Ngoko kutheni le nto kusekho ubungendawo obuninzi kangaka emhlabeni? Ngemva kokuhlaliswa etroneni kukaKristu, uSathana needemon zakhe bakhutshwa ezulwini baza baphoselwa emhlabeni. (ISityhi. 12:12) UKristu njengoKumkani akalithabathanga kwaoko inyathelo lokutshabalalisa bonke abalayo ukwamkela ulongamo lukaYehova naye njengoMesiya. Kunoko, njengoko kuxelwe ngenx’ engaphambili, kwakuza kwenziwa umsebenzi wokushumayela emhlabeni wonke. (Mat. 24:14) NjengoKumkani wayeya kwalathisa ukwahlulwa kwabantu bazo zonke iintlanga, abo bazingqina bengamalungisa benikwa ithemba lobomi obungunaphakade, yaye abangendawo besabelwa ekunqunyulweni ngonaphakade ekufeni. (Mat. 25:31-46) Okwelo thuba, kwakuya kwesamela iimeko ezinzima gqitha ezazixelwe ngenx’ engaphambili njengezaziya kubakho ‘ngemihla yokugqibela.’ Njengoko kuboniswa phantsi komxholo othi “ImiHla Yokugqibela,” ezo ziganeko bezibonakala ngokucacileyo ukususela kowe-1914. Ngaphambi kokuba amalungu okugqibela esizukulwana esasiphila ngowe-1914 aphele, zonke izinto ezazixelwe ngenx’ engaphambili ziya kwenzeka, kuquka “imbandezelo enkulu” eliya kuphela kuyo ihlabathi elikhoyo elingendawo.—Mat. 24:21, 22, 34.

Kuya kufika nini ukuphela kweli hlabathi lingendawo?

UYesu waphendula wathi: “Ke akukho bani uwaziyo loo mhla nelo xesha. Kwanezithunywa ezisezulwini azazi, engazi naye uNyana lo. Kuphela nguYise owaziyo.” Phofu ke, wakwachaza wathi: “Ndithi kuni, inene, esi sizukulwana [esasiphila xa “umqondiso” ‘wemihla yokugqibela’ waqala ukuzaliseka] asiyi kudlula zingadanga zenzeke zonke ezi zinto.”—Mat. 24:36, 34, TE.

Kwakhona, ngemva kokuchaza iziganeko ezaziya kulandela ukumiselwa koBukumkani ezandleni zikaYesu Kristu ngowe-1914, ISityhilelo 12:12 sihlomela oku: “Yibani nemihlali, nina mazulu, nani ninomnquba kuwo. Yeha, abo bawumiyo umhlaba nolwandle! ngokuba uhlile weza kuni uMtyholi, enomsindo omkhulu, esazi nje ukuba ixesha analo lincinane.”

ImiHla Yokugqibela

Ingcaciso: IBhayibhile isebenzisa ibinzana elithi “imihla yokugqibela” ukubhekisela kwithuba lokuqosheliswa kwexesha elikhokelela kumgwebo omiselwe nguThixo ophawula isiphelo senkqubo yezinto. Inkqubo yamaYuda eyayinonqulo lwalo olwalusekelwe kwitempile yaseYerusalem yafikelela kwimihla yayo yokugqibela ebudeni bexesha elafikelela kwincopho ngokutshatyalaliswa kwayo ngowama-70 C.E. Okwenzeka ngoko kwakufanekisela oko kwakuya kubonwa ngendlela enkulu ngakumbi nangokomlinganiselo wazwenibanzi kwixesha laxa zonke iintlanga zaziya kube zijongene nokuphunyezwa komgwebo omiselwe nguThixo. Inkqubo yezinto engendawo nekhoyo, efikelela zwenibanzi, yafikelela kwimihla yayo yokugqibela ngowe-1914, ibe abathile besizukulwana esasiphila ngoko baya kuba bephila ukuze babone isiphelo sayo esipheleleyo ‘kwimbandezelo enkulu.’

Yintoni ebonisa ukuba thina namhlanje siphila ‘kwimihla yokugqibela’?

IBhayibhile ichaza iziganeko neemeko eziphawula eli thuba lexesha. “Umqondiso” ungoyintlanganisela yaye ubunjwe bubungqina obuninzi; ngaloo ndlela ukuzaliseka kwawo kufuna ukuba zonke iinkalo zomqondiso zibe zibonakala ngokucacileyo ebudeni besizukulwana esinye. Iinkalo ezahlukahlukeneyo zomqondiso zibhalwe kuMateyu isahluko 24, 25, kuMarko 13, nakuLuka 21; kukho iinkcukacha ezingakumbi kweyesi-2 kuTimoti 3:1-5, kweyesi-2 kaPetros 3:3, 4, nakwiSityhilelo 6:1-8. Ngendlela yokuzekelisa, siza kuqwalasela amacandelo ambalwa abalaseleyo alo mqondiso.

“Uhlanga luya kuvukelana nohlanga, nobukumkani buvukelane nobukumkani” (Mat. 24:7)

Imfazwe iye yatshabalalisa ubomi babaninzi emhlabeni kangangamawaka eminyaka. Kuye kwaliwa iimfazwe phakathi kwezizwe ngezizwe naphakathi kweentlanga. Kodwa ukususela ngowe-1914 kwabakho imfazwe yehlabathi yokuqala. Le yayingeyomfazwe nje ephakathi kwemikhosi emibini kwithafa ledabi. Okwesihlandlo sokuqala, onke amagunya amakhulu ayesemfazweni. Zonke iintlanga—kuquka abemi nje—baqokelelwa ukuba baxhase imfazwe. Kuqikelelwa ukuba ngasekupheleni kwemfazwe abemi behlabathi abangama-93 ekhulwini babebandakanyekile. (Ngokubhekisele kwintsingiselo engokwembali yowe-1914, bona iphepha 141, 142.)

Njengoko kwaxelwa kwangaphambili kwiSityhilelo 6:4, ‘uxolo lwalususiwe emhlabeni.’ Ngaloo ndlela ihlabathi liye laqhubeka likwimeko yezidubedube ukususela ngowe-1914. IMfazwe Yehlabathi II yabakho ukususela ngowe-1939 ukusa kowe-1945. Ngokutsho kuka-Admiral Gene La Rocque odla umhlala-phantsi, ukuza kuthi ga kowe-1982 kwakukho ezinye iimfazwe ezingama-270 ukususela kowe-1945. Abantu abangaphezu kwe-100 lezigidi baye babulawa emfazweni ebudeni bale nkulungwane. Kwakhona, ngokutsho kohlelo lowe-1982 lweWorld Military and Social Expenditures, kuloo nyaka kwakukho abantu abali-100 lezigidi ababebandakanyeke ngokuthe ngqo okanye ngokungathe ngqo kwimicimbi yezomkhosi.

Ngaba kufuneka okungakumbi ukuze kuzalisekiswe le nkalo yesiprofeto? Kukho amashumi amawaka ezixhobo zenyukliya ezimiswa kwiindawo ngeendawo ukuze zisetyenziswe ngokukhawuleza. Izazinzulu eziphambili ziye zathi ukuba iintlanga bezinokusebenzisa kwaneqhezu lezixhobo ezikumaziko azo enyukliya, bekuya kutshatyalaliswa inkcubeko mhlawumbi nabo bonke abantu. Kodwa lowo asingomphumo isiprofeto seBhayibhile esiwubonisayo.

“Kuya kubakho iindlala, . . . kwiindawo ngeendawo” (Mat. 24:7)

Kwimbali yabantu bekukho iindlala ezininzi. Inkulungwane yama-20 iye yantlithwa zizo ukusa kuwuphi umlinganiselo? Imfazwe yehlabathi yabangela ukulamba kwabantu abaninzi eYurophu naseAshiya. IAfrika iye yantlithwa yimbalela, nto leyo ephumele ekunqongophaleni kokutya ngokuqatha. Kamva ngowe-1980 iNtlangano Yokutya Neyezolimo yaqikelela ukuba abantu abangama-450 ezigidi babelambe ukusa kwinqanaba lokufa yindlala, ibe abafikelela kumawaka ezigidi babengenakutya kwaneleyo ababemele bakudle. Kwaba, abanokuba ngama-40 ezigidi ngonyaka bafa ngokoqobo—kwiminyaka ethile babebaninzi kangangama-50 ezigidi—ngenxa yokunqongophala kokutya.

Ngaba kukho nantoni na eyahlukileyo ngoku kunqongophala kokutya? ISityhilelo 6:6 sabonisa ukuba igcuntswana lokutya kwezizwe ezithile okunjengengqolowa okanye irhasi laliya kuthengiswa ngomvuzo wemini (idenariyo; bona uMateyu 20:2), yaye salumkisa ngokusigqiba ngokukhawuleza isixa seoli yomnquma newayini. Zonke ezi zinto zazigqalwa njengezinto ezaziyimfuneko kuMbindi Mpuma ngelo xesha; ngoko oku kwaxela kusengaphambili ukunqongophala kokutya okuqatha. Le meko ayisasebenzi nje ekuhlaleni, kodwa isebenza zwenibanzi. Ngowe-1981 iThe New York Times yathi: “Ukuphuculwa kwemilinganiselo yokuphila nokufunwa kokutya ngendlel’ ethabath’ unyawo jikelele ehlabathini kuye kwabangela ingcinezelo kumaxabiso okutya, nto leyo enze kwanzima ngakumbi ngamazwe ahlwempuzeke gqitha ukuba athenge ukutya kwawo akufunayo.” Kumazwe amaninzi ukuveliswa kokutya, nangoncedo lwenzululwazi yanamhla, akukwazanga ukukhuphisana nokwanda kwabo bonke abemi behlabathi. Iingcaphephe zokutya zanamhla aziboni sicombululo sokwenene kule ngxaki.

“Kuya kubakho iinyikima zomhlaba” (Luka 21:11)

Kuyinyaniso ukuba kwakukho iinyikima ezinkulu kwiinkulungwane ezidluleyo; ngokungakumbi, njengoko izazinzulu zinezixhobo zazo ezizibonisa ngokukhawuleza ngoku zibona iinyikima ezingaphezu kwezigidi ngonyaka. Kodwa akufuneki zixhobo zikhethekileyo ebantwini ukuze bazi xa kukho inyikima yomhlaba enkulu.

Ngaba eneneni bekukho inani elikhulu leenyikima zomhlaba ezinkulu ukususela ngowe-1914? Ngenkcazelo eyafunyanwa kwiZiko Lesizwe Elinenkcazelo Engokufundisiswa Komhlaba eBoulder, eColorado, neyaqukwa ziincwadi eziliqela ezineembekiselo nezisemgangathweni, ngowe-1984 kwenziwa uhlolisiso olwaquka kuphela iinyikima zomhlaba ezazinomlinganiselo we-7,5 okanye ngaphezulu ngokwesikali zikaRichter, okanye ezabangela ukutshatyalaliswa kwempahla edla izigidi zeerandi ezilishumi okanye ngaphezulu, okanye ezabangela ukufa kwabantu abali-100 okanye ngaphezulu. Kwafunyaniswa ukuba kwakukho iinyikima zomhlaba ezingama-856 ezilolo hlobo ebudeni beminyaka engama-2 000 ngaphambi kowe-1914. Kwauhlolisiso olufanayo lwabonisa ukuba kwiminyaka nje engama-69 emva kowe-1914 kwakukho iinyikima ezingama-605 ezinjalo. Oko kuthetha ukuba, xa kuthelekiswa neminyaka yangaphambili engama-2 000, umlinganiselo wonyaka ngamnye ubumkhulu ngokuphindwe kangangama-20 ukususela ngowe-1914.

‘Kubekho neendyikitya zokufa kwiindawo ngeendawo’ (Luka 21:11)

Ekupheleni kwemfazwe yehlabathi yokuqala uMbathalala wagqugqisa lonke ihlabathi, ubulala abantu abangaphezu kwama-20 ezigidi yaye ubulala ngomlinganiselo ongazange ubonwe kwimbali yezifo. Phezu kwako nje ukuhambela phambili kwenzululwazi yezamayeza, nyaka ngamnye abantu abaninzi babulawa ngumhlaza, sisifo sentliziyo, zizifo eziliqela ezidluliswa ngeentlobano zesini, yimultiple sclerosis, sisifo seengcongconi, kukutyhatshazwa ngumlambo, nesifo sikaChagas.

‘Ukwanda kokuchas’ umthetho okuphelekwa kukuphola kothando lwabaninzi’ (Mat. 24:11, 12)

Isazi esibalaseleyo ngezaphuli-mthetho sithi: “Into ekwenza ukhwankqiseke xa ukhangela kulwaphulo-mthetho olusehlabathini lonke lulwando lwalo olugqugqisileyo noluzingisileyo kwiindawo zonke. Iindawo ezingenalo zimbalwa gqitha, ibe kungekudala zisenokutshayelwa leli liza likhulayo.” (The Growth of Crime, New York, 1977, uMhlekaz’ uLeon Radzinowicz noJoan King, iphe. 4, 5) Ulwando lolokwenene; asingomcimbi nje wokuchaza ezona zinto zibalaseleyo. Oku kuyinyaniso, nezizukulwana ezidluleyo bezinazo izaphuli-mthetho, kodwa akuzange ngaphambili ulwaphulo-mthetho lugqugqise ngendlela olwenza ngayo ngoku. Abantu abasele bekhulile ngeminyaka bakwazi ngamava obuqu oko.

Ukuchas’ umthetho ekubhekiselwe kuko kwesi siprofeto kuquka ukujongelwa phantsi kwemithetho eyaziwayo kaThixo, ukuzibeka kukabani phambili ebomini bakhe endaweni yokubeka uThixo. Ngenxa yesi simo sengqondo, imilinganiselo yoqhawulo-mtshato iyantinga, isini esingaphandle komtshato nobufanasini zizinto ezamkelwa ngokubanzi, ibe amashumi ezigidi abantwana ayaqhomfwa nyaka ngamnye. Ukuchas’ umthetho okunjalo kunxulunyaniswe (kuMateyu 24:11, 12) nempembelelo yabaprofeti bobuxoki, abo balibekela bucala iLizwi likaThixo ngenxa yokukholana neemfundiso ezizezabo. Ukuthobela iingcamango zabo kunokubambelela eBhayibhileni kufak’ isandla ekwenzeni ihlabathi elingenaluthando. (1 Yoh. 4:8) Funda ingcaciso yoku kweyesi-2 kuTimoti 3:1-5.

“Abantu besifa kukoyika nakukulindela izinto ezilizelayo elimiweyo” (Luka 21:25, 26)

“Isibakala sesokuba namhlanje imvakalelo eyodwa neyiyeyona inkulu elawula ubomi bethu luloyiko,” yatsho iU.S. News & World Report. (Oktobha 11, 1965, iphe. 144) “Aluzange ngaphambili uluntu loyike njengokuba lusoyika ngoku,” latsho njalo iphephancwadi laseJamani iHörzu.—No. 25, Juni 20, 1980, iphe. 22.

Zininzi izinto ezifak’ isandla kule meko yoloyiko ikhoyo emhlabeni: ulwaphulo-mthetho olunogonyamelo, ukungaqeshwa, ukuxengaxenga kwezoqoqosho ngenxa yokuba iintlanga ezininzi gqitha zithe zwabha ematyaleni ngokungenathemba, ukungcoliswa kwemekobume zwenibanzi, ukusweleka kwamaqhina entsapho awomeleleyo nangawothando, nemvakalelo ecinezelayo yokuba uluntu lujongene nengozi esondeleyo yembubhiso yenyukliya. ULuka 21:25 ukhankanya ‘imiqondiso elangeni nasenyangeni nasezinkwenkwezini; nokugquma kweelwandle’ ngokunxibelelene nokuxinezeleka okuviwa ziintlanga. Ukuphuma kwelanga kudla ngokubangela, kungekhona ithemba elonwabisayo, kodwa kubangel’ uloyiko ngento esenokuziswa yiloo mini; xa inyanga neenkwenkwezi zikhanyisa, ukoyika ulwaphulo-mthetho kwenza abantu bahlale ngaphaya kweengcango ezitshixiweyo. Kwinkulungwane yama-20, kodwa kungekhona ngaphambi kwayo, kuye kwasetyenziswa iinqwelo-moya neentolo zomlilo ukuthumela intshabalalo evela emazulwini. Iinkwili ezithwele imithwalo ebulalayo yeentolo zomlilo zithwethwa kwiilwandle, inkwili nje enye enjalo ixhotyiselwe ukutshabalalisa izixeko ezili-160. Akumangalisi ukuba iintlanga zibe zixinezelekile!

‘Abalandeli bakaKristu bokwenyaniso bathiywe ziintlanga zonke ngenxa yegama lakhe’ (Mat. 24:9)

Le ntshutshiso ayibangelwa kukugxuphuleka kwezobupolitika kodwa ‘ibangelwa ligama likaYesu Kristu,’ ngenxa yokuba abalandeli bakhe balandela yena njengoKumkani kaYehova onguMesiya, ibangelwa kukuthobela kwabo uKristu ngaphezu kwakhe nawuphi na umlawuli wasemhlabeni, ibe ibangelwa kukunamathela kwabo ngokunyanisekileyo kuBukumkani bakhe yaye bengabandakanyeki kwimicimbi yoorhulumente babantu. Njengoko imbali yanamhla ingqina, lawo ibe ngamava amaNgqina kaYehova kuzo zonke iindawo zomhlaba.

‘Ezi ndaba zilungileyo zobukumkani zivakaliswe kulo elimiweyo liphela, zibe bubungqina’ (Mat. 24:14)

Isigidimi esasiza kushunyayelwa sesokuba uBukumkani bukaThixo obulawulwa nguYesu Kristu buqalisile ukulawula emazulwini, yaye kungekudala buza kuphelisa yonke inkqubo yezinto engendawo, yaye kwakuza kuvakaliswa nokuba phantsi kolawulo lwabo uluntu luza kuziswa kwimfezeko nomhlaba ube yiparadisi. Ezo ndaba zilungileyo namhlanje zishunyayelwa kumazwe angaphezu kwama-200 namaqela eziqithi, ukusa kwezona ndawo zikude zomhlaba. AmaNgqina kaYehova anikela amakhulu ezigidi zeeyure kulo msebenzi nyaka ngamnye, esenza amatyelelo aphindaphindiweyo kwindlu ngendlu ukuze wonk’ ubani anokudibana naye anikwe ithuba lokuphulaphula.

Ezi ziganeko ‘zemihla yokugqibela’ zalatha entwenini xa zizonke?

Luka 21:31, 32: “Xa nithe nazibona ezi zinto zisihla, yazini ukuba bukufuphi ubukumkani bukaThixo [oko kukuthi, ixesha laxa buya kutshabalalisa ihlabathi elingendawo elikhoyo buze bona ngokwabo buyilawule yonke imicimbi yomhlaba]. Inene ndithi kuni, Asiyi kukha sidlule esi sizukulwana, zide zihle zonke ezi zinto.” (‘Isizukulwana’ esasiphila ekuqaliseni kokuzaliseka komqondiso ngowe-1914 ngoku sele sikhulile ngokweminyaka. Ixesha eliseleyo limele ukuba lifutshane gqitha. Iimeko zehlabathi zibonisa ngazo zonke iindlela ukuba oku kunjalo.)

Kutheni le nto amaNgqina kaYehova esithi “imihla yokugqibela” yaqalisa ngowe-1914?

Unyaka we-1914 uphawulwa sisiprofeto seBhayibhile. Ngokubhekisele kwiinkcukacha ezingobalo-maxesha, bona iphepha 133-135, phantsi komxholo omkhulu othi “ImiHla Yeziganeko.” Ukuchana kwalo mhla kuboniswa sisibakala sokuba iimeko zehlabathi ezaxelwa kwangaphambili zisiya kuphawula eli thuba lexesha ziye zaqhubeka ukususela ngowe-1914 kanye njengokuba zaxelwa kwangaphambili. Izibakala ezandlalwe ngasentla zicacisa oku.

Ababhali-mbali behlabathi bawujonga njani unyaka we-1914?

“Xa ngoku siphosa amehlo emva ngokucacileyo namhlanje sibona ukuba ukuqhambuka kweMfazwe Yehlabathi I kwangenisa ‘Ixesha Leenkathazo’ kwinkulungwane yamashumi amabini—ngokwamazwi ombhali-mbali waseBritani uArnold Toynbee—impucuko yethu engekaphumi kuzo. Ngokuthe ngqo okanye ngokungathe ngqo yonke ingxuba-kaxaka yesiqingatha senkulungwane edluleyo ivela kowe-1914.”—The Fall of the Dynasties: The Collapse of the Old Order (New York, 1963), Edmond Taylor, iphe. 16.

“Abantu besizukulwana seMfazwe Yehlabathi II, isizukulwana endikuso, baya kusoloko becinga ngemfazwe yabo njengento enkulu eyaphawula ukuguquka kwezinto kwanamhla. . . . Kumele kuvunywe ukuyibabaza kwethu, sadibana ngokobuqu nezinto ezinkulu embalini. Kodwa simele sazi ukuba, ngokwezentlalo, inguqulelo engenakukhanyelwa yenzeka ngethuba leMfazwe Yehlabathi I. Kwakungoko ekwathi iinkqubo zobupolitika nezentlalo, iinkqubo ekwakukudala zikho, konke kwaba zintlaba-zahlukane—maxa wambi oko kusenzeka kwiiveki nje. Ibe ezinye zaguquka ngokusisigxina. Kwaba ngeMfazwe Yehlabathi I ekwathi izinto ekwakukudala kuthenjelwe kuzo zalahlwa. . . . iMfazwe Yehlabathi II yaqhubeka, yayandisa yaza yayiqinisa le nguqulelo. Ngokwezentlalo iMfazwe Yehlabathi II yaba lidabi lokugqibela leMfazwe Yehlabathi I.”—The Age of Uncertainty (Boston, 1977), John K. Galbraith, iphe. 133.

“Ngoku sele kudlule isiqingatha senkulungwane, kanti uphawu olwashiywa yintlekele yeMfazwe Enkulu [yiMfazwe Yehlabathi I, eyaqalisa ngowe-1914] kwiintlanga aluphelanga . . . Umlinganiselo obonakalayo nongowokuziphatha wale nkathazo wawumkhulu kangangokuba akukho nto eyasalayo eyayifana neyangaphambili. Lonke ibutho: iinkqubo zikarhulumente, imida yamazwe, imithetho, imikhosi exhobileyo, ulwalamano phakathi koorhulumente kwaneengcamango, ubomi bentsapho, ubutyebi, izikhundla, ulwalamano phakathi kwabantu—yonk’ into yaguqulwa ngokupheleleyo. . . . Ekugqibeleni abantu baphulukana nokulungelelana kwabo, abakabuyeli apho unanamhla.”—YayinguNjengele Charles de Gaulle, ethetha ngowe-1968 (Le Monde, Nov. 12, 1968, iphe. 9).

Ngaba kuya kubakho abaphilayo emhlabeni emva kokuphela kwenkqubo yehlabathi ekhoyo?

Ngokuqinisekileyo bobakho. Isiphelo senkqubo ekhoyo yehlabathi siza kufika, kodwa asinakubangelwa kukubulawa kwabantu okungakhethiyo kwimfazwe yenyukliya, kodwa sobangelwa yimbandezelo enkulu eya kuquka ‘imfazwe yaloo mini inkulu kaThixo, uSomandla.’ (ISityhi. 16:14, 16) Loo mfazwe ayiyi kutshabalalisa umhlaba, ibe ingasayi konakalisa lonke uluntu.

Mat. 24:21, 22: “Ngelo xesha kuya kubakho imbandezelo enkulu, ekungazanga kubekho injalo kwasekuqalekeni kwehlabathi, kwada kwaba kalokunje, ekungasayi kubuye kubekho injalo. Kanjalo ukuba ibingayi kuthi loo mihla inqanyulelwe, bekungayi kubakho nyama isindayo; ngenxa ke yabanyuliweyo, loo mihla iya kunqanyulelwa.” (Ngoko ‘inyama’ ethile, uluntu oluthile, luya kusinda.)

IMize. 2:21, 22: “Abathe tye baya kulima ilizwe, basale kulo abagqibeleleyo, banqunyulwe ezweni abangendawo, abanginizayo bancothulwe kulo.”

INdu. 37:29, 34: “Amalungisa aya kulidla ilifa ilizwe, ahlale kulo ngonaphakade. Thembela kuYehova, ugcine indlela yakhe; wokuphakamisa, ulidle ilifa ilizwe; ekunqanyulweni kongendawo wobonela.”

Kutheni le nto uThixo evumela ukuba kudlule ixesha elininzi kangaka ngaphambi kokutshabalalisa abangendawo?

2 Pet. 3:9: “INkosi [uYehova, NW] ayilibali dinga, njengoko abathile baba iyalibala; isuka izeke kade umsindo kuthi, ingangi kungatshabalala nabani; inga bonke bangasinga enguqukweni.”

Marko 13:10: “Kumele ukuthi ke ukuqala kuvakaliswe iindaba ezilungileyo ezi kuzo zonke iintlanga.”

Mat. 25:31, 32, 46: “Xa ke athe wafika uNyana woMntu [uYesu Kristu] esebuqaqawulini bakhe, enazo zonke izithunywa ezingcwele, ngelo xa uya kuhlala phezu kwetrone yobuqaqawuli bakhe; zihlanganiswe phambi kwakhe zonke iintlanga, abahlule abanye kwabanye, njengokuba umalusi ezahlula izimvu ezibhokhweni. Baya kumka aba [abasilelayo ukugqala abazalwana bakaKristu bokomoya njengabameli boKumkani ngokwakhe] baye elubethweni olungunaphakade; ke wona amalungisa aya kuya ebomini obungunaphakade.”

Bona kwanephepha 318, 319 nelama-227-229.

Ukuba Ubani Uthi—

‘Iimeko azimbi kangako namhla; bekusoloko kukho iimfazwe, iindlala, iinyikima zomhlaba, ulwaphulo-mthetho’

Usenokuphendula uthi: ‘Ndiyasiqonda isizathu sokuba uvakalelwe ngaloo ndlela. Sazalelwa kwihlabathi apho ezi zinto mihla le zingundaba-mlonyeni. Kodwa ababhali-mbali bayacacisa ukuba kukho into eyahluke ngokukhwankqisayo ngenkulungwane yama-20. (Funda iingcaphulo kwiphepha 141, 142.)’

Okanye unokuthi: ‘Into ebalulekileyo asinto nje yokuba bekukho iimfazwe, iindlala, iinyikima zomhlaba, nolwaphulo-mthetho. Ubusazi na ukuba umqondiso uYesu awawunikelayo wawungoyintlanganisela?’ Mhlawumbi usenokongeza uthi: ‘Akazange athi nasiphi na isiganeko esinye sasiya kuthi ngokwaso singqine ukuba “sasikwimihla yokugqibela.” Kodwa xa kubonakala wonke umqondiso, oko kunentsingiselo—ibe ingakumbi xa ubonakala ngokomlinganiselo wazwenibanzi yaye uqalise ngonyaka owamiselwa lubalo-maxesha lweBhayibhile.’ (Bona iphepha 135-140, kwanephepha 133-135.)

‘Wazi njani ukuba isizukulwana esithile sexesha elizayo asiyi kufanelwa kakuhle gqitha sesi siprofeto kunesi sizukulwana?’

Usenokuphendula uthi: ‘Lo mbuzo ubangel’ umdla, ibe impendulo ibalaselisa isibakala sokuba ngokwenene siphila “kwimihla yokugqibela.” Njani? Kaloku, inxalenye yomqondiso eyanikelwa nguYesu iquka imfazwe ephakathi kweentlanga nezikumkani. Kodwa bekuya kwenzeka ntoni namhlanje ukuba inzaliseko yalo mqondiso ibifuna ukuba silinde de kuqhambuke enye imfazwe enkulu phakathi kwamagunya amakhulu? Imfazwe enjalo ibiya kushiya iqaqobana nje ukuba bebeya kubakho abasindi. Ngoko, uyabona, injongo kaThixo yokuba kubekho abasindi ibonisa ukuba ngoku sisondele kakhulu ekupheleni kwale nkqubo indala.’

Okanye unokuthi: ‘Ukuthelekisa iziganeko zehlabathi nesi siprofeto kufana nokuthelekisa imigca eseminweni kumnini wayo. Akunakubakho mntu ongomnye onemigca efana naleyo. Ngokukwanjalo, iziganeko ezaqalisa ngowe-1914 aziyi kuphindwa kwisizukulwana esithile esizayo.’ Mhlawumbi usenokongeza uthi: (1) ‘Yonke into ebumba lo mqondiso ibonakala ngokucacileyo.’ (2) ‘Ngokuqinisekileyo asifuni ukuba njengabantu bomhla kaNowa. (Mat. 24:37-39)’

‘Asiyi kusibona isiphelo kwixesha lokuphila kwethu’

Usenokuphendula uthi: ‘Kodwa uyakholelwa ukuba uThixo uza kungenelela ngaxesha lithile, andibi kunjalo?’ Mhlawumbi usenokongeza uthi: (1) ‘Ukuba Yena loo nkcazelo wayenza yafumaneka kuthi leyo kuphela kwendlela anokuthi nawuphi na kuthi azi ukuba oko kuya kwenzeka nini na. Kaloku, uYesu wachaza ngokucacileyo ukuba akukho mntu uwaziyo umhla okanye iyure, kodwa ngokweenkcukacha wazichaza izinto ezaziya kwenzeka ebudeni besizukulwana ekwakuya kwenzeka ngaso oko.’ (2) ‘Loo ngcaciso ithetha ngeziganeko wena oqheleneyo nazo ngokobuqu. (Ukuba kunokwenzeka, xubusha ngeenkcukacha zomqondiso, usebenzisa izibakala ezilungiselelwe kumaphepha awandulelayo.)’

‘Andizikhathazi ngezi zinto; ndiphila nje usuku olunye ngexesha’

Usenokuphendula uthi: ‘Ngokuqinisekileyo kuyinto entle ukungazixhalabisi ngokugqithisileyo ngekamva. Kodwa sonke siyazama ukubulungiselela ubomi bethu ngendlela yokuba sizikhusele nabathandekayo bethu. Ukuceba ngendlela yokwenene kuyinto eluncedo. IBhayibhile ibonisa ukuba kukho izinto ezimangalisayo ezingaphambili, ibe sizizilumko ukuba siyazilungiselela ukuze singenelwe kuzo. (IMize. 1:33; 2 Pet. 3:13)’

‘Andizifak’ ingqondweni zonke ezi meko zimbi; ndithanda ukuba ngonentembelo ngekamva’

Usenokuphendula uthi: ‘Into ebangel’ umdla kukuba, uYesu wathi kwakuya kubakho isizathu esihle sokuba abalandeli bakhe babe nentembelo ngekamva kumhla wethu. (Luka 21:28, 31)’ Mhlawumbi usenokongeza uthi: ‘Kodwa phawula ukuba akabaxeleli ukuba bawavale amehlo abo kwizinto ezenzekayo ehlabathini baze bonwabe. Uthi ukuba nentembelo kwabo ngekamva kwakuya kusekelwa kwinto entle; kwakuya kubangelwa kukuba babeyiqonda intsingiselo yeziganeko zehlabathi ibe beyazi into eya kuba ngumphumo.’