“Nibabeke Abo Banjalo”

“Bazini kakuhle ngoko abanjalo.”—1 KORINTE 16:18.

1. Luhlobo olunjani lwabantu umpostile uPawulos awalubekayo ngokukhethekileyo, yaye wabhala wathini ngomnye umKristu onjalo?

UHLOBO lwabantu umpostile uPawulos awalubeka ngokukhethekileyo yayingabo babekulungele ukusebenzisa amandla abo ngokungagogotye nto ngenxa kaYehova nabazalwana babo. Ebhala ngomnye wabasebenzi abangoowabo abanjalo, uPawulos wenjenje: “Mamkeleni ke ngokwaseNkosini, ninovuyo lonke; nibabeke abo banjalo; ngokuba, ngenxa yomsebenzi kaKristu, wada waphantsa ukufa, ebenza isichenge ubomi bakhe.”—Filipi 2:29, 30.

2. Ngoobani esifanele sibanike ingqalelo ekhethekileyo, yaye ngoba?

² Namhlanje, kumabandla amaNgqina kaYehova angaphezu kwama-55 000, kukho abantu abaninzi abangamaKristu afanelekileyo esifanele sibaxabise ngokukhethekileyo ngenxa yokubulaleka kwabo phakathi kwabazalwana babo. Ebonisa ukuba sifanele sibabeke abantu abanjalo, uPawulos wathi: “Siyanicela, bazalwana, ukuba nibazi ababulalekayo phakathi kwenu, abanongamelayo eNkosini, abanilulekayo, nibabeke ngokugqithiseleyo kakhulu ukubathanda, ngenxa yomsebenzi wabo. Hlalani ninoxolo phakathi kwenu.”—1 Tesalonika 5:12, 13.

3. (a) Yintoni eya kusinceda ukuba sibe seluxolweni omnye komnye? (b) Kukuyiphi inkalo abafanele abadala bamisele umzekelo kuyo?

³ Ukuba noxabiso olufanelekileyo ngabo bonke abazalwana noodade bethu, ingakumbi abadala abasebenza nzima, ngokungathandabuzekiyo kuyinkalo ebalulekileyo ukuze sihlalisane ngoxolo emabandleni ethu. Koku, njengakuzo zonke iinkalo zokuphila kwamaKristu, abadala bafanele babe “yimizekelo kumhlambi.” (1 Petros 5:2, 3) Phofu ke, ngoxa abadala benokukulindela ngokufanelekileyo ukuxatyiswa ngabazalwana ngenxa yomsebenzi wabo onzima, nabo bakwafanele bamisele umzekelo ekuhlonelaneni ngokufanelekileyo.

‘Bonakalisani Imbeko Omnye Komnye’

4, 5. (a) Yintoni ebonisa ukuba umpostile uPawulos wayebaxabisa abadala ababesebenza nzima? (b) Wawabhalela wathini amaKristu aseRoma, yaye kutheni le nto amazwi akhe esebenza ingakumbi kubadala?

⁴ Umpostile uPawulos wamisela umzekelo omhle kule nkalo. Njengoko sibonile kwinqaku elandulelayo, wakhangela izinto ezilungileyo kubazalwana noodade bakhe. Yaye akazange nje kuphela akhuthaze amaKristu ukuba abathande aze abahlonele abadala abasebenza nzima kodwa naye wabonisa uxabiso olufanelekileyo ngabo. Ngokucacileyo wababeka abantu abanjalo.—Thelekisa eyabaseFilipi 2:19-25, 29; Kolose 4:12, 13; Tito 1:4, 5.

⁵ Kwincwadi yakhe eyayisiya kumaKristu aseRoma, uPawulos wabhala: “Mayela nothando olu lobuzalwana, ndithi, yenzelanani ububele; mayela nembeko leyo, phangelanani; mayela nokunyameka oko, musani ukunqena; mayela nomoya lo, vuthani; mayela neNkosi le, khonzani.” (Roma 12:10, 11) Ngokuqinisekileyo, la mazwi asebenza ngakumbi kubadala abangamaKristu. Bona, kuwo onke amaKristu, bafanele bakhokele ekubonakaliseni imbeko omnye komnye.

6. (a) Abadala bafanele baphephe ukwenza ntoni, yaye ngoba? (b) Abadala banokwenza njani ukuba ibandla libe nentembelo ngakumbi kwiqumrhu labadala liphela?

⁶ Abadala bafanele bakulumkele ngokukhethekileyo ukuthetha amazwi okugxeka ngabaveleli abangoowabo. Akukho namnye umdala onazo zonke iimpawu zobuKristu ukusa kumlinganiselo ophakamileyo, kuba bonke abafezekanga. Bambi babalasele kwiimpawu ezithile, kodwa babuthathaka kwezinye. Ukuba abadala banothando olufanelekileyo lobuzalwana nolobubele omnye komnye, abasayi kuthetha nto ngobuthathaka babanye. Xa bencokola nabazalwana, baya kubalaselisa ubuchule babadala abangoowabo. Ngokukhokela ngaloo ndlela ekubonakaliseni imbeko omnye komnye, baya kulenza ibandla libe nentembelo ngakumbi kwiqumrhu labadala liphela.

Ukusebenza Kunye Njengequmrhu

7. Yintoni eya kunceda abadala ukuba basebenze kunye bemanyene, yaye baya kukubonisa njani oku?

⁷ Emva kokuthetha ngokupha kukaKristu ‘abantu izipho’ kwibandla lakhe lasemhlabeni ngenjongo yokuphinda kuhlengahlengiswe abazalwana nomsebenzi wobulungiseleli, umpostile uPawulos wabhala wenjenje: “Sithi ke, sinyanisekile eluthandweni, sikhulele, ngeendawo zonke, kuye lo uyintloko, uKristu.” (Efese 4:7-15) Ukuqonda ukuba uKristu uyiNtloko esebenzayo yebandla, nokuba abadala bamele bazithobe kwisandla sakhe sokunene sokuba negunya, kunguthunywashe omanyanisayo kwiqumrhu ngalinye labadala. (Efese 1:22; Kolose 1:18; ISityhilelo 1:16, 20; 2:1) Baya kufuna ulwalathiso lwakhe ngomoya oyingcwele, ngemigaqo yeBhayibhile nangokhokelo olunikelwa liQumrhu Elilawulayo ‘lodidi lomkhonzi othembekileyo noqondayo.’—Mateyu 24:45-47; IZenzo 15:2, 28; 16:4, 5.

8. Yintoni abafanele bonke abadala bayikhumbule, yaye baya kuyibonakalisa njani imbeko omnye komnye?

⁸ Abadala baya kuqonda ukuba uKristu, ngomoya oyingcwele, unokwalathisa ingqondo yakhe nawuphi na umdala kwiqumrhu labadala ukuba anikele umgaqo weBhayibhile ofunekayo ukuze kuhlangatyezwane nayo nayiphi na imeko okanye kwenziwe nasiphi na isigqibo esibalulekileyo. (IZenzo 15:6-15) Akukho namnye umdala onebango lokuba umoya usebenza kuye yedwa kwiqumrhu. Abadala baya kubonakalisa imbeko omnye komnye ngokuthi bamphulaphule ngenyameko nawuphi na omnye weqela labo ovelisa umgaqo weBhayibhile okanye ulwalathiso oluvela kwiQumrhu Elilawulayo ngombandela oxutyushwayo.

9. (a) Ziziphi iimpawu zokomoya eziya kunceda umveleli ukuba aphephe ukugagamela abadala abangoowabo? (b) Umdala uya kubonisa njani ukuba ‘ungothantamisayo,’ yaye iqumrhu elilawulayo lenkulungwane yokuqala lawumisela njani umzekelo kule nkalo?

⁹ Ukuthozama, ululamo nentobeko yobuKristu ziya kuthintela nawuphi na umdala ukuba angazami ukulawula abazalwana bakhe aze anyanzelise uluvo lwakhe. (IMizekeliso 11:2; Kolose 3:12) Umveleli ongumKristu usenokuba neembono ezinamandla kakhulu nezinyanisekileyo kumbandela othile. Kodwa ukuba uyabona ukuba abadala akhonza kunye nabo banezizathu ezingokweZibhalo nezisekelwe kulawulo lobuthixo zokuba babe neembono ezahlukileyo kwezakhe, uya ‘kuzenza omncinane’ aze azibonakalise ‘engothantamisayo’ ngokuyekela kuluvo loninzi ngombandela.a (Luka 9:48; 1 Timoti 3:3) Uya kulandela umzekelo omhle owamiselwa liqumrhu elilawulayo lenkulungwane yokuqala, elathi, emva kwengxubusho engokweZibhalo, naphantsi kokhokelo olwanikelwa nguKristu ngomoya oyingcwele, lavumelana ‘ngamxhelo mnye.’—IZenzo 15:25.

10. (a) Yintoni ebonisa ukuba ukumiselwa kwequmrhu labadala kwibandla ngalinye kulilungiselelo elisekelwe eBhayibhileni? (b) Incwadi ethi Ukulungelelaniselwa Ukufeza Ubulungiseleli Bethu izichaza njani iingenelo zeli lungiselelo?

¹⁰ Ukumiselwa kwequmrhu labadala ukuba likhokele kwibandla ngalinye kusekelwe kumzekelo owamiselwa libandla lamaKristu okuqala. (Filipi 1:1; 1 Timoti 4:14; Tito 1:5; thelekisa umbhalo osemazantsi phantsi kwegama elithi “elders” kuTito 1:5 kwiThe Jerusalem Bible.) Ishwankathela ubulumko obusetyenzisiweyo kweli lungiselelo, incwadi ethi Ukulungelelaniselwa Ukufeza Ubulungiseleli Bethu (iphepha 37) ithi: “Bambi abadala baya kubalasela ngakumbi kuphawu olunye kunakolunye, ngoxa abanye bentlanganiso beya kubalasela kwezo mpawu abanye abasenokuba buthathaka kuzo. Undoqo ke ngulo, ngokubanzi, yonke intlanganiso iya kuba nazo zonke iimpawu ezintle ezifunekayo ukuze konganyelwe ngokufanelekileyo ibandla likaThixo.”

Ukuhlonelana Kwamaqumrhu Abadala

11, 12. (a) Kutheni le nto iqumrhu labadala linokuphumeza okungakumbi kunoko bekuya kuphunyezwa ngamalungu alo ngokomntu ngamnye? (b) UKristu Yesu nompostile uPawulos baqhubana njani namaqumrhu abadala ngaloo ndlela, yaye kwanikelwa siphi isiluleko?

¹¹ Ngaloo ndlela, iqumrhu labadala likho ngokweZibhalo elithi xa lilonke limele okungakumbi kunokuba enokwenza amalungu alo ngokwabantu ngabanye. Xa behlanganisana baze bathandaze ngoKristu nangomoya oyingcwele becela ulwalathiso lukaYehova, banokwenza izigqibo abebengenakufikelela kuzo ukuba bekudliwene indlebe nabo ngokomntu ngamnye. Xa abadala behlanganisana, iimpawu zabo ezahlukeneyo ziyabonakala zize zivelise imiphumo ebonisa ulwalathiso lukaKristu kwimibandela leyo.—Thelekisa uMateyu 18:19, 20.

¹² Into yokuba uKristu waqhubana namaqumrhu abadala ngaloo ndlela iboniswa kwizigidimi awazithumela ‘kwiinkwenkwezi ezisixhenxe’ okanye “izithunywa zawo amabandla asixhenxe” eAsiya. (ISityhilelo 1:11, 20) Esokuqala sezo zigidimi sathunyelwa kwibandla lase-Efese ‘ngesithunywa’ salo, okanye iqumrhu labaveleli abathanjisiweyo. Kwiminyaka enokuba ngama-40 ngaphambilana, umpostile uPawulos wabiza iqumrhu labadala base-Efese ukuba liye eMileto ukuze libe nentlanganiso ekhethekileyo kunye naye. Walikhumbuza ukuba lizilumkele lize lilaluse ibandla.—IZenzo 20:17, 28.

13. Kutheni abadala befanele banikele ingqalelo kumoya abawubonisayo kwiqumrhu labo labadala lasekuhlaleni nakulwalamano lwabo oluyintlanganisela namanye amaqumrhu abadala?

¹³ Amaqumrhu abadala afanele anikele ingqalelo ekhethekileyo ekugcineni umoya omhle nokhuthazayo phakathi kwawo nakwibandla akulo. (IZenzo 20:30) Kanye njengoko mKristu ngamnye ebonakalisa umoya othile, ngokukwanjalo amaqumrhu abadala namabandla ephela anokuvelisa umoya othile. (Filipi 4:23; 2 Timoti 4:22; Filemon 25) Maxa wambi kuyenzeka ukuba abadala abahlonelanayo ebandleni abakulo babonise ukungavisisani nelinye iqumrhu labadala. Kwizixeko apho amabandla aliqela ahlanganisana kwiholo enye, maxa wambi kuye kuvele ukungavisisani phakathi kwamaqumrhu abadala ngokuphathelele ucwangciso lweentlanganiso, imida yentsimi, ukumiswa kwezinto eHolweni yoBukumkani, njalo njalo. Imigaqo efanayo yokuthozama, yolulamo, yentobeko nokuthantamisa ethi ilawule abadala abakwiqumrhu ngalinye ifanele ilawule ulwalamano phakathi kwamaqumrhu abadala. Umpostile uPawulos waluleka esithi: “Mazithi zonke izinto zenzelwe ukuba lakheke ibandla.”—1 Korinte 14:26.

Intlonelo Efanelekileyo Ngabaveleli Abahambahambayo

14. Luluphi olunye udidi lwabadala olufanele lubekwe, yaye ngoba?

¹⁴ Elinye ilungiselelo elisekelwe eBhayibhileni elisebenzayo phakathi kwamabandla amaNgqina kaYehova kukutyelelwa kwawo rhoqo ngabadala abahambahambayo, ababizwa ngokuba ngabaveleli besiphaluka okanye abesithili. (IZenzo 15:36; 16:4, 5) Ngokubalaseleyo, la ‘ngamadoda amakhulu, awongamela kakuhle.’ Ngokufanayo nabanye abadala, afanele “abalelwe ekuthini afanelwe yimbeko ephindwe kabini, ngokukodwa lawo abulalekayo elizwini nasemfundisweni.”—1 Timoti 5:17.

15. UYohane wanikela siphi isiluleko ngokuphathelele abavangeli abahambahambayo?

¹⁵ Kwincwadi yakhe yesithathu umpostile uYohane wamgxeka uDiyotrefe kuba engazange afune “ukubamkela ngentlonelo abazalwana.” (3Yoh Indinyana 10, NW) Aba bazalwana babengamaKristu ahambahambayo awayehamba ‘ngenxa yegama [likaYehova].’ (3Yoh Indinyana 7) Kubonakala ukuba ayethunywe njengabavangeli ukuba ashumayele iindaba ezilungileyo aze akhe amabandla kwiidolophu awayetyelela kuzo. UYohane wayalela ukuba aba bashumayeli bahambahambayo nababesebenza nzima babefanele ‘baxhotyiselwe indlela ngokufanele uThixo.’ (3Yoh Indinyana 6) Lo mpostile wongezelela wathi: “Thina ngoko sifanele ukubaxhasa abanjalo, ukuze sibe ngabasebenzisana nabo kuyo inyaniso.” (3Yoh Indinyana 8) Babefanele bamkelwe ngentlonelo.

16. Onke amaKristu namhlanje anokuwulandela njani umzekelo kaGayo ‘womsebenzi othembekileyo’ awawenzela abavangeli benkulungwane yokuqala, yaye kutheni oku kufanelekile nje?

¹⁶ Ngokufanayo namhlanje, abaveleli abahambahambayo abathunyelwa liQumrhu Elilawulayo ukuba bashumayele iindaba ezilungileyo baze bancede amabandla bafanele bamkelwe ngobubele nangentlonelo. Aba bazalwana nabafazi babo (ukuba batshatile, njengokuba abaninzi babo benjalo) baye bavuma ukuncama ukuhlala emakhayeni abo. Bahambahamba kwiindawo ngeendawo, ngokufuthi bexhomekeke kububele babazalwana ngokutya nangegumbi lokulala. Ebhalela uGayo, owathi ngokunothando wabamkela abavangeli abahambahambayo kwinkulungwane yokuqala yeXesha Eliqhelekileyo, uYohane wenjenje: “Ntanda, wenza okuthembekileyo, oko sukuba ukwenzela abazalwana nabasemzini.” (3 Yohane 5) Ngokukwanjalo namhlanje, abo bahamba ‘egameni likaYehova’ bafanele babekwe kuze kubonakaliswe uthando nentlonelo kubo.

17. Abadala bebandla bafanele bayibonise njani intlonelo efanelekileyo kubameli abahambahambayo beQumrhu Elilawulayo?

¹⁷ Ingakumbi abadala, bafanele babonise intlonelo efanelekileyo kwaba bameli bahambahambayo beQumrhu Elilawulayo. Bathunyelwa emabandleni ngenxa yeempawu zabo zokomoya namava abo, ngokuqhelekileyo amaninzi ngakumbi kunawabadala abaninzi basekuhlaleni. Bambi baba baveleli bahambahambayo basenokuba baselula ngeminyaka kunabadala abathile abasemabandleni abawatyelelayo. Kodwa oko akusosizathu sivakalayo sokuba bangahlonelwa ngokufanelekileyo. Basenokukubona kuyimfuneko ukunqanda abadala basekuhlaleni ukuba bangangxami ukuncomela umzalwana othile njengesicaka solungiselelo okanye umdala, bekhumbula isiluleko sikaPawulos kuTimoti. (1 Timoti 5:22) Nangona umveleli ohambahambayo esenokunikela ingqalelo efanelekileyo kwiimpikiswano zabadala basekuhlaleni, bafanele bakulungele ukumphulaphula baze bangenelwe kumava akhe amaninzi. Ewe, bafanele ‘bababeke abo banjalo.’—Filipi 2:29.

“Bazini Kakuhle Ngoko Abanjalo”

18, 19. (a) UPawulos walubonisa njani uxabiso lwakhe ngabasebenzi abangoowabo? (b) Nguwuphi umzekelo obonisa ukuba uPawulos wayengenanqala ngabazalwana bakhe?

¹⁸ Kwincwadi yakhe yokuqala eya kwabaseKorinte, uPawulos wabhala wenjenje: “Ke kaloku ndiyanivuselela, bazalwana (niyayazi indlu kaStefana, ukuba iyintlahlela yelaseAkaya, nokuba bazimisele ukulungiselela abangcwele), ukuze nani nibalulamele abanjalo, nabo bonke abasebenzisana nathi emsebenzini, nababulalekayo. Ndiyavuya ke ngokufika kukaStefana noFortunato noAkayiko; ngokuba bakwenzelelele bona ukungabikho kwenu; kuba bawuphumzile umoya wam nowenu. Bazini kakuhle ngoko abanjalo.”—1 Korinte 16:15-18.

¹⁹ Esinjani sona isimo sengqondo ukuba sihle nesobubele uPawulos awaba naso kubazalwana bakhe, bambi babo awayengabazi kangako. Kodwa uPawulos wayebathanda kuba ‘babenentsebenziswano’ yaye ‘babebulaleka’ kwimigudu yabo yokulungiselela abangcwele. Kwakhona uPawulos wamisela umzekelo obalaseleyo wokuziphosa kwelokulibala izono ezidluleyo. Nangona uYohane ekuthiwa nguMarko wayemphoxile ebudeni bohambo lwakhe lokuqala lobuvangeli basemazweni, kamva uPawulos wamncoma ngokufudumeleyo kwibandla laseKolose. (IZenzo 13:13; 15:37, 38; Kolose 4:10) Xa wayevalelwe entolongweni eRoma, uPawulos wafuna ukuba kuziwe noMarko kuba, kunjengokuba wathi, “[uMarko] unokundinceda kakuhle kumsebenzi wokulungiselela.” (2 Timoti 4:11) Akukho nentwana yenqala apho!

20. AmaKristu xa ewonke, ingakumbi abadala, anokubonisa njani ukuba ayabaxabisa abaveleli abathembekileyo nokuba ‘ayababeka abo banjalo’?

²⁰ Namhlanje phakathi kwabantu bakaThixo, kukho abaveleli abaninzi abazinikelayo abathi, njengoStefana, balungiselele abazalwana babo. Ngokuqinisekileyo, baneziphoso neentsilelo zabo. Sekunjalo, ‘bayasebenzisana’ ‘nomkhonzi othembekileyo noqondayo’ neQumrhu lakhe Elilawulayo, yaye ‘bayabulaleka’ emsebenzini wokushumayela nasekuncedeni abazalwana babo. Sifanele ‘sihlale sibathobela abantu abanjalo,’ sibaxabisa ngenxa yeempawu zabo, singakhangeli iintsilelo zabo. Abadala bafanele bakhokele ekuboniseni uxabiso nentlonelo efanelekileyo kubadala abangoowabo. Abadala bamele basebenzisane ngomoya wothando nomanyano. Bonke baya kuyiqonda indlela abaxabiseke ngayo abazalwana abathembekileyo abanjalo baze ‘bababeke abo banjalo.’—Filipi 2:29.

[Umbhalo osemazantsi]

Iingongoma Zempinda

◻ Luhlobo olunjani lwabantu uPawulos awalubeka ngokukhethekileyo, yaye ngoobani esifanele sibabeke ngokukhethekileyo namhlanje?

◻ Abadala bafanele babonise njani ukuba bayahlonelana?

◻ Kutheni le nto iqumrhu labadala linokuphumeza okungakumbi kunoko kunokuphunyezwa ngamalungu alo ngokomntu ngamnye?

◻ Kukuziphi iinkalo elinokuthi iqumrhu labadala libonise ukuba liyalihlonela elinye iqumrhu labadala?

◻ Luluphi udidi lwabaveleli olufanele lubekwe ngokukhethekileyo, yaye inokuboniswa njani le ntlonelo ifanelekileyo?

[Umfanekiso okwiphepha 15]

Abadala bafanele babonakalise uxabiso olufanelekileyo omnye komnye

[Umfanekiso okwiphepha 18]

Bonisani uthando nentlonelo ngabaveleli abahambahambayo