Kwiinyanga ezalandelayo, uHitoshi wayengasenathemba lokufumana omnye umsebenzi. Ngokomzekelo, kolunye udliwano-ndlebe, wachaza ngokuphandle ukuba akanakuwenza umsebenzi ofuna anganyaniseki. Loo mntu wayenodliwano-ndlebe naye wathi, “Iyothusa indlela ocinga ngayo!” Intsapho nabahlobo bakaHitoshi bamkhuthaza ukuba angayeki ukunyaniseka, sekunjalo waqalisa ukuthandabuza. Ngokomzekelo, wathi, “Ndandizibuza ukuba ngaba ndenza kakuhle na ngokunyaniseka kukholo lwam.”

Amava kaHitoshi asikhumbuza ukuba asinguye wonke ubani okubona njengento ebalulekileyo ukunyaniseka. Enyanisweni, abanye bakujonga njengento engafunekiyo, ingakumbi kwezoshishino. Elinye ibhinqa elisebenza eMzantsi Afrika lathi: “Ndisebenza nabantu abanganyanisekanga, ngoko ngamany’ amaxesha kuba nzima ukunyaniseka.”

Olunye uhlobo lokunganyaniseki oluxhaphakileyo namhlanje kukuxoka. Kwiminyaka ethile eyadlulayo, kuphando olwenziwa yiYunivesithi yaseMassachusetts Amherst, ugqirha wengqondo uRobert S. Feldman, kwaqikelelwa ukuba i-60 pesenti yabantu abadala, kwimizuzu elishumi abayincokolayo, umntu uxoka kube kanye. UFeldman uthi: “Kwasothusa oku. Besingazi ukuba ukuxoka yinto exhaphake kangaka.” Ngaba ayothusi into yokuba abantu bekucaphukela ukuqhathwa ngoxa kuxhaphakile ukuxoka?

Kutheni ukuxoka, ubusela nezinye iindlela zokunganyaniseki zixhaphakile namhlanje? Ukunganyaniseki kwenza ntoni ebantwini? Singakulumkela njani ukuzifaka kwizenzo zokunganyaniseki?

Ngaba nawe utsho? NjengoSamantha sonke sikhe sakwimeko efanayo. Indlela esenza ngayo xa sikwimeko enokusilingela ekubeni singanyaniseki ibonisa ukuba yiyiphi eyona ndlela yokuziphatha esiyithandayo. Ngokomzekelo, ukuba asikuthandi ukuhlazeka, sisenokuqonda ukuba eyona nto kufuneka siyenze kukuxoka. Xa inyani ivela, ukunganyaniseki kuba nemiphumo emibi. Khawucinge ngoku.

UKUNGANYANISEKI KUPHELISA UKUTHENJWA

Ubuhlobo bakhiwa ngokuthembana. Xa abantu ababini bethembana, baziva bekhuselekile. Sekunjalo, ukuthembana akwenzeki ngokuqhwanyaza kweliso. Xa bechitha ixesha kunye, bencokola kwaye bengacingeli iziqu zabo, abantu bayathembana. Kodwa oko kuthembana kunokupheliswa sisenzo nje esinye sokungathembeki. Ibe xa kuphelile, kuba nzima ukuphinda kube khona.

Ngaba wakha waqhathwa ngumntu owawumthembile? Ukuba kunjalo, wathini? Kusenokwenzeka ukuba waphoxeka ibe waba buhlungu. Kuyaqondakala oko. Ngokuqinisekileyo ukunganyaniseki kunokusihlutha izinto ezixabisekileyo, njengobuhlobo.

UKUNGANYANISEKI KUYOSULELA

Kuphando awalenzayo uprofesa Robert Innes wezoqoqosho kwiYunivesithi yaseKhalifoniya wafumanisa ukuba “ngokwenene ukunganyaniseki kuyosulela.” Kunokufaniswa nentsholongwane—njengoko usiya usondelelana nomntu onganyanisekanga, uzibeka esichengeni “sokosulelwa” kukunganyaniseki kwakhe.

Ungawuphepha njani umgibe wokunganyaniseki? IBhayibhile ingakunceda. Khawufunde le migaqo yeBhayibhile ilandelayo.

EBhayibhileni igama lesiGrike elidla ngokuguqulelwa ngokuthi “ukunyaniseka” ngokoqobo lithetha “eyona nto ilunge ngokwenene.” Lisenokuthetha ukujonga izinto ngendlela efanelekileyo.

AmaKristu awathatha nzulu amazwi aphefumlelweyo kampostile uPawulos athi: “Sinqwenela ukuziphatha ngokunyaniseka kwizinto zonke.” Kodwa kubandakanya ntoni oko?

UMLO WANGAPHAKATHI

Ntsasa nganye uninzi lwabantu luye luzijonge espilini. Ngoba? Ukuze lubone ukuba luyafaneleka na. Kodwa kukho into ebaluleke lee kunenkangeleko yeenwele okanye isinxibo sala maxesha. Inkangeleko yethu yangaphandle enyanisweni ityhila oko sikuko ngaphakathi.

ILizwi likaThixo liyavuma ukuba kulula ngathi ukwenza okubi. IGenesis 8:21 ithi: “Intliziyo yomntu ityekele ebubini kwasebutsheni bakhe.” Ngoko ke, ukuze sinyaniseke sifanele silwe nzima nokungafezeki esazalwa nako. Umpostile uPawulos wawuchaza ngokucacileyo lo mlo kwimeko yakhe ngokuthi: “Ngokwenene ndiyayoliswa ngumthetho kaThixo ngokomntu endinguye ngaphakathi, kodwa ndibona omnye umthetho emalungwini am usilwa nomthetho wengqondo yam yaye undithimbela emthethweni wesono osemalungwini am.”—Roma 7:22, 23.

Ngokomzekelo, xa iintliziyo zethu zisitsalela ekwenzeni okubi kwaye kulula ngathi ukunganyaniseki, asifanele sibe ngamakhoboka eentliziyo zethu. Sisenokwenza ukhetho. Xa sikhetha ukuziphepha iingcinga ezimbi sinokuhlala sinyanisekile phezu kwako nje ukunganyaniseki okukhoyo.

UKOYISA KULO MLO

Ukuze sinyaniseke sifanele siziphathe kakuhle. Ngelishwa abantu bachitha ixesha elininzi begqiba ngendlela abafanele “banxibe ngayo” kunokuba bacinge ngendlela yokuziphatha. Ngoko basoloko bekuthethelela ukunganyiseki kwabo. Incwadi ethi, The (Honest) Truth About Dishonesty ithi: “Singade sixoke kuba nje sifuna ukukhusele indlela esijongwa ngayo.” Noko ke, ngaba ukho umlinganiselo onokusinceda sazi ukuba kunini apho bamkelekileyo ubuxoki? Ngethamsanqa ukho.

Izigidi zabantu ehlabathini lonke, ziye zancedwa yiBhayibhile. IBhayibhile inemigaqo emihle engenakuthelekiswa nanto. (INdumiso 19:7) Isinika ukhokelo esinokulithemba, kwimicimbi yeentsapho, umsebenzi, ukuziphatha, nezinto zobuthixo. Ibisoloko ikho nangamaxesha obunzima. Imithetho nemigaqo yayo iluncedo kuzo zonke, iintlanga, iilwimi, nezizwe. Xa sifunda, sicamngca ngoko ikuthethayo, kwaye sisebenzisa amacebiso ayo, sinokuqeqesha iintliziyo zethu ukuze zinyaniseke.

Sekunjalo, kufuneka senze okungakumbi kunokufumana nje ulwazi oluchanileyo lweBhayibhile ukuze siliphumelele eli dabi lokunganyaniseki. Ngapha koko, siphila kwihlabathi eliziphethe kakubi nelisinyanzela ukuba samkele iindlela zalo ezingaphucukanga. Yiloo nto kubalulekile ukuba sithandaze sicele uncedo nenkxaso kaThixo. (Filipi 4:6, 7, 13) Ngokwenjenjalo, siya kuba nesibindi sokwenza oko kulungileyo size sihlale sinyanisekile kwizinto zonke.

UMVUZO WOKUNYANISEKA

UHitoshi ekuthethwe ngaye kwinqaku elingaphambili wavuzwa ngokunyaniseka kwakhe. Ngoku usebenzela umqeshi omxabisayo. Uthi: “Ndiyabulela kuba ndiye ndafumana umsebenzi ondenza ndibe nesazela esicocekileyo.”

Nabanye bayavumelana noku. Makhe sithethe ngemizekelo yabo baye bavuzwa ngokuthobela umgaqo weBhayibhile othi, ‘ziphathe ngokunyaniseka kwizinto zonke.’

• Isazela Esicocekileyo

  

  “Ndayeka esikolweni ndineminyaka eyi-13 ukuze ndisebenze namasela. Ngenxa yoko, i-95 pesenti yomvuzo wam, ndandiyifumene ngondlela mnyama. Ethubeni ndatshata, kwaye mna nomyeni wam saqalisa ukufunda iBhayibhile namaNgqina kaYehova. Safunda ukuba uYehovaa uThixo uyazicaphukela izenzo zokunganyaniseki, ngoko sagqiba kwelokuba sitshintshe indlela esasiphila ngayo. Ngo-1990 sazahlulela kuYehova saza sabhaptizwa njengamaNgqina kaYehova.”—IMizekeliso 6:16-19.

  “Ngaphambili, indlu yam yayizele zizinto ezibiweyo, kodwa ngoku akho nenye; kwaye oku kundenza ndibe nesazela esicocekileyo. Xa ndicinga emva kwiminyaka yam yokunganyaniseki, ndiyambulela uYehova ngenceba yakhe. Sihlandlo ngasinye ndisiya kulala kuyandivuyisa ukwazi ukuba uYehova uyakholiswa ndim.”—UCheryl waseIreland.

  

  “Xa umqeshi wam weva ukuba ndalile ukunyotywa ngumthengi, wathi kum: ‘UThixo wakho ukwenza uthembeke! Kuyintsikelelo ngokwenene ukusebenza kwakho kule nkampani.’ Ukunyaniseka kwizinto zonke kundenza ndiqhubeke ndinesazela esicocekileyo phambi kukaYehova uThixo. Ndiye ndikwazi ukunceda intsapho nabanye ukuba benze okufanayo.”—USonny waseHong Kong.

• Ukuba Noxolo Lwengqondo

  

  “Emsebenzini ndilisekela lomphathi kwibhanki yehlabathi. Ukunyaniseka kunqabile, eyona nto iphambili yingeniso. Ubukhulu becala abantu bathi, ‘Akuyongozi ukuxoka noba kukancinci ukuba kuza kuphucula ezoqoqosho.’ Ngokunyaniseka, ndihlala ndinoxolo lwengqondo kwaye ndilungele naziphi na imeko ezinovela. Abaqeshi bam bayazi ukuba andisoze ndixoke kubo okanye ndivume bandixokise.”—UTom waseMerika.

• Ukuzihlonela

  

  “Umphathi wam wathi mandixoke ngezinto ezazilahlekile emsebenzini, kodwa andizange ndivume. Xa bavelayo abantu abangamasela wandibulela ngokunyaniseka kwam. Ukunyaniseka kweli hlabathi linganyanisekanga, kufuna isibindi. Ekugqibeleni, siye sithenjwe size sihlonitshwe ngabanye.”—UKaori waseJapan.

Isazela esicocekileyo, uxolo lwengqondo nokuzihlonela—zonke ezi zinto zibonisa ukuba ukunyaniseka kunomvuzo. Ngaba akuvumi?