Abantu Abaselula Bayabuza

Yintoni Endifanele Ndiyazi Ngeewebhusayithi Zokuncokola?—Inxalenye 2

Landelelanisa ezi zinto zilandelayo ngokokubaluleka kwazo kuwe.

․․․․․ ukukhusela inkcazelo yam eyimfihlo

․․․․․ ixesha lam

․․․․․ indlela endaziwa ngayo

․․․․․ abahlobo bam

YIYIPHI kwezi zingentla othi yeyona ibaluleke ngaphezu kwazo zonke kuwe? Yona kunye nazo zonke ezi zidweliswe ngasentla ziba sesichengeni xa usebenzisa iiwebhusayithi zokuncokola.

Ngaba ufanele uzisebenzise ezi webhusayithi? Ukuba usahlala nabazali, ngabo abafanele benze eso sigqibo.a (IMizekeliso 6:20) Njenge-Internet, nazo ezi webhusayithi ziluncedo ukanti zikwayingozi. Ukuba abazali bakho abafuni ukuba uzisebenzise, ufanele ubathobele.—Efese 6:1.

Ukanti, ukuba abazali bakho bayakuvumela ukuba usebenzise iiwebhusayithi zokuncokola, unokuziphepha njani iingozi? Inqaku elithi “Abantu Abaselula Bayabuza” kuVukani! kaJulayi 2011 lachaza izinto ezimbini ofanele uzilumkele—ukukhusela inkcazelo yakho eyimfihlo kunye nexesha lakho. Kweli nqaku siza kuthetha ngendlela owaziwa ngayo kunye nabahlobo bakho.

INDLELA OWAZIWA NGAYO

Ukuze ukhusele isidima sakho kufuneka ukulumkele ukunika abanye izizathu zokucinga ukuba ungumntu ombi. Ngokomzekelo, masithi unemoto entsha kraca engenawo nomkrwelo. Ngaba ubungenakuthanda ukuba ihlale injalo? Ubuya kuvakalelwa njani ukuba ubunokuyitshayisa kuba nje uye waqhuba ngokungakhathali?

Kunokwenzeka into efanayo nangesidima sakho xa usebenzisa iwebhusayithi yokuncokola. Intombazana egama linguCara ithi: “Unokuphelelwa sisidima xa ufaka ifoto okanye ubhala umyalezo othile ungakhange ucingisise kakuhle ngawo.” Ngokomzekelo, cinga ngoko kunokwenzeka kwisidima sakho ngenxa . . .

● Yeefoto zakho. Umpostile uPetros wabhala wathi: “Abanye mabasoloko bekubona unesimilo.” (1 Petros 2:12, iContemporary English Version) Yintoni oye wayiphawula ngeefoto eziba kwiwebhusayithi yokuncokola?

“Ngamanye amaxesha ndikhe ndabona iifoto zabantu ebendibahlonipha, bebonakala ngathi banxilile.”—UAna, oneminyaka eli-19 ubudala.

“Ndikhe ndabona amanye amantombazana ezifotweni enxibe ngendlela evuselela inkanuko. Indlela abayiyo kule webhusayithi yahlukile kwindlela ababa yiyo xa ubabona ubuso ngobuso.”—UCara, oneminyaka eli-19.

Ubuya kumjonga njani umntu (1) onxibe ngendlela evuselela inkanuko okanye (2) obonakala ngathi unxilile kwifoto ayifake kwiwebhusayithi yokuncokola?

1 ․․․․․

2 ․․․․․

● Izinto ozibhalayo. Ama-Efese 4:29 athi: “Makungaphumi lizwi libolileyo emlonyeni wenu.” Abanye abantu baye baphawula ukuba abantu bayathanda ukufaka izithuko, ukuthetha izinto ezingcolileyo okanye intlebendwane xa bencokola kwezi webhusayithi.

“Abantu bathetha nantoni na xa bencokola kwezi webhusayithi. Ezi zinto zingcolileyo bacinga ukuba azilumezi kangako xa zibhaliwe kunaxa zithethwa. Nangona ungade uthuke kodwa usenokuthetha izinto ezingcolileyo.”—UDanielle, oneminyaka eli-19 ubudala.

Ucinga ukuba yintoni eyenza abantu bacinge ukuba banokufaka baze bathethe nantoni na kwiwebhusayithi yokuncokola?

․․․․․

Ngaba iifoto nezinto ozibhala kwezi webhusayithi zibalulekile? Ewe! Intombazana ekuthiwa nguJane ithi: “Esikolweni kusoloko kusithiwa zibalulekile. Kuthiwa abaqeshi baza kujonga izinto ozibhale kwiwebhusayithi yokuncokola xa befuna ukukwazi ukuba ungumntu onjani.”

Kwincwadi ethi Facebook for Parents, uGqr. B. J. Fogg uthi, wenza kanye loo nto xa eza kuqesha umntu. Uthi: “Ndicinga ukuba oku kundinceda ndifikelele kwizigqibo ezifanelekileyo. Xa ndivula iwebhusayithi yomntu ofake isicelo somsebenzi ndize ndibone ukuba ufake izinto ezibubuvuvu, andimqeshi loo mntu. Ngoba kutheni? Kuba ndifuna ukusebenza kuphela nabantu ababhadlileyo.”

Ukuba ungumKristu, kukho nenye into ebalulekileyo ofanele uyikhumbule—indlela ezibachaphazela ngayo abanye izinto ozibhalayo, enoba bangamaKristu okanye abangawo. Umpostile uPawulos wabhala wathi: “Siyakuphepha ukuba sisikhubekiso nangayiphi na indlela.”—2 Korinte 6:3; 1 Petros 3:16.

Oko Unokukwenza

Ukuba abazali bakho bayakuvumela ukuba usebenzise iiwebhusayithi zokuncokola, khawujonge iifoto ozifakileyo uze uzibuze: ‘Ezi foto zibonisa ntoni ngam? Ngaba yindlela endifuna ukwaziwa ngayo le? Ngaba ndingaba neentloni xa ezi foto zinokubonwa ngabazali bam, ngumdala ongumKristu okanye ngumntu oza kundiqesha?’ Ukuba impendulo yakho nguewe, kuza kufuneka wenze utshintsho. Wenza kanye loo nto uKate oneminyaka engama-21 ubudala. Uthi: “Omnye umdala wabona ifoto yam kwiwebhusayithi yokuncokola, wathetha nam ngayo yaye ndayixabisa loo nto. Ndandisazi ukuba wayefuna ukukhusela isidima sam.”

Kwakhona kufuneka umane uzihlola izinto ozibhalileyo, uze uhlole nezo zibhalwe ngabanye. Musa ukuyinyamezela ‘intetho yobudenge nokuqhula okungamanyala.’ (Efese 5:3, 4) UJane oneminyaka eli-19 ubudala wathi: “Ngamanye amaxesha abantu babhala izinto ezingafanelekanga okanye bathethe amanyala ngendlela echuliweyo. Nangona ingenguwe othethe loo mazwi, akujongisa kakubi ngabantu kuba akwiwebhusayithi yakho.”

Yintoni oza kuyenza ukuze uqiniseke ukuba azisithobi isidima sakho iifoto nezinto ozibhala kwiwebhusayithi yokuncokola?

․․․․․

ABAHLOBO BAKHO

Ukuba ubunemoto entsha, ngaba ubunokukhwelisa nabani na kuyo? Ukuba abazali bakho bayakuvumela ukuba usebenzise enye yezi webhusayithi, kufuneka ukhethe abantu abaza kuba ngabahlobo bakho. Ngaba uza kuvumela nabani na abe ngumhlobo wakho?

“Abanye abantu bayakuthanda ukuba nabahlobo abaninzi. Basenokude baquke nabantu abangabaziyo.”—UNayisha, oneminyaka eli-16 ubudala.

“Kwiwebhusayithi yokuncokola usenokuphinda udibane nabahlobo bakudala. Kodwa kubhetele ubalibale ngonaphakade abahlobo abanjalo.”—UEllen, oneminyaka engama-25 ubudala.

Oko Unokukwenza

Icebiso: Hlola uze uhluze. Hlola uluhlu lwabahlobo bakho uze ubacime abanye. Xa uhlola umhlobo ngamnye, zibuze:

1. ‘Ndimazi kangakanani lo mntu?’

2. ‘Zinjani iifoto zakhe kunye nezinto azithethayo?’

3. ‘Ngaba ungumhlobo olungileyo?’

“Nyanga nganye ndiye ndihlole uluhlu lwabahlobo bam. Xa kukho umntu endingamginyisisi ncam okanye endingamazi kakuhle, ndiyamcima.”—UIvana, oneminyaka eli-17 ubudala.

Icebiso: Bakhethe abahlobo bakho. Lwazi uhlobo lwabantu oza kubavumela babe ngabahlobo bakho. (1 Korinte 15:33) Ngokomzekelo, ibhinqa eliselula ekuthiwa nguLeanne lithi: “Nantsi into endiyenzayo: Ukuba andikwazi, andikuvumeli ukuba ube ngumhlobo wam. Xa ubhale izinto endingazithandiyo, ndiyakucima kuluhlu lwabahlobo lwam ndize ndingaphindi ndikuvumele ube ngumhlobo wam.” Nabanye benjenjalo.

“Andivumeli nabani na ukuba abe ngumhlobo wam. Inokuba yingozi loo nto.”—UErin, oneminyaka engama-21 ubudala.

“Abanye abantwana endandifunda nabo esikolweni baye bandithumela imiyalezo befuna ukuba ngabahlobo bam. Kodwa babengengobahlobo bam esikolweni; ngoko yintoni eza kubangela ndifune babe ngabo ngoku?”—UAlex oneminyaka engama-21 ubudala.

Bhala apha ngezantsi indlela oza kubakhetha ngayo abahlobo bakho.

․․․․․

Amanye amanqaku athi “Abantu Abaselula Bayabuza” afumaneka kwiWebhusayithi ethi www.watchtower.org/ype

[Umbhalo osemazantsi]

[Amagama acatshulweyo akwiphepha 10]

Umzekeliso weBhayibhile uthi: “Igama elilungileyo linokunyulwa ngaphezu kobutyebi obuninzi.”—IMizekeliso 22:1

[Ibhokisi ekwiphepha 12]

BUZA ABAZALI BAKHO

Xubusha eli nqaku kunye nelithi “Abantu Abaselula Bayabuza” elikuVukani! kaJulayi 2011 kunye nabazali bakho. Thethani ngendlela ukusebenzisa kwakho i-internet okuyichaphazela ngayo (1) inkcazelo ephathelele wena, (2) ixesha lakho, (3) isidima sakho, kunye (4) nabahlobo bakho.

[Ibhokisi ekwiphepha 13]

UMYALEZO OYA KUBAZALI

Kusenokwenzeka ukuba abantwana bakho banolwazi olungaphezu kolwakho nge-Internet. Kodwa ingqondo yabo ayilingani neyakho. (IMizekeliso 1:4; 2:1-6) Kunjengokuba ingcali yokhuseleko lwe-Internet, uParry Aftab esitsho: “Abantwana bazi yonk’ into le ngezobugcisa. Kodwa ke bona abazali babazi kakuhle ubomi.”

Kwiminyaka yakutshanje, iiwebhusayithi zokuncokola ziye zasetyenziswa ehlabathini lonke. Ngaba umntwana wakho ubhadle ngokwaneleyo ukuba asebenzise enye yazo? Nguwe ofanele wenze eso sigqibo. Ukuncokola kwiwebhusayithi kuneengozi zako kanye njengokuba kunjalo ngokuqhub’ imoto, ukuba neakhawunti yebhanki okanye ukusebenzisa icredit card. Ziziphi ezinye zazo?

IZINTO EZIYIMFIHLO. Ulutsha oluninzi aluyiqondi imiphumo yokuchazela abanye yonk’ into le xa lusebenzisa i-Internet. Ukuchazela abanye apho luhlala khona, lufunda khona okanye ixesha oluba sekhaya ngalo kunokubeka ukhuseleko lwentsapho yakho esichengeni.

Oko unokukwenza. Xa abantwana bakho babesebancinane, wabafundisa ukujong’ iimoto ngaphambi kokuba bawel’ indlela. Ekubeni ngoku sele bethe dlundlu, bafundise indlela yokuzikhusela xa besebenzisa i-Internet. Funda inkcazelo eyongezelelekileyo ngokuphathelele izinto eziyimfihlo, kwinqaku elithi “Abantu Abaselula Bayabuza,” lale nyanga iphelileyo. Kwakhona, funda iphepha 3-9 kuVukani! kaOktobha 2008. Emva koko, xubusha la manqaku kunye nabo. Zama ukubenza basebenzise “ubulumko bobuqili namandla okucinga” ukuze bazikhusele xa besebenzisa i-Internet.—IMizekeliso 3:21.

IXESHA. Kunokuba nzima ukwahlukana nezi webhusayithi zokuncokola. URick oneminyaka engama-23 ubudala uthi: “Ndaba likhoboka lazo emva nje kweentsuku ezimbalwa ndiqalile ukuzisebenzisa. Ndandichitha iiyure ndibuka iifoto, ndibhala yaye ndifunda imiyalezo.”

Oko unokukwenza. Funda uze uxubushe nomntwana wakho inqaku elinomxholo othi “Abantu Abaselula Bayabuza . . . Ngaba Ndilikhoboka Lezinto Ze-elektroniki,?” kuVukani! kaJanuwari 2011. Funda ngokukodwa ibhokisi ekwiphepha 26 enomxholo othi “Ndandilikhoboka Lezinto Ze-elektroniki.” Nceda umntwana wakho “abe ngcathu ngemikhwa” aze alilinganisele ixesha alichitha esebenzisa i-Internet. (1 Timoti 3:2) Mxelele ukuba zikho ezinye izinto anokuzenza ngaphandle kokuncokola kwiwebhusayithi.

INDLELA AZIWA NGAYO. Umzekeliso weBhayibhile uthi: “Nditsho kwaumntwana waziwa ngokuziphatha kwakhe.” (IMizekeliso 20:11, iBhayibhile YesiXhosa Yowe-1996) Kuba njalo naxa esebenzisa i-Internet. Ngaphezu koko, ekubeni iiwebhusayithi zokuncokola zisetyenziswa nguwonke wonke, izinto ezifakwa ngabantwana bakho kuzo zinokuchaphazela kungekhona nje esabo isidima kodwa kwanesentsapho yakho.

Oko unokukwenza. Abantwana bafanele bazi ukuba izinto abazifaka kwi-Internet ziveza oko bakuko. Kwakhona, kufuneka bazi ukuba abanakukwazi ukuzicima izinto abazifake kwi-Internet. Kwincwadi ethi CyberSafe, uGqr. Gwenn Schurgin O’Keeffe uthi: “Kunzima ngabantwana ukuyiqonda into yokuba abanakukwazi ukuzicima izinto abazifake kwi-Internet kodwa ke kufuneka bayifunde loo nto. Enye yeendlela zokubafundisa, kukubaxelela ukuba bangayithethi kwi-Internet into ebebengayi kuyixelela nabani na ebusweni.”

ABAHLOBO BABO. UTanya oneminyaka engama-23 ubudala uthi: “Ulutsha oluninzi lufuna abanye bacinge ukuba luthandwa ngabantu abaninzi, ngoko luvumela nabantu olungabaziyo okanye abaziphethe kakubi ukuba babe ngabahlobo balo.”

Oko unokukwenza. Nceda unyana okanye intombi yakho ingavumeli wonke umntu lo abe ngumhlobo wayo. Ngokomzekelo, uAlicia oneminyaka engama-22 ubudala akadli ngokuba ngumhlobo wabahlobo bakhe. Uthi: “Ukuba andikwazi okanye andizange ndakha ndakubona, andikuvumeli ukuba ube ngumhlobo wam kuba nje waziwa ngabahlobo bam.”

UTim nenkosikazi yakhe uJulia nabo baneyabo iwebhusayithi yokuncokola ebanceda babone izinto ezithethwa ngabahlobo bentombi yabo. UJulia uthi: “Samchazela ukuba asiquke nathi kuluhlu lwabahlobo bakhe. Abantu athetha nabo kwi-Internet kufana nokungathi ubamemele kwikhaya lethu. Ngoko sifuna ukubazi ukuba bangoobani.”

[Umfanekiso okwiphepha 11]

Njengokuba imoto inokutshayisa xa uqhuba ngokungakhathali, unokuzenzela igama elibi xa ufaka iifoto ezivuselela inkanuko okanye uthetha izinto ezibolileyo kwiwebhusayithi yokuncokola

[Umfanekiso okwiphepha 12]

Ngaba ubunokumkhwelisa umntu ongamaziyo emotweni yakho? Kutheni ke ngoko uvumela umntu ongamaziyo ukuba abe ngumhlobo wakho?