Isahluko 41

IMini KaThixo Yomgwebo—Umphumo Wayo Ovuyisayo!

Umbono 15—ISityhilelo 20:11–21:8

Umbandela: Uvuko lwabantu bonke, iMini Yomgwebo neentsikelelo zamazulu amatsha nomhlaba omtsha

Ixesha lokuzaliseka: ULawulo Lweminyaka Eliwaka

1. (a) Yintoni uluntu olwaphulukana nayo xa uAdam noEva bonayo? (b) Yiyiphi injongo kaThixo engaguqukanga, ibe sazi njani?

NJENGABANTU, sadalelwa ukuphila ngonaphakade. Ukuba uAdam noEva babeyithobele imiyalelo kaThixo, ngebabengazange bafe. (Genesis 1:28; 2:8, 16, 17; INtshumayeli 3:10, 11) Kodwa xa bonayo, baphulukana nokufezeka baza baphulukana nobomi babo nobenzala yabo, yaye ukufa kwalawula uluntu njengotshaba olungayekeleliyo. (Roma 5:12, 14; 1 Korinte 15:26) Sekunjalo, injongo kaThixo yokuba abantu abafezekileyo baphile ngonaphakade kumhlaba oyiparadesi ayizange iguquke. Ngenxa yokuluthanda kwakhe ngokugqithiseleyo uluntu, wathumela emhlabeni uNyana wakhe okuphela kwamzeleyo, uYesu, owathi wanikela ngobomi bakhe bobuntu obufezekileyo njengentlawulelo “yabaninzi” benzala ka-Adam. (Mateyu 20:28; Yohane 3:16) Ngoku uYesu unokukusebenzisa oku kufaneleka kungokwasemthethweni kwedini lakhe ukuze abuyisele abantu abakholwayo kubomi obufezekileyo emhlabeni oyiparadesi. (1 Petros 3:18; 1 Yohane 2:2) Esinjani sona ukuzuka isizathu ngoluntu ukuba ‘luvuye yaye lube nemihlali’!—Isaya 25:8, 9.

2. Yintoni echazwa nguYohane kwiSityhilelo 20:11, yaye yintoni “itrone enkulu emhlophe”?

² Xa uSathana evalelwe enzonzobileni, uLawulo Lweminyaka Eliwaka oluzukileyo lukaYesu luyaqalisa. Ngoku ‘yimini’ uThixo “anenjongo ngayo yokuba agwebe umhlaba omiweyo ngobulungisa ngendoda ayimiseleyo.” (IZenzo 17:31; 2 Petros 3:8) UYohane uvakalisa esithi: “Ndaza ndabona itrone enkulu emhlophe nalowo wayehleli kuyo. Umhlaba nezulu zasaba zemka phambi kwakhe, zaza azafunyanelwa ndawo.” (ISityhilelo 20:11) Iyintoni le ‘trone enkulu emhlophe’? Ngokuqinisekileyo isisihlalo sokugweba ‘sikaThixo uMgwebi wabo bonke.’ (Hebhere 12:23) Ngoku uza kugweba uluntu esahlula abo baya kungenelwa kwidini likaYesu lentlawulelo.—Marko 10:45.

3. (a) Yintoni eboniswa sisibakala sokuba itrone kaThixo kusithiwa ‘inkulu’ yaye ‘imhlophe’? (b) Ngoobani abaya kugweba ngeMini Yomgwebo, yaye baya kugweba ngokwasiphi isizinzi?

³ Itrone kaThixo ‘inkulu,’ nto leyo ebalaselisa ubungangamsha bukaYehova njengeNkosi enguMongami, yaye ‘imhlophe,’ nto leyo etsalel’ ingqalelo kubulungisa bakhe obungenasiphako. Ungoyena Mgwebi mkhulu woluntu. (INdumiso 19:7-11; Isaya 33:22; 51:5, 8) Noko ke, umsebenzi wokugweba uwunikele kuYesu Kristu: “UYise akagwebi namnye, kodwa unikele konke ukugweba kuNyana.” (Yohane 5:22) Abakunye noYesu zizinxulumani zakhe ezili-144 000, ekwanikelwa kuzo ‘igunya lokugweba kangangeminyaka eliwaka.’ (ISityhilelo 20:4) Nakuba kunjalo, yimilinganiselo kaYehova egqiba ngento eya kwenzeka kumntu ngamnye ebudeni beMini Yomgwebo.

4. Kuthethwa ukuthini xa kusithiwa “umhlaba nezulu zasaba”?

⁴ “Umhlaba nezulu zasaba” njani? Eli lizulu elifanayo nelo lafingeka njengomsongo ekuvulweni kwetywina lesithandathu—amagunya abantu alawulayo ‘aqwetyelwe umlilo yaye abekelwe imini yomgwebo neyentshabalalo yabantu abangenabuthixo.’ (ISityhilelo 6:14; 2 Petros 3:7) Umhlaba yinkqubo elungelelanisiweyo yezinto ephantsi kolu lawulo. (ISityhilelo 8:7) Ukutshatyalaliswa kwerhamncwa nookumkani bomhlaba nemikhosi yabo, kunye nabo bafumana uphawu lwerhamncwa nabo banqula umfanekiselo walo, kuphawula ukusaba kweli zulu nomhlaba. (ISityhilelo 19:19-21) Wakuba umgwebo uphunyeziwe kumhlaba nezulu likaSathana, uMgwebi Omkhulu umisela enye iMini Yomgwebo.

IMini YoMgwebo Yeminyaka Eliwaka

5. Emva kokuba umhlaba omdala nezulu elidala zisabile, ngoobani abaseleyo abaza kugwetywa?

⁵ Ngoobani abaseleyo abaza kugwetywa emva kokuba umhlaba omdala nezulu elidala zisabile? Asiyontsalela ethanjisiweyo ye-144-000, kuba aba sele begwetyiwe baza batywinwa. Ukuba kukho abathanjiswa abaya kuba besaphila emhlabeni emva kweArmagedon, bamele bafe ngokukhawuleza emva koko baze bafumane umvuzo wabo wasezulwini ngovuko. (1 Petros 4:17; ISityhilelo 7:2-4) Noko ke, izigidi zesihlwele esikhulu ngoku eziphumileyo kwimbandezelo enkulu zimi ngokucacileyo “phambi kwetrone.” Sele sibalwe njengamalungisa aza kusinda ngenxa yokholo lwaso kwigazi likaYesu elaphalazwayo, kodwa ukugwetywa kwaso kumele kuqhubeke ukutyhubela iminyaka eliwaka njengoko uYesu ehlala esikhokela esisa “emithonjeni yamanzi obomi.” Siya kwandula ke, sakuba sibuyiselwe emfezekweni saza emva koko savavanywa, sivakaliswe singamalungisa ngokupheleleyo. (ISityhilelo 7:9, 10, 14, 17) Abantwana abaya kusinda kwimbandezelo enkulu nabo nabaphi na abantwana abaya kuzalwa sisihlwele esikhulu ebudeni beMinyaka Eliwaka ngokufanayo kuya kufuneka bagwetywe ebudeni beminyaka eliwaka.—Thelekisa iGenesis 1:28; 9:7; 1 Korinte 7:14.

6. (a) Yiyiphi inginginya yabantu ebonwa nguYohane, yaye asingisele entwenini amazwi athi “abakhulu nabancinane”? (b) Izigidi ezingenakubaleka ezikwinkumbulo kaThixo ngokungathandabuzekiyo ziya kuvuswa njani?

⁶ Noko ke, uYohane ubona inginginya yabantu eninzi ngakumbi kunesihlwele esikhulu esisindileyo. Iya kuba ngamawaka ezigidi! “Kwaye ndababona nabafileyo, abakhulu nabancinane, bemi phambi kwetrone, nemisongo yayivuliwe.” (ISityhilelo 20:12a) Aba ‘bakhulu nabancinane’ baquka abantu ababalaseleyo nabangabalaselanga kangako abaye baphila baze bafa kulo mhlaba ebudeni beminyaka engama-6 000 edluleyo. Kwincwadi yeVangeli eyabhalwa ngumpostile uYohane emva nje kweSityhilelo, uYesu wathi ngoYise: “Umnike [uYesu] igunya lokugweba, ngenxa yokuba enguNyana womntu. Musani ukumangaliswa koku, kuba liyeza ilixa ekuya kuthi ngalo bonke abo bakumangcwaba enkumbulo balive ilizwi lakhe baze baphume.” (Yohane 5:27-29) Onjani wona ukuba mkhulu umsebenzi—ukupheliswa kokufa namangcwaba abekho kuyo yonke imbali! Alithandabuzeki elokuba ezo zigidi zingenakubaleka zikwinkumbulo kaThixo ziya kuvuswa ngokuthe ngcembe ukuze isihlwele esikhulu—esimbalwa gqitha ngokwentelekiso—sikwazi ukusingatha iingxaki ezisenokuvela ngenxa yokuba ekuqaleni abo bavusiweyo basenokutyekela ekulandeleni indlela yabo yangaphambili yobomi, enobuthathaka nesimo sengqondo sayo senyama.

Ngoobani Abavuswayo Baze Bagwetywe?

7, 8. (a) Nguwuphi umsongo ovulwayo, yaye kwenzeka ntoni emva koko? (b) Ngoobani abangayi kuvuswa?

⁷ UYohane uyongezelela esithi: “Kodwa kwavulwa omnye umsongo; umsongo wobomi. Baza abafileyo bagwetywa ngokwezinto ezibhalwe kuloo misongo ngokwezenzo zabo. Lwathi ulwandle lwabakhupha abafileyo abakulo, kwathi ukufa neHadesi kwabakhupha abafileyo abalapho, bagwetywa elowo ngokwezenzo zakhe.” (ISityhilelo 20:12b, 13) Ngenene lo ngumbono obambis’ ongezantsi! ‘Ulwandle, ukufa neHadesi’ nganye kwezi zinto iphumeza indima yayo, kodwa phawula ukuba la magama akahlukananga kangako.a UYona, xa wayesesiswini sentlanzi yaye ke ngoko ephakathi elwandle, wathetha ngaye njengowayeseShiyol, okanye eHadesi. (Yona 2:2) Ukuba umntu ubanjwe kukufa kuka-Adam, ngoko mhlawumbi naye useHadesi. La magama angokwesiprofeto anikela isiqinisekiso esinamandla sokuba akukho namnye oya kushiywa.

⁸ Kambe ke, kukho inani elingaziwayo elingayi kuvuswa. Phakathi kwaba ngababhali nabaFarisi abangazange baguquke nabachasa uYesu nabapostile, “umchasi-mthetho” ongowonqulo, namaKristu athanjisiweyo ‘aphambukileyo.’ (2 Tesalonika 2:3; Hebhere 6:4-6; Mateyu 23:29-33) UYesu wakwathetha nangabantu abanjengeebhokhwe kwesi siphelo sehlabathi abaya kuya “emlilweni ongunaphakade owalungiselelwa uMtyholi neengelosi zakhe,” okuthetha ukuthi ‘intshabalalo engunaphakade.’ (Mateyu 25:41, 46) Aba abayi kuvuswa!

9. Umpostile uPawulos ubonisa njani ukuba abathile baya kubabalwa ngokukhethekileyo eluvukweni, yaye aba baquka oobani?

⁹ Kwelinye icala, bambi baya kubabalwa ngokukhethekileyo eluvukweni. Umpostile uPawulos wakubonisa oku xa wathi: “Ndinethemba kuThixo . . . lokuba kuza kubakho uvuko lwamalungisa nabangengomalungisa.” (IZenzo 24:15) Mayela novuko lwasemhlabeni, ‘amalungisa’ aya kuquka amadoda nabafazi abathembekileyo bamandulo—uAbraham, uRahabhi nabanye abaninzi—abavakaliswa bengamalungisa njengabahlobo bakaThixo. (Yakobi 2:21, 23, 25) Kwakweli qela linye kuya kubakho ezinye izimvu ezingamalungisa ezife zithembekile kuYehova kumaxesha anamhla. Kusenokwenzeka ukuba, bonke abagcini bengqibelelo abanjalo baya kuvuswa ekuqaleni koLawulo Lweminyaka Eliwaka lukaYesu. (Yobhi 14:13-15; 27:5; Daniyeli 12:13; Hebhere 11:35, 39, 40) Akuthandabuzeki ukuba uninzi lwala malungisa avusiweyo luya kunikwa amalungelo akhethekileyo ekongameleni umsebenzi omkhulu wokubuyiselwa kweParadesi.—INdumiso 45:16; thelekisa uIsaya 32:1, 16-18; 61:5; 65:21-23.

10. Kwabo baza kuvuswa, ngoobani ‘abangengomalungisa’?

¹⁰ Noko ke, ngoobani ‘abangengomalungisa’ abakhankanywe kwiZenzo 24:15? Aba baya kuquka inkitha yabantu abafe ukutyhubela imbali, ingakumbi abo babephila ‘kumaxesha okungazi.’ (IZenzo 17:30) Ngenxa yendawo abazalelwa kuyo okanye ixesha ababephila ngalo, aba babengenalo ithuba lokufunda ukuthobela ukuthanda kukaYehova. Ukongezelela, kusenokubakho abathile abasivayo isigidimi sosindiso kodwa abangazange basabele ngokupheleleyo ngelo xesha okanye abafa ngaphambi kokuba benze inkqubela ukusa kuzahlulelo nobhaptizo. Eluvukweni abanjalo kuya kufuneka benze uhlengahlengiso olungakumbi kwindlela abacinga ngayo nakwikhondo labo lobomi ukuba baza kungenelwa kweli thuba lokuzuza ubomi obungunaphakade.

Umsongo Wobomi

11. (a) Uyintoni “umsongo wobomi,” yaye ngamagama oobani abhalwe kuwo? (b) Kutheni le nto umsongo wobomi uya kuvulwa ebudeni boLawulo Lweminyaka Eliwaka?

¹¹ UYohane uthetha ‘ngomsongo wobomi.’ Le yingxelo yabo baza kufumana ubomi obungunaphakade kuYehova. Amagama abazalwana bakaYesu abathanjisiweyo, esihlwele esikhulu nawamadoda athembekileyo amandulo, anjengoMoses, aye abhalwa kulo msongo. (Eksodus 32:32, 33; Daniyeli 12:1; ISityhilelo 3:5) Ngelo xesha, amagama abavusiweyo ‘abangengomalungisa’ aya kube engabhalwanga kumsongo wobomi. Ngoko umsongo wobomi uya kuvulwa ebudeni boLawulo Lweminyaka Eliwaka ukuze kuvulelwe ithuba lokubhalwa kwamagama abanye abafanelekayo. Abo amagama abo angabhalwanga kumsongo okanye kwincwadi yobomi, baya ‘kuphoswa edikeni lomlilo.’—ISityhilelo 20:15; thelekisa amaHebhere 3:19.

12. Yintoni eya kugqiba enoba umntu igama lakhe liyabhalwa kumsongo wobomi ovuliweyo, yaye uMgwebi omiselwe nguYehova wawumisela njani umzekelo?

¹² Ngoko, yintoni eya kugqiba enoba umntu igama lakhe liyabhalwa kumsongo wobomi oya kuvulwa ngelo xesha? Imeko iya kufana naleyo yomhla ka-Adam noEva: ukuthobela uYehova. Kunjengokuba umpostile uYohane wabhalela amaKristu awayekhonza kunye nawo, esithi: “Ihlabathi liyadlula nenkanuko yalo, kodwa lowo wenza ukuthanda kukaThixo uhleli ngonaphakade.” (1 Yohane 2:4-7, 17) Kumbandela wokuthobela, uMgwebi omiselwe nguYehova wamisela umzekelo: “Nangona [uYesu] wayenguNyana, wafunda ukuthobeka ngeembandezelo awazifumanayo; yaye emva kokuba enziwe wagqibelela waba nembopheleleko yosindiso olungunaphakade kubo bonke abo bamthobelayo.”—Hebhere 5:8, 9.

Ukuvulwa Kweminye Imisongo

13. Abavusiweyo bamele bakubonise njani ukuthobela kwabo, yaye yiyiphi imigaqo abamele bayilandele?

¹³ Aba bavusiweyo bamele bakubonise njani ukuthobela kwabo? UYesu wathetha ngemithetho emibini emikhulu, esithi: “Owokuqala ngulo, ‘Yiva, Sirayeli, uYehova uThixo wethu nguYehova mnye, uze umthande uYehova uThixo wakho ngentliziyo yakho iphela nangomphefumlo wakho uphela nangengqondo yakho iphela nangamandla akho ephela.’ Owesibini ngulo, ‘Uze umthande ummelwane wakho njengawe siqu.’” (Marko 12:29-31) Kukwakho nemigaqo emiselwe nguYehova abamele bayilandele, enjengokuyeka ubusela, ukuxoka, ukubulala nokuziphatha okubi.—1 Timoti 1:8-11; ISityhilelo 21:8.

14. Yiyiphi eminye imisongo evulwayo, yaye iqulethe ntoni?

¹⁴ Noko ke, uYohane usandul’ ukukhankanya neminye imisongo eya kuvulwa ebudeni boLawulo Lweminyaka Eliwaka. (ISityhilelo 20:12) Iya kuba yintoni le misongo? Maxa wambi, uYehova uye wanikela imiyalelo engqalileyo ngeemeko ezithile. Ngokomzekelo, ngomhla kaMoses wanikela ungcelele lwemithetho eyayineenkcukacha eyayithetha ubomi kumaSirayeli ukuba ayeyithobela. (Duteronomi 4:40; 32:45-47) Ebudeni benkulungwane yokuqala, kwanikelwa imiyalelo emitsha ukuze kuncedwe abathembekileyo ukuba balandele imigaqo kaYehova phantsi kwenkqubo yezinto yamaKristu. (Mateyu 28:19, 20; Yohane 13:34; 15:9, 10) Ngoku uYohane uchaza ukuba abafileyo baza ‘kugwetywa ngokwezinto ezibhalwe kuloo misongo ngokwezenzo zabo.’ Ngoko licacile elokuba ukuvulwa kwale misongo kuya kuvakalisa ngokweenkcukacha imiyalelo kaYehova eluntwini ebudeni beminyaka eliwaka. Ngokusebenzisa imimiselo nemiyalelo yaloo misongo kubomi babo, abantu abathobelayo baya kukwazi ukolula imihla yabo, ekugqibeleni bazuze ubomi obungunaphakade.

15. Liliphi iphulo lemfundo eliya kufuneka ebudeni bovuko, yaye ngokunokwenzeka uvuko luya kuqhubeka njani?

¹⁵ Elinjani lona ukuba likhulu iphulo lemfundo yolawulo lobuthixo eliya kufuneka! Ngowama-2005, ehlabathini lonke amaNgqina kaYehova, ngokomlinganiselo, ayeqhuba izifundo zeBhayibhile ezizizi-6 061 534 kwiindawo ezahlukahlukeneyo. Kodwa ebudeni bovuko, alithandabuzeki elokuba kuya kuqhutywa izigidi ezingenakubalwa zezifundo, ezisekelwe eBhayibhileni nakwimisongo emitsha! Kuya kufuneka ukuba bonke abantu bakaThixo babe ngabafundisi baze bazibhokoxe. Njengoko besenza inkqubela, abantu abavusiweyo ngokungathandabuzekiyo baya kuba nesabelo kolu cwangciso lukhulu lokufundisa. Kusenokwenzeka ukuba, uvuko luya kuqhubeka ngendlela yokuba abo baphilayo bafumane uvuyo lokwamkela nokufundisa ababekade bengamalungu entsapho nezihlobo, abanokuthi nabo bamkele abanye baze babafundise. (Thelekisa eyoku-1 kwabaseKorinte 15:19-28, 58.) AmaNgqina kaYehova angaphezu kwezigidi ezithandathu akhutheleyo ekusasazeni inyaniso namhlanje andlala isiseko esihle samalungelo anethemba lokuwafumana ebudeni bovuko.—Isaya 50:4; 54:13.

16. (a) Ngamagama oobani angayi kubhalwa kumsongo okanye incwadi yobomi? (b) Ngoobani abo uvuko lwabo luya kungqineka ‘lulolobomi’?

¹⁶ Mayela novuko lwasemhlabeni, uYesu wathi ‘abo benze izinto ezilungileyo baya kuza kuvuko lobomi, abo baqhelisele izinto ezimbi kuvuko lomgwebo.’ Apha ‘ubomi nomgwebo’ zichasene, nto leyo ebonisa ukuba abavusiweyo ‘abaqhelisela izinto ezimbi’ emva kokuba befundiswe ngeZibhalo eziphefumlelweyo nangemisongo baya kugwetywa njengabangabufanelanga ubomi. Amagama abo akayi kubhalwa kumsongo okanye incwadi yobomi. (Yohane 5:29) Kuya kwenzeka into efanayo kuye nawuphi na owathi ngaphambili wahamba ngekhondo lokuthembeka kodwa othi, ngasizathu sithile, atyeke ebudeni boLawulo Lweminyaka Eliwaka. Amagama anokucinywa. (Eksodus 32:32, 33) Kwelinye icala, abo bathi ngokuthobeka balandele izinto ezibhalwe kwimisongo amagama abo aya kugcinwa ebhaliwe kumsongo wobomi, baze baqhubeke bephila. Kubo, uvuko luya kungqineka ‘lulolobomi.’

Ukuphela Kokufa NeHadesi

17. (a) Sisiphi isenzo esimangalisayo esichazwa nguYohane? (b) IHadesi iya kupheliswa nini? (c) Ukufa okuvela kuAdam kuya ‘kuphoswa nini edikeni lomlilo’?

¹⁷ Ngokulandelayo, uYohane uchaza into emangalisa ngokwenene! “Kwaza ukufa neHadesi kwaphoswa edikeni lomlilo. Oku kuthetha ukufa kwesibini, idike lomlilo. Ngapha koko, nabani na ongafunyanwanga ebhaliwe encwadini yobomi waphoswa edikeni lomlilo.” (ISityhilelo 20:14, 15) Ekupheleni kweMini Yomgwebo yeminyaka eliwaka, “ukufa neHadesi” ziya kushenxiswa ngokupheleleyo. Kutheni oku kuquka iminyaka eliwaka nje? IHadesi, ingcwaba eliqhelekileyo loluntu lonke, iya kupheliswa xa owokugqibela osenkumbulweni kaThixo evuswa. Kodwa logama nje nabaphi na abantu bengcoliswe sisono esizuzw’ ilifa, ukufa okuvela kuAdam kusenabo. Bonke abo bavuselwe emhlabeni, kwanesihlwele esikhulu esisinda kwiArmagedon, kuya kufuneka ukuba bathobele okubhalwe kwimisongo de intlawulelo kaYesu isetyenziswe ekukushenxiseni ngokupheleleyo ukugula, ukwaluphala nobunye ubuthathaka obuzuzw’ ilifa. Emva koko ukufa okuvela kuAdam, kunye neHadesi, kuya ‘kuphoswa edikeni lomlilo.’ Ziya kutshabalala ngonaphakade!

18. (a) Umpostile uPawulos ukuchaza njani ukuphumelela kokulawula kukaYesu njengoKumkani? (b) Yintoni eya kwenziwa nguYesu ngentsapho yabantu eyenziwe yafezeka? (c) Ziziphi ezinye izinto eziya kwenzeka ekupheleni kweminyaka eliwaka?

¹⁸ Ngaloo ndlela, ucwangciso oluchazwa ngumpostile uPawulos kwincwadi yakhe eya kwabaseKorinte luya kufikelela esiphelweni: “Kuba [uYesu] umele alawule njengokumkani ade uThixo azibeke phantsi kweenyawo zakhe zonke iintshaba. Olokugqibela utshaba oluya kutshitshiswa kukufa [okwabangelwa nguAdam].” Yintoni eya kwenzeka emva koko? “Zakuba zithotyelwe phantsi kwakhe zonke izinto, uya kwandula ke noNyana ngokwakhe azithobe kuLowo wazithobela phantsi kwakhe zonke izinto.” Ngamany’ amazwi, uYesu ‘unikela ubukumkani kuThixo wakhe noYise.’ (1 Korinte 15:24-28) Ewe, uYesu, akuba ekoyisile ukufa okuvela kuAdam ngedini lakhe lentlawulelo, uya kudlulisela intsapho yabantu eyenziwe yafezeka kuYise, uYehova. Ngokucacileyo kukweli nqanaba, ekupheleni kweminyaka eliwaka, aya kuthi uSathana akhululwe kuze kuqhubeke uvavanyo lokugqibela oluya kugqiba ngamagama aya kuhlala ebhalwe ngokusisigxina kumsongo wobomi. ‘Zibhokoxe ngamandla’ ukuze igama lakho libe phakathi kwawo!—Luka 13:24; ISityhilelo 20:5.

[Umbhalo osemazantsi]

[Umfanekiso okwiphepha 298]

‘Abangengomalungisa’ abavusiweyo abathobela okubhalwe kwimisongo evulwayo ebudeni boLawulo Lweminyaka Eliwaka amagama abo asenokubhalwa kumsongo wobomi