Hlakulela Ukukholosa NgoYehova—Ngokulifundisisa Ngenkuthalo Ilizwi Lakhe
“Wabekeleni iintliziyo zenu onke amazwi endiwangqinayo kuni. namhla . . . Ngokuba asilizwi lilambathayo kuni eli, kuba bubomi benU.”—DUTERONOMI 32:46, 47.
1, 2. (a) Liliphi ithemba uSirayeli awayenalo njengoko wayegxumeke iintente kumathafa akwaMowabhi? (b) UMoses waluyala wathini olo hlanga?
KWAKUNGASENTSUKU zatywala ukuba alugqibe uhambo lwawo olude lwasentlango. Kwakusele nje ukuba olu hlanga luwele iYordan enamajiko-jiko ngaphambi kokuba lufike kwiLizwe Ledinga ekwakukudala lujonge phambili kulo. Noko ke, ithemba lamaSirayeli lokungena kwelo lizwe labangela ukuba uMoses, owayeyinkokeli yolo hlanga, acinge nzulu. Wayenokukhumbula indlela olwathi olu hlanga ngaxa lithile lwakhubeka ngayo ngenxa yokungakholosi kwalo ngo Y ehova lwaza ngaloo0 ndlela alwavunyelwa ukuba lungene eKanan.—Numeri 13:25–14:30.
2 Ngaloo ndlela uMoses waluhlanganisa olo hlanga kumathafa anamahla-ndinyuka akwaMowabhi. Emva kokuba uMoses eluchazele olu hlanga ngembali yalo waza waluchazela ngoMthetho kaThixo ngokuphindaphindiweyo, waqamba oko kuye kwabizwa ngokuba yingoma yakhe egqwese ngokubalaseleyo. Ethetha ngolwimi oluchubekileyo, wenza umbongo, ebongoza uSirayeli ukuba akholose aze athobele uYehova, ‘uThixo wentembeko, tu ubugqwetha; olilungisa, othe tye yena.’ Ekuqukumbeleni, uMoses wawayala esithi: “Wabekeleni iintliziyo zenu onke amazwi endiwangqinayo kuni namhla, eniya kuwamisela koonyana benu, ukuba bagcine ukuwenza onke amazwi alo myalelo. Ngokuba asilizwi lilambathayo kuni eli, kuba bubomi benu.”—Duteronomi 32:4, 46, 47.
‘Ukulibekela Iintliziyo Zawo’ ILizwi LikaThixo
3, 4. (a) Yintoni ekwakufuneka amaSirayeli ‘ayibekele iintliziyo zawo,’ yaye le nto yayiquka ntoni? (b) Izizukulwana zamva zasisebenzisa njani isiluleko sikaMoses?
3 UMoses waluleka amaSirayeli ukuba ‘abekele iintliziyo zawo’ kungekhona nje ingoma yakhe ehlab’ umxhelo kodwa zonke imibhalo engcwele. Ayefanele ‘awunikel’ ingqalelo’ (Knox) uMthetho kaThixo, ‘aqiniseke ukuba ayawuthobela’ (Today’s English Version), okanye ‘acamngce ngawo’ (The Living Bible). Kuphela kungokuqhelana ngokupheleleyo nawo awayenokuthi ‘awamisele koonyana bawo, ukuba bagcine ukuwenza onke amazwi alo myalelo.’ KwiDuteronomi 6:6-8, uMoses wabhala oku: “La mazwi ndikuwisela umthetho ngawo namhlanje, aze abe sentliziyweni yakho. Uze uwatsolise koonyana bakho, . . . uwabophe esandleni sakho abe ngumqondiso, abe zizikhumbuzo phakathi kwamehlo akho.”
4 Umgqabazi ngeBhayibhile uW. H. Davey uthetha ngendlela ekwathi kumaxesha asemva koko, la mazwi “atolikwa ngokoqobo ngayo ngamaYuda, aza aluguqula ulwalathiso olwaluqulethwe kuwo ukuze alusebenzise kwiinkolelo. Iindinyana ezithile . . . zazibhalwa kwiphepha elenziwe ngesikhumba segusha okanye sebhokhwe, size sinxitywe engalweni nasebunzi ngexesha lokuthandaza.” Ngexesha likaYesu kwakujingiswa imixwayo embejembeje’ ekwakufakwa kuyo izicatshulwa zezibhalo, okanye iibhokisana ezimbini ezinamacala amane alinganayo nekwakufakwa kuzo amaphepha ekubhalwe kuwo izicatshulwa zezibhalo, yaye zisasetyenziswa nanamhlanje ngamahlelo athile obuYuda. (Mateyu 23:5) Kodwa, lo kaDavey wongezelela ngelithi: “Abantu ngobuyatha babo bazanelisa ngokuphatha umbhalo nje wamazwi omthetho, endaweni yokubonisa ngendlela abaphila ngayo ukuba bakugcinile oko kuqulethwe nguloo mthetho.”
5. Yiyiphi indlela eyayifanelekile yokusebenzisa amazwi kaMoses akwiDuteronomi 6:6-8?
5 UMthetho kaThixo wawungayi kuhlala ezandleni okanye emabunzini awo okoqobo kodwa ‘ezintliziyweni zawo.’ Ngokuzuza kungekuphela nje ulwazi kodwa uxabiso olunzulu ngawo, loo Mthetho wawuya kusoloko ukhunjulwa, ngokungathi wawubhalwe ecwecweni ngaphambi kwamehlo awo okanye ubotshelelwe ezandleni zawo.
Amalungiselelo Okufunda UMthetho kaThixo
6, 7. (a) Ngawaphi amalungiselelo uYehova awawenzayo ukuze aqhelanise amaSirayeli noMthetho kaMoses? (b) Kwakunokwenzeka njani kwakhona ngabantu bakaThixo bamaxesha amandulo ukuba bafundiswe ngeLizwi likaThixo?
6 Noko ke, amaSirayeli ayenokuyifunda njani imimiselo yoMthetho emalunga nama-600? Alithandabuzeki elokuba imibhalo yayo yayinqabile ekuqaleni. Ukumkani owayeza kubakho kwaSirayeli wayefanele ‘azibhalele impinda yombhalo yalo myalelo encwadini, alese kuyo imihla yonke yobomi bakhe, ukuze afunde ukumoyika uYehova uThixo wakhe, nokuwagcina onke amazwi alo myalelo.’ (Duteronomi 17:18, 19) UThixo walungiselela ukuba lo Mthetho usoloko ufundwa kunyaka wesixhenxe eMthendelekweni Weminquba. (Duteronomi 31:10-13) Ngoxa ngokungathandabuzekiyo isiganeko esinjalo sasikhuthaza, sasifika emva kwexesha elide gqitha ukuba sibe singadlulisela ulwazi olunzulu.
7 Kwakhona uYehova walungiselela ukuba isizwe sakwaLevi ‘siyale uYakobi ngamasiko kaThixo, siyale uSirayeli ngomyalelo kaThixo.’ (Duteronomi 33:8, 10; thelekisa uMalaki 2:7.) Ngezinye izihlandlo, abaLevi babesenza amaphulo okufundisa awayeluncedo kuhlanga luphela. (2 Kronike 17:7-9; Nehemiya 8:7-9) Kubonakala ukuba ekuhambeni kwexesha, ubuncinane abantu ngokubanzi babenokuzifumana iinxalenye zeLizwi likaThixo.a Ngenxa yoko, umdumisi wayenokubha1a en jenje: “Hayi, uyolo lomntu . . . [ononelela] umyalelo kaYehova; ucamanga ngomyalelo wakhe imini nobusuku.” (INdumiso 1:1, 2) Ngaloo ndlela isibongozo sikaMoses ‘sokulibekela iintliziyo zawo iLizwi likaThixo’ safana nomyalelo wokuba bayifundisise ngokukhutheleyo iBhayibhile.
‘Ukulibekela Iintliziyo Zethu’ ILizwi LikaThixo Namhlanje
8. USirayeli wathobela ukusa kuwuphi umlingani selo xa uMoses wayemyala, ibe yaba yintoni imiphumo?
8 USirayeli akazange amthobele uMoses xa wayemyala. Xa olu hlanga lwathi ekugqibeleni lwazimisela ubukumkani balo, ngokucacileyo ookumkani balo abaninzi abazange ‘bazibhalele impinda yombhalo womyalelo baze bawulese imihla yonke yobomi babo.’ Ngenkulungwane yesixhenxe Ngaphambi kweXesha Eliqhelekileyo, ngemihla yoKumkani uYosiya, “incwadi yomyalelo” yalahleka. (2 Kumkani 22:8-13) Ngokungathandabuzekiyo umzekelo ombi weenkokeli zolu hlanga wabangela ukuba olu hlanga luwexuke ngokukhawuleza. Ngowama-607 B.C.E. olu hlanga lwafumana intlekele, kanye njengokuba uMoses wayelumkisile.—Duteronomi 28:15-37; 32:23-35.
9. Imeko yamaKristu namhlanje ifana njani naleyo yamaSirayeli amandulo?
9 NjengamaSirayeli amandulo, amaKristu namhlanje ami emdeni welizwe ledinga—ihlabathi elitsha likaThixo elinobulungisa. (2 Petros 3:13) lziganeko ezothusayo seziqalisile ukuvela elundini phayaa: ukuvakaliswa ‘koxolo nonqabiseko,’ ukuwa ‘kweBhabhiloni Enkulu,’ ukuhlaselwa ‘kukaGogi kaMagogi.’ Ezi ziganeko ziya kukuvavanya ukukholosa kwethu ngoYehova. Ngoko, kungxamisekile ukuba ‘silibekele iintliziyo zethu ilizwi likaThixo’ ngoku!—1 Tesalonika 5:3; ISityhilelo, isahluko 18; Hezekile, isahluko 38.
10. Kutheni le nto abanye besenokuyekelela kufundisiso lobuqu?
10 Phofu ke, ukwenjenjalo, kunokuba lucelomngeni lokwenene kula “maxesha anomngcipheko.” (2 Timoti 3:1) Umsebenzi wempangelo, ukukhulisa abantwana, isikolo neembopheleleko zebandla zonke ezi zinto zinokufuna ixesha lethu elininzi. Ngenxa yoko, sisenokutyekela ekuzithetheleleni size siyekelele ekufundisiseni iBhayibhile, siqiqa ngelokuba ‘Ndiyakwenza oko kufunekayo.’ Kanti, iBhayibhile iyala amaKristu isithi: “Zinyamekele ezo zinto, hlala kwezo zinto.” (1 Timoti 4:15, 16) Ngoku makhe siqwalasele ezinye zezizathu ezinamandla zokwenjenjalo.
Ukomeleza Ulwalamano Lwethu NoThixo
11, 12. (a) Ukufumana ulwazi olunzulu ngakumbi ngoThixo kwamchaphazela njani uYobhi? (b) Kutheni sinokuba nembono ecace ngakumbi ngoThixo kunakumhla kaYobhi?
11 UYobhi wayengomnye ‘owayemoyika uThixo nowayetyeka ebubini.’ Kodwa emva kokuba uYehova wayezityhile ngokubhekele phaya kumoya ovuthuzayo, uYobhi wayenokuthi: “Bendikuva ukukuva ngeendlebe, kungoku iliso lam likubonile.” (Yobhi 1:1; 42:5) Ngaba thina namhlanje ‘sinokumbona’ uThixo, oko kukuthi, sidlulele ngaphaya kokuba nobuhlobo nje, sizazi ngokunzulu iinkalo ezininzi zobuntu bakhe? Ngokwenene sinako ukwenjenjalo! NgeBhayibhile, uYehova uye wazityhila ngakumbi kunokuba wayesaziwa kwananguYobhi.
12 Sinembono ecacileyo ngobunzulu bothando lukaThixo, sisazi ukuba ‘walithanda ihlabathi kangangokuba wade wancama uNyana wakhe okuphela kwamzeleyo.’ (Yohane 3:16) Ngeziprofeto zeBhayibhile, sinengxelo emfutshane ngemisebenzi kaThixo—ecacileyo ukusa ekupheleni kweWaka Leminyaka! (ISityhilelo, isahluko 18-22) Sinengxelo yeendlela uThixo awaqhubana ngazo nebandla lamaKristu: ukungenisa kwakhe abeeNtlanga, ukunyula kwakhe ‘umkhonzi othembekileyo noqondayo’ ukuze wondle abantu bakhe, ukuhlanganisa kwakhe “isihlwele esikhulu” sinethemba lokuphila ngonaphakade kwiParadisi esemhlabeni. (Mateyu 24:45; ISityhilelo 7:9, 14-17; Efese 3:3-6) Emva kokondela izinto ezinzulu zikaThixo nokucamngca ngemisebenzi emangalisayo asenzela yona, sisuka ngokungenakuzinceda sidanduluke sithi: “Hayi, ubunzulu bobutyebi nobobulumko nobokwazi kukaThixo!”—Roma 11:33.
13. ‘Sinokumquqela njani uThixo,’ yaye ziyintoni iingenelo zokwenjenjalo?
13 Umdumisi wathi: “Ndiya kuquqela kuwe ngentliziyo yam yonke.” Sinokwenza okufanayo ngokuthi suku ngalunye siqwalasele umbandela ongokweZibhalo; oku kunendima enkulu ekulomelezeni ulwalamano lwethu noYehova. Kwakhona ukufundisisa ngokunyaniseka kunceda ekwenzeni indlela yethu ‘ibhekiselwe ekugcineni imimiselo kaThixo.’—INdumiso 119:5, 10.
Ukufundisisa Kusinceda Ukuba Silumele Ukholo Lwethu
14. Zekelisa indlela ekuxabiseke ngayo ‘ukulungela ukuziphendulela’ ngethemba lethu lobuKristu.
14 “Andinifuni nina maNgqinandini endlwini yam!” yatsho enye indoda yaseGhana kwamabini awayetyelele ekhayeni layo. Yahlabela mgama iwagculela amaNgqina “ngokungalwamkeli utofelogazi nangokungayikhahleli indwe yesizwe.” Siqhelene neenkcaso ezilolo hlobo kubulungiseleli basentsimini. Olunjani lona ugculelo—nehlazo—ebekuya kuba lulo ukuba besingakwazi “ukuziphendulela kumntu wonke obuzayo kuni ilizwi, ngalo ithemba elingaphakathi kwenu”! (1 Petros 3:15) Ngethamsanqa, la maNgqina akwazi ukusebenzisa iBhayibhile ngokunomphumo ekucaciseni imbono efanelekileyo ngegazi nendlela umKristu ayihlonela ngokulinganiselweyo ngayo imifuziselo yesizwe njengoko ephepha ukunqula izithixo. Waba yintoni umphumo? Le ndoda yachukumiseka ziimpendulo zawo ezingqalileyo. Namhlanje, yona nomfazi wayo bangamaNgqina abhaptiziweyo.
15. Ufundisiso lobuqu lusenza sibuxhobele njani ubulungiseleli bethu?
15 UPawulos ubongoza esithi: “Kukhuthalele ukuzimisa phambi koThixo ucikidekile, ungumsébenzi ongenazintloni, ulungisa ukulahlula ilizwi lenyaniso.” Ufundisiso lobuqu luya kusinceda kungekuphela nje ukuba sihlale thina endleleni yobomi kodwa kwakhona ‘sifanelekele, sixhobele’ ukunceda abanye ukuba ben jenjalo.—2 Timoti 2:15; 3:17.
Ukuxhathisa Imigibe KaSathana
16. Yiyiphi eminye imigibe kaSathana abajongene nayo abantu bakaYehova?
16 Namhlanje, ukubhengezwa kwezinto kusitsalela ‘kwinkanuko yenyama, nakwinkanuko yamehlo, nakuqhankqalazo lobu bomi.’ (1 Yohane 2:16) Ukuziphatha okubi ngokwesini kuyazukiswa ngamaziko eendaba yaye ngokufuthi kubalaseliswa ngokukhutheleyo ngabo sisebenza nesifunda nabo. Uncwadi oluvuselelayo lwabawexuki lusenokuthunyelwa emakhayeni ethu singakhange silucele. Ngenxa yokufun’ ukwazi, bambi abazalwana baye balufunda olu ncwadi lungcolisayo—nto leyo eye yalonakalisa ukholo lwabo. Kukwakho ‘umoya’ wokuzingca nowokwenyama ‘osebenzayo ngoku kubo abangevayo.’ Hayi indlela ekulula ngayo ukuchatshazelwa nguwo nokuvelisa isimo sengqondo esingakhiyo nesokuhlaba amadlala!—Efese 2:2.
17, 18. Ufundisiso lobuqu lunokusikhusela njani ‘ekukhukulisweni’?
17 Kambe ke, abambalwa, bayabanjiswa nguSathana. Ngokutyeshela kwabo ufundisiso lobuqu, bathi, ngokufana nephenyane elikhululekileyo kwiintambo ezilibopheleleyo, ‘bakhukuliswe’ ngokuthe ngcembe baze babe ngamaxhoba aphambili okuhlaselwa nguSathana. (Hebhere 2:1) Ngokomzekelo, omnye umzalwana oselula wabandakanyeka ekuziphatheni okubi kunye nentombazana eselula esikolweni. Ukhumbula oku: “Ndafumanisa ukuba, oyena nobangela uyintloko woku wawukukuba ndandilamba ngokomoya. Ndandingalwenzi ufundisiso lobuqu. Kungenxa yoko le nto ndingazange ndikwazi ukusixhathisa isilingo.” Phofu ke, ukwenza ucwangciso lofundisiso lobuqu, kwamnceda lo mzalwana ukuba omelele ngokomoya.
18 USathana uzimisele ukubhangisa abantu bakaThixo abaninzi kangangoko anako. Ngokondla iingqondo zethu ngokuzingisileyo ngezinto ezilungileyo ezivela eLizwini likaThixo nakwigosa lakhe elithernbekileyo, sinokuku. phepha ukurhintyelwa. (Filipi 4:8) IBhayibhile neempapasho zeWatch Tower Society zinentabalala yezinto zokusikhumbuza ukuze siphephe izinto eziphathekayo, ukuziphatha okubi ngokwesini, ukucinga ngowexuko nokuba nesimo sengqondo esingakhiyo. Ukuba ngokwenene sinikela ingqalelo engakumbi, asisayi kuze sikhukuliswe.
Amalungiselelo Entlangano KaYehova Awenzelwe Ukusinceda
19. Yintoni ezekeliswa lithenwa elingumTiyopiya ngokuphathelele ukufuna kwethu ukhokelo lokomoya?
19 Ukufundisisa kungumsebenzi onzima. Ngoko sinokuba nombulelo ngokuba intlangano kaYehova isinceda kakhulu. Kwiminyaka yakutshanje bambi baye bathi abantu ngabanye bafanele bavunyelwe ukuba bazitolikele ngokwabo iBhayibhile. Phofu ke, ithenwa elingumTiyopiya, lavuma ngokuphandle ukuba lalifuna ukhokelo olungokomoya. Njengeguquka elalolukile, ngokungathandabuzekiyo lalisele linolwazi olukhulu ngeBhayibhile. Kwaisibakala sokuba lalinokuzama ukufundisisa umbandela onzulu njengesiprofeto sikaIsaya 53 sibonisa oku. Kanti, xa labuzwayo ukuba lalikuqonda na oko lalikufunda, lavuma lisithi: “Ndingaba nako ngani na, kungekho undikhokelayo nje?”—IZenzo 8:26-33.
20. (a) Ngawaphi amanye amalungiselelo aye enziwa yintlangano kaYehova okusinceda kufundisiso lwethu lobuqu lweBhayibhile? (b) Uvakalelwa njani ngamalungiselelo anjalo?
20 Ngokufanayo abantu bakaYehova namhl an je bayalufuna ukhokelo lokomoya. Benqwenela ‘ukuthetha nto-nye’ xa kufikelelwa kwimibandela yokomoya, bayalwamkela uncedo olunikelwa yintlangano kaYehova—yaye olunjani lona ukuzuka uncedo oko okululo! (1 Korinte 1:10) Sisoloko sifumana inkcazelo ngephephancwadi IMboniselo noVukani! Sinentlaninge yeencwadi neencwadana ezinemifanekiso ezigubungela imixholo yeBhayibhile emininzi. Abafundi abathetha isiNgesi basikeleleke ngokukhethekileyo ngokufumana iWatch Tower Publications Index 1930-1985, esisixhobo esinokunceda umntu ukuba ‘afune ubulumko njengesilivere, abumbe njengobutyebi obuselelweyo.’—IMizekeliso 2:2-4.
21. (a) Umpostile uPawulos wawubonakalisa njani umdla kufundisiso lobuqu? (b) Ngawaphi amanye amacebiso okwenza ufundisiso lobuqu lube lula?
21 Ngaba uzisebenzisa ngokupheleleyo iimpapasho zoMbutho ekwenzeni ufundisiso nasekwenzeni uphengululo? Okanye ngaba ezo mpapasho uhombisa nje ngazo? Okubangel’ umdla kukuba, umpostile uPawulos wakhe wayalela uTimoti ukuba ‘amzisele iincwadi, ngokukodwa ezezintsu’ ngoxa wayeseRoma; ngokucacileyo, uPawulos wayebhekisela kwiinxalenye zeZibhalo zesiHebhere. (2 Timoti 4:13) Ngokungathandabuzekiyo wayezifuna zibekho ukuze akwazi ukulwenza lula ufundisiso nophengululo. Ukuba akukenzi njalo, kutheni ungaqalisi ukuzenzela ithala lakho leempapasho zolawulo lobuthixo ukuze nawe ukwazi ukwenza uphengululo? Iimpapasho ezinjalo zigcine kwiindawo ezinokufumaneka ngokulula kuyo, zilungelelene yaye zicocekile. Yiba nendawo yokwenza ufundisiso ekungekho ngxolo kuyo nekhanya kakuhle. Cwangcisa amaxesha athe rhoqo ofundisiso lobuqu.
22. Kutheni le nto ‘ukulibekela iintliziyo zethu ilizwi likaThixo’ kubaluleke ngakumbi namhlanje kunanini na ngaphambili?
22 NjengamaSirayeli awayegxumeke iintente kumathafa achumileyo akwaMowabhi, sele kukufuphi ukuba singene kwihlabathi elitsha. Ngaphezu kunanini na ngaphambili, simele silifundisise ngokukhutheleyo iLizwi likaThixo size ‘sizongele ixesha’ lokufundisisa, mhlawumbi sincame ezinye izinto esinomdla kuzo, njengokubukela umabonwakude. (Efese 5:16) UPetros ubongoza esithi: “Walangazeleleni . . . amasi angawelizwi, angenankohliso, ukuze nikhule ngawo,” kungekuphela nje kubuntu obukhulu kodwa “elusindisweni, NW.” (1 Petros 2:2; thelekisa amaHebhere 5:12-14.) Oku kubandakanya ubomi bethu. Ngoko luxhathise naluphi na utyekelo lokuyekelela kufundisiso lobuqu. Lusebenzise njengendlela yokwenza nzulu uthando lwakho ngoThixo nokukholosa kwakho ngaye; lukwayindlela yokukhulisa uxabiso lwakho ngentlangano ayisebenzisayo ukusinceda. Ewe, kukhuthalele ‘ukulibekela intliziyo yakho’ iLizwi likaThixo, ngokuthe rhoqo. “Asilizwi lilambathayo kuni eli, kuba bubomi benu.”
[Imibhalo esemazantsi]
a Amaceba ezinto ezenziwe ngodongwe, ayesetyenziswa ngokuqhelekileyo ngamaxesha okubhalwa kweBhayibhile njengezinto zokubhalela ezazingabizi mali ininzi. IThe International Standard Bible Encyclopedia (1986) ithi: “Amaceba okubhalela ayenokusetyenziswa kwanangabona bantu bangamahlwempu, ababengenandlela yakufumana nantoni na engenye yokubhalela.” Awaziwa ukuba amaceba okubhalela ayesetyenziswa ngamaSirayeli amandulo ukusa kuwuphi na umlinganiselo ukuze abhale phantsi izicatshulwa zeBhayibhile. Noko ke, okubangel’ umdla kukuba, eYiputa, kuye kwafunyanwa amaceba okubhalela enkulungwane yesixhenxe yeXesha Eliqhelekileyo nawayenezicatshulwa zeBhayibhile, ebonisa enye yeendlela ababesithi abantu abaqhelekileyo bazifumane ngayo iinxalenye zeBhayibhile.
Iingongoma Zempinda
◻ Kwakutheni ukuze uMoses ayale amaSirayeli ukuba ‘alibekele iintliziyo zawo iLizwi likaThixo,’ yaye ayeza kukwenza njani oko?
◻ Ufundisiso lobuqu lulomeleza njani ulwalamano lwethu noThixo luze lusincede ukuba silumele ukholo lwethu?
◻ Ufundisiso lobuqu lunayiphi indima ekuxhathiseni kwethu imigibe kaSathana?
◻ Intlangano kaYehova iye yenza waphi amalungiselelo ukuze ufundisiso lwethu lweLizwi likaThixo lube lula?
[Umfanekiso okwiphepha 11]
Kunokuba abhale uMthetho kaThixo ezintliziyweni zawo, amaYuda abophelela imixwayo ekwakufakwa kuyo izicatshulwa zezibhalo