Ngaba UThixo Xa Exolela, Uyalibala?

IMPENDULO yalo mbuzo nguewe. Mayela nabo abathandayo uYehova uthembisa oku: “Ndiya kusixolela isiphoso sabo, nesono sabo andiyi kuba sasikhumbula.” (Yeremiya 31:34) Ngaloo ndlela uYehova uyasiqinisekisa ukuba xa exolela aboni abaguqukayo, akaphindi asikhumbule isono sabo. Kodwa ngaba oko kuthetha ukuba uMdali wendalo akakwazi kuzikhumbula izono xa ezixolela? Amazwi kaHezekile asithela thsuphe ngendlela axolela nalibala ngayo uThixo.—Funda uHezekile 18:19-22.

Esebenzisa umprofeti uHezekile njengesithethi sakhe, uYehova wabhengeza umgwebo nxamnye noYuda neYerusalem engathembekanga. Lonke uhlanga lwalushiya unqulo lukaYehova laza ilizwe lazaliswa lugonyamelo. UYehova wakuxela kwangaphambili ukutshatyalaliswa kweYerusalem ngamaBhabhiloni. Kodwa kanye xa wayevakalisa eso sigwebo uYehova wachaza nekamva eliqaqambileyo. Mntu ngamnye wayenokhetho; ngamnye eza kuthwala uxanduva ngendlela aphila ngayo.—Vesi 19, 20.

Kuthekani ukuba umntu uyayeka ukwenza izinto ezimbi aze enze izinto ezintle? UYehova wathi: “Ngokubhekisele kongendawo, ukuba unokuthi abuye kuzo zonke izono azenzileyo aze okunene agcine yonke imimiselo yam, aphumeze okusesikweni nobulungisa, ngokuqinisekileyo uya kuhlala ephila. Akayi kufa.” (Vesi 21) Ewe, uYehova ‘wayekulungele ukuxolela’ umoni ozishiyayo iindlela zakhe, abonise inguquko enyanisekileyo.—INdumiso 86:5.

Kuthekani ngezono aye wazenza? UYehova uthi: “Konke ukunxaxha kwakhe akwenzileyo—akuyi kukhunjulelwa kuye.” (Vesi 22) Phawula ukuba izono zomntu oguqukileyo ‘aziyi kukhunjulelwa kuye.’ Kuthetha ntoni oku?

EBhayibhileni, igama lesiHebhere eliguqulelwe ngokuthi “khumbula” linokuthetha okungakumbi kunokukhumbula into eyenzeke kwixa elidluleyo. Mayela neli gama, enye imbekiselo ithi: “Lidla ngokubhekisela kwinto ethile efanele yenziwe okanye inento yokwenza nezenzi.” Ngaloo ndlela, “Ukukhumbula” kunokuthetha “ukwenza into ethile.” Ngenxa yoko, xa uYehova esithi kumoni oguqukileyo izono zakhe ‘aziyi kukhunjulelwa kuye,’ Uthetha ukuba akayi kuphinda amohlwaye loo mntu ngenxa yezono ebezenzile, njengokummangalela.a

Amazwi kaHezekile 18:21, 22 asizobela umfanekiso ngqondweni wendlela axolela ngayo uThixo. Xa uYehova exolela izono zethu, akasayi kuze aphinde asohlwaye ngenxa yazo kwixa elizayo. Kunoko, uziphosa ngasemva izono zabantu abaxoleleyo. (Isaya 38:17) Kuba ngathi uzicimile ezo zono.—IZenzo 3:19.

Njengabantu abangafezekanga, siyayifuna inceba kaThixo. Ngaphezu koko, sisoloko sisona. (Roma 3:23) Kodwa uYehova ufuna sazi ukuba xa siguquka ngokunyanisekileyo, ukulungele ukusixolela. Kwaye xa exolela, uyalibala—oko kuthetha ukuba, akanakuze asohlwayele izono esiye saguquka kuzo. Hayi indlela athuthuzela ngayo loo mazwi! Ngaba inceba kaThixo ikwenza ufune ukusondela kuye?

Izibhalo onokuzifunda ngoJulayi:

◼ Hezekile 6–20

[Umbhalo osemazantsi]