UYehova Uyaluvuza Ukholo Nenkalipho
“UThixo wethu esimbusayo unako [ukusihlangula, NW], wosisindisa ezikweni elivutha umlilo, nasesandleni sakho, kumkani.”—DANIYELI 3:17.
1. Sisiphi isifundo esibalaseliswe kwinqaku elandulelayo, yaye kungani ukuhlolisiswa kwakhona kwezo ziganeko kuya kuba yingenelo?
UYEHOVA UTHIXO, uMongami Wendalo Iphela, ubafundisile abalawuli behlabathi izifundo ezibalulekileyo ezimayela nokuphakama kwakhe. Kwinqaku elandulelayo, siyibonile indlela oku okwenzeka ngayo kwiziganeko ezibhalwe kwizahluko ezithandathu zokuqala zencwadi kaDaniyeli. Ngoku kwaezi ngxelo zinokuphinda zihlolisiswe ukuze kubonwe oko sinokukufunda kuzo ngokuvisisana nala mazwi aphefumlelweyo ompostile uPawulos: “Izinto zonke ezabhalwayo ngenxa engaphambili, zaye zibhalelwa okwethu ukufundiswa, ukuze sithi ngalo unyamezelo novuselelo lwezibhalo sibe nalo ithemba.”—Roma 15:4.
2, 3. Ngoobani ababephakathi kwabo bathi bathinjwa nguKumkani uNebhukadenetsare, yaye sinokufikelela kweziphi izigqibo ngokuphuma kwintsingiselo yamagama abo?
2 Kwakungomnyaka wama-617 B.C.E., ngethuba lolawulo olufutshane lukaYehoyakin, unyana kaKumkani uYehoyakim, awathi uKumkani uNebhukadenetsare wayalela ukuba kuziswe eBhabhiloni abathile phakathi kwabona bafana baneempawu ezintle nabazizilumko kulutsha lwamaYuda. Phakathi kwaba kwakukho uDaniyeli, uHananiya, uMishayeli, kwanoAzariya.—Daniyeli 1:3, 4, 6.
3 Ngokusuka kwintsingiselo yamagama abo, licace gca elokuba phezu kwazo nje iimeko zobungendawo ezazesamele kwaYuda ngelo xesha, aba bafana baselula bane bangamaHebhere babenabazali abahlonela uThixo. Igama elithi “Daniyeli” lithetha ukuba “Umgwebi Wam NguThixo.” ElikaHananiya igama lithetha ukuba “UYehova Ubonakalise Inkoliseko; UYehova Ube Nobabalo.” Kunokwenzeka ukuba elikaMishayeli igama lithetha ukuba “Ngubani Na OnjengoThixo?” okanye “Ngubani OngokaThixo?” Yaye elika-Azariya igama lithetha ukuba “UYehova Ube Luncedo.” Ngokungathandabuzekiyo kwa-amagama abo ayelukhuthazo kubo ukuba bathembeke kokuphela koThixo oyinyaniso. Endaweni yala magama, amaKaledi ababiza aba bafana bangamaHebhere ngokuthi nguBheletshatsare, uShadraki, uMeshaki, uAbhede-nego. Kakade ke, ekubeni babengamakhoboka kwigunya lasemzini, babengenakuzikhethela mayela nelokuba abathimbi babo babesebenzisa waphi na amagama xa bebabiza.—Daniyeli 1:7.
Ukuvavanywa Kokholo Nenkalipho
4. Yintoni eyalatha ukuba uYehova wayefuna abantu bakhe bayithabathe nzulu imithetho yakhe emayela nezilwanyana ezicocekileyo neziziinqambi?
4 Abazali bawo aboyik’ uThixo abazange bawanike nje kuphela la maHebhere mane isiqalo esihle ebomini ngamagama abawathiya wona kodwa bamele ukuba bawakhulisa ngokungqongqo ngokoMthetho kaMoses, kuquka neenkalo zawo ezingezinto ezidliwayo. UYehova uThixo ngokwakhe wazigqala ezi nkalo zibaluleke kangangokuba kwakusemva kokudwelisa izalelo ezininzi ezikwanjalo awathi wachaza esithi: “Ize nibe ngcwele, ngokuba ndiyiNgcwele [ndingcwele mna, NW].”—Levitikus 11:44, 45.
5. Kwavavanywa njani ukuqeqeshwa okuhle kwabafana abane abangamaHebhere?
5 Kungekudala oku kuqeqeshwa kuhle kwaba bafana bane bangamaHebhere kwavavanywa. Njani njalo? Kuba ‘babemiselwe umamkeliso wemihla ngemihla ekudleni kokumkani nasewayinini ayiselayo.’ (Daniyeli 1:5) Babesazi ukuba phakathi kwezinto ezazalelwe nguMthetho kaMoses yayikukutya okunjengeehagu, imivundla, iimbatyisi, kwaneempalanga. Kwanenyama eyayivumelekile ngokoMthetho yayithandabuzeka kwinkundla yaseBhabhiloni, ekubeni kwakungekho ndlela yakwazi enoba yayophiswe ngokufanelekileyo kusini na. Ngaphezu koko, kusenokwenzeka ukuba inyama enjalo iye yangcoliswa zizithethe zonqulo lobuhedeni.—Levitikus 3:16, 17.
6. Asabela njani amaHebhere amane kolu vavanyo?
6 Ayenokwenza ntoni la maHebhere mane? Sifunda ukuba uDaniyeli, yaye ngokungathandabuzekiyo kwanabanye abathathu, wazimisela entliziyweni yakhe ukuba angazingcolisi ngokutya okunjalo. Ngenxa yoko, ‘waqhubeka ecela’ imifuno nje engenanto kunezibiliboco zokumkani waza wacela amanzi kunewayini yakhe. Into yokuba yiyiphi na eyayinencasa ngakumbi kunenye ayizange ithi qatha nokuthi qatha ezingqondweni zabo. Ngokuqinisekileyo kwafuna ukholo nenkalipho ukujamelana nale mbambano. Phofu ke, ekubeni uYehova wayenomdla kwaba bafana bane, waqinisekisa ukuba igosa eliyintloko lale nkundla lalinesimo sengqondo senkoliseko ngakuDaniyeli. Kambe ke, eli gosa loyika ukuvumelana nesicelo sikaDaniyeli ngenxa yokoyika umphumo ekwakuya kuba nawo oko kutya kwimpilo kaDaniyeli. Ngoko uDaniyeli wacela ukuba mabavunyelwe khe bakulinge oku kudla kangangemihla elishumi. Wayenokholo olomeleleyo lokuba ukuthobela uMthetho kaThixo kwakungayi kumnika nje kuphela isazela esilungileyo kodwa kwakuya kungqineka kuyingenelo ngokwasempilweni. Ngenxa yokuma kwawo, ngokungathandabuzekiyo la maHebhere mane kwafuneka enyamezele ukunyenjwa okukhulu.—Daniyeli 1:8-14; Isaya 48:17, 18.
7. Loo maHebhere aselula avuzwa njani ngokuma kwawo ngenkalipho?
7 Kwafuna ukholo nenkalipho ngala maHebhere mane ukuvus’ imbambano ngokumayela nokudla kwawo. Kodwa enjani yona indlela awavuzwa ngayo ngokwenjenjalo, kuba ekupheleni kwemihla elishumi, abonakala enomkhitha yaye esempilweni ngakumbi kunabo nabaphi abanye abafana! UYehova wayebanika ulwazi, ukuqonda nobulumko, ukuze bathi xa bevele phambi kokumkani ekupheleni kwethuba lokuqeqeshwa kwabo iminyaka emithathu, abafumane ‘bezidlula kalishumi zonke izazi nabakhwitsi ababesebukumkanini bakhe bonke.’—Daniyeli 1:20.
8. Sisiphi isifundo esikhoyo koku kubakhonzi bakaYehova banamhla?
8 Oku kusisifundo kubo bonke abakhonzi bakaYehova uThixo namhlanje. Abo bafana bangamaHebhere babesenokuqiqa ngelithi izalelo ezimayela nezinto ezidliwayo ezikuMthetho kaMoses zazingabalulekanga kangako, ubuncinane xa zithelekiswa neMithetho Elishumi okanye imithetho emayela namadini okanye imisitho yeminyaka ngeminyaka. Kodwa kwakungenjalo, la maHebhere anyanisekileyo ayekuxhalabele ukuphila ngokuvisisana nazo zonke iinkalo zoMthetho kaThixo. Oku kusikhumbuza umgaqo owachazwa nguYesu, njengokuba ubhalwe kuLuka 16:10: “Othembekileyo kokuncinane, uthembekile nakokukhulu; nongalungisiyo kokuncinane, akalungisi nakokukhulu.”—Thelekisa uMateyu 23:23.
9. Wambi amaNgqina alubonakalise njani ukholo olukwanjalo namhlanje?
9 Izihlandlo ezininzi amaNgqina kaYehova abonakalisa ukholo olukwanjalo nenkalipho ekwanjalo, njengaxa kufikelela ekuceleni abaqeshi bawo ukuba bawanike ixesha lokukhululeka emsebenzini ukuze aye kwindibano yesithili. Yaye ngokuphindaphindiweyo, kusoloko kuqhelekile ukuba avunyelwe xa ecela. AmaNgqina afuna ukungenela ubuvulindlela okanye abe ngoovulindlela abangabancedani aye anomnqweno obukhali wokufumana umsebenzi wengqesho wesingxungxo yaye ngokufuthi aye alifumana elo lungelo.
10. Kukonke nje oku, kunasiphi isifundo kubazali abangamaNgqina?
10 Esinjani sona ukuba sihle isifundo esinokufundwa ngabazali aboyik’ uThixo banamhla kwingqeqesho ecacileyo yaba bafana bane bangamaHebhere! Xa abazali abangamaKristu benezilangazelelo zokwenene zokomoya ngabantwana babo ezintliziyweni zabo, baya kuzibeka tanci ebomini babo, ngokuvisisana noMateyu 6:33. Banokwandula ke balindele ukuba abantwana babo baya kukwazi ukuxhathisa izilingo neengcinezelo zabalingane babo nezabafundisi-ntsapho esikolweni zokuba babhiyozele imihla yokuzalwa okanye iiholide okanye baphule imigaqo engokweZibhalo nangezinye iindlela. Ngaloo ndlela aba bazali boyik’ uThixo bangqinela IMizekeliso 22:6 njengeyinyaniso.
Ukuwatyhila Ngokungenaloyiko Amaphupha KaNebhukadenetsare
11. Namhlanje sinokuwulandela njani umzekelo kaDaniyeli nezihlobo zakhe ezithathu?
11 Isahluko sesibini sikaDaniyeli sisinika omnye umzekelo wokholo nenkalipho. Xa uDaniyeli wevayo ngommiselo wokumkani wokutshabalalisa zonke izilumko zaseBhabhiloni ngenxa yokuba zingakwazanga ukumxelela iphupha lakhe nentsingiselo yalo, ngaba uDaniyeli namaqabane akhe amathathu bankwantya? Abazange benjenjalo konke konke! Kunoko, enokholo olupheleleyo lokuba uYehova wayeya kumnika inkcazelo eyayifunwa ngukumkani, uDaniyeli wavela phambi kwaloo mlawuli waza wacela ixesha lokuba akhe aye kulungiselela impendulo eyayifuneka. Esi sicelo samkelwa. Wandula ke uDaniyeli namaqabane akhe amathathu bawuthandazela ngokunyanisekileyo lo mcimbi. UYehova waluvuza ukholo lwabo ngokubanika inkcazelo eyayifuneka. Kwathi kwakuba njalo ke, uDaniyeli wenza umthandazo osuk’ entliziyweni wokubulela kuYehova. (Daniyeli 2:23) Yaye ukutyhila kukaDaniyeli iphupha elikwisahluko 4 kwafuna ukuba amxelele uKumkani uNebhukadenetsare ukuba wayeya kuchitha iminyaka esixhenxe ephila njengenkomo kunye nezilwanyana zasendle. Oko kwafuna ukholo nenkalipho efana naleyo abantu bakaThixo kufuneka beyibonakalisile namhlanje ekuvakaliseni isigidimi esinamandla sempindezelo Yakhe nxamnye nehlabathi likaSathana.
‘Ukucima Amandla Omlilo’
12, 13. Isahluko 3 sikaDaniyeli sibalisa luphi uvavanyo ezazijamelene nalo izihlobo zikaDaniyeli ezithathu?
12 UDaniyeli isahluko 3 uchaza ngesinye sezona ziganeko zibalaseleyo kwingxelo yeBhayibhile esibonisa indlela uYehova awaluvuza ngayo ukholo olumangalisayo nenkalipho yabakhonzi abathathu abangamaHebhere. Khawuwuthelekelele lo mbono. Zonke izithwalandwe nezidwangube zaseBhabhiloni zibuthelene kwithafa laseDura. Phambi kwazo kumi umfanekiso wegolide ongama-27 eemitha ukuphakama ne-2,7 leemitha ububanzi. Ukuze achukumise iimvakalelo zabo, ukumkani ulungiselele ukuba kubekho iqela lentambula. Kuthi kwakuvakala isandi somculo, abo babutheleneyo bamele ‘bawe phantsi baze baqubude kumfanekiso wegolide ukumkani uNebhukadenetsare awumisileyo. Yaye nabani na ongawi phantsi aqubude uthatyathwa kwangeso sihlandlo sinye aphoselwe kwiziko lomlilo elivuthayo.’—Daniyeli 3:5, 6.
13 Akukho mathandabuzo mayela noku: Ukwala ukuthobela loo myalelo kwakufuna ukholo olukhulu nenkalipho. Kodwa ‘ukuthembeka kwabo kokuncinane’ kwabalungiselela ukuba ‘bathembeke nakokukhulu.’ Isibakala sokuba ukuma kwabo kwakusenokuwabeka engozini namanye amaYuda sasingangeni ndawo okwakalokunje. Babengasayi kuqubuda baze bawunqule loo mfanekiso. Ukwala kwabo ngokubonakalayo kwaphawulwa zezinye izinxulumani zabo ezinomona, ezaba ngathi ziphetshethwa ngumoya ukuya kubika oku kukumkani.
14. UNebhukadenetsare wasabela njani kukwala kwabo ukuqubuda, yaye baphendula njani kwisisongelo sakhe sokugqibela?
14 ‘Equmbile yaye eshushu ngumsindo,’ uNebhukadenetsare wayalela ukuba makaziswe kuye la maHebhere mathathu. Umbuzo wakhe othi, “Nenza ngabomi na?” ubonisa ukuba wayengenakuyithelekelela into yokuba babefanele bakwale ukuqubuda baze banqule loo mfanekiso wegolide. Wayekulungele ukubanika elinye ithuba, kodwa ukuba babesaqhubeka besala, babeya kuphoselwa kwiziko lomlilo elivuthayo. Waza wathi umlawuli onekratshi waseBhabhiloni, “Ngubani na ke uThixo oya kunisindisa esandleni sam?” Enenkalipho nokholo lokwenyaniso kuYehova, la maHebhere mathathu amphendula ngentlonelo ukumkani, esithi: “Akufuneki kuthi ukuba sikuphendule ngale ndawo. Ukuba uThixo wethu esimbusayo unako [ukusihlangula, NW] wosisindisa ezikweni elivutha umlilo, . . . kumkani. Ke, ukuba akunjalo, makwazeke kuwe, kumkani, ukuba asiyi kubabusa oothixo bakho, asiyi kuqubuda kumfanekiso wegolide owumisileyo.”—Daniyeli 3:13-18.
15. Wathabatha liphi inyathelo uNebhukadenetsare?
15 Ukuba uNebhukadenetsare wayenomsindo ngaphambili, ngoku wayetshawuza imibane ngumsindo, kuba sifunda ukuba “nokumila kobuso bakhe baba bubi” ngakumaHebhere amathathu. (Daniyeli 3:19) Okwalatha ukubharhumla kwakhe ngumyalelo wakhe wokuba malenziwe shushu iziko izihlandlo ezisixhenxe ngaphezu kwesiqhelo. Zandula ke izigantsontso ezithile zamadoda akumkhosi wakhe zawabamba la maHebhere mathathu zaza zawaphosa kwiziko elivuthayo. Amadangatye ayemakhulu kangangokuba awabulala amadoda awayesenza lo msebenzi.
16. Lwavuzwa njani ukholo lwamaHebhere amathathu?
16 Kodwa hayi indlela awamangaliswa ngayo ukumkani xa wabona kungekuphela nje amadoda amathathu koko amane ehambahamba phakathi emlilweni engakhange arhetshwe nayintoni na enokuwenzakalisa! Xa ukumkani wawabizayo la maHebhere mathathu ukuba aphume, wafumanisa ukuba kwakungarhawukanga nditsho nalunye unwele kwiintloko zawo yaye kwakungekho nevumba lomsi kwiimpahla zawo. Enjani yona indlela uYehova awaluvuza kakhulu ngayo ukholo lwawo nenkalipho yawo! Ngokungathandabuzekiyo umzekelo wawo ngulowo uPawulos wacinga ngawo xa wayedwelisa phakathi kwelifu elikhulu lamangqina abo ‘bacima amandla omlilo.’ (Hebhere 11:34) Onjani ukuba mhle umzekelo aye anguwo kubo bonke abakhonzi bakaYehova ukususela ngoko!
17. Yeyiphi imizekelo emihle ekwanjalo esinayo namhlanje?
17 Namhlanje abakhonzi bakaYehova abajamelananga nesisongelo seziko lokoqobo elivutha umlilo. Kodwa abaninzi kakhulu kubo baye bavavanywa ngokukrakra kwingqibelelo yabo xa kufikelela ekubonakaliseni intlonelo engokonqulo kwimifuziselo yobuzwe. Bambi baye bavavanywa ukunyaniseka kwabo xa kufikelela ekuthengeni amaqweqwe eqela lobupolitika okanye ukungenela ezomkhosi. UYehova uye wabazimasa bonke abantu abanjalo, ebanceda ukuba bahlangabezane ngempumelelo nocelomngeni lwengqibelelo yabo baze ngaloo ndlela bangqine uMtyholi elixoki yena uYehova enguThixo wenyaniso.
Omnye Umzekelo Wokholo Nenkalipho
18. UBheleshatsare wakubonakalisa njani ukumdelela uYehova, uThixo wamaYuda, njengokuba kubhalwe kuDaniyeli isahluko 5, indinyana 3, 4?
18 Kanti omnye umzekelo wokholo nenkalipho ubhalwe kwincwadi kaDaniyeli, kwisahluko 5. UBheleshatsare, ukumkani waseBhabhiloni, wayenandipha isihikahika somsitho owawunyelisa uThixo ekunye newaka lezidwangube zakhe, amashweshwe akhe, nabafazi bakhe abangabanye. Ngequbuliso, kwavela umbhalo wesandla ongaziwayo eludongeni. Oko kwamnxunguphalisa ukumkani kangangokuba amalungu esinqe sakhe akhululeka aza namadolo aqalisa ukubethabethana. Kwakhona, uDaniyeli, umkhonzi woThixo oyinyaniso, wabizwa ukuba eze kutyhila lo mbhalo kuba zonke izilumko zaseBhabhiloni zazibethwe zee makatha.
19. Yintoni eyayiyekhethekileyo xa uDaniyeli watyhila umbhalo oseludongeni?
19 Ukuma yedwa jwi apho kuloo mekobume yobukhazikhazi kwaneyobutshaba akuzange kumbangele azale luloyiko uDaniyeli okanye kumbangele ukuba asingxengelele isigidimi sakhe okanye angakuqondi kakuhle oko kwakubandakanyekile. Emi ngesithozela yaye ezolile, ethetha ngelizwi elicacileyo nelinesihomo, wanikela ubungqina ngoThixo wakhe. Enganeliswanga kukutyhila nje kuphela umbhalo wesandla, uDaniyeli wamkhumbuza ukumkani ukuba uYehova uThixo wayemthobile uyisemkhulu ngokumbangela ukuba aphile njengerhamncwa lasendle de wafikelela ekuqondeni ukuba uThixo Osenyangweni unguMlawuli ebukumkanini babantu. UDaniyeli wamxelela oku uBheleshatsare, “Nakuba ubukwazi oko konke” ‘akuzithobanga kodwa usuke wazingcolisa izitya ezingcwele zetempile kaYehova waza wabadumisa oothixo begolide, abesilivere, abobhedu, abesinyithi, abomthi, nabamatye, abangaboniyo, abangevayo, nabangazi nto. Kodwa uThixo lowo zixhomekeke kuye zonke iindlela zakho, akuzange umzukise. Ngenxa yoko, kuphume lo myalelo uvela kuye. Ulinganisiwe esikalini waza wafunyanwa ulula, yaye ubukumkani bakho buyahlulwahlulwa buze bunikelwe kumaMedi nakumaPersi.’ Ewe, kwakhona uDaniyeli umisela umzekelo obalasele ngokukhethekileyo wokholo nenkalipho kubakhonzi bakaThixo namhlanje.—Daniyeli 5:22-28.
20. Ngethuba lolawulo lukaDariyo, nguwuphi umzekelo ongakumbi wokholo olukhulu awawumiselayo uDaniyeli?
20 Xa sifika kwisahluko 6 sikaDaniyeli, sinomnye umzekelo omhle wokholo nenkalipho. UKumkani uDariyo ngoku wayengumlawuli waza wamenza uDaniyeli omnye wabalawuli abaziintloko abathathu kubukumkani bakhe. Abanye, benomona ngoDaniyeli, bambongoza umlawuli ukuba akhuphe umthetho wokuba kangangemihla engama-30 kwakungekho bani wayemele enze nasiphi na isibongozo nakubani na ongomnye ngaphandle kwakukumkani. Babekugqalile ukuba leyo yayikuphela kwendlela ababenokumenzela ngayo iyelenqe uDaniyeli. Akazange awunakuze loo mthetho waza waqhubeka ethandaza kwigumbi lakhe eliphezulu eluphahleni lwendlu eyivulile ifestile yakhe, ubuso bakhe bukhangele eYerusalem. Ekubeni wayefunyaniswe enetyala lokwaphula umyalelo wokumkani, uDaniyeli waphoswa kumhadi weengonyama ngokuvisisana nesohlwayo esasimiselwe ngumthetho. Kwakhona uThixo wamvuza uDaniyeli ngokholo lwakhe nangenkalipho. Njani? Kunjengokuba kanye amaHebhere 11:33 echaza, uYehova ‘wayivingca imilomo yeengonyama.’
21. Ngenxa yemizekelo emihle yokholo nenkalipho ebhalwe kwizahluko ezithandathu zokuqala zencwadi kaDaniyeli, lumele lube yintoni uzimiselo lwethu oluqinileyo?
21 Ezinjani zona ukomeleza ukholo iziganeko ezibaliswe kuDaniyeli isahluko 1 ukusa kwesesi-6! Enjani yona indlela uYehova aye wabavuza ngayo abo babonakalisa ukholo nenkalipho! Kwelinye icala, oku kwenzeka ngokuthi baphakanyiswe kanti kwelinye icala, ngokuthi babe namava okuhlangulwa ngokungummangaliso. Ngokwenyaniso, xa sijamelene nezilingo sinokuzuza intuthuzelo nethemba kumava ala mangqina athembekileyo. Ewe, kungenxa kanye yesi sizathu le nto ezi zinto zabhalwayo! Ngenxa yoko, ngamana singenza isigqibo sokuba sibe ngabaxelisi abahle bokholo nenkalipho enjalo.—Roma 15:4; Hebhere 6:12.
Imibuzo Yempinda
◻ Amagama amaHebhere amane aselula anikela yiphi ingcamango ngendlela awayekhuliswe ngayo?
◻ Ukuhlangabezana kwamaHebhere novavanyo olumayela nokutya kunasiphi isifundo kuthi?
◻ Abakhonzi bakaYehova namhlanje baye bavavanywa njani kwingqibelelo yabo njengokuba kwakunjalo ngamaHebhere amathathu?
◻ UDaniyeli walubonakalisa njani ukholo nenkalipho ekunikeleni ubungqina kuBheleshatsare?
[Umfanekiso okwiphepha 17]
UDaniyeli namaqabane akhe bafunda ukuba bathi hayi