Yilumkele Imigibe KaMtyholi!

‘Baphume emgibeni kaMtyholi.’—2 TIM. 2:26.

UBUYA KUPHENDULA UTHINI?

Sinokuzihlola njani xa sithanda ukugxeka abanye?

UPilato noPetros banokusifundisa ntoni ngokunganikezeli kuloyiko nakwingcinezelo?

Unokukuphepha njani ukuzibek’ ityala ngokugqithiseleyo?

1, 2. Yiyiphi imigibe kaMtyholi esiza kuthetha ngayo kweli nqaku?

UMTYHOLI uyabazingela abakhonzi bakaYehova. Injongo yakhe ephambili asikokubatshabalalisa, ngendlela umzingeli azibulala ngayo iinyamakazi. Kunoko, olona sukelo lwakhe kukulibamba liphila ixhoba aze alenzise nantoni na ayifunayo.—Funda eyesi-2 kuTimoti 2:24-26.

² Ukuze abambise ixhoba liphila, umbambisi unokusebenzisa umgibe. Unokuzama ukuba ixhoba lize ekuhleni aze alirhintyele. Okanye unokusebenzisa umgibe ofihlakeleyo nonokusibamba isilwanyana singalindelanga. UMtyholi usebenzisa imigibe efanayo ukuze ababambise bephila abakhonzi bakaThixo. Ukuba asikufuni ukubanjiswa, sifanele siphaphe size sithobele imiqondiso ebonisa imigibe kaSathana ekufutshane kuthi. Eli nqaku liza kuthetha ngendlela esinokuyilumkela ngayo imigibe emithathu kaMtyholi aye, ngokomkhamo othile, waphumelela ukuyisebenzisa. Le migibe (1) kukungalulawuli ulwimi, (2) ukoyika kwakunye nengcinezelo (3) nokuzibek’ ityala ngokugqithiseleyo. Inqaku elilandelayo liza kuthetha ngeminye imigibe emibini kaSathana.

WUCIME UMLILO WOLWIMI OLUNGALAWULWAYO

3, 4. Ukungakwazi ukululawula ulwimi kunokuphumela entwenini? Sicela wenze umzekelo.

³ Ukuze akhuphe izilwanyana apho zizimele khona, umzingeli unokutshisa imithi, aze abambise izilwanyana ezizama ukubaleka. Ngokufuziselayo, uMtyholi angakuthanda ukutshisa ibandla lamaKristu. Xa ephumelela, unokuwakhupha amalungu alo aze awabambise. Sinokuwela njani ezandleni zakhe aze asibambise?

⁴ Umfundi uYakobi ufanisa ulwimi nomlilo. (Funda uYakobi 3:6-8.) Ukuba siyasilela ukululawula ulwimi lwethu, ngokufuziselayo kunokubakho umlilo ongalawulekiyo ebandleni. Kunokwenzeka njani oko? Ngokomzekelo: Ezintlanganisweni kwaziswa ukuba udade othile umiselwe njengovulindlela othe ngxi. Emva kweentlanganiso, oodade ababini bancokola ngesi saziso. Omnye kwaba dade uyavuya yaye umnqwenelela okuhle lo vulindlela mtsha. Omnye uyazithandabuza izizathu zakhe zokuba nguvulindlela yaye uthi uzifunela nje udumo ebandleni. Nguwuphi kwaba dade ongathanda ukuba abe ngumhlobo wakho? Kulula ukubona ukuba nguwuphi onokubangela umlilo ebandleni ngenxa yezinto azithethayo.

5. Ukuze sicime umlilo wolwimi olungalawulwayo, simele sizihlole njani?

⁵ Sinokuwucima njani umlilo wolwimi olungalawulwayo? UYesu wathi: “Umlomo uthetha ngokuphuphuma kwentliziyo.” (Mat. 12:34) Ngoko inyathelo lokuqala kukuhlola iintliziyo zethu. Ngaba siyaziphepha iimvakalelo ezingafanelekanga ezinokuphembelela incoko engakhiyo? Ngokomzekelo, xa sisiva ukuba umzalwana othile usukela ilungelo elithile lenkonzo, ngaba sivakalelwa kukuba uneentshukumisa ezintle okanye siyamkrokrela sisithi uqhutywa kukuzingca? Ukuba sisoloko sinotyekelo lokubacingela kakubi abazalwana bethu, kufuneka sikhumbule ukuba noMtyholi wazithandabuza izizathu zikaYobhi othembekileyo zokukhonza uThixo. (Yobhi 1:9-11) Kunokuba simkrokrele lo mzalwana, kufuneka sihlole izizathu zokuba simgxeke. Ngaba sinezizathu ezivakalayo zokuba simgxeke? Okanye ngaba iintliziyo zethu zityhefwe kukungabi nabubele okuxhaphakileyo kule mihla yokugqibela?—2 Tim. 3:1-4.

6, 7. (a) Ziziphi izizathu ezinokubangela ukuba sibagxeke abanye? (b) Sifanele sithini xa sitshabhiswa?

⁶ Nazi ezinye izinto ezinokusenza sibagxeke abanye. Kusenokwenzeka ukuba sifuna kubonakale izinto ezenziwe sithi. Ngenxa yoko, sinokuzama ukubadobelela abanye kuba sifuna kubalasele thina. Okanye sinokuzama ukuzithethelela xa singazenziyo izinto ezifanelekileyo. Enoba likratshi, ngumona okanye kukungazithembi okubangela oko, imiphumo iba yingozi.

⁷ Usenokuzithethelela ngokugxeka omnye umntu. Mhlawumbi naye uye wathetha kakubi ngawe. Nakuba kunjalo, akulungisi nto ukuziphindezelela. Ukwenjenjalo kukugalela iparafini emlilweni yaye kuvisisana nokuthanda kukaMtyholi kungekhona okukaThixo. (2 Tim. 2:26) Kufuneka sixelise uYesu kule nkalo. Xa wayetshabhiswa “akazange aphindise atshabhise.” Kunoko, “wahlala ezinikele kulowo ugweba ngobulungisa.” (1 Pet. 2:21-23) UYesu wayeqinisekile ukuba uYehova uya kuyicombulula ingxaki ngendlela yakhe nangexesha lakhe. Sifanele simthembe ngendlela efanayo uThixo. Ukuba sithetha kakuhle ngabanye, siya kulondoloza ‘umxokelelwane omanyanisayo woxolo’ ebandleni.—Funda eyabase-Efese 4:1-3

KUPHEPHE UKURHINTYELWA LULOYIKO NENGCINEZELO

8, 9. Kwakutheni ukuze uPilato amgwebele ukufa uYesu?

⁸ Isilwanyana esibanjiswe ngumgibe asiphindi sikwazi ukuhambahamba. Ngokufanayo, umntu owoyikayo nophantsi kwengcinezelo akakwazi kulawula ubomi bakhe. (Funda iMizekeliso 29:25.) Makhe sithethe ngamadoda amabini awahluke ngokupheleleyo awanikezelayo kwingcinezelo nakuloyiko size sibone oko sinokukufunda kuwo.

⁹ IRhuluneli yaseRoma uPontiyo Pilato yayisazi ukuba uYesu akanatyala yaye yayingafuni ukuba abulawe. Phofu ke, uPilato wathi uYesu “akukho nto ayenzileyo ingabangela ukuba afe.” Sekunjalo, uPilato wamgwebela ukufa. Ngoba? Kungenxa yokuba uPilato wayesoyika ingcinezelo yehlokondiba. (Luka 23:15, 21-25) Abachasi bekhwaza bathi, “ukuba uyamkhulula lo mntu, akungomhlobo kaKesare” ngaloo ndlela bemcinezela ukuba enze ukuthanda kwabo. (Yoh. 19:12) Kusenokwenzeka ukuba uPilato wayesoyika ukuphulukana nesikhundla sakhe—okanye ubomi bakhe—ngenxa yokuthethelela uKristu. Ngoko wavuma ukuphenjelelwa ukuze enze ukuthanda kukaMtyholi.

10. Yintoni eyabangela ukuba uPetros akhanyele uKristu?

¹⁰ Umpostile uPetros wayengoyena mhlobo kaYesu. Watsho phambi kwabantu abaninzi ukuba uYesu unguMesiya. (Mat. 16:16) UPetros waqhubeka ekunye noYesu xa abanye bengazange bayiqonde intsingiselo yamazwi akhe baza bamshiya. (Yoh. 6:66-69) Xa iintshaba zazibamba uYesu, uPetros wabinza ngekrele ekhusela iNkosi yakhe. (Yoh. 18:10, 11) Noko ke, kamva uPetros woyika waza wakhanyela nokuba uyamazi uYesu Kristu. Kangangethutyana, umpostile uPetros wabanjiswa ngumgibe wokoyika abantu yaye wawuvumela ukuba umenze angabi nankalipho.—Mat. 26:74, 75.

11. Kunokufuneka simelane naziphi iimpembelelo ezimbi?

¹¹ Thina maKristu, masiyixhathise ingcinezelo yokwenza izinto ezingamkholisiyo uThixo. Abaqeshwa nabanye abantu banokuzama ukusinyanzela ukuba singanyaniseki okanye basihende ukuba siziphathe kakubi ngokwesini. Abantwana besikolo banokujamelana nengcinezelo yoontanga abafuna bakope xa kubhalwa iimviwo, babukele iphonografi, batshaye, basebenzise iziyobisi, banxile, okanye baziphathe kakubi ngokwesini. Ngoko, yintoni enokusinceda siphephe umgibe woloyiko nowengcinezelo yokwenza oko uYehova angakufuniyo?

12. Yintoni esinokuyifunda kuPilato nakuPetros?

¹² Masibone oko sinokukufunda kuPilato noPetros. UPilato wayengazi nto kangako ngoKristu. Sekunjalo, wayesazi ukuba uYesu akanatyala yaye akangomntu uqhelekileyo. Kodwa uPilato wayengathobekanga yaye engamthandi uThixo wokwenyaniso. UMtyholi wambambisa lula. UPetros wayemazi kakuhle uThixo yaye emthanda. Noko ke, maxa wambi wayengathozamanga, esoyika yaye enikezela lula kwingcinezelo. Ngaphambi kokuba uYesu abanjwe, uPetros wazingomb’ isifuba ngelithi: “Kwanokuba bonke abanye bayakhubeka, kodwa andisayi kukhubeka.” (Marko 14:29) Lo mpostile ngewayezilungiselele kwangaphambili iimvavanyo awayeza kujamelana nazo ukuba wayethembele kuThixo njengomdumisi owathi: “UYehova usecaleni lam; andiyi koyika. Angandenza ntoni na umntu wasemhlabeni?” (INdu. 118:6) Ngobusuku bokugqibela esemhlabeni, uYesu wahamba noPetros nabanye abapostile ababini ukuya kumyezo waseGetsemane. Kunokuba bahlale bephaphile, uPetros nabanye abapostile balala. UYesu wabavusa waza wathi: “Madoda, hlalani nilindile yaye nithandaza, ukuze ningangeni ekuhendweni.” (Marko 14:38) Kodwa uPetros waphinda walala yaye kamva woyika waza wanikezela kwingcinezelo.

13. Sinokuyixhathisa njani ingcinezelo yokwenza isono?

¹³ Umzekelo kaPilato nokaPetros unokusifundisa esinye isifundo esibalulekileyo: Ukuze siyixhathise ingcinezelo, kufuneka sibe nolwazi oluchanileyo, sithobeke, sithozame, sithande uYehova size soyike yena kungekhona abantu. Ukuba ukholo lwethu lwakhelwe kulwazi oluchanileyo, siya kuthetha ngenkalipho ngeenkolelo zethu. Oko kuya kusinceda ukuba sixhathise ingcinezelo size sikoyise ukoyika abantu. Kambe ke, asifanele sizithembe ngokugqithiseleyo. Kunoko, sifanele ngokuzithoba siqonde ukuba ngamandla kaThixo anokusinceda sixhathise ingcinezelo. Kufuneka sithandazele umoya kaYehova yaye simele siliphakamise igama nemilinganiselo yakhe ngenxa yokuba simthanda. Ukongezelela, kufuneka siyilungele ingcinezelo ngaphambi kokuba sivavanywe. Ngokomzekelo, ukuzilungiselela kwangaphambili nokuthandaza kunokunceda abantwana bethu bakwazi ukuphendula xa iintanga zabo zizama ukubaphembelela ukuba benze isono.—2 Kor. 13:7.a

WULUMKELE UMGIBE OTYUMZAYO WOKUZIBEK’ ITYALA NGOKUGQITHISELEYO

14. UMtyholi ufuna sicinge ntoni ngeempazamo esakha sazenza?

¹⁴ Maxa wambi kudla ngokubekwa isiqobo esinzima somthi okanye ilitye kwindlela elidla ngokuhamba kuyo ixhoba. Isilwanyana esingalumkanga sinokugila ucingo olubotshelelwe kwesi siqobo okanye ilitye, size ke siwelwe ngulo mgibe. Ukuzibek’ ityala ngokugqithiseleyo kunokufaniswa nesiqobo esinzima esityumzayo. Xa sicinga ngeempazamo esakha sazenza, sinokuziva ‘sityumke ngomlinganiselo ogqithileyo.’ (Funda iNdumiso 38:3-5, 8.) USathana ufuna sicinge ukuba asikufanelekeli ukwenzelwa inceba nguYehova yaye asinakuyifikelela imilinganiselo yakhe.

15, 16. Sinokuwuphepha njani umgibe wokuzibek’ ityala ngokugqithiseleyo?

¹⁵ Unokuwuphepha njani lo mgibe utyumzayo? Ukuba ukhe wenza isono esinzulu, zama ngoku ukuhlaziya ubuhlobo bakho noYehova. Cela uncedo lwabadala. (Yak. 5:14-16) Zama ukulungisa umonakalo owenzekileyo. (2 Kor. 7:11) Musa ukutyhafa xa wohlwayiwe. Loo nto iqinisekisa ukuba uYehova uyakuthanda. (Heb. 12:6) Zimisele ukuzilumkela izinto ezabangela ukuba wone. Emva kokuba uguquke ngokupheleleyo, yiba nokholo lokuba idini lentlawulelo likaYesu Kristu liya kukugubungela ukunxaxha kwakho.—1 Yoh. 4:9, 14.

¹⁶ Abanye abantu baqhubeka bezibeka ityala ngezono zabo ezaxolelwayo. Ukuba kunjalo nakuwe, khumbula ukuba uYehova wamxolela uPetros nabanye abapostile abashiya uYesu, uNyana wakhe othandekayo xa kanye kwakufuneka bemxhasile. Indoda eyagxothwa kwibandla laseKorinte ngenxa yokwenza inyala, yaxolelwa nguYehova isakuba iguqukile. (1 Kor. 5:1-5; 2 Kor. 2:6-8) IBhayibhile ithetha ngabantu abenza izono ezinzulu abaguqukayo baza baxolelwa nguThixo.—2 Kron. 33:2, 10-13; 1 Kor. 6:9-11.

17. Inokusinceda njani intlawulelo?

¹⁷ UYehova uya kuzixolela aze azilibale izono zakho zexa elidluleyo ukuba uguquka ngokunyanisekileyo uze uvume akwenzele inceba. Ungaze uvakalelwe kukuba idini lentlawulelo likaYesu alinakuzigubungela ezakho izono. Ukucinga ngolo hlobo kuya kuthetha ukuzifaka komnye umgibe kaSathana. Enoba uMtyholi ufuna uvakalelwe njani na, intlawulelo inokuzigubungela zonke izono zabo baguqukayo. (IMize. 24:16) Ukuba nokholo kwintlawulelo kunokususa umthwalo wokuzibek’ ityala ngokugqithiseleyo kuze kukunike amandla okukhonza uThixo ngentliziyo, ingqondo nomphefumlo wakho uphela.—Mat. 22:37.

SIYAWAZI AMAQHINGA KASATHANA

18. Sinokuyiphepha njani imigibe kaMtyholi?

¹⁸ USathana unokusibekela nawuphi na umgibe, logama nje eza kusibambisa. Ekubeni siwazi amaqhinga akhe, sinokukuphepha ukuba zizisulu zikaMtyholi. (2 Kor. 2:10, 11) Asinakubanjiswa yimigibe yakhe ukuba sithandazela ubulumko bokujamelana nezilingo. UYakobi wabhala wathi: “Ukuba kukho nabani na kuni oswele ubulumko, makaqhubeke ebucela kuThixo, kuba unika bonke ngesisa, engangcikivi; yaye uya kubunikwa.” (Yak. 1:5) Kufuneka senze ngokuvumelana nemithandazo yethu ngokulwenza rhoqo ufundisiso lobuqu nokuphila ngokuvisisana neLizwi likaThixo. Uncwadi lweBhayibhile olulungiselelwe ludidi lwekhoboka elithembekileyo neliyingqondi luyasikhanyisela ngemigibe ebekwa nguMtyholi yaye lusinceda siyiphephe.

19, 20. Kutheni sifanele sikuthiye okubi?

¹⁹ Ukuthandaza nokufunda iBhayibhile kusenza sithande oko kulungileyo. Kodwa kubaluleke ngendlela efanayo ukuhlakulela ukukuthiya okubi. (INdu. 97:10) Ukucamngca ngemiphumo yokwenza izinto ezimbi kunokusinceda siziphephe. (Yak. 1:14, 15) Xa sifunda ukuthiya okubi size sikuthande ngokwenene okulungileyo, asinakubanjiswa yimigibe kaSathana.

²⁰ Simbulela ngokwenene uThixo kuba eye wasikhusela ekubeni zizisulu zikaSathana! UYehova usihlangula ngomoya wakhe, iLizwi lakhe nangentlangano yakhe “kulowo ungendawo.” (Mat. 6:13) Kwinqaku elilandelayo, siza kufunda ngendlela yokuphepha imigibe emibini aye uMtyholi wayisebenzisa ngokuphumelelayo ekubambiseni abakhonzi bakaThixo.

Yimani Niqinile Nize Niyiphephe Imigibe KaSathana!

‘Yimani niqinile nxamnye namaqhinga kaMtyholi.’—EFE. 6:11.

UBUYA KUPHENDULA UTHINI?

Umkhonzi kaYehova unokukuphepha njani ukubanjiswa zizinto eziphathekayo?

Yintoni enokunceda umKristu otshatileyo ukuze angaweli kumhadi wokukrexeza?

Kutheni ucinga ukuba kunokukunceda ukuxhathisa umgibe wezinto eziphathekayo nokuziphatha kakubi ngokwesini?

1, 2. (a) Kutheni uSathana engenaluvelwano ngentsalela kwakunye “nezinye izimvu”? (b) Yiyiphi imigibe kaSathana eza kuxutyushwa kweli nqaku?

USATHANA UMTYHOLI akanaluvelwano ngabantu, ingakumbi abo bakhonza uYehova. Enyanisweni, uSathana ulwa nentsalela ethanjisiweyo. (ISityhi. 12:17) La maKristu athembekileyo aye akhokela kumsebenzi wanamhlanje wokushumayela ngoBukumkani aze ambhenca uSathana njengomlawuli weli hlabathi. Kanti uMtyholi akazithandi “nezinye izimvu” ezixhasa abathanjisiweyo nezinethemba lokuphila ngonaphakade—nto leyo uSathana angenathemba layo. (Yoh. 10:16) Yiyo loo nto enomsindo! Enoba sinethemba lokuphila ezulwini okanye emhlabeni, siqinisekile ukuba uSathana akasikhathalelanga. Eyona nto ayifunayo kukusenza amaxhoba akhe.—1 Pet. 5:8.

² Ukuze aphumeze injongo yakhe, uSathana uye wabeka imigibe eyahlukahlukeneyo. Ekubeni eye ‘wazimfamekisa iingqondo zabangakholwayo,’ abazamkeli iindaba ezilungileyo yaye abayiboni nale migibe. Noko ke, uMtyholi ukwarhintyela nabo baye basamkela isigidimi soBukumkani. (2 Kor. 4:3, 4) Inqaku elidluleyo lisibonise iindlela ezintathu esinokuyixhathisa ngazo imigibe kaSathana: (1) ukungakwazi ukululawula ulwimi lwethu, (2) uloyiko nengcinezelo, (3) nokuzibek’ ityala ngokugqithiseleyo. Ngoku makhe sihlolisise indlela yokuma siqinile nxamnye neminye imigibe emibini kaSathana—izinto eziphathekayo nesilingo sokukrexeza.

IZINTO EZIPHATHEKAYO—UMGIBE OMINXAYO

3, 4. Amaxhala ale nkqubo yezinto, anokusenza njani ukuba sisukelane nezinto eziphathekayo?

³ Komnye wemizekeliso yakhe, uYesu wathetha ngembewu etyalwe phakathi kwameva. Wathi umntu unokuliva ilizwi, “kodwa ixhala lale nkqubo yezinto namandla akhohlisayo obutyebi ayaliminxa ilizwi, aze angabi nasiqhamo.” (Mat. 13:22) Eneneni, izinto eziphathekayo zingumgibe osetyenziswa lutshaba lwethu uSathana.

⁴ Zimbini izinto ezithi xa zidibene, ziliminxe ilizwi. Enye yazo ‘lixhala lale nkqubo yezinto.’ Kula ‘maxesha amanqam ekunzima ukujamelana nawo,’ zininzi izinto ezinokukwenza uxhalabe. (2 Tim. 3:1) Ngenxa yokuntinga kwamaxabiso nokwanda kwabantu abangaphangeliyo, usenokufumanisa kunzima ukuziphilisa. Kwakhona usenokuba nexhala nangekamva uzibuza ukuba, ‘Ngaba ndiya kuba nemali eyaneleyo emva kokuba ndidle umhlala-phantsi?’ Ngenxa yala maxhala, abanye baye basukelana nobutyebi, becinga ukuba imali iza kubakhusela.

5. ‘Amandla obutyebi’ anokuba ngakhohlisayo njani?

⁵ UYesu wathetha nangenye into—‘amandla akhohlisayo obutyebi.’ La mandla edibene nexhala anokuliminxa ilizwi. IBhayibhile iyavuma ukuba ‘imali iyakhusela.’ (INtshu. 7:12) Noko ke, ukusukelana nobutyebi akubobulumko. Abantu abaninzi baye bafumanisa ukuba okukhona befuna ubutyebi, kokukhona bengena kumgibe wokuthanda izinto eziphathekayo. Abanye bade baba ngamakhoboka okufuna ubutyebi.—Mat. 6:24.

6, 7. (a) Ukuthanda izinto eziphathekayo kunokuba yingozi njani empangelweni? (b) Yintoni amele ayixhalabele umKristu xa ecelwa ukuba asebenze ixesha elongezelelekileyo?

⁶ Ukunqwenela ukuba sisityebi kunokuqala ngenjongo emsulwa. Ngokomzekelo, khawucinge ngoku. Umphathi wakho uthi kuwe: “Ndineendaba ezimnandi! Inkampani yethu ifumene umsebenzi omkhulu. Oko kuthetha ukuba uza kusebenza ixesha elongezelelekileyo kwezi nyanga zimbalwa zilandelayo. Kodwa ndiyakuqinisekisa ukuba imali uza kuyibutha ngezitya.” Ubuya kuthini? Eneneni, ukunyamekela intsapho yakho kuyimbopheleleko ebalulekileyo, kodwa akuphela kwembopheleleko onayo. (1 Tim. 5:8) Zikho nezinye izinto omele uziqwalasele. Liza kuba ngakanani ixesha elongezelelekileyo? Ngaba lo msebenzi uza kuphazamisana nezinto zokomoya, eziquka ukuya kwiintlanganiso zebandla kunye nokuqhuba ingokuhlwa yoNqulo Lwentsapho?

⁷ Usacinga njalo, yintoni eyona nto ibalulekileyo kuwe—ngaba kukuba nemali eninzi okanye lulwalamano lwakho noYehova? Ngaba uza kuyeka ukubeka izilangazelelo zoBukumkani kuqala ebomini bakho, kuba nje ufuna ukuba nemali eninzi? Ngaba uyayibona indlela yokusukelana nezinto eziphathekayo okuza kukuchaphazela ngayo, ukuba unokulibala ngempilo yakho yokomoya neyentsapho yakho? Ukuba oko kuyenzeka kuwe kanye ngoku, unokukwazi njani ukuma uqinile uze uphephe ukuminxwa zizinto eziphathekayo?—Funda eyoku-1 kuTimoti 6:9, 10.

8. Yiyiphi imizekelo eseZibhalweni enokusinceda njengoko sihlola indlela esiphila ngayo?

⁸ Ukuze ungarhintyelwa zizinto eziphathekayo, kufuneka umana uyihlola indlela ophila ngayo. Ngokuqinisekileyo akunakufuna ukufana noEsawu, owabonisa ngokuphandle ukuba uyazicekisa izinto zokomoya! (Gen. 25:34; Heb. 12:16) Kanti akufuni kufana nesityebi esakhuthazwa ukuba sithengise impahla yaso, imali siyinike amahlwempu, size sibe ngumlandeli kaYesu. Endaweni yokuba senjenjalo, esi sityebi ‘semka sibuhlungu, kuba sasinezinto ezininzi.’ (Mat. 19:21, 22) Ibanjiswe bubutyebi, le ndoda yaphulukana nelungelo elikhethekileyo—lokuba ngumlandeli woyena mntu ubalaseleyo wakha waphila! Lumka, ungaze uphulukane nelungelo lokuba ngumfundi kaYesu Kristu.

9, 10. Ungayichaza njani imbono yeZibhalo ngezinto eziphathekayo?

⁹ Ukuze singazikhathazi ngokungeyomfuneko ngezinto eziphathekayo, makhe siphulaphule esi sibongozo sikaYesu: “Musani ke ukuxhala nisithi, ‘Siza kudla ntoni na?’ okanye, ‘Siza kusela ntoni na?’ okanye, ‘Siza kunxiba ntoni na?’ Kuba zonke ezi zizinto iintlanga ezizisukela ngentumekelelo. Kuba uYihlo osemazulwini uyazi ukuba ziyimfuneko kuni zonke ezi zinto.”—Mat. 6:31, 32; Luka 21:34, 35.

¹⁰ Kunokuba sibe zizisulu zokuzikhohlisa ngamandla obutyebi, masizame ukuba nengcamango efanayo neyombhali weBhayibhile uAgure, owabhala wathi: “ Musa ukundivumela ndibe lihlwempu kakhulu okanye ndibe sisityebi ngokugqithiseleyo. Ndinike nje oko kuyimfuneko.” (IMize. 30:8, Contemporary English Version) Kucacile ukuba, uAgure wayeyiqonda into yokuba imali iyakhusela esazi kwangaxeshanye ukuba amandla obutyebi ayakhohlisa. Yazi into yokuba amaxhala ale nkqubo namandla akhohlisayo obutyebi anokulonakalisa ulwalamano lwakho noYehova. Ukuzikhathaza ngokungeyomfuneko ngezinto eziphathekayo kunokusityela ixesha, kusitheze amandla, kuze kusishiye singafuni kwanto edibene nezilangazelelo zoBukumkani. Ngoko ke, ungaze ubanjiswe ngumgibe kaSathana wokuthanda izinto eziphathekayo!—Funda amaHebhere 13:5.

UKUKREXEZA—UMHADI OFIHLWE NGOBUCHULE

11, 12. Inokwenzeka njani into yokuba umKristu akrexeze kwindawo aphangela kuyo?

¹¹ Abazingeli abafuna ukubamba isilwanyana esikhulu nesomeleleyo banokwemba umhadi kwindlela esidla ngokuhamba kuyo. Lo mhadi badla ngokuwugquma ngezinti nangomhlaba. Esinye sezona zilingo ziphumelelayo zikaSathana siyafana nolu hlobo lomgibe. Esi silingo kukuziphatha kakubi. (IMize. 22:14; 23:27) AmaKristu amaninzi aye angena kulo mhadi ngokuvumela iimeko ezenza kube lula ngawo ukuba aziphathe kakubi. Ezinye izibini ezingamaKristu ziye zakrexeza emva kokuthandana nabantu ezingatshatanga nabo.

¹² Usenokuqala ngokuthandana nomntu ongatshatanga naye osebenza naye. Eneneni, olunye uphando luye lwadiza ukuba abafazi abangaphezu kwesiqingatha abaye bakrexeza namadoda amalunga namathathu kwamane akrexezileyo, aqale ngokuthandana nabantu asebenza nabo. Ngaba usebenza nabantu besini esahlukileyo? Ukuba kunjalo, lunjani unxulumano lwakho kunye nabo? Ngaba ubeke imida eza kukukhusela ekuziboneni sele uthandana nomnye wabo? Ngokomzekelo, emva kokusoloko encokola nendoda asebenza nayo, udade ongumKristu unokuyithemba de ayixelele neengxaki zomtshato wakhe. Kwenye imeko, emva kokuba ngumhlobo webhinqa esebenza nalo, indoda engumKristu isenokuthi: “Uyaluxabisa uluvo lwam kwaye uyandiphulaphula xa ndincokola naye. Uyandixabisa kananjalo. Bendingavuya ukuba ebenokundiphatha ngolu hlobo umfazi wam!” Ngaba uyayibona indlela amaKristu akwezi meko sithethe ngazo asesichengeni ngayo sokukrexeza?

13. Kunokwenzeka njani ukuba uthandane nomntu ongatshatanga naye ebandleni?

¹³ Kunokwenzeka ukuba uthandane nomntu ongatshatanga naye osebandleni. Nanku umzekelo wento eyakha yenzeka. UDaniel nomfazi wakhe uSarah,a babengoovulindlela abathe ngxi. UDaniel uthi wayengumdala ongakwaziyo ukwala. Wayexhakamfula ngovuyo naliphi na ilungelo alifumanayo. Njengenxalenye yobulungiseleli bakhe, uDaniel wayeqhuba izifundo zeBhayibhile ezihlanu ezingabafana—ezithathu kuzo zabhaptizwa. Aba bazalwana basandul’ ukubhaptizwa babefuna ukuncedwa ngokukhethekileyo. Ngoxa uDaniel wayexakeke zezinye izabelo zebandla, uSarah wayedla ngokubanceda aba bazalwana. Akuzange kube kudala izinto zathath’ unyawo: Aba babekhe bazizifundo zikaDaniel babefuna inkxaso, yaye uSarah wayebanika. Naye wayekufuna ukukhathalelwa, ibe zazimkhathalele ezi zifundo zikaDaniel. Yeyona nto yaba ngumgibe ke leyo. UDaniel uthi: “Ukusebenza nzima komfazi wam kangangeenyanga kwamdina ngokomoya nangokweemvakalelo. Loo nto, idibene nokungamhoyi kwam zaba nemiphumo emibi. Umfazi wam wakrexeza nomnye wabo bafana ndandibafundela. Waba buthathaka ngokomoya ndijongile, yaye ngendlela endandixakeke ngayo ngamalungelo endandinawo andizange ndiyibone loo nto.” Ungayiphepha njani loo ntlekele?

14, 15. Ziziphi izibakala ezinokunceda amaKristu atshatileyo aphephe umhadi wokukrexeza?

¹⁴ Ukuze uphephe umhadi wokukrexeza, cingisisa ngoko kuthethwa kukuzinikela emtshatweni. UYesu wathi: “Oko uThixo akubophelele ngedyokhwe ndawonye makungahlukaniswa mntu.” (Mat. 19:6) Ungaze ucinge ukuba amalungelo enkonzo onawo abaluleke ngaphezu kweqabane lakho. Ngaphezu koko, kulumkele ukusoloko ungekho kunye neqabane lakho usenza izinto ezingabalulekanga kangako kuba loo nto inokubonisa ukuba umtshato wakho ubuthathaka yaye oko kunokuphumela esilingweni nakwisono esinzulu.

¹⁵ Kodwa ke, ukuba ungumdala, kusafuneka unyamekele umhlambi. Umpostile uPetros wabhala wathi: “Waluseni umhlambi kaThixo eniwunyamekelayo, kungengakunyanzelwa, kodwa ngokuzithandela; kungekhona ngokuthanda inzuzo yokunganyaniseki, kodwa ngentumekelelo.” (1 Pet. 5:2) Ngokuqinisekileyo akunakuwatyeshela amalungu ebandla. Noko ke, imbopheleleko yakho njengomalusi ayimele yodlule eyokuba ngumyeni. Akuncedi nganto yaye kuyingozi ukuzikhuphelela usondla ibandla ngoxa umfazi wakho ebulawa “yindlala” ekhaya. UDaniel uphinda athi: “Akumele uzixakekise ngezinye iimbopheleleko de ulibale nentsapho le yakho.”

16, 17. (a) AmaKristu atshatileyo amele enze ntoni emsebenzini ukuze enze kucace kumntu wonke ukuba akanamdla wakuthandana? (b) Yiyiphi inkcazelo enokunceda amaKristu aphephe ukukrexeza?

¹⁶ IMboniselo noVukani! baye banamacebiso okunceda amaKristu atshatileyo ukuze awuphephe umgibe wokukrexeza. Ngokomzekelo, iMboniselo kaSeptemba 15, 2006 yanikela eli cebiso: “Xa usemsebenzini nakwenye indawo, umele ulumkele iimeko eziya kwenza uwele kumgibe wokuthandana. Ngokomzekelo, ukuchitha iiyure ezingakumbi usebenza ngokusondeleyo nomntu wesini esahlukileyo kunokukwenza utsaleleke kuye. Njengendoda okanye umfazi otshatileyo, umele ukwenze kucace kwintetho nakwindlela oziphatha ngayo ukuba ayithi qatha into yokuthandana nomntu ongeloqabane lakho. Njengomntu ohlonela uThixo, ngekhe utsalele abanye kuwe ngendlel’ engafanelekanga wenze ngathi unomdla wokuthandana nabo okanye unxibe yaye uzilungise ngendlela engafanelekanga. . . . Ukubek’ iifoto zeqabane lomtshato nezabantwana bakho ekuhleni kwindawo osebenza kuyo kuya kumana kukhumbuza wena nabanye ukuba intsapho yakho yeyona nto ibalulekileyo kuwe. Zimisele ukuba ungaze uvumele—okanye unyamezele—ukulingelwa eluthandweni ngomnye umntu.”

¹⁷ Inqaku elinomxholo othi “Ukunyaniseka Emtshatweni—Kuthetha Ukuthini?” elikuVukani! ka-Aprili 2009 lalumkisa ngokuba neminqweno ephosakeleyo ngesini nomntu ongelilo iqabane lakho lomtshato. Laye labonisa ukuba xa usiba neminqweno enjalo, maninzi amathuba okuba ukrexeze. (Yak. 1:14, 15) Xa utshatile, kuya kuba kuhle ukuba niwafunde kunye la manqaku maxa wambi. Umtshato wasungulwa nguYehova, yaye ungcwele. Ukuzinika ixesha lokuncokola neqabane lakho ngomtshato wenu kuya kubonisa ukuba uyazixabisa izinto ezingcwele.—Gen. 2:21-24.

18, 19. (a) Yiyiphi imiphumo yokukrexeza? (b) Ukuthembeka emtshatweni kuba nayiphi imiphumo?

¹⁸ Ukuba utyekele ekuthandeni umntu ongatshatanga naye, yicingisise imiphumo eyingozi yokuhenyuza nokukrexeza. (IMize. 7:22, 23; Gal. 6:7) Abantu abaziphatha kakubi bayamcaphukisa uYehova, bawenza buhlungu amaqabane abo kwakunye neziqu zabo. (Funda uMalaki 2:13, 14.) Ngokwahlukileyo, cinga ngeengenelo ezifunyanwa ngabo baqhubeka beziphethe kakuhle. Abapheleli nje ekubeni nethemba lokuphila ngonaphakade kodwa baphila kamnandi yaye banezazela ezicocekileyo.—Funda iMizekeliso 3:1, 2.

¹⁹ Umdumisi wathi: “Uxolo oluninzi lolwabo bathanda umthetho wakho [Thixo], yaye kubo akukho mqobo usisikhubekiso.” (INdu. 119:165) Ngoko thanda inyaniso uze ‘uhlale ukuphaphele ngokungqongqo ukuba indlela ohamba ngayo ingabi njengeyabantu abangezozilumko kodwa ibe njengeyezilumko’ kula maxesha angendawo. (Efe. 5:15, 16) Ubomi buzaliswe yimigibe kaSathana ayenzele ukubambisa abakhonzi bakaThixo abanyanisekileyo. Kodwa sixhobe ngokwaneleyo. UYehova usinike konke esikudingayo ukuze ‘sime siqinile’ size ‘sicime yonke imijukujelwa evuthayo yalowo ungendawo’!—Efe. 6:11, 16.