukhutheleyo iLizwi likaThixo ebomini. Hayi indlela ebekuya kuba kuhle ngayo ukuba nina nobabini beninokucombulula iingxaki zomtshato wenu nize niphinde ninandiphe ubomi kunye kwikhaya lokuphumla neloxolo!

19. NgokweyabaseFilipi 4:6, 7, yintoni exabisekileyo enokunanditshwa ngabo bonke abakhonzi bakaYehova?

¹⁹ Bonke abakhonzi abathembekileyo bakaYehova bafuna ibe banokunandipha into ethile exabisekileyo—“uxolo lukaThixo, olugqithisele kuko konke ukuqonda.” NjengamaKristu, sinokuba nalo olu xolo luxabisekileyo ukuba sithobela amazwi kaPawulos athi: “Ningaxhaleli nto; mazithi iingcelo zenu ezintweni zonke, ngako ukuthandaza nokukhunga, ndawonye nokubulela, zaziswe kuye uThixo. Lwaye uxolo lukaThixo, olugqithisele kuko konke ukuqonda, luya kuzigcina iintliziyo zenu neengqiqo zenu kuKristu Yesu.”—Filipi 4:6, 7.

20. (a) Luyintoni “uxolo lukaThixo”? (b) Kungakhathaliseki ukuba sitshatile okanye asitshatanga, yintoni esimele siyenze?

²⁰ Olo xolo kukuzola nokuphola okuvela kuThixo, okubakho kwanaphakathi kwezona meko zilingayo. Luvela kulwalamano olusondeleyo noYehova nasekubeni nolwazi lokuba senza oko kukholekileyo emehlweni akhe. Abo ‘banoxolo lukaThixo’ bavumela umoya wakhe ukuba ubashukumise, ibe aboyiswa lixhala. Ngoba? Kuba bayazi ukuba akukho nanye into eyenzekayo kubo ngaphandle kokuba ivunyelwe nguThixo. (Efese 4:30; thelekisa iZenzo 11:26.) Ngoko enoba asitshatanga okanye sitshatile, sahlukene namaqabane ethu okanye siqhawule umtshato, masinandiphe “uxolo lukaThixo.” Yaye kwanga singanentembelo njengoko uDavide wenzayo, owavakalisa oku: “Ndiya kulala phantsi, ndilale ubuthongo kwangoku, ndixolile, ngokuba wena, Yehova, undihlalisa ndikholosile, noko ndindedwa.”—INdumiso 4:8.

[Umbhalo osemazantsi]

Unokuphendula Njani?

◻ Kuphantsi kwaziphi iimeko apho kunokuthiwa: “UThixo wasibizela ukuhlala ngoxolo”?

◻ Bunokuncitshiswa njani ubulolo?

◻ Yiyiphi indima ofanele ube nayo umthandazo kubomi bomKristu owahlukene neqabane lakhe okanye oqhawule umtshato?

◻ Unokuluchaza njani “uxolo lukaThixo” olugcina iintliziyo zabakhonzi bakaYehova abangatshatanga, abatshatileyo, abahlukene namaqabane abo, okanye abaqhawule umtshato?

[Umfanekiso okwiphepha 29]

Umthandazo unokunika onke amaKristu athembekileyo “uxolo lukaThixo” oluya kuzigcina iintliziyo neengqiqo zawo