Isahluko 16
UThixo Wenyaniso Nekamva Lakho
“Kule ndalo iphela iyimfihlelo, kukho into enye uMntu anokuqiniseka ngayo. Ngokuqinisekileyo uMntu akasiso esona siqu songamileyo sokomoya kwiNdalo Iphela. . . . Kwindalo Iphela Kukho isiqu esithile sokomoya esongamileyo kunoMntu. . . . Usukelo loMntu kukufuna ukunxibelelana nesiqu esithile esongamileyo, yaye enenjongo yokufuna ukuphila ngokuvisisana nesi siqu sigqibeleleyo sokomoya.”—An Historian’s Approach to Religion, nguArnold Toynbee.
1. (Quka intshayelelo.) (a) Yintoni umbhali-mbali uToynbee awayiqondayo ngomntu nangendalo iphela? (b) IBhayibhile isichaza njani ‘isiqu esigqibeleleyo sokomoya’?
PHANTSE ebudeni bayo yonke le minyaka ingamawaka amathandathu idluleyo, uluntu luye lwakwiphulo lokufuna, ngenzondelelo enkulu okanye encinane, ukuze lufumane eso “siqu sigqibeleleyo sokomoya.” Nqulo ngalunye oluphambili luye lwasinika eso siqu igama elahlukileyo. Ngokuxhomekeke kunqulo lwakho—enoba ungumHindu, umSilamsi, umBhuda, umShinto, umConfucius, umTao, umYuda, umKristu, okanye naluphi na olunye—unalo igama lesi “siqu sigqibeleleyo sokomoya.” Kodwa iBhayibhile isinika igama, isini nobuntu besi siqu—uYehova, uThixo ophilayo. Loo Thixo ungenakulinganiswa nanto wathi kuKoreshi Omkhulu wasePersi: “NdinguYehova; akukho wumbi, akukho Thixo ingendim. . . . Mna ndenza ihlabathi, ndadala abantu phezu kwalo.”—Isaya 45:5, 12, 18; INdumiso 68:19, 20.
UYehova—UThixo Wesiprofeto Esinokuthenjwa
2. Ukuba sifuna ukufumana inkcazelo enokuthenjwa ngokuphathelele ikamva, ngubani esifanele siphethukele kuye, yaye ngoba?
2 UYehova ungundoqo kwiphulo loluntu lokufuna uThixo. UYehova uye wazityhila njengoThixo wesiprofeto onokuxela isiphelo kwasekuqaleni. Wathetha oku ngomprofeti uIsaya: “Khumbulani izinto zangaphambili, zasephakadeni, okokuba ndinguThixo, akukho wumbi; ndinguThixo, akukho namnye unjengam; ukuxelayo kwasekuqaleni okungasemva, nakwabamandulo okungekenzeki, ndisithi, Icebo lam liya kuma, ndikwenze konke ukuthanda kwam; . . . nditshilo, ewe, ndiya kukufeza; ndiyilile, ewe, ndiya kukwenza.”—Isaya 46:9-11; 55:10, 11.
3. (a) Ziziphi iziganeko esinokuzibona kwangaphambili ngokuhlolisisa isiprofeto seBhayibhile? (b) Yintoni uSathana ayenzileyo kwabangakholwayo, yaye ngoba?
3 Ekubeni sinoThixo ololo hlobo wesiprofeto nonokuthenjwa, sinokukwazi oko kuza kwenzeka kwinkqubo yehlabathi eneenkonzo ezahlukeneyo. Kwakhona sinokukubona kwangaphambili oko kuza kwehlela iintlangano ezinamandla zobupolitika nezibonakala zilawula ikamva lehlabathi. Kwanangakumbi, sinokusixela kwangaphambili isiphelo ‘sothixo weli phakade,’ uSathana, oye ‘wazimfamekisa iingqiqo zabangakholwayo’ ngeenkonzo ezininzi eziye zadudulela uluntu kude noThixo wenyaniso, uYehova. Ibe kutheni le nto uSathana eye wenza lo msebenzi wokumfamekisa? “Ukuze singabengezeli kubo isikhanyiso seendaba ezilungileyo zobuqaqawuli bukaKristu, ongumfanekiselo kaThixo.”—2 Korinte 4:3, 4; 1 Yohane 5:19.
4. Yiyiphi imibuzo ephathelele umhlaba nekamva labantu efuna ukuphendulwa?
4 Kwakhona sinokukwazi okuza kwenzeka emva kwezi ziganeko zixelwe kwangaphambili. Uza kuba kwimeko enjani umhlaba ekugqibeleni? Ngaba uza kungcoliswa? Wonakaliswe? Kutshatyalaliswe amahlathi awo? Okanye ngaba umhlaba kunye nohlanga loluntu luza kuhlaziywa? Njengoko siza kubona, iBhayibhile iyayiphendula yonke loo mibuzo. Kodwa okokuqala makhe siphethulele ingqalelo yethu kwiziganeko eziza kwenzeka kwakamsinya.
Ukufaniswa ‘KweBhabhiloni Enkulu’
5. Yintoni uYohane awayibona embonweni?
5 Incwadi yeBhayibhile yeSityhilelo yatyhilwa kumpostile uYohane kwisiqithi sasePatmos ngonyaka wama-96 C.E. Iyichaza ngokucace gca imifuziselo yeziganeko ezikhulu ezaziza kwenzeka kwixesha lesiphelo, xesha elo, ngokobungqina beBhayibhile, ebeluphila kulo uluntu ukususela ngowe-1914.a Omnye waloo mifuziselo eyabonwa nguYohane embonweni, ngowehenyukazi elimbejembeje ngokugqithiseleyo, nelinekratshi, elibizwa ngokuba ‘yiBhabhiloni Enkulu, unina wamahenyukazi nowamasikizi omhlaba.’ Lalikweyiphi imeko? “Ndayibona inkazana leyo inxila ligazi labangcwele, naligazi lamangqina kaYesu.”—ISityhilelo 17:5, 6.
6. Kutheni le nto iBhabhiloni Enkulu ingafanekiselwa ngoothunywashe behlabathi abalawulayo bezobupolitika?
6 Ifanekisela bani le nkazana? Asishiywanga nje sifathula ebumnyameni ngokuphathelele ukufaniswa kwayo. Ngokwenziwa kothelekiso oluthile, inako ukubhencwa. Kwakuloo mbono mnye, uYohane uva isithunywa sezulu sisithi: “Yiza apha, ndikubonise ukugwetywa kwalo ihenyukazi elikhulu, elihleli phezu kwawo amanzi amaninzi; abahenyuze nalo ookumkani bomhlaba, abo bawumiyo umhlaba, banxiliswa yiwayini yobuhenyu balo.” Ukuba ookumkani, okanye abalawuli, bomhlaba bahenyuza kunye nalo, ngoko oko kuthetha ukuba eli henyukazi alinakufanekisela oothunywashe behlabathi abalawulayo bezobupolitika.—ISityhilelo 17:1, 2, 18.
7. (a) Kutheni le nto iBhabhiloni Enkulu ingafanekiselwa ngoothunywashe bezorhwebo? (b) Ifanekisela ntoni iBhabhiloni Enkulu?
7 Kwale ngxelo inye isixelela ukuba “nabarhwebi bomhlaba baba zizityebi, ngamandla okuxhamla kwabo iziyolo zayo.” Ngoko ke iBhabhiloni Enkulu ayinakufanekisela oothunywashe behlabathi bezoshishino, okanye ‘bezorhwebo.’ Kanti, isibhalo esiphefumlelweyo sithi: “Amanzi owawabonayo, apho lihleli khona ihenyukazi, ngabantu, nezihlwele, neentlanga, neelwimi.” Nguwuphi omnye uthunywashe ophambili oseleyo wale nkqubo yehlabathi ofanelana nenkcazelo yehenyukazi lokomfuziselo elihenyuza nabalawuli bezobupolitika, elirhweba kunye noosomashishini, yaye lihleli ngokuzukileyo phezu kwabantu, izihlwele, iintlanga neelwimi? Lunqulo lobuxoki olunenkangeleko eyahlukahlukeneyo!—ISityhilelo 17:15; 18:2, 3.
8. Ziziphi izibakala ezingakumbi eziqinisekisa ukuchana kwendlela efaniswa ngayo iBhabhiloni Enkulu?
8 Ukuchana kwale ndlela efaniswa ngayo iBhabhiloni Enkulu kuqinisekiswa kukuvakalisa kwesithunywa sezulu ukugwetywa kwayo ngenxa ‘yokukhafula kwayo okwathi kwalahlekisa zonke iintlanga.’ (ISityhilelo 18:23) Zonke iindlela zokusebenzelana nemimoya zisekelwe kunqulo yaye ziphenjelelwa ziidemon. (Duteronomi 18:10-12) Ngaloo ndlela, iBhabhiloni Enkulu imele ifuzisele uthunywashe ongokonqulo. Ubungqina beBhayibhile bubonisa ukuba ibubo bonke ubukhosi bukaSathana behlabathi bonqulo lobuxoki, olukhuthazwa nguye ezingqondweni zabantu ukuze aphethulele ingqalelo yabo kude noThixo wenyaniso uYehova.—Yohane 8:44-47; 2 Korinte 11:13-15; ISityhilelo 21:8; 22:15.
9. Yiyiphi imizila efanayo efumaneka kwiinkonzo ezininzi?
9 Njengoko sibonile kuyo yonke le ncwadi, kukho imizila efanayo kwiinkonzo eziphixeneyo zehlabathi. Iinkonzo ezininzi zisekelwe kwiintsomi. Phantse zonke zibotshwa ngabande linye luhlobo oluthile lwenkolelo eqikelelwayo yokungafi komphefumlo womntu othi usinde ekufeni uze uye kubomi basemva kokufa okanye ufudukele kwesinye isidalwa. Ezininzi zinomlinganiselo ofanayo wenkolelo yendawo eyoyikekayo yentuthumbo nongcungcutheko ebizwa ngokuba sisihogo. Ezinye zidityaniswa ziinkolelo zamandulo zobuhedeni zoothixo abangoobathathu emnye, noothixokazi abangoomama. Ngoko ke, kufaneleke ngokwenene ukuba zonke zibotshwe ngabande linye phantsi kophawu olunye lwehenyukazi “iBhabhiloni Enkulu.”—ISityhilelo 17:5.
Lixesha Lokuphuma Kunqulo Lobuxoki
10. Sisiphi isiphelo ekuprofetwe ngaso sehenyukazi lonqulo?
10 Yintoni iBhayibhile eyixela kwangaphambili eya kuba sisiphelo seli henyukazi eligqugqisa kuwo wonke umhlaba? Ngokufuziselayo, incwadi yeSityhilelo ichaza ngokutshatyalaliswa kwayo ngoothunywashe bezobupolitika. Aba thunywashe bafuziselwa ‘ziimpondo ezilishumi’ ezixhasa iZizwe Ezimanyeneyo, ‘irhamncwa elimfusa’ elingumfanekiselo wenkqubo kaSathana yezobupolitika enkone ligazi.—ISityhilelo 16:2; 17:3-16.b
11. (a) Kutheni le nto unqulo lobuxoki lugwetywa nguThixo? (b) Yintoni eza kwenzeka kwiBhabhiloni Enkulu?
11 Oku kutshatyalaliswa kobukhosi behlabathi bukaSathana bonqulo lobuxoki kuya kuba ngumphumo womgwebo oqatha kaThixo kwezi nkonzo. Ziya kube zifunyaniswe zinetyala lokuhenyuza ngokomoya ngenxa yokuthelela kwizenzo ezingendawo nokuxhasa kwazo izithandane zazo ezicinezelayo zobupolitika. Unqulo lobuxoki lunkone ligazi labamsulwa njengoko luye ngokuqhutywa ngumoya wokuthand’ izwe lwasebenzisana nabalawuli bodidi oluphezulu besizwe ngasinye ekulweni iimfazwe zaso. Ngoko ke, uYehova ufaka ezintliziyweni zoothunywashe bezobupolitika umoya wokuphumeza ukuthanda kwakhe ngokunxamnye neBhabhiloni Enkulu baze bayiphanzise.—ISityhilelo 17:16-18.
12. (a) Yintoni omele uyenze ngoku ukuze usindiswe xa iBhabhiloni itshatyalaliswa? (b) Ziziphi iimfundiso ezahlula unqulo lokwenyaniso?
12 Ekubeni iinkonzo zehlabathi zijamelene nekamva elinjalo, yintoni ofanele uyenze? Impendulo ifumaneka koko uYohane wakuva kuvakaliswa lilizwi elivela ezulwini lisithi: “Phumani kuyo, bantu bam, ukuze ningadlelani nayo ngezono zayo, nokuze ningamkeliswa kwizibetho zayo. Ngokuba izono zayo ziye zafikelela emazulwini, nezinto zayo zokungalungisi uzikhumbule uThixo.” Ngoko ke, ngoku lixesha lokuthobela umyalelo ogunyazisayo wesithunywa sezulu wokuphuma kubukhosi bukaSathana bonqulo lobuxoki uze uzibandakanye nonqulo lokwenyaniso lukaYehova. (Bona ibhokisi, kwiphepha 377.)—ISityhilelo 17:17; 18:4, 5; thelekisa uYeremiya 2:34; 51:12, 13.
IArmagedon Isemnyango
13. Ziziphi iziganeko ezimele zenzeke kwakamsinya?
13 ISityhilelo sibonisa ukuba “ziya kufika ngamini-nye izibetho zayo, ukufa, nesijwili, nendlala. Iya kutsha ngumlilo.” Ngokwemiqondiso yeziprofeto zeBhayibhile, loo ‘mini inye,’ okanye ixesha elifutshane lokutshatyalaliswa ngephanyazo, ngoku lisondele. Enyanisweni, ukutshatyalaliswa kweBhabhiloni Enkulu kuya kuba kukuqalisa kwexesha ‘lembandezelo enkulu’ eya kufikelela incopho yayo “emfazweni yaloo mini inkulu kaThixo, uSomandla . . . iArmagedon.” Loo mfazwe, okanye idabi, leArmagedon liya kukhokelela ekoyisweni kwenkqubo kaSathana yezobupolitika nasekuvalelweni kwakhe enzonzobileni. Kuya kuthi ke kuqalise ukuvela ihlabathi elitsha lobulungisa!—ISityhilelo 16:14-16; 18:7, 8; 21:1-4; Mateyu 24:20-22.
14, 15. Sisiphi isiprofeto seBhayibhile esibonakala siza kuzaliseka kungentsuku zatywala?
14 Sithetha nje, akusentsuku zatywala sibone ukuzaliseka kwesinye isiprofeto esibalaseleyo seBhayibhile. Umpostile uPawulos waprofeta waza walumkisa esithi: “Ke kaloku ngawo amaxesha namathuba, bazalwana, akufuneki nganto ukuba ndinibhalele; kuba nani ngokwenu niyazi ngokucacileyo, ukuba imini yeNkosi, njengesela ebusuku, yenjenjalo ukuza kwayo. Kuba xenikweni baya kuthi, Luxolo nokunqaba, oko baya kufikelwa yintshabalaliso ngebhaqo, kwanjengenimba komithiyo; baye bengayi kukha basinde.”—1 Tesalonika 5:1-3.
15 Kuya kubonakala ngathi izizwe ezazikade ziphakamiselana izigalo yaye zijongene ngezikhondo zamehlo ngoku zifikelele kwinqanaba lokuvakalisa uxolo nonqabiseko lwehlabathi. Ngoko ke, ngokusuka kwenye inkalo, siyazi ukuba usuku lomgwebo kaYehova ozela unqulo lobuxoki, iintlanga nomlawuli wazo uSathana, lusondele.—Zefaniya 2:3; 3:8, 9; ISityhilelo 20:1-3.
16. Kutheni le nto isiluleko sikaYohane sifaneleke kangaka namhlanje?
16 Izigidi zabantu namhlanje zibuphila ubomi bazo ngokungathi akukho nto yimbi ehlala ngokusisigxina nebalulekileyo ngaphandle kobuncwane bezinto eziphathekayo. Kanti, oko kuveliswa leli hlabathi lonakeleyo kokwexeshana yaye kuza kudlula ngokukhawuleza. Kungoko esi siluleko sikaYohane sifaneleke kangaka: “Musani ukulithanda ihlabathi, kwanezinto ezisehlabathini. Ukuba kukho othi alithande ihlabathi, uthando lukaYise alukho kuye. Ngokuba konke okusehlabathini, inkanuko yenyama, nenkanuko yamehlo, noqhankqalazo lobu bomi, asikokuphuma kuye uYise, kokuphuma ehlabathini. Ihlabathi ke liyadlula, nenkanuko yalo; ke yena owenza ukuthanda kukaThixo uhleli ngonaphakade.” Ngaba ubungayi kukhetha ukuhlala ngonaphakade?—1 Yohane 2:15-17.
Idinga Lehlabathi Elitsha
17. Ikamva libafumbethele ntoni abo bafuna uThixo wenyaniso?
17 Ekubeni uThixo eza kuligweba ihlabathi ngokusebenzisa uKristu Yesu, yintoni eza kulandela? Kude kudala, kwiZibhalo zesiHebhere, uThixo waprofeta ukuba wayeza kuyiphumeza injongo yakhe yantlandlolo ngoluntu kulo mhlaba, yokuba kubekho intsapho yabantu abathobekileyo abaphila ubomi obufezekileyo kumhlaba oyiparadisi. Ilinge likaSathana lokutshitshisa loo njongo alizange lilibhangise idinga likaThixo. Ngaloo ndlela, uKumkani uDavide wayenokubhala athi: “Ngokuba abenzi bobubi baya kunqunyulwa; ke bona abamthembayo uYehova, baya kulidla ilifa ilizwe. Kusaya kuba mzuzwana, angabikho ongendawo . . . Amalungisa aya kulidla ilifa ilizwe, ahlale kulo ngonaphakade.”—INdumiso 37:9-11, 29; Yohane 5:21-30.
18-20. Ziziphi iinguqulelo eziza kwenzeka kulo mhlaba?
18 Uya kube ukweyiphi imeko umhlaba ngelo xesha? Ngaba uya kube ungcoliswe ngokupheleleyo? Utshisiwe? Amahlathi awo egawulwe? Nakanye! Kwantlandlolo uYehova wayenenjongo yokuba umhlaba ufanele ube ngumyezo weparadisi ecocekileyo, nelungeleleneyo. Lisekho ithemba lokuzaliseka kwaloo njongo phezu kwako nje ukonakalisa kwabantu umhlaba. Kodwa uYehova uye wathembisa ukuba uza ‘kubonakalisa abo bawonakalisayo umhlaba.’ Imeko yokuphanziswa komhlaba uphela iye yaqala ukubonakala kwinkulungwane yama-20. Ngoko, kukho isizathu esingakumbi sokukholelwa ukuba kwakamsinya uYehova uza kuthabatha inyathelo lokukhusela umhlaba, oyindalo yakhe.—ISityhilelo 11:18; Genesis 1:27, 28.
19 Le nguqulelo iza kwenzeka kwakamsinya phantsi kwelungiselelo likaThixo ‘lezulu elitsha nomhlaba omtsha.’ Ayisayi kuthetha ukudalwa kwesibhakabhaka sitsha negaqa lomhlaba elitsha kodwa, kunoko iya kuba lulawulo olutsha lokomoya kumhlaba ohlaziyiweyo omiwe libutho loluntu olungamalungisa. Kwelo hlabathi litsha, akusayi kubakho ukuxhatshazwa kwabantu abangoowethu okanye kwezilwanyana. Akusayi kubakho lugonyamelo okanye ukuphalazwa kwegazi. Akusayi kubakho bantu bangenamakhaya, abalambayo nabacinezelwayo.—ISityhilelo 21:1; 2 Petros 3:13.
20 ILizwi likaThixo lithi: “Baya kwakha izindlu, bazihlale; batyale izidiliya, badle iziqhamo zazo. Abayi kwakha, kuhlale bambi; abayi kutyala, kudle bambi; kuba iya kuba njengemihla yomthi imihla yabantu bam, badle into esetyenzwe zizandla zabo abanyulwa bam. . . . Kuya kudla ndawonye ingcuka nemvana, ingonyama idle umququ njengenkomo; inyoka, sibe luthuli isonka sayo. Aziyi kwenza bubi, zonakalise, kuyo yonke intaba yam engcwele; utsho uYehova.”—Isaya 65:17-25.
Isiseko Sehlabathi Elitsha
21. Kutheni le nto ihlabathi elitsha liyinto eqinisekileyo?
21 Usenokubuza uthi, ‘Kuza kwenzeka njani konke oku?’ Ngenxa yokuba ‘uThixo, ongenakuxoka, wabeka idinga ngaphambi kwamaxesha angunaphakade’ lokuba uluntu lwaluya kuhlaziywa luze lufumane ubomi obungunaphakade emfezekweni. Ibe isiseko seli themba sikoko umpostile uPetros wakuvakalisayo kwincwadi yakhe yokuqala eyayisiya kumaKristu athanjisiweyo awayekhonza kunye nawo: “Makabongwe uThixo, uYise weNkosi yethu uYesu Kristu, othe ngokobuninzi benceba yakhe, wasizala ngokutsha, ukuba sibe nethemba eliphilileyo ngokuvuka kukaYesu Kristu kwabafileyo; sibe nelifa elingenakonakala, elingenakudyobheka, elingenakuguga.”—Tito 1:1, 2; 1 Petros 1:3, 4.
22. Yintoni esisiseko sethemba lehlabathi elitsha, yaye ngoba?
22 Ukuvuka kukaYesu Kristu kusisiseko sethemba lehlabathi elitsha lobulungisa kuba uye wanyulwa nguThixo ukuba athi ngoxa esemazulwini alawule kumhlaba ocociweyo. Kwakhona uPawulos wagxininisa indlela olubaluleke ngayo uvuko lukaKristu xa wabhala oku: “UKristu yena kunje uvukile kwabafileyo, waba yintlahlela yabalele ukufa. Kuba ekubeni kaloku kungomntu ukufa, kukwangomntu ukuvuka kwabafileyo. Kuba, njengokuba kuye uAdam bafa bonke, ngokunjalo nakuye uKristu baya kudliswa ubomi bonke.”—1 Korinte 15:20-22.
23. (a) Kutheni ukuvuka kukaKristu kubalulekile nje? (b) Nguwuphi umyalelo uYesu ovusiweyo awawunika abalandeli bakhe?
23 Ukufa kukaKristu okulidini njengentlawulelo nokuvuka kwakhe kwandlala isiseko sethemba ‘lezulu elitsha,’ ulawulo loBukumkani, nelohlanga loluntu oluhlaziyiyweyo, ibutho ‘lomhlaba omtsha.’ Kwakhona ukuvuka kwakhe kwabangela ukuba abapostile bakhe abathembekileyo babe nenzondelelo engakumbi ekushumayeleni nasekufundiseni kwabo. Ingxelo isixelela oku: “Bahamba ke abafundi abalishumi elinamnye, baya kwelaseGalili, kuloo ntaba wayebayalele yona uYesu [ovusiweyo]. Baza bakumbona baqubuda kuye; ke inxenye yathandabuza. Waza uYesu wathetha kubo, esithi, Linikwe mna lonke igunya emazulwini nasehlabathini. Hambani ngoko niye kuzenza abafundi zonke iintlanga, nibabhaptizela egameni loYise, loNyana, loMoya oyiNgcwele; nibafundisa ukuba bazigcine zonke izinto endiniwisele umthetho ngazo. Niyabona, mna ndinani yonke imihla, kude kube sekuphelisweni kwephakade eli.”—Mateyu 19:28, 29; 28:16-20; 1 Timoti 2:6.
24. Yiyiphi intsikelelo engakumbi ukuvuka kukaYesu okuyiqinisekisayo?
24 Kwakhona ukuvuka kukaYesu kuqinisekisa enye intsikelelo yoluntu—ukuvuswa kwabafileyo. Ukuvusa kukaYesu uLazaro ekufeni kwakungumfuziselo wokuvuswa kwabantu abaninzi ngakumbi kwixesha elizayo. (Bona iphepha 249-50.) UYesu wayethe: “Musani ukumangaliswa kuko oko; ngokuba kuza ilixa abaya kuthi ngalo bonke abasemangcwabeni balive ilizwi lakhe; baphume ke: abo benza izinto ezilungileyo beze eluvukweni lobomi; nabo ke benza izinto ezimbi, beze eluvukweni lokugwetywa.”—Yohane 5:28, 29; 11:39-44; IZenzo 17:30, 31.
25. (a) Luluphi ukhetho oluza kubakho kubantu bonke kwihlabathi elitsha? (b) Luhlobo olunjani lonqulo oluya kuqheliselwa ngokubanzi kwihlabathi elitsha?
25 Olunjani lona uvuyo ekuya kuba lulo ukwamkela kwakhona abathandekayo bethu, ngokunokwenzeka oko kusenziwa kwisizukulwana ngasinye ngokulandelelana kwazo! Apho kwihlabathi elitsha, mntu ngamnye uya kukwazi ukwenza isigqibo phantsi kweemeko zemfezeko enoba uya kukhonza uThixo wenyaniso, uYehova, okanye aphulukane nobomi njengomchasi kusini na. Ewe, kwihlabathi elitsha, kuya kubakho unqulo olunye kuphela, indlela enye yokunqula. Yonke indumiso iya kusiwa kuMdali onothando, yaye mntu ngamnye othobelayo uya kuphinda amazwi omdumisi athi: “Ndiya kukuphakamisa, Thixo wam, wena Kumkani, ndilibonge igama lakho ngonaphakade kanaphakade. . . . Mkhulu uYehova, ngowokudunyiswa kakhulu; ubukhulu bakhe abunakugocwagocwa.”—INdumiso 145:1-3; ISityhilelo 20:7-10.
26. Kutheni le nto ufanele uhlolisise iLizwi likaThixo, iBhayibhile?
26 Ngoku ekubeni uye wathelekisa iinkonzo eziphambili zehlabathi, siyakumema ukuba ulihlolisise ngokubhekele phaya iLizwi likaThixo, iBhayibhile, elo zisekelwe kulo iinkolelo zamaNgqina kaYehova. Ziphandele ngokwakho ubungqina bokuba uThixo wenyaniso unako ukufunyanwa. Nokuba ungumHindu, umSilamsi, umBhuda, umShinto, umConfucius, umTao, umYuda, umKristu, okanye ungowalo naluphi na olunye unqulo, ngoku lixesha lokuhlolisisa ulwalamano lwakho noThixo wenyaniso nophilayo. Mhlawumbi unqulo lwakho walukhetha ngenxa yendawo owazalelwa kuyo, kungekho ndlela yakuluphepha. Ngokuqinisekileyo, akukho nto ulahlekelwa yiyo ngokuhlolisisa oko iBhayibhile ikutshoyo ngoThixo. Eli isenokuba lithuba lakho lokufumana ubomi obungunaphakade ngokuthi uyazi ngokwenene injongo yeNkosi uThixo onguMongami wendalo iphela ngalo mhlaba nangoluntu olukuwo. Ewe, uphando lwakho lokwenene lokufuna uThixo wenyaniso lunokwaneliswa ngokufundisisa iBhayibhile kunye nabathunywa bakaYehova, amaNgqina akhe, lawo akuzisele le ncwadi.
27. (a) Sisiphi isimemo uYesu asidluliselayo kuwe? (b) Ngokuvisisana nomxholo wale ncwadi, yintoni uIsaya amemela wonke ubani ukuba ayenze?
27 UYesu wayengathetheli ilize xa wayesithi: “Celani, nophiwa; funani, nofumana; nkqonkqozani, novulelwa.” Unokuba phakathi kwabo baye bamfumana uThixo wenyaniso ukuba uthobela isigidimi somprofeti uIsaya esithi: “Funani uYehova esenokufunyanwa; mbizeni esekufuphi. Ongendawo makashiye indlela yakhe, indoda enobutshinga mayishiye iingcinga zayo, ibuyele kuYehova: woba nemfesane kuyo; ibuyele kuThixo wethu ngokuba woxolela ngokukhulu.”—Mateyu 7:7; Isaya 55:6, 7.
28. Ngoobani abanokukunceda ukuba ufumane uThixo wenyaniso?
28 Ukuba ukwiphulo lokufuna uThixo wenyaniso, zive ukhululekile ukuqhagamshelana namaNgqina kaYehova.c Ngaphandle kwentlawulo aya kukuvuyela ukukunceda ukuba umazi ngokusondeleyo uBawo nokuthanda kwakhe ngoxa kusekho ixesha.—Zefaniya 2:3.
[Imibhalo esemazantsi]
a Ukuze ufumane inkcazelo eneenkcukacha ngokuphathelele imihla yokugqibela, bona ethi Unokuphila Ngonaphakade KwiParadisi Esemhlabeni, epapashwe yiWatchtower Bible and Tract Society of New York, Inc., ngowe-1982, iphepha 148-54.
b Ukuze ufumane ukuhlolisiswa ngokweenkcukacha kwezi ziprofeto ezikwiSityhilelo, bona incwadi ethi ISityhilelo—Incopho Yaso Ezukileyo Isondele!, epapashwe yiWatchtower Bible and Tract Society of New York, Inc., ngowe-1988, isahluko 33-37.
c Ukuze ufumane uludwe lweedilesi, bona iphepha 384.
[Ibhokisi/Umfanekiso okwiphepha 377]
Indlela Yokufanisa Unqulo Lokwenyaniso
1. Kunqulo lokwenyaniso kunqulwa okuphela koThixo wenyaniso, uYehova.—Duteronomi 6:4, 5; INdumiso 146:5-10; Mateyu 22:37, 38.
2. Kunqulo lokwenyaniso kusondelwa kuThixo ngoKristu Yesu.—Yohane 17:3, 6-8; 1 Timoti 2:5, 6; 1 Yohane 4:15.
3. Unqulo lokwenyaniso lufundisa luze luqhelisele uthando lokungazingci.—Yohane 13:34, 35; 1 Korinte 13:1-8; 1 Yohane 3:10-12.
4. Unqulo lokwenyaniso aludyojwanga ziipolitiki nangamadabi ehlabathi. Lugcina ubundilele ngexesha lemfazwe.—Yohane 18:36; Yakobi 1:27.
5. Unqulo lokwenyaniso lumgqala uThixo njengonenyaniso ngokuthi lwamkele iBhayibhile njengeLizwi likaThixo.—Roma 3:3, 4; 2 Timoti 3:16, 17; 1 Tesalonika 2:13.
6. Unqulo lokwenyaniso aluyithetheleli imfazwe okanye ugonyamelo lwabantu.—Mika 4:2-4; Roma 12:17-21; Kolose 3:12-14.
7. Unqulo lokwenyaniso lubamanyanisa ngokunempumelelo abantu bazo zonke iintlanga, iilwimi nezizwe. Alushumayeli umoya wobuhlanga okanye wentiyo, kodwa lushumayela owothando.—Isaya 2:2-4; Kolose 3:10, 11; ISityhilelo 7:9, 10.
8. Unqulo lokwenyaniso lukhuthaza ukukhonza uThixo, kungekhona ngenjongo yokufumana ingeniso okanye umvuzo wokuzingca, kodwa ngenxa yothando. Aluzukisi bantu. Luzukisa uThixo.—1 Petros 5:1-4; 1 Korinte 9:18; Mateyu 23:5-12.
9. Unqulo lokwenyaniso luvakalisa uBukumkani bukaThixo njengethemba eliqinisekileyo labantu, kungekhona intanda-bulumko yezobupolitika okanye yezentlalo.—Marko 13:10; IZenzo 8:12; 28:23, 30, 31.
10. Unqulo lokwenyaniso lufundisa inyaniso ngokuphathelele injongo kaThixo ngabantu nangomhlaba. Alufundisi ubuxoki obungokonqulo bomphefumlo ongafiyo nobentuthumbo kanaphakade esihogweni. Lufundisa ukuba uThixo uluthando.—ABagwebi 16:30; Isaya 45:12, 18; Mateyu 5:5; 1 Yohane 4:7-11; ISityhilelo 20:13, 14.
[Umfanekiso]
AmaNgqina eshumayela eNetherlands
[Imifanekiso ekwiphepha 373]
Kukho ithemba lokuba umhlaba uza kuba yiparadisi—ukuze oku kwenzeke, kufuneka urhulumente wobulungisa osisigxina ibe uThixo usithembisile ngaye
[Umfanekiso okwiphepha 374]
Ngaphambi kokubuyela ezulwini, uYesu wayalela abafundi bakhe ukuba bashumayele baze bafundise iindaba ezilungileyo kuwo wonke umhlaba
[Imifanekiso ekwiphepha 379]
Ukuvuswa kwabafileyo kuya kuzisa uvuyo kwintsapho engabantu emhlabeni ngokubanzi