Indlela Yokuphumelela Kubulungiseleli Bobuvulindlela

NGABA ubulungiseleli bobuvulindlela bungumsebenzi wakho? Ukuba unguvulindlela, okanye umvakalisi woBukumkani wexesha elizeleyo, ngokungathandabuzekiyo unomdla ekubeni ube ngophumelelayo. Kodwa ukuba ngophumelelayo kufuna okungakumbi nje kunokuchithela ixesha kumsebenzi owenzayo. Umntu ophumelelayo umele amkele uqeqesho aze azingise ekuveliseni ubuchule.

Ngoko ke, unokuqhubeka njani ungengovulindlela nje kuphela kodwa kwakhona wenze inkqubela kulo msebenzi wakho? Kukho imibuzo eliqela esisikhokelo osenokuyiqwalasela.

Lomelele Kangakanani Ulwalamano Lwam NoThixo?

Omnye woothunywashe ababaluleke gqitha ekuphumeleleni njengovulindlela kukuba nolwalamano olusondeleyo nolomeleleyo noYehova uThixo. Kule nkalo, sinokufunda isifundo kumdumisi uDavide. Wenza esi sicelo: “Ndazise iindlela zakho, Yehova, ndifundise umendo wakho. Ndinyathelise enyanisweni yakho, undifundise; ngokuba unguThixo ongumsindisi wam; ndithembe wena yonke imihla.”—INdumiso 25:4, 5.

UDavide wathembela ngokupheleleyo ‘ngoThixo ongumsindisi wakhe.’ Wanqwenela ukuba afundiswe nguYehova nokuba ‘amazise iindlela Zakhe.’ Ngaba awunakuba naloo mvakalelo yomnqweno ovuthayo kaDavide wokukholisa uThixo? Lo yayingengomnqweno nje wemilebe, kuba uDavide wathi: “Ndithembe wena yonke imihla.”

Kodwa unokululondoloza njani ulwalamano olusondele ngolo hlobo noYehova? Phawula ukuba amazwi kaDavide awandulelayo wawavakalisa emthandazweni. Ewe, ukuthetha emthandazweni kusesona siseko solwalamano oluhle noThixo. Ibe sinokuziva singaxhalele nto ngenxa yokwazi ukuba akukho mfuneko yakubopheleleka ekwenzeni idinga noBawo wethu wasezulwini. Sinokuthetha naye nangaliphi na ixesha. Kunjengokuba uDavide wathi: “Ndidanduluka kuwe yonke imini.” (INdumiso 86:3) NoNyana kaThixo, owakhe wahamba kulo mhlaba njengomntu ofezekileyo, waqonda ukuba wayengenakuphumelela ngaphandle koncedo lukaYise. UYesu wathetha naye emthandazweni yonke imini—kwakusasa, ebudeni bemini, nasebusuku.—Marko 1:35; Luka 11:1; 6:12.

NjengamaKristu, kufuneka silandele umzekelo kaYesu ukuba siza kuphumelela kubulungiseleli bethu. (Hebhere 5:7) Mayela nomthandazo, elinye ibhinqa elingumKristu neliye languvulindlela ophumelelayo kangangeminyaka engama-30 lathetha lenjenje: “Ndifumanise ukuba umthandazo ubalulekile kum ukuba ndiza kuphumelela njengovulindlela. Uye wandinceda ukuba ndithembele ngokupheleleyo ngoYehova, ndiqonda ukuba andinakuphumelela ngokunokwam. Ndisoloko ndimcela uYehova ukuba andincede ndiqhubeke.”

Ewe, ukuze uphumelele kwinkonzo yobuvulindlela, kufuneka ulondoloze ulwalamano olomeleleyo noYehova, ngomthandazo uthembela ngaye ngokupheleleyo emthandazweni. Noko ke, lo ulandelayo ngomnye umbuzo obalulekileyo omele uzibuze wona.

Ndibathanda Kangakanani Abantu?

Ukuba nguvulindlela kuyimbonakaliso yothando. Ngoba? Ngenxa yokuba ubulungiseleli bexesha elizeleyo bubandakanya umoya wokuzincama. Njengovulindlela, usoloko uchitha ixesha namandla akho ekuncedeni abanye. Kodwa ukuba uza kuqhubeka usenza oku, umele ube nomdla wokwenene kwiintswelo zabanye. Xa wayesemhlabeni, uYesu wabonakalisa uthando olunjalo ngabantu. Ngokomzekelo, kwabakho isihlandlo apho yena nabafundi bakhe bahamba ngephenyane besiya kwindawo engenabantu ukuze ‘baphumle kancinane.’ Noko ke, izihlwele zafika kuqala kunabo kuloo ndawo. “Uthe ke akuphuma uYesu, wabona isihlwele esikhulu; wasikwa yimfesane ngabo, ngokuba babenjengezimvu ezingenamalusi; waqala ukubafundisa iindawo ezininzi.”—Marko 6:30-34.

Ngokufana noYesu, thina njengoovulindlela simele sibe nothando olusuk’ entliziyweni ngabantu. Uthando olunjalo lusishukumisela ukuba sizinikele ngenxa yabo. Kunjengokuba omnye umbhali wathi kuYesu: “Umthande yena [uThixo] ngentliziyo iphela, nangengqiqo iphela, nangomphefumlo uphela, nangamandla ephela, nokuthi umthande ummelwane wakho njengoko uzithanda ngako, kungaphezu kwawo onke amadini atshiswayo kuphele, nemibingelelo.” (Marko 12:33) La mazwi asinceda siqonde ukuba okubalulekileyo akukuphela koko sikwenzayo kubulungiseleli kodwa nesizathu sokuba sikwenze sibalulekile.

Wena njengovulindlela, uchitha ixesha elingakumbi kumsebenzi wokushumayela nowokwenza abafundi ngaphezu kokuba abanye besenjenjalo. Kodwa kwakhona udibana nabantu abangakumbi. Uvakalelwa njani ngabo? Omnye uvulindlela wathi: “Ndiyazi ukuba uthando lusisiqhamo somoya kaThixo. Ngoko ke ngaphandle kwalo ngendingekho enyanisweni konke konke, ndingasathethi ke ngokuba nguvulindlela ophumelelayo. Uthando lundenza ndibacingele abantu, ndiziphaphele iintswelo zabo yaye ndiyakuxabisa ukuba abantu besabela kuthando olubonakaliswayo. Kambe ke, kukho amaxesha apho uthando lwakho ngabantu luya kuvavanywa ngenxa yesimo sabo sengqondo okanye iimpawu zobuntu abazibonakalisayo. Kulapho ke endithi ngokukodwa ndizame ukuphulaphula nokuba nomonde.”

Ngaba leyo yindlela ovakalelwa ngayo ngabantu abakummandla wentsimi oyisebenzayo? Ukuze ube nguvulindlela ophumelelayo, umele ubathande abantu. (1 Tesalonika 2:6-8) Phofu ke, ukuze uphumelele kumsebenzi wakho wobuvulindlela, kukwafuneka ube nocwangciso olucetywe kakuhle. Ngoko, khawuzibuze oku:

Ngaba Ndinocwangciso Olulungeleleneyo?

Ukuze aqhubeke ephumelela kubulungiseleli bexesha elizeleyo, uvulindlela umele acebe kakuhle. Ngaphandle kocwangciso lobuqu olucetywe kakuhle, ubuvulindlela busenokumdanisa. Kambe ke, ukuba nocwangciso olwenza ukwazi ukuchitha ixesha elithile kubulungiseleli basentsimini asikuphela kwento ebandakanyekileyo.

Uvulindlela kufuneka abe nocwangciso olulungeleleneyo. Ngaba unalo? Kusenokuba kuhle ukuba uzibuze oku: Ngaba ndichitha ixesha elifanelekileyo kwiinkalo ezahlukahlukeneyo zobulungiseleli? Ngaba ndinokuthi ndenza wonke umgudu ukuze ndifikelele abantu abakummandla wentsimi endiyisebenzayo? Ngaba ndenza uhlengahlengiso olufunekayo kucwangciso lwam khon’ ukuze ndibatyelele xa besekhaya? Ngaba abantu endibabuyelayo benza inkqubela? UYesu wathi: “Hambani ngoko niye kuzenza abafundi iintlanga . . . nibafundisa.” (Mateyu 28:19, 20) Ukushumayela nokufundisa kuzizinto ezingundoqo kubulungiseleli bethu. Ngaba waneliswa kukuhambisa uncwadi, okanye ngaba uyababuyela bonke ababonisa umdla, enoba bayalwamkela uncwadi lweBhayibhile okanye akunjalo? Ngamafutshane, ngaba ulisebenzisa kakuhle ixesha lakho?

Ngaba Ndingumfundisi Owenza Inkqubela?

Lowo ngomnye umbuzo obalulekileyo. Kweyesi-2 kuTimoti 4:2, uPawulos wabhala: “Livakalise ilizwi; zingisa ukwenjenjalo ngamathuba alungileyo naxakileyo; . . . unako konke ukuzeka kade umsindo, nokufundisa.” Ukuze bashumayele ilizwi, enoba kusebandleni okanye ngaphandle, oovulindlela abaphumelelayo bazabalazela ukufikelela nokuphucula ubuchule babo bokufundisa. Kutheni le nto uPawulos esithi ukufundisa kububuchule? Kungenxa yokuba ukufundisa kufuna ubuchule noqheliselo.

Uza kubuphucula njani ke ubuchule bakho njengomfundisi? Umpostile uyaphendula: “Zinyamekele ezo zinto, hlala kwezo zinto, ukuze ukuhambela kwakho phambili kubonakale kwinto yonke.” (1 Timoti 4:15) Ewe, oovulindlela bamele babe nexesha abalichithela kwisifundo sobuqu seBhayibhile, lokucinga nokucamngca. Oku kuquka ukuwasebenzisa ngokoqobo amacebiso afumaneka kwiimpapasho ezinjengethi Ukuqiqa NgeZibhalo, Ubulungiseleli Bethu BoBukumkani, nethi Incwadi Yesikhokelo Yesikolo Sobulungiseleli Sobuthixo.a

Ngoko ke, ukuze uphumelele kubulungiseleli bobuvulindlela, londoloza ulwalamano lobuqu olomeleleyo noYehova uThixo. Nako oku, kuya kukushukumisela ukuba ube nothando olusuk’ entliziyweni ngabantu nokulubonakalisa kubo. Kakade ke, ukuze ubonakalise olu thando, akumele nje uphaphele ubungakanani bexesha olichithela kubulungiseleli, kodwa ukwamele ufune ukulisebenzisa kakuhle ixesha lakho. Njani? Ngokwenza nawuphi na umgudu ofunekayo ukuze ufikelele abantu abaninzi kangangoko kunokwenzeka ngesigidimi soBukumkani. Elokuqukumbela, qhubeka usiba ngumfundisi owenza inkqubela ngokufunda iindlela ezahlukahlukeneyo zokuqalisa incoko nabantu kubulungiseleli nangokuyifundisisa ngenkuthalo iBhayibhile ngenjongo yokuphucula ubuchule bakho bokufundisa.

[Umbhalo osemazantsi]