Siyalifuna Ibandla
1 Oonyana bakaKora bakha bavakalisa uxabiso lwabo ngebandla likaYehova ngale ndlela: “Imini enye ezintendelezweni zakho ilungile kunewaka.” (INdu. 84:10) Kubo, ihlabathi lalingenanto inokuthelekiswa nalo. Ukuba nawe uvakalelwa ngolo hlobo, ibandla lifanele libe yeyona nto ibalulekileyo ebomini bakho.
2 Ukususela ekusekweni kwalo, ibandla lamaKristu liye labonakala lisikelelwa nguYehova. (IZe. 16:4, 5) Akukho namnye kuthi ufanele alithabathe lula ibandla okanye acinge ukuba liyindlela nje yokusihlanganisa ngokwemizimba. Ibandla yindawo yokuhlaziyeka kumaNgqina kaYehova kuzo zonke iindawo. Liyasimanyanisa ukuze sifundiswe nguYehova size silungelelaniselwe umsebenzi woBukumkani.—Isa. 2:2.
3 Ibandla lamaKristu ngumjelo oyintloko wokusifundisa inyaniso. (1 Tim. 3:15) Abalandeli bakaYesu bamele “bonke babe banye”—bamanyane noThixo, noKristu nabo bonke ngabanye. (Yoh. 17:20, 21; thelekisa uIsaya 54:13.) Nokuba siya phi na ehlabathini, abazalwana bethu bakholelwa kwiimfundiso nemigaqo yeBhayibhile, yaye baziphatha ngokuvisisana nayo.
4 Siqeqeshelwa size sixhotyiselwe ukuphumeza isabelo sethu sokwenza abafundi. Nyanga nganye, IMboniselo, uVukani!, noBulungiseleli Bethu BoBukumkani bunikela inkcazelo eluncedo yokusinceda ekuqaliseni iingxubusho zeZibhalo. Iintlanganiso zenzelwe ukusibonisa indlela yokufumana nokukhulisa umdla. Ulwando esilubona kwihlabathi lonke lububungqina bokuba sixhaswa ezulwini kulo msebenzi.—Mat. 28:18-20.
5 Ngebandla, sifumana ukhuthazo mihla le oluthi ‘lusilole eluthandweni nasemisebenzini emihle.’ (Heb. 10:24, 25) Somelezelwa ukuba sinyamezele izilingo ngokuthembeka. Abaveleli abanothando bayasinceda sijamelane neengcinezelo namaxhala. (INtshu. 4:9-12) Sinikwa isiluleko esisifunayo xa sisengozini yokuphambuka. Yiyiphi enye intlangano enyamekela ngothando ngolu hlobo?—1 Tes. 5:14.
6 Kukuthanda kukaYehova ukuba sihlale sisondele kwintlangano yakhe ukuze sihlale simanyene. (Yoh. 10:16) Enye indlela ibandla elisinceda ngayo sihlale sisondele kudidi lomkhonzi othembekileyo kungokuthumela abaveleli abahambahambayo ukuba basikhuthaze. Ukusabela kwethu kulwalathiso lothando olunikelwayo kusisondeza kumanyano olusinceda sihlale somelele ngokomoya.
7 Ibandla libalulekile ukuze sihlale siphilile ngokomoya. Bekungayi kwenzeka ukumkhonza ngokwamkelekileyo uYehova sizimele geqe kulo. Ngoko ke, masihlale sisondele kwilungiselelo likaYehova. Kwanga singaluxhasa usukelo lwalo size ngokunyaniseka sisisebenzise isiluleko esisifumana kulo. Kungale ndlela kuphela esinokubonisa indlela esilixabise ngayo ibandla.—INdu. 27:4.