Unako Ukufunda Olunye Ulwimi!

UMike uthi: “Andinakuwatshintshisa nangantoni na amava endinawo.” UPhelps wongezelela athi: “Esi siphakathi kwezigqibo ezifanelekileyo endakha ndazenza ebomini.” Bobabini babhekisela ekukwazini kwabo ukumelana nocelomngeni lokufunda olunye ulwimi.

KUMAZWE amaninzi ehlabathini lonke, abantu abaninzi bafunda olunye ulwimi ngenxa yezizathu eziliqela—ezinye zazo zezobuqu, ngenxa yezoqoqosho yaye abanye ngenxa yonqulo. UVukani! uye wadlan’ indlebe nabantu abaliqela abafunda ulwimi. Phakathi kwemibuzo aye wayibuza ngothi, Kunjani ufunda olunye ulwimi xa sele umdala nothi yintoni enokunceda umntu alufunde? Le nkcazelo ingezantsi isekelwe kwiimpendulo zabo. Uya kuyifumanisa ikhuthaza kwaye ikwenza uqonde ngokukodwa ukuba ufunda olunye ulwimi okanye ucinga ukwenjenjalo. Qwalasela ngokomzekelo ezinye iimpawu abantu abafunda olunye ulwimi abaye bathi zibalulekile ukuze uphumelele.

Umonde, Ukuthobeka Nokuzivumelanisa Neemeko

Ngoxa abantwana abancinane benokufunda iilwimi ezimbini nangaphezulu ngaxeshanye—baze babe phakathi kwabantu abathetha ezo lwimi—abantu abadala bakufumanisa kunzima kakhulu ukufunda olunye ulwimi. Undoqo kukuba nomonde xa befunda olunye ulwimi ekubeni oku kusenokuthabatha ixesha elide. Ngenxa yokuba bexakekile, kusenokufuneka bezibekele elinye ixesha ezinye izinto.

UGeorge uthi: “Ukuthobeka kubalulekile. Xa ungaqhelananga nolo lwimi ulufundayo, ufanele ukulungele ukuthetha—ukanti ngamanye amaxesha ukuphathwa njengomntwana.” Incwadi ethi How to Learn a Foreign Language ithi: “Ufanele ulwe nomoya wokuziva ubalulekile, ungakhathazeki nangesidima sakho ukuba ufuna ukuphumelela.” Musa ukuziva uneentloni xa uye wenza impazamo. UBen uthi: “Ukuba awuzenzi iimpazamo akulusebenzisi ngokwaneleyo olo lwimi ulufundayo.”

Musa ukukhathazeka xa abanye bekuhleka xa usenza iimpazamo—kunoko zihleke nawe. Enyanisweni, ngenye imini uya kubalisa ngezinto owawudla ngokuzithetha. Musa ukoyika ukubuza imibuzo. Ukuqonda isizathu sokuba ezinye izinto zibizwe ngendlela ethile kuya kukunceda ukhumbule.

Ngenxa yokuba ukufunda olunye ulwimi kuthetha ukufunda indlela oluphila ngayo olo hlanga, kuyanceda ukuba ngumntu ovumelana neemeko, ube nengqondo ephangaleleyo. UJulie uthi: “Ukufunda olunye ulwimi kuye kwandinceda ndaqonda ukuba kukho indlela ezininzi zokubona nokwenza izinto. Akukho ibhetele kunenye—zahlukile nje kuphela.” UJay ucebisa esithi, “Yiba nabahlobo nabantu abathetha olo lwimi uze ukuvuyele ukuba kunye nabo.” Kakade ke, amaKristu aqinisekisa ukuba abo bahlobo balunxulumano oluhle yaye ngabantu abakhayo. (1 Korinte 15:33; Efese 5:3, 4) UJay wongezelela esithi: “Xa bebona ukuba unomdla kubo, kuhlobo lokutya abakutyayo, umculo nezinye izinto, ngokuzenzekelayo nabo baya kutsaleleka kuwe.”

Inkqubela idla ngokukhawuleza ibonakale ukuba uchitha ixesha elingakumbi kwaye uyalusebenzisa olo lwimi ulufundayo. UGeorge uthi: “Sifumana ubuchule bokuthetha olunye ulwimi kanye ngendlela inkuku etya ngayo—itya ukhozo olunye ngexesha. Ukhozo lungamasuntswana kodwa longeza kokuthile.” UBill owafunda iilwimi eziliqela kuba wayengumvangeli wasemazweni, uthi: “Ndiba noludwe lwamagama naphi na apho ndiya khona ukuze ndilujonge xa ndifumana ithuba lokwenjenjalo.” Abantu abaninzi baye bakufumanisa kuluncedo ukufunda rhoqo, ufunde nje into enye okanye ezimbini kunokuchitha ixesha elininzi ufunda izinto ezininzi.

Kukho izinto ezininzi ezinokunceda abantu bafunde olunye ulwimi, ziquka iincwadi, ukuphulaphula iikhasethi ezifumaneka ngolo lwimi, amakhadi okufunda nezinye izinto. Noko ke, nakuba zikho zonke ezi zinto, abantu abaninzi baye bafumanisa ukuba balufunda kakuhle olunye ulwimi xa kukho iiklasi ezifundisa olo lwimi. Sebenzisa nayiphi na indlela esebenzayo kuwe. Noko ke, khumbula ukuba ayikho enye indlela yokufunda ulwimi ngaphandle kokuba nawe wenze umgudu kwaye unyamezele. Kodwa zikho iindlela ezenza ukufunda olunye ulwimi kube lula kwaye ukunandiphe. Enye indlela kukuba phakathi kwabantu abathetha olo lwimi nokubona indlela abaphila ngayo.

UGeorge uthi: “Emva kokuba ndizazi izinto ezisisiseko zolwimi nokuba nesigama sabantu abasandul’ ukulufunda olo lwimi, kunokuba kuhle ukuchitha ixesha elithile kwilizwe apho ungqongwe ngabantu abathetha olo lwimi.” UBarb uyavumelana noku, uthi: “Ukutyelela ilizwe elisebenzisa olo lwimi kukuvulela ithuba lokuba uluve olo lwimi.” Okubaluleke ngakumbi, ukuba phakathi kwabantu abathetha olo lwimi kukunceda ucinge ngendlela abantu balo abacinga ngayo. Kakade ke, abantu abaninzi basenokungakwazi ukuya kwelinye ilizwe. Kodwa kunokubakho ezinye indlela ekuhlaleni ezinokukunceda ukuba ube phakathi kwabantu bolo lwimi nokuba wazi nendlela abaphila ngayo. Ngokomzekelo, kusenokuba kukho iincwadi ezifanelekileyo, iinkqubo zikanomathotholo okanye zikamabonwakude ngolwimi olufundayo. Ekuhlaleni khangela abantu abathetha olo lwimi uze uthethe nabo. Incwadi ethi How to Learn a Foreign Language ithi: “Ekugqibeleni ukuluthetha olo lwimi yeyona nto ibalulekileyo ukuze wenze inkqubela.”a

Xa Kungekho Nkqubela Ingako

Njengokuba uqhubeka ufunda ulwimi, maxa wambi usenokuvakalelwa kukuba akwenzi nkqubela. Yintoni onokuyenza? Okokuqala, cinga ngesizathu sokuba ufunde olo lwimi. AmaNgqina kaYehova amaninzi aye afunda olunye ulwimi eneenjongo zokunceda abanye bafunde iBhayibhile. Ucinga ngosukelo onalo okanye ngenjongo yokuba ufunde olo lwimi, unokukhuthazeka.

Okwesibini, musa ukulindela okungaphaya kwamandla akho. Incwadi ethi How to Learn a Foreign Language ithi: “Usenokungakwazi ukuthetha njengomntu othetha olo lwimi. Asiyiyo injongo yakho leyo. Ufuna nje ukuba abantu bakwazi ukukuva ukuba uthini.” Ngoko ke, kunokuba ulilisele ngento yokuba akuthethi ngokutyibilikayo njengaxa uthetha ulwimi lwakho, nikela ingqalelo ekuthetheni ngokucacileyo usebenzisa oko sele ukwazi.

Okwesithathu, khangela into ephawulekayo okhe wayenza ubone ukuba wenza inkqubela engakanani. Ukufunda olunye ulwimi kufana nokubukela ingca ikhula—akuyiboni ikhula kodwa suku ngalunye ingca iyakhula. Ngokufanayo, ukuba ujonga ngasemva ngexesha owawuqala ngalo ukufunda, ngokungathandabuzekiyo uya kubona ukuba wenze inkqubela noko. Kuphephe ukuzithelekisa nabanye abantu. Umgaqo ofanelekileyo esifanele siwulandele ufumaneka eBhayibhileni kwabaseGalati 6:4. Uthi: “Ngamnye makangqine oko ukuko umsebenzi wakhe, uya kwandula ke abe nesizathu sokugcoba ngaye siqu, kungekhona ngokuzithelekisa nomnye umntu.”

Okwesine, ukwenza inkqubela kuthabatha ixesha nomgudu, kodwa kukuzisela iintsikelelo. Cinga ngoku: Njengokuba sele ukwazi ukuthetha, ngaba ucinga ukuba umntwana oneminyaka emithathu okanye emine angakwazi ukuthetha njengawe? Ngaba usebenzisa amagama antsonkothileyo? Akunjalo! Kodwa uthetha nje izinto ekulula ukuziqonda. Enyanisweni, kwanakubantwana bethu, ukufunda olunye ulwimi kuthabatha iminyaka eliqela.

Okwesihlanu, lusebenzise ulwimi osandula ukulufunda kangangoko kunokwenzeka. UBen uthi: “Kuye kubonakale ngathi andenzi nkqubela ukuba andilusebenzisi rhoqo ulwimi endisandul’ ukulufunda.” Ngoko ke, qhubeka uluthetha. Qhubeka ulusebenzisa xa uncokola! Ngokuqhelekileyo, usenokukhathazeka ukuba uzama ukuthetha kodwa uphawule ukuba uthetha ngokungathi kuthetha umntwana. UMileivi uthi: “Eyona inzima kum kukungakwazi ukuthetha into endifuna ukuyithetha ngexesha endifuna ukuyithetha ngalo.” Kodwa oko kukhathazeka kusenokukukhuthaza ukuba unyamezele. UMike uthi: “Andiyithandi into yokuba ndingeva xa kubaliswa kwaye ndingahleki xa kuhlekwa. Ndicinga ukuba iimvakalelo ezinjalo ziye zandikhuthaza ukuba ndizibhokoxe ukuze ndidlule kweloo nqanaba.”

Indlela Abanye Abanokunceda Ngayo

Yintoni enokwenziwa ngabantu abasele belwazi olo lwimi ukunceda umntu osafundayo? UBill okhankanywe ngaphambilana ucebisa esithi: “Zekelela xa uthetha kodwa uthethe izinto ezichanileyo kungekhona ngokungathi kuthetha umntwana.” UJulie uthi: “Yiba nomonde yaye ungamgqibezeleli isivakalisi umntu osafundayo.” UTony uthi: “Abantu abakwaziyo ukuthetha iilwimi ezimbini, basebenzise ulwimi lwam xa bethetha nam. Kodwa oko kwandenza andabi nankqubela.” Ngenxa yoko, abanye abantu abafunda olunye ulwimi maxa wambi baye bacele abahlobo babo ukuba xa bethetha nabo bathethe kuphela olo lwimi balufundayo baze babachazele apho bafanele baphucule khona. Kwakhona abantu abafunda olunye ulwimi bayavuya xa benconywa ngomgudu abawenzayo. Njengokuba uGeorge esitsho, ndiye ndaphumelela ngenxa yothando nokhuthazo lwabahlobo bam.”

Ngaba ukufunda olunye ulwimi kuwufanele umgudu? UBill okhe wakhankanywa ngaphambilana, othetha iilwimi eziliqela uthi: “Ngokuqinisekileyo kunjalo! Kuye kwandinceda ndaphangalala kwindlela endizijonga ngayo izinto yaye ndizibona nangezinye iindlela izinto. Ngokukodwa ukukwazi ukufunda iBhayibhile nabantu abathetha olo lwimi, ubabone besamkela inyaniso baze benze inkqubela ngokomoya kwenza uwuxabise loo mgudu. Ingcali yeelwimi ethetha iilwimi ezili-12 ithetha nam yathi: ‘Ndinqwenel’ ukuba nguwe. Ndafunda iilwimi kuba ndandikuvuyela ukuzifunda; kodwa ufunde iilwimi ngokunyanisekileyo kuba ufuna ukunceda abantu.’”

[Umbhalo osemazantsi]

[Amagama acatshulweyo akwiphepha 11]

Umnqweno wokufuna ukunceda abanye yeyona nto ikhuthaza abanye ukuba bafunde olunye ulwimi