Imigwebo KaThixo Imele Ivakaliswe
“Usuk’ ume, uthethe kubo konke endikuwisela umthetho ngako. Musa ukuqhiphuka umbilini ngabo.”—YEREMIYA 1:17.
1. AmaNgqina kaYehova ‘alukhanyisa njani ukhanyiselo lwawo’ kwiJamani yamaNazi?
“UKUTSHUTSHISWA kwamaNgqina kaYehova ebudeni bolawulo Olutshabalalisayo [lweJamani yamaNazi] kuye kwabalelwa phakathi kwamanye amaxesha okulingwa kwimbali yawo.” (Holocaust Studies Annual, Volume II—The Churches’ Response to the Holocaust) Iphephandaba laseMzantsi Afrika, iDaily News kaJulayi 15, 1939, nalo lathetha ngamaNgqina aseJamani lisithi: “Njengesibane esisoloko siqaqambile, eli qela lincinane lamadoda nabafazi abangamaKristu lime ngokuqinileyo kukholo lwalo, nto leyo engumdintsi kuMlawuli waseMunich [uAdolf Hitler] nebubungqina obuphilayo bokufana kwakhe nabanye abantu.” La mazwi asikhumbuza ukuba uYesu wathi abafundi bakhe babeya kuba ‘lukhanyiselo lwehlabathi’ yaye kwakuya kufuneka lukhanye ukhanyiselo lwabo ehlabathini, kungakhathaliseki ukuba zinjani na iimeko.—Mateyu 5:11, 12, 14-16.
2, 3. Nguwuphi umzekelo wokushumayela ngokungenaloyiko owaboniswa eSri Lanka?
2 Enye ingxelo, evela kwilizwe elizaliswe bubugrogrisi iSri Lanka, ibalisa ngeNgqina eliselula laseTamil, uDavid Gunaratnam, owathi kanye njengoYeremiya, washumayela ngokungenaloyiko kumagunya omkhosi. Yena nabanye abafana babuzwa imibuzo. Ingxelo ibonisa oku: “Abasemagunyeni nabafana bachukumiseka gqitha lulwazi lwalo mfana, yaye ngaphezu koko, yindlela awayethetha ngokunyaniseka ngayo, ingakumbi xa wathi, ‘Nokuba bendinokudibana nabaphi na kwabo kuthiwa ngabagrogrisi, bendiya kushumayela into enye nakubo.’”
3 Kwangobo busuku bunye waqweqwediswa ekhayeni lakhe ngabagrogrisi ababemtyhola ngokusebenzisana nomkhosi. Wazingisa ekubeni ngundilele kwakhe waza wathi wayeshumayela kuphela isigidimi soBukumkani bukaThixo. “Ndenza umsebenzi kaThixo yaye ndiya kuqhubeka ndiwenza. Ndishumayela ngokungakhethiyo nakubani na oya kuphulaphula.” Eli Ngqina likhaliphileyo ladutyulwa laza labulawa ngabagrogrisi, lishiya ngasemva umhlolokazi oselula nomntwana oyinkwenkwe.—Thelekisa IZenzo 7:51-60.
4. Kukuphi ukutshutshiswa kwamaNgqina kaYehova okwakuxhaswa ngabefundisi okwathi kwenzeka kwilizwe laseMzantsi Merika?
4 Ezivela kwelaseMzantsi Merika, apho ukutshutshiswa kwamaNgqina kaYehova kuye kwaxhaswa kwaza kwabethwa ngoyaba ngabefundisi abathile bamaKatolika nabaseRhabe, zibika oku: “Kwakukho amaNgqina kaYehova amahlanu kwindawo owawumise kuyo umkhosi . . . Ayesoloko ebethwa yaye ehlaliswa odwa enganikwa kutya. Igosa lomkhosi elalijongene nokunyanzelisa imigaqo ethile kwigumbi lethu lawohlwaya kuba ayeshumayela kwamanye amajoni. Lathi kuzo zonke iimvaba zonqulo, amaNgqina kaYehova ayeyeyona iyingozi.”
Unobangela Wentshutshiso Nendlela Asabela Ngayo
5. NjengakuYeremiya, ngokufuthi yintoni ebangela ukutshutshiswa kwamaNgqina?
5 Ewe, kanye njengokuba uYeremiya wayetshutshiswa ngabalawuli bezonqulo nabezobupolitika bomhla wakhe, ngokunjalo namaNgqina kaYehova kwihlabathi lonke ajongene nenkcaso evela kule mithombo ifanayo. Yintoni exhokonxa le ntshutshiso? Nakubeni amaNgqina elelona qela linoxolo neligcina umthetho kulo naliphi na ibutho, iintshaba zawo zilijonga iLizwi likaThixo njengeliyingozi, kuba ziyasicekisa yaye zingasifuni isigidimi esingoBukumkani bukaThixo. Ukushumayela nemigaqo yawo engayekeleliyo ibhenca ukuzingca nokungathembeki kweepolitiki, ezorhwebo nezonqulo zale nkqubo kaSathana.—Yohane 15:18, 19; 1 Yohane 5:19.
6. AmaNgqina kaYehova aye asabela njani kwintshutshiso?
6 Kanti, phezu kwako nje ukuvalelwa, ukubethwa kwanokufa, amaNgqina kaYehova kwihlabathi lonke aye asabela njengoYeremiya wakudala. Ngoxa ebonakalisa uthando nobuchule, ayaqhubeka eshumayela imigwebo kaThixo engathandwayo ziintlanga. (2 Timoti 2:23-26) Ayazi ukuba amele athobele uThixo njengoMlawuli kunokuba athobele abantu. (IZenzo 4:19, 20; 5:29) Ayasiphaphela isiluleko sikaPawulos kumaKristu angamaHebhere, sokuba, abe nomonde ekwenzeni ukuthanda kukaThixo. Aya kwandula ke ayibone inzaliseko yedinga ubomi obungunaphakade. Ngoko, njengoPawulos noYeremiya, simele sikwazi ukuthi: “Ke thina asingabahlehla baye entshabalalweni; singabokholo olusa ekuzuzeni umphefumlo.”—Hebhere 10:35-39.
UYeremiya Wale Mihla Ubhenca INgqobhoko
7. AmaNgqina kaYehova kwinkulungwane yama-20 aye awulandela njani umzekelo wabaprofeti bakaYehova abathembekileyo awabathumela kuSirayeli nakuYuda?
7 Kanye njengoko uYehova wayethe gqolo ethumela abaprofeti bakhe kwaSirayeli nakwaYuda, uye wathumela amangqina akhe ukuba athethe ngokuphindaphindiweyo ngesi sigidimi somgwebo wakhe ozayo. (Yeremiya 7:25, 26; 25:4, 8, 9) Ingakumbi ukususela kunyaka wokuhlaziyeka ngokomoya we-1919, intsalela ethanjisiweyo engabazalwana bakaKristu ngokungoyikiyo iye yavakalisa kwiNgqobhoko imigwebo kaThixo nezigidimi ezinamandla zentlekele. (Thelekisa uYeremiya 11:9-13.) Ngaloo nyaka kwapapashwa iphephancwadi iThe Golden Age. Njengokuba iminyaka iqengqeleka yaye litshintshwa imixholo, njengoko lathi labizwa ngokuba yiConsolation (ngowe-1937) laza languVukani! (ngowe-1946), liye lasebenza ukubhenca ubuxoki bonqulo lweNgqobhoko nobuKristu bayo benkohliso.
8, 9. (a) Kutheni le nto iicawa zazigxekwa ngowe-1922? (b) Yiyiphi intlekele ekwathiwa iya kuzifikela?
8 Ngokomzekelo, iGolden Age kaOktobha 11, 1922, yagxeka unqulo lobuxoki ngala mazwi: “Yonke imigudu eyenziwe ziintlangano zeecawa zeemvaba ngeemvaba, abefundisi bazo, abakhokeli nabaxhasi bazo, ukuze basindise baze baphucule inkqubo yezinto emhlabeni . . . ngokufanelekileyo iyasilela, ngenxa yokuba ayinanto yokwenza nobukumkani bukaMesiya. Ngokuchasene noko, ebudeni beMfazwe Yehlabathi [I] abefundisi bezi cawa zeemvaba ngeemvaba ezahlukeneyo bathi abanyaniseka kwiNkosi uYesu Kristu ngokuthi ngokuphosakeleyo bamanyane namashishini amakhulu nabezobupolitika abaphambili ukuze bakhuthaze iMfazwe Yehlabathi.”
9 La magqabaza okugxeka ahlabela mgama esithi: “Ngokubhekele phaya bathi bayikhanyela iNkosi nobukumkani bayo baza babonakalisa ukunganyaniseki kwabo ngokuthi ngokuzithandela bazimanyanise nentlangano kaSathana baze ngokungenazintloni bavakalise ehlabathini ukuba uManyano Lwezizwe luyimbonakaliso yobukumkani bukaThixo kwezobupolitika emhlabeni.” Ekugqibeleni kwavakala isigidimi ‘sobubi,’ okanye somgwebo esasisithi: “Ngoku iintlanga zehlabathi sele kumbovu ukuba zifikelwe lixesha elinzima ‘lembandezelo enkulu engazanga ibekho enjalo kwasekuqalekeni kwehlabathi, kwada kwaba kalokunje, ekungasayi kubuye kubekho injalo,’ njengoko uYesu Kristu watshoyo.”
10. Zagxekwa njani ngowe-1926?
10 Indima kaYeremiya yandiswa ngokusetyenziswa kwezinye iimpapasho, ezinjengephephancwadi IMboniselo, iincwadana neencwadi. Ngokomzekelo, ngowe-1926 incwadi ethi Deliverance yaquka ukubhencwa okunamandla kweemfundiso ezilahlekisayo zeNgqobhoko. Kwiphepha lama-203 ibonisa oku: “Iimfundiso zobuxoki zazifundiswa ngokukhululekileyo [kwiNgqobhoko ewexukileyo] yaye zayithabathel’ indawo inyaniso. Phakathi kwezi kwakukho iimfundiso ezisekho nanamhlanje, ekabathathu emnye, ukungafi kwayo yonke imiphefumlo, ukuthuthunjiswa ngonaphakade kwabangendawo, ilungelo labefundisi abalinikwe nguThixo nelungelo lookumkani lokulawula abalinikwe nguThixo. Ekuhambeni kwexesha uMariya, unina womntwana onguYesu, wanqulwa; yaye abantu bakhuthazelwa ekubeni bamnqule njengonina kaThixo.”
INgqobhoko Ebangela Ukungamanyani Iyalunyukiswa
11, 12. (a) Ukungabi ngoondilele kwabefundisi kwabhencwa njani? (b) Sisiphi isilumkiso esanikelwa ludidi lukaYeremiya?
11 Le mpapasho ikwanye yabhenca ukuzifaka kwabefundisi ezimfazweni, isithi: “Abefundisi bezi mvaba zecawa zahlukeneyo basikelela imikhosi ethunyelwa ngamaqela ezorhwebo naweepolitiki, yaye isikelelwe yandisiwe kungakhathaliseki ukuba liliphi na icala elilwelwa yile mikhosi. Abefundisi xa bebonke bahanahanisa ngelokuba bathandazela ukusikelelwa kwale mikhosi ilwayo kumaqela omabini kuThixo omnye.” (Thelekisa uYeremiya 7:31.) Kwathi ke kwaxelwa umgwebo osondelayo ngale ndlela: “Onke la maqela abumba inxalenye ebonakalayo yentlangano kaSathana ayaqokelelwa yaye ahlanganiselwa kwidabi elikhulu eArmagedon.”—ISityhilelo 16:14-16.
12 Kanye njengoko kwakunjalo ngomhla kaYeremiya, xa iinkokeli zazisithi zazikhuselekile yaye ziseluxolweni noThixo, “ngoko ezi nkokeli zecawa zizixelela ukuba zona zikhuselekile nokuba zifuna nje ukubizwa ngegama likaKristu, ngoxa ziqhubeka zizifaka engozini kaMtyholi. Zizimfamekisa ngokwazo ekubeni zizibone izinto ngobunjalo bazo ngokuthi zizenze ezingaboniyo zize zikhohlise nabanye abantu.” (Deliverance, iphepha 270) Ukuziqaba kwazo intshongo emehlweni kwabhencwa ngabo Bafundi BeBhayibhile banenzondelelo, njengoko leyo iyindlela ayebizwa ngayo amaNgqina kaYehova ngoko.—Mateyu 7:21-23.
13. Sisiphi isiganeko esenzekayo ngowe-1931, yaye kungani sasifanelekile?
13 Njengoko ixesha lalidlula, ukufana kwaBafundi BeBhayibhile noYeremiya kwacaca ngakumbi nangakumbi, ekubeni ngowe-1931, kwindibano eyayiseColumbus, eOhio, eUnited States, kwathi kwavakaliswa ukuba igama elalithatyathwe eBhayibhileni leli qela likhaliphileyo lamaKristu lalifanele libe lelithi ‘AmaNgqina kaYehova.’ (Isaya 43:10-12) Elo gama laliye labalaseliswa kwinkulungwane yesibhozo Ngaphambi kweXesha Eliqhelekileyo xa uYehova wathi walisebenzisa kumaSirayeli. Ngenxa yoko, malunga neminyaka elikhulu kamva, xa uYeremiya wayekhonza njengomprofeti, wayekwaliNgqina likaYehova. (Yeremiya 16:21) Ngokufanayo, noYesu xa weza emhlabeni njengomYuda, wayelingqina likaYise, uYehova. (Yohane 17:25, 26; ISityhilelo 1:5; 3:14) Ngoko ke, kwaba kokufanelekileyo ukuba ngexesha likaThixo elimisiweyo, ekugqibeleni abantu bakhe babemele bafanelekele ukubizwa ngeli gama likhethwe nguThixo—“amaNgqina kaYehova.”—Yohane 17:6, 11, 12.
Ukubhencwa KweNgqobhoko
14. INgqobhoko iye yabhencwa njani ngaphezu kweminyaka engama-70 edlulileyo?
14 Ngaphezu kweminyaka engamashumi asixhenxe edlulileyo, ngokuvisisana nokuvakaliswa kwethemba elizukileyo loBukumkani bukaYehova obuzayo, amaNgqina kaYehova aye avakalisa kwihlabathi jikelele isikhukula esipheleleyo sokusingelwa phantsi nesomgwebo. Kumakhulu ezigidi zeempapasho ezisekelwe eBhayibhileni, ezingagwegweleziyo nezinamandla aye abhenca iNgqobhoko njengeyona mpembelelo inamandla kunqulo olulihenyukazi, “iBhabheli Enkulu,” egwetywayo kwiSityhilelo isahluko 17 nese-18. (Bona incwadi ethi “Babylon the Great Has Fallen!” God’s Kingdom Rules!, iphepha 576-615, eyapapashwa ngowe-1963 yiWatchtower Bible and Tract Society of New York, Inc.)
15. Yabhencwa njani iNgqobhoko ngowe-1955?
15 Ngowe-1955 amaNgqina kaYehova asasaza izigidi zemibhalo yencwadana ethi Christendom or Christianity—Which One Is “the Light of the World”? Ezingamawaka zazisisiwa ngokungqalileyo kubefundisi beNgqobhoko. Yaye ngaba loo ncwadana yabaxelela ntoni? Kanye ngendlela uYeremiya awenza ngayo, yabonisa oku: “Phezu kwawo nje amalungelo ayo athe ayihambisela phambili ngokwezoqoqosho, ngokwengqondo nangokwezomkhosi, iNgqobhoko ayizingqinanga ‘njengelukhanyiselo lwehlabathi.’ Kutheni ingenzanga njalo nje? . . . Ayishumayeli okanye ayibuqheliseli ubuKristu [obuseBhayibhileni].” Yandula ke yaphakamisa lo mbuzo: “Ngaba ukubhenca iinkonzo zobuxoki kukutshutshisa amalungu azo? Ngaba kukungabi nambono iphangeleleyo okungekuko okwamaKristu?”
16. Ngaba yayikukungabi nambono iphangaleleyo okwenza amaNgqina ukuba abhence iNgqobhoko? Cacisa.
16 Impendulo yayiyile: “Akunjalo; ukuba kunjalo makube ke uYesu Kristu wayengumtshutshisi wamaYuda ongenambono iphangaleleyo, . . . nabo bonke abaprofeti bakaYehova bamaxesha amandulo [kuquka uYeremiya] ababekho ngaphambi koYesu babengabatshutshisi nabantu abangenambono iphangaleleyo, kuba bonke babhenca unqulo lobuxoki lwamaYuda awexukileyo nolweentlanga ezazingabahedeni.” Ngokuqinisekileyo, ukuze amaKristu okwenyaniso abe ‘lukhanyiselo lwehlabathi,’ amele abhence ‘ubumnyama’ bokomoya. (2 Korinte 6:14-17) Oku akuthethi ukuthi abantu bayahlaselwa kodwa kunoko, kuhlaselwa inkqubo leyo ibakhobokisayo. Ngaloo ndlela, uYehova wayalela uYeremiya esithi: “Bhinqa amanqe akho, usuk’ ume, uthethe kubo konke endikuwisela umthetho ngako. Musa ukuqhiphuka umbilini ngabo . . . Baya kulwa nawe, bangabi nakukweyisa, ngokuba ndinawe ukuba ndikuhlangule; utsho uYehova.”—Yeremiya 1:17, 19.
Umsebenzi KaYeremiya Ufikelela Esiphelweni
17, 18. (a) AmaNgqina kaYehova aye awuqhuba njani umsebenzi wawo ofana nokaYeremiya kwiminyaka yakutshanje? (b) Sisiphi isiluleko esiye sanikelwa kwabo baneentliziyo ezinyanisekileyo?
17 Ngaba amaNgqina kaYehova aye ayekelela ekuvakaliseni umgwebo kaThixo? Kuyinyaniso ukuba, siphila kwixesha laxa ukugxekwa kolunye unqulo kungathatyathelwa ngqalelo. Sekunjalo, iimpapasho zamaNgqina kaYehova zisoloko zisichaza ngokucacileyo isigidimi esikwasinye somgwebo ozela iNgqobhoko. Ngokomzekelo, kwiminyaka emine edlulileyo amaNgqina kaYehova aye ashicilela imibhalo ezizigidi ezingama-32 zencwadi ethi Unokuphila Ngonaphakade Kwiparadisi Esemhlabeni, ngeelwimi ezingama-76. Le mpapasho inikela iimpendulo kwimibuzo emininzi ebuzwayo ngoku, enjengethi “Kwenzeka Ntoni Ekufeni?” “Kungani UThixo Evumele Ubungendawo?” nothi “Ukufanisa Unqulo Lokwenyaniso.” Kodwa ikwanikela isilumkiso esicacileyo ngokubhekisele kubukhosi behlabathi bonqulo lobuxoki.
18 Kwisahluko sama-25, phantsi komxholo othi “Ngaba Umele Ihlabathi LikaSathana, Okanye Inkqubo KaThixo Entsha?” ibonisa oku: “EBhayibhileni unqulo lobuxoki lumelwe ‘lihenyukazi elikhulu,’ okanye unongogo, onegama elithi ‘iBhabheli Enkulu.’ . . . Yaye kuyinyaniso ukuba ukutyhubela imbali unqulo luye lwaxubana neepolitiki, ngokufuthi luxelela urhulumente emakwenziwe.” Ngoko ke, liliphi ikhondo lesenzo le ncwadi elicebisayo? Iphakamisa lo mbuzo: “Ngaba ufuna ukuba ngowehlabathi likaSathana? Okanye ngaba umele inkqubo entsha kaThixo? Ukuba umele inkqubo entsha kaThixo, uya kwahluka ehlabathini, kuquka unqulo lwalo lobuxoki. Uya kuwubekel’ indlebe lo myalelo: ‘Phumani kuyo [iBhabheli Enkulu], bantu bam.’ (ISityhilelo 18:4)”
19. Unokubonisa njani ukuba ilizwi likaYeremiya wale mihla alithothiswa kulo mhla wamva nje?
19 Esi sigidimi sikwasinye nesinamandla sokwahlula nesomgwebo sivakala ngokucacileyo kwincwadi ethi Ukunqabiseka Kwehlabathi Lonke Phantsi ‘KoMthetheli Woxolo,’ epapashwe ngowe-1986 (ngemibhalo ezizigidi ezithandathu ngeelwimi ezingama-25). Ibhenca abefundisi beNgqobhoko ‘ngokuphembelela abafana ukuba baye kumathafa edabi’ ngeMfazwe Yehlabathi I. Ihlabela mgama isithi: “INgqobhoko iyaqhubeka ilutshaba loThixo Osenyangweni ukuhla ukuza kuthi ga kweli xesha. Ngokuqinisekileyo ayikhuselwa nguThixo, ibe ngenxa yesi sizathu sibalulekileyo ubukho bayo buhlala bunganqabisekanga.” (Bona iphepha lama-30-2.) Ilizwi likaYeremiya wale mihla alithothiswa! Ngoxa abefundisi nabezobupolitika besenza unakonako ukuba bathibaze ukushunyayelwa kwemigwebo kaThixo, amangqina akhe athembekileyo atyhalela phambili, ezimisele ukuwugqiba lo msebenzi wokulumkisa.—Yeremiya 18:18.
20. Kutheni le nto amaNgqina kaYehova esiya kuqhubeka evakalisa imigwebo kaYehova ezintlangeni?
20 Kutheni le nto lo msebenzi umele ugqitywe? Kungokuba uYehova, iNkosi enguMongami ophilayo wendalo iphela, ubambene neentlanga nonqulo lwazo. Njengoko uYehova wathi wabuza uYuda neYerusalem eyayinenkohliso, ngoko lo mbuzo usebenza ngokufanayo kwiNgqobhoko namhlanje: “Mandingaveleli na ke ngenxa yezo zinto? utsho uYehova; ungaphindezeli na ke umphefumlo wam, kuhlanga olunje?” Ngoko ke, amaNgqina kaYehova aya kuqhubeka etyelela abantu neentlanga ngesigidimi esilumezayo ebantwini abaninzi njengomgwebo ongathandwayo kodwa esiziindaba ezilungileyo ezonwabisayo kwabambalwa—iindaba ezilungileyo zoBukumkani bukaThixo.—Yeremiya 5:9, 29; 9:9; IZenzo 8:4, 12.
21. Phezu kwayo nje intlekele exelwe kwangaphambili, liliphi ithemba elimangalisayo abanalo abo bazithobayo kumsebenzi kaYeremiya? (INdumiso 37:9, 11, 18, 19, 28, 29)
21 Ngoxa uYeremiya ebesoloko ebizwa ngokuba ngumbhombolozi wentlekele, kuyinyaniso ukuba isigidimi sakhe sabangela ithemba elithile kumaYuda. (Yeremiya 23:5, 6; 31:16, 17) Ngendlela efanayo, ngoxa amaNgqina kaYehova evakalisa “imbandezelo enkulu,” esondelayo ehambisana nomgwebo kaThixo eArmagedon, akwavakalisa iintsikelelo ‘zezulu elitsha nomhlaba omtsha’ oya kuphumela ekubuyiselweni kobulungisa neParadisi, ezihambisana nobomi obungunaphakade kwesi sijikelezi-langa. (Mateyu 24:21, 22; ISityhilelo 16:16; 21:1-4) Ngoko ke, ngoku lixesha lokuthobela isigidimi somgwebo kaYehova nokufak’ isandla ekuqoshelisweni komsebenzi omkhulu kaYeremiya.—Thelekisa uYeremiya 38:7-13.
Uyakhumbula Na?
◻ NjengoYeremiya, amaNgqina kaYehova atshutshiwa njani?
◻ Kutheni le nto amaNgqina kaYehova ezingisa ekushumayeleni?
◻ Ubusandiswa njani umsebenzi kaYeremiya?
◻ Yiyiphi imizekelo yakutshanje ebonisa ukuba ukugxekwa akukaguquki?
◻ Phezu kwaso nje isigidimi sentlekele, liliphi ithemba elikhoyo?
[Umfanekiso okwiphepha 23]
Ekuhambeni kwexesha, uMariya wanqulwa njengesithixo yaye abantu bakhuthazwa ukuba bamnqule ‘njengoNina kaThixo’
[Umfanekiso okwiphepha 24]
Ngowe-1931 Abafundi BeBhayibhile bamkela igama elithi ‘AmaNgqina KaYehova’ kwindibano yabo eyayiseColumbus, eOhio
[Imifanekiso ekwiphepha 25]
Kwihlabathi lonke amaNgqina kaYehova alandela umzekelo kaYeremiya