IRashiya

“UKUSUSELA ekuphumeni kwelanga kuse ekutshoneni kwalo igama lam liya kuba likhulu phakathi kweentlanga.” (Mal. 1:11) Namhlanje eRashiya, sibona ukuzaliseka kwamazwi esiprofeto sikaYehova esabhalwa kwiminyaka engama-2 450 eyadlulayo. Njengokuba ilanga lisiya kunina kwisixeko sasentshona iKaliningrad, sele ilixesha lokuvuka kubavakalisi abahlala entshona kwincam yeChukchi, ngaphesheya koMjelo obizwa ngokuba yiBering osuka eAlaska. Kunjalo kanye, ilanga alitshoni kubavakalisi boBukumkani baseRashiya nakumsebenzi wabo wokwenza abafundi. Ukuzibhokoxa kwabazalwana noodade ngexesha leSoviet kuye kwasikelelwa. Njengokuba siza kubona baye bajamelana nentshutshiso ekrakra, yaye ngokwenza oko baye bahlahl’ indlela yabavakalisi abangaphezu kwama-150 000 abakhonza eRashiya namhlanje.

IRashiya yaziwa ngokusesikweni ngokuba “Lumanyano Lwamazwana aseRashiya,” yaye oko kuthetha ukuba eli lizwe aliyilwa luhlanga olunye. Kanye njengokuba negama libonisa, lumanyano lweentlanga, ingxubevange yezizwe, iilwimi nabantu abanezithethe ezahlukeneyo. Masiqale ke sikubalisele ngendlela ezazahluke ngayo iintlanga, iilwimi, nonqulo, kungekuko kwiRashiya yedemokhrasi yanamhlanje, kodwa kuBukhosi baseRashiya obabulawulwa yiczar kwiminyaka engaphezu kwekhulu eyadlulayo.

UKUSHUMAYELA NGENKALIPHO KUBEFUNDISI BASEMOSCOW

Ngexesha abantu babenomdla kwimicimbi yetyalike, uSemyon Kozlitsky, indoda eyayiluthanda egazini unqulo, neyafunda yayityekeza kwisikolo secawa yobuOthodoki baseRashiya, yadibana noCharles Taze Russell, owayekhokela umsebenzi waBafundi BeBhayibhile, njengokuba amaNgqina kaYehova ayesaziwa ngaloo ndlela ngelo xesha. UNina Luppo, umzukulwana kaSemyon, uthi: “Utatomkhulu wasuk’ apha waya eUnited States ngowe-1891, waza wadibana nomzalwan’ uRussell. Wayesoloko ehamba nefoto ababefote bobabini kuyo yaye wayengapheli emlonyeni wakhe umzalwan’ uRussell.” Ngasekupheleni kweminyaka yee-1800 umzalwana uRussell nezinxulumani zakhe babemaxhaphetshu bebuyisela unqulo lokwenyaniso ngokufundisa abantu iinyaniso eziguqula ubomi ezisekelwe eBhayibhileni. Ngokuyinxenye lo msebenzi wawuquka ukubhenca unqulo neemfundiso ezibubuxoki zeecawa zeNgqobhoko nabefundisi bazo. Inyaniso yeBhayibhile, nenzondelelo awayenayo umzalwana uRussell nabanye abazalwana awayekunye nabo, yashukumisela okaSemyon ukuba ashumayele ngenkalipho kwisifundisi saseMoscow. Waba yintoni umphumo?

UNina ubhala esithi: “Ngaphandle kokuba aye nasematyaleni, ngoko nangoko wafakwa amakhamandela wathunyelwa eSiberia, etyholwa ngokuba uthuke ubhishophu omkhulu waseMoscow, lafika ngaloo ndlela ilizwi likaThixo eSiberia ngowe-1891.” Ekuhambeni kwexesha, uSeymon Kozlitsky wafudukela kwinxalenye yeSiberia namhlanje ekwilizwe laseKazakhstan. Nalapho washumayela ilizwi likaThixo ngenzondelelo de yaba kukufa kwakhe ngowe-1935.

‘IRASHIYA AYIKAYILUNGELI INYANISO’

Kunyaka wokubhaca kukaSemyon Kozlitsky, umzalwana uRussell watyelela iRashiya okwesihlandlo sokuqala. Malunga nolo tyelelo, wathi: “Kubonakala ngathi iRashiya ayikayilungeli inyaniso.” Loo mazwi akhe ebesoloko ecatshulwa. Ngaba oku kwakuthetha ukuba abantu abanamdla wenyaniso? Akunjalo. Ekubeni urhulumente wayenguzwilakhe wayengabavumel’ abantu beve inyaniso.

Enaba ngale meko, umzalwana uRussell wabhala wathi kwiZion’s Watch Tower kaMatshi 1, 1892: “Urhulumente waseRashiya ungqongqo kumntu wonk’ ohlala kwela lizwe, yaye umntu ongaziwayo emasangweni abo usoloko ekrokrelwa. Kufuneka ukuba akhuphe incwadi yokundwendwela xa esehotele okanye esesitishini ngaphambi kokuba angene okanye ahambe kwidolophu okanye kuso nasiphi na isixeko. Umnini wehotele uthatha incwadi yakho yokundwendwela ayinike ingqonyela yamaPolisa, nayo iyigcine de uhambe, ukuze umntu wasemzini aziwe ixesha afike ngalo nahambe ngalo. Amagosa karhulumente nabasemagunyeni ngabantu nje abadikidiki, bakubonisa zisuka ukuba into oyiyo ulundwendwe apha, qwaba ke. Naziphi na iincwadi namaphepha onawo ayagocwagocwa ukuqiniseka ukuba akukho nto iza kuphazamisa izicwangciso zabo.”

Kwakungathi kwiimeko ezinjalo ukuphumelela komsebenzi wokushumayela kwakuyinto emfiliba. Noko ke, ukukhula kwembewu yenyaniso kwakungenakuthintelwa eRashiya.

UKUQALA “KWEMINI YEZINTO EZINCINANE”

Malunga nowe-1887, IZion’s Watch Tower yanikela ingxelo yokuba kukho iinkupho zamaphephancwadi eziye zathunyelwa kwiindawo ezahlukeneyo, “nkqu naseRashiya.” Ngowe-1904, iqela elincinane laBafundi beBhayibhile eRashiya, labhala lisithi lifumene iincwadi zeBhayibhile nakuba bekunzima. Le leta yacacisa yathi: “Uncwadi lutsale ingqalelo yabaninzi, yaye luphantse lwathinjwa” ngabasemagunyeni. Ndlela le eli qela lakuvuyela ngayo ukufumana ezo ncwadi, labhala lenjenje, “Zingathi yigolide apha—kunzima ukuzifumana.” Ukubonisa ukuba babeyiqonda injongo yezi ncwadi babhala bathi: “Ngamana iNkosi ngoku ingasisikelela ukuze sifumane ithuba lokuhambisa ezi ncwadi.”

Ewe, kwakusele kuqale ngehlombe ukushunyayelwa kweendaba ezilungileyo, yaye unqulo lokwenyaniso lwalusele lumiselwe. Kanti kwakusanyelwa nje intamo. Kaloku, umprofeti uZekariya wabhala wathi, “ngubani na oyideleleyo imini yezinto ezincinane?”—Zek. 4:10.

Kwiminyaka eyalandelayo, abazalwana baseJamani abanenzondelelo bathumela iincwadi eRashiya. Uninzi lwezo ncwadi lwalubhalwe ngesiJamani, yaye uninzi lwabantu abathetha olu lwimi bayamkela inyaniso. Ngowe-1907, amalungu ecawa yamaBhaptizi aseJamani, aseRashiya athunyelelwa iikopi zencwadi ethi Millennial Dawn. Xa abantu abali-15 kuloo cawa bamela unqulo oluyinyaniso, basikwa ecaweni. Kamva, umfundisi owayewachasa wazamkela iinyaniso ezichazwe kwiMillennial Dawn.

Ngowe-1911, umsebenzi wahambela phambili ngendlela engaqhelekanga—ngenxa yohambo lwasemva komtshato. Emva kokuba isibini esiselula sakwaHerkendells eJamani sitshatile, sathabatha uhambo lokuya kushumayela kubantu abathetha isiJamani eRashiya. Savuya ngeyona ndlela sisakufumana iqela labavakalisi boBukumkani saza salinceda ngokomoya.

Kamva, omnye umfundi waseRashiya wabhala wathi: “Iincwadi ezisuka eJamani zibalulekile kum njengemana evela ezulwini kubantwana bakaSirayeli. . . . Kodwa isenza buhlungu into yokuba iincwadi zingekho ngesiRashiya! Ndisebenzisa naliphi na ithuba endinalo ukuze ndiguqulele amanqaku awahlukeneyo kwisiRashiya. Ukuguqulela kwakusele kuthabath’ unyawo, yaye kuninzi okwakuza kuguqulelwa.

“MININZI IMIPHEFUMLO EFUNA UTHIXO”

Ngowe 1911, uR. H. Oleszynski, umzalwana ongumPolish waseWarsaw, ePoland, ngelo xesha eyayiyinxalenye yoBukhosi baseRashiya, walungiselela ukuba iphecana elinomxholo othi Baphi Abafi? liguqulelwe ngesiRashiya. Kwileta eya kumzalwana uRussell, wabhala wathi: “Ndithumela kunye nale leta ikopi eguqulelweyo . . . Apha ukwenza iikopi eziliwaka kubiza iiruble ezingama-73. . . Mininzi imiqobo kodwa mininzi nemiphefumlo efuna uThixo.” La maphecana athunyelwa nolunye uncwadi lwabantu abantetho isisiRashiya, baza bazisa eRashiya. Kwaba ke kuthatyathwa inyathelo elihle kwintsimi yolu lwimi lusakhasayo. Kamva nolunye uncwadi—amaphecana, iincwadana, neencwadana ezinemifanekiso—zaqalisa ukuveliswa. Kamva ekuhambeni kwexesha, kwaguqulelwa ezinye iincwadi ezinkulu.

Ngowe-1912, umzalwana uRussell watyelela eFinland, eyayiyinxalenye yoBukhosi baseRashiya. Kwamiselwa ukuba uKaarlo Harteva abe ngummeli weWatch Tower Bible and Tract Society eFinland. NgoSeptemba 25, 1913, ummeli weczar, iBhunga laseRashiya eNew York, wagximfiza isitampu saseburhulumenteni waza watyobela ukuqinisekisa ukuba wayenikwe igunya ngurhulumente.

UHAMBO LOKUSHUMAYELA LWEENYANGA EZIMBINI LUYABAMBEZELEKA

Kungekudala, ngaphambi kokuba kuqhambuke iMfazwe Yehlabathi I, uJoseph F. Rutherford esuka eBrooklyn, watyelela amazwe aliqela njengommeli wentlangano. Kolu tyelelo, wadibana noMfundi weBhayibhile uDojczman, kwisixeko sasePoland iLodz. Kamva, umzalwana uDojczman nentsapho yakhe batyelela eRashiya kuhambo ababecinga ukuba luza kuthabatha iinyanga ezimbini beshumayela. Noko ke, ukuqhambuka kwemfazwe kwalubambezela uhambo lwabo.

Emva kokutyhubela iinzima ezininzi, intsapho yakwaDojczman, yahlala kwidolophana ekufuphi noMlambo iVolga. Ngowe-1918 le ntsapho yagqiba ekubeni ibuyele ePoland, kodwa ubhubhane wengqakaqha wenza ukuba ingakwazi ukubuyela apho. Emva koko, yavalwa imida ngenxa yokuqhambuka kwemfazwe yamakhaya. Abantwana abathathu bale ntsapho bafa ebudeni bale minyaka—omnye ngenxa yengqakaqha, omnye yinyumoniya, kanti omnye ngenxa yokungafezeki.

Indlala noloyiko yayizizinto zemihla ngemihla kubantu abaninzi. Izidumbu zazithe tywa ezitratweni ngenxa yendlala. Ngenxa yoko, abantu abaninzi ngakumbi abasuka kwamanye amazwe, babetyholwa ngokuba nobudlelane “notshaba” yaye bagwetyelwa ukufa ngaphandle kokuya enkundleni. Ngenye imini indoda eyayihamba nejoni yambonzeleka endlwini yakwaDojczman.

Le ndoda yathi: “Lutshaba, mbambeni!”

Ijoni labuza: “Ngoba? Wenze ntoni?”

Le ndoda yapheka iqhinga ukuze ingamhlawuli umzalwana uDojczman ngomsebenzi wokuchwela awayewenzele yona. Emva kokuva la madoda omabini, ijoni labona ukuba le ndoda iyaxoka laza layikhuphela ngaphandle. Ijoni laxelela umzalwana uDojczman ukuba likhumbula bencokola kamnandi ngenye imini ngeBhayibhile. Kusenokwenzeka ukuba loo ncoko yasindisa umzalwan’ uDojczman nentsapho yakhe. Ngowe-1921 urhulumente wobuKomanisi woyisa imvukelo yomkhosi yaza yaphela imfazwe yobukhaya. Intsapho yakwaDojczman yenjenjeya ukubuyela ePoland.

ABAFUNDI BEBHAYIBHILE NABAXHASI BOBUKOMANISI

Ngenxa yeMfazwe Yehlabathi I, unxibelelwano nabazalwana baseRashiya lwaqhawuka. Njengokuba kwakunjalo ngabo bonke abazalwana ehlabathini, abaseRashiya babengakuqondi kakuhle ukubekwa kukaKristu njengomlawuli. Babengenalo nofifi lokuba kungekudala kwilizwe labo kwakuza kwenzeka iziganeko eziphawulekayo zenkulungwane yama-20, yaye uninzi lwazo luyinzaliseko yeziprofeto zeBhayibhile.

Phakathi kowe-1917, iiNguqu zaseRashiya zabhangisa ulawulo lweminyaka eli-370 lweczar. Engazi ngobukho beNkosi uYesu Kristu, abalawuli abatsha baseRashiya, abaxhasi bobuKomanisi bamisela uhlobo lorhulumente olungazange lwabonwa ngaphambili. Ngoko ke, kwiminyaka nje embalwa kwamiselwa iUnion of Soviet Socialist Republics, iUSSR ngamafutshane, yaye malunga ne-17 ekhulwini yomhlaba wonke wawuphantsi kwayo.

Okuphawulekayo kukuba kwiminyaka engephi yeeNguqu zaseRashiya, uVladimir Lenin, inkokeli yokuqala yeSoviet Union, yathi: “Wonk’ umntu kufuneka akhululeke ngokupheleleyo, kungekuphela nje ngokwendlela afuna ukunqula ngayo, kodwa asasaze aze atshintshe unqulo lwakhe. Akukho namnye osemagunyeni onelungelo lokubuza nawuphi umntu ngonqulo lwakhe: lo ngumbandela wesazela somntu ngamnye yaye akukho namnye unelungelo lokuphazamisa.”

Kwezinye iindawo, le migaqo yaseburhulumenteni neyayimelwe ngumbutho iSocial-Democratic Party, yavulela ithuba lokuba abantu abantliziyo zinyanisekileyo bathethe nabanye ngeBhayibhile. Phofu ngokuqhelekileyo, eli Lizwe litsha lalingakholelwa kuThixo kwasekuqaleni yaye laliluthiye egazini unqulo, lusithi “sisiyobisi.” Enye yezinto ezenziwa ngabameli bobuKomanisi yaba kukwahlula iCawa kuRhulumente. Ukufundisa kwemibutho yonqulo kwavalwa ngokusemthethweni zaza izakhiwo zecawa zathatyathwa ngurhulumente.

Ayeza kuthini ke amaqela aBafundi beBhayibhile awayethe saa kwelo, kulo rhulumente mtsha njengokuba babemela uBukumkani bukaThixo? Omnye uMfundi weBhayibhile waseSiberia kancinane nje emva kowe-1917, wasenzela lo mfanekiso-ngqondweni woyikekayo: “Kusenokuba niyayazi imeko esikuyo apha eRashiya. Sikurhulumente weSoviet, ophantsi kwemigaqo yobuKomanisi. Nakuba siphawula utshintsho kokusesikweni, nantoni na enokwenza noThixo iphoswe kwesinomhlwa.”

Ngowe-1923, inkcaso nxamnye naBafundi beBhayibhile yayisele iqatha. Abazalwana babhala besithi: “Sibhala le leta ukunazisa ngemeko yaseRashiya. . . . Sinazo izinto ezisisiseko, ukutya nempahla, kodwa silambele ukutya kokomoya. Iincwadi ezazithunyelwe kuthi ziye zahluthwa ngurhulumente. Siyanicela ukuba nisithumelele ezinye iincwadi zesiRashiya ngokungathi ziileta. Baninzi abantu abalambele iNyaniso yeLizwi. Kutshanje kuye kwabhaptizwa abantu abahlanu, yaye kukho nabanye abalishumi elinesihlanu abasuka kwicawa yamaBhaptizi abakunye nathi.”

IMboniselo yesiNgesi kaDisemba 15, 1923 yathi: “Umbutho uzama ngazo zonke iindlela ukuzisa iincwadi eRashiya yaye siza kuqhubeka sisenza oku ngoncedo lweNkosi.” Ngowe-1925, IMboniselo yayifumaneka eRashiya. Indlela oku okwachaphazela ngayo umsebenzi wokushumayela eRashiya yacaca zibekwa. Ngokomzekelo, elinye ilungu lecawa yoBuvangeli lalingayiqondi ncam into yokuba imfundiso yesihogo noThixo oluthando zidibana njani na. Xa waphakamisa lo mbuzo kubantu akhonza nabo, basuka bamthandazela becela uThixo ukuba amncede kwiingcinga ezinjalo. Kamva, yena nomfazi wakhe bafumana inkupho yeMboniselo yaye ngoko nangoko babona ukuba yinyaniso le. Wabhala esithi, “silindele imana esuka ngaphesheya kolwandle.” Baninzi abazalwana ababechaza ukuba bayifumana le “mana,” yaye bebulela abazalwana baseUnited States ngothando lwabo lobuKristu ababelubonakalisa kubo ngokuvelisa ukutya kokomoya okwakubomeleza.

‘KHANINDITHUMELELE YONK’ INTO ENINAYO’

Ileta echukumisayo eyayisuka eSiberia yapapashwa kwiMboniselo kaSeptemba 1925. Enye ititshala enentsapho etsala nzima, yabalisa ukuba yona nentsapho yayo bafuduka kumzantsi Rashiya baya eSiberia ngowe-1909. Kwileta yayo ibalisa ukuba iye yafunda iimpapasho yaye ayiziva luvuyo, yongezelela isithi: “Owona mnqweno ndinawo kukuba ndibe nolwazi olunzulu lwenyaniso kaThixo ukuze ndibe namandla okulwa nobumnyama.” Yaqukumbela ileta yayo ngokucela ezinye iincwadi, yathi: “Ncedani nindithumelele yonk’ into eninayo.”

Impendulo yomhleli yapapashwa kwakuloo nkupho. Yathi: “Kudala sizama ukuthumela incwadi eRashiya, kodwa imizamo yethu inyhashwa ngurhulumente waseRashiya ongafuni ukusibona nangetshengele. Le leta nezinye ezifana nayo, zifana nekhwelo elahlatywa ngabaseMakedoni: ‘Welelani ngapha . . . nize nisincede.’ (IZe. 16:9) Siza kube silapho xa livela ithuba naxa oko ikukuthanda kweNkosi.”

Ngokwenene, IMboniselo izingqine isisixhobo esihle sokushumayela iindaba ezilungileyo nokuze “kube bubungqina” kulwimi lwesiRashiya! (Mat. 24:14) Ngowama-2006, inani leencwadi ezipapashwe ngesiRashiya ngamaNgqina kaYehova, zifikelele ama-691 243 952, inani elingaphezu kwalo naluphi na ulwimi ngaphandle kwezine isiNgesi, isiPhuthukezi neSpanish. UYehova uye wayisikelela imigudu yamaNgqina kaYehova yokuvakalisa iindaba zoBukumkani.

UKUSHUMAYELA KUMARASHIYA AHLALA KWAMANYE AMAZWE

Ekubeni amaKomanisi ayesezintanjeni, amaRashiya amaninzi afudukela kwamanye amazwe. IMboniselo nezinye iincwadi zesiRashiya zazishicilelwa ngaphandle kweSoviet Union. Ngaloo ndlela, urhulumente waseSoviet wayengenako ukuthintela ukutya kokomoya kwamanye amazwe. Ngasekupheleni kweminyaka yee-1920, iincwadi zesiRashiya zazifikelela abantu ehlabathini lonke, yaye iileta zombulelo zazisuka kubantu abathetha isiRashiya abasuka eFinland, eFransi, eLatvia, eParaguay, ePoland, eOstreliya, eUnited States naseUruguay.

Ekugqibeleni, abazalwana balungiselela ukuba kushunyayelwe kuze kuqhutywe neentlanganiso zebandla ngesiRashiya. EUnited States, iintetho zeBhayibhile zalungiselelwa ukuba zisasazwe ngesiRashiya kwizitishi zikanomathotholo. Kwasekwa amabandla esiRashiya eBrownsville, ePennsylvania kwaza kwalungiselelwa neendibano zesithili. Ngokomzekelo, ngoMeyi 1925, abazalwana baqhuba indibano yesithili yeentsuku ezintathu ngesiRashiya eCarnegie, ePennsylvania. Kweza abantu abangama-250 yaye kwabhaptizwa abangama-29.

UKUGUQUKA KWEEMEKO

Itshoba lalal’ ubethe kwinto kaLenin, yaye emva koko urhulumente waba ngathi uyaqinisa ukuhlasela zonke iicawa. Ngowe-1926 kwasekwa iLeague of the Militant Godless—gama elo elalivisisana neenjongo zalo mbutho. Lalisekho iphulo lokuba kususwe neengcambu ezintliziyweni nasezingqondweni zabantu ukukholelwa kuThixo. Kungabanga ntsuku zatywala, umoya wokungakholelwa kuThixo wanwenwa kuwo wonke loo mhlaba weSoviet Union mkhulu. Kwileta eyayisiya kwikomkhulu omnye waBafundi beBhayibhile, waseRashiya wathi: “Ulutsha oluninzi lusezela lo moya, yaye oku kwenza ukuba kube nzima ukufunda inyaniso.”

ILeague of the Militant Godless yapapasha iincwadi ezazichas’ uThixo, kuquka nephephancwadi iAntireligioznik. Ngowe-1928, eli phephancwadi lathi: “EVoronezh nakumathanga ayo kunyakazela amahlelo amaninzi.” Phakathi kwamahlelo amaninzi yachaza, ‘Abafundi beBhayibhile abangama-48, neenkokeli zabo uZinchenko noMitrofan Bovin.” IMboniselo kaSeptemba yowe-1926, yayineleta eyayibhalwe nguMikhail Zinchenko waseRashiya. Wabhala wathi: “Abantu balambele ukutya kokomoya . . . Kuncinane kakhulu esinako. Umzalwana uTrumpi nabanye baguqulela baze benze iikopi zesiRashiya yaye le kuphela kwendlela esizondla ngayo ngokomoya nesomelezana ngayo. Sithumela imibuliso yabazalwana baseRashiya.”

NgoSeptemba 1926, umzalwana uTrumpi wabhala echaza ukuba kukho ithemba lokuba abasemagunyeni baza kuvumela abazalwana bafumane iincwadi ngesiRashiya. Wacela abazalwana besebe laseBrooklyn ukuba bathumele amaphecana, iincwadana, iincwadi, nemiqulu yeMboniselo kwiofisi yaseMagdeburg, eJamani. Ukuphendula eso sicela umzalwana uRutherford wathumela uGeorge Young eMoscow. Wafika apho ngoAgasti 28, 1928. Kwenye yeeleta zakhe umzalwana uYoung wabhala wathi: “Zikho izinto ezenzekileyo ezibangel’ umdla kodwa andazi enoba ndiza kuvunyelwa ukuba ndihlale ixesha elingakanani na.” Nakuba wafumana ithuba lokuthetha nabasemagunyeni eMoscow, wafumana isazisi esimvumela ukuba ahlale kwelo lizwe de kwaba ngo-Oktobha 4, 1928.

Ngeli xesha, isimo sengqondo kwiLizwe leSoviet ngonqulo sasingacacanga. Amaxwebhu asuka kurhulumente ayebonisa ukuba amaqela onqulo ayeza kubandakanywa kubasebenzi beSoviet. Kwiminyaka kamva, eli themba laba ngumgaqo-nkqubo karhulumente. Imele icace phofu into yokuba, urhulumente waseSoviet wayengafuni ukubabulala abantu bakaYehova; kodwa wayefuna ukuguqula iingqondo neentliziyo zabo. Wayefuna ukweyisela abantu bakaThixo ukuba baguquke, ebanyanzela ukuba bathembeke kwilizwe labo. Kodwa eyokuba abantu bagcine ingqibelelo yabo kuYehova, yayiyinto yokugqibela ezingqondweni zabo.

Emva kokuba umzalwana uYoung elifulathele elaseRashiya, abazalwana balapho babhinqa omfutshane beshumayela ngoBukumkani bukaThixo. UDanyil Starukhin wamiselwa ukuba ongamele umsebenzi wokushumayela eRashiya. Ukuze atyhalele phambili umsebenzi nokukhuthaza abazalwana, umzalwana uStarukhin watyelela eMoscow, eKursk, eVoronezh, nakwezinye izixeko zaseRashiya naseUkraine. Ekunye nabanye abazalwana washumayela kwiicawa zamaBhaptizi, etyhila inyaniso ngoYesu Kristu nangoBukumkani bukaThixo. NgoJanuwari 1929, abazalwana bagqiba kwelokuba baqeshe isakhiwo secawa eKursk, behlawula iidola ezingama-200 ngonyaka ukuze babe neentlanganiso esidlangalaleni.

Kamva kuloo nyaka, abazalwana beBheteli yaseBrooklyn bacela imvume kwiPeople’s Commissariat of Trade yaseUSSR ukuba bathumele iipasile ezincinane zeencwadi zeBhayibhile eSoviet Union. Ezi pasile zaziquka iikopi ezingama-800 zencwadi ethi UHadi LukaThixo nethi Deliverance nezinye iincwadana ezingama-2 400. Kwiinyanga ezimbini le pasile yabuya igximfizwe ngesitampu esithi: “Ibuyiselwe Ayamkelekanga Ukungena Kubalawuli Bezinto Ezishicilelweyo.” Kodwa abazalwana abazange balahl’ ithemba. Abanye babecinga ukuba isizathu sokuba zibuyiswe yayikukuba zazibhalwe ngoonobumba abadala besiRashiya. Ukususela ngoko, abazalwana baqiniseka ukuba isiRashiya siguqulelwa ngokuchanileyo yaye sishicilelwa ngendlela ehambisana nolwimi.

IMFUNEKO YOKUGUQULELA NGOKUSEMGANGATHWENI

Ukususela ngowe-1929 IMboniselo yayinesaziso esibongoza abazalwana abasazi kakhuhle isiNgesi nesiRashiya ukuba babe ngabaguquleli. Ngokomzekelo, IMboniselo yesiNgesi kaMatshi 1930 yayinesi saziso: “Umzalwana ofanelekayo onolwazi lwesiNgesi nosazi kakuhle isiRashiya ufunwa ngamandla ukuba aguqulele ngokusuka kwisiNgesi ukusa kwisiRashiya.”

UYehova wayibona le mfuneko yaye kwavela abaguquleli abasuka kumazwe awahlukeneyo. Omnye waba baguquleli yayinguAleksandr Forstman, owayethumela amanqaku aguqulelwe ngesiRashiya kwiofisi yesebe yaseDenmark eCopenhagen, baze bona bawathumele kwikomkhulu. Umzalwan’ uForstman wayengumguquleli onentshiseko ehlala eLatvia. Wayefunde wade wayityekeza, etyibilika kwisiNgesi nesiRashiya yaye eziguqulela ngokukhawuleza iincwadi zeBhayibhile. Ekuqaleni wayesebenza nje iiyure ezimbalwa ekuguquleleni, njengokuba wayenomsebenzi wempangelo ukuze axhase umfazi wakhe ongakholwayo nomntwana wabo. Ngowe-1932, umzalwana uForstman waba ngumguquleli ixesha elizeleyo. Ebudeni benkonzo yakhe waguqulela amaphecana, iincwadana neencwadi. Wasweleka ngowe-1942.

Abazalwana babenomdla ongazenzisiyo wokuguqulela iincwadi ezazifumaneka ngokusemgangathweni ngesiRashiya, bekholelwa ukuba umsebenzi wokushumayela wawuza kuba semthethweni eRashiya. UWilliam Dey, umveleli kwiOfisi yoMntla Yurophu wabhala ileta ebhalela umzalwana uRutherford esithi: “Xa uvulwa umsebenzi eRashiya, yaye kungekudala uza kuvulwa, kuya kuba yinto entle ukuba nabaguquleli abasemgangathweni ukuguqulela iincwadi zethu, sisenzela abantu abazizigidi ezili-180.”

UKUSASAZA NGONOMATHOTHOLO

Unomathotholo yenye yeendlela ezazisetyenziswa ukuvakalisa iindaba ezilungileyo kwintsimi ephangaleleyo yesiRashiya. IMboniselo kaFebruwari 1929 yayinesi saziso: “Iintetho zesiRashiya ziza kusasazwa kunomathotholo.” Ucwangciso lwalusasazwa rhoqo ngeCawa yesibini neyesine enyangeni.

Umzalwana uWallace Baxter, umveleli wesebe lase-Estonia, ubalisa athi: “Emva kweengxoxo eziliqela, ngowe-1929, kwatyikitywa isivumelwano sokusasaza unyaka wonke. Emva kokuba kuqalisiwe ukusasaza ngesiRashiya, seva ukuba abantu baseLeningrad babephulaphula. Intsabelo yorhulumente weSoviet yafana nqwa neyesifundisi sase-Estonia. Kwalunyukiswa abantu ukuba bangasiphulaphuli isigidimi soBukumkani.” Ngowe-1931, kwakusasazwa ngesiRashiya ngexesha elalifanele abaphulaphuli, phakathi kwe-5:30 ne-6:30 matshona. Emva kweminyaka emithathu enesiqingatha, usasazo lwayekiswa ngoJuni 1934. Kwileta eyayibhalwe yiofisi yesebe yase-Estonia, abazalwana bachaza isizekabani sokuba ukusasazwa kuyekiswe, bathi: “Abefundisi bacebise urhulumente [wase-Estonia] ukuba ukusasaza ezi ntetho akulixhasi iLizwe, kuba zisekelwe kubuKomanisi yaye ziphembelela isiphithiphithi.”

KUVELA UTSHINTSHO

IOfisi yaseBrooklyn yathumela uAnton Koerber kwiSoviet Union ngowe-1935, kukho ithemba lokuba uza kuvula iofisi yesebe apho. Kwakucetywa ukuba kuthunyelwe umatshini wokushicilela eUSSR osuka eJamani, njengokuba uAdolf Hitler wayexhuzula imikhala kwelo. Nakuba eli cebo lafa namthanyana, umzalwana uKoerber wadibana nabazalwana baseRashiya.

Kangangeminyaka embalwa umsebenzi wokushumayela eRashiya waba nenkqubela ngokuthe ngcembe. Uncwadi lweBhayibhile lwaluguqulelwa kwisiRashiya phantsi kokhokelo lweofisi yesebe yaseLatvia. Kodwa ke, kwakusenzima ukuthumela iincwadi ezishicilelweyo kwelo lizwe. Uncwadi oluninzi olwalushicilelwe lwagcinwa ezishedini.

Ngaphambi kokuqalisa kweMfazwe Yehlabathi II ngowe-1939, amaNgqina ayembalwa. Ngenxa yeso sizathu, urhulumente weSoviet akazange awase so kangako. Kodwa ke, zaziza kutshintsha izinto. Kancinane nje emva kokuba iNazi yamaJamani yagaleleka ePoland ngowe-1939, iSoviet Union yasala neeriphabliki zayo ezi-4 kwezili-15—iEstonia, iLatvia, iLithuania neMoldova. Amawaka amaNgqina kaYehova azibona sele ephakathi kwiSoviet Union—ilizwe elaliza kudlakazwa yimfazwe. Yayiza kuba lixesha losizi nonxunguphalo kwizigidi zabantu. KumaNgqina kaYehova, yayiza kuba lixesha lokubonisa ukuthembela kwabo kuThixo phantsi kwedyokhwe enzima yengcinezelo.

UKULUNGELA UKUNYAMEZELA

NgoJuni 1941, iJamani yahlasela iSoviet Union engalindelanga uJoseph Stalin owayeyinkokeli yelo lizwe. Ekupheleni konyaka, amajoni amaJamani afikelela kwimimandla ekufuphi needolophu zaseMoscow, yaye ukuwa kweSoviet Union kwabonakala kungenakuphepheka.

Ngokudyuduzela, uStalin wabopha amaxonya ephembelela ilizwe lonke kwinto eyabizwa ngokuba Yimfazwe Enkulu Yokuthanda Ilizwe. OkaStalin wayesazi ukuba kwakufuneka enze umnyinyiva kwiicawa ukuze azuze inkxaso yabantu kwiinzame zakhe zokulwa, kaloku izigidi zabantu zazisaluthanda unqulo. NgoSeptemba 1943, kwiKremlin, phambi kwamehlo kawonke wonke into kaStalin yathweswa iimbasa ezintathu eziphambili zeCawa YobuOthodoki YaseRashiya. Oku kwavala umsantsa owawukho phakathi kweCawa neLizwe yaye kwavulela inqwaba yeeCawa ithuba lokubonakala ekuhleni.

NjengamaNgqina kaYehova aseJamani, abazalwana baseRashiya abazange babe nenxaxheba kwimfazwe. Babeza kuginya nokuba kuyakrakra, yaye babezimisele ukuthobela umyalelo weNkosi yabo. (Mat. 22:37-39) Ngenxa yeso sigqibo, amaNgqina aseUkraine, eMoldova nakwiiriphabliki zeBaltic athunyelwa kwiinkampu zoxinaniso kumbindi weRashiya phakathi kowe-1940 nowe-1945.

UVasily Savchuk ubalisa esithi: “Ndabhaptizwa eUkraine ngowe-1941 ndineminyaka eli-14 ubudala. Ebudeni bemfazwe, abazalwana abaninzi bathunyelwa ezintolongweni nakwiinkampu kumbindi weRashiya. Kodwa umsebenzi kaYehova awuzange ume. Oodade abathembekileyo nolutsha olufana nam kwafuneka sithabath’ iimbopheleleko zebandla size sikhokele nasentsimini. Kwidolophana yasekhaya, omnye umzalwana, owayegula wathi kum: ‘Vasily, sicela uncedo lwakho. Sinomsebenzi obalulekileyo esimele siwenze, yaye asinawo amadoda aneleyo.’ Andizange ndikwazi ukuzibamba xa ndabona indlela lo mzalwana awayewuxhalabele ngayo umsebenzi kaYehova nakuba wayegula. Ndavuma ukwenza nantoni na endandimele ndiyenze. Salungiselela ukuba kubekho oomatshini bokushicilela kumagumbi angaphantsi ukuze silungiselele ukutya kokomoya, sikusasaze kubazalwana, ngakumbi abo babesezintolongweni.”

Phezu kwako nje ukuzinikela ngokungazingci koodade nolutsha, ukutya kokomoya kwakunganelanga. Icebo lavela kubazalwana abafudukela ePoland bevela eRashiya nabanikela ingxelo kwiofisi yasePoland. Abazalwana baseUkraine nabaseRashiya bafudukela kwelinye icala leRashiya, behamba nokutya kokomoya nezixhobo zokushicilela ukuze bazisebenzise eRashiya.

“NGAMNYE MAKAYE ENDAWENI YAKHE”

Ngowe-1946 abazalwana abahlala ePoland kwafuneka ukuba bafudukele kwakhona kwiSoviet Ukraine. UIvan Pashkovsky ubalisa esithi: “Abazalwana babuza iofisi yesebe laseLodz ukuba babemele benze ntoni ngale mfuduko. Impendulo yabo yacaphula Abagwebi 7:7, apho ithi: ‘ngamnye makaye endaweni yakhe.’ Kwiminyaka kamva, ndayiqonda indlela uYehova awawukhokela ngayo ngobulumko umsebenzi wokushumayela kwiimeko ezimaxongo. Kuthi igama elithi ‘iindawo’ zethu, lalibhekisa kuyo nayiphi na indawo uYehova asithumela kuyo. Saqonda ukuba kwakubalulekile ukuthobela imiyalelo yabasemagunyeni. Ngaloo ndlela, salungiselela ukuba sifudukela kwilizwe elichas’ uThixo.

“Okokuqala sadibana neqela elalilungele ukubhaptizwa elinamalungu ali-18, ababeziswe endlwini yomzalwana. Saqokelela iincwadi zesiRashiya nesiUkrainian saza sazipakisha ngendlela ekwakuza kubanzima ukuba zibonwe xa kugqogqwa. Kwathi kuvel’ ikhwezi, yabe idolophana yethu irhangqwe ngamajoni omkhosi wasePoland yaye asixelela ukuba silungele indlela. Savunyelwa ukuba sihambe nokutya okwakuza kwanela inyanga nezinto eziyimfuneko zekhaya. Sasiwa kwisitishi sikaloliwe. Ngaloo ndlela iSoviet Ukraine yaba ‘yindawo’ yethu.

“Xa safika kwindawo esasisiya kuyo sasigqongwe ngabantu basekuhlaleni nabasemagunyeni. Njengokuba sasifuna ukunikela ubungqina kubo ngoko nangoko sabaxelela ukuba singamaNgqina kaYehova. Singalindelanga, ngosuku olulandelayo, satyelelwa ngunobhala wekomiti yezolimo. Wathi uyise wayefudukele eMerika yaye wayemthumelela iincwadi zamaNgqina kaYehova. Kwasivuyisa kakhulu oko. Kwasivuyisa ukuba asinike ngokwakhe iincwadi. Xa yena nentsapho yakhe basithelelayo kwiintlanganiso zethu, saqonda ukuba eli lizwe ‘linezinto ezinqwenelekayo’ ezininzi. (Hag. 2:7) Kamva le ntsapho yonke yaba ngamaNgqina kaYehova yaye iye yakhonza ngokuthembeka kangangeminyaka emininzi.”

KUSEKHO UMSEBENZI OMNINZI

Ebudeni nasemva kweMfazwe Yehlabathi II, umsebenzi wokushumayela eRashiya wawusenziwa phantsi kwezona meko zinzima. Kwileta eyayibhalwe yiofisi yesebe yasePoland isiya kwikomkhulu ngoAprili 10, 1947, yathi: “Abameli bonqulo boyikisa amalungu eecawa zabo ngelithi, xa bethabatha IMboniselo okanye iphecana lamaNgqina kaYehova baza kunyanzeliswa ukuba bohlwaywe ngokusebenza ngesinyanzelo iminyaka elishumi. Ngenxa yoko, kukho umoya woloyiko nokungaqiniseki ogqubayo phakathi kwabahlali beli lizwe, yaye abantu bafuna ukukhanya ngamehlo abomvu.”

Incwadi Yonyaka Yowe-1947 yagqabaza ngelithi: “AmaNgqina akanalo uncwadi olushicilelweyo engenayo neMboniselo. . . . Kumathuba amaninzi asebenzisa iikopi ezikhutshelwe ngezandla zize zinikwe abanye. . . Abantu abahambisa la maphephancwadi baphoswa entolongweni xa befunyanwa beneMboniselo.”

URegina Krivokulskaya uthi: “Kwakungathi ilizwe lonke likhuselwe ngocingo oluhlabayo, yaye sasingamabanjwa nakuba sasingavalelwanga. Abayeni bethu, abavakalisi abanenzondelelo bakaThixo, babechitha ixesha elininzi ezintolongweni nasezinkampini. Thina bafazi kwakufuneka sinyamezele kakhulu: Sonke sasingalali kakuhle ebusuku, ingcinezelo yabantu basekuhlaleni nengokwasengqondweni evela kwiSoviet State Security Committee (KGB), ukulahlekelwa yimisebenzi nangenxa yezinye nje izinto. Abasemagunyeni bazama iindlela ezininzi ukuze basahlukanise nenyaniso. (Isa. 30:21) Asithandabuzi ukuba uSathana wayefuna ukusebenzisa eli thuba ukuze avale umsebenzi wokushumayela ngoBukumkani. Kodwa uYehova akazange abashiye kwesinomhlwa abantu bakhe—uncedo lwakhe lwalubonakala nakuthathatha.

“Iincwadi zeBhayibhile ezazithutyeleziswa ngamacebo alusizi ukungena elizweni zasinika ubulumko ‘namandla angaphaya kwaqhelekileyo’ ukuze sijamelane nemeko esasikuyo. (2 Kor. 4:7) UYehova wayebakhokela abantu bakhe, naxa sasitshutshiswa ngokukrakra nguRhulumente, kwakukho ulwando lwabantu abatsha entlanganweni. Kwakumangalisa ukubona ukuba zisuka nje, babekulungele ukunyamezela iinzima kunye nabantu bakaThixo. Ngumoya kaYehova kuphela owawunokuphumeza oku.”

IILETA EZIPHOSWE NGAPHA KOCINGO

Ngowe-1944, uPyotr, owayeza kutshata noRegina, wabanjwa kwiPhondo laseGorki ngenxa yokungangeneleli ezopolitika. Oku akuzange kunciphise inzondelelo yakhe yokushumayela. UPyotr wabhala iileta, nganye kuzo inentshumayelo emfutshane efundisa ngeBhayibhile. Wayephosa leta nganye ngapha kocingo oluhlabayo lwentolongo. UPyotr wayenethemba lokuba kukho umntu owayeza kuzifunda ezo leta, yaye ngenye imini yafundwa—yintombazana egama linguLidia Bulatova. UPyotr wambona waza wambiza. Wambuza ukuba angathanda na ukufunda okungakumbi ngeBhayibhile. ULidia wayithanda le nto, baza bavumelana ukuba baza kudibana kwakhona. Emva koko waqhubeka esiza ukuze afumane ezinye iileta.

ULidia waba ngudade onenzondelelo kumsebenzi wokushumayela iindaba ezilungileyo yaye kungekudala waqhuba isifundo seBhayibhile noMaria Smirnova noOlga Sevryugina. Nabo baba ngabakhonzi bakaYehova. Ukuze baxhase aba dade bokomoya abazalwana balungiselela ukutya kokomoya okuvela enkampini. Ukuze oko kuphumelele, uPyotr wenza ityesi enamacandelo amabini kwelinye lawo wayefaka amaphephancwadi. Walungiselela ukuba le tyesi iphathwe ngabantu abangengawo amaNgqina okanye amabanjwa, ukuze bayise kwindawo eyayihlala omnye udade.

Kungekudala aba dade balungiselela ukuba kushunyayelwe kummandla wabo. Amapolisa akubona oku aza athumela ungcothoza ukuba abahlole, njengokuba kwakuqhelekile oko. Lo mhloli, yayingutishala, wenza ngathi unomdla enyanisweni baza aba dade bamthemba. Ngenxa yokuba babengenamava, bakhawuleza bafak’ isigidimi seBhayibhile baza kamva bayixelela indlela abazifumana ngayo iincwadi. Xa le tyesi yayiza kuphuma enkampini, uPyotr wabanjwa waza wagwetywa eminye iminyaka engama-25 phezu kwesigwebo sakhe. Ngamnye kwaba dade bathathu wafumana isigwebo seminyaka engama-25.

‘BANIKWE INKCAZELO ETHE CHATHA’

Ebudeni nasemva kweminyaka yemfazwe, urhulumente waqhubeka echasa umsebenzi wamaNgqina kaYehova. NgoMatshi 1947 abazalwana basePoland banikela ingxelo yokuba enye ingangalala yaseburhulumenteni kwingingqi esentshona yeSoviet Union, ivakalise ukuba ngasekupheleni kwentwasahlobo akukho nalinye iNgqina likaYehova eliya kubonwa apho. Ileta yabo yayisithi: “Njengokuba sibhala le leta, kufika iindaba ezithi abazalwana noodade abali-100 baye babanjwa ngosuku nje olunye.” Enye ileta yathi malunga nabazalwana abasezinkampini: “Bagcine ingqibelelo yabo kuYehova ngendlela engummangaliso. Abanye bade bancama ubomi babo yaye abazalwana noodade balindele ukuhlangulwa nguYehova njengabo basezinkampini.”

AmaNgqina ayebanjwa ngenxa yokushumayela nokungafuni ukuvota. Abazalwana bathabatha ukhokelo babhala bathi ngowe-1947: “Sicinga ukuba abasemagunyeni kwiSoviet Union abanalo nofifi ngezinto ezenzeka kubazalwana bethu kodwa injongo yabo asikuko ukuba babulawe. Eyona nto ifunekayo kukucacisa izinto nokuba banikwe inkcazelo ethe chatha.”

IMIZAMO YOKUBHALISWA NGOKUSEMTHETHWENI

Ngokukhawuleza isebe lasePoland lacinga ukuba kulungiselelwe abazalwana ababini negqwetha elinamava ukuze umsebenzi wamaNgqina kaYehova ubhaliswe ngokusemthethweni eSoviet Union. Enye ileta esuka ePoland eya kubazalwana eRashiya yathi: “Iindaba ezilungileyo zimele zivakaliswe kuyo yonke indawo, kuquka naseRashiya. (Marko 13:10) Le leta yaqukumbela ngala mazwi: “Yibani nomonde. UYehova uza kuguqula iinyembezi zenu zibe ziinyembezi zovuyo.—INdumiso 126:2-6.”

NgoAgasti 1949, uMykola Pyatokha, uMykhailo Chumak noIlya Babijchuk bafaka isicelo sokubhaliswa ngokusemthethweni. Urhulumente wavuma ukubhalisa amaNgqina kaYehova kodwa phantsi kwemiqathango ethile. Phakathi kwezinye izinto, abazalwana bacelwa ukuba bafake uludwe olunamagama amaNgqina kaYehova onke ahlala kummandla weSoviet Union. Leyo ke into ayizange ivunywe ngabazalwana. Nakuba umsebenzi waqhubeka nenani labavakalisi likhula, abazalwana abaninzi bavalelwa ezintolongweni.

‘UYEHOVA AKANAKUZE AKUKHULULE APHA’

UPyotr Krivokulsky, ubalisa okwenzeka kwihlobo lowe-1945, uthi: “Emva kokuba kuvavanywe amatyala abo, abazalwana abaninzi baphoswa kwiinkampu ezahlukeneyo. Kwinkampu endandikuyo, abantu abaninzi babonisa umdla omkhulu enyanisweni. Elinye laloo mabanjwa, lalingumfundisi wecawa yaye wakhawuleza wakuqonda ukuba oko akuvayo yinyaniso waza wema ngakwicala likaYehova.

Nakuba kunjalo, imeko zazinzima. Ndakha ndavalelwa kwisisele esasisincinane kangangokuba kwakunzima nokuma ngenyawo. Eso sisele sasibizwa ngokuba yindlwana yezinambuzane, kaloku zazingathi zityaliwe incukuthu kwesi sisele—zazininzi kangangokuba zazinokulimfimfitha lonke igazi emzimbeni wam. Emi ngaphambi kwesisele sam, omnye umcuphi wathi: ‘UYehova akanakuze akukhulule apha.’ Ndandifumana izilayi ezibini ezinesiqingatha zesonka nekomityi yamanzi ngemini. Kwakungekho moya, ndandidla ngokusondela kucango oluncinane ndize ndisezele ngamandla umoya owawungena ngemfanta. Ndandiziva iincukuthu zizenzela, zimfimfitha igazi lam. Kwiintsuku ezilishumi ndikwindlwana yezinambuzane, ndamcela ngokuphindaphindiweyo uYehova ukuba andinike amandla okunyamezela. (Yer. 15:15) Xa kwavulwa iingcango zeso sisele, ndaf’ isiqaqa ndaza ndavuka ndikwesinye isisele.

“Emva koko, inkundla yandigweba iminyaka elishumi kwintolongo yenkampu ngenxa ‘yemvukelo nokusasaza impembelelo embi nxamnye norhulumente weSoviet.’ Kwakungekho ndlela yakufumana leta kule nkampu. Amabanjwa alapha ayegwetyelwe izenzo zobundlobongela ezifana nokubulala. Ndaxelelwa ukuba, ukuba andilulahli ukholo lwam, aba bantu baza kwenza nantoni na abaxelelwa ukuba bayenze. Ubunzima bomzimba wam babumalunga neekhilogram ezingama-36 ibe kwakunzima nokuhamba. Nalapho kuloo nkampu, ndafumana abantu abanyanisekileyo abantliziyo zabo zityekele enyanisweni.

“Ngenye imini ndandilele ecaleni kwetyholo ndithandaza, kwafika elinye ixhego. Landibuza, ‘Wenze ntoni le ingaka ude ube lapha kwesi sihogo?’ Xa leva ukuba ndiliNgqina likaYehova, lahlala phantsi, landanga. Lathi: ‘Mfo wam, kudala ndifuna ukuyazi iBhayibhile! Ndiyakucela khawundifundise yona.’ Kwakungathi ndibonwa yintoni nanje. Ndandithungele iincwadi ezindala zevangeli empahleni yam eyayikrazukile, ngoko nangoko ndazikhupha. Eli xhego lacela kule nto yabantwana. Sancokola ixesha elide ngaloo ngokuhlwa. Landixelela ukuba lalisebenza kwigumbi lokutyela yaye laliza kundibonelela ngento esiwa phantsi kwempumlo. Saba ngumtya nethunga ukususela ngoko. Lakhula ngokomoya nam ndaya ndisomelela ngakumbi. Ndandiqinisekile ukuba eli yayililungiselelo elivela kuYehova. Emva kweenyanga ezimbalwa, lakhululwa, kwaye nam ndatshintshelwa kwenye inkampu kwiPhondo laseGorki.

“Izinto zazingafani noko apho. Kodwa ngaphezu kwento zonke, ndandonwabile kuba ndandiqhuba izifundo zeBhayibhile namabanjwa amane. Ngowe-1952, sabhaqwa ngumlindi wenkampu sineencwadi. Sonke sabekw’ ityala. Xa babendincina, bandifaka kwibhokisi encinane evalwe ngci, xa besiva ukuba ndiphelelwa ngumoya babeyivula kancinane, bendinika ithutyana lokuba nditsale umoya baze baphinde bayivale. Babefuna ndilahle ukholo lwam. Sonke safunyaniswa sinetyala. Xa sanikwa isigwebo, akukho namnye kwizifundo zam owayesoyika. Kwatsho kwathi xibilili! Bobane bagwetywa iminyaka engama-25 ezinkampini. Ndanikwa isohlwayo esithe chatha, kodwa satshitshelwa kwiminyaka engama-25 kwinkampu yezikrelemnqa ezincanyiweyo neminyaka elishumi elubhacweni. Emva kokuphuma kwelo gumbi, sema kancinane saza sambulela uYehova ngokusixhasa. Abalindi babamb’ ongezantsi, bezibuza isizathu sokuba sonwabe kangaka. Sahlukaniswa sasiwa kwiinkampu ezahlukeneyo. Ndathunyelwa kwinkampu yooncanyelweni eVorkuta.”

ASINDISWA KUKUNGATHABATHI CALA

Babunzima ubomi basezinkampini. Amabanjwa amaninzi awayengengomaNgqina azibulala. UIvan Krylov uyasityela: “Emva kokuba ndikhululwe entolongweni, ndaya kwimigodi yamalahle eyahlukahlukeneyo ababesebenza kuyo abazalwana noodade. Saqalisa ukunxibelelana, nabani na okhuphele elinye lamaphephancwadi ethu wayelidlulisela kwabanye. AmaNgqina ayeshumayela kuzo zonke iinkampu awayevalelwe kuzo, kwaye abantu abaninzi babenomdla. Emva kokuba ekhululwe enkampini, wambi kuwo abhaptizwa kuMlambo iVorkuta.

“Sasisoloko sivavanywa ngenxa kaYehova noBukumkani bakhe. Ngenye imini ngowe-1948, kwintolongo yaseVorkuta amabanjwa avukela. Aba bavukeli baxelela amanye amabanjwa ukuba le mvukelo iya kuba nefuthe ngakumbi ukuba banokuzilungelelanisa ngokwamaqela obuzwe okanye awonqulo. Ngeloo xesha, kwakukho amaNgqina ali-15 kuloo nkampu. Sabaxelela abo bavukeli ukuba thina singamaNgqina kaYehova ngenxa yoko asinakuba nanxaxheba kuloo mvukelo. Sabachazela ukuba amaKristu enkulungwane yokuqala ayengafak’ isandla xa kwakuvukelwa amaRoma. Abaninzi basala bebamb’ ongezantsi bakuva oku, kodwa asizange sigungqe kwisigqibo sethu.”

Lo mvukelo yaphumela kwintlekele engathethekiyo. Amajoni awayexhob’ afohlela ayiphelisa loo mvukelo aze lo mabanjwa ayevukela asiwa eziseleni. Emva koko bazigalela ipetroli ezo zisele baze bazintumeka umlilo, wonke umntu owayengaphakathi watshela apho. Amajoni awazange abenzakalise abazalwana.

UIvan uhlabela mgama esithi: “NgoDisemba 1948, ndadibana nabazalwana abasibhozo kwenye inkampu ababegwetye iminyaka engama-25 bethothoza.” Yayiyimini yasebusika eqhaqhazelis’ amazinyo, umsebenzi wasemgodini wawuqoba. Nangona yayinjalo imeko, babebonakala bechulumancile bonwabile. Ukuchwayita kwaba bazalwana komeleza nkqu namabanjwa awayengengawo amaNgqina kaYehova.”

ELUBHACWENI ESIBERIA

Nangona abasemagunyeni babekhohlakele, amaNgqina aqhubeka eshumayela iindaba ezilungileyo zoBukumkani bukaYehova ngenzondelelo. Oku kwamphatha emanyeni urhulumente, ngokukodwa iKGB. Uxwebhu olwalubhalwe umhla kaFebruwari 19, 1951, olwalusiya kuStalin lwalusithi: “Ukuze siyitshayele nayiphi na imigushuzo engumtshetsha phantsi yamaNgqina kaYehova iMGB [Isebe Lezokhuseleko, kamva elaba yiKGB] lagqiba kwelokuba amaNgqina neentsapho zawo athunyelwe elubhacweni kumaPhondo aseIrkutsk naseTomsk.” IKGB yayiwazi onke amaNgqina, yacela imvume kuStalin yokuba abantu abangama-8 576 kumaphondo amathandathu eSoviet Union bathunyelwe eSiberia. Sagunyaziswa eso sicelo.

UMagdalina Beloshitskaya yena uthi: “Ngentsimbi yesibini ngeCawa, ngoAprili 8, 1951, savuswa kukungonjwa kocango ngolunya. Umama wathi khwasu ezingubeni ngoko nangoko waza waya emnyango. Igosa likarhulumente lasixelela ukuba: ‘Niza kuthunyelwa elubhacweni eSiberia kuba nikholelwa kubukho bukaThixo. Nineeyure ezimbini kuphela zokuba niqoqoshe zonke izinto zenu. Ningathabatha nantoni ekule ndlu yenu, ngaphandle kokutya okuzinkozo, umgubo, ifanitshala nomatshini wokuthunga. Yonke enye into niyishiye ngasemva. Thabathini impahla yokulala, yokunxiba neebhegi kuphela.’

“Ngaphambili sasifundile kwiimpapasho zethu ukuba mkhulu umsebenzi osafuna ukwenziwa kwinxalenye esempuma yelizwe. Ngoku sasiqonda ukuba lifikile ixesha lokuba uqale loo msebenzi.

“Akakho owayelila kuthi. Eli gosa lothuka laza lathi, ‘Akukho nokuba abemnye olilayo kuni.’ Salixelela ukuba besisilindele esi sihlandlo ukususela ngowe-1948. Sacela ukuba sihambe nenkuku ibe inye, eso sicelo wasikhaba ngawo omane. Kunoko asuka la magosa abelane ngemfuyo yethu. Babelane ngeenkuku zethu, elinye lathabatha zantlanu, elinye zantandathu elinye lathabatha ezintathu okanye ezine. Ehokweni kwasala iinkuku ezimbini kuphela, igosa lakhupha umyalelo wokuba zixhelwe size sizinikwe zona.

“Intwazana yam eneenyanga ezisibhozo yayilele emkhumbini wokulalisa abantwana. Sabuza enokuba sasinokuhamba nawo na loo mkhumbi, kodwa igosa lathi mawohlulwe. Lasinika inxalenye yokulalisa usana.

“Akuzange kube kudala abamelwane bethu beva ukuba siya elubhacweni. Omnye wabo bamelwane wasizisela isonka, njengoko inqwelo yayisimka nathi, wajula lo bheqi inesonka enqwelweni. Ijoni elalisilindile layibona laza layithabatha layiphosa kwakuye. Sasibathandathu kulo nqwelo, yayindim, umama nabantakwethu ababini, umyeni wam nentwazana yethu eneenyanga ezisibhozo. Sathi sakusithela edolophini, safakwa emotweni saza sasiwa kwandaba zabantu ukuze kulungiswe iincwadi zethu. Emva koko sakhweliswa elorini eyayiza kusisa kwisikhululo sikaloliwe.

“KwakungeCawa, ilanga laligqats’ ubhobhoyi. Esi sikhululo sasinyakazela ngabantu—abo baya elubhacweni nabo babeze kusibukela njengoko sasisiya elubhacweni. Ilori yethu yafika yayakumisa phambi kwekhareji likaloliwe apho babesele besilindele kakade abazalwana bethu. Wathi esakuzala uloliwe, amajoni aqinisekisa ukuba siphelele ekhwaza ngamnye wethu ngefani. Ikhareji esasikhwele kulo lalinabantu abangama-52. Ngaphambi kokuba sinduluke, abo babe zokuthi ndlela ntle baqalisa ukulila bambi bengqukruleka. Sasala sibamb’ ongezantsi ekubeni sasingabazi abanye babo bantu. Kodwa babesazi ukuba singamaNgqina kaYehova kwaye sasithunyelwa elubhacweni eSiberia. Uloliwe watsho ngomgqumokazi. Abazalwana bacula ingoma yesiUkraine eyayinomxholo othi: ‘Uthando lukaKristu malube nawe. Zukisa uYesu Kristu, siyakudibana kwakhona eBukumkani.’ Inkoliso yethu yayinethemba nokholo lokuba uYehova akasayi kuze asishiye. Sacula izitanza ezininzi. Eli culo lalichukumisa gqitha kangangokuba amanye kuloo majoni acela kulento yabantwana. Wabe nololiwe ecanda amathafa nemimango.”

“ZAZAHLUKE OKWEMPUMA KWINTSHONA KUNOKO KWAKULINDELWE”

UGqr. N. S. Gordienko, owayengunjingalwazi kwiYunivesithi yaseHerzen St. Petersburg, wachaza oko kwaphunyeza ngabatshutshisi kwincwadi yakhe. Wabhala wathi: “Imiphumo yayahluke okwempuma kwintshona koko kwakulindelwe, babefuna ukuyenza buthathaka intlangano yamaNgqina kaYehova kwiUSSR, kunoko basuka bayomeleza. Kwimimandla emitsha eyayingenawo amaNgqina kaYehova ‘ayephembelela’ abantu basekuhlaleni ngokholo lwawo nangokunyaniseka kwawo.”

AmaNgqina amaninzi akhawuleza aziqhela ezi meko zintsha. Kwamiselwa amabandla amancinane, kwacandwa namasimi ekwakuza kushunyayelwa kuwo. UNikolai Kalibaba uthi: “Maxa wambi eSiberia sasishumayela kwindlu ngendlu okanye, kwizindlu ezimbini okanye ezintathu ngokokulandelelana kwazo. Kodwa kwakuyingozi. Sasishumayela njani? Emva kotyelelo lokuqala, sasiye sizame ukubuyela emva kwenyanga. Sasiqala ngokubuza abantu ukuba, ‘abazithengisi inkuku, iibhokhwe okanye iinkomo?’ Size siyitshintshe incoko ngobuchule sishumayele ngoBukumkani. Emva kwexesha kwaxelelwa iKGB, ngokukhawuleza kwapapashwa inqaku kwiphephendaba elalilumkisa abantu ukuba bangathethi namaNgqina kaYehova. Eli nqaku lahambisa lathi amaNgqina angena emizini yabantu ebuza ukuba ngaba abazithengisi iibhokwe, iinkomo neenkuku—kodwa eyonanto sasiyifuna yayizizimvu!”

UGavriil Livy ubalisa esithi: “Abazalwana bazama ukuqhubeka nomsebenzi wokushumayela nangona babebekw’ esweni elibukhali yiKGB. Isimo sengqondo esasigquba kwiSoviet ngezo mini yayisesokuba, ukuba barhanela ukuba umntu othile uzama ukuxubusha nabo umbandela ophathelele unqulo, babekhawuleza bazise abakwantsasana. Nangona kwakukho le miqobo, saqhubeka sishumayela, nangona singazange sivelise nto ekuqaleni. Noko ke, ekuhambeni kwexesha inyaniso yabatshintsha ngokuthe ngcembe abantu. Omnye wabantu abatshintshwa yinyaniso yindoda eyayilinxila elaziwayo. Emva kokuba ifunde inyaniso, yavisisanisa ubomi bayo nemigaqo yeBhayibhile yaze yaba liNgqina elikhutheleyo. Kamva, igosa leKGB layibiza laza layibuza ukuba: ‘Ibutha nabani ngoku? Onke la maNgqina ayinzalelwana yaseUkraine.’

“Lo mzalwana waphendula wathi: “Ngokuya ndandinxila ndingumalalaphayiphu, wawungandinanzanga. Ngoku ndingumntu owenza izinto kakuhle nothobela umthetho uyandicaphukela. Abantu abaninzi baseUkraine baza kumka eSiberia, kodwa xa bemka abantu abaninzi baza kube befundiswe ukuphila ngendlela efanelekileyo.’”

Emva kweminyaka engephi, igosa elithile laseIrkutsk labhalela eMoscow lathi: “Abantu basekuhlaleni bandulula ukuba onke [amaNgqina kaYehova] afanele athunyelwe kummandla ongasentla ukuze angadibani nabantu aze afundiswe ngokutsha.” Bonke abantu babemi nematha eSiberia naseMoscow bengazi ukuba mabenze ntoni ukuze bawavale umlomo amaNgqina kaYehova.

“NGEKUKUDALA SANITHUMELA KWANTSONGANYAWANA NONKE”

Ebutsheni bowe-1957, abasemagunyeni bagaya iphulo elitsha nxamnye namaNgqina kaYehova. Abazalwana babebekw’ esweni namakhaya abo ayegqogqwa. UViktor Gutshmidt ukhumbula oku: “Ngenye imini xa ndandivela entsimini ndafika zonke izinto zithe saa. Amagosa eKGB ayakhangela uncwadi. Ndabanjwa ndaza ndancinwa iinyanga ezimbini. Intwazana yethu uYulia yayineenyanga ezili-11 kuphela ubudala, enye intwazana eyayindadlana kunaye yayineminyaka emibini kuphela ubudala.

“Xa ndandiphandwa, eli gosa lathi kum ‘awuloJamani kanene?’ Ngezo mini, ‘ubuJamani’ nenkqubo yolawulo ‘yobuFasi’ yayingamaphuth’ ahlathinye. AmaJamani ayethityw’ egazini.

“Ndathi kulo ‘andizithand’ izinto ezinobuhlanga umthetho wam kodwa ukuba la maJamani uthetha ngawo ngalawa ayetshutshiswa ngamaNazi ndinelunda ngawo! Ngezo mini ayebizwa ngokuba ziBibelforscher ngoku abizwa ngokuba ngamaNgqina kaYehova. Ndinebhongo ngokuba lingekho iNgqina elalisebenzisa umpu okanye inkanunu. Ukuba ngaloo maJamani, la uthetha ngawo ndiyazidla ngawo!’

“Lo mcuphi wasuka waba yinkuku esik’ umlomo, ndalek’ umsundulo ndathi: ‘Ndiqinisekile ukuba akukho nokuba libe linye iNgqina likaYehova eliye lanenxaxheba kwimvukelo okanye kudushe. Naxa umsebenzi wamaNgqina kaYehova uvaliwe, awayeki ukukhonza uThixo. Kwangaxeshanye amaNgqina kaYehova ayabahlonela abasemagunyeni ukuba imithetho yabo ayingqubani nemithetho ephakamileyo yoMdali wethu.’

“Ndingalindelanga lo mcuphi wasuka wandingena emlonyeni waza wathi: ‘Alikho iqela esiye salondela njengamaNgqina. Ukuba nanibulele umntu okanye naphalaza igazi, ngekukudala sanithumela kwantsonganyawana nonke.’

“Engqondweni yam kwathi qatha ingcamango yokuba: ‘Abazalwana bethu baye bakhonza uYehova ngenkalipho ehlabathini jikelele, umzekelo wabo uye wasisindisa nalapha eSoviet. Mhlawumbi inkonzo yethu apha inokubanceda abazalwana abakwezinye iindawo.’ Le ngcamango yandomeleza ndabambelela nkqi kwiindlela zikaYehova.”

AMANGQINA KAYEHOVA KWIINKAMPU EZINGAPHEZU KWAMA-50

Ukungabi nanxaxheba kwezopolitiko nokushumayela kwamaNgqina kaYehova ngenzondelelo kwakumphath’ emanyeni urhulumente. (Marko 13:10; Yohane 17:16) Ukungalalanisi kwabazalwana kwezi zinto zimbini kwabangela ukuba bavalelwe entolongweni ixesha elide.

Kwiindibano ezili-199 ezaziqhutywa ehlabathini jikelele ukususela ngoJuni 1956 ukusa kuFebruwari 1957 abazalwana noodade abangama-462 936 batyikitya ixwebhu lezikhalazo, ezinye zezo zikhalazo zathunyelwa eMoscow kwibhunga labaphathiswa. Ezinye zezinto ezazithethwa kula maxwebhu kukuba: “AmaNgqina kaYehova ankolonkoloza kwizisele ezimnyama ezingaphezu kwama-50 ukususela kwinxalenye yeRashiya eseYurophu, eSiberia nasemantla kwiArctic Ocean nkqu nakwisiqithi saseNovaya Zemlya. Kumazwe aseMerika nakwamanye amazwe asentshona, amaNgqina kaYehova atyholwa ngokuba ngoongcothoza bamaKomanisi, kumazwe amaKomanisi atyholwa ngokuba ‘ngoongcothoza basentshona’. . . Kumazwe amaKomanisi aye agwetywa iminyaka engapha kwama-20 ethothoza entolongweni ‘njengoongcothoza.’ Nangona kunjalo awazange akhe abe ngoofunz’ eweni.” Okulusizi kukuba olo xwebhu aluzange lenze mnyinyiva kwimeko yamaNgqina kaYehova kwelo lamaKomanisi.

Kwakunzima ngokwenene kwintsapho zamaNgqina kaYehova eRashiya ukukhulisa abantwana bazo. UVladimir Sosnin waseMoscow wayenoonyana abathathu ngeloo xesha, uthi: “Bonke abantwana kwakufuneka bahamb’ isikolo. Ootishala nabanye abafundi babenyanzela abantwana bethu ukuba babhalise kwimibutho yabafundi eyayikhuthaza ubuKomanisi. Sasifuna abantwana bethu bafunde, sasibanceda kwizifundo zabo. Kwakungekho lula ukufundisa abantwana bethu ukuba bathande uYehova. Ezikolweni zazigqugqisile iimfundiso zamaKomanisi. Kwakufuneka abazali bazingise baze babe nomonde xa befundisa abantwana babo.”

BAMANGALELWA NGOKUKRUMPULA INDLEBE YENTOMBI YABO

USemyon noDaria Kostylyev bakhulisela abantwana abathathu eSiberia. USemyon uyasibalisela: “Ngelo xesha, amaNgqina kaYehova ayejongwa njengabantu abanenzondelelo yempambano ngonqulo. Ngowe-1961, uAlla intombazana yethu yesibini yayifunda kwibanga lokuqala. Ngenye imini xa wayedlala nabanye abantwana, omnye kwabo bantwana wamenzakalisa endlebeni. Ngosuku olulandelayo utishala wambuza ukuba wenzakaliswe yintoni, uAlla wathula cwaka, kuba wayengafuni ukuxela ukuba wenzakaliswe ngugxa wakhe. Lo tishala wayesazi ukuba uAlla wayengumntwana wamaNgqina ngenxa yoko wagqiba kwelokuba samenzakalisa kuba sasifuna aphile ngemigaqo yeBhayibhile. Isikolo sawuxela kumtshutshisi kawonke wonke lo mbandela. Nenkampani endandisebenza kuyo nayo yabandakanyeka. Olu phando lwathabatha unyaka wonke sade ekugqibeleni sathunyelelwa umsila wengwe ngo-Oktobha 1962.

“Iveki ezimbini ngaphambi kokuba liqale ityala, iholo elaliza kuxoxelwa kulo eli tyala lalinombhalo othi ‘sele kumbovu ukuba liqalise ityala lehlelo eliyingozi lamaNgqina kaYehova.’ Mna nomkam sasityholwa ngokunyanzelisa iimfundiso zeBhayibhile kubantwana bethu. Kwakhona satyholwa ngokukhohlakala. Inkundla yasityhola ngokunyanzela intombi yethu ukuba ithandaze ngenxa yoko siye sayikrumpula indlebe. Ingqina le nkundla yayinguAlla kuphela, kodwa wathunyelwa kwikhaya labantwana abaziinkedama eKirensk sixeko eso esasimalunga neekhilomitha ezingama-700 kumntla weIrkutsk, endawo esasihlala kuyo.

“Iholo yayizele imi ngembambo lulutsha lwamakomanisi. Yathi isakunqumama inkundla, abantu babangela umbhodamo. Sasityhalelwa ngapha nangapha siyucwa ngezithuko, omnye wade wathi ezi zinto zimele zikhulule nale mpahla ‘ziyinxibileyo.’ Wonke umntu wayesithi simele sibulawe, omnye wayefuna ukusicim’ igama kanye ngelo xesha. Isihlwele saya sivutha ngumsindo, neejaji zazingade zifike. Lo mbhodamo waqhuba iyure yonke. Sathi sisakusondela isihlwele, omnye udade oliNgqina nomyeni wakhe ongakholwayo bema phakathi kwethu neso sihlwele sabantu, besibongoza ukuba singasibethi. Kwangaxeshanye bezama ukuxelela eso sihlwele singalawulekiyo ukuba zonke ezi zityholo sityatyekwa zona zibubuvuvu, basixhwila kulo nginginya yabantu.

“Ekugqibeleni, yafika ijaji ihamba nabancedisi benkundla yaza yasifundela isigwebo: Saphucwa ilungelo lokukhulisa abantwana. Ndabanjwa ndaza ndathunyelwa enkampini iminyaka emibini. Umafungwashe wethu naye wathunyelwa kwikhaya lokugcina iinkedama emva kokuba eye waxelelwa ukuba abazali bakhe babengamalungu ehlelo eliyingozi yaye oko kwakuyingozi nakuye.

“Unyana wethu yena wasala noDaria, kuba wayeneminyaka emithathu kuphela ubudala. Emva kokuba ndisigqibile isigwebo sam, ndabuyel’ ekhaya. Njengangaphambili, saqhubeka sinikela ubungqina ngokungacwangciswanga.”

“SASINELUNDA NGABANTWANA BETHU”

“Emva kokuba uAlla ekhululwe kwikhaya labantwana abaziinkedama emva kokuba eneminyaka eli-13 ubudala wahlala nathi kwakhona. Sasingakwazi ukuzibamba luvuyo esakuzahlulela kuYehova waza wabhaptizwa ngowe-1969. Kwangaxeshanye, kwakunikelwa ungcelele lweentetho ngonqulo kwiHolo lesixeko sethu. Sagqiba kwelokuba siye ukuze sive ukuba babesiza nelithini. Njengesiqhelo, amaNgqina kaYehova ngawona ayesoloko esematheni. Esinye kwezo zithethi saphakamisa inkupho yeMboniselo saza sathi, ‘eli phephancwadi liyingozi libangela ukuba ilizwe libe zintlaba zahlukane.’ Sahambisa sathi: ‘Amalungu eli hlelo anyanzela abantwana bawo ukuba bafunde la maphephancwadi baze bathandaze. Kwenye intsapho, intwazana eselula yayingakufuni ukufunda eli phephancwadi, uyise wayikrumpul’ indlebe.’ UAlla wothuka woma, kuba wayekho naye apha ephulaphule lo ntetho indlebe zakhe ziphelele. Akazange athethe, kuba wasoyikisela ukuba uza kuphinda ahlukaniswe nabazali bakhe.

“Unyana wethu uBoris, wathi esakuba neminyaka eli-13 ubudala wazahlulela kuYehova waza wabhaptizwa. Ngenye imini wayeshumayela esitratweni nabanye abantwana abaziintanga zakhe, nangona umsebenzi wethu wawusavaliwe. Babengenayo iBhayibhile okanye iimpapasho ezixubusha ngeBhayibhile. Kwasuka kwevumbu imoto, baza bakhweliswa bonke basiwa kwisigqubu somkhosi. Emva kokuba benciniwe baza basetshwa, la magosa omkhosi awazange afumane nto ngaphandle kweendinyana zeBhayibhile ezikhutshelwe ephepheni. Emva koko bakhululwa. Wathi esakufika ekhaya, uBoris wasibalisela ngendlela yena nabanye abazalwana abaye batshutshiswa ngayo ngenxa yegama likaYehova. Saziva sinelunda ngenxa yabantwana bethu, kuba uYehova wabaxhasa xa babevavanywa. Emva kwesi siganeko, mna noDaria sathunyelelwa umsila wengwe ngamagosa eKGB izihlandlo eziliqela. Elinye igosa lathi: ‘Aba bantwana bamele basiwe kwikhaya lokugcina abantwana abaziinjubaqa. Silusizi kuba abakayidibanisi iminyaka eli-14 ubudala.’ Sohlwaywa ngenxa yokushumayela konyana wethu.

“Namhlanje, ndihlala nonyana wam nabazukulwana bonke bahamba enyanisweni. Umafungwashe wethu uhlala eUzbekistan, nangona engekamkhonzi uYehova, uyayihlonela iBhayibhile nathi kwaye usoloko esityelela. Ngowama-2001, uDaria wasutywa kukufa, emva kokukhonza uYehova kwada kwaba sekupheleni. Ngoxa ndisenawo amandla, ndiya kwimimandla esemagqagaleni ndiye kushumayela khona, ndikhangela abantu ‘abanotyekelo olufanelekileyo ngobomi obungunaphakade.’ (IZenzo 13:48) Ndikholelwa ukuba kungekudala uYehova uza kuwuzalisekisa umnqweno womkhonzi wakhe ngamnye, njengokuba kubhaliswe kuIsaya 65:23.”

ABAZALI BAMISELA UMZEKELO OMHLE

UVladislav Apanyuk ukhonza kwiBheteli yaseRashiya. Usayikhumbula kakuhle indlela abazali bakhe abakubethelela ngayo ukuthanda uThixo kuye nakwabanye abantwana bakowabo: “Abazali bethu bathunyelwa elubhacweni eSiberia ngowe-1951 bevela eUkraine. Basifundisa ukuzenzela izigqibo ngoxa sizama ukukholisa uYehova. Ndikuxabisa ngokwenene ukuthetha phandle ngeentsilelo zabo phambi kwethu. Xa benze impazamo babengazifihli. Yayicace gca into yokuba bayamthanda uYehova. Abazali bam babebonakala bechwayitile ngokukodwa xa sincokola ngemibandela yeBhayibhile. Sasibona ukuba babekuthanda ukucamngca nokuthetha ngoYehova. Ezo zinto zasenza nathi sacamngca ngeenyaniso eziphathelele uYehova. Sasidla ngokuba nomfanekiso ngqondweni wendlela abaza kuphila ngayo abantu kwihlabathi elitsha xa zonke izinto ziza kube zihamba kakuhle izifo neemfazwe ziza kube zingasekho.

“Xa ndandisenza ibanga lesithathu, yonke iklasi yethu yamenyelwa ukuba ibhalise kumbutho wolutsha lweSoviet owawubiza ngokuba ngooVulindlela. Kubantwana abaninzi eSoviet Union, ukuba nguvulindlela kwakuliwonga elikhulu. Abantwana endandifunda nabo babelilindele ngolangazelelo olu suku. Ngamnye wethu kwakufuneka abhale isifungo sokuba ukulungele ukuba nguvulindlela weSoviet, iinkokeli zangomso zamaKomanisi. Andizange ndivume, ngoko ke utishalakazi wandohlwaya ngokundivalela eklasini. Wathi: ‘Awusayi kuphuma apha ungasenzanga esi sifungo.’ Emva kweeyure ezimbalwa emva koko, abanye abafundi bankqonkqoza efestileni baza bathi masihambe siye kudlala. Ndasala ngasemva ndingagungqi nakancinane kwisigqibo sam. Omnye utitshalakazi wabuya ngaphambi kokuba litshone ilanga, akundibona ndihleli ndedwa, wathi mandihambe. Olu yayiluloyiso lwam lokuqala. Ndandinebhongo ngokwenza into eyayiza kuvuyisa intliziyo kaYehova. (IMiz. 27:11) Ndathi ndisakufika ekhaya ndabaxelela yonke into eyenzekileyo abazali. Bavuya waza utata wathi, ‘Kwekhu uyindoda nyana!’”

IBHAYIBHILE ITYHOLWA NGOKUBA NXAMNYE NAMAKOMANISI

UNadezhda Vishnya uthi: “Maxa wambi abazalwana babemangalelwa kuba beneBhayibhile, mna nomyeni wam sasingekabi ngawo amaNgqina kaYehova, kodwa inyaniso yayisichukumise gqitha. Ngenye imini amapolisa eza kwindawo endandisebenza kuyo afika andithabatha emka nam. Umyeni wam uPyotr, naye wabanjwa kwindawo awayesebenza kuyo. Ngaphambi kokuba kwenzeke ezi zinto, indlu yethu yaguqululwa ngamapolisa afumana iBhayibhile nencwadana ethi Emva kweArmagedon—Ihlabathi Elitsha LikaThixo. UPyotr wayecinga ukuba andizukubanjwa kuba ndandisele ndineenyanga ezisixhenxe ndikhulelwe.

“Sasityholwa ngokungcatsha umbuso. Sabaxelela ukuba sikholelwa iBhayibhile, eyayiligunya eliphakamileyo kunamagunya aseSoviet.

“Ndathi ‘IBhayibhile liLizwi likaThixo, yiyo loo nto sifuna ukuphila ngokuvisisana nemigaqo yayo.’

“Ixesha lokuvavanywa kwetyala lethu, lafika sekusele iiveki ezimbini kuphela ngaphambi kokuba ndibeleke. Ebudeni bokuvavanywa kwetyala ijaji yandivumela ukuba ndimane ndibethwa ngumoya ndiphelekwa lijoni. Ngesinye isihlandlo landibuza ukuba yintoni le ndimangalelwe ngayo. Oko kwandivulela ithuba lokuba ndinikele ubungqina kulo.

“Ijaji yathi iBhayibhile noncwadi olwaluthinjiwe ‘zazinxamnye neSoviet.’ Ndavuya gqitha ngokuba ingendim nomyeni wam ababetyholwa ngokuba nxamnye neSoviet Union kodwa kwanoncwadi lwethu neBhayibhile. Sabuzwa ukuba sadibana phi namaNgqina kaYehova. Sathi sakuthi sadibana nawo kwintolongo yaseVorkuta, ijaji yagqabhuka ngumsindo yathi, ‘Khawuve into eqhubeka kwiinkampu zethu.’ Sagwetywa iminyaka elishumi sobabini sisebenza nzima ezinkampini.

“Ndathunyelwa kwinkampu yaseMordvinia embindini weRashiya, ndavalelwa ndedwa esiseleni. NgoMatshi 1958, ndabeleka unyana wethu. Kuloo maxesha kaxakeka, uYehova wayengoyena mhlobo nomncedi wam. Umama wathabatha unyana wethu waza wamnyamekela. Ndasiwa eKemerovo, eSiberia, apho ndavalelwa enkampini.

“Emva kweminyaka esibhozo, ndakhululwa ndingekasigqibi isigwebo sam. Ndikhumbula ukuba xa ndandivalelwe eziseleni, ibhinqa elalisigadile ladanduluka lathi andizange ndithethe nto ‘inxamnye neSoviet Union’ kwaye noncwadi lwethu lwaluxubusha izinto zonqulo. Ndabhaptizwa ngowe-1966 emva kokuba ndandikhululwe entolongweni.”

IBhayibhile noncwadi lweBhayibhile zazixabiseke gqitha kumabanjwa awayevalelwe. Ngowe-1958 kwintolongo yaseMordvinia, abazalwana babesoloko beqhuba iintlanganiso. Ukuze bangabhaqwa ngumphathi wentolongo, kwakhethwa abazalwana abaliqela ukuba babengokhala ngoxa abanye abazalwana befunda iMboniselo. Wayesithi akuvela umphathi, umzalwana okufutshane athi nanko “esiza”, esitsho kumzalwana okufutshane naye axelele osecaleni kwakhe ude lo myalezo uye kufika kwabo baqhuba isifundo. Emva koko babesithi saa abazalwana, lize lifihlwe nephephancwadi. Kodwa amaxesha amaninzi umlindi wayesuka avele kwicala esingalilindelanga.

Ngenye imini abazalwana bafunyanwa bengalindelanga uBoris Kryltsov waqonda ukuba makamphazamise lo mlindi ukuze akwazi ukufihla elo phephancwadi. Wathatha incwadi waza wabaleka nayo waphuma eziseleni. Umlindi wamsukela ixesha elide, bathi besakumbamba, bafumanisa ukuba le ncwadi wayebaleka nayo yayithetha ngobomi bukaLenin. Nangona wavalelwa iintsuku ezisixhenxe eziseleni, wayevuya kuba lingazange libhaqwe elo phephancwadi.

UKUHLWAYELA IMBEWU YENYANISO EMOSCOW

Ukushunyayelwa kweendaba ezilungileyo eMoscow kwaqalwa liqela elincinane. UBoris Kryltsov wayengomnye webathwana labazalwana elalishumayela iindaba ezilungileyo ngenzondelelo kwesi sixeko. Ubalisa esithi: “Ndandisebenza kwinkampani yokwakha. Siliqela labazalwana noodade ndazama ukushumayela ngokungacwangciswanga. Isakwazi ukuba ndandishumayela iKGB yaguqulula indlu yam ngoAprili 1957 yaza yafumana uncwadi lweBhayibhile, ndabanjwa ngoko nangoko. Njengoko ndandincinwa, umcuphi wandixelela ukuba amaNgqina kaYehova ngabona bantu bayingozi kweli lizwe. Wathi: ‘Ukuba siya kukhulula, abantu abaninzi baya kunilandela. Yiloo nto isenza sicinge ukuba niyingozi.’

“Ndathi kulo: ‘IBhayibhile isifundisa ukuba sithobele umthetho, kwakhona isifundisa ukuba sifune kuqala uBukumkani nobulungisa bukaThixo. AmaKristu okwenyaniso awazange akhe azame ukuhlutha igunya ngonomnganga kulo naliphi ilizwe.’

“Umcuphi wabuza: ‘Ulufumana phi olwa ncwadi silufumene ngokuya besigqogqa?’

“Ndambuza ukuba: ‘Yintoni ephosakeleyo ngeza ncwadi? Kuba zithetha ngeziprofeto zeBhayibhile azinanto yakwenza nezopolitiko.’

“Waphendula wathi: ‘Ewe ndiyavuma kodwa azishishicilelwanga apha.’

“Ekugqibeleni ndavalelwa kwintolongo ekwisixeko saseVladimir. Bacokisa xa babendisetsha kodwa into eyandothusayo ndangena neenkupho ezine zeMboniselo, endandizikhuphele ngesandla. Kwakucacile ukuba ndandincedwe nguYehova. Kwisisele endandivalelwe kuso, ndaphinda ndazikhuphela zone ezo nkupho. Ndandisazi ukuba kwakukho namanye amaNgqina apho awayengakufumani ukutya kokomoya iminyaka esixhenxe. La maphephancwadi ndawanyebelezisa ngodade owayecoca izinyuko.

“Kwakukho ungcothoza owayephakathi kwabazalwana owayechazela abasemagunyeni ukuba kukho uncwadi lweBhayibhile olulapha entolongweni. Baqalisa ukusetsha wonke umntu ngoko nangoko baza baluthimba lonke uncwadi olwalukho. Bathi bakufika kum bafumana uncwadi kumatrasi wam. Ndavalelwa ndedwa iintsuku ezingama-85. Nangona kunjalo, uYehova waqhubeka esinyamekela njengangaphambili.”

IINTETHO EZAZINIKELWA ZANCEDA ABANINZI BAFUNDA INYANISO

Intetho zesidlangalala yenye indlela eyayisetyenziswa ukuze amaNgqina kaYehova enziwe amkele iinkolelo zobuKomanisi. UViktor Gutshmidt uthi: “Kwinkampu yethu kwakusolo kufika izithethi ezazinikela iintetho ezikhuthaza ukungakholelwa kubukho bukaThixo. Abazalwana babedla ngokubuza imibuzo. Maxa wambi ezi zithethi zazingakwazi ukuphendula neyona mibuzo ilula. Iholo lalidla ngokuzala lime ngeembambo, abantu babephulaphula ngenyameko. Abantu babesiza ngobuninzi babo befuna ukuva ukuba aza kuthini amaNgqina kaYehova xa kuqukunjelwa.

“Ngesinye isihlandlo satyelelwa, sisithethi esasifudula singumfundisi kwiCawa YobuOthodoki BaseRashiya. Wonke umntu wayesazi ukuba wayilahla inkonzo yakhe xa wayevalelwe entolongweni waza wayeka ukukholelwa kubukho bukaThixo.

“Yathi isakuqukunjelwa loo ntetho omnye umzalwana wambuza ukuba: ‘Ngaphambi kokuba ubanjwe wawungakholelwa kubukho bukaThixo?’

Isithethi saphendula sathi “‘Khawucamngce ngesi sibakala. ‘umntu uye emajukujukwini kodwa akambonanga uThixo.’

“Omnye umzalwana wambuza ukuba: ‘Xa wawungumfundisi, ngaba wawucinga ukuba uThixo ujonge abantu ekumgama omalunga neekhilomitha ezingama-200 ngaphezu komhlaba?’ Isithethi asizange sikhuphe nelimdaka. Ezi ngxubusho zabenza abantu abaninzi bazikis’ ukucinga, emva koko abanye babo baqalisa ukufundisisa iBhayibhile nathi.

“Kwezinye zezintetho, omnye udade wacela ukugqabaza. Isithethi sathi: ‘Thetha, ndiyazi ukuba uliNgqina kaYehova.’

Loo dade wabuza wathi: “‘Ubuya kumchaza njani umntu ome ethafeni othetha yedwa, edanduluka esithi “ndiza kukubulala!” kube kungekho mntu phofu okufuphi naye?’

“Isithethi saphendula sathi: ‘Ubuya kuthi ushiywa ziingqondo.”

“Emva koko wabuza wathi: ‘Ukuba uThixo akakho ulwa njani naye? Ukuba akakho akukho mntu ulwa naye.’ Abantu abazange bakwazi ukuzibamba yintsini.”

ABASHUMAYELI BAZA KUSOLOKO BEBUYA

Iintetho ezikhuthaza ubuKomanisi zazinganikelwa ezinkampini kuphela. Ubukhulu becala zazinikelwa kubantu abahlala ezixekweni. Izithethi ezaziwayo zazityelela, idolophu nezixeko, ngokukodwa ezazinamaNgqina amaninzi njengaseVorkuta, eInta, eUkhta naseSyktyvkar. Umzalwana uGutshmidt uthi: “Ngenye imini ngowe-1957 isithethi seza kunikela intetho kumgodi wamalahle waseInta, kweza abantu abangama-300. Sachaza izinto azikholelwayo amaNgqina kaYehova nendlela ashumayela ngayo. Emva kokuyichaza kakuhle indlela esishumayela ngayo, eyayiquka indlela esibuyela ngayo kangangezihlandlo ezili-15, saqhubeka sathi: ‘Ukuba ubonakala unomdla aza kubuya. Ukuba emva kotyelelo lwesibini ubonakala unomdla baza kubuya okwesithathu.’

“Emva kweeyure ezimbini wabonisa indlela esibuyela ngayo, waza emva koko wafunda zonke izibhalo esidla ngokuzifunda. Umfazi wam, uPolina, wandibhalela ngesi siganeko waza wachaza indlela abamatsheka ngayo abazalwana. Emva kwale ntetho, iphephandaba lasekuhlaleni lapapasha izinto ezingatshongo khona ngamaNgqina kaYehova, kodwa labuchaza kakuhle uBukumkani. Ngaphezu koko, yonke loo ntetho yasasazwa kunomathotholo. Sibamba ngazibini, kuba amawaka abantu abahlala kwesi sixeko beva ngendlela ashumayela ngayo amaNgqina kaYehova nesigidimi asishumayelayo.

“Ngowe-1962 isithethi esasivela eMoscow safika size kunikela intetho eyayithetha ngamaNgqina kaYehova. Emva kokuchaza imbali yamaNgqina kaYehova yale mihla, sathi: ‘Nyanga nganye anikela ngezigidi zeedola ngokuzithandela ukuze kuxhaswe umsebenzi wamaNgqina kaYehova’ kwamanye amazwe. Iinkokeli zawo azinayo newodrophu yempahla. Bonke batya ndawonye, abo benza umsebenzi wokucoca nomongameli, akukho mahluko. Bonke babizana ngokuba mzalwana dade, njengokuba nathi sibizana ngokuba singamaqabane.’

“Kwakhe kwathi cwaka kungekho mntu uthetha nomnye. Emva koko saleka sathi, ‘kodwa thina asinakuze senze izinto njengabo, nangona bebonakala besenza kakuhle, kuba sifuna ukuzenzela yonke le nto ngaphandle kukaThixo.’

“Oku kwasikhuthaza gqitha ngenxa yokuba esi yayisisihlandlo sokuqala ukuba sive inyaniso ngamaNgqina kaYehova kwabasemagunyeni ngenkqu. Ezi ntetho zavulela abantu abaninzi ithuba lokuba beve inyaniso ngamaNgqina kaYehova. Noko ke, abantu babefuna ukuzibonela indlela ezinokubuphucula ngayo ubomi babo iimfundiso zeBhayibhile.”

OONGCOTHOZA ABASOLOKO BEPHUMELELA

Kangangeminyaka, amagosa eKGB, ayephulaphula iindaba zabantu xa bethetha ngomnxeba, ezileteni nangezinye iindlela. Maxa wambi babefaka izixhobo zokuphulaphula emakhayeni abazalwana abakhokelayo ebandleni. UGrigory Sivulsky, owayengumveleli wesithili iminyaka engama-25 ebudeni bokuvalwa komsebenzi, ukhumbula ngowe-1958 ebhaqa isixhobo esinjalo kwigumbi eliphezulu ekhayeni labo ngelo xesha uthi: “Sasihlala eTulun, eSiberia, kumgangatho wesibini wesakhiwo esasinamacandelo amabini ngasekupheleni kwedolophu. Ngenye imini xa ndandigoduka, ndeva ingxolo iphuma kwela gumbi liphezulu lesakhiwo. Ndaqonda ukuba amagosa eKGB ayefakela isixhobo sokuphulaphula kwela gumbi liphezulu—le yenye yendlela ababezithanda. Uncwadi oluninzi lwalugcinwe eluphahleni leli gumbi.

“Ngorhatya, xa idibene yonke intsapho, ndayixelela ngento endandiyirhanela, sagqiba ekubeni singathethi ngezinto zebandla kude kudlule ixesha elithile. Savulela unomathotholo, saze samshiya ebhomboloza yedwa iveki yonke. Ekupheleni kweveki, mna nomnye umzalwana saya kwela gumbi liphezulu saze safumana intambo exokonyezelelwe kwisixhobo sokuphulaphula. Le ntambo yayihamba phakathi kwamaplanga etulo lwendlu ize iye ngqo kwiiofisi zeKGB. Sasingathandabuzi ukuba babeshicilela kwanto, kodwa ngelo xesha, beva iinkqubo zikanomathotholo kuphela.

IKGB ITYALA OONGCOTHOZA ENTLANGANWENI

IKGB yabona ukuba intshutshiso ayizange iyithothise inzondelelo yamaNgqina. Yabhenela emaqhingeni nasebuqilini, ukuze ihlwayele umoya wokungabathembi abazalwana ababemiselwe ukuba bongamele amabandla nentlangano ngokubanzi. Enye indlela eyayisetyenziswa yiKGB yayikukunyubelezisa oongcothoza abangoomakad’ enetha ebandleni.

Uninzi lwaba ngcothoza bamiselwa kwizikhundla zokongamela entlanganweni. Aba bazalwana bobuxoki benza konke okusemandleni ukuze bathibaze umsebenzi wokushumayela ngokubangela imo yonxunguphalo nokungabathembi abazalwana abakhokelayo. Maxa wambi, babelunkonya kubo uncwadi baze baluse kumagosa EKGB. Enye ingxelo ithi oongcothoza ababini ababenyutyeleziswe ngowe-1957 ukusa kowe-1959 bathumela imibhalo engaphezu kwama-500 eMboniselo nolunye uncwadi kumagosa eKGB.

Ngeminyaka yee-1950 bambi abazalwana babengasayithembi iKomiti Yelizwe. Kwakukho amarhe okuba wambi amalungu ayesebenza neKGB kwaye ayengcatsha abazalwana abathembekileyo, kuquka nabo babekhuphela uncwadi. UIvan Pashkovsky uthi: “NgoAprili 1959 kwasekwa iKomiti Yelizwe entsha, endandililungu layo. Sasizimisele ukuyikhusela inyaniso, phezu kwayo nje imigudu kaSathana yokuphixanisa abazalwana. Oku yayikukuqalisa kwelona xesha linzima kwimbali yamaNgqina kaYehova eUSSR.”

Njengokuba ayesiya ekhula amarhe, bambi abazalwana bayeka ukuthumela iingxelo kwiKomiti Yelizwe. Abavakalisi baqhubeka bekhuthele kubulungiseleli neengxelo zabo babezithumela rhoqo, kodwa inkoliso yabo yayingazi ukuba iingxelo azisathunyelwa kwiKomiti Yelizwe. Ngowe-1958, amawaka abavakalisi babenganxibelelani neKomiti Yelizwe ngenxa yamaqela abazalwana abathile. Kwisixeko saseIrkutsk naseTomsk kamva nakwezinye izixeko zaseRashiya, amaqela abazalwana awayezahlukanise nentlangano aqhubeka ekhula. NgoMatshi 1958 abo babezahlule bamisela eyabo “ikomiti yelizwe” becinga ukuba iza kwamkelwa ngawo onke amabandla.

IQumrhu Elilawulayo lawa livuka linceda abazalwana ukuba baphinde bamanyane kunqulo lukaYehova kwakhona. UAlfred Rütimann ohlala eSwitzerland, wayengumphathi wesebe kwiOfisi ekuMntla Yurophu, esongamela umsebenzi eSoviet Union. Ngowe-1959 wathumela ileta kubazalwana baseRashiya ebachazela ukuba uYehova uza kusikelela abo babesebenzela ukuba kubekho umanyano kuphela nabashumayela iindaba ezilungileyo zoBukumkani. Bambi babazalwana ababezahlule baluthobela olu lwalathiso baze baqalisa ukuyithemba kwakhona iKomiti Yelizwe. Noko ke, kwaqengqeleka iminyaka ngaphambi kokuba ibuye lo ntembelo. Ebudeni beli xesha, iKomiti Yelizwe yaqhubeka isasaza uncwadi ngabazalwana abathile. Nangona abo babezahlule babelufunda uncwadi, bazinkonya iingxelo zabo zenkonzo yasentsimini.

IKGB yaqhubeka ihlwayela umoya wokungathembani kwabazalwana. Abanye babengabanjwa ngoxa abanye babevalelwa entolongweni. Ngaloo ndlela, uninzi lwabazalwana babevakalelwa kukuba loo maNgqina ayengabanjwanga ayengontamnani beKGB. Abanye babebarhanela kwaye bebagxeka abazalwana abakhokelayo.

ITYALA ELABA NGUNDABA MLONYENI

Igosa laseburhulumenteni laseIrkutsk, lathumela le ngxelo eMoscow: “[AmaNgqina kaYehova ePhondo laseIrkutsk] ashumayela ngokuyimfihlo. Kwisiqingatha sesibini sowe-1959, amagosa eKGB afumana oomatshini bokushicilela abahlanu ngaphantsi komhlaba.” Aba matshini bafunyanwa kwiidolophu zaseSiberia ezifana neZima, neTulun nakwiidolophana zaseKitoy, eOktyabr’skiy naseZalari. Emva kokufumana aba matshini kwabanjwa bonke ababefak’ isandla ekushicileleni.

Abazalwana abane ababebanjiwe babhala phantsi zonke iinkcukacha zokushicilela. Ngobuqhetseba, abecuphi babanyanzela aba bazalwana ukuba benze oko. Amagosa eKGB agqweth’ intw’ eninzi ngaphambi kokuba zipapashwe kumaphephandaba. Aba bazalwana bane bakhululwa kwaza kwabanjwa abanye abasibhozo. Ityala labo laliza kuchotshelwa eTulun ngoAprili 1960. IKGB yenza amatile tile ukuqiniseka ukuba eli tyala liba ngundaba mlonyeni. Yayila igumgedle lokusebenzisa aba bazalwana bane bakhululiweyo ukuze babe ngamangqina enkundla. Abazalwana abaninzi emabandleni baberhanela ukuba aba bazalwana babe ngoontamnani beKGB.

Elinye lamacebo eKGB yaba kukuba batshabalalise ukholo leNgqina ngalinye elalize ematyaleni nokuze banuk’ umzondo ekuhlaleni. Ngenxa yoku, iKGB yalungiselela ukuba kubekho abanye abaza kutyelela kwelinye lamagumbi angaphantsi komhlaba apho kwakushicilelwa khona amaphephancwadi kangangeminyaka. Ngokukhawuleza yathi ndi ekuhlaleni imisebenzi “yehlelo” elisemfihlekweni. Xa kwafika usuku lokuba kuvavanywe ityala, kweza abantu abangaphezu kwama-300, kukho iintatheli zamaphephandaba noomabonwakude, abanye besuka eMoscow. Kwakukho inkungu nelanga yamaNgqina kaYehova kuloo nkundla.

UMBHODAMO ENKUNDLENI

Kungalindelekanga, amayelenqe eKGB asuka apatyalaka. Abazalwana ababenikela ubungqina bayiqonda impazamo abayenzayo. Ngobusuku ngaphambi kwetyala, benza isigqibo sokuba baza kwenza konke okusemandleni abo ukuzukisa uYehova. Ebudeni betyala, bachaza ukuba baye balukuhlwa yaye ubungqina babo babunongwe ngobuxoki. Emva koko bathi, “Sikulungele ukuhlala eziseleni nabazalwana bethu.” Yaba ngumbhodamo enkundleni.

Ngaphezu koko, xa babephekwa besophulwa ngemibuzo ebudeni betyala, abazalwana bakwazi ukuphendula loo mibuzo ngaphandle kokubandakanya abanye abazalwana. Ngokomzekelo, xa ijaji yabuza uGrigory Timchuk ukuba ngubani owakha umatshini wokushicilela endlwini yakhe, waphendula wathi, “Ndim.” Xa yabuza ukuba ngubani owayeshicilela ngaloo matshini wathi, “Ndim obeshicilela.” Xa wabuzwa ukuba ngubani owayesasaza uncwadi olwalushicilelwe kuloo matshini, waphendula wathi: “Ndim.” Xa wabuzwa ukuba ngubani owayethenga iphepha alizise kulo matshini wathi “Nalapho isendim.” Lo mtshutshisi wabuza: “Loo nto ithetha ukuba wena ungubani? Ngaba uziphethe, uzithumelela iphepha uphinde uzisebenzele?”

“LE LETA YASIKHUTHAZA!”

Xa kwabonakala ukuba umtshutshisi akanamangqina, wafana watyhola abazalwana ngokuba ngoontamnani belizwe lasemzini. Njengobungqina wafunda ileta eyayivela kumzalwana uNathan H. Knorr weBheteli yaseBrooklyn. UMikhail Savitsky, omnye wabazalwana ababeze kuphulaphula eli tyala, uthi: “Umtshutshisi wafunda ileta eyayivela kumzalwana uKnorr neyayibanjwe ngamagosa eKGB neyayibhalelwe abazalwana baseSoviet Union. Sonke thina maNgqina awayelapho kwelo holo, kwakungathi sifumene isipho esivela kuYehova. Le leta yasikhuthaza! Safumana amacebiso obulumko avela eBhayibhileni ukuze sikhonze abazalwana bethu size sihlale sithembekile phantsi kweemvavanyo. Ngaphezu koko, amaNgqina kaYehova abongozwa ukuba akholose ngoThixo kuzo zonke izinto, acele kuye ubulumko nokhokelo lwakhe, yaye asebenzisane nabazalwana abamiselweyo. Lo mtshutshisi wayifunda yonke le leta. Sasiphulaphule ngenyameko. Kwakungathi sasikwindibano yesithili!” Nakuba abazalwana bafumana izigwebo ezahlukeneyo, bonke ababeze kuphulaphula eli tyala babambelela nkqi kuzimiselo lwabo lokukhonza uYehova.

UKUMANYANA NGOVUYO EKUNQULENI KWAKHONA

Kwakungathi iKGB yayiwabambe apho amancinane khona amaNgqina kaYehova eSoviet Union ngoko ke, ayezimisele ukuwatshayela kungasali nempunde. Kodwa kwenzeka isimanga sento, xa abazalwana abangama-450 bazibona bekwinkampu enye eMordvinia. Phakathi kwaba bazalwana kwakukho nabo babekhokela amaqela amabini iqela labo babezahlulile nentlangano nelabo babeseyinxalenye yayo. IKGB yayicinga ukuba intlangano yayiza kuba ziintlaba zahlukane. Kwiphephandaba lale nkampu kwapapashwa inqaku elalithob’ isidima abazalwana nelalicacisa ukuba ngoobani ekwakulindeleke ukuba baxhwithane ngezikhundla. Noko ke, abazalwana bakuzinzisa ukungaboni ngasonye kwabo, baza balisebenzisa kakuhle elo xesha lokuba kunye.

UIov Andronic uyabalisa: “Abazalwana ababethabath’ ukhokelo bahlab’ ikhwelo kwiNgqina ngalinye, nkqu nakwabo babezahlulile, ukuba kufikelelwe kumanyano. Aba bazalwana babhekisela kwinqaku leMboniselo yesiRashiya kaSeptemba 1, 1961, elalinomxholo othi: ‘Umanyano Lwabantu Bonke Kwithemba Eliqaqambileyo.’ Eli nqaku labonisa imigaqo nemizekelo yendlela uYehova awabakhokela ngayo abantu bakhe kumaxesha amandulo. Laxubusha ngokubaluleka kokuba wonk’ ubani aphuthume uxolo nomanyano kwibandla lamaKristu. Ngokufundisisa eli nqaku ngokucokisekileyo, abaninzi bakuqonda ukubaluleka komanyano kwintlangano kaThixo yaye basabela kwelo khwelo.

UKUTYA KOKOMOYA KUYAPHILISA

Inqaku elikwiMboniselo lanceda naloo maNgqina ayengabanjwanga ukuba abe yimbumba yamanyama. Abazalwana ababemiselwe ukuba bathabathe ukhokelo bathandaza baza balifunda kunye. Eli nqaku lathi ngenxa yokuba umzalwan’ uRutherford wayenempilo enkenenkene, unikele intetho yakhe yokugqibela kwindibano yesithili ka-Agasti 1941. Le ntetho ikhuthaze abazalwana ukuba babambelele nkqi kwintlangano kaYehova kungekhona kwinkokeli engumntu, umzalwana uRutherford, wathi: ‘Nantoni na ethi gqi esithubeni ize ikhule, abanye abantu badla ngokuthi kukho indoda yamadoda, inkokeli enabalandeli abaninzi. Ukuba nikholelwa ukuba ndingomnye wabakhonzi beNkosi yaye sisebenza ngaxhatha linye ekukhonzeni uThixo noKristu, yithini Ewe.’ Kuloo ndibano kwavakala impendulo enamandla nengqalileyo ‘ngoEwe’ ovakalayo.

UMikhail Savitsky uyabalisa: “AmaNgqina aseSoviet Union kwakufuneka amanyane kanye ngolu hlobo. Sambulela uYehova kuba wayesinyamekela esixhasa ngokomoya ebonakalisa uthando nomonde kuthi. Omnye umzalwana owayesele ezahlule nentlangano, ngoko nangoko wacela eli phephancwadi esithi ‘Ndicela undinike ukuze sifundele abazalwana abaseBratsk nakwezinye iindawo.’ Ndamxelela ukuba sinephephancwadi elinye kuphela. Kodwa wathembisa ukuba wayeza kulibuyisa emva kweveki. Walibuyisa elo phephancwadi kunye neengxelo zasentsimini zeenyanga eziliqela ezazivela kumabandla awahlukeneyo. Yinkungu nelanga yabazalwana noodade ababuyela kwintsapho yabanquli bakaYehova emanyeneyo.”

UIvan Pashkovskyi, ilungu leKomiti Yelizwe kangangeminyaka engaphezu kwamashumi amathathu, ubalisa la mava: “Xa sasityelelwe ngomnye umzalwana owayesuka phesheya, samxelela ukuba acele umzalwana uKnorr abongoze abazalwana abakwilizwe lethu ukuba bamanyane baze bazithobe kulungelelwano lobuthixo. Umzalwana uKnorr wasamkela eso sicelo, ngowe1962 safumana iikopi ezingama-25 zeleta yakhe ngeelwimi ezimbini isiNgesi nesiRashiya. Le leta yabavus’ emaqandeni abantu abaninzi.”

IZIMVU ZIYALIVA ILIZWI LOMALUSI WAZO

IKomiti Yelizwe yasebenza kanobom ukuze abazalwana bamanyane. Xa sicinga ngeemeko ababetyhubela phantsi kwazo kufanele ukuba kwakukho amahla ndinyuka. Kwihlobo lowe-1962 sonke isithili sasimanyene nentlangano. Abazalwana abaqolileyo bamiselwa njengamalungu ekomiti ekhethekileyo. UYehova wayisikelela imigudu yaba bazalwana ngokubanika “ubulumko obuvela phezulu.” (Yak. 3:17) UAleksey Gaburyak, owayengumveleli wesiphaluka ngowe-1986 ukusa kowe-1995, ubalisa esithi: “Sadibana neKomiti Yelizwe eUsol’ye-Sibirskoye ngowe-1965. Le komiti yacela ukuba sifune bonke abazalwana ababethe saa ngenxa yokubhaca, ukuvalelwa nangenxa yeyantlukwano ukuba baphinde bamanyane namabandla. Sanikwa iiadresi asasimele siqale kuzo. Mna ndabelwa ukuba ndisebenze amaPhondo aseTomsk naseKemerovo kuquka izixeko ezibini iNovokuznetsk neNovosibirsk. Abanye abazalwana babelwa ezinye iindawo. Kwakufuneka silungiselele ukumisela amabandla namaqela size simisele abazalwana sibaqeqeshe ekunyamekeleni amabandla. Ngaphezu koko, kwafuneka simisele iindawo olwaluza kufikela kuzo uncwadi size silungiselele iintlanganiso zebandla phantsi kokuvalwa komsebenzi wethu. Kwisithuba nje esingephi, sadibana nabazalwana abangama-84 nababengasanxibelelani nentlangano. Savuya ngokwenene ukubona ‘izimvu’ zikaYehova zisiva ilizwi loMalusi Olungileyo yaye zinqula nabantu bakhe!”—Yohane 10:16.

Kamva abaninzi abazahlulayo nentlangano bamanyana neKomiti Yelizwe baza bathumela iingxelo zabo zenkonzo yasentsimini. Ngowe-1971 bangaphezu kwama-4 500 abavakalisi abamanyana nentlangano kaYehova. Phakathi kweminyaka yee-1980, phezu kwako nje ukuvalw’ umlomo, umsebenzi wokushumayela waqhubeka yaye nabantu abatsha babengena emabandleni.

AMASUNTSWANA AXABISEKILEYO EFILIMU

Ukuvelisa ukutya kokomoya kwakusoloko kuxhomekeke kwimigudu yabazalwana baseSoviet Union ababephaphile yaye benenkalipho. Kodwa kwakufika njani kubo ukutya kokomoya?

Enye yezona ndlela zisisiseko yayiziifilimu ezincinane. Abazalwana ababesebenza kumazwe aselumelwaneni, babefota amaphephancwadi ethu, iincwadi neencwadana ezinemifanekiso nezazipapashwe ngesiRashiya nangesiUkraine kodwa befota nezinye iilwimi. Oku kwakusenziwa ngocoselelo kwiphepha ngalinye kusetyenziswa ikhamera enefilimu emalunga neemitha ezingama-30 ubude. Zonke iincwadi zazifotwa ngokuphindaphindiweyo kusenziwa iikopi ezahlukeneyo ukuqiniseka ukuba zithunyelwa ngokulula. Ukutyhubela eli thuba, kwaveliswa intabalala yokutya kokomoya neefilimu zekhamera ezininzi. Iifilimu zazisikwa zibe ngamasuntswana amalunga neesentimitha ezingama-20 ukuze kube lula ukusebenza ngazo, kwakulula ke ukuthatha la masuntswana eefilimu aze athunyelwe eSoviet Union.

UKUSHICILELA NGOKUFIHLAKELEYO ESIBERIA

Ukushicilela uncwadi lweBhayibhile kwakunzima, kodwa uYehova wawusikelela umsebenzi wabo. Phakathi kowe-1949 nowe-1950 nje kuphela, abazalwana bashicilela baza bathumela iikopi zoncwadi ezingama-47 165 kumabandla awahlukeneyo. Ukongezelela, iKomiti Yelizwe yanikela ingxelo yokuba phakathi kwelo xesha kanye, kwaqhutywa iintlanganiso ezingama 31 488 kwelo lizwe.

Uncwadi lwalufuneka ngamandla yaye oko kwakuthetha ukuba kwakufuneka oomatshini bokushicilela abatsha. UStakh Savitsky uthi: “Ngowe-1955 kwalungiselelwa umatshini wokushicilela ngokufihlakeleyo ekhayeni lethu. Ekubeni utata wayengelilo iNgqina likaYehova, kwafuneka sicele imvume kuye. Kangangeenyanga ezimbini, semba umngxuma ngaphantsi kwevaranda, sisenza igumbi elimalunga neemitha ezimbini kumacala amabini nezine kwamanye amacala amabini. Kwafuneka sikhuphe umhlaba omalunga nama-30 eekyubhik’ mitha. Kwafuneka sikhuphe lo mhlaba size siwufihle ukuze ungabonwa ngabanye abantu. Xa sagrumba saza safikelela kwimitha enesiqingatha sadibana nomkhenkce. Xa sasisemisebenzini yethu yempangelo, umama ebedla ngokwenza umlilo omcinane ukuze kunyibilike lo mhlaba, ezama ukuba angatsali ingqalelo yabamelwane. Kamva sabeka iibhodi ukuze senze umgangatho saza senza nesilingi. Emva nje kokuba le ndawo igqityiwe kwahlala isibini esitshatileyo. Babesebenza yaye behlala kweli gumbi lingaphantsi. Umama wayebaphekela, ebahlambela impahla yaye ebanyamekela nangezinye iindlela. Le ndawo kwashicilelwa kuyo kwade kwaba ngowe-1959.

“Ngowe-1957 omnye umzalwana owayesongamela umsebenzi wokushicilela wandibuza: ‘Ungakwazi ukusebenza kwigumbi lokushicilela? Kufuneka sishicilele amaphephancwadi angama-200 ngenyanga.’ Ekuqaleni ndandishicilela amaphephancwadi angama-200 ndaza kamva ndashicilela angama-500. Noko ke, imfuneko yoncwadi yayisoloko ikhula. Kwakufuneka sisebenze ebusuku yaye kwakufuneka sisebenze phantsi kweliso elibukhali sinosuku nje olunye lokuphumla ngeveki.

“Ndingena nje ekhaya ndandisihla ndiye ezantsi kumatshini wokushicilela. Ndandisebenza ubusuku bonke kulo msebenzi, ukuba ndiqalile kwakufuneka ndiwugqibe umsebenzi. I-inki yayisoma, ngaloo ndlela kwakungenakwenzeka ukuba umsebenzi ugqityezelwe ngelinye ixesha. Ndandidla ngokwenza amaphepha angama-500 ndize emva koko ndisebenzise inaliti ekulungiseni iimpazamo zibonakale kakuhle ephepheni. Ngenxa yokuba kwakungekho moya ungenayo, kwakunzima ukwenza la maphepha ome xa egqitywa ukushicilelwa.

“Ndandithumela la maphephancwadi kwidolophu yaseTulun ngobusuku, malunga neekhilomitha ezingama-20 ukusuka ekhaya. Andiqinisekanga ukuba kwakusenzeka ntoni kuwo emva koko, kodwa ndandisazi ukuba uncwadi lusetyenziswa ngamaNgqina aseKrasnoyarsk, eBratsk, eUsol’ye-Sibirskoye nakwezinye izixeko needolophu.

“Ngowe-1959 umzalwana owayesongamela lo msebenzi wandicela ukuba ndiseke indawo yokushicilela eTulun, kufuphi nesitishi sikaloliwe. Kwakhona kwafuneka ndenze umsebenzi endandiwazi kakuhle, ukukhupha umhlaba, ukufaka izibane nokwakha indawo yokushicilela efana neyokuqala. UYehova wasinika ubulumko. Kwafika intsapho eyayiza kuhlala apho yaye yasebenza kangangonyaka. Ekugqibeleni iKGB yawubhaqa loo matshini. Kwabhalwa emaphepheni ukuba ‘nkqu neengcali zombane kwaba yinkohla ukuqonda indlela ezazilungelelaniswe ngayo izibane zale ndawo.’

“Ngaphandle kwabantu basekhaya, bambalwa abazalwana ababesazi ngomsebenzi wam wokushicilela. Ngenxa yokuba ndandingasabonakali ngorhatya, abanye abazalwana noodade basebandleni babexhalabele ukomelela kwam ngokomoya. Babedla ngokundityelela ukuze bandikhuthaze kodwa babefika ndingekho. Ewe, ngezo mini sasisoloko sibekw’ esweni, umsebenzi wokushicilela kwakufuneka ube yindaba yakwamkhozi.”

UKUKHUTSHELWA KONCWADI EMOSCOW

Abasemagunyeni babesazi kakuhle ukuba amaNgqina ayezifuna ngamehlo amnyama iiBhayibhile noncwadi olusekelwe kuyo. Izicelo zokushicilela iiBhayibhile nezokuzithumela ezivela kwiQumrhu Elilawulayo zazikhatywa okanye zingahoywa. Ngenxa yokunqongophala koncwadi, abazalwana bazama iindlela ezahlukeneyo zokuba kukhutshelwe iincwadi kwiindawo ezithile zelizwe, kuquka neMoscow, ukuze amabandla namaqela afumane ukutya kokomoya.

Ngowe-1957, uStepan Levitsky wagwetywa iminyaka elishumi ngenxa yokuba kufunyenwe inkupho enye yeMboniselo ngaphantsi kwelaphu letafile kwigumbi lokutyela. UStepan ubalisa esithi: “Emva kweminyaka emithathu enesiqingatha, iNkundla Ephakamileyo yasihlehlisa isigwebo sam. Ngaphambi kokuba ndikhululwe, abazalwana bancomela ukuba ndifudukele kwindawo ekufuphi neMoscow ukuze ndishumayele ndize ndinyamekele nezinye izinto zebandla. Ndafumana indawo yokuhlala kwindawo eyayimalunga nomgama oziiyure ezimbini ukusuka eMoscow, ndaqalisa ukushumayela kwimimandla eyahlukeneyo yeso sixeko. UYehova wayisikelela le migudu, yaye emva kweminyaka embalwa, kwamiselwa iqela labazalwana noodade. Ngowe-1970, ndabelwa ukuba ndibe ngumveleli wesiphaluka esasiquka iMoscow, iLeningrad (ngoku eyiSt. Petersburg), iGorki (ngoku eyiNizhniy Novgorod), iOrel neTula. Ndandinembopheleleko yokwabela abazalwana ukutya kokomoya.

“Ndicinga ukuba kwakulilungiselelo likaYehova ukuba iMoscow nezinye iinxalenye zeRashiya zibe noncwadi olwaneleyo. Ndathandaza kuYehova ndimazisa ukuba ndifuna ukwenza okungakumbi kule nkalo. Kamva ndaqhelana nenkuntsela yomshicileli eyayisazana namashishini okushicilela awahlukeneyo eMoscow. Ngokungathi ndiyaqhula, ndambuza ukuba kwakunokwenzeka ukuba ndishicilele incwadi ethile kumatshini oseMoscow kusini na.

“‘Incwadi? Incwadi enjani?’ Yandibuza ngelitshoyo le ndedeba.

Ndingaziva luloyiko ndaphendula ndathi “Ukusuka KwiParadesi Ilahlekile Kuye KwiParadesi Ibe Yazuzeka.

“Omnye umhlobo wale ndoda wayesebenza kumzi-mveliso wokushicilela. Lo mhlobo wayeyinkokeli yombutho wamaKomanisi. Ngeesenti ezimbalwa, le ndoda yavuma ukuba ishicilele inxalenye encinane yale ncwadi. Hayi indlela abavuya ngayo abazalwana ukuba bayibambe ngezandla zabo le ncwadi isekelwe eBhayibhile!

“Sasizibeka esichengeni mna nale ndoda ngokushicilela uncwadi lwethu. Emva kokushicilela nantoni na, kwakufuneka iphume ngokukhawuleza kumatshini, izizinto zasebusuku ezo, ingakhange ibonwe nangomnye umntu. UYehova walisikelela eli lungiselelo yaye kwashicilelwa iincwadi kuloo matshini ezifana nethi “Inyaniso Iya Kunikhulula,” nethi Inyaniso Ekhokelela Kubomi Obungunaphakade, kwade kwashicilelwa neculo! Kukutya okwakufike ngexesha elifanelekileyo ngokwenene. (Mat. 24:45) Sasebenzisa loo matshini iminyaka elithoba.

“Yapatyalaka ibhobhile xa kwathi gqi singalindelanga ibhinqa elalivelela lo mzi-mveliso wokushicilela, simaxhaphetshu sisashicilela uncwadi lwethu. Ngokukhawuleza sacinezela amaqhosha athile kwavela iikopi zephephancwadi lezempilo. Ibhuduzela, le ndoda yayisinceda ngelishwa yadibanisa amaphepha amathandathu ephephancwadi lethu nephephancwadi lezempilo. Lingxamile, eli bhinqa lathi rhuthu amaphephancwadi ezempilo ambalwa laya nawo kwiofisi yalo. Ekufundeni iphephancwadi labona ukuba lukho unyawo lwemfene kwelo phephancwadi. Labiza umshicileli labuza ngezinto ezilapho kwelo phephancwadi. Lo mbandela wathunyelwa kwiKGB. Umshicileli, woyikiswa ngesigwebo seminyaka emininzi ethothoza entolongweni, wasuka waqhaqh’ amabholo eshiya alilibeleyo. Kungentsuku zatywala iKGB yandifumana, kuba yayindim kuphela iNgqina likaYehova eMoscow. Ndagwetywa iminyaka emihlanu enesiqingatha entolongweni.” Phofu naloo mshicileli wafumana iminyaka emithathu entolongweni.

“MAYIFIKE IARMAGEDON!”

Abazalwana noodade abaninzi babethothoza ixesha elide eziseleni. UGrigory Gatilov wahlala iminyaka eli-15 entolongweni. Uthi: “Intolongo yokugqibela endandikuyo yayinegama apha elisekelwe eluthandweni: Yayibizwa ngokuba yi-The White Swan [Idada Elimhlophe]. Yayimi kwindawo entle kwiiCaucasus, phezu kweentaba ezintlanu ezinendawo yokuchitha iiholide kwidolophu yasePyatigorsk eyayikufuphi nayo. Kule ntolongo, ndandinelungelo lokushumayela ebantwini unyaka wonke. Isisele sam sasiyindawo entle yokushumayela, kwakungeyomfuneko ukuba ndiye kushumayela kwenye indawo. Kwakufika abantu abatsha rhoqo, emva kweentsuku ezimbalwa bemke abo kuphinde kufike abanye, kodwa mna ndingatshintshwa. Yayinqabile into yokuba ndiye kwesinye isisele. Ndazama ukuba ndishumayele kubo bonke abantu ngoBukumkani bukaYehova. Abantu abaninzi babesoloko bebuza ngeArmagedon. Amanye amabanjwa ayebamb’ ongezantsi akufumanisa ukuba ndichithe ixesha elide kangaka ndisentolongweni ngenxa yonqulo lwam. Amanye amabanjwa nabalindi bentolongo babedla ngokubuza ukuba ‘Kutheni ungalulahli unqulo lwakho ugoduke?’ Yayindivuyisa into yokubona abanye besiba nomdla enyanisweni. Ngenye imini ndabona omnye ebhale eludongeni ‘Mayifike IArmagedon!’ Nakuba entolongweni kwakusentla kwamasimi, kwakundivuyisa ukuthetha ngenyaniso nabantu.”

“NGABA KUKHO AMAYONADABHI PHAKATHI KWENU”

Kukho oodade abanenzondelelo abathothoza ixesha elivakalayo ezinkampini. (INdu. 68:11) UZinaida Kozyreva ubalisa indlela oodade ababethandana ngayo nendlela ababewathanda ngayo amanye amabanjwa esithi: “Ngowe-1959, ndingekawugqibi nonyaka ndibhaptiziwe, mna, uVera Mikhailova noLyudmila Yevstafyeva savalelwa kwinkampu yaseKemerovo, eSiberia. Le nkampu yayinamabanjwa angama-550. Kwakukho amabhinqa awayemi ngasesangweni ukufika kwethu.

La mabhinqa abuza: “‘Ngaba kukho amaYonadabhi phakathi kwenu.’

“Saqonda zisuka nje ukuba aba ngoodade wethu. Basinika ukutya besihlaba nangemibuzo. Babeziimvuzemvuze luthando endingazange ndalubona ngaphambili. Ekubeni babesazi ukuba sasisengoohata kule nkampu aba dade basinyamekela. (Mat. 28:20) Ngokukhawuleza sazibonela ngawethu ukuba amalungiselelo okondliwa ngokomoya ayelungiselelwe kakuhle.

“Sasiyintsapho yokwenene. Zaziyolisa izihlandlo zasehlotyeni xa sasisipha ingca. Abaphathi benkampu babeqinisekile ukuba asinakuze siqhweshe okanye sophule imithetho yenkampu. Ijoni elinye lalilinda oodade abangama-20 ukusa kwabangama-25, nakuba eneneni yayisithi abalinde lona! Naninina kusiza umntu sasimvusa ebuthongweni umlindi ukuze angagxothwa emsebenzini ngenxa yokulala. Xa elele sasincokola ngezinto zokomoya ebudeni bekhefu lethu. Eli lungiselelo lalisinceda sonke.

“Ngasekupheleni kowe-1959 ndikunye nabanye oodade sathunyelwa kwinkampu eyayinokhuseleko olungqingqwa. Savalelwa kwisisele esasibanda nesasinefestile engenaglasi. Sasilala phezu kweebhodi ebusuku sisebenza kugob’ umqolo emini. Abasemagunyeni basinika umsebenzi wokukhetha imifuno yaye ihambo yethu yayibekw’ esweni. Kamva, bakubon’ ukuba thina asinaminwe mide njengamanye amabanjwa, basinika ingca eyomileyo ukuze silale phezu kwayo baza basifakela iglasi efestileni yethu. Sahlala unyaka apho baza bonke oodade bafuduselwa kwinkampu yaseIrkutsk eyayingakhuselekanga kangako.

“Le nkampu yayinoodade abali-120. Sahlala kunye apho unyaka neenyanga ezintathu. Ubusika bokuqala babuqhaqhazelis’ amazinyo yaye kuthe wambu ikhephu. Sasisebenza sigob’ umqolo kumzi-mveliso owawusika imithi yokwenza amaplanga. Umphathi wayesoloko ekhangela enoba asinalo kusini na uncwadi. Kubonakala ngathi le kwakukuphela kwendlela yabo yokuchitha isithukuthezi. Sasiziincutshe kaloku ekufihleni uncwadi, ngamanye amaxesha ngendlela engakholelekiyo. Ngeny’ imini, mna noVera safihla iphepha elalinemibhalo yetekisi kwibhatyi zethu zokusebenza kangangokuba kwakunzima ukuba nathi silifumane. Kodwa ke umphathi walifumana yaye mna noVera savalelwa sodwa iintsuku ezintlanu. Iqondo lokubanda lalingaphantsi kweqondo lokubanda ngama-40 ngokukaCelsius, yaye kwigumbi esasikulo iindonga zazineqabaka ngenxa yokuba kwakungabaswa.

“Kwakukho nje indawana eyayanele ukuba ungahlala kuyo eyayakhiwe ngesamente. Xa ingqele yayinganyamezeleki, sasibeka iinyawo zethu eludongeni size sidibane ngemiqolo, silale. Apho sothuke khona sasixhuma sisoyikela ukuba singabulawa yingqele silele. Sasifumana amanzi ashushu nesonka esimnyama esasimalunga neegram ezingama-300. Phezu kwazo zonke ezi zinto sasivuya kuba uYehova wasinika ‘amandla angaphaya kwaqhelekileyo.’ (2 Kor. 4:7) Oodadewethu babesiphatha kakuhle sakubuyela kwizisele eziqhelekileyo. Babesilungiselela ukutya okufudumeleyo yaye babesifudumezela namanzi ukuze sihlambe.”

“UKUHLALA NGEMVISISWANO NABANYE”

UZinaida usabalisa: “Kwakunzima ukushumayela enkampini, ayembalwa amabanjwa yaye uninzi lwaluwazi amaNgqina. Umgaqo ofumaneka kweyoku-1 kaPetros 3:1 wawusebenza kakuhle kwimeko yethu. Sasisithi kukushumayela ngaphandle kwelizwi. Izisele zethu zazicocekile ngalo lonke ixesha ibe sinobuhlobo yaye simanyene. (Yohane 13:34, 35) Ngaphezu koko sasinobuhlobo obuhle nabantu abangengawo amaNgqina. Sasizama ngako konke ukwenza izinto ngokwendlela yeLizwi likaThixo yaye sinikela ingqalelo kwiimfuno zabanye. Ngamanye amaxesha sinceda abantu abangengomaNgqina ngendlela ezahlukeneyo. Ngokomzekelo, omnye udade ngokuzithandela wanceda elinye ibanjwa elalifuna ukuncedwa kwizibalo. Abantu abaninzi babona ukuba amaNgqina kaYehova ayengafani tu nezinye iicawa.

“Ngowe-1962 safuduswa kwinkampu yaseIrkutsk sasiwa eMordvinia. Nalapha sazama ukuhlala sibukeka yaye sicocekileyo emzimbeni. Iibhedi zethu zazicocekile ngalo lonke ixesha yaye zondlulwe kakuhle. Malunga namabanjwa angama-50 awayehlala kwisisele sethu uninzi yayingoodade. Yayingoodade kuphela ababecoca izisele, kaloku amanye amabanjwa ayengawuginyi ncam lo msebenzi. Umgangatho wezisele wawuhlanjwa yaye ukhuhlwa ibe abasemagunyeni kule nkampu babesinika izixhobo zokucoca. Oonongendi babengafuni ukucoca yaye iinkcuba-buchopho zelizwe zazingafuni nokukubona ukwenza umsebenzi omdaka, ngenxa yoko, ukucoca indawo esasihlala kuyo lwakuxhomekeke emagxeni ethu. Naninina omnye udade wayekhululwa, kwakubhalwa kwingxelo yakhe ukuba ‘ubhetyebhetye yaye uhlalisana kakuhle nabanye.’”

IINTYATYAMBO EZINDE ZIYAKHUSELA

UZenaida usanaba: “Ngasihlandlo sithile oodade babhalela emakhaya becela iimbewu zeentyatyambo ezikhula zibe nde. Sacela kwabaphetheyo ukuba singathanda ukutyala iintyatyambo ezintle nokuba sicela umhlaba ovundileyo uziswe kule kampu ukuze sityale ezi ntyatyambo. Singalindelanga, bakuvuyela ngeyona ndlela oko. Satyala iintyantyambo ecaleni kwezisele saza senza indledlana ezihonjiswe ngeentyatyambo. Kwakhula iintyatyambo ezintle ezixineneyo kule nkampu, iirozi, iisweet William nezinye iintyatyambo ezintle yaye okubaluleke nangakumbi iintyatyambo ezinde. Embindini wesitiya sezi ntyatyambo kwakukho iidahlias ezinkulu needaisies ezinde zinemibala eyahlukeneyo. Sasihambahamba kule ndawo, sifunda iiBhayibhile emva kwezi ntyatyambo sifihla noncwadi kwizihlahla ezintle zerozi.

“Sasiqhuba iintlanganiso sihambahamba njalo. Sazilungiselela ukuba sibe ngamaqela anamalungu amahlanu. Dade ngamnye kwakufuneka acengceleze isiqendu esinye kwezintlanu zoncwadi kusengaphambili. Emva kokuba sivule ngomthandazo, sasisitsho ezo ziqendu size sixubushe ngazo. Emva komthandazo wokuvala, sasiqhubeka sihambahamba. IMboniselo yethu yayisenziwa ibe ncinane [njengale iboniswe kwiphepha 161]. Suku ngalunye kwakukho nto ithile esiyifundayo, ngakumbi itekisi yosuku size siphinde iziqendu zentlanganiso zethu esasiziqhuba kathathu ngeveki. Ukongezelela koko, besizama ukufunda izahluko zeBhayibhile ukuze sizazi ngentloko size sixelele abanye oodade ukuze somele. Ngenxa yoko, sasingafane sibe nexhala ukuba abasemagunyeni bafumene uncwadi lwethu baze baluthimbe.

“Nangona iziphatha-mandla zasenkampini zazama isihlandlo ezininzi ukubuza kwamanye amabanjwa enoba siwulungelelanisa njani umsebenzi wethu kodwa inkoliso yamabanjwa yayisithanda. Omnye owayehlala nathi eziseleni yayinguOlga Ivinskaya, nowayelihlakani likaBoris Pasternak, umbhali nembongi eyaziwayo neyafumana iMbasa kaNobel kwicandelo lokuBhala. UOlga wayengumbhali, yaye ngenxa yokuba wayesithanda wayeyibukela indlela amaNgqina awayelungelelene ngayo. UYehova wasinika ubulumko, ngokukhethekileyo ukuze sifumane ukutya kokomoya.”—Yak. 3:17.

“UNOMDINTSI KE KHONA!”

UZinaida usabalisa: “Uncwadi lwalusiza kuthi ngeendlela ezahlukeneyo. Yayicace nakuthathatha into yokuba lawo yayingamalungiselelo kaYehova, njengokuba wasithembisa ukuba: ‘Andiyi kuze ndikushiye, ndingayi kuze ndikutyeshele.’ (Heb. 13:5) Ngamanye amaxesha bekungathi wenza abalindi babeziimfama. Ngobunye ubusika xa iqela lethu labasebenzi langena emasangweni enkampu sagqogqwa ngabalindi ngokuthi bakhulule iimpahla zethu. Ndandingowokugqibela ndifihle uncwadi esasisandul’ ukulufumana ngaphantsi kweebhulukhwe ezimbini.

“Ngenxa yengqele ndandoleke ngathi ndilitswele! Eli bhinqa lalisigqogqa lakhangela kwidyasi yam lakhangela ebhatyini ngaphantsi. Ndacinga ukuba xa ndicotha ukukhulula impahla liza kudikwa lindiyeke. Ndakhulula ijezi yokuqala. Emva kokucokisa ukuhlola ezo mpahla ndathi chu ukukhulula izikhafu eziliqela, ndakhulula ivesti ndakhulula nehempe yokuqala nezinye. Kwasala iibhulukhwe ezimbini neebhutsi ezazenziwe ngoboya. Ndakhulula ibhutsi enye kuqala ndingangxamanga, ndakhulula nenye kungekho kwanto indileqayo, kwafuneka ndikhulule ibhulukhwe engaphezulu. Ndacinga: ‘Ndiza kuthini ke ngoku? Ukuba uthi mandikhulule neyesibini ibhulukhwe ndiza kubaleka ndikhuphe uncwadi ndilunike abanye oodade.’ Emva nje kokuba ndikhulule ibhulukhwe yesibini ibhinqa elalisihlola lathi: ‘Unomdintsi ke khona! Mka!’ Ndanxiba ingathi ndiyaleqwa ndaphuma apho ndibeleke abasicatyana.

“Sasilufumana phi uncwadi? Kwakukho indawo esasiyilungiselele nabazalwana kusengaphambili, kwakumana kusiya omnye ngamaxesha awahlukeneyo size ke siyizise enkampini. Xa uncwadi lufike enkampini sasilufihla kwiindawo ezikhuselekileyo nezahlukahlukeneyo. Sasikhuphela ngesandla olunye uncwadi sifihle iikopi kwiindawo ezahlukeneyo. Ukukhanya kwesibane sasesitratweni kwakungena ngefestile, sizigqume senze isikrotyana esincinane ezingubeni ukuze sibone. Sasizigcina sixakekile ukuze kungabikho xesha lihamba nje. Naxa sasisiya kwiholo yokutyela, sonke sasisiba nephetshana elibhalwe isibhalo.”

“IXESHA LAKHO LIFIKILE”

Ngesiquphe, ngowe-1965 urhulumente waseSoviet Union wakhupha umyalelo wokuba onke amaNgqina awayevalelwe eSiberia ukususela ngowe-1949 ukusa kowe-1951 akhululwe. Noko ke, abazalwana noodade abaninzi abazange bavunyelwe ukuba babuyela kwizindlu ababehlala kuzo ngaphambili. Ababengakufuni ukuhlala eSiberia, bafudukela kwiindawo ezazinemfuneko yabashumayeli.

UMagdalina Beloshitskaya uthi: “Sahlala eluvalelweni lwaseSiberia iminyaka ephantse ibe li-15. Ebusika iqondo lokubanda lalifikelela ngaphantsi kweqondo lomkhenkce ngama-60 ngokuCelsius yaye ehlotyeni kwakufika izibawu neengcongconi ingathi ziingqimba zelifu ezazide zilume nokhozo lweliso. Kodwa satyhubela kuzo zonke ezo zinto ngenxa yokuncedwa nguYehova. Kwakusivuyisa ngokwenene ukufumana ithuba lokutyala imbewu yenyaniso kuloo ntsimi iqhaqhazelis’ amazinyo yaseSiberia! Nyanga ngamnye kangangeminyaka eli-15 besityikitya isindululo kwiofisi yomphathi ukuba asiyikuzama ukuqhwesha kwindawo esasivalelwe kuyo. Ngamanye amaxesha umphathi wayelala ekhayeni lethu. Ngezo zihlandlo wayesiba nobubele, esibuza imibuzo yeBhayibhile neyona nto ifunekayo ukuze siphile ngeemfundiso zayo. Wabuza neyona nto isiphembelelayo ekukhetheni le ndlela yokuphila ngoxa sasisazi ukuba sasiza kutshutshiswa. Ngenye imini sambuza ukuba likho na ithemba lokuba siya kuze sikhululwe kuloo nkampu. Wavula intende yesandla sakhe waza wabuza, ‘Ucinga ukuba likho ithemba lokuba kungaze kukhule iinwele kule ndawo?’

“‘Hayi,’ ndaphendula ngelitshoyo.

“‘Linjalo ke nethemba lokuba uya kuze ukhululwe,’ waqwela ngelitshoyo. Emva kokuzikis’ ukucinga walek’ umsundulu wathi, ‘Ngaphandle kokuba uThixo wakho enze into ethile okanye enze ummangaliso.’

“Ngenye mini yehlobo ngowe-1965, ndandisesitishini sikaloliwe ndiye kuthumela ileta. Endibona ndikude umlindi wandikhwaza: “Magdalina, uyaphi ngaphandle kwemvume?’

“Ndaphendula ndathi: ‘Ndiposa nje le leta akukho ndawo ndiya kuyo. Weza kum wathi: ‘Namhlanje uza kukhululwa. Ixesha lakho lifikile.’ Wandijonga ngathi kukho le nto afuna ukuyithetha, ngokungathi ufuna ukuthi, ‘UThixo wakho ukukhulule!’ Kwakungathi ndiyaphupha!

“Sasinokuya naphi na eSoviet Union ngaphandle kweendawo esasihlala kuzo ngaphambili. Kwakungathi uYehova uthi: ‘Yithini saa nize nishumayele. Ixesha lifikile yaye asinakulinda, yithini saa.’ Ukuba sasinokuvunyelwa ukuba sibuyele emizini yethu, sasiza kuthi zava emakhaya. Kodwa ngenxa yokuba oku kwakungavumelekanga, wonk’ umntu wafudukela kwenye indawo. Intsapho yethu yagqiba ekubeni izinze eCaucasus.”

Yinkungu nelanga yamaNgqina kaYehova ayethe saa kwelaseSoviet Union. Kuloo nyaka kwenye inkomfa yesizwe, isihandiba saseburhulumenteni sabuza sididekile sisithi: “Ngubani onokusixelela ukuba eli hlelo lamaNgqina lifike njani kwisixeko sethu esitsha, esakhiwe lulutsha olungamatsha-ntliziyo? Isixeko esitsha kraca nesicocekileyo ngesiquphe sesinehlelo lamaNgqina athi qhaphu gqi esithubeni!” Abasemagunyeni basuka bomelwa ngumqa ephinini bengazi ukuba mabawenze ntoni na amaNgqina. Akukho namnye unokuma endleleni yokuzaliseka kwezithembiso zikaThixo mayelana ‘nokwazi uYehova.’—Isa. 11:9.

“NINA NINAMANZI ANGCWELE’”

AmaNgqina ayesohlwaywa ngokuthunyelwa kwiinkampu ngenxa yokushumayela. UNikolai Kalibaba, owachitha iminyaka emininzi kwiinkampu ezinjalo, ubalisa esithi: “Sasingamadoda amane awathunyelwa kwinkampu eyayikwidolophana yaseVikhorevka, kwiPhondo laseIrkutsk apho kwakuvalelwe abazalwana abangama-70. Wawungasoze uwabone amanzi okusela; ukuba unxaniwe wawukho umbhobho wamanzi odibene namanzi okugutyula, kwakuyingozi ukusela loo manzi. Into esiwa phantsi kwempumlo yayingekho mgangathweni, kodwa uYehova wasinceda. Kule nkampu akukho namnye omnye umntu owayefuna ukusebenza ngaphandle kwamaNgqina kaYehova. Sasisebenza ke nathi singadlali. Akuzange kube kudala abasemagunyeni bakubona oku, saza sathunyelwa ukuba siye kusebenza kwezinye iindawo zenkampu. Sasifumana amanzi acwengileyo ngonina. Amabanjwa amaninzi ayedla ngokuthi: ‘Sivile ukuba “ninamanzi angcwele.” Khanisiphe bethuna nokuba iglasi ayizelanga.’ Hayi noko sabapha amanzi.

“Kula mabanjwa babekho abantu abantliziyo zilungileyo. Abanye babengamatutu nezinye iintlobo zezikrelemnqa. Bafunda inyaniso baza baba ngamaNgqina kaYehova. Abanye babeyichasa inyaniso bengafihlisi. Kodwa xa kwafika isithethi size kuthetha kakubi ngamaNgqina kaYehova, aba bachasi bema ngakwicala lethu besithi loo ntetho yayiyintlebendwane nxamnye namaNgqina kaYehova.”

“SIZA KUZA KUNI SINGAMAQELA”

Ngalo lonke ixesha abazalwana babecela ubulumko bukaYehova ukuze bakwazi ukuhambisela phambili umsebenzi woBukumkani. UNikolai uthi: “Seva ngeempukane eziluhlala ukuba sasiza kufuduselwa kwinkampu ekude kufuphi naseMoscow, eMordvinia. Ngaphambi kokuba sihambe kwenzeka okuthile okubangel’ umdla. Sabamb’ ongezantsi xa amanye amagosa nabalindi ababegada amaNgqina kaYehova iminyaka besiza kuthi benesi sicelo: ‘Sicela nisiculele iingoma zenu nisixelele nangeenkolelo zenu. Siza kuza kuni singamaqela abantu abali-10 okanye abangama-20 okanye ngaphezulu.’

“Ekubeni sasiziva singakhuselekanga kweli cebo labo, basixelela ukuba baza kumisa ookhala abaza kulinda le ndawo sasiza kudibana kuyo. Sabaxelela ukuba sithi abantu abaqhelene nezinto ezinjalo, siza kunyula owethu umlindi. Lo mlindi wasebenza kanye ngendlela esilinda ngayo nathi: Kwakukho amajoni kwindlu yokulinda nendawo esasiza kudibana kuyo. Unawo wena umfanekiso ngqondweni wesi siganeko? Iqela lamaNgqina kaYehova liculela amagosa nabalindi, emva koko kwakho umzalwana onikela intetho emfutshane ngombandela osekelwe eBhayibhileni. Kwakungathi sasikwiHolo yoBukumkani yamaNgqina kaYehova! Le yindlela esasiziqhuba ngayo iintlanganiso nabantu abanomdla. Sayibona indlela uYehova asinyamekela ngayo thina nabanye abantu abanomdla.

UNikolai uthi: “Sahamba namaphephancwadi amaninzi ukusuka kwethu kule nkampu ukuya eMordvinia. Nalapha kwakukho amaNgqina amaninzi. Abazalwana bandinika ityesi eyayinecala lokufihla iincwadi. Yonke le nto yenziwa ukuze xa kugqogqwa, le tyesi ingatsali ingqalelo yabalindi. Ukufika kwethu kwinkampu yaseMordvinia sagqogqwa ngocoselelo. Omnye umlindi wabamba ityesi yam waza wadanduluka esithi: ‘Inzima le nto yakho! Kufanele ukuba kukho ubutyebi kuyo!’ Ndingalindelanga, wayibeka phantsi ityesi nezinye iimpahla zam waza wagqogqa iimpahla zabanye. Emva kokugqogqwa, omnye umlindi wathi: ‘Thatha iinto zakho wena uhamb’ apha!’ Ityesi yam ayizange igqongqwe, ngoko nangoko ndayisa kwizisele ndaza ndaphakela abazalwana ukutya kokomoya okusexesheni yaye babekulambele ngokwenene.

“Akuphelelanga apho, kaloku ndikhe ndafaka namaphecana abhalwe ngesandla ezibhutsini zam. Ndineenyawo ezinkulu, ngoko ke ndandisoloko ndinendawo eyaneleyo yokufaka amaphepha amaninzi. Ndandiwafaka ngaphantsi esihlangwini ndize ndizingcolise ngeoyile. Le oyile yayimtyibilizi yaye inevumba elibi, babengasondeli nokusondela abalindi kuyo.”

“SASIBEKWE ESWENI NGABALINDI, NAM NDIBABEKE ESWENI”

UNikolai usaqhuba: “Kwinkampu yaseMordivinia abazalwana bandabela ukuba ndivelele ukukhutshelwa kweencwadi zeBhayibhile. Enye yeembopheleleko zam yayikukubek’ esweni abalindi ukuze abo bakhuphela uncwadi babe nexesha lokufihla yonk’ into. Umlindi wasibek’ esweni kodwa nam ndimbeke esweni. Abanye abalindi babecinga ukuba bangasifikela singalindelanga, babedla ngokumbonzeleka eziseleni ngamaxesha amaninzi. Kwakunzima ukubabeka esweni bonke. Abanye babesiza eziseleni kanye ngosuku. Aba balindi babengafane basinike ingxaki.

“Ebudeni beli xesha sasikhuphela ngokusuka ezincwadini ezazigcinwe kwindawo ekhuselekileyo. Uninzi lweencwadi zazigcinwa esitovini, nkqu nakwisitovu esasikwiofisi yomphathi wenkampu. Abazalwana babecoca le ofisi balungiselela indawo ekhethekileyo kwesi sitovu, kulapho sasizigcina khona izinto ezixabisekileyo ezifana neeMboniselo. Nokuba abalindi babegqogqa ngokucokisekileyo kangakanani na, iiMboniselo zazisoloko zikhuselekile kwiofisi yomphathi wenkampu.

“Abazalwana babenobuchule bokufihla uncwadi. Eyona ndawo sasifihla kuyo kakhulu yiyingumgubasi wefestile. Abazalwana bade bafunda ukufihla uncwadi kwiqokobhe lentlama yamazinyo. Ngabazalwana ababini okanye abathathu ababesazi ukuba zazifihlwa ndawoni na iiMboniselo. Xa kwakunyanzelekile, omnye wabo wayesiza neMboniselo ikhutshelwe ngesandla ize iphinde ibuyiselwe endaweni yayo. Ngaloo ndlela onke amaphephancwadi ayehlala kwindawo ekhuselekileyo. Abanye abazalwana babekugqala njengelungelo ukukhuphela uncwadi nakuba oku kwakunokukhokelela ekubeni bavalelwe bodwa iintsuku ezili-15. UViktor Gutshmidt ubalisa esithi: “Kwiminyaka elishumi enkampini, ndichithe iminyaka emithathu ndivalelwe ndodwa.”

UKUKHUPHELA IMBONISELO NGOKUNGATHI KUHAMBA ISIGCAWU

Abazalwana babecinga ukuba abaphathi benkampu babequlunqe inkqubo ethile yokugqogqa nokuthimba uncwadi lweBhayibhile lwamaNgqina kaYehova. Abanye oonogada babengathi babethwe ephondweni ekugqogqeni olu ncwadi. UIvan Klimko uyabalisa: “Ngenye imini eMordvinia kwiKampu 19, amajoni nezinja bakhupha abazalwana ngaphandle kumhlaba wenkampu ukuze bagqogqe ngokucokisekileyo. Ngqina ngalinye kwafuneka likhulule nomrhaji wokugqibela. Kodwa abazalwana babencamathisele amaphepha abhalwe ngesandla ngaphantsi kweenyawo zabo, kwaba kukubhungca kwabo ke oko. Babenze neencwadi ezincinane ezazinokufihlwa phakathi kweminwe yabo. Xa oonogada babesithi wonk’ umntu makaphakamise izandla, iincwadi zahlala phakathi kweminwe nalapha zasinda ezo ncwadi.”

Zazikho nezinye iindlela zokugcina ukutya kokomoya. UAleksey Nepochatov uthi: “Abanye abazalwana babekwazi ukubhala ngokungathi bekuhamba isigcawu. Babesebenzisa usiba lokubhala olutsolo kakhulu bebhala phezu kwencwadi enemigca emile ngokungathi ziibhokisi apho babenokubhala imigca emithathu nemine. Ibhokisi yomatshisi yayinokungena iiMboniselo ezintlanu okanye ezintandathu ezikhutshelwe ngesandla. Ukubhala kancinane ngolo hlobo kwakufuna umntu obona kakuhle nokuba aziphose nofele. Emva kokuba izibane zicinyiwe nabantu beye kulala, aba bazalwana babebhalela phantsi kweengubo. Ekuphela kwesibane esasikho sesingaphandle kwezisele. Ukwenza lo msebenzi ixesha elide kunokwenzakalisa amehlo. Ngamany’ amaxesha, ukuba ubonwa ngumlindi yaye ngumlindi owathandayo amaNgqina uza kufika esithi, “Usabhala nangoku—uza kulala nini?’”

Umzalwana uKlimko ubalisa la mava: “Ngenye imini salahlekelwa zincwadi ezininzi neBhayibhile. Zonke zazifihlwe kumlenze ofakelweyo womnye umzalwana. Emva kokunyazela lo mzalwana ukuba akhuphe lo mlenze, oonogada bawophula. Bafota onke amaphepha awayethe saa apho baza bapapasha ezo foto kwiphephandaba lasenkampini. Nakuba kunjalo, kwasinceda kuba kwabonisa ukuba amaNgqina kaYehova ayewubambe ngamandla umsebenzi wawo. Emva koko, umphathi wenkampu wathi kwaba bazalwana, ‘YiArmagedon yenu ke le!’ Ngosuku olulandelayo, weva ngeempukane eziluhlaza ukuba amaNgqina kaYehova ayehlanganisene yaye ayecula ingoma efunda ngokwesiqhelo.”

INCOKO NOMTSHUTSHISI OYINTLOKO

Ngasekupheleni kowe-1961, umtshutshisi oyintloko weRussian Soviet Federative Socialist Republic weza enkampini eMordvinia eze kuhlola. Ehambahamba eziseleni wangena kwisisele esasihlala amaNgqina. Lo mtshutshisi uyintloko wavumela ukuba amaNgqina abuze imibuzo embalwa. UViktor Gutshmidt ubalisa okwenzekayo: “Ndambuza ukuba ‘Ucinga ukuba unqulo lwamaNgqina kaYehova luyingozi kwiSoviet Union?’

Waphendula wathi: “‘Hayi, andicingi ngolo hlobo.’ Kodwa ebudeni bencoko mhlawumbi engaziva wathi ‘Ngowe-1959 kuphela, iPhondo laseIrkutsk, lanikwa iiruble [imali yaseRashiya] ezizigidi ezintlanu ukuze liphande ngamaNgqina.’

“Ngala mazwi wayesithi abasemagunyeni babewaqonda kakuhle amaNgqina ukuba ayengoobani, njengokuba uRhulumente wayechithe iiruble ezizigidi ezintlanu ukuze bacacelwe ukuba angoobani amaNgqina kaYehova. Sisikhuntyu semali ke eso. Ngaloo minyaka ngamawaka amahlanu eeruble wawunokuthenga imoto engayiwayo nomzi ova wena. Kufanele ukuba abasemagunyeni eMoscow babesazi ukuba amaNgqina kaYehova ayengasoze enzakalise nempukane.

“Lo mtshutshisi uyintloko waqhubeka esithi ‘Ukuba sinokuxelela abantu baseSoviet ukuba bangenza nantoni na abayithandayo ngamaNgqina kaYehova, kungasa kungekho nelinye iNgqina eliphilayo.’ Wayethetha ukuthi abantu baseSoviet babengawafuni amaNgqina. Kuyabonakala ukuba izigidi zabantu zaziphenjelelwa kukungakholelwa kuThixo neengcamango ezibubuxoki.

“Sathi ke thina kuye ‘Niseza kubona ukuba anjani amaNgqina xa eneendibano zawo zesithili kuyo yonke le Rashiya ukusuka eMoscow ukuya eVladivostok.’

“Waphendula wathi:‘Kusenokwenzeka ukuba isiqingatha sesigidi sabantu sibe kwicala lenu, kodwa abanye baza kuba ngakuthi.’

“Yaphela ngolo hlobo incoko yethu nomtshutshisi oyintloko. Waphantse watheth’ inyaniso. Namhlanje, kukho abantu abangama-700 000 abeza kwiintlanganiso zamaNgqina kaYehova kulo lonke elalisakuba yiSoviet Union. Apho ke, abantu baxelelwa inyaniso yeBhayibhile, kungekhona iingcamango zobuxoki.”

“NAKHELE AMANGQINA INDAWO YOKUPHUMLA”

UViktor usabalisa: “Umphathi wenkampu wabonisa umtshutshisi oyintloko iintyatyambo nemithi eyayityalwe ngamaNgqina kunye neepasile awayezithunyelelwe zizihlobo nezalamane ezazigcinwe kwizisele zabo kungekho namnye uneminwe emide kuwo. Ebuka yonk’ into kubonakala nakuthathatha ukuba akayikholelwa into ayibonayo. Noko ke, safumanisa kamva ukuba le ndoda yayalela umphathi wentolongo ukuba kuncothulwe zonke ezo ntyatyambo nemithi. Waxelela umphathi wentolongo oku ‘Nakhele amaNgqina indawo yokuphumla endaweni yokuba babe senkampini ekusetyenzwa nzima kuyo.’ Wawalela ukuba amaNgqina afumane izipho ezivela ngaphandle wavala nevenkile awayethenga kuyo ukutya.

“Bavuya kakhulu abazalwana kuba umphathi wentolongo engazange ayithobele yonke loo miyalelo. Ngokomzekelo, oodade bavunyelwa ukuba batyale iintyatyambo. Ekwindla, babevunyelwa ukuba basike iintyatyambo ukuze banike abasebenzi besezinkampini nabantwana babo. Kwakuvuyisa ngokwenene ukubona abantwana befika esangweni le nkampu nabazali babo, bafumane iintyatyambo baye esikolweni noncumo lukaBlankethi. Babewathanda amaNgqina.

UViktor uthi: “Ngenye imini ekuqaleni kowe-1964, omnye umlindi wayenomntakwabo owayesebenzela iKGB, wasixelela ukuba uRhulumente ulungiselela iphulo nxamnye namaNgqina kaYehova. Kodwa ngasekupheleni kwaloo nyaka, uNikita Khrushchev ngokungalindelekanga wahluthwa intlak’ isemlonyeni ekulawuleni elo Lizwe kwatsho kwadambha nokutshutshiswa.”

IINGOMA ZOBUKUMKANI KWINKAMPU ENOKHUSELEKO OLUNGQINGQWA

Kwiminyaka yee-1960, enye inkampu yaseMordvinia, yavumela ukuba amabanjwa afumane iipasile kanye ngonyaka kodwa oku kwatshintshwa kwaba ‘lilungelo elikhethekileyo.’ Kwakugqogqwa ngokuphindaphindiweyo. Ukuba umntu wayebhaqwe eneBhayibhile okanye iphetshana elibhalwe isibhalo, elo banjwa lalivalelwa lodwa iintsuku ezilishumi. Ngaphezu koko, kule nkampu amabanjwa ayefumana ukutya okuncinane xa kuthelekiswa nezinye iinkampu. Kwakusetyenzwa de kugob’ umqolo kule nkampu; amaNgqina kwakufuneka ancothule iziphunzi zemithi emikhulu. UAleksey Nepochatov uthi: “Wawudinwa ube yimfe. Kodwa sanyamezela yaye asizange sinikezele. Enye indlela yokuzomeleza yayikukucula iingoma zoBukumkani. Salungiselela ukuba kubekho ikwayara yamadoda enamazwi awahlukeneyo, loo kwayara, nditsho bengekho oodade, yayisitsho ngoncuthu lwengoma. Ezi ngoma zazinganeli nje ukuba lukhuthazo kubazalwana, kodwa zazikwanjalo nakubalindi, ababecela abazalwana ukuba bacule xa besebenza. Ngesinye isihlandlo sasincothula umthi, omnye umlindi weza kuthi wathi: ‘Khanicule nje iingoma ezimbalwa. Esi sicelo sisuka kumphathi weli candelo ngokwakhe!’

“Kudala abalindi bale nkampu besiva amaNgqina ecula iingoma zoBukumkani. Sasifike ngexesha elililo esi sicelo, ngaloo mini sasidinwe ngendlela engathethekiyo. Saqalisa ukudumisa uYehova ngokumculela. Ngokuqhelekileyo, xa sasicula ezinkampini, abafazi babalindi babesima ezindlwini zabo ezazikufuphi nenkampu, baphulaphule loo mculo ixesha elide. Babeyithanda ingoma yesi-6 ethi ‘Umhlaba Mawumzukise,’ yeculo elidala. Le ngoma yayinamazwi amnandi kakhulu yaye iyingoma eluncuthu mazangwa.”

LELINYE “ILIZWE ELI”

Nakwezona meko zinzima amaNgqina kaYehova ayebonakala nakuthathatha ukuba ayengabantu abanjani. UViktor Gutshmidt ukhumbula esinye isiganeko esenzeka kwinkampu ababevalelwe kuyo, uthi: “Ngenye impelaveki xa sasihleli egadini kwafika izixhobo zombane ezixabisa imali eninzi. Umqhubi wayengeloNgqina, sasingamabanjwa sonke yaye wayephelekwa ngusomaqhuzu owayesuka kwenye inkampu. Igumbi lokufaka izixhobo lalivaliwe nomntu owayesebenza kulo wayesekhefini, amaNgqina acelwa ukuba azamkele ezo zinto aze azothule.

“Sazothula zonke saza sazibeka ecaleni kwegumbi lezixhobo elalikude kufuphi nezisele esasihlala kuzo. Lo somaqhuzu yayimkhathaza into yokuba eza kushiya ezo zixhobo kubantu abangenagunya lakuzamkela. Kodwa umqhubi wamqinisekisa wathi: ‘Ungakhathazeki. Azizukubiwa. Lelinye “ilizwe eli.” Le ndawo ayifani nezinye iindawo. Ungayishiya naphi na iwotshi yakho yaye ngomso uza kuyifumana kwakulo ndawo.’ Le ndedeba yayingayiginyi ncam into yokuvela nje ishiya ezi zixhobo zibiza isikhuntyu semali.

“Akuzange kube kudala bafika abaphathi benkampu bakhupha umyalelo wokuba ilori ihambe. Omnye wabo waxelela loo ndedeba ukuba izishiye zonke ezo zixhobo ibuye ngosuku olulandelayo ukuza kuphuthuma i-invoyisi. Ikrikriza yancama yahamba. Ngosuku olulandelayo yabuya ize kuphuthuma i-invoyisi, kodwa umlindi wamabanjwa wamnika sele ityotyelwe.

“Umlindi wamabanjwa wasichazela ukuba ekubeni umntu owayenegunya lokwamkela ezi zixhobo wayesekhefini, le ndedeba yayizilazila ingafuni ukuhamba. Kangangesiqingatha seyure yaphakama yaza yondela esangweni nakulo maxwebhu yangathi iyahamba ithe sele ihamba yondela ngasemva kwakhona. Yayisisihlandlo sokuqala ebomini bayo le ndedeba into yokuba kothulwe izixhobo ezibiza imali eninzi kangaka kuze kutyotyelwe namaxwebhu ingekho ize yonke into yenziwe ngokunyaniseka. Eyona nto ikhwankqisayo kukuba esi siganeko senzeka kweyona nkampu inokhuseleko olungqingqwa nekwakuvalelwe kuyo ‘awona mabanjwa ayingozi.’ Kungakhathaliseki ukuba bungakanani ubuxoki obabusasazwa nxamnye namaNgqina, iziganeko ezifana nezi zazisenza abakhi-mkhanya babone uhlobo lwabantu amaNgqina kaYehova alulo.”

“AYASHUMAYELA KWAKHONA”

Ngowe-1960, amaNgqina ali-100 asuka kwinkampu yaseMordvinian afuduselwa kwintolongo ekhethekileyo ekwidolophana iUdarny eyayikude kufuphi nalapho. Le ntolongo yayenzelwe “ukuvavanya” amaNgqina ukuba aya kuba njani emva kokuba efundiswe ngokutsha. Amabanjwa ayenxiba iimpahla ezifana nezo zazinxitywa ngamabanjwa awayevalelwe kwiinkampu zamaNazi. Phakathi kwemisebenzi ekwakufuneka ayenze amaNgqina yayikukwemba iziphunzi zemithi emikhulu ehlathini. Mntu ngamnye kwakufuneka akhuphe iziphunzi zemithi ezili-11 ukuya kwezili-12 suku ngalunye. Ngamanye amaxesha, kwanaxa ayencedisana ayengakwazi ukwemba nkqu nesiphunzi esinye somthi wom-oki. Ukuze akhuthazane ayedla ngokucula iingoma zoBukumkani. Wayesithi akuweva ecula umphathi wenkampu wayedla ngokuwasongela athi: ‘Ukuba aniyeki ukucula maNgqinandini anizusiva isidlo senu sasemini. Niza kuyazi le nto kuthiwa ngumsebenzi!’ Omnye umzalwana wathi: “Kodwa uYehova wasinceda sanyamezela. Phezu kwezo meko zimandundu ayephilile ngokomoya. Sasivuyiswa kukuba sasikwicala likaYehova kwimbambano yolongamo lwendalo iphela.”—IMize. 27:11.

Isisele ngasinye sasinomhlohli waso, onke amagosa omkhosi awayabelwe kule ntolongo ayeqalela kwinqwanqwa lobukapteni ukunyuka. Eyona njongo iphambili yala magosa yayikukuba amaNgqina alulahle ukholo lwawo. Nabani na olahla ukholo wayeya kukhululwa. Nyanga nganye abahlohli babebhala ingxelo ngeNgqina ngalinye ize ityotyelwe ngabantu abahlukahlukeneyo abasebenza entolongweni. Kwingxelo yeNgqina ngalinye babenyanzeleka babhale bathi, “Aligungqi, libambelele nkqi kukholo lwalo.” UIvan Klimko uhlabela mgama esithi: “Ndathothoza iminyaka emithandathu kwelishumi kule ntolongo yaye mna nabanye abazalwana sasijongwa ‘njengamabanjwa ayingozi angoncanyelweni.’ Abasemagunyeni bazenza zanzima ngakumbi iimeko ukuze bakwazi ukubek’ esweni indlela awayeziphethe ngayo amaNgqina.”

UIov Andronic owayekule ntolongo kangangeminyaka emihlanu wabuza inkumanda yale nkampu, “Siza kuhlala ixesha elingakanani kule ntolongo?” Inkumandla yalatha ehlathini yaza yaphendula yathi, “Niza kuhlala apha de nife size siningcwabele kwela hlathi.” UIov uthi: “Sasingavunyelwa ukuba sidibane namanye amabanjwa ukuze singawashumayezi. Babesoloko besibek’ esweni. Ukuba omnye wethu wayefuna ukuya kwelinye icandelo lenkampu wayephelekwa ligosa lentolongo. Kwiminyaka eliqela kamva, xa safuduselwa kwinkampu ekhuselekileyo, amabanjwa angengomaNgqina axelela abasemagunyeni athi: ‘AmaNgqina kaYehova oyisile. Niye nazama ukuwenza amakheswa kodwa ngoku ayashumayela kwakhona.’”

IGOSA LIKHUMBULA IBHAYIBHILE YALO

Kwakunzima ukunyebelezisa uncwadi lweBhayibhile kule ntolongo ikhethekileyo, singasathethi ke ngeBhayibhile. Ayemfiliba amathuba okuthubelezisa iLizwi likaThixo entolongweni. Omnye umzalwana obe kule ntolongo kangangeminyaka embalwa uthi: ‘KuYehova, zonke izinto zinokwenzeka. UThixo wayiva imithandazo yethu. Sacela iBhayibhile enye sisenzela amaNgqina ali-100 akule ntolongo kodwa saphela sele sinezimbini!’ (Mat. 19:26) Kwenzeka njani oku?

Igosa eliphambili emkhosini lanikwa umsebenzi wokuba ngumhlohli. Kodwa laliza kuwafundisa njani amaNgqina ekubeni lalingazi nowathwethwa ngeBhayibhile? Lathabatha iBhayibhile edlakadlaka laza ngaphambi kokuba liye ekhefini lacela elinye ibanjwa elisele likhulile lecawa yaseBhaptizi ukuba liyidibanise laza layalela igosa lentolongo ukuba lingayithathi kweli xhego. Ixhego laseBhaptizi laqhayisela amaNgqina lisithi lona lifumene iBhayibhile yaye lawaboleka ukuze ayifunde. Bathi nje bakuyibamba bayahlulahlula baza bayinika onke amaNgqina ukuba ayikhuphele. Kwiintsuku ezingephi ezalandelayo izisele zamaNgqina zaba yindawo yokukhuphela iBhayibhile. Kwenziwa imibhalo emibini yephepha ngalinye. Omnye umzalwana uthi: “Athi akudityaniswa onke la maphepha saba neeBhayibhile ezintathu! Lakubuy’ ekhefini igosa eliphambili lomkhosi labuyiselwa iBhayibhile yalo saza saba neeBhayibhile ezimbini. Enye sasiyifunda, enye igcinwe kwindawo ekhuselekileyo, kwimibhobho ehambisa iintambo zombane. Salungiselela iindawo ezikhethekileyo kule mibhobho. Zazisoyikwa ezi ndawo ngamagosa entolongo, akukho namnye owayegqogqa kuzo. Iintambo zombane zaziqiniseka ukuba akukho mntu uchukumisa ithala lethu leencwadi.”

Noko ke, ngenye imini xa kwakugqogqwa, igosa eliphambili lomkhosi lafumana iBhayibhile ekhutshelwe ngesandla. Wathi nje akuyibona wadana wamanzi waza wathi, “Iziswe ndim nje le Bhayibhile kule nkampu!”

UKUQHUBA ISIKHUMBUZO

Nyaka ngamnye abazalwana babezama ukuqhuba isikhumbuzo enkampini. Kuyo yonke le minyaka besenkampini eMordvinia, akukho namnye owakha waphoswa sesi siganeko. Ngaphandle kwamathandabuzo abasemagunyeni bazama ukubathintela. Babelwazi usuku lweSikhumbuzo yaye ngolo suku babegaya abalindi ukuze bahlale bephaphile. Noko ke, ngorhatya abalindi babedinwa kukusoloko beqolozelelene nabazalwana, kaloku babengayazi indawo nexesha esasiza kuqhutyelwa kuyo iSikhumbuzo.

Abazalwana babesenza amatile-tile ukuze kubekho iwayini nesonka esingenagwele. Ngesinye isihlandlo iqela labalindi labhaqa imifuziselo ngosuku lweSikhumbuzo laza layithatha. Kamva, kwangena elinye iqela labalindi yaye abazalwana ababecoca kwiofisi yenkumanda bayifumana imifuziselo baza bayidlulisela kubazalwana bengabonwa. Ngalo ngokuhlwa abazalwana baqhuba iSikhumbuzo emva kokuba kungene iqela lesithathu labalindi. Yayifuneka ngokwenene le mifuziselo kuba omnye wabazalwana wayengumthanjiswa.

UKUQHUBA ISIKHUMBUZO KWINKAMPU YAMABHINQA

Ezinye iinkampu zazineengxaki ezifanayo. UValentina Garnovskaya ukhumbul’ indlela ekwakunzima ngayo ukuqhuba iSikhumbuzo kwinkampu yamabhinqa yaseKemerovo. Uthi: “Kule nkampu kwakuvalelwe oodade abamalunga ne-180. Sasingavunyelwa ukuba sidibane. Kwisithuba seminyaka elishumi sasiqhuba kabini kuphela iSikhumbuzo. Ngesinye isihlandlo sagqiba ekubeni iSikhumbuzo sisiqhube kwenye yeeofisi endandizicoca. Oodade babefika ngokufika kwiiyure ezimbalwa ngaphambi kokuba siqale iSikhumbuzo. Kwafika oodade abangama-80. Sabeka isonka esingenagwele newayini ebomvu phezu kwetafile.

“Sagqiba ekubeni siqalise ngaphandle kwengoma, omnye udade wenza umthandazo wokuvula yaza yonke into yaqhubeka ngesidima nangesithozela. Ngesiquphe seva ingxolo nesankxwe saza saqonda ukuba abalindi babesikhangela. Ngoko nangoko sabona inkumanda ikrobe ngefestile nakuba ifestile yayiphezulu. Kwangaxeshanye, kwangonjwa ucango sinyanzelwa ukuba siwuvule. Embonzelekile, umlindi wamthi hlasi udade owayenikela intetho, wamgxagxamisa waza wamvalela esiseleni yedwa. Omnye udade ngesibindi waqala apho ebeyeke khona naye bamthi hlasi bahamba naye. Udade wesithathu wakhwel’ eqongeni waza waqhubeka nentetho, basinyhala sonke kwelinye igumbi baza basityityimbisel’ umnwe besithi baza kuvalela ngamnye wethu esiseleni. Saqukumbela iSikhumbuzo kwelo gumbi babesivalele kulo ngengoma nomthandazo.

“Ukubuyela kwethu eziseleni amanye amabanjwa athi, ‘Sathi sakunganiboni sacinga ukuba iArmagedon ifikile yaye uThixo unithathile wanisa ezulwini waza thina wasishiya ukuze sitshabalale!’ Besikunye nala mabanjwa iminyaka embalwa engayamkeli inyaniso. Kodwa emva kwesi siganeko amanye awo aphulaphula.”

SABUTHELANA NDAWONYE

Enye inkampu yaseVorkuta yayinamaNgqina amaninzi asuka eUkraine, eMoldova, nakwimimandla yeBaltic nakwamanye amazwe eSoviet Union. UIvan Klimko uthi: “Kwakusebusika ngowe-1948. Nakuba sasingenalo uncwadi lweBhayibhile sabhala kumaphetshana izinto esasinokuzikhumbula esasizifunde kumaphephancwadi amadala size siwafihle angabonwa ngabasemagunyeni. Kodwa babesazi ukuba sinala maphetshana. Kwingqele yasebusika eqhaqhazelis’ amazinyo sakhutshelwa ngaphandle saza samiswa ngokwemiqolo, umqolo ngamnye unabantu abahlanu. Sabalwa into engapheliyo. Babelindele ukuba sibanike loo maphetshana kunokuba sichachatheke kulo ngqele. Njengokuba sasibalwa sabuthelana ndawonye sancokola ngemixholo yeBhayibhile, sasisoloko sicinga ngezinto zokomoya. UYehova wasinceda sagcina ingqibelelo yethu. Ngasihlandlo sithile kamva abazalwana bakwazi ukuthubelezisa iBhayibhile enkampini. Sayahlulahlula sisenzela ukuba xa kugqogqwa ingafunyanwa yonke.

“Phakathi kwabalindi kwakukho abo babeqonda ukuba inkampu yayingeyondawo yamaNgqina kaYehova. Aba balindi basinceda ngazo zonke iindlela ababenokusinceda ngazo. Abanye ‘babesenza ngathi ababoni’ xa sifumana iipasile. Ngokuqhelekileyo pasile nganye yayisiba nephepha elinye okanye amabini eMboniselo. La maphepha ayebaluleke ngaphezu kokutya. Kuzo zonke iinkampu ayevalelwe kuzo, amaNgqina ayengafumani ukutya okwaneleyo kodwa ayezizityebi ngokomoya.”—Isa. 65:13, 14.

“UZA KUYAHLULA IBE NGAMAQHEKEZA ANGAMA-50!”

Abazalwana babeqhuba izifundo zeBhayibhile veki nganye nabantu ababenomdla enyanisweni. Amanye amabanjwa—kwanalowo ayengenamdla eBhayibhileni—afumanisa ukuba ngentsimbi ye-7:00 ngorhatya, kwakuqhutywa izifundo zeBhayibhile kwizisele yaye babezama kangangoko ukuba bangaphazamisi. UIov Andronic uthi: “Kwakucacile ukuba uYehova wayesinyamekela kwaye wayewuxhasa umsebenzi wakhe. Ukongezelela, sazama ukuba sibonise uthando lobuKristu omnye komnye ngokusebenzisa imigaqo yeBhayibhile. Ngokomzekelo, xa sifumene iipasile sasisabelana ngokutya esikuthunyelelweyo nto leyo eyayingaqhelekanga ezinkampini.

“Kwenye inkampu uMykola Pyatokha nguye owayesabela abazalwana ukutya. Elinye igosa leKGB lathi: ‘Ukuba unika uMykola ilekese, uya kuyahlula ibe ngamaqhekeza angama-50!’ Le yindlela ababeqhuba ngayo abazalwana. Sasisabelana ngayo yonke into esinayo enkampini, nokuba kukutya kokwenyama okanye kokomoya. Kwasinceda yaye kwanikela ubungqina obuhle obachukumisa abantu abantliziyo zinyanisekileyo.”—Mat. 28:19, 20; Yoh. 13:34, 35.

UKUZIPHATHA KAKUHLE KUZALA AMADUNA NAMATHOKAZI

Kwenye inkampu abantu ababesebenza namaNgqina kaYehova bafumana uchatha wama-30 ekhulwini kwimivuzo yabo. Kwakutheni? UViktor Gutshmidt uyasichazela: “Owayesakuba ngunondyebo enkampini wandixelela isizathu. Eli gqiyazana lathi, kule nkampu abasebenzi baxelelwa ukuba bangabi nephuku okanye bathuke kunoko bamele babe nobuchule baze babe ngabantu abachubekileyo. Ngenxa yokuziphatha kakuhle babeza kufumana uchatha emvuzweni wabo. Yonke le nto yenziwa ngabom ukubonisa nje ukuba amaNgqina kaYehova asingawo odwa aziphethe kakuhle yaye ayefana nabanye abantu. Ngoko ke, abasebenzi babehlawulwa ngokuziphatha kwabo kakuhle. Babebaninzi abantu ababesebenza kule nkampu babequka abezonyango, abasebenzi, oonodyebo, nabaphathi, bebonke babemalunga ne-100. Wonk’ umntu wayefuna ukuwelwa ngulo mqa esandleni.

“Ngenye imini omnye umzalwana owayesebenza ngaphandle ezinkampini weva umphathi wabasebenzi ethuka. Ngosuku olulandelayo lo mzalwana wadibana naye ngaphakathi enkampini, wathi kuye: ‘Kumele ukuba ukho lo mntu uye wakuphath’ emanyeni izolo. Ubungathuki ubuqalekisa!’ Le ndoda yaphendula yathi: ‘Hayi wena, ndenziwe ngumsindo. Ndithe mandiphume ngaphandle kwenkampu ukuze ndiwuyeke umsindo uzenzele.’ Eneneni, kunzima ukuziphatha ngendlela aziphethe ngayo amaNgqina kaYehova.”

UKUSHUMAYELA NGAPHA KWEGLASI

Abazalwana baxhakamfula onke amathuba okushumayela kwabanye, yaye maxa wambi imigudu yabo yayivuzwa. UNikolai Gutsulyak uthi: “Sasidla ngokuthenga ukutya kwivenkilana eyayisenkampini. Rhoqo xa ndisiya kuthenga ukutya, ndandidla ngokuphosa amagama amabini okanye amathathu ngomxholo othile weBhayibhile. Ibhinqa elalithengisa ukutya lalindiphulaphula ngenyameko yaye kwesinye isihlandlo landicela ukuba ndilifundele okuthile. Emva kweentsuku ezintathu, ndabizwa ligosa esangweni. Mna nelinye iNgqina lasiyalela ukuba siye kufaka iglasi endlwini yomphathi.

“Mna nomnye umzalwana saya edolophini siphelekwa ngamajoni. Sathi sakufika endlwini, savulelwa lela bhinqa lalisebenza kwivenkilana ethengisa ukutya. Lalingumfazi womphathi wenkampu. Salindwa lelinye ijoni ngaphakathi amabini ema ngaphandle kwisitrato esingqamane nefestile. Lasenzela into ephungwayo, laza lasicela ukuba silixelele okungakumbi ngeBhayibhile. Ngaloo mini salifakela iglasi yefestile salishumayeza ngokucokisekileyo. Emva kokuba sincokole nalo lathi: ‘Ningandoyiki. Abazali bam babemoyika uThixo njengani.’ Lalifunda uncwadi lwethu ngasese, engazi umyeni walo, owayewathiy’ egazini amaNgqina.”

“BUYELAN’ ENKOMENI”

Bambi kwabasemagunyeni babethetha kakuhle ngamaNgqina. Ngeminyaka yee-1970 kumaphondo aseBratsk, naseIrkutsk iqela lombutho wamaKomanisi kumzi-mveliso wokwenza amaplanga lenza isigqibo sokuba kugxothwe bonke abasebenzi abangamaNgqina kaYehova. Kwathiwa kwaba bazalwana: “Ekubeni ningamfuni urhulumente walapha eSoviet, naye uza kunilahla kwesinomhlwa. Niyamthanda uYehova wenu, makaninyamekele.” Abazalwana ababegxothiwe emisebenzini bagqiba kwelokuba ekuphela kwento abanokuyenza kukushumayela esidlangalaleni, ngoko ke bashumayela kwindlu ngendlu. Kwenye indlu kwavula ibhinqa emnyango, abazalwana bazazisa baza bathi gqaba gqaba ngenjongo yotyelelo lwabo. Kwavakala ilizwi lendoda ekhitshini lisithi: “Ngobani aba uthetha nabo? Mabangene ngaphakathi.” Xa abazalwana bangena endlwini le ndoda yabuza: “Kutheni ningaphangelanga? Benimele ukuba nisemsebenzini.” Abazalwana bachaza isizathu sokuba bengoomahlalela.

Bafumanisa ukuba le ndoda ngumtshutshisi owayeze kufumana isidlo sasemini. Iligqabi ngumsindo yaya emnxebeni, yaza yafowunela kula mzi-mveliso wamaplanga yaza yabuza ubunyaniso bale nto yayiyiva. Yathi isakuphendulwa, lo mtshutshisi wabuza wathi: “Ngaziphi izizathu? Niyaqonda nje phofu ukuba naphule umthetho? Aninalo igunya lokwenza le nto. Ndithi ngoku buyiselani onke amaNgqina emisebenzini yawo nakugqiba niwahlawule zonke eza nyanga zintathu ebengazisebenzi.” Umtshutshisi wawubeka phantsi umnxeba waza wathi kubazalwana, “Ngomso nibuyel’ enkomeni.”

“BENDIFIHLA UNCWADI UKUSUSELA NGOWE-1947”

Ngeminyaka yee-1970, abazalwana babenobuchule bokuvelisa, ukusasaza nokufihla uncwadi. Maxa wambi, kwakufuneka bacinge ngokukhawuleza. UGrigory Sivulsky uthi: “Ngaminazana ithile ngowe-1976 umzi wethu wagqogqwa. Ngezolo ndandibeke iingxelo zenkonzo yasentsimini needilesi zabazalwana ngaphantsi kwechest. Njengokuba yayigqogqa iKGB yayibonakala iyazi into eyifunayo nalapho inokuyifumana khona. Elinye lamagosa eKGB lathi kum: ‘Yiza neplayazi nesikrudrayiva—siza kuqhaqha le sofa.’ Ndathandaza ndaza ndaphendula ngokuzithemba:

“‘Ukuba benize kugqogqa singalindelanga ngendlela enidla ngokwenza ngayo kwizindlu zamanye amaNgqina, ikho into ebeniza kuyifumana. Kodwa nifike emva kwesithonga namhlanje. Anisoze nifumane nempunde.’

Eli gosa lathi “‘Besiza kufumana ntoni?’

Ndaphendula ndathi “‘IMboniselo noVukani! Njengokuba benditshilo nifike emva kwesithonga.’

“Ndalinika izixhobo elalizifuna, ndathi kulo, ‘emva kokuba nigqibile ukugqogqa, kuza kufuneka niphinde niyidibanise le sofa iphinde ibe njengokuba ibinjalo.’

“Bema umzuzwana becinga. Ndibona ukuba bayathingaza, ndasondela komnye wabo, igatyana lo mfana, ndathi: ‘Ndicinga ukuba uneminyaka emithathu ufuna uncwadi lwamaNgqina kaYehova. Bendifihla uncwadi ukususela ngowe-1947. Sanukuzichithel’ ixesha, uncwadi lukwindawo ekhuselekileyo.’

“Ndingalindelanga emka. Iingxelo needilesi zabazalwana zazinokufumaneka lula.

IXESHA LEENGUQU

Iinguqu ezabhengezwa ngowe-1985 azizange zizise isiqabu ngoko nangoko njengokuba kwakulindelekile. Kweminye imimandla kwakusadliwa ngendeb’ endala, amaNgqina ayegwetywa avalelwe. Noko ke, ngowe-1988 isebe laseJamani labhalela ikomkhulu lisithi: “Ekuqaleni konyaka wenkonzo, kwakukho iimpawu ezibonisa ukuba abasemagunyeni babekulungele ukusinika inkululeko engakumbi yonqulo [abazalwana abaseUSSR], kwinkalo ezifana neentlanganiso zebandla noncwadi, ukuba ayenokubhaliswa ngokusemthethweni. Kwezinye iindawo bakwazi ukuqhuba iSikhumbuzo ngaphandle kokuphazanyiswa. Bavakalelwa kukuba isimo sengqondo sabasemagunyeni nxamnye nabo sitshintshe ngokuphawulekayo.”

Ekuhambeni kwexesha, abazalwana abamiselweyo bathumela iidilesi zabo kwisebe laseJamani ukuze bathunyelelwe ukutya kokomoya. Bona, babeza kukudlulisa kubadala ababeza kuqinisekisa ukuba wonke ubani uya kufumana ukutya kokomoya. NgoFebruwari 1990, kwakukho iidilesi ezili-1 600 ekwakuthunyelwa kuzo ukutya kokomoya nyanga nganye.

Ngowe-1989 amawaka amaNgqina kaYehova aseSoviet Unioni ayephakathi kwabo babephulaphule indibano ekhethekileyo yesithili eyayisePoland. UYevdokia, iNgqina elisuka kwisixeko saseNaberezhnye Chelny uthi: “Sathandaza ngokunyanisekileyo kuYehova sicela ukuba sikwazi ukubakho kwindibano yethu yokuqala yesithili. Umphathi wenkampani endandisebenza kuyo wathi: ‘Intoni! Uyambukela kodwa umabonwakude? Imida ivaliwe, akukho mntu uphumayo nongenayo kuyo!’

“Ndaphendula ngokuzithemba ndathi: ‘Imida iza kuvulwa.’ Yaye kwenzeka kanye oko. Emdeni oseBrest ngamaNgqina kaYehova kuphela avunyelwayo ukuba adlule. Azizange zigqogqwe iimpahla zethu, sonke saphathwa ngembeko. Omnye umntu owayengelilo iNgqina wazenza ngathi uya endibanweni waza wadlula. Abasemagunyeni bakhawuleza bambhaqa baza bamvalela. Bamazi njani? Abazalwana ababesiya endibanweni babencumile kwaye babephethe iibhegi ezincinane.”

UKWAMKELWA NGEZANDLA EZISHUSHU EMOSCOW

Sekudlule iminyaka engama-40 ukususela oko amaNgqina kaYehova enza isicelo sokuba abhaliswe ngokusemthethweni ngowe-1949. Ngelo xesha abazalwana babengenakukwazi ukuzenza izinto ezazifunwa nguStalin. Kodwa ngoFebruwari 26, 1990, usihlalo weKomiti yeMicimbi yoNqulo yaseMoscow wamkela igqiza lamaNgqina kaYehova. Le ntlanganiso yayizinyaswe nangamasekela amabini kasihlalo nangoogxa babo abathathu. Igqiza lamaNgqina kaYehova lalinabantu abali-15: abazalwana abali-11 abasuka eRashiya nakwamanye amazwe eSoviet Union, umzalwana uMilton Henschel noTheodore Jaracz osuka eBrooklyn, uWilli Pohl noNikita Karlstroem ababevela kwisebe laseJamani.

Usihlalo wale ntlanganiso wayivula ngala mazwi: “Kuyasivuyisa ukudibana namaNgqina kaYehova. Kudala ndisiva ngani, kodwa kokokuqala ndidibana nani. Sikulungele ukuthetha ngayo nantoni ngomoya okhululekileyo.” Abazalwana bachaza umnqweno wabo wokuba abhaliswe ngokusemthethweni amaNgqina kaYehova eSoviet Union. Usihlalo watyatyadula wathi: “Kuyasivuyisa oko, yaye kufike ngexesha elifanelekileyo. Kungekudala kuza kuba sentwasahlobo, ixesha lokuhlwayela. Ngoko sinokulindela isivuno seziqhamo ezihle.”

Xa usihlalo wacela ukuba abazalwana bazazise, kwakucace nakuthathatha ukuba amaNgqina ayefumaneka mbombo zone zelo lizwe ukusuka eKaliningrad ukusa kwiMpuma yeRashiya. Omnye umveleli wesiphaluka wathi: “Ndimela amabandla amane akwiPhondo laseIrkutsk. Ukanti iMpuma eKude, iKhabarovsk, iKrasnoyarsk eyahlulwa lulwandle iNovosibirsk kunye nePhondo laseOmsk nazo ziphantsi kwam.” Usihlalo wadanduluka, “Ninomhlaba omkhulu; mkhulu ngaphezu kwamanye amazwe!”

Usekela sihlalo wathi: “Kufuneka sizazi kakuhle iinkolo zenu kuba ezinye zazo asiziqondi kakuhle. Ngokomzekelo kwenye yeencwadi zenu kuthiwa uThixo uza kucoca lo mhlaba aze ashenxise bonke oorhulumente abakhoyo namhlanje. Asiyiqondi kakuhle ke le into.” Umzalwana uPohl waphendula wathi: “AmaNgqina kaYehova akaluxhasi naluphi na uhlobo logonyamelo. Ukuba kukho incwadi ethetha ngolo hlobo sukuba ibhekisela kwisiprofeto seBhayibhile. AmaNgqina kaYehova ashumayela ngoBukumkani bukaThixo nangobomi obungunaphakade kwiparadesi esemhlabeni.”

Usekela sihlalo wathi, “Akukho nto iphosakeleyo kuloo nto.”

Ekupheleni kwale ntlanganiso usihlalo wathi: “Sikuvuyela kakhulu ukudibana nani. Niza kubhaliswa kungentsuku zatywala.”

NgoMatshi 1991, amaNgqina kaYehova amkelwa ngokusemthethweni eRashiya. Ngelo xesha abemi baseRashiya babengaphezu kwezigidi ezili-150 yaye abali-15 987 babengabavakalisi boBukumkani. Ngenxa yezi nguqu, kwafuneka uYehova afundise abazalwana noodade baseRashiya.—Mat. 24:45; 28:19, 20.

“ULONWABO NENKULULEKO ENGATHETHEKIYO!”

Ekubeni ilizwe laseFinland lisondele eRashiya, iQumrhu Elilawulayo lacela isebe laseFinland ukuba lincedise ekwenzeni amalungiselelo endibano yezizwe ngezizwe eSt. Petersburg, eRashiya eyayiza kuqhutywa ngoJuni 26-28, 1992. Bavakalelwa njani abazalwana ngokuqhutywa kwendibano ngokukhululekileyo emva kokuvalwa umlomo iminyaka engaphezu kwamashumi amahlanu? Omnye umzalwana uthi: “Yiyingumbo nomxesibe emabaleni. Sasiziinyhididi ziinyembezi. Ulonwabo nenkululeko engathethekiyo! Ayizange ithi thiki engqondweni into yokuba singaze sikhululeke kule nkqubo yezinto. Kodwa uYehova uye wasikhulula. Sakhumbula ukuba ngaphandle kwale nkululeko ngesivalelwe sibahlanu eziseleni ezinkampini ezibiyelwe ngocingo olude yaye kwakuza kufuneka sizame ukukhuselana engqeleni. Eli bala lalibiyelwe ngodonga olude. Kodwa sasifuna ukuhlala kule ndawo kangangoko kunokwenzeka. Kunzima ukuyichaza indlela esasivakalelwa ngayo.

“Sasintywizisa kuyo yonke loo ndibano. Sasililiswa luvuyo ngenxa yalo mmangaliso sasiwubona. Nangona sasineminyaka engaphezu kwama-70 ubudala, sasisihla sinyuka kwelo bala sibulisa abazalwana. Iminyaka engama-50 silindele inkululeko evela kuYehova. Okokuqala uYehova wavumela ukuba sithinjelwe eSiberia ekugqibeleni savalelwa ezintolongweni nasezinkampini. Kodwa ngoku sisebaleni! UYehova unamandla kunaye nabani na. Sema sagixa. Akukho namnye kuthi owayekholelwa ukuba oku kwakusenzeka ngokwenene. Abanye abazalwana abaselula basondela basibuza: ‘Ngaba ikho into enikhathazayo? Ngaba ukho umntu onikhathazileyo?’ Asizange sikwazi nokuphendula ngenxa yesingqala. Omnye wethu engqukruleka waphendula wathi, ‘Sililiswa luvuyo!’ Sababalisela indlela esamkhonza ngayo uYehova phantsi kokuvalwa umlomo. Ngoku yayingumnqa into yokuba uYehova atshintshe izinto ngesiquphe.”

Emva kwaloo ndibano ingenakulibaleka, isebe laseFinland lacelwa ukuba lithumele oovulindlela abakhethekileyo abali-15 eRashiya. Isibini saseFinland uHannu noEija Tanninen sagaleleka eSt. Petersburg. Ingxaki yokuqala abajamelana nayo kukufunda olunye ulwimi. Emva kwesifundo sokuqala, baya entsimini ukuze baqalise izifundo zeBhayibhile. UHannu uthi: “Ekuqaleni kweminyaka yee-1990 phantse wonk’ umntu wayefuna ukufunda iBhayibhile. Xa sikumsebenzi wamaphephancwadi, abantu babesinika iidilesi zabo ngokuzithandela. Wonk’ umntu wayefuna uncwadi. Esitratweni ukuba uhambisele umntu omnye iphephancwadi okanye iphecana, abanye abantu abalishumi abalibonileyo babezizela ukuze bafumane awabo. Abantu babengamkeli nje uncwadi kodwa ngoko nangoko babelufunda ezitratweni nakoololiwe abahamba ngaphantsi komhlaba.”

Ukususela ngo-Oktobha 1992 kwafika oovulindlela abakhethekileyo abaninzi ababesuka ePoland. Iqela lokuqala laliquka oodade abangatshatanga. Iqela lesibini elalivela ePoland lathunyelwa eSt. Petersburg. Emva konyaka iqela loovulindlela ababesuka ePoland lathunyelwa eMoscow. Emva kweminyaka ethile, kwathunyelwa amatsha-ntliziyo ali-170, ubukhulu becala ayephumelele kwiSikolo Sokuqeqesha Abalungiseleli.

KUVULEKE UMNYANGO OMKHULU OKHOKELELA EMSEBENZINI

Emva kwaloo ndibano yezizwe ngezizwe yaseSt. Petersburg, iQumrhu Elilawulayo lagunyazisa ukuba kuthengwe umhlaba oziihektare ezisixhenxe, owawunezakhiwo ezidala kwidolophana yaseSolnechnoye kude kufuphi nesixeko. Ngoku lalifikile ixesha lokuba kwakhiwe iBheteli naseRashiya. Isebe laseFinland lacelwa ukuba lincedise kumsebenzi wokwakha. NgoSeptemba 1992, iqela lokuqala lamatsha-ntliziyo avela eFinland lagaleleka eSolnechnoye. UAulis Bergdahl, omnye wabazalwana awayekwelo qela owathi kamva wakhonza njengelungu leKomiti yeSebe, uthi: “Mna nenkosikazi uEva-Lisa, samkela isimemo sokuncedisa ekwakhiweni kweBheteli yaseRashiya. Kwakucace mhlophe ukuba uYehova wayewalathisa umsebenzi. Lo msebenzi wawuxhaswa ngabazalwana ehlabathini lonke ngeendlela ezahlukahlukeneyo.”

UAlf Cederlöf, umveleli wolwakhiwo waseFinland kunye nenkosikazi yakhe uMarja-Leena, babelukhuthazo kubazalwana ababeselwakhiweni. IKomiti yeSebe nayo yayilukhuthazo. Abazalwana ababevela kwikomkhulu eBrooklyn batyelela eSolnechnoye ngoxa kwakusakhiwa. UAulis uthi: “Ngowe-1993, uMilton Henschel wasityelela emva kwendibano yezizwe ngezizwe eyayiseMoscow. Wayewakhuthaza amatsha-ntliziyo ngeentetho zakhe naxa encokola nawo.”

Kwakukho amatsha-ntliziyo angama-700 awayesuka kumazwe eScandinavia, eYurophu, eMerika, eOstreliya, eRashiya nakwamanye amazwe awayesakuba phantsi kweSoviet awayesebenza ekwakhiweni kweBheteli. Ayeneemvelaphi nezithethe ezahlukeneyo yaye esebenza ngeendlela ezingafaniyo. Kodwa lo msebenzi wagqitywa, njengokuba uZekariya 4:6 esithi: “Akungamkhosi wamajoni, kungengamandla, kodwa kungomoya wam,’ utsho uYehova wemikhosi.” Eneneni nguYehova owakha le ‘ndlu.’ (INdu. 127:1) Abazalwana baseRashiya bazibhokoxa kumsebenzi woBukumkani. Inkoliso yabo yayiselula yaye intsha nasenyanisweni, kodwa uninzi lungoovulindlela. Babesitsha zintambo befuna ukufunda indlela yokwenza umsebenzi ngendlela ekhawulezayo nesemgangathweni, nokulungelelanisa izinto ngendlela yobuthixo.

UKULUNGELELANISA UMSEBENZI

Ngasekupheleni kowe-1993, amalungu eKomiti yeLizwe laseRashiya agaleleka eSolnechnoye. La malungu yayinguIvan Pashkovsky, uDmitry Livy, uVasily Kalin, uAleksey Verzhbitsky, uAnatoly Pribitkov noDmitry Fedunishin. Emva konyaka kwamiselwa ilungu elitsha uMikhail Savitsky. IQumrhu Elilawulayo lamisela uHorst Henschel owayesuka kwisebe laseJamani ukuze ancede abazalwana ekulungelelaniseni umsebenzi.

Into yokuqala eyalungelelaniswayo yaba ngumsebenzi wokuhambahamba. Ekuqaleni kwamiselwa iziphaluka ezintlanu, ezibini zaziseSt. Petersburg ezintathu ziseMoscow nakwimimandla eyingqongileyo. Abaveleli bokuqala beziphaluka yaba nguArtur Bauer, uPavel Bugaisky noRoy Öster eMoscow, kanti eSt. Petersburg kwamiselwa uHannu Tanninen. Kamva kwamiselwa noRoman Skiba njengomveleli wesiphaluka. UMatthew Kelly, waseUnited States nowaphumelela kwiSikolo Sokuqeqesha Abalungiseleli sowe-1992, wamiselwa njengomveleli wesithili obambelayo.

UHannu Tanninen usibalisela ngendlela awayeqhutywa ngayo amatyelelo okuqala omveleli wesiphaluka ekuqaleni kweminyaka yee-1990: “Ndathumela ileta echaza ngotyelelo kwibandla lasePetrozavodsk, eKarelia. Le leta yayichaza indlela ezaziza kuqhutywa ngayo iintlanganiso ebudeni botyelelo. Sakhawulelwa ngumdala kwisikhululo sikaloliwe waza wasisa ekhayeni lakhe. Wandibonisa ileta wathi, ‘Nantsi laa leta wawusibhalele yona, ekubeni besingayazi le nto ubuthetha ngayo sigqibe ekubeni sikulinde ukuze usicacisele.’

“Ukutyelela kwethu okokuqala eMurmansk, kwakukho abavakalisi abangama-385, ababeqhuba izifundo zeBhayibhile ezazingaphezu kwe-1 000. Phofu ke, inani lezifundo lalingaphezulu kwelo nani, kaloku izifundo ezininzi zaziqhutywa ngokwamaqela nabantu abanomdla. Ngokomzekelo, omnye udade onguvulindlela wayenezifundo zeBhayibhile ezili-13, kodwa abantu awayefunda nabo babengaphezu kwama-50!

“Isiphaluka esilandelayo sasikumaPhondo aseVolgograd naseRostov. IVolgograd yayinabemi abangaphezu kwesigidi kodwa kukho amabandla amane kuphela. Abazalwana babekulangazelela ukufunda indlela yokuqhuba iintlanganiso zebandla, ukuqhuba izifundo zeBhayibhile nokushumayela kwindlu ngendlu. Kutyelelo ngalunye sasimisela amabandla amatsha. Kwingxelo yomveleli wesiphaluka, sasibala abantu abaye babhaptizwa ngemva kotyelelo oludluleyo. Kwibandla ngalinye kwakubhaptizwa abantu abangama-50, abangama-60, okanye abangama-80, kwelinye kwabhaptizwa ngaphezu kwe-100! Ngenxa yoko, kwisixeko nje esinye kwasekwa amabandla ali-16 kwiminyaka nje emithathu.”

NgoJanuwari 1996, kwamiselwa iKomiti yeSebe eRashiya. Kwangaxeshanye kwamiselwa abaveleli bezithili. Phakathi kwabo kwamiselwa uRoman Skiba (owayevelela iSiberia neMpuma Ekude), uRoy Öster (wayeza kuvelela iBelarus, iMoscow neSt. Petersburg ukuya eziNtabeni zeUral), uHannu Tanninen (wavelela iCaucasia ukusa eVolga), yaye uArtur Bauer (wayetyelela iKazakhstan noMbindi weAsia). Ngezo mini, bonke abaveleli bezithili babesiba ngabaveleli beziphaluka ezincinane phezu komsebenzi wabo wesithili.

BABEHAMBA IMIGAMA EMIDE

Omnye woovulindlela abakhethekileyo bokuqala ukufika eRashiya bevela ePoland yayinguRoman Skiba ngasekuqaleni kowe-1993. Usibalisela esithi: “Ngo-Oktobha 1993, ndamiselwa ukuba ndibe ngumveleli wesiphaluka. Isiphaluka endasebenza kuso okokuqala sasiquka amazantsi eSt. Petersburg, kwiPhondo lasePskov nawo wonke ummandla waseBelarus. Kodwa ungacingi ukuba yayisesona siphaluka sikhulu saseRashiya. Ngokukhawuleza kwafuneka ndiqhelane nokuhamba imigama emide. NgoNovemba 1995, ndabelwa kwisiphaluka seeNtaba zeUral ndaza ndamiselwa njengomveleli wesithili obambelayo. Lo mmandla wawususela kwiintaba zeUral, uthathe yonke iSiberia ukuya kutsho kwiMpuma Ekude. Omnye umzalwana wafumanisa ukuba esi sithili sasinokulingana namazwe angama-38 alingana nePoland! Yonke le mimandla yayinamaxesha asibhozo awahlukahlukeneyo! Emva kweminyaka emalunga nemibini kamva, isebe landicela ukuba ndiye kutyelela iqela laseUlaanbaatar, ikomkhulu laseMongolia.”

Umzalwana uSkiba uhlabela mgama esithi: “Ngesinye isihlandlo xa kwakufuneka ndiye eYekaterinburg ukusuka eNoril’sk, emntla weArctic Circle, kwafuneka ndihambe ngeenqwelo-moya ezimbini, eyokuqala isuka eNoril’sk ukuya eNovosibirsk eyesibini yandithatha yandisa eYekaterinburg. Olu hambo alulibaleki kuba kwakungathi alunakuze luphele. Inqwelo-moya yaseNoril’sk yalibaziseka ngeeyure ezili-12, ngenxa yoko mna nomfazi wam kwafuneka silinde usuku lonke kweso sikhulo seenqwelo-moya. Okuvuyisayo kukuba saqhela ukufunda xa siseluhambeni.

“Nangona sasizama ukubamba ixesha, maxa wambi sasilibaziseka ekutyeleleni amabandla. Xa kwakufuneka sityelele elinye ibandla elikwidolophana esezintabeni iUst’-Kan, eAltai, kwafuneka sihambe ngemoto kwindlela yomhlaba egudla iintaba. Ngelishwa, imoto esasihamba ngayo yonakala endleleni, yasityela ixesha lokuhlola iingxelo zebandla yaye safika kwiiyure ezimbini emva kokuqalisa kweentlanganiso zebandla. Sasikhathazekile sicinga ukuba siza kufika kungekho mntu. Samangaliswa kukufumanisa ukuba kwakukho abantu abali-175 ababekwiholo eqeshiweyo nakuba elibandla lalinabavakalisi abangaphantsi kwama-40. Kubonakala ukuba ngenxa yokulibaziseka kwethu, abantu abaninzi abanomdla abavela kwezinye idolophana bafika iintlanganiso zingekaqali.”a

IINDIBANO EZINGENAKULIBALEKA

Yayisisihlandlo sokuqala ukuba iindibano zezithili ziqhutyelwe kwizixeko ezikhulu ezazinabazalwana abangenamava okulungiselela indibano. Ngowe-1996, eYekaterinburg, abazalwana bakhetha ibala ekwakuza kuqhutyelwa kulo indibano yesithili. Uthi uRoman Skiba: “Ngaphantsi kwezitulo zeli bala kwakukho ingca ende yaye ebaleni kwakukho imithi emide. Kwakusele nje iiveki ezintathu ngaphambi kokuba iqale indibano yaye eso sixeko sinamabandla amathathu kuphela. Okuvuyisayo kukuba, umlawuli weli bala wayekuvuyela ukusebenzisana nathi nakuba wayengayiqondi kakuhle into yokuba yayiza kuphumelela njani loo ndibano. Abazalwana bazibhokoxa besebenza nzima yaye lwafika usuku lwendibano ibala licocekile. Umlawuli weli bala akazange akholelwe akulibona!” Wababulela aba bazalwana ngokubavumela ukuba baqhube Isikolo Soovulindlela kwelinye lamagumbi elo bala. Omnye umzalwana uthi, “Emva kwale ndibano, yaqala phantsi imdlalo kwelo bala, nto leyo eyayingenisa imali eninzi kweso sixeko.”

Maxa wambi kwakufuneka bavumelane neemeko ukuze bakwazi ukuqhuba iindibano zeziphaluka nezezithili. EVladikavkaz ngowe-1999, abazalwana babengakwazi ukuqesha ibala ukuze baqhube indibano yesiphaluka ekwakulindeleke ukuba kubekho abantu abangama-5 000. Ngaloo ndlela abazalwana baceba ukuba balungiselele olunye ucwangciso lwendibano yesiphaluka. Ucwangciso losuku olunye lwaqhutywa izihlandlo ezihlanu kwiholo lokubukela iifilimu eVladikavkaz. Ucwangciso lwendibano yesiphaluka lwaqhutywa kwiindawo ezimbini ezazimalunga neekhilomitha ezimbini ukusuka kwisixeko saseNal’chik. Ezi ndibano zaqhutywa ngemini enye, kodwa zishiyana ngeeyure ezimbini, ukuze izithethi zikwazi ukunikela iintetho zazo kuzo zombini ezi ndibano. Kwakubonakala ngathi abanye abaveleli abahambahambayo babeza kutshelwa ngamazwi ngaphambi kokuba indibano iphele. Omnye umzalwana ucinga ukuba wanikela iintetho ezingama-35 kuloo veki. Yonk’ into yahamba kakuhle de ucwangciso lwaphazanyiswa ngentsasa yangoMgqibelo. Kwafika amadoda ehamba nenja esithi wonk’ umntu wayemele aphume kwelo holo. Njengesiqhelo abazalwana noodade baphuma bezolile baza bafumana isidlo sabo sasemini banandipha nonxulumano oluhle nabanye abazalwana. Ekugqibeleni safumanisa ukuba umntu othile owayewathiyile amaNgqina wafowunela abasemagunyeni ebaxelela ukuba kwakukho isiqhushumbisi kweso sakhiwo. Basikhangela baza abasifumana yaye abazalwana baqhubeka nocwangciso. Ngaphandle nje kotshintsho olungephi, indibano yaphumelela yaye wonke umntu wangenelwa kucwangciso.

AMATYE, AMAKHAKA NAMAKRELE

Imbewu yenyaniso yakhawuleza yasasazeka kwilizwe lonke. UEija Tanninen uthi: “Ngowe-1998 sasilungiselela ukuya kwindibano yesithili siza kuhamba iiyure ezili-15 ngololiwe. Abazalwana babuza enoba sasingenako na ukuhamba neempahla ezaziza kusetyenziswa kumdlalo wendibano yesithili. Yayizakuba nzima ke le nto, kaloku abalindi abasebenza kuloliwe babengabathandi abantu abaneempahla ezininzi. Kodwa ngoncedo lwabazalwana, sahamba namatye, amakhaka namakrele neengxowa ezineempahla zabadlali kwikhareji esasikhwele kulo. Sahlala kwelo khareji nezinto zethu nabanye abantu ababini.

Xa umlindi osebenza kuloliwe weza kuhlola amatikiti ethu, wasibuza ukuba kutheni sineempahla ezininzi kangaka. Samchazela ukuba le yimpahla eza kusetyenziswa kumdlalo wendibano yesithili yamaNgqina kaYehova. Wayenobubele kakhulu kangangokuba wasixelela ukuba ukhe waya kwintetho yesidlangalala eyayinikelwa ngumyeni wam xa sasityelele ibandla elikwidolophana yakowabo. Kwaba ngathi sincedwa nguYehova ngokwakhe.”

UKUFUNDA INDLELA YOKUQHUBA ISIFUNDO

Zininzi izinto ababenokufundisana zona oodade. UEija uyasibalisela: “Kumele ukuba kwakufuneka bathobeke yaye babe nomonde oodade xa saqalisa umsebenzi wethu eRashiya kaloku sasisalupitiliza ulwimi lwabo. Ndachukunyiswa kukubona indlela ababekulangazelela ngayo ukufunda ukuqhuba izifundo zeBhayibhile. Uninzi lwabo lwaluselutsha enyanisweni kwaye abanye babo baye bakhonza ngexesha lokuvalwa komsebenzi, ngelo xesha kwakungelula ukufundiswa yintlangano kaYehova.

“Sakhonza kwidolophu yaseVolzhskiy ukususela ngowe-1995 ukusa kowe-1996. Xa omnye woodade endicelile ukuba ndiye esifundweni sakhe, abanye oodade babecela ukuhamba kunye nathi. Ekuqaleni ndandizibuza ukuba kutheni befuna ukuhamba nathi, kodwa bandixelela ukuba babefuna ukufunda indlela yokuqhuba isifundo seBhayibhile. Ndabaxelela ukuba, ukuba isifundo asinakukhathazeka bangahamba nathi. Ngokuqhelekileyo sasihamba noodade abathandathu ukusa kwabalishumi, babecinga ukuba isifundo asinakuphazamiseka yaye kwaba njalo. Emva kweenyanga eziliqela izifundo zeBhayibhile nazo zaziqhuba ezazo izifundo zeBhayibhile nabantu abanomdla. Ngelo xesha kwakukho amabandla amabini eVolzhskiy. Emva kweminyaka elishumi kuye kwamiselwa amabandla ali-11.”

UMTHANDAZO WAKHE WAPHENDULWA

Kwakucace nakuthathatha ukuba imfundiso yobuthixo ayizange nje ibe yingenelo kubazalwana noodade abatsha kodwa namagqala awayekhonza uYehova ngexesha lokuvalwa komsebenzi angenelwa. UHannu Tanninen uthi: “Kwiimeko ezahlukeneyo sasivakalelwa kukuba sasikhokelwa ziingelosi yaye kwakukho iziganeko ezazisichukumisa ngokwenene. Ngowe-1994 safika kwibandla elitsha elalibizwa ngokuba kuseNovgorod, ngoku eyaziwa ngokuba yiVeliky Novgorod, yaye abazalwana basisa kwindawo esasiza kuhlala kuyo kulo veki. Kweli gumbi liqeshwayo kwakukho udade osele ekhulile ogama linguMaria, owahamba ngezikaTshiwo iikhilomitha ezingama-50 ukuze abekhona kuloo veki. Wayesenyanisweni iminyaka engama-50 yaye umnqweno wakhe yayikukubona umveleli wesiphaluka wokuqala emva kokuvulwa komsebenzi. Sambuza ukuba wayifumana njani inyaniso. Wasixelela ukuba xa wayeneminyaka eli-17 ubudala wavalelwa kwinkampu yoxinaniso eJamani yaye kulapho wadibana khona namaNgqina kaYehova. Wayamkela inyaniso waza wabhaptizwa enkampini ngudade owayengumthanjiswa. Ekugqibeleni wakhululwa waza wabuyela eRashiya ukuze ashumayele iindaba ezilungileyo zoBukumkani. Emva kwexesha elithile waye wabanjwa waza wavalelwa entolongweni ngenxa yokushumayela. Wathothoza iminyaka emininzi kwiinkampu ekwakusetyenzwa nzima kuzo zeSoviet.

“Xa wayequkumbela ibali lakhe sachukumiseka gqitha ukuva lo dade uthobekileyo esithi, kwezi veki zimbalwa zidluleyo, ebethandaza kuYehova ecela ukuba ambonise nantoni na esisikhwasilima kwindlela awayemnqula ngayo. Kwangaloo ngokuhlwa ndamchazela ukuba, kwiminyaka emininzi eyadlulayo kwakukho inqaku leMboniselo elithi “Imibuzo Evela Kubafundi” elalixubusha ngombandela othile. Yathi ukuze ubhaptizo lube lolufanelekileyo lwalufanele lwenziwe ngumzalwana. Wakuvuyela kakhulu oko uMaria. Wavakalelwa ukuba yayiphendulwe imithandazo yakhe. Ngoko ke, wavuya ngokwenene ukubhaptizelwa ebhafini. Wabhaptizwa ngowe-1944 emva kweminyaka engama-50 ezahlulele.”

INTLUTHA YOKOMOYA KWIMIMANDLA ENAMAXESHA ALI-11 AWAHLUKENEYO

Ekuqaleni kowe-1991 uncwadi lwaluthunyelwa eRashiya luvela eJamani naseFinland. NgoJulayi 1993 ilori yokuqala eyayisuka eJamani yafika eSolnechnoye, ilayishe iitoni ezingama-20 zoncwadi. Iilori ezisuka eRashiya zazihamba umzila oya eMoscow, eBelarus, naseKazakhstan. Ayekho namagingxigingxi. Ngokomzekelo ukuze abazalwana bathumele uncwadi eKazakhstan, kwakufuneka abazalwana bahambe iikhilomitha ezingama-5 000 ukuya nje kuphela. Babelityaziswa emideni yaye ebusika babebanjezelwa likhephu elivale indlela.

Sithetha nje, eSolnechnoye kuthunyelwa iitoni ezingama-200 zoncwadi nyanga nganye. Abaqhubi baseBheteli baxhakamfula onke amathuba okushumayela kumagosa namajoni asebenza emideni. Amanye awo ayakuthanda ukufunda uncwadi oluxubusha iBhayibhile. Xa kwakuhlolwa impahla yethu, lathi elinye ipolisa lakuphawula ukuba ilori yethu yeyonqulo, lagxeka kwanto ilunqulo. Eli gosa labalisa ngomfundisi owalithuka kanobom ngenxa yokuba lona liye lammisa kuba ophule umthetho wendlela. Abazalwana bamchazela indlela uThixo abaphatha ngayo abantu nangenjongo yakhe ngomhlaba nabantu. Eli polisa lathetha kakuhle laza laba nobuhlobo. Labuza imibuzo baza abazalwana baliphendula besebenzisa iiBhayibhile zabo yaye baba nencoko emnandi nelo polisa. Eli polisa lachukumiseka gqitha laza lathi: “Ndiza kuwafuna amaNgqina ndize ndiqhubeke nale ncoko.”

Ngowe-1995 ukusa kowama-2001, amabandla aseVladivostok akwiMpuma Ekude ayefumana uncwadi lwawo kwisebe laseJapan. Ukusuka apho abazalwana bebethumela uncwadi ngenqanawa kumabandla aseKamchatka. Abazalwana baseVladivostok baqhelana noomatiloshe bezi nqanawa zazisiya eKamchatka. Omnye umatiloshe wavuma ukuhambisa uncwadi lwethu ngaphandle kwentlawulo yaye wayede ancedise naxa lulayishwa. Wathi kwaba bazalwana: “Nangona ndingelokholwa, ndifuna ukwenza umsebenzi omhle. Ndiyanithanda bantundini yaye ndiyayithanda indlela enilungelelelene ngayo. Xa ndifika ezibukweni andilityaziswa ekothuleni uncwadi. Nina nifana neentaka; ngokukhawuleza nithabatha iibhokisi zoncwadi nize nihambe nazo.”

ULWANDO LUBANGELA INTSWELO

Kangangeminyaka uhlelo lweMboniselo yesiRashiya eyayiphuma kanye ngenyanga yayinamaphepha ali-16 ishicilelwa ngephepha elikhudlwana kunelo silisebenzisayo. Onke amanqaku afundisiswayo ayeguqulelwa kwisiRashiya yaye ayethunyelwa kubazalwana baseSoviet Union kodwa ephuma emva kwexesha elide kupapashwe awesiNgesi. Amanqaku afundisiswayo ayelibaziseka kangangeenyanga ezintathu ukusa kwiminyaka emibini, yaye amanqaku angafundisiswayo ayelandela emva kwexesha elide nangakumbi. Ukususela ngowe-1981 iMboniselo yesiRashiya yayipapashwa kanye ngenyanga inamaphepha angama-24, kodwa ukususela ngowe-1985 yapapashwa kabini ngenyanga. Inkupho kaJuni 1, 1990 yaba yeyokuqala eyashicilelwa ngemibala emine, enamaphepha angama-32 neyapapashwa ngaxesha linye neyesiNgesi.

UTanja ongumguquleli uthi: “Indlela yokuguqulela iinkupho zokuqala, siyazi ukuba yayingavakali yaye ifundeka nzima. Kodwa kuphela kwendlela esasinokuguqulela ngayo ngelo xesha. Yayikukutya kokomoya okwakufuneka ngelo xesha.”

Ukuvulwa komsebenzi kumazwe awayefudula ephantsi kweSoviet Union kwavulela ithuba lokuba uncwadi lwethu lusasazwe nakuloo mazwe. Abaguquleli besiRashiya ababesebenza eJamani babekulangazelela ukusinceda. Zimbini izinto ezaphucula umgangatho wethu wokuguqulela. Eyokuqala, abazalwana baseRashiya naseUkraine bakuvuyela ukuya kwisebe laseJamani ukuze baqeqeshwe njengabaguquleli. Abahlanu kubo bafika ngoSeptemba 27, 1991 kwaza kwalandela abanye kamva. Abaguquleli baseRashiya bahlengahlengiswa. Olu hlengahlengiso lwalunamahlandinyuka. Kwimeko yabo ‘umthi nelitye’ azizange zibe yigolide ngokuqhwanyaza kweliso, kodwa kwafuneka bachankcathe kuwo onke amanqanaba achazwe kuIsaya 60:17.

Okwesibini abaguquleli baseRashiya bancedwa liSebe Leenkqubo Zokuguqulela elalisandul’ ukusekwa. Kwaqhutywa isikolo sokuqeqesha abaguquleli esasikwisebe laseJamani ngethuba abazalwana noodade bokuqala baseRashiya abafika ngalo eSelters, eJamani.

Ukuze kuguqulelwe ngendlela esemgangathweni kufuneka lo msebenzi wenziwe kwilizwe elithetha olo lwimi. Yaba luchulumanco ngoJanuwari 1994, xa abaguquleli besiRashiya bafulathela elaseJamani besiya kwiBheteli eyayisakhiwa eSolnechnoye.

Kwakubuhlungu ukwahlukana nabazalwana ababeguqulela kangangamashumi eminyaka ngoxa umsebenzi wawuvaliwe kodwa ngenxa yeemeko abazange bakwazi ukubuyela eRashiya. Iqela labaguquleli labazalwana noodade abali-17 nabazalwana ababini ababeza kuba ngoovulindlela abakhethekileyo bemka bentywizisa eSelters ngeCawa, ngoJanuwari 23, 1994.

“ NDINGUTHIXO KWISIGULANA”

Kangangeminyaka eminizi eRashiya oogqirha nabasebenzi bezamayeza imbono zabo zonqulo babezisekele kwimfundiso yokungakholelwa kuThixo nakwinkqubo yokunyanga esebenzisa igazi eyayiqhelekile kwiSoviet. Ngoko ke, xa amaNgqina kaYehova efuna ukunyangwa ngaphandle kwegazi, oogqirha babesiba mathidala bade babekrwada.

Oogqirha babedla ngokuthi, “Mna ndinguThixo kwisigulana.” Ukuba asivumelani neso sigqibo isigulana sasikhutshwa esibhedlele ngoko nangoko. Ngaphezu koko, ukuma kwamaNgqina okusekelwe eBhayibhileni malunga notofelo-gazi kwakudla ngokusetyenziswa ngabachasi ukuze kuvalwe umsebenzi eRashiya.

Ngowe-1995 kwisebe laseRashiya kwamiselwa, iOfisi yeNkcazelo ngeziBhedlele eyayiza kusebenza namagosa ezempilo ukuze idlulisele inkcazelo echanileyo ngembono yamaNgqina kaYehova. Kwaqhutywa izikolo nabadala ababemela iiKomiti Zokunxibelelana neziBhedlele ezingama-60 ukuze bafundiswe indlela yokucacisela oogqirha ngendlela yokunyanga amaNgqina kaYehova ngaphandle kwegazi.

EMoscow ngowe-1998, oogqirha baseRashiya noogxa babo ababesuka mbombo zone zomhlaba babamba iingqungquthela eyayinomxholo othi: “Ezinye Iindlela Zokutyanda Ngaphandle Kwegazi,” yayiyeyokuqala le ngqungquthela eRashiya. Kule ngqungquthela kweza oogqirha abangaphezu kwama-500 ababesuka kuyo yonke imimandla yaseRashiya. Phakathi kowe-1998 nowama-2002 oogqirha baseRashiya babesele benolwazi oluphangaleleyo ukuze baqhube ezi ngqungquthela nakwezinye izixeko ezikhulu zaseRashiya. Ezi ngqungquthela zaba nemiphumo emihle.

UGqr. A. I. Vorobyov, owayesakuba ngumphathiswa wezempilo nentloko kwisebe lehematology eRashiya, wabhala ileta eyayisiya kumagqwetha awayekhusela amalungelo ezigulana ezingamaNgqina, wathi xa oogqirha bewuqwalasela ngokutsha umcimbi wotofelo-gazi “umlinganiselo woomama abafa bebeleka kwilizwe lethu uye wancipha ngama-34 ekhulwini.” Esi sinxiba mxhaka saleka umsundulo ngelithi: “Ngaphambi koku, inkqubo yethu yezonyango yayinikela ingxelo yokuba umlinganiselo wokufa koomama ababelekayo eYuruphu ubuwuphindaphinda kasibhozo lo mlinganiselo ngenxa yokuba ababelekisi babetofela oomama igazi ngokungeyomfuneko.”

Ngowama-2001 umphathiswa weZempilo kuManyano lwaseRashiya wathumela imiyalelo kumaziko ezempilo kulo lonke ilizwe. Le miyalelo yayisithi isigulana sinelungelo lokwala utofelo-gazi ngenxa yonqulo yaye oogqirha bafanele basihlonele eso sigqibo. Ngowama-2002 umphathiswa wezempilo wakhulula isindululo esasinomxholo othi Instructions on the Use of Blood Components. Esi sindululo sathi igazi linokutofelwa kuphela xa isigulana sinento ebhaliweyo egunyazisayo. Kwakhona esi sindululo sabonisa ukuba, ukuba izigulana ziyala ukunyangwa ngokutofelwa igazi ngenxa yonqulo lwazo kufanele kusetyenziswe ezinye iindlela zonyango.

Oogqirha abaninzi baye bayitshintsha indlela abakujonga ngayo ukusetyenziswa kwegazi emva kokuba beye badibana nabameli beOfisi Yenkcazelo ngeziBhedlele. Omnye umtyandi wathi: “Ndive ngani nangezigulana ezingamaNgqina ukuba ukwala kwenu ukutofelwa igazi kusekelwe kumthetho weBhayibhile. Ndigqibe ekubeni ndikhe ndiwuphande lo mba. Ndizifunde zonke iindinyana zeBhayibhile ezikuncwadi ebenindinike lona. Emva kokucingisisa nzulu ndifikelele kwisigqibo sokuba ukuma kwenu kusekelwe eBhayibhileni ngokwenene. Kodwa kutheni abefundisi bethu bengasixeleli ezi zinto? Ngoku xa lo mbandela uphinda uvela kwakhona, ndixelela abanye oogqirha ukuba amaNgqina athobela iBhayibhile.” Namhlanje eRashiya oogqirha abangaphezu kwama-2 000 banyanga izigulana ezingamaNgqina ngaphandle kwegazi.

UKUKHONZA NGOVUYO KWIZABELO ZABO

UArno noSonja Tüngler, abaphumelela kwiSikolo saseGiliyadi esasiqhutyelwa eJamani, baye bakhonza kwizixeko ezahlukahlukeneyo zaseRashiya ukususela ngo-Oktobha 1993. Umsebenzi kaYehova uye wanenkqubela ukusa kuwuphi umlinganiselo kwintsimi ababekuyo? Khawuve njengokuba besibalisela amava abo.

UArno uthi: “Emva kweeveki ezimbalwa sifikile kwisabelo sethu eMoscow sanikela iintetho yethu yokuqala kwiSikolo Sobulungiseleli Sobuthixo. Emva kweeveki ezintandathu ndanikela intetho yokuqala endibanweni. Sabelwa kwibandla elinabavakalisi ababhaptiziweyo abali-140, intsimi yeli bandla yayilingana nesiphaluka saseJamani! Intsimi yethu yokuqala yayikufutshane nendawo esasihlala kuyo. Yayibangel’ imincili into yokuba sibe ngamaNgqina okuqala ukungen’ indlu ngendlu kuloo mmandla!

USonja uthi: “Nangona sasingasazi kakuhle isiRashiya, ngamanye amaxesha sasishumayela esitratweni sihamba sedwa, sithetha nabantu, sibahambisela amaphecana noncwadi. Abazalwana noodade basekuhlaleni babesixhasa yaye kwakulula ukubacela ukuze siye nabo entsimini. Babenobubele, benomonde yaye besiyeka sithethe ngeso siRashiya sethu sophukileyo. Abaninimzi nabo babenomonde. ISoviet Union yayiyingqushu yaye abantu babelufuna ngamehlo abomvu unqulo.”

UArno walek’ umsundulu esithi: “Eyona nto yayisinceda ukuze sifunde isiRashiya yayikukushumayela kwindlu ngendlu nokuqhuba izifundo zeBhayibhile. NgoJanuwari 1994 sasisele sineenyanga ezine siseRashiya, sasiqhuba izifundo zeBhayibhile ezingama-22 ngaloo ndlela sasinamathuba amaninzi okuva nokuthetha isiRashiya.

“Ngelo xesha babebaninzi abantu ababebhaptizwa kwiindibano ezincinane nezinkulu; babesiba lishumi ekhulwini okanye ngaphezulu kwinani labantu abeze endibanweni. Amanye amabandla ayengenabo abadala nezicaka zolungiselelo ezaneleyo. Omnye umdala wayengumveleli owongamelayo wamabandla amahlanu! Wandicela ukuba ndinikele intetho yesikhumbuzo kwelinye lala mabandla. Kweza abantu abangama-804 yaye kwafuneka bakhawuleze baphume kuba kwakuza kungena elinye ibandla. Isithethi esasiza kunikela intetho kwibandla lesibini safumana ingozi yemoto, kwafuneka ndiphinde ndinikele intetho. Kweli ibandla kweza abantu abali-796! Into ethetha ukuba kumabandla nje amabini kweza abantu abali-1 600 eSikhumbuzweni yaye oku kubonisa umdla abantu ababenawo enyanisweni ngelo xesha.”

UYEHOVA ‘UYASIKHAWULEZISA’ ISIVUNO

ELizwini lakhe, uYehova wathembisa ukuba uya ‘kukukhawulezisa’ ukuhlanganisa “izinto ezinqwenelekayo” zakhe. (Isa. 60:22; Hag. 2:7) Ngowe-1980 kwakukho abavakalisi abangama-65 eSt. Petersburg ekwathi nakuba amagosa eKGB ayebabeke phantsi kweliso elibukhali baqhubeka bencokola nabantu beso sixeko ngeBhayibhile. Ngowe-1990 amaNgqina angaphezu kwali-170 ayenikela ubungqina obungacwangciswanga kwizitrato ezahlukahlukeneyo zeso sixeko. NgoMatshi 1991, umsebenzi wamaNgqina wabhaliswa ngokusemthethweni eRashiya yaye ngoko nangoko kwamiselwa amabandla amahlanu. Iindibano zezizwe ngezizwe ezazibanjelwe eSt. Petersburg ngowe-1992 namanye amalungiselelo obuthixo zabangela ulwando olwaphul’ izikeyi. Ngowama-2006, kwakusele kukho amabandla angaphezu kwangama-70.

Ngowe-1995 kwakukho ibandla elinye eAstrakhan engekude kuyaphi kumda waseKazakhstan. Elo bandla lalingenabo abadala nezicaka zolungiselelo. Nakuba kwakunjalo abazalwana babesibanayo indibano yesiphaluka nekhethekileyo yosuku olunye. Iintetho zazinikelwa ngabazalwana ababehamba iikhilomitha ezingama-700 ukusuka eKabardino-Balkaria. Aba bazalwana babengalazi kwangaphambili inani labantu abaza kubhaptizwa kwezo ndibano. URoman Skiba uthi: “Mna nomnye umdala sasifika kwiiveki ezimbini ngaphambi kokuba iqale indibano ukuze siye entsimini nebandla sihlole nabo baza kubhaptizwa. Sasingabi nalo ixesha lokuya entsimini. Ixesha elininzi sasilichitha sihlola abantu abamalunga nama-20 abaza kubhaptizwa!”

Ngowe-1999 eYekaterinburg abazalwana bamemela eSikhumbuzweni iqela labarhwebi ababethengisa emarikeni. Aba barhwebi babuza enoba bangeza nabahlobo babo kusini na. Abamb’ ongezantsi amaNgqina kwakuza abantu abali-100 eSikhumbuzweni! Nangona eli holo laliqashiwe lalilikhulu, kwanyanzeleka ukuba abanye beme ngeenyawo.

ABANTU ABANGAMA-50 ABAQHUTYELWA ISIFUNDO SEBHAYIBHILE

Umsebenzi wokushumayela kwiPhondo laseIvanovo, elikude kufuphi naseMoscow, waqaliswa ngasekupheleni kowe-1991 xa uPavel noAnastasia Dimov bafudukela kulo mmandla. Babenomqobo omkhulu wokushumayela kwintsimi enabemi abangaphezu kwesigidi. Babeza kuyiqala ngaphi le nto? Bagqib’ ekubeni basebenzise indlela elula: badeka itafile yoncwadi. Le tafile yayisembindini wesixeko, ineencwadana ezinemifanekiso, amaphephancwadi neencwadi. Abantu abadlulayo babedla ngokuma yaye uninzi lwabo lwalunomdla. Bonke ababenomdla babemenyelwa kwisifundo seBhayibhile. Kungangenkankulu ukuba singathi ezi yayizizifundo zeBhayibhile kuba zaziqhutyelwa kwiiholo eziqashwayo yaye kwakusiza abantu abangama-50. Ezi zifundo zazifana neentlanganiso zebandla kuba zaziqhutywa ngeempapasho ezimbini. Kwakuqale kufundwe incwadi ethi Unokuphila Ngonaphakade KwiParadesi Esemhlabeni kuze kuxutyushwe nenqaku leMboniselo. Ezi zifundo zaziqhutywa kathathu ngeveki yaye zazithabatha iiyure ezintathu. Zaziqhutywelwa kwiindawo ezahlukahlukeneyo kweso sixeko. Kwingxelo yakhe uPavel wayedla ngokuthi uqhube izifundo ezithathu. Xa wabuzwa isizathu sokuba aqhube izifundo ezimbalwa kangaka ekubeni abavakalisi abaninzi babeqhuba izifundo ezili-10 ukuya kwezingama-20, kwafunyaniswa ukuba kwakubakho abantu abangama-50 kwisifundo ngasinye. Lalicace mhlophe elokuba uYehova wayelisikelela eli lungiselelo kangangokuba kwixesha elingephi uninzi olwalusiza kweso sifundo lwathi lwalunomnqweno wokushumayela iindaba ezilungileyo kwabanye. Ngenye imini emva kokuqhuba isifundo uPavel wenza isaziso sokuba abo babefuna ukuba ngabavakalisi bangasala. Akukho nokuba abe mnye owahambayo bonke baba ngabavakalisi. Zaya zisiba ninzi iitafile ezidekwayo yaye ngokukhawuleza zabakho kwiipaki nakwiindawo zentengiso.

Kwakufanele kuqaliswe ukushumayela kwindlu ngendlu. Kodwa kwakuza kwenzeka njani oku ekubeni kungazange kubekho mvakalisi owakha washumayela ngale ndlela? Abo babefuna ukufunda le ndlela yokushumayela babepheleka isibini sakwaDimov xa sisiya entsimini. Babebaninzi abavakalisi ababefuna ukufunda. Ngesinye isihlandlo uPavel wayehamba nabavakalisi abalishumi. Okumangalisayo kukuba babengothuki abaninimzi yaye babekuvuyela ukuthetha nabantu abaninzi. Abanye babedla ngokulingenisa emakhayeni abo eli qela.

Abavakalisi abatsha babekulangazelela ukushumayela nakwezinye izixeko, kwalungiselelwa ukuba kuye kushunyayelwa kwezinye izixeko zePhondo laseIvanovo. Amaqela abunjwa ngabantu abangama-50 ayeshumayela koololiwe endleleni eya kweso sixeko yaye xa efika kuso ayeshumayela ngababini. Xa babeshumayela kwisakhiwo esihlala abantu babamemela kwiintlanganiso ezaziza kuqhutywa ngobo busuku. Kwezo ntlanganiso babukeliswa iividiyo zamaNgqina kaYehova. Babenikela nentetho. Emva kwentlanganiso bonke abazileyo babebuzwa enoba bangathanda kusini na ukuqhutyelwa isifundo seBhayibhile yaye ababenomdla badlulisela kubazalwana iidilesi zabo. Sibamba ngazibini ngala maphulo kuba ngenxa yawo kwamiselwa amabandla amahlanu kwizixeko ezahlukahlukeneyo zePhondo laseIvanovo.

Ngowe-1994 eIvanovo kuphela kwakukho abavakalisi abali-125 yaye kwakukho abali-1 008 abeza eSikhumbuzweni. Kwangaloo nyaka kwabhaptizwa abangama-62 ababesuka eIvanovo kwindibano yesithili. Kwasekwa ibandla elitsha kusuku nje olunye! Ngoku kwiPhondo laseIvanovo, kukho abavakalisi boBukumkani abamaxhaphetshu ngumsebenzi weNkosi abali-1 800.

UKUHLANGANISANA NANGONA KUKHO INKCASO

Kwizixeko eziliqela kwakungelula ukufumana amabala okuqhuba iindibano. Ngokomzekelo, eNovosibirsk abefundisi babexhasa abachasi, beququzelela imingcelele yabaqhankqalazi eyayisesangweni lebala ekwakuqhutyelwa kulo indibano. Enye ibhodi yayifundeka ngolu hlobo: “Lumkelani amaNgqina kaYehova.” Noko ke, aba baqhankqalazi abazange baqaphele ukuba oonobumba obabini begama lokuqala babethetha ukuba: “Nyamekela amaNgqina kaYehova.”

Ngowe-1998, iinzame zabazalwana zokuqhuba indibano yesiphaluka eOmsk zaphazanyiswa. Ngomzuzu wokugqibela abachasi banyanzelisa amagunya asekuhlaleni ukuba arhoxise isivumelwano sokuqhutywa kwendibano yamaNgqina. Abantu ababeze endibanweni bafika bathi xhonxosholo ecaleni kweholo. Umphathi weholo esoyikisela ubomi bakhe nokonakaliswa kweholo wacela abazalwana ukuba bangabheneli kubundlobongela okanye kwizigalo. Abazalwana bamthomalalisa besithi akukho nokuba abe mnye mntu owayeza kumchukumisa. Abazalwana abeze endibanweni basuka bafotana ukuze bangasilibali esi sihlandlo. Umphathi weholo weyiseka ukuba amaNgqina kaYehova ngabantu abanoxolo. Emva kweeveki ezimbini, kwaqhutywa indibano kwenye iholo. Abachasi bafika sek’ ophulwe baza abakwazi ukuphazamisa.

INDIBANO “NGAPHANTSI KWEENKWENKWEZI”

Enye yeendibano zesithili zentetho yezandla yayiza kuqhutyelwa kwisixeko saseStavropol’ eCaucasia ukususela ngoAgasti 22-24 ngowama-2003. Kweza iindwendwe ezisuka kwizixeko zaseRashiya ezingama-70. Noko ke, indibano yaphantse yarhoxiswa ngenxa yenkcaso yabalawuli besixeko. Ngosuku olungaphambi kwendibano umlawuli warhoxisa isivumelwano sokuqasha iholo. Kodwa ngoAgasti 22 abazalwana benza isivumelwano nomphathi wesekisi ukuba basebenzise elo bala ukuze kuqhutywe indibano.

Ucwangciso lwaqalisa ngentsimbi yesi-3:00 emva kwemini, kodwa ngequbuliso emva kwekhefu, umbane wemka. Iindwendwe zalinda ngomonde ezihlalweni zazo, ucwangciso lwaqhubeka emva kweyure usakuba ubuyiselwe umbane, lwaza lwaphela ngeye-9:30 ebusuku.

Usuku lwesibini lwendibano lwaqala ngokumka kombane ngeye-9:30 kusasa. Akuzange kube kudala aphela namanzi. Abazalwana babeza kuyiqhuba njani indibano ngaphandle kwamanzi nombane? Ngeye-10:50 kusasa, iKomiti Yendibano yagqiba ekubeni ivule yonke iminyango yelo holo, kuba kwakuzole nasebukhweni bezinja. Abazalwana bacinga icebo lokuba bathabathe izipili bazibeke esitratweni ukuze bakhanyise iholo. Nangona abaphulaphuli babesibona isithethi, kodwa isithethi sasingakwazi ukubona amanqaku aso. Basebenzisa ezinye izipili, ukuze bakhanyise isipili esasijinga ngaphakathi kweli holo. Emva koko eli holo lakhanya ngokwaneleyo ukuze isithethi nabaphulaphuli banikele ingqalelo kucwangciso. Yaba yindibano ekhethekileyo eyayiqhutyelwa “ngaphantsi kwenkwenkwezi,” njengoko kwakukhanyisa isipili esasijinga kwelo holo.

Ngokukhawuleza, usodolophu namanye amagosa bagaleleka kweli holo. Bothuka abakholelwa xa bafumanisa ukuba amaNgqina ayeqhubeka nendibano yawo. Eyona nto yawothusa ngakumbi yindlela azaziziphethe ngayo ezo ndwendwe. Akukho namnye kubo owayeqhankqalaza ekhalaza, bonke babephulaphule ngenyameko. Umphathi wamapolisa, owayewathiy’ egazini amaNgqina wachukumiseka gqitha kangangokuba wade wathi, “ngentliziyo ndikunye nani, kodwa siphila kwihlabathi elinganifuniyo.”

La magosa emka, umbane wabuya ngokukhawuleza kwelo holo. Nangona iintsuku ezimbini zalo ndibano zaphela emva kwexesha, iindwendwe zahlala ezihlalweni de yangumthandazo wokuqukumbela. Phezu kwayo nje intshutshiso inani leendwendwe lalintinga suku ngalunye, ngolweSihlanu zazingama-494, ngoMgqibelo zazingama-535 ngeCawa zazingama-611! Kumthandazo wokuqukumbela, kwabulelwa uYehova ngokuvumela ukuba kuqhutywe le ndibano imangalisayo. Iindwendwe zagoduka zichulumancile, zizimisele ngakumbi ukhonza uBawo wasezulwini nokudumisa igama lakhe.

ABANTU ABANGEVAYO BADUMISA UYEHOVA

Phakathi kwamawaka eendwendwe awayekwindibano ekhethekileyo yesithili eyayisePoland ngowe-1990 kwakukho abantu abangevayo. Emva kokufumana ukhuthazo kulo ndibano aba “batyali” bokuqala benza umgudu onyanisekileyo wokushumayela. Ukususela ngowe-1992 le ntsimi yayisele ilungele ukuvunwa yaye ‘isivuno sasiza kuba sikhulu.’ (Mat. 9:37) Ngowe-1997 kwamiselwa ibandla lokuqala lentetho yezandla kwaza kwamiselwa amaqela amaninzi kulo lonke elo lizwe. Ngowama-2002 kwamiselwa isiphaluka sentetho yezandla—esona siphaluka sikhulu ehlabathini lonke. Ngowama-2006 umlinganiselo wabavakalisi kwintsimi yentetho yezandla yayingumvakalisi omnye kubemi abangama-300, ngoxa kwabevayo yayingumvakalisi omnye kubemi abali-1 000.

Kwakufuneka uncwadi oluguqulwe kakuhle lwentetho yezandla. Ngowe-1997 isebe laseRashiya laqalisa ukuguqulela intetho yezandla. UYevdokia omnye udade ongevayo ongumguquleli wentetho yezandla uthi: “Ukukhonza eBheteli nokuguqulela uncwadi lwethu lwentetho yezandla kulilungelo elikhethekileyo. Ehlabathini abantu abangevayo abathenjwa yaye bajongelwa phantsi. Kodwa izinto zahlukile entlanganweni kaThixo. Okokuqala, uYehova ngokwakhe usithembile thina bantu bangevayo ukuba sidlulisele inyaniso ngolwimi lwethu. Okwesibini, asiziva sinedyudyu xa siphakathi kwabantu bakaYehova yaye kuyavuyisa ukuba yinxalenye yale ntsapho inkulu.”

IINDABA EZILUNGILEYO NGAZO ZONKE IILWIMI

IsiRashiya lolona lwimi lusetyenziswayo kwiSoviet Union kwezoshishino nasezikolweni, noko ke kukho ezinye iilwimi ezili-150 ezithethwayo kweli lizwe. Emva kokuba yahlulahlulwe yangamazwe ali-15 ngowe-1991, umdla wokwazi inyaniso uye wakhula ngakumbi kubantu abathetha ezo lwimi kulo mazwe matsha. Ngokuvisisana neSityhilelo 14:6 kuye kwenziwa umgudu okhethekileyo wokufikelela abantu bazo “zonke iintlanga nezizwe neelwimi nabantu” abakule ntsimi inkulu. Oku kuye kwenza ukuba iMboniselo ishicilelwe ngeelwimi ezili-14 ezintsha kwintsimi yesebe laseRashiya ukuze kulungiselelwe ukutya kokomoya kwamawaka abafundi abatsha. Ukuqinisekisa ukuba ukushunyayelwa kweendaba ezilungileyo kuhambela phambili, iofisi yesebe laseRashiya ivelela ukuguqulelwa koncwadi ngeelwimi ezingama-40, ngale ndlela kulungiselelwa ukuba inyaniso yeBhayibhile ifikelele iintliziyo zabantu abangakumbi ngokukhawuleza nangokunzulu kunangaphambili.

Uninzi lwezi lwimi luthethwa kuManyano lweRashiya. Ngokomzekelo, unokuva kuthethwa isiOssetia kwizitrato zaseBeslan yaye eVladikavkaz unokuva isiBuryat esiyelelene kwisiMongolia ulwimi oluthethwa kufutshane neChibi iBaikal; isiYakut lulwimi lweAltaic-Turkic oluthethwa ngabelusi bereindeer nakweminye imimandla ekwiMpuma Ekude yaye kukho nezinye iilwimi ezingama-30 eCaucasia. Olona lwimi luthethwa ngabantu abaninzi ngaphandle kwesiRashiya sisiTatar yaye sithethwa ngabantu abangaphezu kwezigidi ezintlanu ngokukodwa kummandla ekuthiwa yiTatarstan.

Abantu abaninzi abathetha isiTatar bayalwamkela uncwadi lolwimi lwabo nakuba bembalwa abamkela uncwadi lwesiRashiya. Ebudeni bephulo leKingdom News No. 35, elinye ibhinqa elihlala kwindawo esemaphandleni lafumana eli phecana laza labhala ileta lifuna incwadana enemifanekiso ethi Okufunwa NguThixo ngesiTatar. Omnye udade wamthumelela ileta kunye nencwadana enemifanekiso, eli bhinqa laphendula lichulumancile ngenye ileta enamaphepha asibhozo. Ngokukhawuleza laqalisa isifundo seBhayibhile lisebenzisa iimpapasho zesiTatar. Indoda eyafumana incwadana enemifanekiso ethi Ngaba UThixo Usikhathalele yathi iye yamnceda yabona iimeko zehlabathi ngenye indlela. Bekungenakwenzeka oku ngaphandle koncwadi lwesiTatar.

Ibhinqa elithetha isiMari lafumana iKingdom News No. 35. Emva kokuba lilifundile lalifuna ukwazi okungakumbi, kodwa ayengekho amaNgqina kule ndawo isemaphandleni lalihlala kuyo. Ngoxa lalityelele esixekweni ladibana neNgqina likaYehova laza lafumana incwadi ethi Ulwazi nolunye uncwadi lwesiRashiya. Emva kokuzifundela ezi ncwadi lashumayela kummandla elihlala kuwo yaye kungekudala laliqhuba izifundo neqela labantu abanomdla. Leva ukuba kukho indibano ekhethekileyo yosuku olunye eIzhevsk laza lenjenjeya ukuya apho linethemba lokuba laliza kubhaptizwa. Noko ke, ekufikeni kwalo endibanweni lafumanisa ukuba abo bafuna ukubhaptizwa bamele bafundiswe iBhayibhile ngokucokisekileyo yaye abazalwana benza ilungiselelo lokulinceda ngokomoya. Konke oko kungumphumo wokufunda iKingdom News ngolwimi lalo.

EVladikavkaz kwakukho ibandla elinye kuphela lesiOssetia yaye kwiindibano zesiphaluka nezezithili kwakungekho nanye intetho eyayiguqulelwa kwisiOssetia. Noko ke, ngowama-2002 iintetho zaguqulelwa okokuqala kolo lwimi. Babengakwazi nokuzibamba luvuyo abazalwana abathetha isiOssetia. Kwanabo babetyibilika kwisiRashiya bathi ukuva isigidimi soBhayibhile ngolwimi lwabo kuye kwabachukumisa ngokwenene. Oku kuye kwanegalelo ekuncedeni ibandla likhule ngokomoya yaye kwenze abantu abaninzi abathetha isiOssetia baba nomdla enyanisweni. Ngowama-2006 kwalungiselelwa indibano yesiphaluka eOssetia ngesiOssetia okwesihlandlo sokuqala.

Ebudeni botyelelo lwabaveleli abahambahambayo kwidolophana yaseAktash, eAltai malunga nabantu abangama-30 bahlanganisana kwigumbi eliqeshiweyo nakuba eli bandla lalinabavakalisi abambalwa. Wonk’ umntu wayephulaphule intetho yesidlangalala kodwa xa umveleli wesithili wayeza kunikela intetho yakhe yenkonzo isiqingatha sabaphulaphuli semka. Emva kweentlanganiso umveleli wesithili wabuza abazalwana basekuhlaleni isizathu sokuba kumke abantu abaninzi kangaka. Elinye ixhegwazana elithetha isiAltaic laphendula ngesiRashiya esaphukileyo lisithi: “Wenza umsebenzi obalulekileyo kodwa andiyivanga phantse yonke lanto ubuyithetha!” Kutyelelo olwalandelayo lomveleli wesiphaluka kwalungiselelwa itoliki yaye wonk’ umntu waphulaphula ucwangciso.

Kukho abafundi abaninzi abathetha ulwimi lwasemzini abahlala kwisixeko saseVoronezh. Ngowama-2000 isicaka solungiselelo esithetha isiTshayina saququzelela iklasi yokufundisa isiTshayina. AmaNgqina amaninzi asabela kweli khwelo aza emva koko aqalisa ukushumayela kubafundi abathetha isiTshayina. IsiTshayina lulwimi olunzima ngendlela engathethekiyo kodwa abazalwana abazange banikezele. NgoFebruwari 2004, kwaqaliswa isifundo sencwadi sesiTshayina kwesi sixeko. NgoAprili waloo nyaka kwabhaptizwa isifundo seBhayibhile sesiTshayina yaye emva kweenyanga ezimbini kwabhaptizwa esinye. Ngoku esi sifundo sencwadi siqhutywa ngokuthe rhoqo nabantu abanomdla, yaye kuqhutywa izifundo zeBhayibhile ezili-15 ngolu lwimi. Njengokuba iindaba ezilungileyo zifikelela abantu abaninzi kule ntsimi inkulu, isebe laseRashiya lifumana izicelo lize lithumele uncwadi ngeelwimi ezingakumbi.

OOVULINDLELA BAYAQEQESHWA

Kangangeminyaka eliqela eRashiya bekuqhutywa iSikolo Senkonzo Yobuvulindlela. Iklasi nganye yayisiba noovulindlela abangama-20 ukusa kwabangama-30, ubukhulu becala ingoovulindlela basekuhlaleni ekungeyomfuneko ukuba bahambe imigama emide ukuze beze esikolweni. Noko ke, kwakungenjalo xa kwakuqhutywa iklasi yokuqala eRashiya. URoman Skiba uthi: “Ndisasikhumbula kakuhle iSikolo Soovulindlela esasiqhutywa eYekaterinburg ngowe-1996. Kwakukho abazalwana noodade abangama-40. Abanye kwafuneka bahambe imigama emide ephantse ibe ziikhilomitha ezili-1 000 ukuze babekho kwesi sikolo.”

Ukususela ngowe-1997, uSvetlana ebenguvulindlela othe ngxi kwintsimi yabantu abathetha ngezandla. NgoJanuwari 2000 waya kwisikolo soovulindlela sentetho yezandla. Emva kweso sikolo, uSvetlana wabalisa indlela esamnceda ngayo ukuze aphucule inkonzo yakhe nokuze aqonde oko kuthethwa kukuba ngumKristu ekhaya nasebandleni. Lo dade utyatyadula esithi: “Ndiye ndabathanda ngakumbi abanye. Ndiye ndafunda nokubaluleka kokusebenzisana nabazalwana noodade, yaye ngoku ndisamkela lula isiluleko. Indlela endiziqhuba ngayo izifundo iye yaphucuka kakhulu, kaloku ngoku ndifunde ukusebenzisa imizekeliso xa ndifundisa.”

UAlyona unguvulindlela kwisixeko saseKhabarovsk esikwiMpuma Ekude yaye unceda abantu abangevayo ukuze bafunde inyaniso. Ukuze asiphumeze kakuhle isabelo sakhe uAlyona wacela ukuya kwiSikolo Senkonzo Yobuvulindlela sentetho yezandla. Yiyiphi imiqobo awajamelana nayo? UAlyona uthi, “Esona sikolo soovulindlela esasikufutshane sentetho yezandla sasimalunga neekhilomitha ezingama-9 000 ukusuka eKhabarovsk. Ukuze ndibekho kweso sikolo kwafuneka ndihambe ngololiwe iintsuku ezisibhozo nezinye ezisibhozo ukubuya.” Kodwa akazange azisole nakancinane!

Ngaphandle kwezikolo zokunceda abantu abantetho yezandla, ukususela ngowe-1996 ukusa kowama-2006 bekuqhutywa amakhulu eZikolo Zenkonzo Yobuvulindlela eRashiya. Ukuqeqeshwa koovulindlela kuye kwanegalelo kulwando kumsebenzi wokushumayela nasekuncedeni amabandla. UMarcin ngoku ongumveleli wesiphaluka ubalisa esithi: “Ngowe-1995 ndamiselwa njengovulindlela okhethekileyo kwibandla laseKuntsëvo eMoscow. Ndaya kwintetho yesidlangalala nesifundo seMboniselo, kodwa kwakungathi kuqhutywa indibano! Kwakukho abantu abangama-400 kuloo holo. Ngelo xesha kwakukho abavakalisi abangama-300 kwelo bandla. Kungaphelanga neminyaka elishumi sele kumiselwe amabandla alishumi aphuma kwelo bandla!

“Ngoxa ndandikhonza njengomveleli wesiphaluka ebudeni beminyaka yowe-1996 ukusa kowe-1997, ndabona ulwando olwaphul’ izikeyi kweso siphaluka. Ndatyelela ibandla elikwidolophu yaseVolzhskiy, kwiPhondo laseVolgograd ndaza ndabuyela kwakhona emva kweenyanga ezintandathu. Kwakusele kukho abavakalisi abatsha abangama-75 kwelo bandla. Kwakungathi kumiselwe ibandla elitsha! Inzondelelo eyayiboniswa ngaba bavakalisi batsha kunzima ukuyichaza. Kwintlanganiso yenkonzo yasentsimini eyayiqhutyelwa ekhayeni lomzalwana kwakudla ngokuza abantu abangama-80. Abanye babesima kwizinyuko ngenxa yokuba kwakungekho nendawo yokunyathela kwelo khaya.”

ABANTU ABASELULA BAZUKISA UYEHOVA

Phezu kwayo nje inkcaso yabazali babo abantu abaninzi abaselula banomdla kwisigidimi soBukumkani. Omnye udade oneminyaka engama-20 ubudala ubalisa esithi: “Ngowe-1995 xa ndandineminyaka esithoba ubudala amaNgqina kaYehova ashumayeza abazali bam, kodwa abazange bayamkele inyaniso. Ndandinomdla wokwazi okungakumbi ngoThixo. Okuvuyisayo kukuba, omnye umhlobo wam endandifunda naye wayefunda iBhayibhile namaNgqina, nam ndafunda kunye nabo. Xa abazali bam bafumanisa ukuba ndifunda iBhayibhile bandalela ukuba ndinxulumane namaNgqina. Ngamanye amaxesha babenditshixel’ endlwini ukuze ndingayi ukuya kufunda iBhayibhile. Le nto yenzeka de nam ndazimela. Ndemka ekhaya ukuya kufunda kwesinye isixeko yaye ndafuna amaNgqina apho. Yandivuyisa gqitha into yokuphinda ndifunde iBhayibhile! Ndamthanda uYehova ngentliziyo yam yonke ndaza ndabhaptizwa kwindibano yesithili yowama-2005. Emva kokuba ndibhaptiziwe ndaba nguvulindlela ongumncedani. Ngoku abazali bam banomdla kule nto ibisoloko ixabisekile kum ukususela ebuntwaneni.”

Omnye udade ubalisa la mava: “Ngowe-1997 xa ndandineminyaka eli-15 ubudala, amaNgqina andihambisela uVukani! Ndasuka ndalithanda eli phephancwadi yaye ndandifuna ukulifumana rhoqo. Akulibona utata eli phephancwadi wawalela ukuba amaNgqina angene ekhaya. Emva kwexesha elithile, umzala wam wafunda iBhayibhile namaNgqina kaYehova yaye ngasekuqaleni kowama-2002 ndaya kwiintlanganiso eHolweni YoBukumkani ndihamba naye. Apho ndeva ukuba amanye amaNgqina kaYehova ngabavangeli basemazweni yaye ndaba nomnqweno onamandla wokunceda abanye bafunde ngoThixo. Kodwa umzala wam wathi kufuneka kuqala ndiyeke ukutshaya, ndiphile ngokuvisisana nokuthanda kukaThixo ndize ndibe ngumkhonzi wakhe. Ndalamkela elo cebiso yaye emva kweenyanga ezintandathu ndabhaptizwa ndaza ngoko nangoko ndaba nguvulindlela ongumncedani. Indivuyisa kakhulu into yokuba ndiphila ubomi obunenjongo.”

UKUFUNA “IZINTO EZINQWENELEKAYO” ESAKHA

Esinye isiphaluka siquka iPhondo leAmur nayo yonke ingingqi yeSakha. Ebudeni bonyaka wenkonzo wama-2005, yayisisihlandlo sokuqala ngqa ukuba kuqhutywe indibano yesiphaluka nekhethekileyo yosuku olunye eYakutsk, ikomkhulu laseSakha. Kwakuvuyisa ngokwenene ukubona abantu bomthonyama kwezo ndibano.

Ukwenzela ingenelo yabeze endibanweni, isiphaluka sahlulwa saba ngamacandelo amahlanu, ngalinye linendibano yalo. Kubaveleli abahambahambayo ukusuka kwenye indibano ukuya kwenye kwakuthabatha iiyure ezingama-24 ngololiwe, uhambe ngemoto iiyure ezili-15 uze uhambe ngeenqwelo-moya ezimbini iiyure ezintathu.

Ubusika kule ngingqi buqhaqhazelis’ amazinyo, amaqondo okubanda afikelela ngaphantsi kweqondo lomkhenkce ngama-50 ngokukaCelsius. Nakuba kunjalo abavakalisi basekuhlaleni abashumayeli nje kwizakhiwo ezikhulu kodwa bashumayela nakwindlu ngendlu.

Ngowama-2005 kwamiselwa amaqela abavakalisi amabini. Elinye iqela lalikwidolophana yaseKhayyr, emalunga neekhilomitha ezingama-80 ukusuka kunxweme loLwandle lwaseLaptev ngasentla kweArctic Circle. Kule dolophana kukho abemi abangama-500 namaNgqina amane. Ngowama-2004 eSikhumbuzweni kwakuze abantu abangama-76. Ukuze umveleli wesiphaluka atyelele eli qela ufanele ahambe ngenqwelo-moya iikhilomitha ezingama-900, aze ahambe iikhilomitha ezingaphezu kwama-450 ngemoto kwiindlela ezigqunywe likhephu.

Elinye iqela lalimiselwe kwidolophana esemagqagaleni eUst’-Nera, iikhilomitha elizili-100 ukusuka eOymyakon. Ebusika amaqondo okubanda kule ngingqi ayehla abe ngaphantsi kweqondo lomkhenkce ngama-60 ngokukaCelsius. Ukuze baye kwindibano yesiphaluka kunyaka odluleyo abavakalisi baye bahamba ngeemoto ezimbini. Kuye kwafuneka bahambe iikhilomitha ezingama-2 000 ukuya nje kuphela, behamba emagqagaleni nakwimimandla ekwanti nengqele izenzela ifikelela ngaphantsi kweqondo lomkhenkce ngama-50 ngokukaCelsius.

Omnye umveleli wesiphaluka ubalisa amava abangel’ umdla awenzeka kwindawo emalunga neemitha ezingama-4 000 ukuphakama ngaphezu kolwandle. Uthi: “Ebudeni bephulo lokuhanjiswa kwencwadana enemifanekiso ethi Hlalani Nilindile! kwabakho ungcelele lweendibano kwisiphaluka sethu. Mna nomveleli wesithili sasihamba ngenqwelo-moya ukuya kwenye indibano. Ngelishwa, saphelelwa yiloo ncwadana sasiyihambisa kwelo phulo ngoko ke, sanika umntu owayesebenza kule nqwelo-moya incwadana enemifanekiso ethi Yintoni UThixo Ayifunayo Kuthi? Eli bhinqa lathi sele lilufumene olunye uncwadi lweBhayibhile sabamb’ ongezantsi xa lasibonisa incwadana ethi Hlalani Nilindile! Kwasivuyisa kakhulu ukubona indlela abazalwana bethu ababexakeke ngayo beshumayela. Njengokuba sincokola umncedisi womqhubi wenqwelo-moya wadlula. Waba nomdla, waza wathelela incoko yethu yaye sancokola de saya kufika apho sasisiya khona. Emva kwaloo ncoko wathabatha amaphephancwadi aliqela ukuze anike abanye abasebenza kule nqwelo-moya.

IINDABA EZILUNGILEYO ZIFIKELELA ESAKHALIN

ISakhalin, ingasentla kwesiqithi saseJapan esibizwa ngokuba yiHokkaido, amaNgqina aqala ukushumayela apha ngasekupheleni kweminyaka yee-1970. Abazalwana baseVladivostok ababevelela umsebenzi wokushumayela kuloo ngingqi, bakhuthaza uSergey Sagin ukuba andise inkonzo yakhe aze afudukele kwesi siqithi ukuze ashumayele kubemi balapho. Emva kokusebenza kwizibuko lalapho, uSergey wancokola nabantu awayesebenza nabo ngeBhayibhile. Ngokukhawuleza wayesele eqhuba izifundo zeBhayibhile eziliqela. Nakuba uSergey kwanyanzeleka ukuba asifulathele eso siqithi, ekugqibeleni imbewu yenyaniso yavelisa isiqhamo.

Kwiindibano zasePoland zangowe-1989 nowe-1990 kwakhuthazwa amaNgqina amaninzi aseRashiya ukuba andise inkonzo yawo aze afudukele apho kukho imfuneko enkulu khona. Ngowe-1990, uSergey noGalina Averin bafuduka eKhabarovsk, kwiMpuma Ekude baza baya eSakhalin kwisixeko esibizwa ngokuba yiKorsakov. Emva kweenyanga ezimbalwa, oovulindlela ababini nabavakalisi abaliqela bafudukela eYuzhno-Sakhalinsk yaye apho kwakukho iNgqina elinye.

UPavel Sivulsky, unyana kaPavel Sivulsky okhankanywe ngaphambilana, omnye woovulindlela ababini nokhonza eBheteli ngoku, usibalisela oku: “Mna nomnye umzalwana ukufika kwethu eYuzhno-Sakhalinsk ekubeni sasingekayifumani indawo yokuhlala sasihlala ehotele. Saqalisa ukushumayela kwindlu ngendlu kufutshane nehotele yaye ebudeni bencoko yethu sasidla ngokubuza enoba kukho umntu oqeshisa ngendawo yokuhlala. Sasidibana nabantu ababesibuza enoba sasinokuqhubeka na ngencoko yeBhayibhile, kodwa sasibaxelela ukuba sasihlala ehotele yaye ukuba nje sasinokufumana indawo yokuhlala sasiza kubamema. Sathandaza kuYehova sicela ukuba asincede sifumane indawo yokuhlala nomsebenzi. UYehova wayiphendula imithandazo yethu. Safumana indawo yokuhlala nomsebenzi. Elinye inenekazi lasimema ukuba sihlale kunye nalo. Eli bhinqa lalingasihlawulisi irenti, lisiphekela nto leyo yayisenza sibe nexesha elaneleyo entsimini. UYehova wasibonisa ukuba wayekunye nathi. Ngokukhawuleza sasiqhuba izifundo zeBhayibhile yaye salungiselela amaqela ezifundo zencwadi. Emva kweenyanga ezimbini, sasirenta indlu siqhubela iintlanganiso kuyo.”

Njengokuba ibandla lalikhula abavakalisi abaninzi baba ngoovulindlela. Babonisa umoya wobuvulindlela ngokufudukela kweminye imimandla yesiqithi ukuze basasaze inyaniso kubemi balapho. UYehova walisikelela ngokuyintabalala elo bandla lalikhula ngendlela engummangaliso, yaye emva kweminyaka emithathu ngowe-1993, kwakusele kukho amabandla asibhozo kuloo mmandla.

Ekuhambeni kwexesha, abavakalisi abaninzi basishiya esi siqithi ngenxa yemeko yezoqoqosho nangenxa yokwandisa inkonzo yabo. Ngendlela efanayo, imigudu yabo yasikelelwa ngolwando. Namhlanje kukho iHolo YoBukumkani ethi ndijonge kumbindi wedolophu yaseYuzhno-Sakhalinsk yaye isiphaluka esikwesi siqithi sinamabandla alithoba namaqela abavakalisi amane.

NAKUBA KUKHO ABACHASI ABANINZI, UMNYANGO UVULEKILE

Kwinkulungwane yokuqala umpostile uPawulos wathi: “Kuba ndivulelwe umnyango omkhulu okhokelela emsebenzini, kodwa kukho abachasi abaninzi. (1 Kor. 16:9) Emva kweminyaka engamawaka amabini, inani labachasi alikhange linciphe. Ukususela ngowe-1995 ukuya kuthi ga ngowe-1998, iofisi eyintloko yomtshutshisi iye yatyabeka amaNgqina kaYehova ngezityholo ezibubuvuvu izihlandlo ezine. AmaNgqina kaYehova ayetyholwa ngokuba ayenenzondelelo yempambano ngonqulo, echitha iintsapho, enxamnye norhulumente yaye enyhasha amalungelo abanye abantu. Xa ezo zityholo zabonakala ukuba azinasihlahla, ngowe-1998, amaNgqina aphinda amangalelwa kwangezo zityholo.

Emva konyaka, isebe lezobulungisa lavuma ukuphinda liwabhalise amaNgqina kaYehova eRashiya, licacelwe mhlophe ukuba amaNgqina kaYehova noncwadi lwabo alukhuthazi ukuthiya ezinye iinkonzo, ukuchitha iintsapho nokunyhasha amalungelo abanye abantu. Nakuba kunjalo iofisi yomtshutshisi yaphinda yawamangalela ngezityholo ezifanayo!

Bambi oonjingalwazi bezakwalizwi baqonda ukuba iinkolelo zamaNgqina kaYehova zisekelwe eBhayibhileni. UGqr. N. S. Gordienko, ongunjingalwazi wezifundo zakwalizwi kwiYunivesithi YasePedagogical eSt. Petersburg kwiphondo laseHerzen, uthi: “Xa iinkcuba-buchopho zimangalela amaNgqina kaYehova ngeemfundiso zawo, aziqondi ukuba eneneni zimangalela iBhayibhile.”

Noko ke, iNkundla YesiXeko SaseMoscow yayifuna ukuba angabonwa nangetshengele amaNgqina kaYehova eMoscow. Phofu, oku akubathinteli abazalwana bethu ekuzalisekiseni umyalelo weBhayibhile wokuba kushunyayelwe iindaba ezilungileyo kwabanye. AmaNgqina kaYehova eyisekile ukuba abemi baseMoscow kufuneka bazigqibele ngokwabo ngeenkolelo zonqulo. Ukunyhashwa kwelo lungelo kukuhluthwa inkululeko yabo bonke abemi baseMoscow. Ngoko ke, amaNgqina aseMoscow, aza kuqhubeka nokuzalisekisa umyalelo kaYesu Kristu wokuba kushunyayelwe kuze kwenziwe abafundi. (Mat. 28:19, 20) Sithethanje Inkundla Yamalungelo Abantu YaseYurophu ihlola isigqibo seNkundla YesiXeko SaseMoscow.

NgoSeptemba 1998, xa kwaqaliswa ukuphulaphulwa kwesimangalo nxamnye namaNgqina kaYehova eMoscow, kwakukho amabandla angama-43 kweso sixeko. Kwiminyaka esibhozo kamva kwabakho amabandla angama-93! UYehova wathembisa abantu bakhe wathi: “Nasiphi na isixhobo esiya kuyilwa nxamnye nawe asiyi kuphumelela.” (Isa. 54:17) Ngowama-2007, amaNgqina kaYehova ebenendibano yesithili eMoscow kwiBala Lemidlalo iLuzhniki, nelakhe laba nemidlalo yeOlimpiki. Le ndibano ibinabantu abangama- 29 040, yaye kubhaptizwe abangama-655.

LIKHULU IGAMA LIKATHIXO ERASHIYA

Kanye njengokuba kubhaliwe kuMalaki 1:11, uYehova wathi: “Ukususela ekuphumeni kwelanga kuse ekutshoneni kwalo igama lam liya kuba likhulu phakathi kweentlanga.” Suku ngalunye kuphuma ilanga kukho ithemba lokufumana omnye umntu obumvu kweli lizwe likhulu kunene. Kunyaka wenkonzo ophelileyo, kuye kwabhaptizwa abantu abangaphezu kwamawaka asixhenxe eRashiya. Alinakuphikiswa elokuba uKumkani wooKumkani (iCzar yeeCzar ngokutsho kweBhayibhile yesiRashiya) ukunye nabalandeli bakhe njengoko besenza lo msebenzi.—Mat. 24:14; ISityhi. 19:16.

Umpostile uPetros wathi: “Imini kaYehova iya kuza njengesela.” (2 Pet. 3:10) Ngoko ke, abantu bakaYehova eRashiya bazimisele ukusebenzisa ixesha eliseleyo ukuze bafune abantu abanotyekelo olufanelekileyo kuzo zonke iintlanga, izizwe, iilwimi nabantu.

[Umbhalo osemazantsi]

[Amagama acatshulweyo akwiphepha 110]

“Ukuba nanibulele umntu okanye naphalaza igazi, ngekukudala sanithumela kwantsonganyawana nonke”

[Amagama acatshulweyo akwiphepha 128]

“Ukuba siya kukhulula, abantu abaninzi baya kunilandela. Yiloo nto isenza sicinge ukuba niyingozi.”

[Amagama acatshulweyo akwiphepha 219]

“Nina nifana neentaka; ngokukhawuleza nithabatha iibhokisi zoncwadi nize nihambe nazo”

[Ibhokisi/Umfanekiso okwiphepha 69]

Kunjani ESiberia?

Yintoni ethi qatha engqondweni yakho xa ucinga ngeSiberia? Ngaba ucinga ngentlango esemagqagaleni nenobusika obuqhaqhazelis’ amazinyo? Ngaba ucinga ngelizwe elibharhileyo, indawo ekuthinjwa kuyo abantu abangquzulana norhulumente waseSoviet? Usenokuba uchan’ ucwethe kodwa ikhona into ongayaziyo ngeSiberia.

ISiberia ngummandla omkhulu ngaphezu kweKhanada, lilizwe lesibini ngobukhulu emhlabeni. Namhlanje iSiberia igubungela ummandla ongaphezu kwezikwekhilomitha ezi-13 000 000, ukususela kwiiNtaba zeUral kwimpuma yoLwandlekazi iPasifiki nokususela eMongolia naseTshayina kumntla woLwandlekazi iArtic. Eli lizwe linobuncwane obuninzi bemvelo—njengemithi yamaplanga, ioli negesi. Kukho udederhu lweentaba, amathafa, imigxobhozo, amachibi nemilambo emikhulu.

Kangangenkulungwane enesiqingatha, eSiberia bekuvalelwa abantu, banyanzelwe ukuba benze umsebenzi othile baze bathinjwe. Ebudeni beminyaka yee-1930 neye-1940, uJoseph Stalin wathumela abaninzi ukuba baye kusebenza kwiinkampu ezazilapho. Ngowe-1949 nangowe-1951 amaNgqina kaYehova amalunga nama-9 000 asuka eMoldova, kumazwana aseBaltic naseUkraine agxothelwa eSiberia.

[Ibhokisi/Imifanekiso ekwiphepha 72, 73]

Amagqabantshintshi

Ukuma komhlaba

IRashiya lelona lizwe likhulu ehlabathini. Ukusuka empuma ukuya entshona igubungela iikhilomitha ezingama-7 700, ukusuka emntla ukuya emzantsi ziikhilomitha ezingama-3 000 yaye ummandla uwonke ziikhilomitha ezizi-17 075 400. Okumangalisayo kukuba igubungela iindawo ezinamaxesha ahlukahlukeneyo ezili-11 yaye ifikelela phantse isiqingatha soMntla weIkweyitha. Kukho intaba ephakamileyo, umlambokazi waseYurophu nelona chibi linzulu emhlabeni.

Abantu balapha

AmaRashiya amalunga nama-80 ekhulwini. Noko ke, kukho nezinye izizwe ezingaphezu kwama-70 ezihlala apho. Ezinye zezi zizwe ngabantu nje abangamawaka ambalwa yaye ezinye zingaphezu kwesigidi.

Ulwimi lwabo

Ulwimi olusemthethweni kweli lizwe sisiRashiya yaye phantse bonke abemi balapho bathetha sona. Ukongezelela, zingaphezu kwe-100 ezinye iilwimi ezithethwayo, ezinye zilulwimi lweenkobe kubantu abaphantse babe sisigidi.

Imeko yezoqoqosho

IRashiya lelona lizwe linkqenkqeza phambili emhlabeni ngokuvelisa ioli negesi. Eminye imizi-mveliso emikhulu iquka amahlathi nokuveliswa kwezinye izinto ezahlukahlukeneyo.

Ukutya kwabo

Ukutya okunentswane okwenziwa ngenyama, intlanzi, ikhaphetshu kutyiwa nesonka, iitapile nebuckwheat. Ukutya kwaseRashiya kunamafutha necarbohydrates ezibanik’ amandla okunyamezela ubusika obubandayo. Isidlo salapho esiqhelekileyo yipelmeni (isonka esiphekwa nenyama) sityiwa nesuphu okanye siqatywe ucwambu okanye ipiroshki (ipastries ezincinane) zityiwe ngekhaphetshu, inyama, itshizi okanye ipotato filling. Iisuphu ezithandwayo yisuphu eyenziwe ngebeet neyenziwe ngekhaphetshu.

Imozulu

Ehlotyeni, liqhats’ ubhobhoyi, ebusika kukhawuleza kube mnyama yaye kuyabanda. Awona maxesha onyaka ahlal’ ixesh’ elide lihlobo nobusika kuba intlakohlaza nokwindla zikhawuleza zidlule.

(Iimaphu zaseRashiya kwiphepha 116 ukusa kwiphepha 117)

[Imifanekiso]

IKremlin

Intaba iEl’brus, eKabardino-Balkaria

Ibhere enombala omdaka, kwincam yeKamchatka

[Ibhokisi ekwiphepha 92, 93]

Wayesephulweni Lokuwatshintsha

Urhulumente waseSoviet akazange afune ukuwacim’ igama amaNgqina. Wayefun’ ukuwaguqula, ngokuweyisela okanye awanyanzele ngengcamango zamaSoviet. Ukuze afeze oku, waqesha iKGB—umbutho karhulumente weentlola nokhuseleko. Nazi ezinye iindlela eyazisebenzisayo.

Yayigqogqa: Yayizigqogqa emini nasebusuku izindlu zamaNgqina. Ezinye iintsapho zazinyanzelwa ukuba zifuduke ngenxa yokuba babequqa bebuyelela ukuza kugqogqa.

Yayibab’ ekesweni: Yayikwenza oku ngezixhobo zokuqokelela inkcazelo, ngokubathintela ukuba bangathumeli izinto nangokubeka izixhobo zokuphulaphula emakhayeni abazalwana.

Yayibahlawulisa ize ibaphazamise xa bekwiintlanganiso: Kulo lonke eli lizwe, amagunya asekuhlaleni ayezibek’ esweni iindawo abazalwana abesiba neentlanganiso kuzo. Bonke abezileyo babehlawuliswa isiqingatha okanye ngaphezulu kumvuzo wabo abawufumana inyanga nenyanga.

Ukunyotywa nezisongelo: IKGB yathembisa amanye amaNgqina izindlu kumbindi weMoscow kwaneemoto ukuba nje anokusebenzisana nayo. Kangangezihlando ezininzi, abazalwana bachazelwa ukuba, ukuba abasebenzisani neKGB babeza kugwetywa iminyaka emininzi bekwiinkampu ekusetyenzwa nzima kuzo.

Ubuxoki: Iifilimu, umabonwakude namaphephandaba achaza amaNgqina njengabantu abayingozi kwibutho labantu. Ezintolongweni nasezinkampini kwakugxekwa abazalwana kusithiwa basebenzisa iBhayibhile ekugayeni ivoti. Obo buxoki bakhokelela kwikhethe; ootitshala bababenika amanqaku aphantsi abantwana bamaNgqina yaye abaqeshi babengabaniki abazalwana izinto abanelungelo lazo njengekhefu.

Baba ngoontamnani: Abameli beKGB bazenza ngathi banomdla wokufund’ iBhayibhile namaNgqina kaYehova yaye babhaptizwa. Abanye bade baba neembopheleleko ebandleni. Usukelo lwabo yayikukuthintela umsebenzi wokushumayela, ukwenza abanye babe nesikrokro neyantlukwano phakathi kwamaNgqina.

Ukugxothwa: AmaNgqina ayethunyelwa kwiindawo ezisemagqagaleni zelo lizwe. Abazalwana babephila nzima apho, besebenza iiyure ezili-12 ngemini. Ubusika balapho babuqhaqhazelis’ amazinyo; ehlotyeni babetyiwa ziingcongconi nazizibawu.

Ukuthinjwa kwezinto zabo nokwahlukaniswa kwabo: Yayithimb’ imihlaba, izindlu neempahla zabo. Maxa wambi abantwana babehluthwa kubazali babo abangamaNgqina.

Yayibagculela ize ibabethe: AmaNgqina amaninzi, kuquka amabhinqa ayegculelwa. Amanye ayengabethwa, ayebhulelw’ amasaka.

Ukuvalelwa entolongweni: Injongo yabo yayikukunyanzela amaNgqina ukuba alahle ukholo lwawo okanye ukubahlukanisa nabazalwana babo.

Iinkampu ekusetyenzwa nzima kuzo: AmaNgqina ayedinwa abe yimfe kwezo nkampu. Ayegrumba izikhondo zemithi emikhulu. Abazalwana babesebenza emgodini wamalahle, besakha iindlela neziporo. Bahlukanisiwe neentsapho zabo, babehlala eziseleni.

[Ibhokisi/Umfanekiso okwiphepha 96, 97]

Ndagwetyelwa Ukufa Kangangezihlandlo Ezibini

UPYOTR KRIVOKULSKY

WAZALWA Ngowe-1922

WABHAPTIZWA Ngowe-1956

INGXELO NGOBOMI Ngaphambi kokuba afunde inyaniso wayefunda kwisikolo sabefundisi. Kangangeminyaka engama-22 wayesentolongweni nakwiinkampu ekusetyenzwa nzima kuzo yaye wafa ngowe-1998.

NGOWE-1940, amaNgqina asePoland ashumayela apho ndandihlala khona eUkraine. Ndatyelelwa nguKorney, umzalwana owayethanjisiwe. Sancokola ubusuku bonke yaye ndandeyisekile ukuba oko wayendichazela kona kwakuyinyaniso ngoThixo.

Ngowe-1942 umkhosi waseJamani wahlasela yaye eyaseSoviet eyayisuka kwindawo endandihlala kuyo yarhoxa. Yayilixesha lezixholo-xholo. Abantu baseUkraine abathand’ isizwe bema ngelithi mandibathelele xa besilwa namaJamani namaSoviet. Xa ndalayo, bandibetha de ndamkelwa zingqondo baza bandilahla esitratweni. Kwangobo busuku beza kundilanda bandisa kwindawo ekubulawa kuyo abantu abaninzi. Sakufika apho bandibuza enoba ndandiza kubamela kusini na abantu baseUkraine. Ndiqinisekile ndathi: “Ndiza kukhonza uYehova uThixo kuphela!” Bandigwebel’ ukufa. Xa elinye ijoni lakhuph’ umyalelo wokuba ndidutyulwe, elinye lawuthi hlasi umpu laza likhwaza lathi: “Sukumdubula! Sisenokumsebenzisa.” Iligqabi ngumsindo, eny’ indoda yandibetha. Yathi iza kundidubula ingaphelanga neveki kodwa kungadlulanga ntsuku zingephi yadutyulwa.

NgoMatshi 1944 umkhosi waseSoviet wabuyela kummandla wethu yaye amajoni athabatha onke amadoda kuquka nam. Yayingumkhosi waseSoviet owawufuna ukuncediswa. Kwindawo esasihlanganiselwe kuyo ndadibana noKorney, umzalwana owandifundisa inyaniso. Kwakukho namanye amaNgqina angama-70. Samela bucala yaye sakhuthazana. Kweza umphathi wasibuza ukuba kutheni sizikhethile nje kwabanye. UKorney wamchazela ukuba singamaKristu yaye asilwi. Ngoko nangoko, wamthabatha waza wasichazela ukuba uza kumdubula. Asizange siphinde simbone. Basoyikisa besithi njengoKorney siza kudutyulwa sonke yaye mntu ngamnye wabuzwa ukuba uza kuya na emkhosini. Xa mna ndalayo, amajoni amathathu nomphathi bandithabatha bandisa ehlathini. Umphathi wafunda isigwebo kwinkundla yomkhosi: “Ngenxa yokwala ukunxiba impahla yasemkhosini, nokuphatha izixhobo, ugwetyelw’ ukufa.” Ndathandaza ngokunyanisekileyo kuYehova ndimbuza enoba uyayamkela kusini na inkonzo yam ekubeni ndandingekalifumani ithuba lokubhaptizwa. Emva koko, ndeva umyalelo othi: “Ludubul’ utshaba!” Kodwa amajoni adubul’ emoyeni. Umphathi wandibetha. Ndagwetyw’ iminyaka elishumi entolongweni yaye ndaphelela kwenye yeenkampu ekusetyenzwa nzima kuzo kwiPhondo iGorki kumbindi weRashiya.

Ndakhululwa ngowe-1956 yaye kamva ndatshata noRegina, iNgqina elithembekileyo. Sahlala kunye iinyanga ezintandathu, ndingalindelanga ndabanjwa ndaza ndavalelwa iminyaka elishumi entolongweni.

Ekugqibeleni ndakhululwa yaye emva koko omnye umphathi wathi: “Andisenandawo yokuhlala eSoviet Union.” Yayilulwim’ etywaleni olo. Hayi indlela ekumnandi ngayo ukwazi ukuba ihlabathi lelikaYehova yaye nguye owenza isigqibo sokuba ngubani oya kuhlala kulo ngonaphakade!—INdu. 37:18.

[Ibhokisi/Umfanekiso okwiphepha 104, 105]

“Mantombazana, Ukhona OliNgqina LikaYehova Phakathi Kwenu?”

UYEVGENIA RYBAK

WAZALWA Ngowe-1928

WABHAPTIZWA Ngowe-1946

INGXELO NGOBOMI Wazalelwa eUkraine, waza wafuduswa ngetshova wasiwa eJamani, apho wafundelwa khona inyaniso. Ngoku ukhonza uYehova ngokuthembeka eRashiya.

KWAKUNGECAWA ndikhangele ngaphandle kwefestile, ndeva umculo omyoli. Kwakucula amaNgqina kaYehova. Ngokukhawuleza ndaya kwiintlanganiso zawo. Ndandingasiqondi isizathu sokuba amaJamani atshutshise amanye amaJamani ngenxa yokholo lwawo. Abahlobo bam baseUkraine endafika nabo eJamani, babengasafuni nokundibona ngenxa yokunxulumana namaJamani. Ngenye imini omnye wabo wakha wandingxolisa waza wandiqhwaba ngempama. Ndandiyinto yokuhlekisa kwamanye amantombazana.

Emva kokukhululwa ngowe-1945 ndabuyela eUkraine. Utat’ omkhulu wathi: “Unyoko uphambene mntwan’ am. Ulahle oothixo bakhe ngoku ulandela Thixo wumbi.” Xa sasisodwa umama wathabath’ iBhayibhile wandifundela endibonisa ukuba uThixo ukuthiyile ukukhonza izithixo. Wandixelela ukuba naye uyaya kwiintlanganiso zamaNgqina kaYehova. Ndasuka ndamwola ndineenyembezi emehlweni am, ndamhlebela ndathi: “Mama, nam ndiliNgqina likaYehova!” Sobabini sasuka sanyhididi ziinyembezi.

Umama wayenenzondelelo entsimini. Ngenxa yokuba bonke abazalwana babe kwiinkampu, umama wamiselwa ukuba avelele iqela. Inzondelelo yakhe yaba nefuthe nakum.

Ngowe-1950, ndabanjwa ngenxa yemisebenzi yonqulo yaye inkundla yandigweba iminyaka elishumi ndithothoza enkampini. Singoodade abahlanu sasiwa kwidolophu yaseUsol’ye-Sibirskoye, eSiberia. Ukususela ngoAprili 1951, sasisakha umzila kaloliwe. Sasibophelela amabhanti anzima emagxeni ethu, sibabini ukuze siphakamise iintsimbi zomzila kaloliwe. Ngezi zethu izandla, sasiphakamisa size sibeke iintsimbi zomzila kaloliwe oziimitha ezili-10 ubude nezimalunga neekhilogram ezingama-320 inye. Emva kwaloo msebenzi sasidinwa sibe yimfe. Ngenye imini emva komsebenzi onzima sidiniwe, kwafika uloliwe ethwele amabanjwa wema phambi kwethu. Enye indoda yavul’ ifestile yabuza, “Mantombazana, ukhona olingqina likaYehova phakathi kwenu?” Kwatsho kwathi qabu noko kudinwa. Satsho ngokuzithemba: “Sobahlanu singawo!” La mabanjwa yayingoodade nabazalwana bethu ababebhacile besuka eUkraine. Emva kokuba uloliwe emile, basixelela okwakwenzekile nendlela abeza ngayo apho. Abantwana basifundela imibongo eyayibhalwe ngaba bazalwana. Akukho nalinye ijoni elasiphazamisayo, sakunandipha ukuba kunye saza sakhuthazana.

Ukusuka eUsol’ye-Sibirskoye, safuduselwa kwinkampu enkudlwana kufuphi naseAngarsk. Kwakukho oodade abangama-22 apho. Yonk’ into yayilungiselelwe kakuhle kuquka nentsimi. Oku kwasinceda somelela ngokomoya.

[Ibhokisi/Umfanekiso okwiphepha 108, 109]

Ndathunyelwa “Ekoneni Yesihlanu” Izihlandlo Ezininzi

UNIKOLAI KALIBABA

WAZALWA Ngowe-1935

WABHAPTIZWA Ngowe-1957

INGXELO YOBOMI Ngowe-1949 wathunyelwa kwiPhondo laseKurgan, eSiberia.

KWAKUNGATHI Ngqina ngalinye eSoviet Union lalibekw’ esweni. Sasiphila ubomi bentshontsho, kodwa uYehova wasinika ubulumko. NgoApril 1959, ndabanjwa ngenxa yokwenza umsebenzi wonqulo. Kuba ndandingafuni ukungcatsha abazalwana bam, ndaphika ndema ngomlenz’ omnye. Omnye umcuphi wandibonisa ifoto yabazalwana endibuza amagama abo. Ndamxelela ukuba andazi namnye kubo. Wandibonisa ifoto yomninawa wam wandibuza esithi: “Ngumninawa wakho lo?” Ndamphendula ndathi: “Andazi nokuba nguye na okanye asinguye. Andazi.” Emva koko, lo mcuphi wandibonisa ifoto yam wathi: “Nguwe lo?” Ndathi: “Uyafana nam ke lomntu, kodwa andazi nokuba ndim okanye asindim.”

Ndavalelwa kangangeenyanga ezimbini. Ntsasa nganye, ndandimbulela uYehova ngobubele bakhe bothando. Emva koko, ndandicinga ngombhalo ndize ndixubushe ngaloo mbhalo ndindodwa. Ndandicula iingoma zoBukumkani ndisebeza, kaloku kwakungafunwa sicule kwezi zisele. Emva koko, ndandicinga ngombandela othile oseBhayibhileni.

Maninzi amaNgqina awayevalelwe kule nkampu. Kodwa impatho yayigadalala yaye sasingavumelekanga ukuba sincokole. Kukaninzi abazalwana bethunyelwa kwisisele apho babeza kuhlala bodwa, neyayisaziwa ngokuba yikona yesihlanu. Ndathunyelwa kwikona yesihlanu izihlandlo eziliqela. Kwesi sisele, ibanjwa lalinikwa izilayi zesonka ezibini ezinesiqingatha ngosuku. Ndandilala phezu kwentsimbi ebekwe emaplangeni. Iifestile zazaphukile ngenxa yoko kwakungena iingcongconi ezininzi. Ndandiqamela ngeebhutsi zam.

Ubukhulu becala, mzalwana ngamnye wayenendawo yakhe yokufihla iincwadi. Mna ndandizifihla kumtshayelo endandiwusebenzisa. Xa kwakuhlolwa, akukho namnye kubalindi owacinga ngokukhangela phakathi kulo mtshayelo, nakuba babecokisa ukukhangela kwezinye iindawo. Sasifihla ezinye iincwadi eludongeni. Ndafunda ukuyithemba intlangano kaYehova. UYehova uyabona yaye wazi konke ibe unceda ngamnye wabakhonzi bakhe abathembekileyo. UYehova wayendinceda ngalo lonke ixesha.

Nangaphambi kokuba intsapho yakowethu ithunyelwe elubhacweni ngowe-1949, utata wathi uYehova unokwenza indlela ukuba nabantu abakwiindawo ezikude neSiberia bayive inyaniso. Sazibuza ukuba, ‘Inokwenzeka njani loo nto?’ Abasemagunyeni ngokwabo baye banceda abantu abanyanisekileyo baseSiberia ukuba bayazi inyaniso.

Xa kwavela iinguqu kweli lizwe, abazalwana balibamba ngazo zozibini ithuba lokuba baye ePoland kwindibano yezizwe ngezizwe ngowe-1989. Akunako ukuzilibala ezo mini. Emva komthandazo wokuqukumbela, sema ngeenyawo saza saqhwaba izandla ixesha elide. Sasichukumisa ngokwenene eso sihlandlo! Kangangeminyaka emininzi ndiye ndatyhubela kumanzithinzithi namahlandinyuka, kodwa zimbalwa izihlandlo apho ndandilila de kuphume iinyembezi. Xa sasisahlukana nabazalwana bethu basePoland, zazizehlela iinyembezi, kwakungekho namnye unako—phofu nofuna ukuzisula.

[Ibhokisi/Umfanekiso okwiphepha 112, 113]

Ukwenza Zonke Izinto Ngenxa Yeendaba Ezilungileyo

UPYOTR PARTSEY

WAZALWA Ngowe-1926

WABHAPTIZWA Ngowe-1946

INGXELO YOBOMI UPyotr wadibana namaNgqina kaYehova okokuqala ngowe-1943, wathothoza kwiinkampu zoxinaniso zamaNazi waza wasebenza nakwiinkampu zaseRashiya. Kamva wakhonza njengomveleli wesiphaluka ngoxa umsebenzi wawuvaliwe.

EMVA kokuba ndifunde iimfundiso ezisisiseko zeBhayibhile kwiJamani yamaNazi, ngoko nangoko ndashumayela kubantu endibaziyo yaye abaninzi kubo bathelela unqulo olunyulu. Ngowe-1943, omnye umfundisi wandimangalela kumaGestapo, ndabanjwa ndaza ndabekw’ ityala lokuphembelela ulutsha ukuba luvukele urhulumente. Ngokukhawuleza ndathunyelwa eMaidanek kwinkampu yasePoland. Ukunxulumana nabazalwana noodade yeyona nto ndandiyixabisa. Enkampini senza isigqibo sokuba siza kushumayela. Abaninzi apho babonisa umdla enyanisweni, yaye safuna nezinye iindlela zokunikela ubungqina ngoBukumkani bukaYehova. Ngenye imini ndabethwa imivumbo engama-25 ngesabhokhwe esingumphindwa. Emva koko ndaphakama ndaza ndatsho ngesiJamani ndingxola, “Danke schön!” (“Enkosi”) Elinye iJamani lathi: “Khawujonge nje indlela le nkewu eyomelele ngayo! Siyayibetha, suka yona ithi enkosi!” Wawubhonte umqolo kukubethwa.

Umsebenzi wawunzima yaye sasidinwe ngeyona ndlela. Izidumbu zazitshiswa kwionti eyayivutha imini nobusuku. Ndandicinga ukuba ngenye imini nam ndiseza kutshiswa kweli ziko. Kwakubonakala ngathi ndandingenakuze ndiphume kuloo nkampu ndisidla amazimba. Kodwa ukwenzakala emsebenzini kwandisindisa. Bonke ababengathi banempilwana babenyanzelwa ukuba basebenze yaye uninzi lwathunyelwa kwezinye iinkampu. Kwiiveki ezimbini kamva, ndathunyelwa kwenye inkampu yoxinaniso eRavensbrück.

Ngasekupheleni kwemfazwe, ndeva amarhe okuba amaJamani ayeza kusibulala sonke. Kamva safumanisa ukuba abalindi babaleke bonke. Xa amabanjwa azibona ekhululekile onk’ athi saa. Ndabuyela eOstriya apho ndaxelelwa ukuba kufuneka ndibhalise emkhosini. Andizange ndivume, ndathi ndikhe ndathothoza kwiinkampu zoxinaniso ngenxa yonqulo lwam. Ndavunyelwa ukuba ndibuyele eUkraine, eyayiyinxalenye yeSoviet Union. Ngowe-1949, ndatshata noYekaterina, owaba liqabane elithembekileyo. Ngowe-1958 ndabanjwa ndaza ndathunyelwa kwinkampu yaseMordvinia.

Emva kokukhululwa, ndancedisa ekushicileleni iincwadi zeBhayibhile. Ngowe-1986 sasebenza ubusuku bonke sishicilela amaphepha ali-1 200. Sawafihla emgangathweni, ezibhedini naphina apho sasinokuwafihla khona. Singalindelanga, kwathi gqi amagosa eKGB esithi ngabula bona bafuna “ukuncokola nje.” UYekaterina wabuza ukuba bafuna ukuncokola phi, singakhange siyicinge eyokuba basenokufuna ukungena endlwini. Kodwa savuya xa babefuna ukuncokola behleli ngaphambi komnyango wekhitshi. Ukuba ayengenile, ngesasibanjiwe.

Ukuza kuthi ga namhlanje, siye sazama ukuphila ngozahlulelo lwethu nokwenza zonke izinto ngenxa yeendaba ezilungileyo. Abantwana bethu abathandathu, nabazukulwana bethu abangama-23, nababini abasisizukulwana, bonke bakhonza uYehova ngokuthembeka yaye siyambulela uYehova ngenxa yokuba abantwana bethu behamba enyanisweni.

[Ibhokisi ekwiphepha 122

Ukuvalelwa Wedwa

Enye yeendlela zokohlwaya ezazixhaphakile kwiSoviet, yayikukuvalelwa wedwa xa ungafuni ukudlulisela iincwadi zonqulo. Amabanjwa ayenikwa iimpahla ezidlakadlaka aze avalelwe eziseleni.

Khawube nomfanekiso ngqondweni wesi sisele. Sincinane—malunga neemitha ezintathu macala onke. Simnyama, simanzi, simdaka ebusika ingqele iqhaqhazelis’ amazinyo. Udonga lwesamente lwalurhabaxa. Ifestile yayingasekupheleni kodonga olwaluyimitha ububanzi. Ezinye iiglasi zazaphukile. Sasisinye isibane esasikhanyisa; sasisekoneni yodonga sigqunywe ngenkcenkce enemingxuma. Ngaphandle komgangatho oyisamente, ekuphela kwendawo yokuhlala yayiyinxalenye yodonga encinane. Wawungenakukwazi ukuhlala ixesha elide. Izihlunu zemilenze nomqolo zazinemikhinkqi yaye ziqaqamba yaye udonga olurhabaxa lwalukrwela emqolo.

Ebusuku abalindi babekufaka kwibhokisi eyenziwe ngeplanga ukuze ulale apho, yayivalwa ngentsimbi. Wawunokulala phezu kwebhodi okanye phezu kwentsimbi kodwa ngenxa yengqele wawuhlala uthe ndwanya amehlo. Zazingekho iingubo. Ngokuqhelekileyo, ibanjwa elivalelwe lodwa lalifumana malunga nekota yesonka ngosuku negxogxa yekomityi yesuphu emva kweentsuku ezintathu.

Indawo yokuzithuma yayingungxunyana nje omncinane otsho ngevumba elinganyamezelekiyo. Ezinye izisele zazinesixhobo sokuvuthela umoya kuloo mingxunyana yelindle. Umlindi wayedla ngokuvula eso sixhobo ngenjongo yokungcungcuthekisa amabanjwa okanye ukuwohlwaya.

[Ibhokisi/Umfanekiso okwiphepha 124, 125]

KwiKampu YaseMordvia #1

Phakathi kowe-1959 nowe-1966, abazalwana abangaphezu kwama-450 bathothoza kule nkampu neyayihlala amabanjwa angama-600. Yayiyenye yeenkampu ezili-19 zale ngingqi yaseMordvinia yaye kwakusetyenzwa kude kugobe umqolo, ibiyelwe ngocingo oluhlabayo olumalunga neemitha ezintathu ukuphakama. Ukongezelela le nkampu yayibiyelwe ngemingqa eli-13 yocingo oluhlabayo. Umhlaba wenkampu wawuvunduziwe ukuze xa ibanjwa liqhwesha libonakale apho linyathele khona.

Ngokuwavalela odwa amaNgqina kaYehova abasemagunyeni bazama ukuwacinezela emzimbeni nasengqondweni. Noko ke, abazalwana babekwazi ukulungiselela imicimbi yebandla bekwezi nkampu.

Inkampu ngokwayo yayisisiphaluka yaye inomveleli wesiphaluka. Isiphaluka sasinamabandla amane namaqela ezifundo zencwadi angama-28. Ukubanceda bonke bomelele ngokomoya abazalwana bagqiba kwelokuba babe neentlanganiso kasixhenxe ngeveki. Ekuqaleni yayinye iBhayibhile apha, ngoko ke benza ucwangciso lokuba bandla ngalinye liyifunde. Xa kwavela ithuba abazalwana bazama ukuyikhuphela. Kwakukho iincwadi zeBhayibhile ezahlukeneyo ezazineencwadi ezibhalwe ngesandla, iBhayibhile yokoqobo yayifihlwa kwindawo ekhuselekileyo. Ngale ndlela abazalwana babekwazi ukulandela ucwangciso lokufundwa kweBhayibhile. Kwalungiselelwa ukuba kuqhutywe isifundo seMboniselo. Oodade ababeze kutyelela abayeni babo babezisa iikopi ezenziwe zancinane kakhulu zamaphephancwadi enkampini, bezifaka emilonyeni yabo okanye kwizithende zezihlangu ezinye bazijijele ezinweleni zabo. Abazalwana abaninzi bakhe bahlaliswa bodwa kwizisele iintsuku ezili-15 ngenxa yokukhuphela iincwadi.

Le ndawo yayingenawo amanye amabanjwa. Abo babephethe baqiniseka ukuba amaNgqina kaYehova akafundi nantoni na xa evalelwe. Nakuba kunjalo, abanye abazalwana bebebazisela ukutya kokomoya. Omnye umzalwana ebekhwela phezu kophahla olukhangele kwibala lamabanjwa xa ephumile ukuze ahamba hambe. Wayenamaphepha amancinane aneendinyana zeBhayibhile awayelungiselelwe kusengaphambili ukuba abe ziibhola ezincinane ezimalunga nesentimitha enye. Bafaka ibhola kumbhombho omde, bavuthele kwindawo eme elo Ngqina lisebaleni. Lize lona iNgqina ligobe, ngokungathi libopha imitya yezihlangu, lize lichole ukutya kokomoya lingakhange libonwe.

Isidlo sakusasa nesasebusuku yayisiba sisidudu esimanzi neoli encinane. Ukutya kwasemini yayiyisuphu nje engacacanga nesinye isidlo. Isonka esasityiwa ngamabanjwa sasifana noboya besilwanyana obenza iibhutsi! UIvan Mikitkov uthi: “Ndihleli iminyaka esixhenxe kule nkampu yaye ngalo lonke elo xesha bendiqunjelwa sisisu.”

Abazalwana bagcina ingqibelelo. Ukuvalelwa bodwa akuzange kuphazamise ukomelela kwabo ngokomoya phakathi kwabantu bakaThixo abathembekileyo, yaye baye baqhubeka besiba nokholo ibe bemthanda uThixo nommelwane.—Mat. 22:37-39.

[Ibhokisi/Umfanekiso okwiphepha 131, 132]

Yandibuza Yathi: “Ulilela Ntoni?”

UPOLINA GUTSHMIDT

WAZALWA Ngowe-1922

WABHAPTIZWA Ngowe-1962

INGXELO YOBOMI Watshata noViktor Gutshmidt. Njengokuba wayesentolongweni, wabona indlela ayenobubele ngayo amaNgqina kaYehova.

NDANDIZIKHOLELWA zonke iingcamango zobuKomanisi. Ndavalelwa ngamaKomanisi ndaza ndathunyelwa kwinkampu ekusetyenzwa nzima kuyo eVorkuta, ngoMeyi 1944. Kangangeminyaka emithathu andizange ndisixelelwe isizathu sokuba ndibanjwe. Ekuqaleni ndandicinga ukuba kwenzeke impazamo yaye ndandilindele ukuba ndikhululwe. Kunoko, ndagwetywa iminyaka elishumi enkampini kusithiwa ndathetha amazwi aphikisana neSoviet.

Ngenxa yokuba ndandifundele ezamayeza, ndasebenza kwisibhedlele sale nkampu kwiminyaka yokuqala yesigwebo sam. Ngowe-1949, ndafuduselwa kwinkampu yaseInta eyayinamabanjwa ezopolitiko. Apho, kwakungqongqo nangakumbi. Phakathi kwamabanjwa kwakugquba umoya wenzondo, ubukrwada, ukuziphatha kakubi, intiyo nokuphelelwa lithemba. Amarhe okuba sonke kule nkampu sasiza kubulawa okanye sifumane isigwebo sentambo kwenza imeko yaba mandundu nangakumbi. Ngenxa yolu xinezeleko, uninzi lwamabanjwa lwashiywa ziingqondo. Amabanjwa ayengathembani yaye ethiyene kuba kwakukho oontamnani abaninzi kule nkampu. Abantu babe ngoonkom’ idla yodwa bezama kangangoko banako ukuvumelana neemeko. Ukuzingca nokubawa kwakwesamele.

Kwakukho iqela labafazi abangamabanjwa abangama-40 ababehlukile ngeyona ndlela kwabanye. Ngalo lonke ixesha babekunye, amahomba angahlalwa mpukane yaye enobubele. Yayingabafazana namantombazana aselula kakhulu. Kamva ndafumanisa ukuba babe ngamaNgqina kaYehova. Amabanjwa ayebaphatha ngeendlela ezahlukeneyo. Amanye amabanjwa ayebaphatha krwada nangenkohlakalo. Abanye babebancoma ngendlela abaziphethe ngayo, ngokukodwa indlela ababethandana ngayo. Ngokomzekelo, xa elinye iNgqina ligula, amanye ayetshintshana ukuze alonge. Enkampini oku kwakungaqhelekanga.

Ndamangaliswa kuba aba bantu babe ziintlanga ezininzi, kodwa babephathana ngobubele. Ngelo xesha, ndandingenamdla ebomini. Ngenye imini ndahlala phantsi ndaza ndatsho esimantshiyane. Enye intombazana yeza kum yaza yandibuza: “Polina, ulilela ntoni?”

“Kubhetele ndife,” ndayiphendula ndatsho.

Le ntwazana, uLidia Nikulina, yandithuthuzela. Yandixelela injongo yobomi, nokuba uThixo uza kuzilungisa zonke iingxaki zabantu, ithetha nangezinye izinto ezininzi. NgoJulayi 1954, ndakhululwa. Ngelo xesha ndandisele ndifunde okuninzi ngamaNgqina kaYehova yaye kwandivuyisa kakhulu ukuba lilo.

[Ibhokisi/Umfanekiso okwiphepha 140, 141]

Ndandingunonjineli Wasemkhosi Ngoku Ndingumshumayeli Weendaba Ezilungileyo

UVLADIMIR NIKOLAEVSKY

WAZALWA Ngowe-1907

WABHAPTIZWA Ngowe-1955

INGXELO NGOBOMI Wafuduselwa kwiinkampu neentolongo ezahlukahlukeneyo kangangezihlandlo ezingama-256. Wafa ngowe-1999.

ISIDANGA sokuba ngunonjineli ndasifumana ngowe-1932 kwiMoscow Institute of Engineering Communication. Ukususela ngoko ukuya kutsho ngowe-1941, ndandisebenza njengononjineli nomzobi weeplani. Ndaziyila ngokwam izixhobo ezikhethekileyo zokulwa. Ndavalelwa ebudeni bemfazwe yaye ekugqibeleni ndasiwa kwinkampu ekumbindi weKazakhstan, kwidolophana yaseKengir.

Iqela lamaNgqina kaYehova lathimb’ ingqalelo yam ngenxa yokuba lalahlukile kwamanye amabanjwa. Ayengama-80 phakathi kwamabanjwa ali-14 000 awayevalelwe kumacandelo amathathu enkampu. Ukwahluka kwawo kwabonakala ngokukodwa ebudeni boqhankqalazo olwaluseKengir ngowe-1954. AmaNgqina kaYehova akazange abandakanyeke kulo yaye ala nokululungiselela. Ezolile azama ukuchaza ukuma kwawo kwamanye amabanjwa. Ndichukumisekile yindlela asabela ngayo ndawabuza ngeenkolelo zawo. Kamva ndazahlulela kuYehova. Lwaluvavanywa ukholo lwamaNgqina enkampini, ngokukodwa xa abo babeqhankqalaza bachithwa chithwa ngamajoni awayexhobile ehamba ngeenqwelo zomkhosi.

Ngesinye isihlandlo ndachazelwa ukuba kufike iinjengele ezimbini ezisuka eMoscow ezizele nje ngokukhethekileyo ukuza kudibana nam. Enye yathi kum: “Vladimir, yiyeke lentw’ ale cawa. Ungunonjineli wasemkhosini nomzobi weeplani. Ilizwe lakho liyakufuna. Sifuna ubuyele emsebenzini wakho owawuwenza. Wonwaba njani uhleli namaqaba?”

Ndaphendula ndathi: “Akukho nto ndinokuqhayisa ngayo. Nabuphi na ubugcisa umntu anabo ubuphiwe nguThixo. Abo bathobekileyo baya kuyivuyela Iminyaka Eliwaka Yokulawula KoBukumkani BukaKristu apho abantu beya kube befezekile yaye befundile.”

Ndakuvuyela kakhulu ukufumana ithuba lokushumayela kwezi njengele. Kangangezihlandlo eziliqela zazindicenga ukuba ndibuyele kumsebenzi endandiwenza. Noko ke, ndazichazela ukuba zingaphinde zizikhathaze ngam kodwa zindiyeke ndihlale enkampini nabazalwana bam endibathandayo.

Ngowe-1955 isigwebo sam sarhoxiswa. Ndaqalisa ukusebenza kwiziko lokwakha elingenanto yakwenza nomkhosi. Ndizabalazela ukushumayela kangangoko kunokwenzeka, ndaqalisa isifundo seBhayibhile nentsapho yomnye unonjineli. Kungekudala yena nentsapho yakhe baba ngamaNgqina kaYehova nabashumayeli abanenzondelelo. Kodwa iKGB yayindibekw’ esweni yaye ngoxa yayigqogqa apho ndandihlala khona yafumana uncwadi lweBhayibhile. Inkundla yandigweba iminyaka engama-25 ndithothoza entolongweni yaye ndathunyelwa kwiinkampu ekusetyenzwa nzima kuzo eSiberia kwisixeko saseKrasnoyarsk. Ndandifuduswa izihlandlo ezininzi kwiinkampu neentolongo ezahlukahlukeneyo. Xa ndibala ndifumanise ukuba ebomini bam bonke ndiye ndatshintshatshintsha iinkampu neentolongo izihlandlo ezingama-256.

[Ibhokisi/Umfanekiso okwiphepha 147, 148]

Kwakufuneka Iityesi Ezinkulu

UNADEZHDA YAROSH

WAZALWA Ngowe-1926

WABHAPTIZWA Ngowe-1957

INGXELO NGOBOMI UNadezhda wayifunda inyaniso kwinkampu yoxinaniso yaseRavensbrück. Emva kokuba ebuyele eSoviet Union, kangangeminyaka emininzi ebethutha iincwadi neeleta ezisa kubazalwana. Sithethanje uhlala eCaucasia.

XA NDANDIFIKA kwinkampu yoxinaniso ngowe-1943, kwakungekho nto yayibangel’ umdla ebomini. Ndandineso simo sengqondo de ndadibana namaNgqina kaYehova. Ndandikuvuyela kakhulu ukubuyela ekhaya eUkraine ndinethemba eliqinisekileyo lobomi obungunaphakade kumhlaba oyiparadesi. Ndandibhalelana nabanye oodade abangamaNgqina ukuze ndomeleze ukholo lwam. Noko ke, iKGB yazivula iileta zam yaye kungekudala ndagwetywa iminyaka eli-15 ndithothoza kwinkampu yentolongo.

NgoNovemba 1947, ndathunyelwa kwinkampu yaseKolyma yaye apho kwakungekho nokuba libe linye iNgqina. UYehova wandinceda ndashumayela apho. UYevdokia, owayelibanjwa waba nomdla eBhayibhileni. Saba ngabahlobo, sasixhasana ngokwemvakalelo sisomelezana nangokomoya. Ndandingenalwazi lungako lweBhayibhile, kodwa oko ndandikufundile kwakwanele ukuze ndigcine ingqibelelo yam kuYehova.

Ngasekuqaleni ngowe-1957, unyaka emva kokuba ndikhululwe, ndafudukela eSuyetikha, kwiPhondo i-Irkutsk. Abazalwana balapho bandamkela ngezandla ezishushu yaye babenobubele. Bandifunela umsebenzi nendawo yokuhlala. Kodwa eyona nto yandivuyisayo kukuba ndacelwa ukuba ndenze umsebenzi wobuthixo. Ekubeni ndandingekabhaptizwa, ndabhaptizwa kwibhafu enkulu enamanzi. Emva koko, ndandikulungele ukusingatha iimbopheleleko entlanganweni kaYehova. Iimbopheleleko endandinazo zaziquka ukuthutha uncwadi lweBhayibhile neeleta.

Uncwadi kwakufuneka ludluliselwe kwiSiberia yonke, kumbindi weRashiya nakwintshona yeUkraine. Yonk’ into kwakufuneka icetywe kakuhle kwangaphambili. Ukuze sise iincwadi kwintshona yeUkraine kwakufuneka iityesi ezinkulu. Ngesinye isihlandlo xa sasikwiSikhululo iYaroslavl’ eMoscow iqhaga leny’ ityesi lophuka yaye iincwadi zonke zathi saa. Ndingangxamanga ndaziqokelela ezo ncwadi ndithandaza. Ndazibopha zonke yaye ndakhawuleza ndahamba kweso sikhululo. Okuvuyisayo kukuba akukho mntu wandibonayo.

Ngesinye isihlandlo, ndathath’ iityesi ezazizele zincwadi ezisuka eUkraine zigqith’ eMoscow zisiya eSiberia. Eny’ ityesi ndayibeka ngaphantsi kwebhedi esezantsi kwigumbi lokulala likaloliwe. Kungekudala amadoda amabini ayekhwele kulo loliwe—amagosa eKGB—angena kweli gumbi. Phakathi kwezinto awayethetha ngazo ngamaNgqina asasaza uncwadi naphembelela uluntu ukuba lube nxamnye neSoviet.” Ndazama ukuhlala ndizolile ndisenzela ukuba bangakrokrel’ into. Njengokuba babethetha babehleli kanye phezu kwezo ncwadi!

Enoba ndithuth’ incwadi okanye ndenza nayiphi na enye into ndandikulungele ukubanjwa nanini na. Kangangezihlandlo ezininzi ndafunda ukukholosa ngoYehova kuyo yonke into.

[Ibhokisi/Umfanekiso okwiphepha 158, 159]

“Abantu Bakho Bahlukile”

UZINAIDA KOZYREVA

WAZALWA Ngowe-1919

WABHAPTIZWA Ngowe-1958

INGXELO NGOBOMI Iminyaka emininzi uyichithe ekwiinkampu ezahlukahlukeneyo yaye wamnabel’ uqaqaqa ngowama-2002.

NDISENGUMNTWANA ndandikulangazelela ngamandla ukukhonz’ uThixo. Ngowe-1942 intombazana endandithandana nayo yandisa kwiCawa yobuOthodoki yamaRashiya isenzela ukuba njengokuba yayisitsho “ndingaphelel’ esihogweni.” Noko ke, emva kokuba umfundisi eve ukuba ndandingumOsset, wala ukundibhaptiza. Ekugqibeleni wandibhaptiza kodwa emva kokuba umhlobo wam emnyobile. Njengokuba ndandisephulweni lokufun’ inyaniso ndaba lirhamente eSabatha, kumaPentekoste naseBhaptizi. Ngenxa yalo nto abasemagunyeni bandinika isigwebo sokwenza umsebenzi othile ndiqhutywa ngebhaxa. Enkampini ndadibana namaNgqina yaye ndakhawuleza ndaqonda ukuba ayayazi inyaniso eseBhayibhileni. Emva kokuba ndikhululiwe ngowe-1952, ndabuyela ekhaya ndaza ndaqalisa ukushumayela iindaba ezilungileyo.

Ngenj’ ixukuxa ngoDisemba 1958 ndeva kunkqonkqozw’ emnyango. Egibilisekile, amajoni aqalisa ukugqogqa ikhaya lethu ngoxa amabini ayendifake ekoneni endigadile. Utata wavuka yaye wayesoyikisela intsapho yakhe ngokukodwa oonyana bakhe. Abazali bam babenoonyana abahlanu yaye yayindim kuphela intombazana. Xa utata wabona indlela la majoni ayewagqogqa ngayo onke amagumbi nophahla waqonda ukuba oku kunento yokwenza nonqulo lwam. Esithi hlasi umbayimbayi wakhazwa, “intlola yaseMerika!” Wazam’ ukundidubula kodwa amajoni amhlutha umbayimbayi. Andizange ndiyikholelwe into yokuba utat’ ondizalayo angafun’ ukundidubula. Xa kwakusele kuyekiwe ukugqogqwa ndathatyathwa ngelori egqunyiweyo kodwa ndandivuyela nje ukuba ndandisaphila. Ngenxa yokushumayela ndagwetywa iminyaka elishumi ndisentolongweni.

NgoDisemba ngowe-1965, ndakhululwa ndingekasigqibi isigwebo. Abazali bam babekuvuyela ukundibona kodwa utata akazange afune ndihlale ekhaya. Noko ke, okumangalisayo kukuba, abasebenzi beKGB banyanzelisa utata ukuba andibhalise ngokusemthethweni njengomnye wabantu ahlala nabo ekhaya aze andifunele nomsebenzi. Utata wayendithiy’ egazini kodwa ekuhambeni kwexesha watshintsha. Wayedibana nabazalwana noodade xa beze kundityelela. Abantakwethu babengasebenzi, benxila yaye babethand’ ukuxambulisana nabantu. Ngeny’ imini, utata wathi: “Ndiyabona ukuba abantu bakho bahlukile kunale nto bendiyicinga. Ndifuna ukuninika elinye igumbi ukuze niqhubele kulo iintlanganiso zenu.” Yayingathi ndiyaphupha! Utata wasinika igumbi elikhulu waza wathi kum: “Ungoyiki. Xa nilapha, ndiza kunigadela amajoni yaye andinakuwavumela angene.” Izinto zatshintsha ngaloo ndlela nakuba abantu babeyazi indlela utata awayelikhuni ngayo.

Sasiba nazo iintlanganiso zamaKristu ekhaya sikhuselwa nguYehova nangutata. Kwiintlanganiso kwakusiza abantu abangama-30 yaye elo yayilinani lamaNgqina aseOssetia. Ndandikuvuyela ukubukela ndisefestileni ndijonge abazali bam behleli esitratweni besigadele amajoni. Sithethanje eOssetia kukho abavakalisi abanenzondelelo abavakalisa ngoBukumkani bukaYehova abamalunga nama-2 600.—Isa. 60:22.

[Ibhokisi/Umfanekiso okwiphepha 162, 163]

Ndandikuphela KweNgqina Elalisele Enkampini

UKONSTANTIN SKRIPCHUK

WAZALWA Ngowe-1922

WABHAPTIZWA Ngowe-1956

INGXELO NGOBOMI Inyaniso wayifumana kwinkampu ekusetyenzwa nzima kuyo ngowe-1953 yaye wabhaptizwa ngowe-1956. Iminyaka engama-25 uyichithe esentolongweni eliNgqina likaYehova. Walala kobandayo ngowama-2003.

EKUQALENI ngowe-1953 ndadibana nomzalwana ekuthiwa nguVasily kwisisele sasentolongweni. Wandichazela ukuba isizathu sokuba abe sentolongweni kungenxa yokholo lwakhe kuThixo. Ndandingasiqondi isizathu sokuba umntu abe sentolongweni ngenxa nje yeenkolelo zakhe. Oku kwandenza ndaphuthelwa ebusuku. Ngosuku olulandelayo wandicacisela ukuba kwenzeka ntoni. Ngokuthe ngcembe, ndeyiseka ukuba iBhayibhile yincwadi ebhalwe nguThixo.

Ngowe-1956 ndabhaptizwa. Ekupheleni kwalo nyaka, umphathi wentolongo waphanda waza wafumanisa ukuba sasinoncwadi oluninzi lweBhayibhile. Uphando lwaqhubeka phantse kangangonyaka yaye ngowe-1958 inkundla yandigweba iminyaka engama-23 ngenxa yomsebenzi wonqulo. Ngelo xesha ndandisele ndichithe iminyaka emihlanu enesiqingatha ndisenkampini. Entolongweni ndahlala iminyaka engama-28 neenyanga ezintandathu ndingazange ndikhe ndikhululwe.

NgoAprili 1962 inkundla yandivakalisa “njengomenzi-bubi oyingozi” yaye ndathunyelwa kwinkampu enokhuseleko oluluqilima, apho ndachitha iminyaka eli-11. Zazininzi izinto ezaziyenza le nkampu “ikhetheke.” Ngokomzekelo, suku ngalunye mntu ngamnye wayefumana ukutya okuziikopeck (imali yaseRashiya) ezili-11 ngaphantsi kwemali efunekayo ukuthenga isonka ngelo xesha. Ndandiziisentimitha ezili-192 ubude kodwa ndandinobunzima obuziikhilogram ezingama-59. Ulusu lwam lwalushwabene yaye luxobuka.

Ekubeni ndandilichul’ aph’ ekwakheni, kwakudla ngokuthiwa mandiye kuhlaziya indawo ehlala abaphathi. Kwakungekho mntu undoyikayo yaye abantu abahlala kuloo ndawo babengazifihli izinto zabo. Xa inkosikazi yomphathi isazi ukuba ndiza kusebenza kwindlu yabo yayingamsi umntwana wayo oneminyaka emithandathu ubudala kwisikolo sabantwana abancinane. Yayisisimanga into yokuba “umenzi-bubi oyingozi” ahlal’ endlwini nomntwana oneminyaka emithandathu ubudala! Licacile elokuba kwakungekho nokuba abe mnye umntu owayekholelwa ukuba ndisisaphuli-mthetho ndingasathethi ke ngokuba “ngumenzi-bubi oyingozi.”

Ngokuthe ngcembe bonke abazalwana abasenkampini babemana bekhululwa ngokukhululwa. Ngowe-1974, ndandikuphela kweNgqina elalisele enkampini. Ndahlala apho iminyaka esixhenxe eyongezelelekileyo de ndakhululwa ngoAgasti 1981. UYehova waqhubeka endixhasa ngokomoya. Wakwenza njani oko? Kule minyaka isixhenxe ndisenkampini ndandifumana iMboniselo injengeleta. Omnye umzalwana wayesoloko endithumelela ezi leta zibhalwe ngesandla kukhutshelwe amanqaku amatsha. Sihlandlo ngasinye ndifumana ileta kumntu owayejonga izinto ezithunyelelwe amabanjwa ndandiyifumana sele ivuliwe. Sobabini sasiyazi into ebhalwe eleteni. Nanamhlanj’ oku andiyazi ukuba yintoni eyamenzaa wazibeka engozini kangaka kodwa ndiyavuya kuba wasebenza apho iminyaka esixhenxe. Ngaphandle kwako konke, ndiyambulela uYehova. Ebudeni bayo yonke loo minyaka, ndafunda ukuthembela ngoYehova yaye wandinika amandla.—1 Pet. 5:7.

[Ibhokisi/Umfanekiso okwiphepha 168, 169]

Emva Kwemfazwe, Ndabuyela ERashiya

UALEKSEY NEPOCHATOV

WAZALWA Ngowe-1921

WABHAPTIZWA Ngowe-1956

INGXELO NGOBOMI Inyaniso wayifumana ngowe-1943 kwinkampu yoxinaniso yaseBuchenwald yaye wachitha iminyaka eli-19 esentolongweni eRashiya. Wayenguvulindlela othe ngxi ngaphezu kweminyaka engama-30 nangona ebudeni belo xesha umsebenzi wokushumayela wawuvaliwe.

XA WAYENEMINYAKA engama-20 ubudala uAleksey wathunyelwa kwinkampu yoxinaniso iAuschwitz, kwiJamani yamaNazi. Kamva wathunyelwa kwinkampu yaseBuchenwald, apho wayifunda khona inyaniso. Ngaphambi nje kokuba akhululwe abazalwana ababini abangamaNgqina abathanjisiweyo bathi kuye: “Aleksey, kungaba kuhle ukuba emva kwemfazwe ubuyele eRashiya. Isivuno sikhulu kufuneka abasebenzi abangakumbi. Akulula kwela lizwe ngoko ke ufanele ulindele ukuba ukholo lwakho luza kuvavanywa. Siza kukuthandazela kuquka nabo baya kukuphulaphula.”

AmaBritani amkhulula uAleksey ngowe-1945. Wabuyela eRashiya yaye apho wagwetywa iminyaka elishumi ngenxa yokuba engazange afune ukuvota. Ubhala athi: “Ekuqaleni ndandikuphela kweNgqina entolongweni. Ndacela ukhokelo lukaYehova ukuze ndifumane izimvu yaye kungekudala sasili-13! Ebudeni balo lonke eli xesha sasingenalo uncwadi lweBhayibhile. Sasikhuphela izibhalo esizithatha kwiinoveli esasiziboleka kumzi wokugcina iincwadi entolongweni.”

UAleksey wachitha iminyaka elishumi esentolongweni. Wathi wakukhululwa waya kummandla awayesazi ukuba kukho kuwo abantu abakholelwa kuYesu. Uthi: “Abantu balapho babelambile ngokomoya. Babesiza kum emini nasebusuku; besiza nabantwana babo. Nto nganye endandibaxelela yona babeyikhangela eBhayibhileni.

Kwiminyaka embalwa eyalandelayo, uAleksey wanceda abantu abangaphezu kwabangama-70 ukuba babhaptizwe. Omnye wabo yayinguMaria, kamva owaba yinkosikazi yakhe. Uthi: “I-KGB yayindifuna phantsi phezulu. Ndabanjwa yaye ndagwetywa iminyaka engama-25 ndithothoza entolongweni. Emva koko babamba uMaria. Ngaphambi kokuba kuthethwe ityala uMaria wachitha iinyanga ezisixhenxe evalelwe yedwa. Lowo wayesenza uphando wathi wayeza kumkhulula ukuba nje wayenokulahla uYehova. UMaria wakhaba ngaw’ omane. Inkundla yamgweba iminyaka esixhenxe ekwiintolongo ekusetyenzwa nzima kuzo. Omnye udade oliNgqina wayithabatha intombi yethu eyayilusana waza wayikhulisa.”

UAleksey noMaria bakhululwa ngaphambi kwexesha yaye bafudukela kwiPhondo laseTver. Abasemagunyeni balapho nabantu basekuhlaleni babebachase ngokukrakra yaye omnye ummelwane wabo wayefuna ukutshisa indlu yabo. Kwiminyaka eyalandelayo kwanyanzeleka ukuba bafuduke kangangezihlandlo ezininzi; kodwa ndawo nganye ababefika kuyo babefumana abafundi abatsha.

UAleksey uthi: “Ebudeni beminyaka yokubanjwa kwethu, sasingakwazi ukufunda iLizwi likaThixo. Ngenxa yoko sinosukelo lokufund’ iBhayibhile suku ngalunye. Mna noMaria siye sayifunda iBhayibhile yonke kangangezihlandlo ezingaphezu kwezingama-40. LiLizwi likaThixo eliye lasomeleza saza sanenzondelelo kumsebenzi wokushumayela.”

UAleksey uchithe iminyaka emine ekwinkampu yoxinaniso yamaNazi neminyaka eli-19 ekwiintolongo neenkampu zaseRashiya. Ebudeni beminyaka engama-30 enguvulindlela othe ngxi, yena nenkosikazi yakhe banceda abantu abaninzi ukuba bamazi baze bamthande uYehova.

[Ibhokisi/Umfanekiso okwiphepha 177, 178]

Ijoni Lalichan’ ucwethe

UREGINA KUKUSHKINA

WAZALWA Ngowe-1914

WABHAPTIZWA Ngowe-1947

INGXELO NGOBOMI Nangona wachitha iminyaka emininzi enganxibelelani nebandla waqhubeka ethembekile ekushumayeleni iindaba ezilungileyo.

NGOWE-1947 iNgqina lathetha nam ndisemarikeni. Kwangalo ngokuhlwa ndalityelela ekhayeni lalo yaye sathetha kangangeeyure eziliqela. Ngokukhawuleza ndagqib’ ekubeni ndikhonze uYehova njengalo. Ndathi kulo, “Uyashumayela, nam ngeny’ imini ndiza kushumayela.”

Ngowe-1949 eL’viv, eUkraine ndabanjelwa ukushumayela yaye ndahlukaniswa nomyeni neentwazana zam ezimbini. Kwinkundla yolawulo, kwityala elachotshelwa nje kuphela ziijaji ezintathu ndagwetyelwa ukufa kusetyenziswa iqela lomkhosi odubulayo. Xa kwakufundwa eso sigwebo, elinye ibhinqa kwezo jaji lisalek’ umsundulo lathi: “Ngenxa yokuba unabantwana ababini siye sagqib’ ekubeni sisinyenyise isigwebo ibe yiminyaka engama-25 usentolongweni.”

Ndasiwa esiseleni entolongweni yaye ndandikuphela kwebhinqa elalilapho. Babesazi ukuba ndiliNgqina likaYehova. Emangalisiwe yindlela endandizole ngayo emva kokwaziswa ukuba ndigwetywe iminyaka engama-25. Xa ndandisiwa kwiinkampu ekusetyenzwa nzima kuzo, elinye ijoni elize ngobuso elizweni landinika ipasile enokutya yaye linobubele lathi: “Mus’ ukoyika; izinto ziza kuhamba kakuhle.”

Ndandikwinkampu ekumntla weRashiya, de yangowe-1953. Le nkampu yayinoodade abaninzi abasuka kwiiriphabliki ezahlukahlukeneyo zeSoviet Union. Sasithandana ngokungathi siyintsapho.

Thina boodade sazama ukushumayela kwabanye ngendlela esasiziphethe ngayo sinethemba lokuba oko kwakuya kubashukumisela ukuba bakhonze uThixo. Sasisebenze iiyure ezininzi yaye sisebenza nzima. Ndakhululwa ngaphambi kwexesha kodwa kangangeminyaka engaphezu kwemihlanu ndandinganxibelelani nebandla. Oku kwakunzima ngaphezu kokuba ndisentolongweni. Phezu kwazo nje ezo meko, ndandiyiva inkxaso nothando olungatshintshiyo lukaYehova. Ndandiyifunda kakhulu iBhayibhile ndize ndicamngce ngezinto endizifundileyo yaye oko kwakundomeleza ngokomoya.

UYehova wandinceda ukuba ndinxibelelane namaNgqina ngendlela engaqhelekanga. Kwiphephandaba iSoviet Russia, ndafunda inqaku elalithetha kakubi ngabazalwana bethu baseOssetia, kumazantsi-ntshona eRashiya. Eli nqaku lalisithi umsebenzi wamaNgqina kaYehova wawunxamnye noluntu lwaseSoviet. Eli nqaku lalineefani neeadresi zabazalwana noodade. Ndinemincili, ndababhalel’ iileta ndibachazela ukuba ndifuna ukudibana nabo. Xa sadibanayo abazalwana bandixhasa kakhulu yaye bathi uYehova uye wavumela ukuba eli nqaku lipapashwe esenzela ukuba ndide ndinxibelelane nabantu bakhe.

Ndithetha nje ndineminyaka engama-92 ubudala. Ngokwenene, ela joni lalinobubele lalichan’ ucwethe. Phezu kwabo nje ubunzima, ebomini bam bonke izinto ziye zahamba kakuhle.

[Ibhokisi/Umfanekiso okwiphepha 188, 189]

Ukuqinisa “Izikhonkwane Zeentente” Zethu Kangangoko Kunokwenzeka

UDMITRY LIVY

WAZALWA Ngowe-1921

WABHAPTIZWA Ngowe 1943

INGXELO YOBOMI Wakhonza kwiKomiti yeLizwe laseRashiya iminyaka engaphezu kwengama-20 yaye sithethanje ungumdala kwibandla laseSiberia.

KWAKUNGOWE-1944, iinyanga ezintandathu ngaphambi kokuba iphele iMfazwe Yehlabathi  II. Ndandimi phambi kwejaji yomkhosi enkundleni ngenxa yokuba ndandingundilele. Ndagwetyelw’ ukufa, kodwa isigwebo sam satshintshwa saba yiminyaka elishumi ndisebenza nzima ezinkampini.

NgoJanuwari 1945, ndasiwa kwinkampu ekumntla weRashiya kwidolophu ekuthiwa kusePechora, kwiRiphabliki yaseKomi. Phakathi kwamabanjwa awayekulo nkampu kwakukho abazalwana abalishumi. Ngelishwa, ekuphela kweMboniselo endandinayo yathathwa yaye sasala singenako ukutya kokomoya. Ndandidinwe kangangokuba ndandingenakusebenza. Xa sasihlamba kwindawo yokuhlamba, omnye umzalwana wandixelela ukuba ndinqinile. Enyanisweni, imeko yam yayimbi kakhulu kangangokuba ndasiwa kwinkampu yaseVorkuta ukuze ndinyangwe.

Emva kwexesha elithile imeko yam yaya isiba bhetele yaye ndathunywa ukuba ndiye kusebenza ekwarini. Ngaphambi nje kokuba kuphele inyanga ndandisele ndiphinde ndanqina. Ugqirha wayecinga ukuba andityi kodwa ndiyatshaya. Ndamchazela ukuba ndiliNgqina likaYehova kwaye anditshayi. Ndachitha ngaphezu kweminyaka emibini ndikulo nkampu. Nakuba yayindim ndedwa iNgqina babekho ababethand’ ukuva ngenyaniso yaye abanye basabela kwiindaba ezilungileyo.

Ngesinye isihlandlo izalamane zam zandithumelela ikopi yeMboniselo ebhaliweyo. Ndandiza kuyifumana njani ekubeni iipasile zazihlolwa kangaka ngumphathi? Amaphepha ayesongwe kabini aza abekwa ngaphantsi kwetoti enemizantsi emibini aza agqunywa ngamafutha. Umphathi wentolongo wayegqobhoza itoti yaye wayengafumani nto, emva koko wayendinika. Lo mthombo ‘wamanzi aphilayo’ wandomeleza kangangexesha elithile.—Yohane 4:10.

NgoOktobha 1949, ndakhululwa ngaphambi kokuba siphele isigwebo sam yaye ngoNovemba ndabuyela ekhaya eUkraine. Seva ukuba abazalwana abaliqela baye eMoscow ukuya kubhalisa umsebenzi wethu kodwa abasemagunyeni babengafuni ukuwabhalisa amaNgqina kaYehova eSoviet Union.

Ngobusuku bangoAprili 8, ngowe-1951 sakhweliswa kuloliwe nezinye iintsapho zamaNgqina kaYehova sathunyelwa eSiberia. Kwiiveki ezimbini kamva sasikumbindi weSiberia kwidolophana ekuthiwa kuseKhazan kwiPhondo laseIrkutsk.

Wasichukumisa kakhulu uIsaya 54:2 othi: “Yandisa iintambo zentente yakho, uzenze zomelele izikhonkwane zentente yakho.” Kwakubonakala ngathi sizalisekisa esi siprofeto. Ngubani kuthi ebenokuthi ufuna ukufudukela eSiberia? Ndicinga ukuba sifanele siqinise izikhonkwane zeentente zethu kangangoko kunokwenzeka. Ngoko ke, ndiye ndahlala eSiberia ngaphezu kweminyaka engama-55.

[Ibhokisi/Umfanekiso okwiphepha 191, 192]

Andizange Ndibe Nayo Indawo Yokufaka Intloko

UVALENTINA GARNOVSKAYA

WAZALWA Ngowe 1924

WABHAPTIZWA Ngowe-1967

INGXELO YOBOMI Wachith’ iminyaka engama-21 esezintolongweni nasezinkampini yaye eli-18 kuyo wayengekabhaptizwa. UValentina wanceda abantu abangama-44 bafunda inyaniso ngaphambi kokuba afe ngowama-2001.

MNA noMama sasihlala kwintshona yeBelarus. Ndadibana namaNgqina kaYehova ngoFebruwari 1945. Kwafik’ umzalwana ekhayeni lethu kangangezihlandlo ezithathu yaye wasibonisa izinto ezithile eBhayibhileni. Nakuba ndingazange ndiphinde ndimbone ndaqalisa ukushumayela kubamelwane nakubantu endibaqhelileyo. Abasemagunyeni bandibamba yaye ndagwetyw’ iminyaka esibhozo ndisezinkampini. Bandithumela kwiPhondo laseUlyanovsk.

Enkampini, ndandiphulaphula amanye amabanjwa xa encokola ndinethemba lokuba ndiza kudibana neNgqina likaYehova. Ngowe-1948, ndeva elinye ibhinqa elalibanjiwe lithetha ngoBukumkani bukaThixo. Igama lalo lalinguAsya. Ndandikuvuyela gqitha ukuthetha nalo ngemixholo yeBhayibhile. Kungekudala, kwaziswa oodade abathathu kule nkampu. Zazimbalwa iincwadi esasinazo ngoko ke, sazama ukuhlanganisana kangangoko sasikwazi.

Ndakhululwa ngowe-1953, kodwa emva kweminyaka emithathu enesiqingatha ndabanjwelwa ukushumayela yaye ndagwetywa iminyaka elishumi. Ngowe-1957 ndafuduselwa kwinkampu eseKemerovo yaye apho kwakukho oodade abali-180. Sasisoloko sinalo uncwadi lweBhayibhile. Xa kusebusika iincwadi sasizifihla ekhephini yaye ehlotyeni sasizifihla engceni nasemhlabeni. Xa kugqogqwa ndiye ndizifihle ezandleni zam, ndigqume amagxa ngetyali enkulu ndize ndibambe amasondo ayo. Xa ndisuka kweny’ inkampu ndisiya kwenye ndandithwala ikepusi endandiyithunge ngokwam ndifake iiMboniselo eziliqela kuyo.

Ekugqibeleni, ndathunyelwa kwinkampu yaseMordvinia. Kulo nkampu yayikho iBhayibhile, ifihlwe kwindawo ekhuselekileyo. Sasiyifunda kuphela xa kukho udade owayeyigcine kakuhle. IBhayibhile ndaqala ukuyibona kumzalwana owayendifundisa inyaniso ngowe-1945.

Ukukhululwa kwam ngowe-1967, ndafudukela eAngren, eUzbekistan. Apho ndazahlulela kuYehova ndaza ndabhaptizwa. Ndandiqala ngqa ukubona abazalwana emva kolwa tyelelo lokuqala. Kaloku ngaphambi koko ndandisoloko ndivalelwe kwinkampu yamabhinqa kuphela. Ebandleni, bonke abazalwana noodade babenenzondelelo kubulungiseleli yaye ndandibathanda. NgoJanuwari 1969, abazalwana abasibhozo noodade abahlanu babanjwa ngenxa yokuba babeshumayela yaye ndandiphakathi kwabo. Ndagwetyw’ iminyaka emithathu “njengesaphuli-mthetho esinguncanyelweni.” Ndavalelwa ndedwa izihlandlo ezininzi ngenxa yokuba ndandishumayela.

Ndandiqhuba izifundo zeBhayibhile nabantu abanomdla ngaphantsi kwengubo. Sasingavumelekanga ukuba sincokole xa sihamba. Ukuba ukhe nje wabhaqwa uthetha wawusohlwaywa ngokuvalelwa wedwa. Sasisebenzisa kuphela imibhalo yoncwadi olukhutshelwe ngesandla.

Andizange ndibe nayo indawo yokufaka intloko. Iimpahla zam zonke zazisetyesini enye kodwa ndandonwabile yaye ndanelisekile kuba ndandikhonza uYehova.

[Ibhokisi/Umfanekiso okwiphepha 200, 201]

Umcuphi Wandomeleza Ngokomoya

UPAVEL SIVULSKY

WAZALWA Ngowe-1933

WABHAPTIZWA Ngowe-1948

INGXELO YOBOMI Ngokuphindaphindiweyo abasemagunyeni babefundisa uPavel ukuba anyaniseke kwiingcamango zeSoviet yaye ngoku ungumdala kwibandla laseRashiya.

NGOWE-1958 ndabanjwa ngenxa yokushumayela. Igosa elalindipheleke ndisiya kuloliwe, lathi: “Inkosikazi yakho yijonge uyigqibelise soz’ uphinde uyibone.”

EIrkutsk ndavalelwa kwisisele ongenakukwazi ukulala kuso. Emva koku ndachitha iinyanga ezintandathu ndivalelwe ndedwa ngaphambi kokuba kuthethw’ ityala. Ebudeni bokuncinwa kwam ebusuku, abacuphi benza konke okusemandleni abo ukuze balwenze buthathaka ukholo lwam eBhayibhileni nentembelo yam kwintlangano kaThixo. Ndatyholwa ngokubandakanyeka kumsebenzi wamaNgqina kaYehova ongekho mthethweni. Maxa wambi babesiba ndlongondlongo, nangona ngokuqhelekileyo babetshintsha indlela acinga ngayo umntu ngokumnyanzela. Ndamcela uYehova ukuba andinike amandla ukuze ndihlale ndiqinile. Wayesoloko endixhasa.

Ebudeni kokuncinwa, umcuphi wandibizela eofisini yakhe waza wathi: “Ngoku siza kukubonisa oko kwenziwa yintlangano yenu. Uza kubona enoba ngumsebenzi kaThixo okanye akunjalo!”

Wandithi ntshoo waze wathi: “Kulo nyaka kwindibano yenu eyayiseNew York kwakuze abantu abangama-253 000 yaye babekumabala emidlalo amabini. Xa ucinga ngesi siganeko uyazi ukuba kwakungenakwenzeka oku ngaphandle kokuxhaswa yiCIA. Le ndibano yathabatha iintsuku ezisibhozo. Iindwendwe ezazize kule ndibano zazisuka kumazwe awahlukahlukeneyo, zisiza ngeenqwelomoya, oololiwe, iinqanawa nangezinye iindlela. Ngaba konke oku bekunokwenzeka ngaphandle kokuncedwa ngabasemagunyeni? Ngubani obenokuhlawula la mabala emidlalo kangangeentsuku ezisibhozo?”

Umcuphi wasasaza iifoto phezu kwetafile. Kwenye ifoto ndabona iindwendwe ezonwabileyo ezizivathe ezomthonyama. Enye ifoto yayinoMzalwan’ uKnorr enikela intetho, ezinye zinabantu ababhaptizwayo noMzalwan’ uKnorr enika abo babhaptizwayo incwadi ethi “Mayenziwe Intando Yakho Emhlabeni.” Asizange siyifumane le ncwadi kodwa safunda ngayo kamva kwiMboniselo. Endijonge ntshoo, umcuphi wandibuza wathi: “Le ncwadi ithetha ngantoni? Ithetha ngokumkani wasentla noko kuza kwenzeka kuye. AmaNgqina kaYehova anokuyilungiselela njani ewodwa le ndibano? Siyazi ukuba kwezi ziganeko kuya umkhosi waseMerika ukuze ufunde kumzekelo wenu xa ulungiselela izinto zasemkhosini. Kwakhona siyazi ukuba omnye usozigidi wanikela ngemali eninzi ukuze kuqhutywe le ndibano. Oosozigidi abadyiwazi ngemali!”

Lo mcuphi wayengayazi indlela endandivakalelwa ngayo ngelo xesha. Ndandivakalelwa kukuba ndandisendibanweni nakuba ndandisentolongweni. Ndeva ngathi amandla am avuselelwe. Ndandikufuna ngokwenene ukukhuthazwa! UYehova wandisikelela ngendlela ekhethekileyo. Ndandikulungele ukunyamezela iimvavanyo ezaziseza kuza.

[Ibhokisi/Umfanekiso okwiphepha 214, 215]

Iholo Yemiboniso Yayizele Imi Ngembambo NgamaNgqina KaYehova

UVENERA GRIGORYEVA

WAZALWA Ngowe-1936

WABHAPTIZWA Ngowe-1994

INGXELO YOBOMI Ngeminyaka yowe-1960 wayesebenza njengomdlali yaye wayengumdlali ophambili kwifilimu eyayisasaza ubuxoki nxamnye namaNgqina eSoviet. Ukususela ngowe-1995 ebenguvulindlela othe ngxi eSt. Petersburg.

NGOWE-1960, xa ndandiqalisa ukusebenza njengomdlali, ndandidlala indawo ephambili kwifilimu ethi God’s Witnesses, owakhululwa kwiindawo zefilimu zaseSoviet. Le filimu yayibonisa “ihlelo eloyikekayo lamaNgqina kaYehova,” nelibekek’ ityala ngokufa kweqhawekazi uTanya umlinganiswa endandidlala indawo yakhe. Ngokwale filimu uTanya uyaqhwesha kweli “hlelo” aze adibane nesaqhwithi sekhephu enganxibanga bhatyi. Watshon’ ekhephini yaye umbalisi elusizi wathi, “Wafa ngolo hlobo ke uTanya Veselova.” Ndandiyithanda le filimu yayiliwonga elingathethekiyo kum ukuba nenxaxheba ekulweni namaNgqina kaYehova, nakuba ekuphela kwento endandiyazi ngawo yayikoko kwakuthethwa yiyo.

Le filimu yayiboniswa kwiindawo zemiboniso nakwiindawo ekudityanwa kuzo kwizixeko ezininzi zaseSoviet Union. Sihlandlo ngasinye iqala ukudlala kwindawo ethile ndandisiya ndize ndiye eqongeni emva kokuba ibonisiwe. Ngelo xesha abantu baseSoviet babekholelwa nantoni na abayibona kule miboniso. Emva kokuba ndiye eqongeni abantu babekhululeka baze bathi, “Uyaphila!” Emva koko ndandichaza indlela ifilimu eyenziwe ngayo nendlela umalathisi azivelise ngayo izandi ezikhethekileyo nesaqhwithi sekhephu nesingathi sindidudulela kwintlambo encinane size sindigqume.

Ngesinye isihlandlo eVyshniy Volochëk, eKalinin (ngoku ebizwa ngokuba liPhondo laseTver’), enye iholo yemiboniso yayizele imi ngembambo kodwa ngalo ngokuhlwa izinto zenzeka ngenye indlela. Emva kwefilimu elinye ixhego landibuza imibuzo ngonqulo nangemvelaphi yobomi. Akukho nokuba abe mnye umntu owathetha ngefilimu kubantu ababekho. Ndaya emva kweqonga ndaza ndabuza kumququzeleli wesi siganeko ndathi, “Ngubani lo bendithetha naye ngoku bendiseqongeni?”

Wathi: “Ngumphathi wehlelo lamaNgqina kaYehova. Iholo yemiboniso izele ngamaNgqina odwa.” Ndingaqondanga yindlela leyo endadibana ngayo namaNgqina kaYehova. Emva koko ndandifuna ukufunda iBhayibhile kodwa ndandingenayo. Ndatshata indoda yasePoland yaye safudukela khona. Ngowe-1977 oodade ababini bankqonkqoza ekhayeni lethu yaye emva koko ndafunda iBhayibhile kunye nabo. Ndandiyithanda iBhayibhile yaye mna nomyeni wam saba ngabahlobo namaNgqina. Ngowe-1985 singalindelanga utat’ ondizalayo eLeningrad (ngoku ebizwa ngokuba yiSt. Petersburg) wayegula kakhulu yaye mna nomyeni sayakumbona. Ndathandaza kuYehova ukuba andincede ndidibane namaNgqina kaYehova apho.

Ekugqibeleni ndaba liNgqina likaYehova. Ndineminyaka eli-12 ndinguvulindlela othe ngxi yaye umyeni wam uZdzisław usisicaka solungiselelo kwibandla laseSt. Petersburg.

Ndiyazi ngokusuka kumava ukuba ‘ngeemfundiso zabakhohlisi abalahlekisa abantu ngobuqhokolo’ abo bavelisa iifilimu banokukhohlisa abantu abaninzi. (Efe. 4:14) Xa ndandidlala kumboniso oshukumayo wokusasaza ubuxoki eSoviet yayingathi qatha kwaukuthi qatha into yokuba emva kweminyaka engama-30 ndandiza kuba liNgqina likaYehova.

[Ibhokisi ekwiphepha 237]

INguqulelo Yehlabathi Elitsha YesiRashiya

Ngaphezu kwenkulungwane amaNgqina kaYehova ebesebenzisa iinguqulelo ezahlukeneyo zeBhayibhile zesiRashiya. Enye yezo nguqulelo yisinodi. Nangona iyinguqulelo yakudala yaye ingafane ilisebenzise igama likaThixo, iye yaluncedo ekufundiseni amaRashiya amaninzi ukuze aqonde injongo kaThixo. Inguqulelo kaMakarios esebenzisa igama likaThixo kangangezihlandlo ezingama-3 000, nayo ibe luncedo. Kodwa njengokuba inani lamaNgqina angamaRashiya likhula iye yafuneka ngakumbi inguqulelo echanileyo, ecacileyo neyalamaxesha.

IQumrhu Elilawulayo liye lalungiselela ukuba iNguqulelo Yehlabathi Elitsha iguqulelwe ngesiRashiya. Ngaphezu kweminyaka elishumi, isebe laseRashiya liye lazibhokoxa kweli phulo.

Ngowama-2001 kuye kwakhululwa Inguqulelo Yehlabathi Elitsha YeZibhalo ZamaKristu ZesiGrike ngesiRashiya. Ngowama-2007 abafundi besiRashiya ehlabathini bavuyiswe kukukhululwa kweNguqulelo Yehlabathi Elitsha YeZibhalo Ezingcwele ngesiRashiya. Le Bhayibhile yakhululwa okokuqala ngamalungu eQumrhu Elilawulayo uTheodore Jaracz eSt. Petersburg noStephen Lett eMoscow. Emva koko ababekwezi ndibano baqhwaba ixesha elide. Indlela abantu ababenemincili ngayo yayibonakala nakuthathatha. Omnye udade wabhala wenjenje: “Ibhalwe ngolwimi oluvakalayo, olucacileyo, noluqondakalayo! Kunandipheka nangakumbi ngoku ukufunda iZibhalo Ezingcwele.” Abaninzi baye bavakalisa uxabiso lwabo kwintlangano ngala magqabaza alandelayo: “Sesona sipho sixabisekileyo sivela kuYehova!” nangokuthi “Enkosi kakhulu, maz’ enethole.” Eli hlombe liboniswa ngabazalwana lenza kucace ukuba ukukhululwa kweNguqulelo Yehlabathi Elitsha ngesiRashiya sisiganeko esingenakulibaleka kubathandi benyaniso abantetho isisiRashiya ehlabathini lonke.

[Ibhokisi/Umfanekiso okwiphepha 244, 245]

Ngosuku Nje Olunye, Iingxaki Zethu Zaconjululwa

UIVAN NONATALIA SLAVA

BAZALWA Ngowe-1966 nangowe-1969

BABHAPTIZWA Ngowe-1989

INGXELO NGOBOMI Njengokuba babengoovulindlela bafudukela apho kwakufuneka abavakalisi abangakumbi. Sithethanje uIvan ulilungu leKomiti Yesebe LaseRashiya.

NGASEKUPHELENI konyaka wowe-1990 mna noNatali sasuka eUkraine safudukela eRashiya. KwiPhondo laseBelgorod elalinabantu abaphantse babe sisigidi esinesiqingatha, kwakukho abavakalisi abangaphantsi kweshumi. Ngokungathandabuzekiyo—kule ndawo ‘isivuno sasisikhulu, kodwa abasebenzi bembalwa.’—Mat. 9:37.

Ukuze sizixhase kwafuneka sifune umsebenzi. Noko ke, imeko yezoqoqosho yelo lizwe yayimaxongo yaye abantu abaninzi baphulukana nemisebenzi yabo. Ukuze abantu bafumane ukutya, urhulumente wayesasaza amaphetshana okanye amatikiti emisebenzini. Ekubeni sasingasebenzi sasingenawo amaphetshana. Ngenxa yoko, kwakufuneka sithenge ukutya okubiz’ imali emarikeni. Kwakukho nengxaki yokungabi nandawo yokuhlala yaye sasihlala ehotele. Saqesha igumbi ehotele iintsuku ezingama-20, emva koko izipaji zethu phantse zazingenanto. Suku ngalunye sathandaza kuYehova sicela asincede sifumane umsebenzi nendawo yokuhlala efikelelekayo. Ngalo lonke elo xesha sasikhuthele sishumayela, sikhangela abantu abanomdla enyanisweni. Usuku lokugqibela lokuhlala ehotele lwafika. Ngaloo madlana yayisele sathenga isonka nobisi. Ngaloo ngokuhlwa ngaphambi kokuba siye kulala sambongoza uYehova ukuba asincede sifumane umsebenzi nendawo yokuhlala kuba ngentsasa elandelayo kwakufuneka sihambe kulo hotele.

Kusasa savuswa kukukhala kwefowuni. Umphathi wehotele wasixelela ukuba ukanina wayendilindile kwigumbi elisekungeneni. Ukanina wam wandipha imali esithi ebesandula ukufumana uchatha kumvuzo wakhe. Kodwa akuzange kuphelele apho. Emva kwemizuzu embalwa omnye umzalwana wasifowunela esixelela ukuba ikhona indawo ayifumeneyo engabizi kangako. Ukongezelela koko kwangolo suku lunye safumana umsebenzi wokunyamekela igadi kwisikolo sabantwana abancinane. Ngosuku nje olunye iingxaki zethu zaconjululwa. Sasinemali, indawo yokuhlala nomsebenzi. Ngokungathandabuzekiyo uYehova wayiva waza wayiphendula ngendlela emangalisayo imithandazo yethu.

Ngowe-1991 eBelgorod, eSikhumbuzweni kwakuze abantu abangama-55; kunyaka owalandelayo kweza abali-150. Ngowe-1993 kwakuze abangama-354. Ngowama-2006, eso sixeko sasinamabandla amathandathu yaye kwiPhondo laseBelgorod kukho abavakalisi abangaphezu kwama-2 200.

[Ibhokisi ekwiphepha 250]

Inkqubela Kwezomthetho

Ilungelo lethu lokunqula ngaphandle kokuphazanyiswa ngurhulumente laqinisekiswa ngoJanuwari 2007 xa iNkundla YaseYurophu Yamalungelo Abantu iye yavumelana ngamxhelo-mnye kwisigwebo sokuba “ukufunda njengeqela nokuxubusha uncwadi lwamaNgqina kaYehova kuyindlela eyamkelekileyo yonqulo lwawo nokufundisa.”

Nakuba umsebenzi wamaNgqina kaYehova wawubekelwe imiqathango eMoscow ngowama-2004, abazalwana baqhubeka behlanganisana esidlangalaleni ukuze banqule bashumayele kangangoko kunokwenzeka. Ngowama-2007 abazalwana baye bavuyiswa kukuba beqhube iSikhumbuzo neendibano zezithili eMoscow ngaphandle kokuphazanyiswa yaye izinto zihambe kakuhle phantse kuyo yonke iRashiya.

Nakuba kusekho imiqobo mayela nomthetho, abazalwana bethu bayaqhubeka bezikhusela ngenkalipho xa behlaselwa ngenkcaso ngabasemagunyeni. Ngokomzekelo kuye kwafakwa isimangalo esitsha kwiNkundla YaseYurophu Yamalungelo Abantu, mayela nokuphazamisa iSikhumbuzo liSebe lamaPolisa aseLyublino eMoscow ngoAprili 12 2006. Amapolisa avalele abazalwana abali-14 baza bagrogrisa igqwetha labo bephethe amabhozo. Nakuba inkundla yasekuhlaleni yavumelana nabazalwana ukusa kumkhamo othile inkundla yesibheno yasitshintsha eso sigwebo. Ukongezelela ngoJulayi 2007, kuye kwafakwa isimangalo nxamnye namagosa karhulumente aye aphanda ngomsebenzi wethu ngokungekho mthethweni eSt. Petersburg.

[Isicangca/Igrafu ekwiphepha 228-230]

ULUHLU LWEZIGANEKO​—ERashiya

Ngowe-1890

Ngowe-1891 Ngenxa yokuba wayeshumayela ngenkalipho, uSemyon Kozlitsky wagxothelwa kummandla okwimpuma yoBukhosi baseRashiya yaye apho wayesebenza nzima.

Ngowe-1904 Isebe laseJamani lifumana iileta ezisuka eRashiya zibamba ngazibini ngoncwadi lweBhayibhile.

Ngowe-1910

Ngowe-1913 Urhulumente waseRashiya uyayazi iofisi Yabafundi BeBhayibhile eseFinland, ngoko eyayiyinxalenye yoBukhosi baseRashiya.

Ngowe-1923 IWatch Tower Society iqalisa ukufumana iileta ezininzi ezicela ukuba uncwadi lweBhayibhile luthunyelwe eRashiya.

Ngowe-1928 EMoscow, uGeorge Young ucel’ imvume yokushumayela kwaBafundi BeBhayibhile baseRashiya. Abasemagunyeni bayala ukwandisa ixesha lokuhlala kwakhe.

Ngowe-1929 Kutyotyelwa isivumelwano nesikhululo sikanomathotholo saseTallinn, e-Estonia. Kudlalwa iintetho zeBhayibhile yaye ziviwa eLeningrad nakwezinye izixeko.

Ngowe-1930

Ngowe-1939-40 IUSSR ithimba intshona yeUkraine, iMoldova neeriphabliki zaseBaltic. Amawaka amaNgqina kaYehova akumda welo lizwe.

Ngowe-1944 AmaNgqina amaninzi athunyelwa kwiintolongo nakwiinkampu ekusetyenzwa nzima kuzo kulo lonke elaseRashiya.

Ngowe-1949 AmaNgqina kaYehova asuswa eMoldova agxothelwa eSiberia nakwiMpuma Ekude.

Ngowe-1950

Ngowe-1951 AmaNgqina angaphezu kwama-8 500 asuka kwintshona yeUkraine, eBelarus, eLatvia, eLithuania nase-Estonia agxothelwa eSiberia.

Ngowe-1956/57 Iindwendwe ezize kwiindibano zesithili ezili-199 ehlabathini lonke zibongoza urhulumente waseSoviet ukuba abantu banqule ngokukhululekileyo.

Ngasekupheleni kweminyaka yowe-1950 AmaNgqina angaphezu kwama-600 avalelwe odwa kwiinkampu ezikhethekileyo ekusetyenzwa nzima kuzo zaseMordvinia.

Ngowe-1965 Urhulumente waseSoviet ulikhupha litsole elokuba abo bagxothelwe eSiberia bahlale kweminye imimandla engaphandle kweSiberia. AmaNgqina agxothelwe eSiberia asasazeka aza ahlale kulo lonke elo lizwe.

Ngowe-1970

Ngowe-1989-90 Okwesihlandlo sokuqala amalungu eQumrhu Elilawulayo adibana nabazalwana baseRashiya. AmaNgqina asuka eUSSR aya endibanweni ekhethekileyo ePoland.

Ngowe-1990

Ngowe-1991 NgoMatshi 27, amaNgqina kaYehova amkelwa ngokusemthethweni eRashiya.

Ngowe-1992/93 Kwaqhutywa iindibano zezizwe ngezizwe eSt. Petersburg naseMoscow.

Ngowe-1997 Kunikezelwa isebe laseRashiya elikwidolophana yaseSolnechnoye, kufuphi naseSt. Petersburg.

Ngowe-1999 Kunikezelwa iHolo Yendibano yokuqala eRashiya, eSt. Petersburg.

2000

Ngowama-2003 Isebe ligqityiwe ukwandisa.

Ngowama-2007 Kukho amabandla namaqela abavakalisi angaphezu kwama-2 100 eRashiya.

[Igrafu]

(Yiya kwimpapasho)

Inani Labavakalisi

Inani Loovulindlela

Inani Labavakalisi

Inani Loovulindlela

Inani labavakalisi kumazwe ali-15 awayekade eyiU.S.S.R.

360 000

300 000

240 000

180 000

120 000

60 000

40 000

20 000

Ngowe-1890 Ngowe-1910 Ngowe-1930 Ngowe-1950 Ngowe-1970 Ngowe-1990 1990 2000

[Umzobo/Imaphu ekwiphepha 218]

(Ukuba ufuna inkcazelo ehlahlelwe kakuhle, yiya kwimpapasho)

Amanye amasebe ancedisa ekuhambiseni uncwadi elizweni lonke

GERMANY FINLAND

↓ ↓

Solnechnoye

↓ ↓ ↓ ↓

BELARUS KAZAKHSTAN MOSCOW RUSSIA

JAPAN

↓

Vladivostok

↓

KAMCHATKA

[Iimaphu ezikwiphepha 116, 117]

(Ukuba ufuna inkcazelo ehlahlelwe kakuhle, yiya kwimpapasho)

ARCTIC CIRCLE

ARCTIC OCEAN

North Pole

Barents Sea

Kara Sea

Laptev Sea

East Siberian Sea

Chukchi Sea

Bering Strait

SWEDEN

NORWAY

DENMARK

COPENHAGEN

GERMANY

POLAND

Lodz

WARSAW

Baltic Sea

FINLAND

ESTONIA

LATVIA

LITHUANIA

BELARUS

Brest

UKRAINE

L’viv

MOLDOVA

Caspian Sea

KAZAKHSTAN

ASTANA

Kengir

UZBEKISTAN

TASHKENT

Angren

CHINA

MONGOLIA

ULAANBAATAR

CHINA

Sea of Japan

JAPAN

TOKYO

Hokkaido

Sea of Okhotsk

Bering Sea

RUSSIA

Petrozavodsk

St. Petersburg

Solnechnoye

Kaliningrad

Novgorod

Vyshniy Volochek

MOSCOW

Tula

Orel

Kursk

Voronezh

Udarnyy

Vladimir

Ivanovo

Nizhniy Novgorod

Syktyvkar

Ukhta

Pechora

Inta

Novaya Zemlya

Vorkuta

URAL MTS.

SIBERIA

Yekaterinburg

Naberezhnye Chelny

Izhevsk

Saratov

Volzhskiy

Stavropol’

Pyatigorsk

Mt. El’brus

Nal’chik

Nartkala

Beslan

Vladikavkaz

CAUCASUS MTS.

Astrakhan

Volga River

Tomsk

Novosibirsk

Kemerovo

Krasnoyarsk

Novokuznetsk

Ust’-Kan

Aktash

Biryusinsk

Oktyabr’skiy

Bratsk

Vikhorevka

Tulun

Central Khazan

Zima

Zalari

Usol’ye-Sibirskoye

Kitoy

Angarsk

Irkutsk

Lake Baikal

Kirensk

Khabarovsk

Vladivostok

Korsakov

Yuzhno-Sakhalinsk

Sakhalin

Yakutsk

Oymyakon

Ust’-Nera

Kamchatka

Chukchi Peninsula

Kolyma River

Khayyr

Noril’sk

[Imaphu ekwiphepha 167]

(Ukuba ufuna inkcazelo ehlahlelwe kakuhle, yiya kwimpapasho)

Caspian Sea

Baltic Sea

Barents Sea

Kara Sea

ARCTIC OCEAN

North Pole

Laptev Sea

East Siberian Sea

Chukchi Sea

Bering Strait

Sea of Okhotsk

Sea of Japan

KAZAKHSTAN

CHINA

MONGOLIA

MURMANSK

PSKOV

TVER’

MOSCOW

BELGOROD

VORONEZH

ROSTOV

KABARDINO-BALKARIA

ALANIA

IVANOVO

NIZHEGOROD

MORDVINIA

ULYANOVSK

VOLGOGRAD

TATARSTAN

PERM’

KOMI REP.

URAL MTS.

SIBERIA

SVERDLOVSK

CHELYABINSK

KURGAN

TYUMEN’

OMSK

TOMSK

NOVOSIBIRSK

ALTAI

ALTAI REP.

KEMEROVO

KHAKASSIA REP.

KRASNOYARSK

TUVA REP.

IRKUTSK

BURYATIA

CHITA

SAKHA REPUBLIC

AMUR

KHABAROVSK

PRIMORSKIY KRAY

SAKHALIN

KAMCHATKA

[Umfanekiso okwiphepha 66]

Ukuvela kwelanga kwiNcam yeChukchi

[Imifanekiso ekwiphepha 68]

Olu phawu, kulwimi lwesiKazakh nesiRashiya, lubonisa idolophana yaseSiberia iBukhtarma, apho uSemyo Kozlitsky wabhacela khona

[Imifanekiso ekwiphepha 71]

AbakwaHerkendells bachitha iintsuku zabo zokuqala emtshatweni benceda abantu abathetha isiJamani eRashiya

[Imifanekiso ekwiphepha 74]

UKaarlo Harteva wanikwa isiqinisekiso esigximfizwe isitampu liBhunga LaseRashiya eNew York

[Umfanekiso okwiphepha 80]

Kule ndibano yesiRashiya eyayiseCarnegie, ePennsylvania, NgoMeyi 1925, kweza abantu abangama-250 kwaza kwabhaptizwa abangama-29

[Umfanekiso okwiphepha 81]

Eli phephancwadi lavakalisa ukuba: “IPhondo laseVoronezh lalinyakazela ngamahlelo”

[Umfanekiso okwiphepha 82]

UGeorge Young

[Imifanekiso ekwiphepha 84]

Phantse iminyaka elishumi, uAleksandr Forstman waguqulela amaphecana, iincwadana neencwadi kwisiRashiya

[Umfanekiso okwiphepha 90]

URegina noPyotr Krivokulsky ngowe-1997

[Imifanekiso ekwiphepha 95]

UOlga Sevryugina waba ngumkhonzi kaYehova ngenxa yeeleta zikaPyotr ‘awayezibophelela ngelitye’

[Umfanekiso okwiphepha 100]

UIvan Krylov

[Imifanekiso ekwiphepha 101]

AmaNgqina awayethunyelwe elubhacweni eSiberia ayazakhela

[Umfanekiso okwiphepha 102]

UMagdalina Beloshitskaya nentsapho yakhe bathunyelwa elubhacweni eSiberia

[Umfanekiso okwiphepha 110]

UViktor Gutshmidt

[Umfanekiso okwiphepha 115]

UAlla ngowe-1964

[Umfanekiso okwiphepha 118]

USemyon Kostylyev namhlanje

[Umfanekiso okwiphepha 120]

Uqeqesho awalufumanayo uVladislav Apanyuk lwamnceda woyisa iimvavanyo

[Umfanekiso okwiphepha 121]

Amapolisa afumana le ncwadana, “Emva kweArmagedon—Ihlabathi Elitsha LikaThixo,” kwikhaya likaNadezhda Vishnyak

[Umfanekiso okwiphepha 126]

UBoris Kryltsov

[Umfanekiso okwiphepha 129]

UViktor Gutshmidt ekunye nodadewabo (ngasemva), iintombi zakhe nomfazi wakhe uPolina, mayela nenyanga ngaphambi kokuba abanjwe ngowe-1957

[Umfanekiso okwiphepha 134]

UIvan Pashkovski

[Umfanekiso okwiphepha 136]

Ngowe-1959, iphephancwadi ‘iCrocodile’ lashicilela umfanekiso wencwadi eyayifunyenwe engceni

[Umfanekiso okwiphepha 139]

Ngaphantsi kwale ndlu kwakukho umatshini wokushicilela owabhaqwa yiKGB ngowe-1959

[Umfanekiso okwiphepha 142]

UAleksey Gaburyak wancedisa ekumanyaniseni abantu ekudala bohlukana

[Imifanekiso ekwiphepha 150]

Izixhobo Zokushicilela Esasizenzele Ngokwethu

Umatshini wokushicilela iRotary

Isixhobo sokucinezela amaphepha

Isixhobo sokusika amaphepha

Isixhobo sokudibanisa amaphepha

[Umfanekiso okwiphepha 151]

UStepan Levitsky, umqhubi wetram waba nenkalipho wathetha nomshicileli

[Umfanekiso okwiphepha 153]

UGrigory Gatilov washumayela kwamanye amabanjwa entolongweni

[Imifanekiso ekwiphepha 157]

Iintyatyambo ezinde zaba yindawo entle yokuzifihla xa kufundwa iBhayibhile

[Umfanekiso okwiphepha 161]

“IMboniselo” eyayenziwe yaba ncinane kakhulu

[Umfanekiso okwiphepha 164]

“Isindululo sePresidium of the Supreme Soviet yaseUSSR”

[Umfanekiso okwiphepha 170]

Abazalwana babefihla izinto “ezixabisekileyo” kwiityesi ezinamacala amabini naphantsi kweebhutsi zabo

[Umfanekiso okwiphepha 173]

UIvan Klimko

[Umfanekiso okwiphepha 175]

Ibhokisi yomatshisi yayinokufihla “iiMboniselo” ezintlanu nezintandathu” ezikhutshelwe ngesandla ngokungathi bekuhamba isigcawu

[Umfanekiso okwiphepha 184, 185]

Kuyo yonke iminyaka ababevalelwe ngayo kwinkampu yaseMordvinia, akukho namnye umzalwana owaphoswa siSikhumbuzo

[Umfanekiso okwiphepha 194]

UNikolai Gutsulyak washumayela ngokungacwangciswanga kumfazi womphathi wenkampu

[Imifanekiso ekwiphepha 199]

Iindibano Zezizwe Ngezizwe

Iindwendwe zaseRashiya ezaya kwiindibano ezintathu zezizwe ngezizwe ePoland ngowe-1989

EWarsaw

EChorzow

EPoznan

[Umfanekiso okwiphepha 202]

Emva kokubhaliswa ngokusemthethweni, ukusuka ngasekhohlo ukuya ngasekunene: uTheodore Jaracz, uMichael Dasevich, uDmitry Livy, uMilton Henschel, umntu osebenza kwisebe lobulungisa, uAnany Grogul, uAleksey Verzhbitsky, noWilli Pohl

[Imifanekiso ekwiphepha 205]

UMilton Henschel unikela intetho kwiNdibano Yezizwe Ngezizwe ‘Yabathwali Bokukhanya’ ngowe-1992, eyayise St. Petersburg, kwiBala iKirov

[Umfanekiso okwiphepha 206]

Kwathengwa umhlaba eSolnechnoye, eRashiya

[Umfanekiso okwiphepha 207]

Aulis noEva Lisa Bergdahl babephakathi kweqela lokuqala lamatsha-ntliziyo elafika eSolnechnoye

[Umfanekiso okwiphepha 208]

UHannu noEija Tanninen bathunyelwa eSt. Petersburg

[Umfanekiso okwiphepha 210]

URoman Skiba ephelekwa ngumfazi wakhe uLyudmila babehamba imigama emide kumsebenzi wesithili

[Umfanekiso okwiphepha 220]

Abazalwana ababesothula uncwadi ezibukweni laseVladivostok

[Umfanekiso okwiphepha 224]

UArno noSonja Tüngler baye banandipha amalungelo aliqela kwisabelo sabo saseRashiya

[Umfanekiso okwiphepha 226, 227]

Intlanganiso yebandla eyayiqhutyelwa kwihlathi elalikufuphi neSt. Petersburg ngowe-1989

[Umfanekiso okwiphepha 238]

Isebe laseRashiya livelela ukuguqulelwa kweempapasho ngeelwimi ezingaphezu kwama-40

[Umfanekiso okwiphepha 243]

ISikolo Senkonzo Yobuvulindlela esaqhutywa okokuqala eSt. Petersburg, ngoJuni 1996

[Imifanekiso ekwiphepha 246]

Ukushumayela eRashiya

Kwintsimi yePhondo lasePerm naseNartkala

Kwizitrato zaseSt. Petersburg

Kwindlu ngendlu eYakutsk

Kwimarike yaseSaratov

[Imifanekiso ekwiphepha 252, 253]

Isebe LaseRashiya

Iindawo zokuhlala nemimandla eyingqongileyo

[Umfanekiso okwiphepha 254]

Indibano yesithili eyayiseMoscow nekwakuze abantu abangama-23 537

[Umfanekiso okwiphepha 254]

Ibala Lemidlalo iLuzhniki