Masivuselelane Eluthandweni Nasemisebenzini Emihle—Njani?

“Masiqwalaselane ukuze sivuselelane eluthandweni nasemisebenzini emihle, . . . masikhuthazane, ngokungakumbi njengoko nibona ukuba imini iyasondela.”—HEBHERE 10:24, 25, NW.

1, 2. (a) Kutheni kwakubalulekile ukuba amaKristu okuqala afumane intuthuzelo nokhuthazo xa ehlanganisana? (b) Sisiphi isiluleko sikaPawulos esabethelela imfuneko yokuhlanganisana?

BABEHLANGANISENE emfihlekweni, bebuthelene ndawonye kwindlu etshixiweyo. Ngaphandle, ingozi yayinokuvela nakweliphi na icala. INkokeli yabo, uYesu, yayisandul’ ukubulawa esidlangalaleni, ibe yayibalumkisile abalandeli bayo yathi babeya kuphathwa ngendlela efanayo. (Yohane 15:20; 20:19) Kodwa njengokuba babethethela phantsi ngoYesu ababemthanda, ukuba kunye kumele ukuba ubuncinane kwabenza baziva bekhuselekile.

² Njengokuba iminyaka yayiqengqeleka, amaKristu ayejamelana nazo zonke iintlobo zezilingo nokutshutshiswa. Njengabo bafundi bokuqala, ukuhlanganisana ndawonye kwakuwakhuthaza. Ngaloo ndlela, umpostile uPawulos wabhala oku kumaHebhere 10:24, 25: “Masiqwalaselane ukuze sivuselelane eluthandweni nasemisebenzini emihle, singakutyesheli ukuhlanganisana kwethu ndawonye, njengoko kulisiko labathile ukwenjenjalo, kodwa masikhuthazane, ngokungakumbi njengoko nibona ukuba imini iyasondela.”

3. Kutheni unokuthi amaHebhere 10:24, 25 akangomyalelo wokuba amaKristu ahlanganisane nje kuphela?

³ Loo mazwi akangomyalelo wokuba baqhubeke behlanganisana nje kuphela. Anikela umlinganiselo ophefumlelwe nguThixo wazo zonke iintlanganiso zamaKristu—yaye eneneni, ngaso nasiphi na isihlandlo amaKristu enxulumana kunye. Namhlanje kunanini na ngaphambili, ekubeni siyibona ngokucacileyo imini kaYehova isondela, iingcinezelo neengozi zale nkqubo ingendawo zenza kubaluleke ukuba iintlanganiso zethu zifane nendawo yokhuseleko, umthombo wamandla nokhuthazo kubo bonke. Sinokwenza ntoni ukuze siqinisekise ukuba ziba njalo? Kaloku, makhe sihlolisise amazwi kaPawulos ngenyameko, sibuza imibuzo emithathu ephambili: Kuthetha ukuthini ‘ukuqwalaselana’? Kuthetha ukuthini ‘ukuvuselelana eluthandweni nasemisebenzini emihle’? Okokugqibela, ‘sinokukhuthazana’ njani kula maxesha anzima?

“Masiqwalaselane”

4. Kuthetha ukuthini ‘ukuqwalaselana’?

⁴ Xa uPawulos wabongoza amaKristu ukuba ‘aqwalaselane,’ wasebenzisa isenzi sesiGrike esithi ka·ta·no·eʹo, isixando sokucokisisa segama eliqhelekileyo elithi “ukuqonda.” ITheological Dictionary of the New Testament ithi esi senzi sithetha “ukutsolisa yonke ingqondo kabani kwinto ethile.” Ngokutsho kukaW. E. Vine, sisekwanokuthetha “ukuqonda ngokupheleleyo, ukunikela ingqalelo ngenyameko.” Ngoko xa amaKristu ‘eqwalaselana,’ akaboni okungaphezulu nje kuphela kodwa asebenzisa yonke ingqondo yawo aze azame ukubona nzulu.—Thelekisa amaHebhere 3:1.

5. Ziziphi ezinye zeenkalo zomntu ezisenokungabonakali lula, yaye kutheni sifanele siziqonde nezi?

⁵ Simele sikhumbule ukuba umntu asinakumgweba ngembonakalo nje kuphela, ngemisebenzi, okanye ngendlela ubuntu bakhe obubonakala buyiyo. (1 Samuweli 16:7) Ngokufuthi umntu osenokubonakala ethule uneemvakalelo ezinzulu okanye uyahlekisa. Kwakhona, neemvelaphi zahluka kakhulu. Bambi baye banamava abuhlungu ebomini babo; abanye sithetha nje banyamezela iimeko ekunganzima ngathi nokuzithelekelela. Ngokufuthi ukucatshukiswa kwethu sisikhwa-silima esithile kumzalwana okanye udade kuthi shwaka xa sisazi ngakumbi ngemvelaphi okanye ngeemeko zaloo mntu.—IMizekeliso 19:11.

6. Ziziphi ezinye zeendlela esinokwazana ngakumbi ngazo, ibe kusenokubakho wuphi umphumo olungileyo?

⁶ Kakade ke, oku akuthethi ukuba sifanele sithi singacelwanga siphande imicimbi yabanye yobuqu. (1 Tesalonika 4:11) Sekunjalo, ngokuqinisekileyo sinokubonisa umdla wobuqu kwabanye. Oku kubandakanya okungakumbi kunokubulisana nje kuphela kwiHolo yoBukumkani. Kutheni ungakhethi umntu othile ongathanda ukumazi kakuhle ngakumbi uze uzame ukuncokola naye imizuzu embalwa ngaphambi okanye emva kwentlanganiso? Kanti okude kwakuhle ngakumbi, ‘sukela ukubuka iindwendwe’ ngokumema umhlobo omnye okanye ababini ekhayeni lakho ukuze nifumane ukudla okungephi. (Roma 12:13) Bonisa umdla. Phulaphula. Ukubuza ukuba umntu wamazi waza wamthanda njani uYehova kukodwa kusenokutyhila lukhulu. Kanti, usenokufunda okungakumbi ngokusebenza nomnye kubulungiseleli bendlu ngendlu. Ukuqwalaselana ngezo ndlela kuya kusinceda sikhulise uvelwano.—Filipi 2:4; 1 Petros 3:8.

“Sivuselelane”

7. (a) Indlela awayefundisa ngayo uYesu yabachaphazela njani abantu? (b) Yintoni eyayibangela ukufundisa kwakhe kube namandla kangako?

⁷ Xa siqwalaselana, sikulungela ngakumbi ukuvuselelana, ukushukumiselana ekubeni sibe nento esiyenzayo. Abadala abangamaKristu banendima ebaluleke ngokukodwa kule nkalo. Ngesinye isihlandlo uYesu awayethethe esidlangalaleni ngaso, sifunda oku: “Zakhwankqiswa iindimbane kukufundisa kwakhe.” (Mateyu 7:28) Ngesinye isihlandlo kwanamadindala awayethunywe ukuza kumbamba abuya esithi: “Akuzanga kuthethe mntu njengoko athetha ngako lo mntu.” (Yohane 7:46) Yintoni eyayibangela ukufundisa kukaYesu kube namandla kangaka? Ngaba kungenxa yokuba wayedlala ngeemvakalelo? Hayi; uYesu wayethetha ngesidima. Kodwa, ngalo lonke ixesha wayezama ukufikelela iintliziyo zabaphulaphuli bakhe. Ngenxa yokuba wayebaqwalasela abantu, wayekwazi ukubakhuthaza. Wayesebenzisa imizekeliso ecacileyo, elula eyayibonisa izinto ezazisenzeka kubomi bemihla ngemihla. (Mateyu 13:34) Ngokufanayo, abo baphumeza izabelo kwiintlanganiso zethu bafanele baxelise uYesu ngokunikela iintetho ezikhuthazayo ngobushushu, nehlombe. NjengoYesu, sinokuzibhokoxa ekufuneni imizekeliso efanele abaphulaphuli bethu neya kufikelela iintliziyo zabo.

8. UYesu wavuselela ngomzekelo njani, ibe sinokumxelisa njani kule nkalo?

⁸ Ekukhonzeni uThixo wethu, sonke sinokuvuselelana ngomzekelo. Ngokuqinisekileyo uYesu wabavuselela abaphulaphuli bakhe. Wayewuthanda umsebenzi wobulungiseleli bobuKristu ibe wabuphakamisa ubulungiseleli. Wathi kwakufana nokudla kuye. (Yohane 4:34; Roma 11:13) Ihlombe elinjalo linokusulela. Ngaba nawe ngokufanayo unokwenza abanye balubone uvuyo lwakho kubulungiseleli? Ngoxa ngobulumko ukuphepha ukuvakala ngathi uyaqhayisa, balisela abanye ebandleni amava akho amnandi. Xa umema abanye ukuba basebenze nawe, khangela ukuba akunakubanceda na bafumane uyolo lokwenene ekuthetheni nabanye ngoMdali wethu Ozukileyo, uYehova.—IMizekeliso 25:25.

9. (a) Ziziphi ezinye zeendlela zokuvuselela abanye esiya kufuna ukuziphepha, ibe ngoba? (b) Yintoni efanele isishukumisele ekubeni sizinikele enkonzweni kaYehova?

⁹ Noko ke, ulumke ungabavuseleli ngendlela ephosakeleyo abanye. Ngokomzekelo, singaqondanga sinokubenza bazive benetyala ngokungenzi okungakumbi. Singazimiselanga sinokubenza babe neentloni ngokubathelekisa ngokungafanelekanga nabanye ababonakala bekhuthele ngakumbi, okanye sisenokude simisele imigaqo engqongqo size sibanyembe abo bangayifikeleliyo. Nayiphi na kwezi ndlela isenokushukumisela abanye esenzweni okwethutyana, kodwa uPawulos akazange abhale athi, ‘sivuselelane sizive sinetyala size senze imisebenzi emihle.’ Hayi, simele sivuselelane eluthandweni, kuya kwandula ke kulandele imisebenzi eqhutywa yintshukumisa elungileyo. Akukho namnye ofanele aqhutywe kukucinga ukuba abanye ebandleni baya kuthini ngaye ukuba akakufikeleli ncam oko kulindelekileyo.—Thelekisa eyesi-2 kwabaseKorinte 9:6, 7.

10. Kutheni sifanele sikhumbule ukuba asizonkosi phezu kokholo lwabanye?

¹⁰ Ukuvuselelana akuthethi ukulawulana. Nangona wayenegunya awayelinikwe nguThixo, umpostile uPawulos ngokuthobeka wakhumbuza ibandla laseKorinte: ‘Asizonkosi phezu kokholo lwenu.’ (2 Korinte 1:24, NW) Ukuba njengaye nathi ngokuthobeka siyaqonda ukuba asingomsebenzi wethu ukujonga ukuba abanye bafanele benze okungakanani enkonzweni kaYehova, okanye ukulawula izazela zabo kwezinye izigqibo zobuqu, siya kukuphepha ukuba ‘ngamalungisa ngokukhulu,’ singabi naluvuyo, sibe ngqongqo, singakhuthazi, okanye sithande ukulawula ngokugqithisileyo. (INtshumayeli 7:16) Iimpawu ezinjalo azivuseleli; ziyacinezela.

11. Yintoni eyashukumisa ukunikelwa kweminikelo ngemihla yokwakha kwamaSirayeli umnquba, ibe oko kunokwenzeka njani kumhla wethu?

¹¹ Sifuna yonke imigudu yokukhonza uYehova yenziwe ngomoya ofanayo nalowo wabonakaliswa kwaSirayeli mandulo xa kwakufuneka iminikelo yokwakha umnquba. IEksodus 35:21 iyafundeka: “Beza bonke abantu abantliziyo yabavuselelayo, abo bonke bamoya wabaqhubayo, bawuzisa umrhumo kaYehova emsebenzini.” Babengaqhutywa ngomnye umntu kodwa bazivuselela ngokwabo, ngokusuka ezintliziyweni. Eneneni, ngokoqobo isiHebhere apha sifundeka ngolu hlobo, “nabani na ontliziyo yakhe yamphakamisayo” wanikela ngezo zipho. (Akekeliswe sithi.) Ngokubhekele phaya, masizabalazele ukuphakamisana iintliziyo nanini na sihlanganisana. Okunye kuya kwenziwa ngumoya kaYehova.

“Masikhuthazane”

12. (a) Ziziphi ezinye zeentsingiselo zegama lesiGrike eliguqulelwa ngokuthi “khuthaza”? (b) Amaqabane kaYobhi asilela njani ukumkhuthaza? (c) Kutheni sifanele sikuphephe ukugwebana?

¹² Xa uPawulos wabhala ukuba sifanele ‘sikhuthazane,’ wasebenzisa imo yegama lesiGrike elithi pa·ra·ka·leʹo, elisekwanokuthetha ‘ukomeleza, ukuthuthuzela.’ Kwinguqulelo yeSeptuagint yesiGrike, eli gama lasetyenziswa kuYobhi 29:25, apho uYobhi achazwa njengalowo uthuthuzela abakhalayo. Okubangel’ umdla kukuba, xa uYobhi wayelingwa ngokuqatha, akuzange kubekho umkhuthazayo. “Abathuthuzeli” bakhe abathathu babexakekile bemgweba yaye bemshumayeza kangangokuba abazange bamqonde okanye bavelane naye. Eneneni, kuko konke abakuthethayo, abazange nakanye bambize ngegama uYobhi. (Thelekisa noYobhi 33:1, 31.) Kubonakala ukuba kunokuba bamjonge njengomntu babemjonga njengengxaki. Akumangalisi ke ukuba uYobhi enomsindo wathi kubo: “Ukuba umphefumlo wenu ubusendaweni yomphefumlo wam”! (Yobhi 16:4) Ngokufanayo namhlanje, ukuba ufuna ukukhuthaza umntu othile, zibeke endaweni akuyo! Musa ukugweba. Njengokuba amaRoma 14:4 esitsho, “Ungubani na wena ugweba isicaka somnye? Ukuma kwaso, nokuba kukuwa kwaso, kusenkosini yaso. Siya kuma ke; kuba uThixo unako ukusimisa.”

13, 14. (a) Yiyiphi inyaniso esisiseko ekufuneka sibaqinisekise ngayo abazalwana noodade wethu ukuze sibathuthuzele? (b) Isithunywa sezulu samomeleza njani uDaniyeli?

¹³ Enye imo yegama elithi pa·ra·ka·leʹo nesenzi esinxulumene nayo ziguqulelwa ngokuthi “intuthuzelo” kweyesi-2 kwabaseTesalonika 2:16, 17: “Ke kaloku, iNkosi yethu uYesu Kristu ngokwayo, noThixo uBawo wethu owasithandayo, wasinika intuthuzelo engunaphakade, nethemba elilungileyo ngobabalo, wanga angazithuthuzela iintliziyo zenu, anizimase kuwo onke amazwi nemisebenzi elungileyo.” Phawula ukuba uPawulos udibanisa ingcamango yokuthuthuzelwa kweentliziyo zethu nenyaniso esisiseko yokuba uYehova uyasithanda. Ngoko sinokukhuthazana size sithuthuzelane ngokuqinisekisana ngaloo nyaniso ibalulekileyo.

¹⁴ Ngesinye isihlandlo umprofeti uDaniyeli wayephazamiseke gqitha emva kokubona umbono owothusayo kangangokuba wathi: “Nebala lobuso bam lasuka lajika, lonakala kum, ndaphelelwa ngamandla.” UYehova wathumela isithunywa sezulu esathi izihlandlo eziliqela samkhumbuza uDaniyeli ukuba ‘wayenqweneleka’ emehlweni kaThixo. Waba yintoni umphumo? UDaniyeli wasixelela oku isithunywa sezulu: “Undomelezile.”—Daniyeli 10:8, 11, 19.

15. Abadala nabaveleli abahambahambayo bafanele bakulungelelanise njani ukuncoma nokulungisa?

¹⁵ Ngoko, nantsi enye indlela esinokubakhuthaza ngayo abanye. Bancome! Kulula gqitha ukuba nomoya wokugxeka nokuba ngqongqo. Liyinyaniso elokuba akho amaxesha ekusenokufuneka kulungiswe ngawo, ngokukodwa ngabadala nabaveleli abahambahambayo. Kodwa baya kwenza kakuhle ukuba baziwa ngokukhuthaza kwabo ngobubele kunangesimo sengqondo sokuhlaba amadlala.

16. (a) Xa sikhuthaza abadandathekileyo, kutheni ngokufuthi kunganele ukubabongoza ukuba benze okungakumbi enkonzweni kaYehova? (b) UYehova wamnceda njani uEliya xa wayedandathekile?

¹⁶ Abo badandathekileyo bakufuna ngokukodwa ukukhuthazwa, ibe uYehova ulindele ukuba njengamaKristu akhonza nabo sibe ngumthombo woncedo—ngokukodwa ukuba singabadala. (IMizekeliso 21:13) Sinokwenza ntoni? Asinakuphendula nje ngokubaxelela ukuba benze okungakumbi enkonzweni kaYehova. Ngoba? Ngenxa yokuba oko kusenokuthetha ukuba badandatheke ngenxa yokuba bengenzi okwaneleyo. Ngokuqhelekileyo akunjalo. Ngaxa lithile umprofeti uEliya wayedandatheke kangangokuba wayefuna ukufa; kodwa oku kwenzeka ngexesha awayexakeke gqitha ngalo ekukhonzeni uYehova. UYehova waqhubana njani naye? Wathumela isithunywa sezulu ukuba siye kunikela uncedo. UEliya waphalaza imbilini yakhe kuYehova, etyhila ukuba wayevakalelwa kukuba akaxabisekanga njengooyisemkhulu abafayo, nokuba umsebenzi wakhe wonke wawulilize, yaye wayesele yedwa. UYehova waphulaphula waza wamthuthuzela ngeembonakaliso ezimangalisayo zamandla Akhe nangeziqinisekiso zokuba wayengeyedwa kwaphela yaye umsebenzi awayewuqalile wawuya kugqityezelwa. UYehova wathembisa nokuba wayeza kunika uEliya iqabane awayeza kuliqeqesha elaliya kuba lilandela lakhe.—1 Kumkani 19:1-21.

17. Umdala unokumkhuthaza njani umntu ozigxeka ngokugqithiseleyo?

¹⁷ Hayi indlela okwakukhuthaza ngayo oko! Ngamana nathi ngokufanayo singabakhuthaza abo bakhathazekileyo ngokweemvakalelo baphakathi kwethu. Zama ukubaqonda ngokuphulaphula! (Yakobi 1:19) Bathuthuzele ngeZibhalo ezilungele iintswelo zabo. (IMizekeliso 25:11; 1 Tesalonika 5:14) Xa bekhuthaza abo bazigxeka ngokugqithiseleyo, ngobubele abadala banokubabonisa ubungqina obuseZibhalweni bokuba uYehova uyabathanda yaye uyabaxabisa.a Ukuxubusha ngentlawulelo kunokuba yindlela enamandla yokukhuthaza abo baziva bengaxabisekanga. Uthile okhathazeke ngenxa yesono esithile sangaphambili kusenokufuneka aboniswe ukuba intlawulelo imhlambulule ukuba uguqukile ngokwenene waza wazishiya ngokupheleleyo ezo zenzo.—Isaya 1:18.

18. Imfundiso yentlawulelo ifanele isetyenziswe njani ukukhuthaza umntu oxhatshazwe ngomnye, njengomntu odlwenguliweyo?

¹⁸ Kakade ke, umdala uya kucinga ngemeko nganye ukuze afundise kakuhle. Khawuqwalasele lo mzekelo: Idini lentlawulelo likaKristu lafuziselwa ngamadini ezilwanyana oMthetho kaMoses, awayefuneka ukuze kucanyagushelwe zonke izono. (Levitikus 4:27, 28) Noko ke, kwakungekho mthetho uthi umntu odlwenguliweyo kwakufuneka enze umnikelo wesono onjalo. Umthetho wawusithi ‘mabangamenzi nto’ ukumohlwaya. (Duteronomi 22:25-27) Ngoko namhlanje, ukuba udade uye wahlaselwa waza wadlwengulwa kwaza oku kwambangela waziva engcolile yaye engaxabisekanga, ngaba bekuya kuba kokufanelekileyo ukugxininisa ukuba ufuna intlawulelo yokumhlambulula kweso sono? Ngokuqinisekileyo akunjalo. Akenzanga sono ngokuhlaselwa. Ngumdlwenguli owonileyo ekufuneka ahlanjululwe. Noko ke, uthando oluboniswe nguYehova noKristu ekulungiseleleni intlawulelo lusenokusetyenziswa njengobungqina bokuba akadyobhekanga emehlweni kaThixo sisono somnye umntu kodwa uxabisekile kuYehova ibe usahleli eluthandweni lwakhe.—Thelekisa uMarko 7:18-23; 1 Yohane 4:16.

19. Kutheni singafanele silindele ukuba lonke unxulumano nabazalwana noodade wethu luya kukhuthaza, kodwa sifanele sizimisele ukwenza ntoni?

¹⁹ Ewe, nokuba injani na imeko yomntu ebomini, nokuba wakha wakwezinjani na ukuba buhlungu iimeko ngaphambili, ufanele akwazi ukufumana ukhuthazo ebandleni labantu bakaYehova. Yaye uya kulufumana ukuba njengabantu ngabanye sizabalazela ukuqwalaselana, ukuvuselelana, nokukhuthazana nanini na sihlanganisana. Noko ke, ekubeni singafezekanga, sonke siyasilela ukwenjenjalo ngamaxesha athile. Singazimiselanga, siyadanisana size senzane buhlungu ngezihlandlo ezithile. Masizame ukungagxininisi kwiintsilelo zabanye kule nkalo. Ukuba uqwalasela iintsilelo kakhulu, usengozini yokuligxeka kakhulu ibandla yaye usenokude uwele emgibeni uPawulos awayelangazelela ukusinceda siwuphephe, oko kukuthi, ukuhilizela ukuhlanganisana kwethu. Kwanga akungebi njalo! Njengoko le nkqubo indala isiya isiba yingozi ngakumbi yaye icinezela, masizimisele ukwenza okusemandleni ethu ukwenza unxulumano lwethu kwiintlanganiso lube lolwakhayo—senjenjalo ngakumbi njengokuba sibona imini kaYehova isondela!

[Umbhalo osemazantsi]

Ubuya Kuphendula Uthini?

◻ Kutheni kubalulekile ukuba iintlanganiso nonxulumano lwethu lukhuthaze kule mihla yokugqibela?

◻ Kuthetha ukuthini ukuqwalaselana?

◻ Kuthetha ukuthini ukuvuselelana?

◻ Yintoni ebandakanyekileyo ekukhuthazaneni?

◻ Abadandathekileyo nabadimazekileyo banokukhuthazwa njani?

[Umfanekiso okwiphepha 16]

Ukubuka iindwendwe kusinceda sazane kakuhle ngakumbi

[Umfanekiso okwiphepha 18]

Xa uEliya wayedandathekile, ngobubele uYehova wamthuthuzela