INdibano YeSithili “Yabadumisi Abanovuyo” Yowe-1995

¹ Zingaphi izizathu esinazo zokuba novuyo? Mhlawumbi bambalwa kuthi abakhe bazama ukuzibala zonke. Nangona siphila kwihlabathi elineziphithiphithi nokuthingaza, sinezizathu ezininzi zokuba novuyo. Njengokuba bekwazisiwe kwiMboniselo kaMeyi 1, 1995, siya kuba nomxholo okhuthazayo othi “Abadumisi Abanovuyo” kwiindibano zesithili zowe-1995.

² Siyamdumisa uYehova kuba wasifundisa inyaniso. (Isa. 54:​13; Yoh. 8:​32) Size thina, ngovuyo sabelane ngenyaniso nabo bafuna unqabiseko nolonwabo. (Hez. 9:⁠4; IZe. 20:​35) Kwakhona ubuzalwana bethu bobuKristu buyasivuyisa. Intsapho yokomoya enothando isenza saneliseke size sonwabe. Ezi zizizathu ezimbalwa kwesinazo ezisibangela sidumise uYehova. Iintetho zendibano nemiboniso ziya kusibonisa izizathu ezingakumbi ezingokweZibhalo zokuvuya kule mihla yokugqibela ineenkathazo.

³ INdibano Yeentsuku Ezintathu: Ngaba sele uwenzile amalungiselelo nomqeshi wakho okufumana ikhefu ukuze uye endibanweni ngezo ntsuku zintathu? Eyona ndibano ikufutshane kuwe iza kuba phi? Ubulungiseleli Bethu BoBukumkani bukaMeyi budwelise imihla nezixeko zazo zonke iindibano ezingama-30 eziza kuba kwintsimi yesebe loMzantsi Afrika. Ngoku unobhala webandla lenu sele enazisile ngeenkcukacha zebandla lenu. Ngaphandle kwesiNgesi, kuza kubakho iindibano ngesiBhulu, isiKwanyama, isiPedi, isiPhuthukezi, isiSuthu, isiTsonga, isiTswana, isiVenda, isiXhosa, isiZulu neNtetho Yezandla.

⁴ Ngosuku lokuqala ucwangciso luza kuqalisa nge-9:​40 kusasa luze luqukunjelwe ngosuku lokugqibela malunga ne-3:​50 emva kwemini. Ngosuku lwesibini nolwesithathu, ucwangciso luya kuqalisa nge-9:​30 kusasa. Kuya kuvulwa nge-8:​00 kusasa. Ngabo banemisebenzi ethile kuphela abaya kuvunyelwa bangene ngaphambi koko.

⁵ Ngaba Uya Kubakho?: Sicelwa ukuba sibekho zontathu ezo ntsuku zendibano. Ngoba? NguYehova ofuna sibekho. Namhlanje ukholo nempilo yethu yokomoya zihlaselwa ngokuqatha. UPawulos wanikela isiluleko sokuba “singakuhilizeli ukuhlanganisana kwethu” ngexesha apho amaKristu akwelakwaYuda ayecinezelekile. (Heb. 3:​12, 13; 10:​25) AmaFilipi ayephila “esazulwini sesizukulwana esigoso, esigwenxa.” Ukanti, ‘ayebonakala njengezikhanyiso ehlabathini.’ (Fil. 2:​15) Kwakutheni ukuze la maKristu enkulungwane yokuqala ahluke? Kuba ayethobela ulwalathiso lomoya oyingcwele olwaluwayalela ukuba ahlanganisane ‘ukuze alolane eluthandweni nasemisebenzini emihle.’​—⁠Heb. 10:⁠24.

⁶ Ihlabathi liya kusifaka impembelelo etenxileyo, linciphise umdla wethu wokuhlanganisana nabazalwana bethu nokudumisa uYehova. Kweli hlobo simenywa ukuba sithobele umoya kaYehova size sizinandiphe zontathu ezo ntsuku zendibano. Ngaba sizimisele ukuza nentsapho yethu yonke? Kufuneka silomeleze rhoqo uthando nokholo lwethu. UYehova ulungiselele iindibano zaminyaka le zokusinceda ekwenzeni oku.

⁷ Buyela Ekhaya Uvune Lukhulu: Ungangenelwa njani kule ndibano? Ngamafutshane nje “ngokunikela ingqalelo.” Oku akulula phakathi kwabantu banamhlanje abangazinzanga. Ulutsha oludlamkileyo lusenokukufumanisa kunzima ukunikela ingqalelo, kodwa sonke sinaloo ngxaki xa sisendibanweni. Ukuba siceba kusengaphambili siya kukufumanisa kulula ukunikela ingqalelo. Zibuze, ‘Uthini umxholo wale ndibano?’ Camngca ngawo! ‘Ndiyela ntoni, ibe ndiza kube ndisenzani ngezo ntsuku zintathu? Ngaba ngeengokuhlwa ndiya kuxakeka kukuzihlaziya, okanye ndicebe ukuba nexesha elaneleyo lokuphumla nokuhlolisisa iimbalasane zendibano?’

⁸ Inqaku leMboniselo kaJulayi 15, 1984 elithi “Ngaba Uyacamngca Okanye Uvumela Ingqondo Ibhadule?” lanikela amacebiso aliqela angendlela yokungenelwa kwiintlanganiso laza lenza esi sigqibo: “Uqeqesho lwengqondo lungoyena ndoqo ubalulekileyo.” Xa isithethi sisaqala, sidla ngokuphulaphula, kodwa mhlawumbi phakathi entethweni, sivumela ingqondo yethu “ibhadule.” Singakuthintela njani oku kungenzeki?

⁹ Amacebiso angaphambili singawaphinda kuba ayasebenza. Ukuba kunokwenzeka, zama ukuphumla ngokwaneleyo busuku ngabunye. Oku akusoloko kulula kuba kusenokufuneka uhambe umgama omde, yaye ukuba uhlala kwindawo eqeshisayo, usenokungalali ngokukhawuleza okanye uphumle njengaxa usemzini wakho. Ngokuqhelekileyo ukuceba kakuhle kuya kukunceda uphumle ngokwaneleyo.

¹⁰ Ukubhala amanqaku amafutshane kungqineke kuluncedo ekunikeleni ingqalelo. Ukuba uzama ukubhala inkcazelo eninzi, usenokuphoswa ngokupheleleyo zezinye iingongoma. Nali icebiso, bhala amanqaku ngenjongo yokushwankathela ucwangciso nesifundo seBhayibhile okanye nolele ngandletyananye. Nakubeni kusenokuba akukho mntu ucinga ngaye, uya kubhala amanqaku ngenjongo, ibe emva kwendibano uya kufumana amathuba okuchaza iimbalasane zendibano ngoxa unikela ubungqina obungacwangciswanga kumalungu entsapho angakholwayo. Ngokubhala amanqaku nokubalisa oko ukuvileyo, akuyi kuyilibala ngokukhawuleza inkcazelo. Into ayilibaleki xa uyibalisa.

¹¹ Nangona kungasayi kubakho kutya, kusachithwa imali eninzi ekuqesheni indawo enendibano, nto leyo edla ngokuquka nezinye iindleko zesandisi-lizwi, njalo njalo. Zihlawulwa njani ezi ndleko? Ngeminikelo yethu yokuzithandela, eyimali okanye itsheke ethunyelwa kwi-“Watch Tower Convention.” Oku kuvisisana neNdumiso 96:⁠8 kunye neyesi-2 yeziKronike 31:⁠12.

¹² Abadumisi Abanovuyo Bazukisa UYehova Ngehambo Yobuthixo: Kunyaka ophelileyo eUnited States, abasebenzi basehotele nabo basebenza kwindawo enendibano banikela amagqabaza akhuthazayo nawakhayo ngehambo yethu. Omnye umphathi wehotele wathi: “Kusoloko kumnandi ukunika indawo amaNgqina kuba anomonde ibe anentsebenziswano yaye abek’ iliso kubantwana bawo.” Omnye umphathi wehotele wathi amaNgqina abonakala onwabile yaye elungelelene ngakumbi kunamanye amaqela. Nangona indibano yethu yayiyeyona inkulu kwezakha zaqhutyelwa apho, wathi: “Zimbalwa izikhalazo neengxaki esiye sazifumana kunezamanye amaqela ambalwa kakhulu kunawo.”

¹³ Omnye osebenza ehotele wadiza ukuba indibano eyayisandul’ ukuqhutywa ngaphambi kweyethu yashiya umonakalo omkhulu, yaye kwebiwa izinto ezininzi, nangona kwakukho abasebenzi basehotele abaninzi. Kodwa ethetha ngendibano yethu, wathi: “Asinaxhala loko ngamaNgqina. . . . Xa elapha, uba mnye okanye babe babini abantu bokulungisa abakhoyo ibe bahlalele nje ukulungisa iingxaki zoomatshini.”

¹⁴ Akwaba bezinganjalo zonke iingxelo esizifumanayo, kodwa okulusizi kukuba azibi njalo zonke. Usihlalo wenye indibano wathi: “Emva kocwangciso ngalunye, igquba labakwishumi elivisayo belicukana kwindawo yokwamkela iindwendwe [yehotele] ezinzulwini zobusuku, lihleka isiqhazolo yaye lifundekela. Oku bekuziphazamisa ezinye iindwendwe . . . , ebezibonakala zibucaphuka. Abanye abaselula bebebaleka ezipasejini, bembakraza iingcango xa beye kubuthelana baze bangxole kuloo magumbi bakuwo.”

¹⁵ Enye ingxaki ezingisileyo minyaka le yeyabazalwana abaninzi abancokola ngaphandle kweholo ebudeni bocwangciso. Kwenye indibano nyakenye, kwafunyanwa ileta yesifundo seBhayibhile kwibhokisi yomnikelo. Yayifundeka ngolu hlobo: “Ndothuka ndabanda yingxolo, kukuphithizela, ukuncokola nazizenzo ezingatshongo khona ezaziqhubeka ngaphandle ebudeni beentetho . . . Andikabi liNgqina, ndisafundelwa ibe ndisafunda ukoyika nokuhlonela uThixo.” Ngokuqinisekileyo, akukho namnye ongathanda ukwenza abanye bacinge ukuba asiwaxabisi amalungiselelo kaYehova.

¹⁶ Maxa onke sifanele sizibuze: ‘Ndimela bani, ibe ndize kwenzani kule ndibano?’ Ubumoya bethu nokuhlonela kwethu uThixo kubonakala kwintetho, kwihambo nakuxabiso lwethu ngamalungiselelo okomoya. (Yak. 3:​13; 1 Pet. 2:​2, 3, 12) Abazalwana abaye banyamezela kangangeminyaka umsebenzi wabo usemiqathangweni yaye uvaliwe kuphawulwe ukuba badla ngokunikela ingqalelo ngakumbi baze bayihlonele indibano, bahlale ezihlalweni zabo, baphulaphule iintetho nemiboniso.

¹⁷ Isinxibo Nokuzilungisa Kwakho Kunento Okuyithethayo: Kweyoku-1 kaSamuweli 16:⁠7, sikhunjuzwa ukuba “umntu ukhangela umphandle, uYehova ukhangela intliziyo.” Ngaloo ndlela, abantu badla ngokusigweba ngokwendlela esibonakala ngayo. Basakhel’ umkhanya isinxibo nokuzilungisa kwethu, ngokukodwa xa sisiya endibanweni yokunqula nokufundiswa ukuphila kwamaKristu. Ukuba ungoselula ohamba isikolo okanye emsebenzini wakho usebenza ngokusondeleyo nabantu abalandela iindlela zehlabathi zokunxiba, kusenokuba nzima ngawe ukubambelela kwimilinganiselo yobuKristu yesinxibo esindilisekileyo.

¹⁸ Imilinganiselo yesinxibo nokuzilungisa ayifani ehlabathini lonke. Kulindeleke ukuba amaKristu anxibe ngokundilisekileyo, iimpahla ezifanelekileyo. Ngubani onokusinceda sizazi? Abazali bafanele baqinisekise ukuba abantwana babo abakwishumi elivisayo abanxibi njengolutsha lwehlabathi lwasesikolweni. Siye sanikwa ulwalathiso lokusinceda senze izigqibo ezisengqiqweni ngalo mbandela uethe-ethe. Sikhuthaza ukuba nihlolisise inqaku likaVukani! kaFebruwari 8, 1987 elithi “Zithetha Ntoni Iimpahla Kuwe?” Kuphawulwe ntoni kwiindibano zethu zonyaka ophelileyo?

¹⁹ Emva kwenye yeeNdibano ZeSithili “Zokoyika UThixo,” safumana la magqabaza: “Abazalwana noodade baphucule ngokwenene kwisinxibo, ekuzilungiseni nakwihambo yabo endibanweni kulo nyaka. . . . Noko ke, zisekho iimeko nemikhwa ekusafuneka kuphuculwe kuyo.” Emva kwenye indibano kwachazwa ukuba babebaninzi abanxibe ngokungandilisekanga. Le ngxelo yachaza ukuba isinxibo sabathile sasikhubekisa kwabanye. Nabanye abantu bangaphandle basiphawula esi sinxibo singandilisekanga. Iimpahla zabanye zaziveza umzimba yaye zibabamba ngokugqithileyo.

²⁰ Inkoliso yabazalwana noodade yayinxibe iimpahla ezindilisekileyo nezihloniphekileyo ngoxa ikwindawo enendibano. Noko ke, emva koko, kwiihotele nakwiivenkile zokutyela, abanye abazalwana noodade, ababesazifakile iibheji zabo, babenxibe “iihempe ezingandilisekanga, iidenim ezindala, ooshoti abancinci, . . . iimpahla zefashoni ezingabafanelanga abantu bakaThixo.” Ukuba abadala baphawula ukuba bakho abanomkhwa wokunxiba ngolu hlobo xa bezonwabele, kuya kuba kuhle ukuba babaluleke ngobubele kodwa babe ngqongqo ngaphambi kwendibano ukuba isinxibo esinjalo asifanelekanga, ngokukodwa kubantu abaye endibanweni yamaKristu. Ncedani nihlolisise nezifundo zenu zeBhayibhile eziya kubakho endibanweni ulwalathiso olungehambo nesinxibo esichazwe ngasentla.

²¹ Iihotele: Nyaka ngamnye kwenziwa unako nako wokufumana indawo enamaxabiso ancitshisiweyo ukuze kungabikho udlekayo emalini. Ncedani ningalibali ukuba nomonde nize nibe nobubele xa niqhubana nabasebenzi basehotele. Sisenokuba sidinwe luhambo babe bona becothisa, kodwa umonde wenu awuyi kuba lilize. Kwakhona simele singalibali ukubapha okuthile ngendlela yasekuhlaleni.​—⁠IAwake! kaJune 22, 1986.

²² Iikhamera Nezixhobo Zokurekhoda: Kufanelekile ukuba sinikhumbuze ngobubele ngeekhamera nezixhobo zokurekhoda. Ncedani nikhumbule, ukuba niceba ukusebenzisa iikhamera, iikhamera zevidiyo, okanye naziphi na izixhobo zokurekhoda, bacingeleni abanye abakhoyo. Ukuhla unyuka ebudeni bocwangciso okanye kwanokurekhoda usesihlalweni sakho kusenokubaphazamisa abanye. Akukho sixhobo sokurekhoda sifanele sixokonyezelwe kumbane okanye kwisandisi-lizwi, yaye ezi zixhobo azifanele zivale indlela. Ngumbandela wobuqu ukufota okanye ukurekhoda iinxalenye ezithile zocwangciso ngekhamera yevidiyo okanye ngesidlali-zikhasethi. Imifanekiso nezinto ezirekhodiweyo zisenokukukhumbuza amava amyoli xa uzibuka kamva. Zonke ezo zinto zifanele zisetyenziswe ngononophelo, ngendlela engaphazamisi abanye okanye ekwenza ungangenelwa kucwangciso. Wakuba ubuyele ekhaya, ngaba uya kuba nalo ixesha lokuphulaphula ezo zinto uzirekhodileyo? Usenokufumanisa ukuba ukubhala amanqaku kuya kwanela.

²³ Izihlalo: KwiNdibano YeSithili “Yokoyika UThixo” yowe-1994, ngaba uphawule ukuphucula ekugcinweni kwezihlalo? Noko kuye kwaphuculwa, kodwa kusafuneka singakulibali oku: IZIHLALO ZISENOKUGCINELWA KUPHELA AMALUNGU ENTSAPHO YAKHO NABASENOKUBA BAHAMBA NAWE KWINQWELO-MAFUTHA YAKHO. Size njengeendwendwe zoMbutho. Irenti yendawo enendibano ihlawulwe ngeminikelo yokuzithandela. Ngaba bekuya kuba luthando nolwazelelelo ukugcina isihlalo esingaqinisekanga ukuba siya kuba nomntu? Silusizi ukuba asiyi kukwazi ukwamkela izicelo zabo bafuna iindawo okanye amagumbi asecaleni ngenxa yokungalungelwa yimekobume ethile, njengokuguliswa zizinto ezithile.

²⁴ Kwindibano nganye ayenziwa amalungiselelo abo baneentswelo ezikhethekileyo, njengabalupheleyo nabaneziphene. Ncedani niqinisekise ukuba anihlali kwizihlalo ezikula macandelo ukuba anifaneleki. Kwakhona, kuphapheleni ukunceda abo baneentswelo ezikhethekileyo bafumane izihlalo ukuba akukho mntu ubanyamekelayo.

²⁵ Ukunyamekela Iintswelo Zakho Zokutya: Njengokuba nisazi, Ubulungiseleli Bethu BoBukumkani bukaJulayi 1995 benza esi saziso: “Ukususela ngoSeptemba 1995 kwiindibano zesiphaluka neendibano ezikhethekileyo zosuku olunye nakwiNdibano YeSithili ‘Yabadumisi Abanovuyo’ yokuphela kwalo nyaka, akuzi kubakho lungiselelo lokutya. Ngamnye uya kuza nokutya nesiselo sakhe.” Saza isihlomelo soBulungiseleli Bethu BoBukumkani bukaSeptemba 1995 sacacisa isizathu sokuba kwenziwe olu hlengahlengiso saza sanikela amacebiso amahle angendlela ngamnye anokuzinyamekela ngayo iintswelo zokutya kwakhe endibanweni. Kungakuhle ukuba bonke banganeli nje ukuzihlolela eso sihlomelo kodwa basixubushe nezifundo zabo zeBhayibhile njengokuba belungiselela ukuya endibanweni. Kubalulekile ukuba abafundi beBhayibhile baziswe ukuba bonke abakhoyo bafanele beze nokutya nesiselo sabo endibanweni. Kwakhona khumbulani ukuba abeze endibanweni abafanele beze nezitovu zegesi okanye iiprayima kwiindawo abalala kuzo okanye kwindawo enendibano ekubeni ziya kubangela ingozi yomlilo. Sikhuthaza bonke basithobele ngentliziyo iphela esi sicelo. Abalindi abasendibanweni nabo banyamekela iindawo zokulala baya kuba ngqongqo gqitha ngalo mbandela.

²⁶ Masibethelele nje iingongoma ezithile, kuya kufuneka nikhumbule ezi zinto zicetyisiweyo zesidlo sasemini: ukutya okulula okunesongo okufana noko kudla ngokuphathwa ngabantu emsebenzini, njengamaqebengwana, iziqhamo eziqwayitiweyo, iinuts, izinto ezibhakiweyo neziqhamo. Iziselo zisenokuquka iikofu, iziselo ezibandayo, iziselo ezenziwe ngencindi yeziqhamo, okanye amanzi asebhotileni, kwizinto ezingophukiyo okanye iiflaski. Ukuba kufuneka niphathe iimantyi, zamkelekile ukuba ziza kungena phantsi kwesihlalo. Noko ke, iimantyi ezinkulu zepikiniki, iziselo ezinxilisayo, okanye izinto zegilasi azimele ziziswe kwindawo enendibano. Ukutya ebudeni bocwangciso kufanele kuphetshwe. Oku kuya kubonisa ukungasihloneli isidlo sokomoya esilungiselelweyo.

²⁷ Esinye isilumkiso kukuba akumele kuphekwe kumagumbi asehotele ngaphandle kokuba kukho igumbi lokuphekela. Kuhle ukuqwalasela ukuba ixesha lesidlo sasemini lilungiselelwe ukuba sidle nje ukutya okulula size sinandiphe ukunxulumana nabazalwana noodade wethu. Njengabantu bakaYehova, siyaqonda ukuba ukudla kokomoya endibanweni kubaluleke gqitha xa kuthelekiswa nezinto eziphathekayo, ibe sifanele sicebe sicinga ngolo hlobo.

²⁸ NgoNovemba 24, 1995, kuza kuqalisa iNdibano YeSithili “Yabadumisi Abanovuyo” yokuqala. Ngaba sele uwaqoshelisile amalungiselelo akho, yaye ngaba ngoku ukulungele ukunandipha iintsuku ezintathu zonxulumano olonwabisayo nezinto ezilungileyo zokomoya? Sithandaza ngokunyanisekileyo kuYehova ukuba asikelele imigudu yakho yokubakho kwindibano yeli hlobo nabazalwana noodade wenu njengokuba sixubusha ngendlela yokuba ngabadumisi abanovuyo bakaYehova.

[Box on page 10]

Emasikukhumbule NgeNdibano YeSithili

Ubhaptizo: Abaza kubhaptizwa bafanele babe kwiindawo zabo ngaphambi kokuqalisa kocwangciso ngentsasa yosuku lwesibini. Kuphawulwe ukuba abanye banxiba impahla engandilisekanga nengasifanelanga eso sihlandlo. Ngamnye oceba ukubhaptizwa ufanele eze nempahla yokuqubha endilisekileyo netawuli. Emva kwentetho yobhaptizo nomthandazo wesithethi, usihlalo wocwangciso uya kunikela imiyalelo emifutshane kwabaza kubhaptizwa aze abize ingoma. Emva komgca wokugqibela, abalindi baya kwalathisa abaza kubhaptizwa indawo yokuntywilisela. Ekubeni ubhaptizo olungumfuziselo wokuzahlulela komntu lungumbandela wobuqu womntu lowo noYehova, alikho ilungiselelo lokubhaptizwa njengamaqabane apho ababhaptizwayo ababini okanye ngaphezulu bagonanayo okanye babambane ngezandla xa bebhaptizwa.

Amaqweqwe Eebheji: Ncedani nifake iqweqwe lebheji lowe-1995 endibanweni nasendleleni eya nebuya kwindawo enendibano. Oku kudla ngokusenza sikwazi ukunikela ubungqina obuhle ngoxa siseluhambeni. Amaqweqwe eebheji nezingxobo zawo nifanele niwafune ebandleni lenu, ekubeni engayi kubakho endibanweni. Ningalibali ukuphatha iqweqwe lenu eliyiAdvance Medical Directive/Release. Amalungu entsapho yaseBheteli noovulindlela bafanele baphathe amaqweqwe abo ofaniso.

Amagumbi: Sicela intsebenziswano yabo bonke abasebenzisa indawo elungiselelwe endibanweni. Oonobhala bamabandla bafanele baqinisekise ukuba iifomu zeZicelo Zamagumbi zithunyelwa ngokukhawuleza kwikhelingi echanileyo yendibano. Ukuba akuzi kuphumelela kwindawo oyilungiselelwe liSebe Lamagumbi, ufanele ngokukhawuleza wazise umninimzi okanye ihotele neSebe Lamagumbi lendibano ukuze elo gumbi linikwe omnye umntu. Kwezinye iindibano kuya kusiba nzima ukufumanela indawo abaninzi abeze endibanweni. Siyaqonda ukuba amakhaya amaninzi mancinane, sekunjalo sikhuthaza iintsapho zamkele abeze endibanweni emakhayeni azo.

Iinqwelana Zabantwana (Iiprem): Kwiindawo ezininzi, iinqwelana zabantwana azinakusetyenziswa kwiindibano zikawonke wonke. ISebe Lomlilo lincomela ukuba kungaziwa nezi nqwelana kumabala endibano zize zimiswe ezipasejini naphakathi kwezihlalo. Ekubeni abantu abaninzi besenokuxinana, ezi nqwelana zabantwana zisenokuba yingozi kungekuphela nje kusana kodwa nakumntu onokukhubeka kuzo. Ngoko ncedani ningezi nazo kwiholo enendibano. Noko ke, izihlalo zeentsana okanye ezo zilungiselelwe iinqwelo-mafutha zamkelekile, ekubeni zisenokubotshelelwa ezihlalweni ecaleni kwabazali. Intsebenziswano yenu kulo mbandela iyaxatyiswa.

Inkonzo Yamatsha-ntliziyo: Ngaba ungabekela ecaleni ixesha elithile endibanweni ukuze uncedise kwelinye lamasebe? Ukukhonza abazalwana bethu, kwanokuba ziiyure ezimbalwa, kunokuba luncedo gqitha kuze kusanelise ngokwenene. Ukuba unganceda, nceda uye kwiSebe Lenkonzo Yamatsha-ntliziyo endibanweni. Abantwana abangaphantsi kweminyaka eli-16 nabo banokuba negalelo elihle ngokusebenza phantsi kolwalathiso lwabazali okanye omnye umntu omkhulu onenkathalo.

Izilumkiso: Ngokuhlala siphaphele iingxaki ezisenokuvela, sinokuphepha ubunzima obungeyomfuneko. Amasela nabantu abangaqondakaliyo badla ngokuxhaphaza abantu abasuka kude namakhaya abo. Qiniseka ukuba inqwelo-mafutha yakho itshixiwe ngamaxesha onke, ibe ungaze ushiye nantoni na ibonakala enokutsala umntu aqhekeze. Amasela nabakhuthuzi bathanda indawo enabantu abaninzi. Akuyi kuba bubulumko ukushiya izinto zakho ezixabisekileyo esihlalweni. Akunakuqiniseka ukuba wonke umntu okhoyo ngumKristu. Kutheni ubahenda? Sifumene iingxelo zamalinge abantu bangaphandle okuba abantwana. ABANTWANA BAKHO MABAHLALE BEPHAMBI KWAKHO NGAMAXESHA ONKE.

Oomabonwakude ababukelwa kwiindawo ezithile badla ngokubonisa imifanekiso eshukumayo engamanyala nengcolileyo. Wulumkele lo mgibe, yaye ungavumeli abantwana bakho babukele umabonwakude kwezi ndawo bodwa.

Ncedani ningatsaleli umnxeba abaphathi bendawo eza kuba nendibano nifuna inkcazelo ngayo nayiphi na imicimbi yendibano. Ukuba loo nkcazelo ayifumaneki kubadala, ngoko bhalelani iKomiti yeNdibano emva kokuba nifumene ikhelingi yayo kunobhala webandla.

Iindawo ZeNdibano YeSithili Yowe-1995

Novemba 24-⁠26:

EST. HELENA (isiNgesi) Kingdom Hall

Disemba 8-⁠10:

EMPANGENI (isiZulu) University of Zululand

EWINDHOEK (isiBhulu/isiNgesi, isiKwanyama) Windhoek Showgrounds

Disemba 9, 10:

ETHOHOYANDOU (isiVenda) University of Venda

Disemba 15-⁠17:

EGABORONE (isiNgesi, isiTswana) National Stadium

ELEBOWAKGOMO (isiPedi) Lebowakgomo Showgrounds

EMAFIKENG (isiTswana) University of Bophuthatswana

ENEWCASTLE (isiZulu) K.R. Rumelin Stadium

ENKOWANKOWA (isiTsonga) Nkowankowa Sports Stadium

EONGWEDIVA (isiKwanyama) Ongwediva College of Education

EMTHATHA (isiXhosa) Unitra Stadium

Disemba 23-25 (NgoMgqibelo-NgoMvulo):

EGCUWA (isiXhosa) APB Factory

DURBAN (isiZulu) Kings Park Soccer Stadium

EMONTI (isiNgesi) Basil Kenyon Stadium

EMONTI (isiXhosa) Mdantsane Stadium

ERHAWUTINI (isiNgesi, isi- Phuthukezi, iNtetho Yezandla)a Gosforth Park Racecourse

KANYAMAZANE (isiZulu) KaNyamazane Stadium

EKOKSTAD (isiXhosa) Kokstad Showgrounds

EMGUNGUNDLOVU (isiZulu) Royal Agricultural Showgrounds

ESOWETO (isiSuthu, isiZulu) Orlando Stadium

ESPRINGS (isiSuthu, isiZulu) Pam Brink Stadium

Disemba 30, 1995– Januwari 1, 1996 (NgoMgqibelo-NgoMvulo):

EBOTSHABELO (isiSuthu) Botshabelo Sports Stadium

EKAPA (isiBhulu, isiNgesi, iNtetho Yezandla) Bellville Cycle and Athletic Stadium

EKAPA (isiXhosa) Lingelethu Sports Stadium, Khayelitsha

ETHEKWINI (isiNgesi) Kings Park Soccer Stadium

EGARANKUWA (isiPedi/isiSuthu/ isiTswana, isiZulu) Odi Sports Stadium, Mabopane

KWAMANZINI (isiNgesi, isiZulu) Trade Fair Centre

EMASERU (isiSuthu) National Stadium

EBHAYI (isiBhulu, isiNgesi) Boet Erasmus Stadium

EBHAYI (isiXhosa) Centenary Hall, New Brighton

EPITOLI (isiBhulu, isiNgesi) Loftus Versfeld

EWELKOM (isiBhulu, isiNgesi) Welkom Agricultural Showgrounds

Ncedani niphawule: Ekubeni amanye amabala endibano engagqunywanga ngokwaneleyo kusenokufuneka isitulo esisongwayo neambrela. IKomiti YeNdibano iya kunikela iinkcukacha ezibhekele phaya.